Ուկրաինա

Կիևը պատրաստ է Ռուսաստանի հետ բանակցությունների «որոշակի փուլում» և պայմանով․ Ուկրաինայի ԱԳՆ |factor.am|

factor.am: Ուկրաինայի արտաքին գործերի նախարար Դմիտրի Կուլեբայի և Չինաստանի արտգործնախարար Վան Յիի Չինաստանի ԱԳՆ ներկայացուցիչ Մաո Նինը հանդիպել են։ «Ուկրաինան մեծ նշանակություն է տալիս Չինաստանի կարծիքին և ուշադիր ուսումնասիրել է ՉԺՀ-ի և Բրազիլիայի վեց կետից բաղկացած կոնսենսուսը հակամարտության քաղաքական կարգավորման վերաբերյալ: Ուկրաինական կողմը ցանկանում է և պատրաստ է բանակցել Ռուսաստանի հետ»,- ասել է նա չինական լրատվամիջոցների հետ զրույցում, գրում է «Վեդոմոստին»։ Սակայն Reuters-ը և ուկրաինական լրատվամիջոցները, վկայակոչելով Ուկրաինայի ԱԳՆ-ի հայտարարությունը, հայտնում են, որ Կուլեբան Չինաստանի ԱԳՆ ղեկավար Վան Յիին ասել է, որ Կիևը պատրաստ է բանակցությունների «որոշակի փուլում»՝ պայմանով, որ Մոսկվայի պատրաստ է «ազնիվ բանակցություններ», ինչը դեռ չկա։ «Դմիտրի Կուլեբան ապացուցեց Ուկրաինայի հետևողական դիրքորոշումը, որը կայանում է որոշակի փուլում ռուսական կողմի հետ բանակցություններ վարելու պատրաստակամության մասին, երբ Ռուսաստանը պատրաստ կլինի բարեխղճորեն բանակցել, սակայն նշել է, որ մինչ այժմ ռուսական կողմից նման պատրաստակամություն չկա»,- ասված է Ուկրաինայի ԱԳՆ հայտարարության մեջ։ Կուլեբան ասել է, որ «ռուսական ագրեսիան ավերել է աշխարհը և դանդաղեցրել է զարգացումը, և պատերազմի յուրաքանչյուր նոր օր ենթադրում է մարդասիրության նոր խախտումներ և արդարության հետագա քայքայում։ Ուստի անհրաժեշտ է վերջ տալ Ուկրաինայի դեմ պատերազմին, վերականգնել խաղաղությունը և արագացնել մեր պետության վերականգնումը»։

15:29 - 24 հուլիսի, 2024

Ռուսական զորքերը հրթիռային հարվածներ են հասցրել Խարկովին |hetq.am|

hetq.am: Ռուսական զորքերը հուլիսի 24-ի առավոտյան հրթիռային հարվածներ են հասցրել Խարկովին։ Այդ մասին հայտնել է Խարկովի քաղաքապետ Իգոր Տերեխովը։ Առաջին հարվածը հասցվել է արդյունաբերական գոտուն, երկրորդը՝ մասնավոր հատվածին։ Բնակելի շենքերից մեկում հրդեհ է բռնկվել: Հայտնի է 1 զոհի մասին, որը խաղաղ բնակիչ է։ Նախնական տվյալներով՝ հարվածները հասցվել է С-300-ի հրթիռներից։ Բացի այդ, Խարկովի մարզային զինվորական վարչակազմի ղեկավար Օլեգ Սինեգուբովը հայտնել է, որ հարվածի տակ է հայտնվել նաև Լեսնոյե գյուղերը։ Դրոնի հարձակման հետևանքով այրվել է ձիանոցի շենքը։ Վիրավորվել է 41 և 18 տարեկան երկու տղամարդ։ Սինեգուբովը հավելել էր, որ Խարկովի Նեմիշլյանսկի շրջանում հրթիռակոծման հետևանքով վնասվել է նաև արդյունաբերական մեկ շենք, սեփական մեկ տուն և 5 ավտոմեքենա։Լուսանկարը՝ Օլեգ Սինեգուբովի տելեգրամյան ալիքից։

