armeniasputnik.am:  ՀՀ վարչապետ Նիկոլ Փաշինյանի որդու` Աշոտ Փաշինյանի առևանգման գործով անջատված մաս կա, որը վերաբերում է մայիսի 17-ին դատարանի բակում ներկա գտնված մյուս ծնողներին։ Sputnik Արմենիայի հետ զրույցում տեղեկությունը հայտնեց առևանգման գործով մեղադրվող Գայանե Հակոբյանի փաստաբան Հովսեփ Սարգսյանը։ Նա նշեց, որ տեղյակ չէ, թե ինչ է արվել այս ուղղությամբ, քանի որ քրեական վարույթով որպես պաշտպան ներգրավված չէ։

«Մենք ստացել ենք այդ մասին համապատասխան որոշումը։ Բայց որքան իրազեկված եմ, մեղադրանք էլ չկա ու չի էլ կարող լինել։ Ախր այդտեղ ի՞նչ է տեղի ունեցել, որ 1 բաժակ ջրում փոթորիկ են բարձրացրել»,- նշեց Սարգսյանը։

Նա հավելեց, որ չի հասկանում այն ամենը, ինչ կատարվում է այս պահին։ Որպես մտահոգ մարդ անհեթեթ է համարում իրավապահների այս ջանասիրությունը` մեր երկրում եղած բազմաթիվ խնդիրների, 1 տոննա կոկաինի և այլ հարցերի կողքին հուզված կնոջ քայլերի հետևից ընկնելը։

«Ախր ընդամենն ասել է` գնանք Եռաբլուր, տես, թե ինչ տղերք են էնտեղ պառկած։ Ես 52 տարեկան եմ և իմ կյանքի 30 տարիները նվիրել եմ ՀՀ երրորդ հանրապետության պետականաշինությանը, բայց ես այսպիսի վայրենություն չեմ տեսել։ Մեկ բաժակ ջրի փոթորկից հիմա էլ անցել են երկրորդ բաժակ ջրին»,– նշեց փաստաբանը` անդրադառնալով մյուս ծնողներին վերաբերող անջատված մասին։

Հիշեցնենք` մայիսի 17-ին տեղեկություն տարածվեց, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Վերջինս հաղորդում էր ներկայացրել ոստիկանություն, որից հետո ՀՀ քննչական կոմիտե քրեական գործ հարուցեց մարդուն առևանգելու հոդվածով, կալանավորվեց մեկ անձ` Գայանե Հակոբյանը։

Հունիսի 5-ին հայտնի դարձավ, որ զոհված զինծառայողի մոր խափանման միջոցը փոխվել է, ընտրվել է տնային կալանքը։ Սակայն նույն օրը Երևանի ընդհանուր իրավասության քրեական դատարանի դատավոր Մանվել Շահվերդյանը որոշեց տնային կալանքը փոխարինել 1 ամիս 15 օր կալանքով։