Սալոմե Զուրաբիշվիլի

Զուրաբիշվիլին որևէ առնչություն չունի Փաշինյանի այցի հետ․ Վրաստանի իշխող ուժի արձագանքը |azatutyun.am|

azatutyun.am: «Վրացական երազանք»-ի ներկայացուցիչ Միխեիլ Սարջվելաձեն, արձագանքելով Սալոմե Զուրաբիշվիլիի դժգոհությանը, պնդել է, որ նախագահը որևէ առնչություն չունի Հայաստանի վարչապետի Թբիլիսի կատարած այցի հետ։ «Զուրաբիշվիլին գիտի, որ ինքը որևէ առնչություն չունի այդ հանդիպման և այցի հետ։ Իրականում այն հաջողված այց էր, հանրությունն ականատես եղավ հաջող համագործակցության արդյունքներին։ Կարծում եմ, որ այս կապակցությամբ նա ասելիք չունի»,- հայտարարել է Վրաստանի իշխող ուժի ներկայացուցիչը։ Նախագահ Զուրաբիշվիլին այսօր ավելի վաղ տարածած իր հայտարարութամբ ողջունել է Հայաստանի վարչապետի այցը, միևնույն ժամանակ նշել, որ իրեն «հնարավորություն չի տրվել հանդիպել և պատշաճ կերպով հյուրընկալել բարեկամ երկրի ղեկավարին»։

18:20 - 27 հունվարի, 2024

Վրաստանի նախագահն ասել է, որ իրեն հնարավորություն չի տրվել Թբիլիսիում հանդիպել Հայաստանի վարչապետի հետ |tert.am|

tert.am: Վրաստանի նախագահ Սալոմե Զուրաբիշվիլին ափսոսանք է հայտնել, որ իրեն հնարավորություն չի տրվել հանդիպել աշխատանքային այցով Թբիլիսի այցելած Հայաստանի վարչապետ Նիկոլ Փաշինյանի հետ։ Այս մասին Զուրաբիշվիլին գրել է ֆեյսբուքյան իր էջում։ «Վրաստանի նախագահը ողջունում է ՀՀ վարչապետի այցը երկիր, բայց ցավալի է, որ Վրաստան կատարած այցի ընթացքում նախագահին հնարավորություն չի տրվել հանդիպելու և պատշաճ ընդունելու երկրների ղեկավարներին։ Ցավալի և ուշագրավ է նաև, որ պատկան մարմինները նախագահին չեն տեղեկացնում երկրում բարձր մակարդակի այցերի, հանդիպումների կամ միջոցառումների մասին»,-գրել է նա։ Հիշեցնենք, որ երեկ Վարչապետ Նիկոլ Փաշինյանն աշխատանքային այցով ժամանել է Վրաստան:

10:45 - 27 հունվարի, 2024

Ղարիբաշվիլին ներողություն է խնդրում Չինաստանի դեսպանից Զուրաբիշվիլիի հայտարարության համար |azatutyun.am|

azatutyun.am: Վրաստանի վարչապետ Իրակլի Ղարիբաշվիլին այսօր կայացած հանդիպման ժամանակ ներողություն է խնդրել Թբիլիսիում Չինաստանի դեսպան Չժոու Ցզյանից՝ երկրի նախագահ Սալոմե Զուրաբիշվիլիի վերջին հայտարարությունների առթիվ։ Փարիզ կատարած այցի ընթացքում Զուրաբիշվիլին ֆրանսիական LCI հեռուստաընկերության եթերում հայտարարել էր, թե «պատմական ձեռքբերում կլինի, եթե Ռուսաստանի նախագահ Վլադիմիր Պուտինն ու Չինաստանի ղեկավար Սի Ծինպինը մի օր կանգնեն դատարանի առջև»։ «Վարչապետ Ղարիբաշվիլին իր ափսոսանքն է հայտնել Վրաստանի նախագահի հայտարարությունների առթիվ՝ նշելով, որ նման հայտարարությունները կտրականապես անթույլատրելի են», - հաղորդում է Վրաստանի կառավարության մամուլի ծառայությունը։

