Դանիա

Ֆրեդերիկ X-ը Դանիայի նոր թագավորն է դարձել գահից մոր հրաժարվելուց հետո |armeniasputnik.am|

Ֆրեդերիկ X-ը Դանիայի նոր թագավորն է դարձել գահից մոր հրաժարվելուց հետո |armeniasputnik.am|

armeniasputnik.am: Ֆրեդերիկ X-ը Դանիայի նոր թագավոր դարձավ մոր՝ Մարգրետե II-ի գահից հրաժարվելուց հետո, որը երկիրը ղեկավարել է 52 տարի։ Մարգրետե II-ը գահից հրաժարումը ստորագրել է կիրակի Քրիստիանսբորգ թագավորական պալատում տեղի ունեցած արարողության ժամանակ։ Ֆրեդերիկը գտնվում էր մոր աջ կողմում և փաստաթղթի ստորագրումից անմիջապես հետո պաշտոնապես նոր միապետ դարձավ։ Ամանորի իր ուղերձում Դանիայի այժմ արդեն նախկին թագուհի Մարգրետե II-ը հայտարարել էր, որ գահից կհրաժարվի 2024 թվականի հունվարի 14-ին, երբ լրանա իր կառավարման 52-րդ տարին։ 83-ամյա թագուհին հայտարարել էր, որ գահը կթողնի որդուն՝ թագաժառանգ արքայազն Ֆրեդերիկին։ Ավելի վաղ Դանիայի թագավորական պալատը հայտնել էր, որ թագուհի Մարգրետե II-ը իր նախորդներից ամենաերկարն է զբաղեցնում գահը Դանիայի ողջ պատմության ընթացքում։
19:45 - 14 հունվարի, 2024
Դանիայի թագուհի Մարգրեթե II-ը ամանորյա ուղերձի ժամանակ անսպասելիորեն հայտնել է գահից հրաժարվելու մասին |tert.am|

Դանիայի թագուհի Մարգրեթե II-ը ամանորյա ուղերձի ժամանակ անսպասելիորեն հայտնել է գահից հրաժարվելու մասին |tert.am|

tert.am: Դանիայի թագուհի Մարգրեթե II-ն անսպասելիորեն հայտարարել է գահից հրաժարվելու մասին ազգին ուղղված ամանորյա հեռուստատեսային ուղերձի ժամանակ։ Այս մասին գրում է BBC-ն։ Պաշտոնական գահից հրաժարվելը տեղի կունենա հունվարի 14-ին. այդ օրը կլրանա նրա թագուհի դառնալու 52 տարին։ Մարգրեթե II-ի հեռանալուց հետո թագավոր կդառնա նրա ավագ որդին՝ թագաժառանգ Ֆրեդերիկը։ «Ես գահը կթողնեմ իմ որդուն՝ թագաժառանգ Ֆրեդերիկին»,- ասել է միապետը։ 83-ամյա Մարգրեթե II-ը Դանիայի պատմության մեջ ամենաերկար կառավարող միապետն է, որը գահ է բարձրացել 1952 թվականին իր հոր՝ Ֆրեդերիկ IX թագավորի մահից հետո: Աղբյուրը նկատում է, որ Մարգրեթե թագուհին Դանիայում սիրված դեմք է, և շատ դանիացիներ ակնկալում էին, որ նա կմնա գահին մինչև իր մահը: Ի տարբերություն բրիտանական թագավորական ավանդույթի՝ 55-ամյա թագաժառանգ Ֆրեդերիկի թագադրման պաշտոնական արարողություն չի լինելու։ Փոխարենը նույն օրը պալատը կհայտարարի նրա գահ բարձրանալու մասին։
17:14 - 01 հունվարի, 2024
Դանիան 1 միլիոն կրոն է հատկացրել Հայաստանին՝ ԼՂ-ից տեղահանված անձանց օգնելու համար

Դանիան 1 միլիոն կրոն է հատկացրել Հայաստանին՝ ԼՂ-ից տեղահանված անձանց օգնելու համար