13:21 - 24 հուլիսի, 2024

ԱՄՆ և Ուկրաինայի պաշտպանության նախարարները քննարկել են Կիևին ամերիկյան աջակցության հարցերը |hetq.am|

hetq.am: Պենտագոնի ղեկավար Լլոյդ Օսթինը և Ուկրաինայի պաշտպանության նախարար Ռուստեմ Ումերովը հեռախոսազրույց են ունեցել, որի ընթացքում քննարկել են հուլիսին Վաշինգտոնում կայացած ՆԱՏՕ-ի գագաթնաժողովի արդյունքները: Այդ մասին կայացած ճեպազրույցի ժամանակ հայտարարել է Պենտագոնի մամուլի քարտուղար, ռազմաօդային ուժերի գեներալ-մայոր Փաթրիք Ռայդերը։ «Այսօր Օսթինը հեռախոսազրույց է ունեցել Ուկրաինայի պաշտպանության նախարար Ռուստեմ Ումերովի հետ»,- ասել է նա: Ռայդերը նշել է, որ կողմերը քննարկել են Վաշինգտոնում կայացած ՆԱՏՕ-ի գագաթնաժողովի արդյունքները, ինչպես նաև ուկրաինական կողմին աջակցելու քայլերը: «Ումերովը Օսթինին նաև թարմ տեղեկատվություն է տրամադրել Ուկրաինայում առկա իրավիճակի զարգացման դինամիկայի մասին»,- հավելել է ամերիկյան պաշտպանական գերատեսչության ներկայացուցիչը: ՆԱՏՕ-ի գագաթնաժողովը տեղի էր ունեցել հուլիսի 9-11-ը։ Դրա գլխավոր թեմաներն էին Ռուսաստանի հետ դիմակայությունը և Ուկրաինային ռազմական աջակցության ցուցաբերումը։ Գագաթնաժողովի մասնակիցները հրապարակել են ամփոփիչ հռչակագիր, որտեղ Պեկինին կոչ էին արել դադարեցնել ուկրաինական պատերազմում Մոսկվային նյութական ու քաղաքական աջակցության ցուցաբերումը, ինչպես նաև կանխել երկակի նշանակության ապրանքների արտահանումը Ռուսաստան։

13:08 - 24 հուլիսի, 2024

Ուկրաինայի ԱԳՆ ղեկավարը բանակցությունների համար մեկնել է Չինաստան |factor.am|

factor.am: Ուկրաինայի արտաքին գործերի նախարար Դմիտրի Կուլեբան մեկնել է Չինաստան՝ տեղի արտգործնախարար Վան Յիի հրավերով, փոխանցում է BBC-ի ռուսական ծառայությունը։ Քննարկման հիմնական թեման, ինչպես ասվում է Կուլեբայի հայտարարության մեջ, ռուսական ագրեսիան կասեցնելու ուղիների որոնումն է և Չինաստանի հնարավոր դերը խաղաղության հասնելու գործում։ Պեկինը հրաժարվել է միանշանակ դատապարտել Ռուսաստանի ներխուժումն Ուկրաինա, փոխարենը Չինաստանի իշխանությունները բանակցությունների կոչ են անում և հայտարարում են իրենց չեզոքության մասին Ռուսաստանի և Ուկրաինայի միջև պատերազմում։ Չինաստանը նաև չի միացել Ռուսաստանի դեմ արևմտյան պատժամիջոցներին և մեծացրել է առևտուրը Ռուսաստանի հետ՝ օգնելով նրան պահպանել իր ռազմական արդյունաբերությունը: Շարունակությունը՝ սկզբնաղբյուր կայքում։

17:02 - 22 հուլիսի, 2024

Լվովում սպանվել է Ուկրաինայի ամենահայտնի ազգայնական գործիչներից մեկը |azatutyun.am|

azatutyun.am: Ուրբաթ երեկոյան Լվովում սպանվել է Ուկրաինայի ամենահայտնի ազգայնական գործիչներից մեկը՝ Գերագույն ռադայի նախկին պատգամավոր Իրինա Ֆարիոնը։ Ուկրաինական ոստիկանության տեղեկություններով՝ անհայտ տղամարդը ատրճանակից կրակել է քաղաքական գործչի գլխին։ Ֆարիոնը հայտնի էր Ռուսաստանի, ինչպես նաև Ուկրաինայի տարածքում ռուսաց լեզվի կիրառման դեմ իր կոշտ ելույթներով։ Նախորդ տարի նա հայտնվել էր սկանդալի կիզակետում այն բանից հետո, երբ հայտարարել էր, որ «ուկրաինական բանակի կազմում կռվող ռուսախոս զինվորականները իսկական ուկրաինացիներ չեն»։

14:44 - 20 հուլիսի, 2024

Լոնդոնը և Կիևը կկարողանան պաշտպանական ոլորտում 2 մլրդ ֆունտ ստեռլինգի պայմանագրեր կնքել |1lurer.am|