19:06 - 13 նոյեմբերի, 2023

Վրաստանի նախագահի իմփիչմենթի գործընթացը ձախողվել է․ Զուրաբիշվիլին կպահպանի պաշտոնը |armenpress.am|

armenpress.am: Վրաստանի նախագահ Սալոմե Զուրաբիշվիլիի իմփիչմենթի օգտին է քվեարկել խորհրդարանի պատգամավորներից 86-ը՝ անհրաժեշտ 100-ի փոխարեն։ Այսպիսով, Զուրաբիշվիլին կշարունակի իր պաշտոնավարումը՝ որպես նախագահ։ Այս մասին հաղորդում է Վրաստանի հանրային հեռուստատեսությունը։ Քվեարկությունը տեղի է ունեցել գաղտնի կերպով։ Նախագահի իմփիչմենթի համար հարկավոր էր խորհրդարանի ամբողջական կազմի 2/3-ի՝ 100 պատգամավորների ձայները։ Սակայն քվեարկության համար գրանցվել է 90 պատգամավոր։ Նախագահի իմփիչմենթին դեմ է քվեարկել 1 պատգամավոր։ Ընդդիմության մի մասը նիստերի դահլիճում ներկա չի եղել։ Սալոմե Զուրաբիշվիլին նույնպես ներկա է գտնվել խորհրդարանում իր իմփիչմենթի հարցի քննարկմանը և ելույթ է ունեցել պատգամավորների առջև։ Հոկտեմբերի 16-ին Վրաստանի Սահմանադրական դատարանը հաստատել էր Զուրաբիշվիլիի կողմից Սահմանադրության 52-րդ հոդվածի խախտումը, ըստ որի՝ նախագահն իրավունք ունի արտաքին հարաբերություններում ներկայացուցչական գործառույթներ իրականացնել միայն կառավարության թույլտվությամբ։ Նախագահին իմփիչմենթի ենթարկելու հայցը ներկայացրել էին իշխող «Վրացական երազանք-Ժողովրդավարական Վրաստան» կուսակցության պատգամավորները։ Իշխող կուսակցության պատգամավորները իմփիչմենթի գործընթաց էին սկսել Զուրաբիշվիլիի դեմ այն բանից հետո, երբ նա օգոստոսի 31-ին առանց կառավարության հավանության սկսել էր արտասահմանյան շրջագայություն և հանդիպումներ էր ունեցել ԵՄ առաջնորդների հետ: Նախարարների կաբինետը հրաժարվել էր ճամփորդության թույլտվություն տալ Զուրաբիշվիլիին և դա բացատրել էր նրանով, որ իշխանությունները կորցրել են վստահությունը նրա նկատմամբ։ Իր հերթին Զուրաբիշվիլին հայտարարել է, որ իր՝ Եվրոպա կատարած այցերի նպատակն է եղել օգնել Վրաստանին ստանալ ԵՄ անդամակցության թեկնածու երկրի կարգավիճակ։

17:46 - 18 հոկտեմբերի, 2023

Վրաստանի նախագահը հայտարարել է, որ չի պատրաստվում հրաժարական տալ |armeniasputnik.am|

armeniasputnik.am: Վրաստանի նախագահ Սալոմե Զուրաբիշվիլին Սահմանադրական դատարանի որոշումից հետո հայտարարել է, որ չի պատրաստվում հրաժարական տալ: Տեղեկությունը հայտնում է Sputnik Վրաստանը։ «Ես ոչ մի տեղ չեմ գնում, հրաժարական չեմ տալիս։ Ես կլինեմ այնտեղ, որտեղ հիմա եմ և եղել եմ ամբողջ կյանքում, ինչի համար ես եկել եմ այստեղ, կանգնել եմ փողոցում՝ հանուն մեր եվրոպական և ժողովրդավարական ապագայի», - հայտարարել է Զուրաբիշվիլին ճեպազրույցի ժամանակ։ Վրաստանի Սահմանադրական դատարանը հոկտեմբերի 16-ին հաստատել է, որ նախագահ Սալոմե Զուրաբիշվիլին խախտել է երկրի գլխավոր օրենքը։ Վրաստանի նախագահը 2023 թվականի օգոստոսի 31-ին, սեպտեմբերի 1-ին և սեպտեմբերի 6-ին արտերկիր կատարած աշխատանքային այցերի ժամանակ ներկայացուցչական գործառույթներ է իրականացրել միջազգային հարաբերությունների ոլորտում՝ առանց Վրաստանի կառավարության համաձայնության, ինչով խախտել է Վրաստանի Սահմանադրության 52-րդ հոդվածը։