Դանիան 1 միլիոն կրոն է հատկացրել Հայաստանին՝ Լեռնային Ղարաբաղից բռնի տեղահանված անձանց մարդասիրական օգնություն տրամադրելու համար։ Այս մասին հաղորդագրություն է տարածել Դանիայի արտաքին գործերի նախարարությունը։ Նշվում է, որ օգնությունը կտրամադրվի Դանիայի Կարմիր Խաչի ընկերության միջոցով, որն աջակցում է Հայկական Կարմիր խաչի ընկերությանը և Կարմիր խաչի շարժման գործընկերներին՝ օգնություն տրամադրելու Լեռնային Ղարաբաղի շրջաններից հակամարտությունից տուժած, իրենց տներից տեղահանված հայ բնակչությանը: Անհապաղ արձագանքը կկենտրոնանա ապաստան տրամադրելու, պարենային անվտանգության, առողջության և խնամքի վրա: «Հակամարտության պատճառով հազարավոր մարդիկ այս օրերին լքում են Լեռնային Ղարաբաղը և հետևաբար, օգնության կարիքը զգալիորեն մեծանում է: Անհրաժեշտ է ինչպես անհապաղ օգնություն՝ ապաստանի և շտապ օգնության տեսքով, այնպես էլ հոգեսոցիալական աջակցություն: Այդ իսկ պատճառով Դանիայի արտաքին գործերի նախարարության աջակցությունը կարևոր է»,- ասել է Դանիայի Կարմիր Խաչի գլխավոր քարտուղար Անդերս Լադեկարլը։ Հայաստանում Դանիայի դեսպան Աննե Թոֆթ Սորենսենն իր հերթին հայտարարել է, որ Հայաստանում և կովկասյան տարածաշրջանում բոլորն ազդված են այս օրերին և ժամերին Լեռնային Ղարաբաղից Հայաստան մուտք գործող բազմաթիվ հայերի իրավիճակից և անորոշ ապագայից: «Իրավիճակը շատ բարդ է, և այդ իսկ պատճառով Դանիայի Կարմիր Խաչի ընկերության միջոցով աջակցելու Դանիայի որոշումը կարևոր է։ Հուսով եմ, օգնությունը կօգնի մեղմել բազմաթիվ տուժած ընտանիքների անմիջական կարիքները։ Դանիան լիովին աջակցում է ԵՄ-ի կողմից Ադրբեջանի ռազմական գործողության և դրա պատճառած մարդկային կորուստների խստիվ դատապարտմանը։ Առաջին հերթին կարևոր է խուսափել նոր սրացումներից։ ԵՄ-ում մենք ակտիվորեն աշխատում ենք հակամարտության դեէսկալացիայի և միջնորդության միջոցով երկարաժամկետ լուծման ուղղությամբ: ԵՄ-ում այլ գործողությունների տարբերակները շարունակաբար դիտարկվում են զարգացող իրավիճակի լույսի ներքո»,- նշել է Հայաստանում Դանիայի դեսպան Աննե Թոֆթ Սորենսենը:
21:01 - 29 սեպտեմբերի, 2023
Հայաստանում Դանիայի դեսպանը հիշեցրել է Լաչինի միջանցքի տևական շրջափակման վերաբերյալ ԵՄ դիրքորոշումը

Հայաստանում Դանիայի դեսպանը հիշեցրել է Լաչինի միջանցքի տևական շրջափակման վերաբերյալ ԵՄ դիրքորոշումը

Լաչինի միջանցքի տևական շրջափակման վերաբերյալ Եվրամիության դիրքորոշումը հետևյալն է․ «Ադրբեջանի իշխանությունները պարտավոր են անհապաղ երաշխավորել Լաչինի միջանցքով տեղաշարժի անվտանգությունն ու ազատությունը և թույլ չտալ ճգնաժամի հետագա խորացում»։ Այդ մասին թվիթերյան իր միկրոբլոգում գրել է Հայաստանում և Վրաստանում Դանիայի դեսպան Աննե Թոֆթ Սորենսենը՝ հիշեցնելով ԵՄ արտաքին և անվտանգության քաղաքականության հարցերով բարձր ներկայացուցիչ Ժոզեպ Բորելի երեկվա հայտարարությունը։  Նշենք, որ ԵՄ արտաքին հարաբերությունների գծով բարձրագույն հանձնակատար Ժոզեպ Բորելը նշել էր, որ ԵՄ-ն ի գիտություն է ընդունել Բաքվի՝ Աղդամով ապրանքներ մատակարարելու պատրաստակամությունը, բայց դա Լաչինի միջանցքի բացման այլընտրանքը չէ։ ԵՄ-ն նաև նշում է, որ ԿԽՄԿ-ի գործունեությունը տարածաշրջանում մեծ ազդեցություն է ունեցել և կոչ է անում վերսկսել այն՝ ներառյալ բժշկական նպատակներով տարհանումը և մարդասիրական մատակարարումները: ԵՄ-ն ընդգծում է, որ մարդասիրական հասանելիությունը չպետք է քաղաքականացվի որևէ դերակատարի կողմից:
15:03 - 27 հուլիսի, 2023
Անդրադարձ է կատարվել Հայաստան-ԵՄ գործընկերության օրակարգին. խորհրդակցություններ Հայաստանի և Դանիայի ԱԳՆ-ների միջև

