Էդվարդ Ասրյան

Ազդարարվել է «Արծիվ գործընկեր-2024» հայ-ամերիկյան համատեղ զորավարժության մեկնարկը

15:08 - 15 հուլիսի, 2024

ԶՈՒ ԳՇ պետը Ֆրանսիայի ցամաքային զորքերի հրամանատարի հետ քննարկել է համագործակցության զարգացմանն առնչվող հարցեր

ՀՀ պաշտպանության նախարարի առաջին տեղակալ, ԶՈՒ գլխավոր շտաբի պետ, գեներալ-լեյտենանտ Էդվարդ Ասրյանը Գերմանիայում ընթացող Եվրոպայի ցամաքային զորքերի հրամանատարների համաժողովի շրջանակում հանդիպում է ունեցել Ֆրանսիայի ցամաքային զորքերի հրամանատար, գեներալ Պիեր Շիլլի հետ։ Այս մասին տեղեկացնում են ՀՀ ՊՆ-ից: Քննարկվել են համագործակցության հետագա զարգացմանն առնչվող հարցեր, մասնավորապես՝ փորձի փոխանակման և անձնակազմի պատրաստության ուղղություններով: Ձեռք են բերվել պայմանավորվածություններ համագործակցությունն առավել զարգացնելու ուղղությամբ։

16:25 - 11 հունիսի, 2024

ԶՈՒ ԳՇ պետը մասնակցել է Խաղաղապահի միջազգային օրվան նվիրված հանդիսավոր արարողությանը

Մայիսի 29-ին ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը բարձրաստիճան մի շարք զինվորականների ուղեկցությամբ այցելել է ՀՀ ՊՆ խաղաղապահ ուժերի բրիգադ, մասնակցել Խաղաղապահի միջազգային օրվան նվիրված հանդիսավոր արարողությանը։ ՀՀ ՊՆ-ից տեղեկացնում են, որ միջոցառմանը ներկա էին նաև ՀՀ-ում հավատարմագրված օտարերկրյա մի շարք դեսպանությունների ռազմական կցորդներ։ «Անդրադարձ կատարելով բրիգադի անցած ուղուն և միջազգային ասպարեզում հայ խաղաղապահների երկարամյա ծառայությանն ու պատվաբեր առաքելությանը՝ գեներալ-լեյտենանտ Էդվարդ Ասրյանը շնորհավորել է զինծառայողներին մասնագիտական տոնի կապակցությամբ՝ ընդգծելով, որ խաղաղարար առաքելություն իրականացնող հայ զինծառայողները մշտապես աչքի են ընկել իրենց պատրաստվածության աստիճանով, կամային ու մասնագիտական բարձր որակներով՝ արժանանալով վերադաս ղեկավարության ու արտերկրի բարձրաստիճան զինվորականների գովեստին ու պարգևներին։ Շնորհակալություն հայտնելով բարեխիղճ ծառայության համար՝ Էդվարդ Ասրյանը նաև համոզմունք է հայտնել, որ հայ խաղաղապահները հետայսու ևս միջազգային հարթակում մասնագիտական պատրաստվածությամբ բարձր կպահեն ՀՀ զինված ուժերի պատիվը՝ իրենց արժանի մասնակցությունն ունենալով աշխարհում խաղաղության պահպանման կարևորագույն գործում։ Խաղաղապահի միջազգային օրվան նվիրված միջոցառումը եզրափակվել է զինծառայողների հանդիսավոր քայլերթով»,- ասված է հաղորդագրության մեջ։

20:15 - 29 մայիսի, 2024

Վստահ եմ, որ դրանք ՀՀ դե-յուրե տարածքներ չէին․ ԳՇ պետը՝ Տավուշի հատվածում սահմանազատման մասին |armenpress.am|