22:07 - 16 հոկտեմբերի, 2023

Վրաստանի Սահմանադրական դատարանը բավարարեց երկրի նախագահին իմփիչմենթի ենթարկելու դիմումը |azatutyun.am|

azatutyun.am: Վրաստանի Սահմանադրական դատարանը բավարարել է երկրի նախագահ Սալոմե Զուրաբիշվիլիի իմփիչմենթի՝ պաշտոնանկության մասին խորհրդարանի մի խումբ պատգամավորների ներկայացրած դիմումը։ Սահմանադրական դատարանի անդամները քվեների 6 կողմ, 3 դեմ հարաբերակցությամբ այսօր վճռել են, որ Զուրաբիշվիլին խախտել է երկրի Հիմնական օրենքը՝ արտերկրյա շրջագայությունների մեկնելով առանց կառավարության թույլտվության։ Դատարանի որոշումից հետո երկշաբաթյա ժամկետում Զուրաբիշվիլիի իմփիչմենթի հարցը պետք է քննի երկրի խորհրդարանը։ Զուրաբիշվիլիի պաշտոնանկության համար Վրաստանի 150-հոգանոց խորհրդարանում պետք է առնվազն 100 քվե հավաքվի։ Վրացական աղբյուրների փոխանցմամբ՝ այս պահին երկրի իշխող կուսակցությունը խորհրդարանում նման քանակությամբ ձայներ չունի։

15:53 - 16 հոկտեմբերի, 2023

Վրաստանի նախագահի պաշտոնանկության հարցը մտել է Սահմանադրական դատարան |armtimes.com|

armtimes.com: Վրաստանի խորհրդարանական մեծամասնության ներկայացուցիչը երեկ՝ սեպտեմբերի 12-ին, միջնորդություն է ներկայացրել Սահմանադրական դատարան (ՍԴ)` նախագահ Սալոմե Զուրաբիշվիլիի պաշտոնանկության հարցով։ Տեղեկությունը RadioTavisupleba-ին հայտնել են ՍԴ-ի մամուլի ծառայությունից: Ըստ ՍԴ-ի՝ այժմ ներկայացված դիմումը կարձանագրվի, այնուհետև կսկսվեն իրավական ընթացակարգերը, փոխանցում է Aliq-ը: Ի դեպ, սեպտեմբերի 11-ին հայտնի դարձավ, որ խորհրդարանի ընթացակարգային հարցերի և կանոնակարգի հանձնաժողովը հաստատել է ստորագրությունների իսկությունը, ինչը անհրաժեշտ նախադրյալ է եղել փաստաթուղթը դատարան ուղարկելու համար։ Զուրաբիշվիլիի դեմ Սահմանադրական դատարան ներկայացված դիմումը ստորագրել է խորհրդարանական մեծամասնության 80 պատգամավոր։ «Վրացական երազանքը» սկսել է նախագահի պաշտոնանկության ընթացակարգը, քանի որ, ըստ իշխող կուսակցության նախագահ Իրակլի Կոբախիձեի, Զուրաբիշվիլին «կոպտորեն խախտել է» Վրաստանի սահմանադրությունը և առանց կառավարության համաձայնության մի շարք այցեր է կատարել արտասահմանյան երկրներ։ Սահմանադրական դատարան ներկայացնելու համար անհրաժեշտ է առնվազն 50 պատգամավորի համաձայնությունը։ Սահմանադրական դատարանը մեկամսյա ժամկետում պետք է իր եզրակացությունը ներկայացնի խորհրդարան, իսկ դրանից հետո խորհրդարանը պետք է քաղաքական վճիռ կայացնի ու որոշի քվեարկության դնել նախագահի պաշտոնանկության հարցը։ Այս գործընթացին զուգահեռ, Վրաստանի նախագահ Սալոմե Զուրաբիշվիլին շարունակում է հանդիպումները եվրոպական մայրաքաղաքներում։