1lurer.am: Ուկրաինայի նախագահը Լոնդոնում հանդիպել է Մեծ Բրիտանիայի նորընտիր վարչապետի հետ: Ուկրաինական կողմի տվյալով՝ Վոլոդիմիր Զելենսկին և Քիր Սթարմերը քննարկել են ռուս-ուկրաինական հակամարտությունը, մասնավորապես՝ իրավիճակը ռազմաճակատում: Այնուհետև Զելենսկու և Սթարմերի ներկայությամբ Ուկրաինայի պաշտպանունակությանը վարկային աջակցության մասին համաձայնագիր է ստորագրվել: Փաստաթղթով նախատեսվում է օգնություն տրամադրել հակաօդային պաշտպանության համակարգերի, զրահատեխնիկայի, զինամթերքի վերանորոգման և մասնակի արտադրության ոլորտում։ Լոնդոնը և Կիևը կկարողանան 2 միլիարդ ֆունտ ստեռլինգի պայմանագրեր կնքել: Ընդ որում՝ այս գումարը վերջնական չէ և, հնարավոր է, ավելանա:

20:13 - 19 հուլիսի, 2024

Նոր գումարման Եվրախորհրդարանն ընդունել է Ուկրաինային աջակցող առաջին բանաձևը. ծայրահեղ աջերը դեմ են քվեարկել |1lurer.am|

1lurer.am: Նոր գումարման Եվրախորհրդարանը ձայների ճնշող մեծամասնությամբ՝ 495 կողմ, 137 դեմ, 47 ձեռնպահ հարաբերությամբ ընդունել է առաջին բանաձևը՝ Ուկրաինային աջակցության վերաբերյալ: Եվրոպացի պահպանողականներն ու ռեֆորմիստները կողմ են արտահայտվել բանաձևին, սակայն ծայրահեղ աջ «Հայրենասերներ հանուն Եվրոպայի» և «Ինքնիշխան ազգերի Եվրոպա» խմբերի պատգամավորները դեմ են քվեարկել փաստաթղթին։ Բանաձևը հաստատում է Ուկրաինային քաղաքական, տնտեսական և ռազմական աջակցություն ցուցաբերելու հանձնառությունը «այնքան ժամանակ, որքան անհրաժեշտ լինի հաղթանակն ապահովելու համար»։ Փաստաթղթի համաձայն՝ ԵՄ անդամ երկրները մինչ օրս Ուկրաինային տրամադրել են ընդհանուր առմամբ մոտ 108 միլիարդ եվրո, որի մեկ երրորդը ռազմական օգնություն է։ Եվրախորհրդարանի պատգամավորները կողմ են արտահայտվել նաև Ուկրաինային մատակարարվող արևմտյան զենքով Ռուսաստանի ռազմական օբյեկտների թիրախավորման սահմանափակումների վերացմանը։

12:55 - 18 հուլիսի, 2024

Եվրախորհրդարանի նոր կազմը կոչ է արել շարունակել աջակցությունն Ուկրաինային և դատապարտել Օրբանի այցը Մոսկվա |azatutyun.am|