Անդրադարձ է կատարվել Հայաստան-ԵՄ գործընկերության օրակարգին. խորհրդակցություններ Հայաստանի և Դանիայի ԱԳՆ-ների միջև

Ապրիլի 5-ին Կոպենհագենում տեղի են ունեցել քաղաքական խորհրդակցություններ Հայաստանի Հանրապետության և Դանիայի Թագավորության արտաքին քաղաքական գերատեսչությունների միջև: Հայկական պատվիրակությունը գլխավորում էր ՀՀ ԱԳՆ Եվրոպայի վարչության պետ Արա Մարգարյանը, դանիականը՝ ԱԳՆ քաղաքական տնօրեն Անդերս Թանգ Ֆրիբորգը: ԱԳՆ-ից հայտնում են, որ խորհրդակցությունների ընթացքում կողմերը քննարկել են հայ-դանիական երկկողմ քաղաքական օրակարգի հարցերի լայն շրջանակ, ընդգծել բարձրաստիճան քաղաքական երկխոսության, առևտրատնտեսական կապերի ակտիվացման անհրաժեշտությունը: Հատուկ անդրադարձ է կատարվել Հայաստան-ԵՄ գործընկերության օրակարգին, Համապարփակ և ընդլայնված գործընկերության համաձայնագրի (CEPA) կիրարկմանը և Հայաստանում ընթացող բարեփոխումների գործընթացներին։ Մտքեր են փոխանակվել երկուստեք հետաքրքրություն ներկայացնող միջազգային և տարածաշրջանային օրակարգի մի շարք հարցերի շուրջ։ Կարևորվել է նաև բազմակողմ հարթակներում շարունակական համագործակցությունը: ԱԳՆ Եվրոպայի վարչության պետը ներկայացրել է Հարավային Կովկասում առկա անվտանգային բարդ իրավիճակը և խաղաղության հաստատմանն ուղղված Հայաստանի շարունակական ջանքերը։ Անդրադառնալով Ադրբեջանի ագրեսիվ գործողություններին, այդ թվում՝ վերջին շրջանի, Լաչինի միջանցքի ապօրինի արգելափակման հետևանքով Լեռնային Ղարաբաղում ահագնացող հումանիտար ճգնաժամին՝ նշել է, որ Ադրբեջանի քայլերը միտված են խաթարելու տարածաշրջանում խաղաղություն հաստատելու ջանքերը: Այս համատեքստում Արա Մարգարյանը կարևորել է Արդարադատության միջազգային դատարանի փետրվարի 22-ի որոշման իրականացումը և ընդգծել Լաչինի միջանցք միջազգային փաստահավաք առաքելության գործուղման հրամայականը:
14:13 - 06 ապրիլի, 2023
Հայաստանում և Վրաստանում Դանիայի դեսպանը մտահոգված է Լաչինի միջանցքի իրադրությամբ

Հայաստանում և Վրաստանում Դանիայի դեսպանը մտահոգված է Լաչինի միջանցքի իրադրությամբ