09:54 - 13 սեպտեմբերի, 2023

Վրաստանի նախագահի իմփիչմենթը հասարակության մեջ բևեռացման վտանգ կստեղծի. Բորել |armenpress.am|

armenpress.am: Վրաստանի նախագահ Սալոմե Զուրաբիշվիլիի իմփիչմենթը, որի ընթացակարգը մեկնարկել են երկրի իշխանությունները, հասարակության մեջ լրացուցիչ բևեռացման վտանգ կստեղծի։ Այս մասին հայտարարել է ԵՄ դիվանագիտության ղեկավար Ժոզեպ Բորելը Թբիլիսիում, որտեղ նա գտնվում է այցով։ «Ինչ վերաբերում է նախագահի իմփիչմենթին, ապա առկա է հակաարդյունավետ բևեռացման հետագա աճի վտանգ: Ես կարծում եմ, որ երկրի բոլոր ինստիտուտները պետք է աշխատեն միասին՝ աջակցելու եվրոպական ուղուն», - Բորելի խոսքերն է մեջբերում ТАСС-ը: Սեպտեմբերի 1-ին Վրաստանի իշխող կուսակցությունը հայտարարել էր նախագահի նկատմամբ իմփիչմենթի ընթացակարգ սկսելու մասին։ Պատճառը դարձել է այն, որ Զուրաբիշվիլին, չնայած կառավարության մերժմանը, մեկնել էր Եվրոպա՝ ԵՄ երկրների ղեկավարների հետ հանդիպելու։ Այսպիսով, Զուրաբիշվիլին խախտել է Սահմանադրությունը, որի համաձայն՝ նախագահը կարող է արտաքին քաղաքականության մեջ ներկայացուցչական գործառույթներ իրականացնել միայն նախարարների կաբինետի համաձայնությամբ։ 2022 թ. հունիսին Եվրամիությանն անդամակցելու թեկնածուի կարգավիճակ տրամադրվեց Մոլդովային և Ուկրաինային։ ԵՄ երկրների ղեկավարները ճանաչեցին Վրաստանի եվրոպական հեռանկարները, ինչպես նաև պատրաստակամություն հայտնեցին նրան թեկնածուի կարգավիճակ տրամադրել 12 պայմանների կատարումից հետո։ 2023 թ. վերջին Վրաստանն ակնկալում է ԵՄ-ի հերթական որոշումը` իրեն թեկնածուի կարգավիճակ տրամադրելու վերաբերյալ։