azatutyun.am: Եվրախորհրդարանի նոր կազմը, երեկ ընդունած բանաձևով, կոչ է արել շարունակել աջակցությունը Ուկրաինային և դատապարտել Հունգարիայի վարչապետ Վիկտոր Օրբանի այցը Ռուսաստան։ Փաստաթուղթը սահմանում է Ուկրաինայի դեմ Ռուսաստանի ագրեսիվ պատերազմի վերաբերյալ առաջին պաշտոնական դիրքորոշումը, նշվում է հաղորդագրությունում։ Բանաձևն ընդունվել է ձայների 495 կողմ, 137 դեմ և 47 ձեռնպահ հարաբերակցությամբ։ Փաստաթուղթը հաստատում է աջակցությունը Ուկրաինայի անկախությանը, ինքնիշխանությանը և տարածքային ամբողջականությանը, կոչ է անում ընդլայնել Ռուսաստանի և Բելառուսի դեմ պատժամիջոցները և բռնագրավել ռուսական սառեցված պետական ակտիվները։ «Վերահաստատելով համոզմունքը, որ Ռուսաստանը պետք է փոխհատուցում վճարի Ուկրաինային հասցրած ավերածությունների համար, Եվրախորհրդարանի պատգամավորները ողջունում են ԵՄ վերջին ջանքերը՝ ռուսական սառեցված ակտիվներից եկամուտներն ուկրաինական պատերազմին ուղղելու համար», - ասված է հայտարարությունում։ Եվրախորհրդարանը դատապարտել է Վիկտոր Օրբանի վերջին այցը Ռուսաստան։ Բանաձևում ասվում է, որ նա չի ներկայացնում ԵՄ-ն, և նրա այցը «պայմանագրերի և ԵՄ ընդհանուր արտաքին քաղաքականության բացահայտ խախտում է»: Հունգարիան «պետք է պատժվի այդ գործողությունների համար», նշվում է բանաձևում։ Հուլիսի 1-ից Հունգարիան ռոտացիոն կարգով ստանձնել է Եվրոպական խորհրդի նախագահությունը, որից անմիջապես հետո վարչապետ Վիկտոր Օրբանը ացելել է Կիև, Մոսկվա, Պեկին՝ այդ երկրների ղեկավարների հետ քննարկելով Ուկրաինայի հակամարտությունը։ Նա իր հանդիպումներն անվանել է «խաղաղության առաքելություն»։ Բրյուսելն այս այցերը չի արտոնել, Օրբանն ինքն է խաղաղության շուրջ հանդիպումները նախաձեռնել։ Այս այցերից հետո Օրբանը՝ ոչ հրապարակային նամակ է հղել ԵՄ ղեկավարությանը՝ նախազգուշացնելով՝ «առաջիկա երկու ամսում ուկրաինական ճակատում հնարավոր են ավելի դրամատիկ կորուստներ և ռազմական իրադարձություններ, քան երբևէ»։ Նամակում Օրբանը Բրյուսելին տեղեկացրել է Ուկրաինայի պարտության հարցում Ռուսաստանի նախագահ Վլադիմիր Պուտինի վստահության մասին։

09:10 - 18 հուլիսի, 2024

Ռուսաստանը և Ուկրաինան գերիների փոխանակում են կատարել 95-ը 95-ի դիմաց ձևաչափով |armenpress.am|

armenpress.am: ՌԴ պաշտպանության նախարարությունը հայտնել է, որ բանակցային գործընթացի արդյունքում ուկրաինական գերությունից վերադարձվել է 95 ռուսաստանցի զինծառայող։ «Արմենպրես»-ի փոխանցմամբ՝ գերատեսչությունը նշում է, որ դրա դիմաց ուկրաինական կողմին է վերադարձվել 95 ռազմագերի։ «Ռուս զինվորականների՝ գերությունից վերադարձի ժամանակ հումանիտար բնույթի միջնորդական մասնակցություն է ցուցաբերել Արաբական Միացյալ Էմիրությունները», - նշված է ՌԴ ՊՆ հաղորդագրությունում։ Ազատ արձակված զինծառայողները կտեղափոխվեն Մոսկվա՝ ՌԴ ՊՆ բուժհաստատություններում բուժման և վերականգնման նպատակով։ Հունիսի 25-ին ՌԴ պաշտպանության նախարարությունը հայտնել էր, որ Մոսկվան և Կիևը գերիների փոխանակում են կատարել 90-90 ձևաչափով՝ ԱՄԷ-ի միջնորդությամբ։ Հունիսի 5-ին ՌԴ նախագահ Վլադիմիր Պուտինը հայտարարել էր, որ Ուկրաինայում գերության մեջ է գտնվում 1348 ռուսաստանցի զինվորական, իսկ Ռուսաստանում է գտնվում Ուկրաինայի զինված ուժերի 6465 գերեվարված զինծառայող։ Մայիսի 31-ին ՌԴ ՊՆ-ն հայտնել էր, որ ԱՄԷ-ի միջնորդությամբ Ռուսաստանը և Ուկրաինան գերիների փոխանակում են կատարել 75-ը 75-ի դիմաց ձևաչափով, իսկ դրանից առաջ՝ փետրվարի 8-ին, կողմերը միմյանց վերադարձրել էին 100-ական գերու՝ կրկին ԱՄԷ-ի միջնորդությամբ, հիշեցնում է «Ինտերֆաքս»-ը։ Հունվարի վերջին էլ 195 ռուսաստանցի ռազմագերի փոխանակվել էր 195 ուկրաինացի ռազմագերու հետ։

