ՊԵԿ - infocom.am

ՊԵԿ

ՀՀ կառավարությանն առընթեր պետական եկամուտների կոմիտեն 2008-2014 թթ. և 2016 թ. մարտի 1-ից գործող հանրապետական գործադիր մարմին է, որն իր իրավասության սահմաններում ապահովում է պետական բյուջեի մուտքերը և հարկային ու մաքսային վարչարարությունը։ Կոմիտեում գործում են հարկային և մաքսային ծառայությունները։

Ներկայումս, Պետական եկամուտների կոմիտեի նախագահի պաշտոնը զբաղեցնում է Էդվարդ Հովհաննիսյանը։

Մաքսային ծառայությունն ԱՄՆ աջակցությամբ վերազինվել է ռենտգենյան սարքերով և ճառագայթային հայտնաբերման նոր սարքավորումներով |armenpress.am|

armenpress.am: Հայաստանի պետական եկամուտների կոմիտեի մաքսային ծառայությունը ԱՄՆ–ի աջակցությամբ վերազինվել է ռենտգենյան և ճառագայթային հայտնաբերման ժամանակակից սարքավորումներով, որոնք թույլ կտան կանխել միջուկային և ռադիոակտիվ նյութերի ապօրինի շրջանառությունը: Հունիսի 27–ին «Ապավեն» մաքսային պահեստում Պետական եկամուտների կոմիտեի նախագահ Ռուստամ Բադասյանն ու Հայաստանում ԱՄՆ արտակարգ և լիազոր դեսպան Քրիստինա Քվինը մասնակցեցին ռենտգենյան սարքավորումների տեղադրման միջոցառմանը: Նոր սարքավորումները ձեռք են բերվել ԱՄՆ պետքարտուղարության «Արտահանման վերահսկողության և սահմանների անվտանգության (EXBS) և ԱՄՆ էներգետիկայի դեպարտամենտի «Միջուկային մաքսանենգության կանխարգելման և բացահայտման» (NSDD) ծրագրերի ֆինանսավորմամբ ու աջակցությամբ: Պետական եկամուտների կոմիտեի նախագահ Ռուստամ Բադասյանը շնորհակալություն հայտնեց ԱՄՆ գործընկերներին՝ ՊԵԿ–ի կարողությունները զարգացնելու համար տրվող շարունակական աջակցության համար: Նա արձանագրեց Հայաստանի և ԱՄՆ–ի միջև հարաբերությունների զարգացումը՝ այս անգամ միջազգային միջուկային անվտանգության, սահմանների պաշտպանության, տնտեսական անվտանգության պաշտպանության համատեքստում: «Ժամանակակից մաքսային վարչարարության տեսանկյունից անգնահատելի է նոր տեխնիկական միջոցների դերակատարումը: Վստահ եմ, որ այս աջակցությունն իր կոնկրետ դրսևորումը կունենա մաքսային վարչարարության արդիականացման բնագավառում»,–ասաց Ռուստամ Բադասյանը՝ հույս հայտնելով, այս ոլորտում համագործակցությունը կշարունակվի: Հայաստանում ԱՄՆ դեսպան Քրիստինա Քվինը հիշեցրեց, որ հունիսի 11-ին կայացած Հայաստան-ԱՄՆ ռազմավարական երկխոսության ամփոփիչ նիստի ընթացքում ստորագրվել է «ՀՀ կառավարության և ԱՄՆ կառավարության միջև իրենց մաքսային մարմինների փոխադարձ օգնության վերաբերյալ» համաձայնագիրը։ Համաձայնագրի նպատակն է խորացնել համագործակցությունը սահմանային անվտանգության և առևտրի ընթացակարգերի պարզեցման ոլորտում: «Գովեստի են արժանի իր սահմաններին միջուկային և ռադիոակտիվ նյութերի հայտնաբերման, կանխման և կասեցման ջանքերի համար Հայաստանի