16:53 - 08 սեպտեմբերի, 2023

Ժոզեպ Բորելը սեպտեմբերի 7-8-ը կայցելի Վրաստան |azatutyun.am|

azatutyun.am: Եվրամիության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը սեպտեմբերի 7-8-ը կայցելի Վրաստան։ «Հանձնակատարի պաշտոնում նրա առաջին այցը Վրաստան թույլ կտա քննարկել Վրաստանի առաջընթացը եվրոպական ինտեգրման ճանապարհին, մտքեր փոխանակել արտաքին քաղաքականության և տարածաշրջանային ավելի լայն հարցերի շուրջ», - հայտնում է ԵՄ արտաքին քաղաքականության ծառայությունը։ Բորելը հանդիպումներ է ունենալու Վրաստանի նախագահի, վարչապետի, արտգործնախարարի, պատգամավորների ու քաղաքացիական հասարակության ներկայացուցիչների հետ։ Նրա այցը կատարվում է Վրաստանի իշխող ուժի ու նախագահի միջև լարվածության ֆոնին։ «Վրացական երազանք»-ը նախագահ Սալոմե Զուրաբիշվիլիին մեղադրում է Սահմանադրությունը խախտելու մեջ ու նրա իմփիչմենթի գործընթաց է սկսել։ Զուրաբիշվիլին համարվում է արևմտամետ քաղաքական գործիչ, իսկ Վրաստանի իշխող ուժն ու կառավարությունը քննադատվում են Ռուսաստանին մերձենալու քայլերի համար։ Եվրահանձնաժողովը ներկայումս ավարտում է Վրաստանի վերաբերյալ զեկույց կազմելու աշխատանքները, որտեղ գնահատվում է Եվրամիության առաջարկների իրականացման ընթացքը՝ ԵՄ-ին անդամակցելու թեկնածու երկրի կարգավիճակ ստանալու համար։

13:06 - 05 սեպտեմբերի, 2023

Վրաստանի իշխող կուսակցությունը սկսել է նախագահի իմպիչմենթի ընթացակարգը |1lurer.am|

1lurer.am: Վրաստանի իշխող «Վրացական երազանք-Ժողովրդավարական Վրաստան» կուսակցությունը նախագահ Սալոմե Զուրաբիշվիլու դեմ իմփիչմենթի գործընթաց է սկսում նրա՝ Եվրոպա մեկնելու պատճառով, չնայած կառավարության մերժմանը։ Այդ մասին ճեպազրույցում հայտարարել է կուսակցության նախագահ Իրակլի Կոբախիձեն։ «Իմպիչմենթն ավարտին հասցնելու համար անհրաժեշտ է 100 պատգամավորի աջակցություն, և, հետևաբար, առանց արմատական ընդդիմության ձայների, այն իրականացման հեռանկար չունի: Չնայած դրան՝ կուսակցության քաղաքական խորհրդի նիստում որոշում կայացրեցինք նախագահի նկատմամբ իմպիչմենթի գործընթաց սկսել»,- ասել է Կոբախիձեն։

12:25 - 01 սեպտեմբերի, 2023

Շուրջ 50 եվրախորհրդարանականներ Վրաստանի իշխանություններին կոչ են անում Սաակաշվիլիին բուժման նպատակով տեղափոխել Եվրոպա |aliq.ge|

aliq.ge: Շուրջ 50 եվրախորհրդարանականներ Վրաստանի իշխանություններին կոչ են անում երրորդ նախագահ, այժմ անազատության մեջ գտնվող Միխեիլ Սաակաշվիլիին բուժման նպատակով տեղափոխել Եվրոպա։ Նամակի հասցեատերերն են Վրաստանի նախագահ Սալոմե Զուրաբիշվիլին, վարչապետ Իրակլի Ղարիբաշվիլին և խորհրդարանի նախագահ Շալվա Պապուաշվիլին։ ԵԽ պատգամավորները շեշտել են, որ իրենց խիստ անհանգստացնում է Սաակաշվիլիի արտաքինը: Նրանց կարծիքով, այս պատկերը յուրօրինակ կերպով արտացոլում է Սաակաշվիլիի առողջության արագ ու կտրուկ վատթարացումը։ Դա, ըստ նրանց, խոսում է այն մասին, որ ներկայիս բժշկական միջամտությունները չեն ապահովում և չեն օգնում նրա արագ ապաքինմանը։ Ուստի նրանք կարծում են, որ իրավիճակի շտկման հրատապ միջոցառումներն ընդունելի են, քանի դեռ իրավիճակը կրիտիկական կետի չի հասել։ Շարունակությունը՝ սկզբնաղբյուր կայքում

