aysor.am: ՀՀ պաշտպանության նախարարության, ՀՀ զինված ուժերի ու հայ ժողովրդի համար պարտավորեցնող է, որպեսզի որևիցե գործողություն կատարելուց միշտ հիշենք այն սխրանքը, որը կատարել են զինծառայողները, կամավորականները ապրիլյան չորսօրյա մարտական գործողությունների ընթացքում, «Եռաբլուր» զինվորական պանթեոնում լրագրողների հետ զրույցում ասաց ՀՀ պաշտպանության փոխնախարար Գաբրիել Բալայանը։
«Որոշակի առումով այս օրն ունի նաև ամբողջ հայ ժողովրդին համախմբելու խորհուրդ՝ պատրաստ լինելու ցանկաված զարգացման, դիմագրավելու այն մարտահրավերները, որն այսօր ունենք», - ասաց նա։

Նա ընդգծեց, որ մարտահրավերների փոփոխություն որևիցե անգամ տեղի չի ունեցել։

«Կարող է մի փոքր ավելի լարվածություն լինել կամ նվազ լարվածություն, բայց, բոլոր դեպքերում, գոնե այսօր, դա չի ազդում այն մարտունակության կամ զգոնության վրա, որը առկա է Զինված ուժերում», - ասաց Գ. Բալայանը։

Նա ասաց, թե չի կիսում այն կարծիքը, որ հայական զինանոցը մերկ է։
«Փառք աստծո, մենք պարտվողի կարգավիճակով դուրս չենք եկել քառօրյա մարտական գործողություններից, այլ կարողացել ենք ցույց տալ այն ոգու խիզախությունը, այն զենքի ճշգրտությունը, որը հայոց բանակը ուներ ու հիմա ունի», - ասաց ՀՀ պաշտպանության փոխնախարարը։

Նրա խոսքով՝ վերջին մի քանի տարվա ընթացքում լրացվել է ՀՀ զինանոցը, մարտական պատրաստության աստիճանը բերվել է շատ ավելի զգոն վիճակի։