Եվրամիությունը մտահոգված է Լաչինի միջանցքում տարածաշրջանային զարգացումներով և կրկնում է Ադրբեջանին ուղղված իր կոչը՝ ամբողջությամբ վերականգնելու ազատ տեղաշարժը: Այս մասին իր թվիթերյան միկրոբլոգում գրել է Հայստանում և Վրաստանում Դանիայի դեսպան Անն Տոֆտ Սորենսենը: «Եվրամիությունն ավելի ու ավելի է անհանգստանում Հայաստանի վրա մարդասիրական բացասական ազդեցության համար: Ստեղծվում է լարվածություն, որը հակասում է վստահության ամրապնդմանն ուղղված այդքան անհրաժեշտ ջանքերին»,- նշել է դեսպանը։ 2022թ․ դեկտեմբերի 12-ից Ադրբեջանը փակել է Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ է Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում ՀՀ-ից վերադառնալ Արցախ։ Հունվարի 17-ին 19 երեխա ռուսական խաղաղապահ զորակազմի ուղեկցությամբ Գորիս-Ստեփանակերտ ճանապարհով վերադարձել է տուն։  Շրջափակման պատճառով ՀՀ-ից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ․ առկա է սննդի, դեղորայքի պակաս: 10 երեխա նորածնային և վերակենդանացման բաժանմունքներում է, 9 բուժառու՝ վերակենդանացման բաժանմունքում․ 4-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 34 հայ և 4 օտարերկրացի է միայն Կարմիր խաչի միջնորդությամբ տեղափոխվել ՀՀ, իսկ Արցախում հիվանդներից մեկը մահացել է: Հունվարի 10-ից վթարի պատճառով Արցախում էլեկտրամատակարարումը կատարվում է հովհարային անջատումների չորսժամյա գրաֆիկով։ Ադրբեջանը հունվարի 18-ի առավոտից կրկին խափանել է Հայաստանից Արցախը սնուցող միակ գազատարի աշխատանքը:
16:02 - 18 հունվարի, 2023
Ֆրանսիան հաղթեց Դանիային Մբապեի դուբլի շնորհիվ |armenpress.am|

Ֆրանսիան հաղթեց Դանիային Մբապեի դուբլի շնորհիվ |armenpress.am|

armenpress.am: Ֆուտբոլի աշխարհի առաջնության խմբայի փուլի երկրորդ տուրի շրջանակներում Ֆրանսիայի հավաքականը մրցեց Դանիայի թիմի հետ: D ենթախմբի այս հանդիպումը կայացավ Կատարի մայրաքաղաք Դոհայի «974» մարզադաշտում: Հենց մեկնարկից աշխարհի գործող չեմպիոնները մեծ ուժերով գրոհում էին: Սակայն մեկը մյուսին հաջորդող գրոհների վերջնամասում չէր բավարարում միայն վերջին, դիպուկ հարվածը: Վիճակագրությունը խոսում էր Ֆրանսիայի օգտին, սակայն Դանիայի պաշտպանությունը գործում էր գրեթե անթերի: Առաջին կեսում այդպես էլ դարպասի գրավում չարձանագրվեց և թիմերն ընդմիջման գնացին զրոյական ոչ-ոքի հաշվով:   Երկրորդ կեսի մեկնարկում Ֆրանսիան այնուամենայնիվ իրացրեց իր պահը: Գոլն իր ակտիվում գրանցեց Մբապեն: Սակայն Դանիայից 7 րոպե պահանջվեց հաշվի հավասարությունը վերականգնելու համար: Գոլի հեղինակ դարձավ Կրիստիանսենը: Հանդիպման վերջնամասում Մբապեն դարձավ նաև դուբլի հեղինակ: Նա աչքի ընկավ 86-րդ րոպեին:   Ֆրանսիա-Դանիա` 2:1:   Այս տուրից հետո Ֆրանսիան մնում է մրցաշարային աղյուսակի առաջատար և ունի 4 միավոր: Երկրորդ տեղում 3 միավորով Ավստրալիան է: 2 միավոր ունի Դանիան և մեկը` Թունիսը: Վերջին տուրում միմյանց դեմ կմրցեն Ավստրալիա-Դանիա, Թունիս-Ֆրանսիա զույգերը:
22:04 - 26 նոյեմբերի, 2022
«Հյուսիսային հոսք» գազատարներից արտահոսքը պայթյունների հետևանք է