Հանրապետության կողմից ձեռնարկվող ջանքերը, նաև Հայաստանի ներդրումը գլոբալ անվտանգության ապահովման համատեքստում: Այսօր մենք հանձնում ենք սարքավորումներ, որոնք կծառայեն մեր ընդհանուր նպատակին՝ սահմանների անվտանգության մեծացմանը և մեր երկրների միջև առևտրի դյուրացմանը»,–ասաց դեսպանը: Սարքավորումները զննման գործընթացում պետք է կիրառվեն, հնարավորություն կտան գործընթացն ավելի արագ կազմակերպել և առավել արդյունավետ կերպով բացահայտել, կասեցնել և կանխարգելել միջուկային և ռադիոակտիվ նյութերի փոխադրումը սահմաններով: «Rapiscan Systems–ի երկու բեռնատար մեքենաները հանդիսանում են 8 մլն ԱՄՆ դոլարի ներդրում, ամերիկյան զննող տեխնոլոգիաներ են, օգտագործվելու են բեռների ստուգման համար: Ճառագայթային հայտնաբերման սարքավորումները տրամադրվել են մեր Էներգետիկայի դեպարտամենտի կողմից»,–ասաց Քրիստինա Քվինը: 2006 թվականին ԱՄՆ էներգետիկայի դեպարտամենտի և Հայաստանի պետական եկամուտների կոմիտեի միջև համագործակցության հուշագիր է ստորագրվել: Այդ ժամանակից ի վեր 30 մլն դոլարի ներդրում է կատարվել ՀՀ ՊԵԿ–ի, Հայաստանի ատոմային էլեկտրակայանի և միջուկային կարգավորող մարմնի հետ համագործակցության համատեքստում: Ճառագայթային հայտնաբերման սարքավորումները կտեղակայվեն «Զվարթնոց» միջազգային օդանավակայանում մեկնումների և ժամանումների սրահներում և բեռնահամալիրում: ԱՄՆ դեսպանը շնորհակալություն հայտնեց Հայաստանի մաքսային ծառայությանը, ՊԵԿ–ին՝ ԱՄՆ–ի նվիրաբերած սարքավորումներն արդյունավետ կիրառելու, աներեր աշխատանքի համար: ՊԵԿ արտաքին տնտեսական գործունեության մաքսային սպասարկման և հսկողության վարչության պետ Արտեմ Կարապետյանը մանրամասնեց, որ նվիրաբերված սարքերը հնարավորություն են տալիս բեռնատար տրանսպորտային միջոցների ռենտգեն սքանավորում իրականացնել: «Դրանք նմանատիպ ստացիոնար սարքավորումներից տարբերվում են նրանով, որ անհրաժեշտ չէ ինչ–որ լրացուցիչ ենթակառուցվածքներ ունենալ, շենք–շինություններ սարքել: Բնականաբար, ավելի մոբիլ են, հնարավորություն են տալիս անհրաժեշտության դեպքում տեղափոխել այլ վայրեր ավելի օպերատիվ մաքսային հսկողություն իրականացնելու համար: Եթե անհրաժեշտություն է լինում նախապես ստուգել, հասկանալ՝ բեռնատար տրանսպորտային միջոցում առկա են գաղտնարաններ, թաքստոցներ, ինչ ապրանքներ կան, սա շատ լավ սարքավորում է»,–ասաց Կարապետյանը: Նոր ռենտգենյան սարքերը մաքսային մարմիններին, տնտեսավարողներին հնարավորություն կտան խնայել ժամանակ, ռեսուրսներ՝ այդ թվում ֆինանսական ռեսուրսներ: Այլ պարագայում ստիպված կարող են լինել բացել բեռնատարը, բեռնաթափել: Սարքավորման միջոցով իրականացվում է ռենտգեն սքանավորում, ուսումնասիրում են պատկերն ու ուսումնասիրության արդյունքում գնահատում ռիսկերը, անհրաժեշտության