armenpress.am: Զինված ուժերի գլխավոր շտաբի պետ Էդվարդ Ասրյանը վստահեցնում է, որ Հայաստանի և Ադրբեջանի միջև Տավուշի հատվածում սահմանազատման արդյունքում Ադրբեջանի վերահսկողության տակ անցած տարածքները դե-յուրե Հայաստանի տարածք չեն եղել։ ԶՈՒ ԳՇ պետն այս մասին ասաց խորհրդարանում լրագրողների հետ ճեպազրույցում։ Նա նշեց, որ ներկայում սահմանի այդ հատվածում սահմանապահներն իրականացնում են ծառայություն, բայց տվյալ ուղղություններում զինված ուժերն ունեն կանոնավոր ստորաբաժանումներ, որոնք պատրաստ են իրենց առջև դրված խնդիրները կատարել։ «Վստահ եմ, որ դրանք ՀՀ դե-յուրե տարածքներից չէին։ Ես չեմ այդպես պնդում, դա պնդում է սահմանը, որը արտացոլված է մեր քարտեզների վրա»,- ասաց Ասրյանը։ 2024 թվականի մայիսի 24-ից Հայաստանի Հանրապետության Ազգային անվտանգության ծառայության սահմանապահ զորքերը ստանձնել են Հայաստանի Հանրապետության պետական սահմանի Տավուշի մարզի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ սահմանազատված հատվածների պահպանությունը։ Պետական սահմանի Կիրանց բնակավայրի 5,8 կմ սահմանազատված հատվածի պահպանությունը, մինչև 2024 թվականի հուլիսի 24-ը, կիրականացվի անցումային սխեմայով:

17:22 - 29 մայիսի, 2024

Էդվարդ Ասրյանը հետևել է ռազմավարական հրամանատարաշտաբային զորավարժությանը

Մայիսի 16-ին ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը հետևել է ռազմավարական հրամանատարաշտաբային զորավարժության հերթական փուլին։ Այդ մասին հայտնում են ՀՀ ՊՆ-ից: Զորատեսակների հրամանատարները, ծառայությունների պետերը և զորավարժության պատասխանատուները ԶՈՒ գլխավոր շտաբի պետին զեկուցել են իրականացված մի շարք գործողությունների մասին, ներկայացրել են խաղարկվող սցենարները, ընդգծել զորատեսակների ներդաշնակման ու առաջադրանքների կատարման արդյունավետությունը: Զորավարժության շրջանակում առանձնացվել են հարձակվող ու պաշտպանվող կողմեր, և ստորաբաժանումների հրամանատարները տեղում ընդունել են որոշումներ՝ անձնակազմի գործողությունները կազմակերպելու համար։ Էդվարդ Ասրյանը համապատասխան ցուցումներ է տվել զորատեսակների հրամանատարներին՝ զորքերի կազմակերպված տեղաշարժի, համապատասխան շրջաններում բացազատման, դիրքավորման և անվտանգության կանոնները խստորեն պահպանելու վերաբերյալ։

21:22 - 16 մայիսի, 2024

ԶՈՒ ԳՇ պետ Էդվարդ Ասրյանը բացառապես ՀՀ քաղաքացի է. ՀՀ ՊՆ

ՀՀ ՊՆ-ից տեղեկացնում են, որ սոցիալական ցանցերի որոշ օգտատերեր կեղծ և մանիպուլյատիվ բնույթի տեղեկություններ են շրջանառում ՀՀ պաշտպանության նախարարի 1-ին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանի՝ ՌԴ քաղաքացի լինելու վերաբերյալ: Անհարկի շահարկումներ են նաև նրա ընտանիքի անդամների՝ միայն ՌԴ քաղաքացի լինելու մասին լուրերը: «ԶՈՒ ԳՇ պետ Էդվարդ Ասրյանը բացառապես ՀՀ քաղաքացի է, իսկ նրա կինը՝ ազգությամբ ռուս, ուստի երեխաները ծննդյան բերումով երկքաղաքացի են: ԳՇ պետի կինն ու երեխաները ոչ միայն ունեն ՀՀ քաղաքացիություն, այլև 2006 թվականից մշտապես բնակվում են Հայաստանի Հանրապետությունում: ԳՇ պետի որդին զինապարտ է և ներգրավված է ՀՀ ԶՈՒ 2024 թվականի զորակոչային միջոցառումներին»,- ասված է ՊՆ-ի տարածած հաղորդագրության մեջ:

15:35 - 14 մայիսի, 2024

Սուրեն Պապիկյանը հետևել է ԶՈՒ բարձրագույն և ավագ սպայական կազմերի ատեստավորման գործընթացին