19:23 - 17 հուլիսի, 2024

95-ը՝ 95-ի դիմաց․ ՌԴ-ն և Ուկրաինան ռազմագերիների են փոխանակել |factor.am|

factor.am: Ռուսաստանը և Ուկրաինան ռազմագերիների են փոխանակել։ Այս մասին հայտնել են Ուկրաինայի նախագահ Վլադիմիր Զելենսկին և ՌԴ Պաշտպանության նախարարությունը, գրում է BBC-ի ռուսական ծառայությունը։ «Մենք շարունակում ենք մեր մարդկանց տուն բերել։ Եվս 95 պաշտպան ազատ է արձակվել ռուսական գերությունից»,- սոցցանցերում հայտնել է Վլադիմիր Զելենսկին։ Նրա խոսքով՝ ազատ են արձակվել Ուկրաինայի զինված ուժերի, Ազգային գվարդիայի զինվորականները և սահմանապահները։ Փոխանակումը տեղի է ունեցել Արաբական Միացյալ Էմիրությունների միջնորդությամբ։ ՌԴ ՊՆ-ն ևս հայտնել է փոխանակման մասին՝ 95-95 բանաձևով։ Նախորդ փոխանակման ժամանակ, որը տեղի էր ունեցել հունիսին և դարձյալ կազմակերպվել էր ԱՄԷ-ի աջակցությամբ, Ռուսաստանը և Ուկրաինան վերադարձրել էին 90-ական ռազմագերիների։ Ուկրաինացի զինվորականների գերությունից վերադարձի համակարգող շտաբը պարզաբանել է, որ սա 54-րդ փոխանակումն է պատերազմի սկզբից ի վեր։ Ուկրաինա է վերադարձվել 3405 մարդ։ Նրանց թվում, ովքեր այժմ փոխանակվել են, կան 23 Մարիուպոլի պաշտպաններ, այդ թվում՝ «Ազովստալի» 13 պաշտպաններ:

17:38 - 17 հուլիսի, 2024

Միշելը մերժել է Օրբանի խաղաղության առաջարկները |azatutyun.am|

azatutyun.am: Եվրոպայի խորհրդի նախագահ Շառլ Միշելը պատասխան նամակ է հղել Հունգարիայի վարչապետ Վիկտոր Օրբանին՝ նշելով՝ ԵՄ խորհրդի ռոտացիոն նախագահությունը միջազգային հարթակում չի ներկայացնում Եվրամիությունը, իսկ Հունգարիան համապատասխան մանդատ չի ստացել Եվրոպական խորհրդի կողմից։ Նամակում, որը թվագրված է հուլիսի 16-ով և հայտնվել է «Ազատության» Current Time-ի տրամադրության տակ, Շառլ Միշելը նշել է, որ հաշվի է առնում Հունգարիայի վարչապետի կարծիքներն ու առաջարկները, բայց միևնույն ժամանակ հիշեցնում է, որ Ուկրաինայի վերաբերյալ ԵՄ դիրքորոշումը համաձայնեցվել է կոնսենսուսով և հաստատվել հունիսին կայացած վերջին առաջնորդների գագաթնաժողովի ժամանակ։ Եվրոպայի խորհրդի նախագահն ասել է, որ այդ օրը Եվրամիությունը վերահաստատել է Ուկրաինային և նրա ժողովրդին աջակցելու անսասան հանձնառությունը՝ որքան անհրաժեշտ կլինի։ Միշելը նաև հիշեցնում է Օրբանին, որ ԵՄ Խորհրդում ռոտացիոն նախագահող Հունգարիան միջազգային ասպարեզում Միության անունից հանդես գալու մանդատ չունի։ Շառլ Միշելը հերքել է Օրբանի պնդումը, թե ԵՄ-ն «պատերազմական քաղաքականություն» է վարում՝ նշելով, որ իրականում հակառակն է՝ «Ռուսաստանն է ագրեսորը, իսկ Ուկրաինան՝ զոհը, որն իրացնում է ինքնապաշտպանության իր օրինական իրավունքը»։ ԵՄ պաշտոնյան Ռուսաստանի կողմից իր զորքերի դուրսբերումն Ուկրաինայից համարել է խաղաղության ամենաուղիղ ճանապարհը։ Նամակում Եվրախորհրդի նախագահն ամփոփել է՝ Ուկրաինայի վերաբերյալ ոչ մի քննարկում չի կարող տեղի ունենալ առանց Ուկրաինայի։ Շառլ Միշելը նամակի կրկնօրինակն ուղարկել է ԵՄ անդամ երկրներին՝ նշելով, որ նամակագրության մասին կտեղեկացվի նաև Ուկրաինան։ Հուլիսի 1-ից Հունգարիան ռոտացիոն կարգով ստանձնել է Եվրոպական խորհրդի նախագահությունը, որից անմիջապես հետո վարչապետ Վիկտոր Օրբանը ացելել է Կիև, Մոսկվա, Պեկին՝ այդ երկրների ղեկավարների հետ քննարկելով Ուկրաինայի հակամարտությունը։ Նա իր հանդիպումներն անվանել է «խաղաղության առաքելություն»։ Պեկինից հետո Օրբանը մեկնել էր Ֆլորիդա ու հանդիպել ԱՄՆ նախկին նախագահ, նախագահի հանրապետական թեկնածու Դոնալդ Թրամփի հետ։ Թրամփի հետ հանդիպումից հետո նա X-ում գրառում է կատարել՝ նշելով․ - «Օրվա լավ լուրը. նա պատրաստվում է լուծել այս խնդիրը»։ Ավելի վաղ Թրամփը մի քանի անգամ հայտարարել է, թե նախագահ ընտրվելու դեպքում կարող է 24 ժամում կանգնեցնել արդեն ավելի քան երկու տարի շարունակվող ուկրաինական պատերազմը։ Թե ինչպես՝ մինչև այսօր չի հստակեցրել։ Բրյուսելը այս այցերը չի արտոնել, Օրբանն ինքն է խաղաղության շուրջ հանդիպումները նախաձեռնել։ Այս այցերից հետո Օրբանը՝ ոչ հրապարակայիննամակ է հղել ԵՄ ղեկավարությանը՝ նախազգուշացնելով՝ «առաջիկա երկու ամսում ուկրաինական ճակատում հնարավոր են ավելի դրամատիկ կորուստներ և ռազմական իրադարձություններ, քան երբևէ»։ Նամակում Օրբանը Բրյուսելին տեղեկացրել է Ուկրաինայի պարտության հարցում Ռուսաստանի նախագահ Վլադիմիր Պուտինի վստահության մասին։