 |factor.am|

«Հյուսիսային հոսք» գազատարներից արտահոսքը պայթյունների հետևանք է |factor.am|

factor.am: «Հյուսիսային հոսք 1» և «Հյուսիսային հոսք 2» գազատարների  պայթյունները կանխամտածված  դիվերսիա են եղել․ այս մասին հայտնում է DW-ի ռուսական ծառայությունը՝ հղում անելով Դանիայի և Լեհաստանի վարչապետներին։ «Համապատասխան գերատեսչությունների գնահատականն այժմ միանշանակ է. սա կանխամտածված գործողությունների արդյունք է: Սա պատահականություն չէ»,- ասել է Դանիայի վարչապետ Մետե Ֆրեդերիկսենը՝ հավելելով, որ իշխանությունները «դեռևս տեղեկություն չունեն, թե ով կարող էր կանգնած լինել այս ամենի հետևում»: Ավելի վաղ հաղորդվել էր, որ երկրի իշխանությունները հետաքննում են, և «որոշ ապացույցներ վկայում են դիվերսիայի հնարավորության մասին»։ Դանիայի կլիմայի և էներգետիկայի նախարար Դեն Յորգենսենը հաստատել է երկրաբանների այն տեղեկությունները, որ գազատարների վրա արտահոսք է գրանցվել՝ ընդգծելով, որ երկաթբետոնե կոնստրուկցիաներով խողովակները գտնվում են ծովի խորքում, իսկ արտահոսքի չափերը վկայում են այն մասին, որ դա չէր կարող  լինել վթար, օրինակ, նավի խարսխի պատճառով։
11:17 - 28 սեպտեմբերի, 2022
Դանիան միացել է ԵՄ պաշտպանական քաղաքականությանը

Դանիան միացել է ԵՄ պաշտպանական քաղաքականությանը

Դանիան միացել է Եվրամիության պաշտպանական քաղաքականությանը։ Այս մասին, ինչպես նշված է ԵՄ դիվանագիտական գերատեսչության կայքում, հայտնել է Եվրոպական Միության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելը։ «Դանիան միացել է եվրոպական պաշտպանական քաղաքականությանը։ Դանիայի արտգործնախարարը մեզ է փոխանցելու փաստաթուղթն այն մասին, որ դանիացիներն ուզում են Եվրամիության օգնությամբ ավելացնել իրենց պաշտպանական ներուժը», - ասել է Բորելը։ Դանիայում հունիսի 1-ին, հանրաքվե է անցկացվել ԵՄ պաշտպանական հարցերով համագործակցության ծրագրին երկրի մասնակցության մասին։ Դանիացիների երկու երրորդը կողմ է արտահայտվել ծրագրին միանալուն։ Դանիան ԵՄ միակ պետությունն էր, որը չէր մասնակցում Պաշտպանության և անվտանգության ընդհանուր քաղաքականությանը։ Դանիայի համար ԵՄ բացառությունը գործում էր 1993 թ-ից։ Այն նշանակում էր, որ Կոպենհագենը մասնակցում է ԵՄ քաղաքացիական առաքելություններին, բայց՝ ոչ ռազմական։ Բացի այդ, թագավորությունը չէր մասնակցում սպառազինության համատեղ մշակմանը, ռազմական սարքավորումների ձեռքբերմանն ու անվտանգության հարցերի քննարկմանը։   Նորա Վանյան Հետևե՛ք մեզ նաև Telegram-ում
14:37 - 20 հունիսի, 2022
Դանիայում հանրաքվե է՝ ԵՄ պաշտպանական քաղաքականությանը մասնակցելու մասին

