16:49 - 30 հունվարի, 2022
ՀՀ մասնակցությունը նման ցուցահանդեսներին կարևոր է երկրի ճանաչելիության բարձրացման համար. Վահան Քերոբյանը՝ «Expo 2020 Dubai»-ի մասին
Այսօր «Expo 2020 Dubai» համաշխարհային ցուցահանդեսում մեզ համար կարեւոր օր է. ՀՀ պետական օրհներգի ներքո հայկական եռագույնի բարձրացման արարողությամբ առավոտյան մեկնարկեց Հայաստանի Ազգային օրը։ Այս մասին ֆեյսբուքյան իր էջում գրառում է կատարել էկոնոմիկայի նախարար Վահան Քերոբյանը։
«Ազգային օրվա պաշտոնական բացման իմ ելույթում կարեւորել եմ աշխարհում գիտության, մշակույթի եւ տեխնոլոգիաների զարգացման գործում հայ գիտնականների եւ նորարարների անգնահատելի ներդրումը՝ ներկայացնելով նորարարություններ, որոնք բեկումնային են եղել մարդկության առաջընթացի համար։
Ընդգծել եմ Հայաստանի գործարար եւ ներդրումային միջավայրի գրավչությունները, առանձնացրել հատկապես տնտեսության այն ոլորտները, որոնք կարող են առավել գրավիչ լինել օտարերկրյա ներդրողների համար։
Հայաստանի մասնակցությունը նման մեծամասշտաբ ցուցահանդեսներին կարեւոր է երկրի ճանաչելիության բարձրացման, նոր համագործակցությունների հաստատման եւ դիվանագիտական հարաբերությունների ամրապնդման տեսանկյունից»,-նշված է գրառման մեջ։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)