09:49 - 17 հուլիսի, 2024

Զելենսկին Խաղաղության երկրորդ գագաթնաժողովին ցանկանում է տեսնել Ռուսաստանի ներկայացուցիչներին |hetq.am|

hetq.am: Ուկրաինայի նախագահ Վլադիմիր Զելենսկին Կիևում կայացած մամուլի ասուլիսի ժամանակ հայտարարել է, որ խաղաղության երկրորդ գագաթնաժողովի ծրագիրը պետք է պատրաստ լինի մինչև 2024 թվականի նոյեմբեր: Այդ մասին հայտնում է Суспiльне-ն։ Զելենսկիի խոսքով՝ գագաթնաժողովի ծրագիրը պատրաստվում են մշակել երեք հանդիպումների ժամանակ, որոնք կանցկացվեն նախարարների և անվտանգության խորհրդականների մակարդակով։ Ուկրաինայի նախագահը նշել է, որ էներգետիկ անվտանգության հարցերով առաջին հանդիպումը նախատեսվում է անցկացնել հուլիսի վերջին կամ օգոստոսի սկզբին Կատարում: Օգոստոսին Թուրքիայում էլ նախատեսվում է անցկացնել ազատ նավարկության վերաբերյալ երկրորդ հանդիպումը, իսկ սեպտեմբերին Կանադայում՝ գերիների փոխանակման և ուկրաինացի երեխաների վերադարձի վերաբերյալ երրորդ հանդիպումը: «Այս երեք կետերից հետո, եթե դրանք աշխատեն, ամբողջությամբ պատրաստ կլինի բոլոր կետերի իրագործման պլանը («խաղաղության բանաձև»-ը)։ Եվ ես խնդիր եմ դրել, որ նոյեմբերին մենք լիովին պատրաստ ծրագիր ունենանք։ Այսպիսով, ծրագիրը պատրաստ կլինի: Երկրորդի գագաթնաժողովի համար ամեն ինչ պատրաստ կլինի։ Եթե այդ երեք կետերը մենք իրականացնենք, և եթե պլանը ամբողջությամբ պատրաստ լինի մեր կողմից, գործընկերների կողմից, ես կարծում եմ, որ ամեն ինչ կարվի։ Մենք պատրաստ կլինենք առավելագույնս մոտեցնել երկրորդ գագաթնաժողովը։ Եվ կարծում եմ, որ Ռուսաստանի ներկայացուցիչները պետք է լինեն երկրորդ գագաթնաժողովում»,- նշել է նախագահ Զելենսկին։ Bloomberg-ի տվյալներով՝ Ուկրաինան մտադիր է խաղաղության երկրորդ գագաթաժողովն անցկացնել մինչև ԱՄՆ նախագահական ընտրությունները, որոնք նախատեսված են նոյեմբերի 5-ին: Կիևում Meduza-ի զրուցակիցը հաստատել է Ուկրաինայի իշխանությունների այդ ցանկությունը։ Միևնույն ժամանակ նա կասկած է հայտնել, որ Ռուսաստանի մասնակցությունը դրան հնարավոր կլինի: ՌԴ ԱԳՆ-ն, մեկնաբանելով խաղաղության գագաթնաժողովին Ռուսաստանի մասնակցության հնարավորությունը, հայտնել է, որ ռուսական կողմը չի պատրաստվում մասնակցել այն միջոցառումներին, որտեղ «առաջ են մղում Զելենսկու բացարձակ փակուղային և վերջնագրային բանաձևը»։ Կրեմլում հայտարարել են, որ Պուտինն ու Ռուսաստանը «միշտ բաց են երկխոսության համար, բայց մենք պետք է հասկանանք, թե ինչի մասին է խոսքը»։