Դանիայում հանրաքվե է՝ ԵՄ պաշտպանական քաղաքականությանը մասնակցելու մասին

Դանիայում այսօր՝ հունիսի 1-ին, հանրաքվե է անցկացվում ԵՄ պաշտպանական հարցերով համագործակցության ծրագրին երկրի մասնակցության մասին։ Դանիայի շուրջ 4,3 մլն քաղաքացի որոշում է այն բացառություններից հրաժարվելու հարցը, որոնք երկրին թույլ են տալիս չմասնակցել ԵՄ Պաշտպանության և անվտանգության ընդհանուր քաղաքականությանը (CSDP), հայտնում է DW-ն։ Այս բացառությունների չեղարկմանը կողմ է արտահայտվել 14 քաղաքական կուսակցություններից 11-ն, այդ թվում՝ իշխող սոցիալ-դեմոկրատները։ Քվեարկության նախնական արդյունքները հայտնի կդառնան ուշ երեկոյան։ Հանրաքվե անցկացնելու որոշման մասին մարտի սկզբին՝ Ուկրաինայում պատերազմի մեկնարկից 10 օր անց, հայտարարել էր երկրի վարչապետ Մետե Ֆրեդերիկսենն այն բանից հետո, երբ հինգ առաջատար քաղաքական կուսակցություններ պայմանավորվել էին երկրի անվտանգության քաղաքականության փոփոխման մասին։ Դանիան ՆԱՏՕ-ի անդամ է, սակայն ԵՄ միակ պետությունն է, որը չի մասնակցում Պաշտպանության և անվտանգության ընդհանուր քաղաքականությանը։ Դանիայի համար ԵՄ բացառությունը գործում է 1993 թ-ից, այն ընդունվել է, երբ դանիացիները հանրաքվեին մերժել են ԵՄ հիմնադրման մասին Մաաստրիխտի պայմանագիրը։ Այս բացառությունը նշանակում է, որ Կոպենհագենը մասնակցում է ԵՄ քաղաքացիական առաքելություններին, բայց՝ ոչ ռազմական։ Բացի այդ, թագավորությունը չի մասնակցում սպառազինության համատեղ մշակմանը, ռազմական սարքավորումների ձեռքբերմանն ու անվտանգության հարցերի քննարկմանը։ Նորա Վանյան
15:16 - 01 հունիսի, 2022
Ռուսաստանն արտաքսում է դանիացի յոթ դիվանագետների

Ռուսաստանն արտաքսում է դանիացի յոթ դիվանագետների

Ռուսաստանի ԱԳՆ-ն պերսոնա նոն գրատա է հայտարարել Դանիայի դեսպանատան յոթ աշխատակիցների՝ ի պատասխան ռուս դիվանագետների արտաքսման և «Կիևին Դանիայի իշխանության կողմից ռազմական օգնության տրամադրման», գրում է «Կոմերսանտը»։ ՌԴ ԱԳՆ-ն զգուշացրել է նաև, որ կարող է միջոցներ ձեռնարկել՝ «ի պատասխան Կոպենհագենի ոչ բարեկամական գործողությունների»։ «Ռուսական կողմից նշվել է, որ թագավորության բացահայտ հակառուսական քաղաքականությունը լուրջ վնաս է հասցնում երկկողմ հարաբերություններին», - ասված է Ռուսաստանի ԱԳՆ հաղորդագրությունում։ Բացի դրանից, գերատեսչությունը հավելել է, որ հրաժարվել է վիզա տրամադրել Դանիայի դիվանագիտական առաքելության դիվանագետներից մեկին։ Ապրիլի 5-ին Դանիան արտաքսել էր Դանիայում ՌԴ դեսպանատան և Կոպենհագենում Առևտրային ներկայացուցչության 15 աշխատակիցների։ Երկիրը նրանց մեղադրել էր լրտեսության համար։   Նորա Վանյան
15:07 - 05 մայիսի, 2022
Դանիան, Իտալիան ու Շվեդիան հայտարարել են ռուս դիվանագետներին վտարելու մասին