13:53 - 15 հուլիսի, 2023

Վրաստանի նախագահը կոչ է արել իրավական սահմանափակումներ կիրառել երկիր ժամանած ռուսաստանցիների նկատմամբ |armenpress.am|

armenpress.am: Վրաստանի նախագահ Սալոմե Զուրաբիշվիլին Թբիլիսիում Անկախության օրվա տոնակատարության ժամանակ իր ելույթում քննադատել է իշխանություններին Ռուսաստանի հետ ուղիղ ավիաչվերթները վերսկսելու, ինչպես նաև այն բանի համար, որ երկիր ժամանած ռուսաստանցիների նկատմամբ մինչև այժմ իրավական սահմանափակումներ չեն մտցվել։ Այդ մասին տեղեկանում ենք «РИА Новости» գործակալությունից: «Անկախությունը, որը մենք այսօր տոնում ենք, նշանակում է պաշտպանություն, որը ղեկավարվում է կանոններով ու օրենքներով։ Սա պետության մոտեցումն է, որը պետք է տարածվի բոլորի վրա։ Ուստի անհասկանալի է, թե ինչու որևէ միջոց և իրավական կարգավորում չի սահմանվել զանգվածաբար Վրաստան ժամանած ռուսաստանցիների համար, նրանց գործունեության նկատմամբ, հատկապես այնպիսի ոլորտներում, ինչպիսիք են առողջապահությունը, կրթությունը», - հայտարարել է Վրաստանի նախագահը։ Զուրաբիշվիլիի խոսքով՝ անհասկանալի է դարձել նաև Վրաստանի արտաքին քաղաքականությունը, որը, նրա կարծիքով, ավելի ու ավելի է մեկուսացվում եվրոպական հեռանկարից։ «Չկա այնպիսի ժողովուրդ, որը չի վախեցել պատերազմից... Բայց վախի սաստկացումը երկրում, որն այսքան ներխուժումներ ու նվաճումներ է հիշում, չի կարելի օգտագործել որպես հաջող կառավարման բանաձև... Անհասկանալի ու վիրավորական է, երբ մենք այսօր հաշվարկում ենք, թե քանի միլիոն կբերի մեզ թռիչքների «նվերը»: Մի՞թե մեր արժանապատվությունը վաճառվել է 200 կամ 300 միլիոնով», - հավելել է նախագահը: Ավելի վաղ Զուրաբիշվիլին, ի պատասխան Թբիլիսիի հետ այցագրային ռեժիմը չեղարկելու Ռուսաստանի Դաշնության որոշման, կոչ էր արել Անվտանգության խորհրդի նիստ հրավիրել և քննարկել ռուսաստանցիների համար եռամսյա այցագրեր սահմանելու հարցը։ Զուրաբիշվիլին հանդես է եկել ՌԴ քաղաքացիների աշխատանքի իրավունքի, ինչպես նաև բիզնեսը գրանցելու, սեփականություն ձեռք բերելու կամ Վրաստանում ռուսալեզու դպրոցներ բացելու իրավունքի կարգավորման օգտին։ Ռուսաստանի նախագահ Վլադիմիր Պուտինն ավելի վաղ չեղարկել էր Վրաստանի հետ այցագրային ռեժիմը, ինչպես նաև հանել էր ռուսական ավիաընկերությունների համար դեպի Վրաստան ուղիղ չվերթներ իրականացնելու՝ 2019 թ.-ին սահմանված արգելքը։

17:41 - 26 մայիսի, 2023

Վրաստանի հետ բարիդրացիական հարաբերությունների խորացումը մեր արտաքին քաղաքականության առաջնահերթություններից է. Փաշինյան