Ապրիլի 16-ին ՀՀ ԶՈՒ բարձրագույն և ավագ սպայական կազմերի ատեստավորմանը ներգրավված զինծառայողները ֆիզիկական պատրաստություն առարկայի քննության շրջանակում ստուգարք են հանձնել մեկ կիլոմետր վազք վարժաձևից։ Այս մասին տեղեկացնում են ՀՀ ՊՆ-ից: Քննության ընթացքին հետևել են ՀՀ պաշտպանության նախարար Սուրեն Պապիկյանն ու ատեստավորման հանձնաժողովի նախագահ, պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը։

15:03 - 16 ապրիլի, 2024

Պաշտպանության ոլորտում համագործակցության շրջանակում ԱՄՆ հրահանգիչների խումբն այցելել է Հայաստան

Պաշտպանության ոլորտում ՀՀ-ԱՄՆ համագործակցության շրջանակում ապրիլի 1-ին ԱՄՆ շարժական հրահանգիչների խումբն այցելել է Հայաստանի Հանրապետություն: Այս մասին տեղեկացնում են ՀՀ ՊՆ-ից: ՊՆ վարչական համալիրում ապրիլի 1-5-ը հրահանգիչները ՊՆ տեղեկատվության և հասարակայնության հետ կապերի վարչության և «Զինուժ Մեդիա» պետական հիմնարկի ծառայողների հետ անցկացնելու են հանրային կապերի և հաղորդակցության ոլորտում փորձի փոխանակման վարժանքներ: Ծրագրի մեկնարկին խոսքով հանդես է եկել ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը։

14:02 - 01 ապրիլի, 2024

«Մենք հող հանձնող չենք»․ ԶՈՒ ԳՇ պետ |azatutyun.am|

azatutyun.am: Եթե հասկանում եք, թե ինչ է պատերազմը, պատերազմը կարող է լինել մեկ ժամ հետո, երկու ժամ հետո, երեք ժամ հետո, մեկ տարի հետո, երկու տարի հետո, հինգ տարի հետո, այսօր լրագրողների հարցին ի պատասխան ասաց Զինված ուժերի գլխավոր շտաբի պետ Էդվարդ Ասրյանը։ Լրագրողի հարցին, թե ինչպե՞ս է հասկացել Ոսկեպարում վարչապետ Նիկոլ Փաշինյանի հայտարարությունը, որ «եթե հողերը չհանձնենք պատերազմ կլինի», Ասրյանը պատասխանեց․ - «Մենք հող հանձնող չենք»։ Անցած շաբաթ Տավուշի մարզում Ոսկեպարի, Բաղանիսի ու հարակից բնակավայրերի բնակիչների հետ հանդիպման ժամանակ վարչապետ Նիկոլ Փաշինյանը հայտարարեց՝ Երևանի քաղաքականությունն է պատերազմ թույլ չտալը և հենց սա է, ըստ գործադիրի ղեկավարի, պատճառը, որ պետք է գնան այս հատվածներում ՀՀ սահմանի ճշգրտման։ Բաքուն պահանջում է անհապաղ իրեն վերադարձնել Տավուշի մարզի և Ղազախի շրջանի սահմանագծին գտնվող չորս գյուղերի տարածքները։ Ադրբեջանի պահանջած 4 գյուղերը՝ Բաղանիս Այրումը, Աշաղը Ասքիփարան, Խեյրիմլին և Ղըզըլհաջիլին, ըստ Փաշինյանի, դե յուրե Հայաստանի տարածքում չեն՝ Ալմա-Աթայի հռչակագրի համաձայն։

14:20 - 25 մարտի, 2024

Նրա դիվերսանտ լինել-չլինելու հարցը որոշվում է Քննչական կոմիտեում. ԳՇ պետը ադրբեջանցի զինծառայողին վերադարձնելու մասին |news.am|