դեպքում միայն կարող է պահանջ դրվել դատարկել բեռնատար տրանսպորտային միջոցը, որ մաքսային մարմինները մանրամասն զննում իրականացնեն: Նոր ռենտգենյան սարքերի և ճառագայթային հայտնաբերման սարքավորումների կիրառումը մաքսային ծառայությունում հնարավորություն կտա ավելի արձրացնել մաքսային ծառայողների աշխատանքի արդյունավետությունը՝ նպաստելով սահմանների ու ազգային շահերի պաշտպանվածությանը մարտահրավերներից:

18:33 - 27 հունիսի, 2024

Բացահայտել է շուրջ 65.7 միլիարդ դրամի ստվերային շրջանառություն. ՊԵԿ

ՀՀ ՊԵԿ հետաքննության և օպերատիվ հետախուզության վարչությունը, վերլուծական գործիքների և կարողությունների շարունակական զարգացման արդյունքում, համագործակցելով հարկային այլ ստորաբաժանումների հետ, շարունակելով ստվերի դեմ պայքարը, 2024թ-ի հունվար-ապրիլ ամիսներին ձեռնարկել է 1177 օպերատիվ-հետախուզական միջոցառում: ՊԵԿ լրատվական ծառայությունից հայտնում են, որ բացահայտվել է շուրջ 65.7 միլիարդ դրամի ստվերային շրջանառություն: Պետական բյուջե է վերականգնվել մոտ 18.6 միլիարդ դրամ, ինչը նախորդ տարվա նույն ժամանակահատվածի ցուցանիշը գերազանցում է շուրջ 7.4 միլիարդ դրամով կամ 66%-ով։ Վարչության աշխատակիցները կազմել են հարկային պարտավորությունների նախնական հաշվարկներ: Պետությանը պատճառված վնասը կազմել է շուրջ 25.4 միլիարդ դրամ։ Նախնական հաշվարկների հիմքով Քննչական կոմիտեում նախաձեռնվել է 125 քրեական վարույթ։ • Հարուցված վարչական վարույթներԱշխատանքներ են տարվել անփաստաթուղթ ապրանքների մատակարարման դեպքերի բացահայտման ուղղությամբ. այս մասով՝ 155 դեպքով, արձանագրվել է 30.4 միլիոն դրամի տուգանք: Ապօրինի ձեռնարկատիրության դեպքերի բացահայտման 162 դեպքով արձանագրվել է 159 միլիոն դրամի տուգանք, լիզենզավորման ենթակա գործունեություն առանց լիցենզիա իրականացնելու 85 դեպքով արձանագրվել է 166.8 միլիոն դրամի տուգանք։ •Անշարժ գույքի վարձակալության գործարքներ 2024թ-ին ՊԵԿ ՀՕՀ վարչությունը աշխատանքներ է տարել նաև ֆիզիկական անձանց կողմից անշարժ գույքի վարձակալության գործարքներն օրենքով սահմանված կարգով չձևակերպելու դեպքերը հայտնաբերելու և բացահայտելու ուղղությամբ։ Այդ նպատակով ձեռնարկված օպերատիվ-հետախուզական միջոցառումների արդյունքում, հունվար-ապրիլ ամիսներին արձանագրվել է խախտման 20 դեպք, որոնց մասով առաջադրվել է շուրջ 9.8 միլիոն ՀՀ դրամի տուգանք։ Հատկանշական է, որ այս գործընթացը սկսելուց ի վեր քաղաքացիները հարկային մարմին են ներկայացրել բնակարանները վարձակալությամբ տրամադրելու շուրջ 26 500 հայտարարություն։ •ԱԱՀ-ի դեբետային գումարները պետությունից հափշտակելու սխեմաներ2024թ-ի հունվար-ապրիլ ամսիներին բացահայտվել են ԱԱՀ-ի դեբետային գումարները պետությունից հափշտակելու տարբեր սխեմաներ: Մասնավորապես, ստեղծվել են իրական տնտեսական գործունեություն ծավալելու մտադրություն չունեցող կազմակերպություններ, որոնք փոխկապակցված ընկերություններին դուրս են գրել ծառայությունների մատուցման կամ ապրանքների մատակարարման հարկային հաշիվներ, ընդ որում և՛ ծառայությունները, և՛ ապրանքները բազմապիսի են՝ ծրագրային ապահովման ծառայություններ, շինանյութի, դիզելային վառելիքի և գյուղատնտեսական ապրանքների մատակարարման հարկային հաշիվներ։ Իրականում, սակայն, այդ գործարքները տեղի չեն ունենցել. նպատակը եղել է գնորդ կազմակերպության մոտ ԱԱՀ-ի գեներացնելը կամ նշված գումարը պետությունից հափշտակելը։ Նշված սխեմայից մի օրինակ՝ ծրագրային ապահովման ոլորտի մի քանի կազմակերպություն, մասնավորաբար «Ալֆա Ջիմ», «ԱՄՈՆԴ-ԱՐՄ», «ՉԵՐՐԻ ՊԼՅՈՒՍ», «ԽՈՐ ՇԻՆ» ընկերությունները ստացել են ավելի քան 1.5 միլիարդ դրամ ընդհանուր արժեքով ակնհայտ կեղծ հարկային հաշիվներ: Վերջիններս հարկային մարմին են ներկայացրել միասնական հաշվից գումարները վերադարձնելու դիմումներ, միևնույն ժամանակ հաշիվները դուրս գրող կազմակերպությունները ԱԱՀ գումարները չեն վճարել։ Հարկ վճարողները նախապես ներկայացրել են փոքր գումարի վերադարձի դիմումներ, որից հետո պարզեցված ընթացակարգի դիմումներ: Այսինքն, եղել է նախապես ծրագրավորված, մտածված սխեմա` ԱԱՀ-ի գումարները բյուջեից անխոչընդոտ հետ ստանալու նպատակով։ Արդյունքում, պետությանը պատճառված վնասը կազմել է շուրջ 300 միլիոն դրամ: Չարաշահում իրականացնող անձը ձերբակալվել և ներկայացվել է Քննչական կոմիտե, որտեղ նախաձեռնվել է քրեական վարույթ: Մեկ այլ դեպքով «Վ․Ավետիսյան» սահմանափակ պատասխանատվությամբ ընկերությունը, չունենալով դիզելային վառելիքի ձեռքբերման որևէ հաշվարկային փաստաթուղթ, 12 կազմակերպության համար դուրս է գրել 3 միլիարդ դրամ ընդհանուր արժեքով շուրջ 8,300,000 լիտր դիզելային վառելիքի կեղծ հարկային հաշիվներ, որոնցում առանձնացված ԱԱՀ-ի գումարները հաշվանցվել են ստացած տնտեսվարող սուբյեկտների կողմից՝ պետությանը պատճառելով մոտ 500 միլիոն դրամի վնաս: Առավել խոշորներն են «Լիդեր-Օիլ» ՍՊԸ՝ շուրջ 324 միլիոն դրամ, «Ջի ԷՄ ԱՅ» ՍՊԸ՝ շուրջ 65 միլիոն դրամ, «Դավիթ Բոբոխյան» Ա/Ձ՝ շուրջ 20 միլիոն դրամ։ Ձեռք բերված տեղեկություններով առերևույթ հանցանքի մասին հաղորդումը, ներկայացվել է ՀՀ Քննչական կոմիտե, որտեղ նախաձեռնվել է քրեական վարույթ։ Չարաշահում կատարած անձիք դատարանի որոշմամբ կալանավորվել են։ •Բնակարանների արժեքների թերհայտարարագրման դեպքերի բացահայտումներՀետաքննության և օպերատիվ հետախուզության վարչությունը 2024թ-ի հունվար-ապրիլ ամիսներին շարունակել է նաև բազմաբնակարան շենքի կառուցապատող ընկերությունների կողմից բնակարանների գնման իրավունքների պայմանագրերում միտումնավոր ցածր