Վարչապետ Նիկոլ Փաշինյանը շնորհավորական ուղերձներ է հղել Վրաստանի նախագահ Սալոմե Զուրաբիշվիլիին և վարչապետ Իրակլի Ղարիբաշվիլիին՝ Պետական անկախության վերականգնման օրվա առթիվ: Վրաստանի նախագահին ուղղված շնորհավորական ուղերձում նշված է. «Ձերդ գերազանցություն, Ջերմորեն շնորհավորում եմ Ձեզ և եղբայրական վրացի ժողովրդին Վրաստանի ազգային տոնի՝ Պետական անկախության վերականգնման օրվա կապակցությամբ։ Ժողովրդավարական արժեքների վրա խարսխված պետություն կառուցելու նպատակով՝ ավելի քան մեկ դար առաջ այս օրը վրացի ժողովուրդը վճռական քայլ կատարեց անկախության վերականգնման ուղղությամբ և այսօր էլ հաստատուն քայլերով շարունակում է իր ուղին։ Ցանկանում եմ ընդգծել, որ Վրաստանի հետ փոխշահավետ և բարիդրացիական հարաբերությունների խորացումը մեր կառավարության արտաքին քաղաքականության առաջնահերթությունների շարքում է, և լիահույս եմ, որ մեր համատեղ ջանքերի շնորհիվ առաջիկայում ևս Հայաստանի ու Վրաստանի միջև հարաբերությունները կշարունակեն զարգանալ երկկողմ հետաքրքրություն ներկայացնող բոլոր ուղղություններով՝ ի շահ մեր երկրների և ժողովուրդների։ Օգտվելով առիթից՝ մաղթում եմ Ձեզ քաջառողջություն և արդյունավետ գործունեություն, իսկ Վրաստանի բարեկամ ժողովրդին՝ խաղաղություն և զարգացում»: Վրաստանի վարչապետին ուղղված ուղերձում ասված է. «Ձերդ գերազանցություն, Ջերմորեն շնորհավորում եմ Ձեզ Վրաստանի ազգային տոնի՝ Պետական անկախության վերականգնման 105- րդ տարեդարձի կապակցությամբ։ Պետականության կերտման ճանապարհը միշտ չէ, որ հարթ է եղել, սակայն հայ և վրացի ժողովուրդներն իրենց հետևողական պայքարի շնորհիվ ապացուցել են անկախ պետություն ունենալու իրենց իրավունքը և այսօր էլ, հավատարիմ մնալով իրենց ձգտմանը, շարունակում են սերտորեն համագործակցել պետականաշինության գործում: Վստահ եմ, որ առկա փոխգործակցության ներուժը և գործընկերությունը խորացնելու երկու բարեկամ երկրների հաստատակամությունը հետագայում ևս կնպաստեն ու նոր խթան կհաղորդեն հայ և վրացի ժողովուրդների միջև ձևավորված եղբայրական հարաբերությունների ու փոխշահավետ համագործակցության զարգացմանը։ Գնահատելի համարելով բարեկամ Վրաստանի ձեռքբերումները՝ հավաստիացնում եմ, որ Հայաստանը Վրաստանի համար վստահելի բարեկամ ու հարևան պետություն է և այդպիսին մնալու է։ Օգտվելով առիթից՝ մաղթում եմ Ձեզ քաջառողջություն և արդյունավետ գործունեություն, իսկ Վրաստանի բարեկամ ժողովրդին՝ խաղաղություն և զարգացում»:

11:35 - 26 մայիսի, 2023

Պուտինի հրամանագրով հանվել է ռուսական ավիաընկերությունների՝ դեպի Վրաստան թռիչքի արգելքը, Վրաստանից այն հերթական սադրանք են որակում

Պուտինի հրամանագրով հանվել է ռուսական ավիաընկերությունների՝ դեպի Վրաստան թռիչքի արգելքը։ Այս մասին հայտնում է ՏԱՍՍ լրատվական գործակալությունը։ Վրաստանի քաղաքացիների համար չեղարկել է նաև վիզային ռեժիմը։ Վրաստանի քաղաքացիները կարող են Ռուսաստան մուտք գործել առանց վիզայի՝ մինչև 90 օր ժամկետով: Վրաստանի նախագահ Սալոմե Զուրաբիշվիլին Ռուսաստանի կողմից վիզային ռեժիմի չեղարկումը հերթական սադրանք է որակում։ «Վրաստանի հետ ուղիղ չվերթների վերսկսումը և վիզային ռեժիմի վերացումը անընդունելի են, քանի դեռ Ռուսաստանը շարունակում է իր ագրեսիան Ուկրաինայի դեմ և մեր տարածքի օկուպացիան։