news.am: Դա Զինված ուժերի գլխավոր շտաբի պետի պարտականությունը չէ: Այս մասին, այսօր՝ մարտի 5-ին, «Եռաբլուր» պանթեոնում, լրագրողների հետ զրույցում նշեց Հայաստանի ԶՈՒ գլխավոր շտաբի պետ, գեներալ-լեյտենանտ Էդվարդ Ասրյանը՝ անդրադառնալով հարցին, թե ինչպես է գնահատում փաստը, որ ադրբեջանցի զինծառայողին Հայաստանը որպես բարի կամքի դրսեւորում որոշել է վեռրադարձնել Ադրբեջանին: Դիտարկմանը, որ գուցե այդ ադրբեջանցի զինծառայողը դիվերսա՞նտ է եղել, չի մոլորվել, Ասրյանն ասաց. «Եթէե ուշի-ուշով հետեւել եք, քննություն է անցկացվել համապատասխան քննչական մարմիններում եւ նրա դիվերսանտ լինել-չլինելու հարցը որոշվում է հենց քննչական կոմիտեում կատարված գործառույթների արդյունքում»: հարցին՝ ինչ-որ բանի դիմա՞ց է ադրբեջանցի զինծառայողը տրվում Ադրբեջանին, նա արձագանքեց. «Դա ԳՇ պետի գործառույթը չէ»: Ավելի վաղ քննչական կոմիտեն հայտնել էր, որ Ադրբեջանի ԶՈՒ զինծառայողի նկատմամբ հանրային քրեական հետապնդումը դադարեցվել է։ Հիշեցնենք, որ վերջինս Հայստանի սահմանը հատել էր Տեղ գյուղի սահմանի մոտ:

11:54 - 05 մարտի, 2024

Ներքին Հանդի ուղղությամբ հետաքննությունը դեռևս ավարտին չի հասել․ ԳՇ պետ |azatutyun.am|

azatutyun.am: Օպերատիվ իրադրությունը հարաբերական կայուն է, սահմանին կուտակումներ չկան, այսօր «Եռաբլուր» զինվորական պանթեոնում, լրագրողների հետ ճեպազրույցում, հայտարարեց Զինված ուժերի Գլխավոր շտաբի պետ Էդվարդ Ասրյանը։ «Ներկա դրությամբ կուտակումներ չկան, ՀՀ ԶՈՒ-ն ուշի ուշով հետևում է բոլոր միջոցներով հակառակորդի շարժերին։ Ադրբեջանի զինված ուժերի և այդպիսի կուտակումներ չկան և օպերատիվ իրադրությունը գնահատվում է հարաբերական կայուն», - ասաց Ասրյանը։ Դիտարկմանը, թե Ներքին Հանդի ուղղությամբ Ադրբեջանը մոտ 20 դիրք ունի՝ ԳՇ պետն այսպես արձագանքեց․ - «Շփման գիծն իրենից ներկայացնում է մի այնպիսի կառուցվածք որը և՛ հակառակորդի կողմից, և՛ մեր կողմից դիրքեր են տեղադրված, ու եթե հակառակորդն ունի 20 դիրք ուրեմն մենք էլ․․․ բայց քանակը չբացազատեմ», - ասաց ԳՇ պետը։ Փետրվարի 13-ի առավոտյան Սյունիքի մարզի Ներքին Հանդի հայկական դիրքերի ուղղությամբ ադրբեջանական կրակի հետևանքով հայկական կողմը 4 զոհ, 1 վիրավոր ունեցավ։ Բաքուն հայտարարեց, թե «Հատուցում» գործողություն է իրականացրել՝ մեղադրելով հայկական կողմին նախորդ օրը Ներքին Հանդի ուղղությամբ հրադադարը խախտելու և իրենց սահմանապահին վիրավորելու համար։ Նախքան ադրբեջանական կրակոցները Հայաստանի պաշտպանության նախարարության Ռազմական ոստիկանությունը հայտարարել էր, որ հայաստանցի դիրքապահների կողմից կրակ բացելու մասին տեղեկատվությունը հետաքննվում է։ «Ազատության» հարցին ի պատասխան Ասրյանն այսօր տեղեկացրեց, որ «Ներքին Հանդի ուղղությամբ հետաքննությունը դեռևս իր ավարտին չի հասել»։

