armenpress.am: Հայաստանի Հանրապետության վարչապետ Նիկոլ Փաշինյանին սպասում են Սանկտ Պետերբուրգում կայանալիք Անկախ պետությունների համագործակցության (ԱՊՀ) երկրների ղեկավարների ոչ ֆորմալ հանդիպմանը։

Այս մասին հայտնում է ՌԻԱ Նովոստի-ն՝ փոխանցելով ՌԴ նախագահի մամուլի խոսնակ Դմիտրի Պեսկովի խոսքերը։ 

«Նախագահը (խմբ․ ՌԴ նախագահ Վլադիմիր Պուտինը) հրավիրել է պարոն Փաշինյանին և, իհարկե, սպասում է նրան մյուս գործընկերների հետ միասին Սանկտ Պետերբուրգում ավանդական հանդիպմանը, որն, իհարկե, ոչ ֆորմալ բնույթ է կրում, բայց միևնույն ժամանակ այնտեղ կլինեն և՛ ԱՊՀ-ն, և՛ ԵԱՏՄ-ն։ Օրակարգը բավականին հագեցած է»,-նշել է Դմիտրի Պեսկովը։

Հոկտեմբերի 30-ին ԱՊՀ գլխավոր քարտուղար Սերգեյ Լեբեդևը հայտնել էր, որ դեկտեմբերի վերջին Սանկտ Պետերբուրգում տեղի կունենա ԱՊՀ երկրների ղեկավարների ոչ պաշտոնական գագաթնաժողովը։ 

ՀՀ վարչապետ Նիկոլ Փաշինյանը դեկտեմբերի 13-ին աշխատանքային այցով ժամանել է Մոսկվա, որտեղ նախագահելու է ԵԱՏՄ միջկառավարական խորհրդի նիստը։ Դմիտրի Պեսկովը հայտարարել էր, որ դեկտեմբերի 13-ին Հայաստանի վարչապետի ու ՌԴ նախագահի առանձին հանդիպում նախատեսված չէ՝ շեշտելով, որ ԵԱՏՄ միջկառավարական խորհրդի նիստի աշխատանքները երկրների վարչապետների մակարդակով են։