16:54 - 16 հուլիսի, 2024

ՀՀ-ում ձերբակալել են հետախուզվող ՌԴ քաղաքացու, ապա ազատ արձակել՝ ՀՀ-ից հեռանալու արգելանքով․ նա մեղադրվում է Բուչայի դեպքերի մասին բարձրաձայնելու համար |factor.am|

factor.am: Հայաստանում հուլիսի 13-ին ձերբակալվել է Ռուսաստանի իրավապահ մարմիների կողմից հետախուզման մեջ գտնվող ՌԴ քաղաքացի Նատալյա Տ.-ն: Այս մասին Factor.am-ին հայտնում են ՆԳՆ նախարարությունից։ Գերատեսչության փոխանցմամբ՝ ձերբակալությունն իրականացվել է հուլիսի 13-ին, ժամը 6.30-ին, Երևան-Տիվատ չվերթի ինքնաթիռի ժամանումից հետո։ Նատալյա Տ.-ն, ըստ ՀՀ ՆԳՆ-ի, հուլիսի 1-ից ՌԴ Մոսկվայի մարզի իրավապահ մարմինների կողմից հետախուզվում էր ՌԴ քրեական օրենսգրքի 207.3-րդ հոդվածի 2-րդ մասի (Ակնհայտ սուտ տեղեկատվության տարածումը) մեղադրանքով: Meduza-ի փոխանցմամբ՝ Նատալյա Տ.-ն 65 տարեկան է, ռուսաց լեզվի և գրականության ուսուցչուհի է։ Ըստ աղբյուրի քրեական հետապնդման պատճառ է դարձել այն, որ ուսուցչուհին «Բարության դաս» դասաժամի ընթացքում դպրոցականներին պատմել է Բուչայում ռուսական բանակի հանցագործությունների մասին, մի քանի տեսանյութ ցուցադրել ուկրաինական լրատվամիջոցներից և Ռուսաստանի ներխուժումն Ուկրաինա անվանել միջազգային իրավունքի խախտում։ Դասն անցկացվել է 2022 թվականին։ Հայաստանի իրավապահները ռուս ուսուցչուհուն մի քանի ժամ բաժնում պահելուց հետո բաց են թողել՝ Հայաստանից չհեռանալու պահանջով, խափանման միջոց է ընտրվել երկրից չբացակայելու մասին ստորագրությունը։ ՆԳՆ-ն փոխանցում է, որ ՌԴ քաղաքացուն հայտնաբերելու մասին հայտնվել է ՌԴ իրավապահներին։ Շարունակությունը՝ սկզբնաղբյուր կայքում

14:56 - 15 հուլիսի, 2024

ՄԱԿ-ի Գլխավոր վեհաժողովը պահանջել է ռուսական զորքերը դուրս բերել Զապորոժիեի ԱԷԿ-ից․ ՀՀ-ն ձեռնպահ է քվեարկել |factor.am|