11:52 - 05 մարտի, 2024

Սյունիքում կուտակումներ չկան. օպերատիվ իրադրությունը հարաբերական կայուն է. ԶՈՒ ԳՇ պետ |aysor.am|

aysor.am: Սյունիքում կուտակումներ չկան, այս մասին լրագրողների հետ զրույցում հայտարարեց ՀՀ զինված ուժերի գլխավոր շտաբի պետ Էդվարդ Ասրյանը։ «ՀՀ զինված ուժերը ուշի-ուշով հետևում են հակառակորդի ուժերին, կուտակումներ չկան, որը ներկայացնում եք»,- ասաց նա։ ԳՇ պետի խոսքով՝ օպերատիվ իրադրությունը հարաբերական կայուն է։ Ըստ նրա՝ շփման գիծը ներկայացնում է մի այնպիսի կառուցվածք, որ և՛ հակառակորդի, և՛ մեր կողմից կան դիրքեր։ «Եթե հակառակորդն ունի 20 դիրք, ապա այդքան էլ մենք ունենք, քանակը չբացահայտեմ»,- նշեց Ասրյանը։ ՀՀ զինված ուժերը ներկա դրությամբ զբաղեցրած բնագծում կատարում են իրենց առջև դրած խնդիրները։ «Եթե կասկածում եք՝ այցելեք ու համոզվեք»,- ասաց նա։

11:47 - 05 մարտի, 2024

ԶՈՒ ԳՇ պետն այցելել է նորակառույց մոդուլային զորամաս

Փետրվարի 14-16-ը ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանն աշխատանքային այցով եղել է հարավարևելյան և հարավարևմտյան սահմանագոտիներում: Գեներալ-լեյտենանտ Էդվարդ Ասրյանը շրջայցի ընթացքում եղել է մի շարք զորամասերում, զրուցել մարտական հերթապահություն իրականացնող զինծառայողների հետ, տեղում ծանոթացել սահմանային իրավիճակին, ծառայության կազմակերպման պայմաններին, ինչպես նաև խորհրդակցություններ անցկացրել զորամիավորման և զորամասերի հրամանատարական կազմերի մասնակցությամբ։ Էդվարդ Ասրյանը հետևել է նաև ինժեներական և ամրաշինական կառույցների շինարարության ընթացքին, այցելել նորակառույց մոդուլային զորամաս, դիտարկել հարդարման և կահավորման աշխատանքները։ Այս մասին հայտնում են ՀՀ ՊՆ-ից։

20:10 - 16 փետրվարի, 2024

Առաջիկայում կձեռնարկվեն քայլեր, որոնք էապես նպաստելու են զորքերի մարտական պատրաստականության վիճակի, ԶՈՒ մարտունակության բարձրացմանը. Սուրեն Պապիկյան

Դեկտեմբերի 27-ին ՀՀ պաշտպանության նախարար Սուրեն Պապիկյանի գլխավորությամբ տեղի է ունեցել պաշտպանության նախարարին կից կոլեգիայի նիստ՝ «2023 թվականի ուսումնական տարում ՀՀ զինված ուժերի մարտական պատրաստականության, պատրաստության, զորքերի ղեկավարման բարոյահոգեբանական ապահովման վիճակն ու 2024 թվականի ուսումնական տարվա գերակա խնդիրները» օրակարգով։ Նիստի ընթացքում զեկույցով հանդես է եկել պաշտպանության նախարարի առաջին տեղակալ, ԶՈՒ գլխավոր շտաբի պետ, գեներալ-լեյտենանտ Էդվարդ Ասրյանը։ Մատնանշվել են խնդիրները, հիմնական միջոցառումներն ու ձեռքբերումները։ Ամփոփելով նիստը և 2024 թվականի ուսումնական տարվա գերակա խնդիրների առնչությամբ մի շարք հանձնարարականներ տալով պատասխանատու ստորաբաժանումների ղեկավարներին՝ պաշտպանության նախարար Սուրեն Պապիկյանը վստահեցրել է, որ արդեն ընթացքի մեջ են մի շարք աշխատանքներ, ծրագրեր, և առաջիկայում ևս կձեռնարկվեն քայլեր, որոնք էապես նպաստելու են զորքերի մարտական պատրաստականության վիճակի, ԶՈՒ մարտունակության, ղեկավարման ունակությունների բարձրացմանը, ինչպես նաև զինծառայողների սոցիալ-կենցաղային պայմանների բարելավմանը։ Նիստի ավարտին 2023 թվականի ուսումնական տարվա պատրաստության արդյունքներով լավագույն ցուցանիշներ արձանագրած զորամասերի հրամանատարներին հանձնվել են փոխանցիկ դրոշները, իսկ բարեխիղճ ծառայությամբ աչքի ընկած մի շարք զինծառայողներ պարգևատրվել են գերատեսչական մեդալներով, պատվոգրերով և արժեքավոր նվերներով։