գներով և կանխիկ եղանակով օտարվող բնակարանների արժեքների թերհայտարարագրման դեպքերի բացահայտումները։ Բացահայտումներից մի դեպքով Երևան քաղաքի Արաբկիր վարչական շրջանում կառուցապատման գործունեություն իրականացնող ընկերության ղեկավար անձինք՝ առանձնապես խոշոր չափերով հարկեր չվճարելու նպատակով, խախտելով «Հաշվապահական հաշվառման մասին», «Անկանխիկ գործառնությունների մասին» ՀՀ օրենքների պահանջները, բնակարանների գնման իրավունքների պայմանագրերում պակաս են նշել օտարվող բնակարանների արժեքները: Այս կերպ պայմաններ են ստեղծել, որպեսզի հարկման ենթակա հաշվարկներում թաքցվեն հարկման օբյեկտները: Ձեռնարկված «հսկիչ գնում» օպերատիվ-հետախուզական միջոցառման շրջանակում՝ «Մոդերն Թաուն» սահմանափակ պատասխանատվությամբ ընկերության տնօրենն, իրենց կողմից կառուցված շենքում՝ 95.9 քմ մակերեսով, 81 միլիոն դրամ իրական վաճառքի գնով բնակարանը վաճառելու նպատակով, բնակարանի գնորդից կանխիկ եղանակով ստացել է 80․000 ԱՄՆ դոլար, որից անմիջապես հետո ՊԵԿ աշխատակիցների կողմից տնօրենը և գործարքի կատարմանը ներգրաված մեկ այլ աշխատակից, հանցանք կատարած լինելու անմիջականորեն ծագած հիմնավոր կասկածի առկայության հիմքով, ձերբակալվել և բերվել են ՀՕՀ վարչություն։ Մի խումբ անձանց կողմից նախնական համաձայնությամբ առանձնապես խոշոր չափերով՝ շուրջ 93 միլիոն դրամի հարկեր չվճարելու նախապատրաստություն կատարելու վերաբերյալ վարչության կողմից առերևույթ հանցանքի վերաբերյալ հաղորդում է ուղարկվել ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն՝ ներկայացնելով նաև ձերբակալված անձանց և կազմված փաստաթղթերը։ Արդյունքում, պետությանը պատճառված վնասից 75 միլիոն դրամն արդեն վերականգնվել է։ •ՏՏ կիրառությամբ հարկերը վճարելուց խուսափելու դեպքերի բացահայտումներ 2023թ-ից սկսած և հատկապես 2024 թ-ին ՊԵԿ-ը կենտրոնացել է ժամանակակից տեղեկատվական տեխնոլոգիաների կիրառությամբ հարկերը վճարելուց խուսափելու դեպքերը բացահայտելու եղանակների և մեթոդների վրա։ Խոշոր բացահայտում է տեղի ունեցել 2023 թվականին, երբ ՊԵԿ հետաքննության և օպերատիվ հետախուզության վարչության, Քննչական կոմիտեի և ԱԱԾ աշխատակիցների հետ համատեղ հայտնաբերվել է տվյալների շտեմարան, որի ուսումնասիրությամբ այս պահին ստվերային շրջանառությունը կազմել է շուրջ 105 միլիարդ դրամ, հարկի գումարը՝ շուրջ 32.6 միլիարդ դրամ, որից մինչև օրս վերականգնվել է շուրջ 10.6 միլիարդ դրամը (ցանկն այստեղ)։ Ներկայումս վերականգնման ուղղությամբ իրականացվում են ակտիվ գործողություններ։ 2024թ-ի հունվար-ապրիլ ամիսներին ձեռնարկված օպերատիվ-հետախուզական միջոցառումների շրջանակում՝ շինանյութի, սննդամթրքի, տնտեսական ապրանքների առևտրի, մսամթերքի, գինու-կոնյակի, ծխախոտի արտադրության, ինտերնետ և կաբելային