15:42 - 10 մայիսի, 2023

Վրաստանի նախագահն ու վարչապետը Սուրբ Ծննդյան տոնի կապակցությամբ շնորհավորել են հայերին |armenpress.am|

armenpress.am: Վրաստանի նախագահ Սալոմե Զուրաբիշվիլին եւ Վրաստանի վարչապետ Իրակլի Ղարիբաշվիլին շնորհավորել են Հայ Առաքելական եկեղեցուն և նրա հավատացյալներին Սուրբ Ծննդյան տոնի կապակցությամբ։ Սալոմե Զուրաբիշվիլիի շնորհավորական ուղերձում, ասվում է. «Ձեզ և ձեր ընտանիքներին, բարության և առաքինության այս սուրբ օրը, որը դուք նշում եք այսօր, մաղթում եմ խաղաղություն, առողջություն և երջանկություն»։ Իրակլի Ղարիբաշվիլիի ուղերձում ասվում է. «Այսօր ուզում եմ շնորհավորել մեր հայ հայրենակիցներին և մեր եղբայրական հայ ժողովրդին՝ բոլորին, ովքեր առանձնահատուկ ուրախությամբ և մեծ տոնով նշում են Փրկչի Սուրբ Ծննդյան և Աստվածահայտնության տոնը։ Մեր ժողովուրդների փոխադարձ հարգանքն ու սերը հանգեցրել է մեր դարավոր բարեկամությանն ու բարիդրացիությանը։ Ուրախ եմ, որ այս հարաբերություններն ավելի են խորանում։ Մաղթում եմ առողջություն, խաղաղություն և բարեկեցություն»։

17:10 - 06 հունվարի, 2023

Վրաստանն էքզիստենցիալ հիասթափություն է ապրել ԵՄ-ից․ Զուրաբիշվիլի |factor.am|

factor.am: Վրաստանը հիասթափված է, որ Մոլդովան և Ուկրաինան արդեն ստացել են Եվրամիությանն անդամակցության թեկնածուի կարգավիճակ, իսկ Վրաստանին խոստացել են միայն հեռանկար: Արտաքին սպառնալիքը, ներքին բևեռացումը և դեպի Եվրամիություն հետագա առաջընթացը Վրաստանի համար այսօր երեք հիմնական մարտահրավերներն են։ Այս մասին հայտարարել է Վրաստանի նախագահ Սալոմե Զուրաբիշվիլին Ստրասբուրգում Ժողովրդավարության համաշխարհային ֆորումի ժամանակ, գրում է «Գրուզիա օնլայնը»։ «Բևեռացումն ամենուր է՝ կուսակցությունների մեջ, լրատվամիջոցներում, նույնիսկ եկեղեցում… Բևեռացումն այն իմաստով, որ դուք այլևս չեք վստահում մյուսին, երբ կարծում եք, որ մյուսն արդեն թշնամի է, և դա այն դեպքում, երբ իրական թշնամին գտնվում է մեր սահմանի վրա։ Նման պահին բևեռացումը դառնում է հանցագործություն ազգի դեմ, քանի որ թուլացնում է երկիրը։ Սա այն է, ինչ թշնամին շահագործում է նույնիսկ առանց ուժային հարձակում գործելու»,- ասել է Զուրաբիշվիլին։ Նա հորդորել է չմոռանալ, որ ռուսական բազան գտնվում է Վրաստանի մայրաքաղաքի մոտ։ «Սա այն իրավիճակն է, որում մենք ապրում ենք, և չնայած դրան՝ մենք զարգացնում ենք ժողովրդավարական ճկունություն, թեև այն կատարյալ չէ»,- ընդգծել է նախագահը։ Զուրաբիշվիլիի խոսքով՝ Վրաստանը «մեծ հիասթափություն» ապրեց, երբ Ուկրաինայի և Մոլդովայի հետ ԵՄ անդամակցության թեկնածուի կարգավիճակ չստացավ։

15:35 - 08 նոյեմբերի, 2022