15:03 - 03 սեպտեմբերի, 2020
Ինֆեկցիոն հիվանդությունների ազգային կենտրոնում գործարկվել է թթվածնի նոր կայան |armenpress.am|
armenpress.am: Ինֆեկցիոն հիվանդությունների ազգային կենտրոնում սեպտեմեբերի 3-ին գործարկվել է թթվածնի նոր կայան:
Ասուլիսի ժամանակ այս մասին ասաց ՀՀ ԱՆ Ինֆեկցիոն հիվանդությունների ազգային կենտրոնի տնօրենի նորանշանակ պաշտոնակատար Հովհաննես Մադոյանը և հավելեց, որ բուժառուները թթվածինը մոտ ապագայում կստանան նոր կայանից:
«Ինֆեկցիոն հիվանդությունների ազգային կենտրոնում ընթանում են վերանորոգման աշխատանքներ: Այս պահին վերանորոգվում է 5-րդ բաժանմունքը, որը սպասարկում էր մեծահասակներին: Գրեթե ավարտված է 6-րդ բաժանմունքը, որն առաջ ծառայում էր զինվորականներին, այժմ ամբողջ հիվանդանոցը ծառայում է կորոնավիրուսով հիվանդ բուժառուներին»,- նշեց Մադոյանը:
Նրա խոսքով՝ կատարվում են նաև ընթացիկ աշխատանքներ, քանի որ նախկինում ոչ բոլոր բաժանմունքներն են նախատեսված եղել օդակաթիլային վարակների վերահսկումն ապահովելու համար:
«Նախատեսվում է այդ տարածքում կառուցել նաև նոր մասնաշենք՝ կլինի մոդեռնիզացված կառույց: Այն միմյանց կկապի «Ա» և «Բ» մասնաշենքերը: Առաջիկայում կսկսվի նաև լաբորատոր մասնաշենքի կառուցումը: Արդեն արվել են նախագծային աշխատանքները»,- ընդգծեց Ինֆեկցիոն հիվանդությունների ազգային կենտրոնի տնօրենի պաշտոնակատարը:
Մադոյանը հույս հայտնեց, որ 2021 թվականին կկարողանան սկսել այդ մասնաշենքերի կառուցման աշխատանքները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)