հեռուստատեսության ծառայություններ, հյուրանոցային ծառայություններ մատուցող ընկերությունների մոտ հայտնաբերվել են սերվերային համակարգեր, որոնցում արտացոլված իրական շրջանառությունները էականորեն տարբերվում են հարկային մարմին ներկայացված հաշվարկներում արտացոլված տվյալներից։ Նմանօրինակ բազմաթիվ դեպքեր են եղել: Օրինակ` սննդի և տնտեսական ապրանքների մանրածախ առևտրով զբաղվող «Արամ Կարապետյան» անհատ ձեռնարկատերը 2023թ-ին հարկային մարմին ներկայացված շահութահարկի հաշվարկով հայտարարագրել է շուրջ 360 միլիոն դրամի շրջանառություն, սակայն ձեռնարկված օպերատիվ-հետախուզական միջոցառումների շրջանակում անհատ ձեռնարկատիրոջ գործունեության հասցեում հայտնաբերված տվյալների շտեմարանի հետազոտման արդյունքում փաստական տվյալներ են ձեռք բերվել այն մասին, որ նշված ժամանակահատվածում իրական շրջանառությունը կազմել է շուրջ 1.55 միլիարդ դրամ: Տվյալ ձեռնարկատիրոջ ստվերային շրջանառությունը կազմել է 1.19 միլիարդ դրամ։ Կազմված նախնական հաշվարկով պետությանը պատճառվել է մոտ 400 միլիոն դրամի վնաս։ Նշվածի հիմքով նախաձեռնված քրեական վարույթի շրջանակում արդեն վերականգնվել է 140 միլիոն դրամ։ Քննիչի կողմից նշանակվել է համալիր հարկային ստուգում, իսկ հետագա հետազոտումների նպատակով վերցված համակարգիչը և սերվերն ուղարկվել են փորձաքննության։ 2024թ-ի հունվար-ապրիլ ամիսներին վարչության խոշոր բացահայտումներից է նաև oկտան նավթամթերիքի անվան տակ ԵԱՏՄ անդամ ՌԴ-ից մեծ քանակությամբ բենզինի ներկրումը։ Մասնավորապես՝ ձեռներկված օպերատիվ-հետախուզական միջոցառումների ընթացքում օպերատիվ տվյալներ էին ստացվել այն մասին, որ «Հայր և Որդի Հարոյաններ», «Էդո-Սարուխ», «Գազ-Պրոպան», «Գոռես», «Էկոքիմսինթեզ», «Ռոսօկտանիկա» սահմանափակ պատասխանատվությամբ ընկերությունները և Կարեն Մուրադյան Ա/Ձ-ն օկտանի անվան տակ փաստացի ՌԴ-ից ՀՀ տարածք են ներմուծում բենզին՝ այս եղանակով խուսափելով առանձնապես խոշոր չափերի ակցիզային, բնապահպանական և ԱԱՀ-ի վճարումից։ Ձեռնարկված օպերատիվ-հետախուզական միջոցառումների շրջանակում՝ օկտանի անվան տակ ներմուծված 31 բեռնատարներից կատարվել են նմուշառումներ և ուղարկվել փորձաքննության։ Փորձաքննության եզրակացություններով հիմնավորվել են, որ ներմուծված օկտանն իրականում բենզին է։ Նշված հիմքերով հաղորդումներ են ներկայացվել Քննչական Կոմիտե, որտեղ նախաձեռնվել են քրեական վարույթներ։ Միաժամանակ, ձեռնարկված օպերատիվ-հետախուզական միջոցառումների շրջանակներում, արդեն իսկ, պետական բյուջե է վերականգնվել շուրջ 65 միլիոն դրամ հարկ։ ՊԵԿ-ը վճռական է տրամադրված ստվերում գործող տնտեսվարողների նկատմամբ և շարունակելու է հարկային իրավախախտումները կանխելուն և խափանելուն ուղղված գործընթացները:

12:38 - 21 հունիսի, 2024