15:15 - 27 դեկտեմբերի, 2023

ՀՀ ՊՆ վարչական համալիրում մեկնարկել է ԶՈՒ բարձրագույն և ավագ սպայական կազմերի երկրորդ ենթախմբի ատեստավորման գործընթացը

Այս շաբաթ ՀՀ ՊՆ վարչական համալիրում մեկնարկել է ԶՈՒ բարձրագույն և ավագ սպայական կազմերի երկրորդ ենթախմբի ատեստավորման գործընթացը։ Այս մասին հայտնում են ՀՀ ՊՆ-ից։ Ատեստավորման առաջին օրը՝ դեկտեմբերի 4-ին, սպաները հանձնել են քննություն ֆիզիկական պատրաստությունից։ Քննական գործընթացին հետևել են ՀՀ պաշտպանության նախարար Սուրեն Պապիկյանը և պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը։ Սպաները հանձնել են քննություններ` ձգումներ պտտաձողի վրա, իրանի ծալում և տարածում, 100 մ վազք և 1 կմ վազք վարժաձևերից։ Ողջունելով և հաջողություն մաղթելով ատեստավորմանը ներգրավված զինծառայողներին՝ Սուրեն Պապիկյանը կարևորել է բարձրագույն և ավագ սպայակազմերի մասնակցությունը սույն գործընթացին՝ ընդգծելով, որ հրամանատարական պաշտոններ զբաղեցնող գեներալներն ու ավագ սպաները մարտական պատրաստության իրենց աստիճանով պետք է դրական օրինակ ծառայեն ենթականերին։ Պաշտպանական գերատեսչության ղեկավարը նաև համոզմունք է հայտնել, որ մասնակիցները հանձնաժողովին կներկայացնեն պատրաստության այն նույն բարձր աստիճանը, որով նախորդ շաբաթ անցկացված ատեստավորման ժամանակ աչքի են ընկել ԶՈՒ բարձրագույն և ավագ սպայակազմերի առաջին ենթախմբում ներգրավված զինվորականները։ Դեկտեմբերի 5-ին էլ ՀՀ ՊՆ զորավարժարաններից մեկում անցկացվել է ԶՈՒ բարձրագույն և ավագ սպայական կազմերի ատեստավորման գործընթացի երկրորդ՝ կրակային պատրաստության ստուգարքը։ Քննական գործընթացին հետևել է ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը, ով վստահություն է հայտնել, որ ատեստավորվող սպաները դիպուկ կխոցեն նշանակված թիրախները՝ լավագույնս ցուցադրելով կրակային պատրաստության իրենց հմտությունները։ Քննությունների ակտիվ փուլն ընթացքի մեջ է. առջևում շարային և մասնագիտական պատրաստության ստուգարքներն են։

15:26 - 05 դեկտեմբերի, 2023

Անցկացվել է ԶՈՒ բարձրագույն և ավագ սպայական կազմերի ատեստավորման գործընթացի կրակային պատրաստության քննությունը

Նոյեմբերի 28-ին ՀՀ ՊՆ զորավարժարաններից մեկում անցկացվել է ԶՈՒ բարձրագույն և ավագ սպայական կազմերի ատեստավորման գործընթացի կրակային պատրաստության քննությունը։ Քննական գործընթացին հետևել են ՀՀ պաշտպանության նախարար, ատեստավորման առաջին հանձնաժողովի նախագահ Սուրեն Պապիկյանը և պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը։ Քննության ավարտին, դիմելով ատեստավորման գործընթացին կամավոր ներգրավված գեներալներին ու բարձրաստիճան սպաներին, նախարար Պապիկյանն ընդգծել է, որ ակնհայտ է այն դրական ազդեցությունը, որ ատեստավորման գործընթացը թողել է ԶՈՒ մարտական պատրաստականության բարձրացման վրա։

14:31 - 28 նոյեմբերի, 2023