Դանիան, Իտալիան ու Շվեդիան հայտարարել են ռուս դիվանագետներին վտարելու մասին

Մի շարք եվրոպական երկրներ այսօր հայտարարել են ռուսաստանցի դիվանագետներին վտարելու մասին։ Դանիայի արտգործնախարար Եպե Կուֆուդը հայտարարել է, որ իր երկիրը վտարում է 15 ռուսաստանցի դիվանագետների։ Դանիան միանում է Եվրամիության մյուս երկրներին, որոնք համանման քայլեր են ձեռնարկել ուկրաինական Բուչա քաղաքում խաղաղ բնակիչների սպանության մասին հաղորդագրությունների ֆոնին։ Այս մասին գրում է Reuters-ը՝ հիշեցնելով, որ տարեսկզբին Դանիայի Անվտանգության և հետախուզության ծառայությունն իր զեկույցում հայտնել էր, որ ռուսական դեսպանատան աշխատակիցներից ոմանք լրտեսությամբ են զբաղվում։ Իտալիայի ԱԳՆ-ն հայտարարել է ռուսաստանցի 30 դիվանագետների վտարելու մասին, գրում է «Կոմերսանտը»։ Երկրի արտգործնախարար Լուիջի դի Մայոն ասել է, որ այս քայլն անհրաժեշտ էր երկրի ազգային անվտանգության հետ կապված պատճառներով և ուկրաինական ճգնաժամի համատեքստում։ Շվեդիան նույնպես միացել է եվրոպական մյուս երկրներին և լրտեսության համար վտարել ռուսաստանցի երեք դիվանագետի։ «Պատճառն այն է, որ նրանք հավատարիմ չեն Վիեննային կոնվենցիային և հետախուզական տվյալների հավաքագրման ապօրինի գործունեություն են իրականացնում», - Reuters-ի փոխանցմամբ՝ ասել է Շվեդիայի արտգործնարար Ան Լինդեն։   Նորա Վանյան
16:10 - 05 ապրիլի, 2022
Հայաստանի և Դանիայի ԱԳ նախարարությունները քաղաքական խորհրդակցություններ են անցկացրել

Հայաստանի և Դանիայի ԱԳ նախարարությունները քաղաքական խորհրդակցություններ են անցկացրել

 Երևանում hոկտեմբերի 11-ին տեղի են ունեցել քաղաքական խորհրդակցություններ Հայաստանի Հանրապետության և Դանիայի Թագավորության արտաքին քաղաքական գերատեսչությունների միջև: Հայկական պատվիրակությունը գլխավորել է ՀՀ ԱԳՆ Եվրոպայի վարչության պետ Տիգրան Սամվելյանը, դանիականը՝ երկրի ԱԳՆ պետքարտուղարի տեղակալ, քաղաքական տնօրեն Քրիստինա Մարկուս Լասսենը։ Խորհրդակցությունների ընթացքում զրուցակիցները քննարկել են հայ-դանիական երկկողմ օրակարգի հարցերի լայն շրջանակ՝ արժևորելով երկու երկրների միջև ձևավորված քաղաքական հարաբերությունները։ Անդրադարձ է կատարվել տնտեսական կապերին՝ ուրվագծելով դրանց ամրապնդման և ընդլայնման ուղղությամբ քայլեր ձեռնարկելու անհրաժեշտությունը։ «Կողմերն անդրադարձան Հայաստանի և Դանիայի միջև դիվանագիտական հարաբերությունների հաստատման 30-ամյակի կապակցությամբ կազմակերպվելիք միջոցառումների շրջանակին։ Խորհրդակցությունների ընթացքում մտքեր փոխանակվեցին երկուստեք հետաքրքրություն ներկայացնող միջազգային և գլոբալ օրակարգի մի շարք հարցերի շուրջ»,- ասվում է հաղորդագրության մեջ: Կողմերը ծանոթացել են տարածաշրջանային խնդիրների շուրջ միմյանց դիրքորոշումներին, անդրադարձել նաև միջազգային կազմակերպությունների շրջանակներում համագործակցությանն ու փոխադարձ աջակցությանը։ Կարևորվել է երկկողմ քաղաքական խորհրդակցությունների շարունակականության ապահովման անհրաժեշտությունը: ՀՀ ԱԳՆ-ից հայտնում են, որ այցի ընթացքում դանիական պատվիրակությանն ընդունել է ԱԳ նախարարի տեղակալ Վահե Գևորգյանը։ Զրույցի ընթացքում հայկական կողմը Դանիայի պետքարտուղարի տեղակալին ներկայացրել է Լեռնային Ղարաբաղի հակամարտության շուրջ ստեղծված ներկա իրավիճակը։ Այս համատեքստում կարևորվել է Ղարաբաղյան խաղաղ գործընթացի լիարժեք վերսկսման անհրաժեշտությունը ԵԱՀԿ Մինսկի խմբի համանախագահության շրջանակներում։ Նշվում է, որ այցի շրջանակներում դանիական պատվիրակությունը ծաղկեպսակ է զետեղել Ծիծեռնակաբերդի հուշահամալիրում։
19:54 - 11 հոկտեմբերի, 2021