Խոշտանգումների մասին հայտնել են գրեթե բոլոր վերադարձած գերիները. ՄԻՊ |armenpress.am|
13:11 - 07 հոկտեմբերի, 2022

Խոշտանգումների մասին հայտնել են գրեթե բոլոր վերադարձած գերիները. ՄԻՊ |armenpress.am|

armenpress.am: Մարդու իրավունքների պաշտպանի աշխատակիցները հոկտեմբերի 6-ին առանձին հանդիպումներ ու զրույցներ են ունեցել ՀՀ վերադարձած 17 գերիներից 16-ի հետ, որից հետո կներկայացնեն առանձին զեկույց, որտեղ կարձանագրվեն բոլոր այն փաստական տվյալները, որոնք հայտնել են տղաները:

Այս մասին լրագրողների հետ հանդիպման ժամանակ հայտնեց ՀՀ մարդու իրավունքների պաշտպան Քրիստիննե Գրիգորյանը։

Նա նշեց նաև, որ անգամ բժիշկների կողմից են վատ վերաբերմունքի արժանացել հայ զինծառայողները։

«Մեկ տղա կա, որն այս պահին հոսպիտալում է գտնվում, նրա հետ այսօր առանձնազրույց կունենանք։ Մենք առանձին զեկույց կունենանք, որի միջոցով կարձանագրենք այն փաստական տվյալները, որոնք հայտնել են տղաները։ Այդ հարցազրույցներով մենք վեր ենք հանել փաստեր խոշտանգումների, վատ վերաբերմունքի, նվաստացումների վերաբերյալ»,–ասաց Գրիգորյանը՝ հավելելով, որ խոշտանգումների մասին հայտնել են գրեթե բոլոր գերիները։

Նրա խոսքով՝ 2020-ի 44-օրյա պատերազմից հետո հայրենիք վերադարձած գերիների հետ նույնպես առանձնազրույց էին ունեցել և առանձին զեկույց են հրապարակել։ Գրիգորյանը նշեց, որ ադրբեջանական կողմի ձեռագիրը չի փոխվել։

«Անգամ զինվորական հոսպիտալում, երբ անձը գտնվել է բժշկական խնամքի ներքո, իր նկատմամբ եղել է վատ վերաբերմունք, որը դրսևորվել է մի քանի ձևերով, օրինակ՝ առանց ցավազրկելու միջամտություններ կատարելն այն դեպքերում, երբ պետք է կատարել ցավազրկումով՝ վիրահատություն, վերքերը կարելու, բուժման պրոցեսի միջամտություններն են, որոնք բժշկական պրոտոկոլներով ենթակա են ցավազրկման»,- նշեց նա՝ հավելելով, որ վատ վերաբերմունք է եղել նաև վերբալ հոգեբանական ճնշումների տեսքով։

Մարդու իրավունքների պաշտպանը հավելեց, որ զեկույցը կներկայացնեն միջազգային կառույցներին։


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել