azatutyun.am: Ադրբեջանի արտգործնախարար Ջեյհուն Բայրամովը հայաստանցի պաշտոնակցի հետ վերջին բանակցությունների արդյունքները «դրական» է գնահատել՝ հրաժարվելով, սակայն, մանրամասներ հայտնել։

«Ինչ վերաբերում է խաղաղության պայմանագրի շուրջ բանակցություններին՝ ասեմ, որ փետրվարից ինտենսիվ բանակցությունները վերսկսվել են։ Դրանից առաջ փաստաթղթերի և պայմանների փոխանակումներ են տեղի ունեցել, բայց դեմ առ դեմ հանդիպում չեղավ, թեև գործընթացը շարունակվեց Մյունխենում, Բեռլինում և Ալմաթիում։ Վերջին հանդիպման ընթացքում մեծ քննարկում է տեղի ունեցել։ Թեև չեմ էլ ուզում մանրամասնել, այդ բանակցությունները դրական եմ գնահատում»,- ԵԱՀԿ-ի գործող նախագահ, Մալթայի արտգործնախարար Իեն Բորջի հետ Բաքվում կայացած հանդիպմանը հայտարարել է Ադրբեջանի արտգործնախարարը։

Ըստ Բայրամովի, երկրների միջև խաղաղության համաձայնագիրը պետք է իրենից ներկայացնի մի փաստաթուղթ, որը չի ունենա բաց կետեր ու չի ներառի հարցեր, որոնք որոշ ժամանակ անց կրկին բանակցությունների թեմա կդառնան, հաղորդում է Report.az-ը:

Երևանում ապրիլի 15-ին Ղազախստանի նախագահ Կասիմ-Ժոմարտ Տոկաևը հայտարարեց, որ ողջունում են խաղաղության համաձայնագիր կնքելու Հայաստանի ու Ադրբեջանի ձգտումը։ Տոկաևը նաև ասաց, որ Ղազախստանը պատրաստ է իր հարթակը տրամադրել բանակցությունների համար՝ շեշտելով՝ հիմնական նպատակը երկու բարեկամ երկրներին մերձեցնելն է։

Գրեթե մեկ ամիս անց՝ մայիսի 10-ին, Հայաստանի և Ադրբեջանի արտգործնախարարները հանդիպեցին Ալմաթիում։ Երկու օր տևած հանդիպումից հետո կողմերը հայտարարեցին, որ Երևանն ու Բաքուն պայմանավորվել են շարունակել բանակցությունները հարցերի շուրջ, որտեղ կան տարաձայնություններ։