factor.am: ՄԱԿ-ի Գլխավոր վեհաժողովը բանաձև է ընդունել Ուկրաինայի միջուկային օբյեկտների, այդ թվում՝ Զապորոժիեի ատոմակայանի տեխնիկական և ֆիզիկական անվտանգության մասին։ Փաստաթղթին կողմ է քվեարկել 99 երկիր, 9 պատվիրակություն դեմ է քվեարկել, 60-ը ձեռնպահ է մնացել, գրում է DW-ի ռուսական ծառայությունը։ Հայաստանը ձեռնպահ է քվեարկել։ ՀՀ հարևան երկրներից ձեռնպահ է մնացել նաև Իրանը, Ադրբեջանը չի մասնակցել քվեարկությանը, Թուրքիան և Վրաստանը կողմ են քվեարկել։ Բանաձևը Ռուսաստանից պահանջում է «դադարեցնել Ուկրաինայի դեմ ագրեսիան» և «անվերապահորեն դուրս բերել իր բոլոր զինված ուժերն այս երկրի տարածքից՝ միջազգայնորեն ճանաչված սահմաններով»։ Ըստ dpa գործակալության՝ թեև 99 երկրների հաստատումը սովորաբար համարվում է հաջողված բանաձևերի համար, Ուկրաինայից ռուսական զորքերի դուրսբերման վերաբերյալ նախորդ բանաձևը հավաքել էր ավելի քան 140 կողմ ձայն։ Փաստաթղթում առանձին պահանջ կա, որպեսզի Ռուսաստանի Դաշնությունը շտապ դուրս բերի իր զինվորականներին և այլ չարտոնված անձնակազմին Զապորոժիեի ատոմակայանից և անմիջապես վերադարձնի կայանը Ուկրաինայի ամբողջական վերահսկողությանը: ՌԴ-ին նաև կոչ է արվել համագործակցել Ատոմային էներգիայի միջազգային գործակալության (ՄԱԳԱՏԷ) հետ, քանի դեռ կայանը չի վերադարձվել ուկրաինական ամբողջական հսկողությանը, և անհապաղ հեռացնել բոլոր հակահետևակային ականները, որոնք տեղադրված են ԱԷԿ-ի տարածքում։

13:26 - 12 հուլիսի, 2024

ՆԱՏՕ-ի անդամները համաձայնեցրել են 2025 թ․ Ուկրաինային 40 մլրդ եվրոյի օգնություն տրամադրումը |1lurer.am|

1lurer.am: ՆԱՏՕ-ի անդամները համաձայնեցրել են 2025 թ․ Ուկրաինային 40 մլրդ եվրոյի օգնության տրամադրումը և հայտարարել, որ Ուկրաինայի՝ դաշինքին անդամակցելու «ուղին անշրջելի է»։ «Մենք վերահաստատում ենք Ուկրաինային աջակցելու մեր վճռականությունը՝ ստեղծելու ուժեր, որոնք կարող են այսօր հաղթել ռուսական ագրեսիան և ապագայում զսպել այն։ Այդ նպատակով մենք մտադիր ենք հաջորդ տարվա ընթացքում հատկացնել 40 մլրդ եվրոյի չափով նվազագույն հիմնական ֆինանսավորում և Ուկրաինայի համար ապահովել անվտանգության ոլորտում օգնության կայուն մակարդակ»,- ասված է գագաթնաժողովի ամփոփիչ հռչակագրում։ ՆԱՏՕ-ի գլխավոր քարտուղար Ենս Ստոլտենբերգն էլ մամուլի ասուլիսի ժամանակ հայտարարել է, որ Ուկրաինան պետք է իրավունք ունենա հարվածել Ռուսաստանի տարածքին, քանի որ դա նախատեսված է ինքնապաշտպանության իրավունքով: Նա հավելել է, որ դաշինքը կհամակարգի ուկրաինական ուժերի նախապատրաստումը ՆԱՏՕ-ի երկրներում:

12:50 - 11 հուլիսի, 2024

Բայդենը և Սթարմերը խոստացել են շարունակել աջակցությունն Ուկրաինային |armenpress.am|

armenpress.am: Վաշինգտոնում անցկացվող ՆԱՏՕ-ի գագաթնաժողովի շրջանակներում ԱՄՆ նախագահ Ջո Բայդենը Սպիտակ տանը երկկողմ հանդիպում է անցկացրել Մեծ Բրիտանիայի վարչապետ Քիր Սթարմերի հետ։ Այս մասին հաղորդագրություն է տարածել Սպիտակ տունը։ Բայդենը շնորհավորել է Սթարմերին խորհրդարանական ընտրությունների արդյունքներով Մեծ Բրիտանիայի վարչապետի պաշտոնը ստանձնելու համար և նշել, որ Բրիտանիան ԱՄՆ-ի կարևոր գործընկերն է։ «Ղեկավարները վերահաստատել են իրենց հանձնառությունը ԱՄՆ-Մեծ Բրիտանիա համագործակցությանը համաշխարհային մակարդակով, մինչ նրանք հասցեագրում են ընդհանուր մարտահրավերները և հնարավորությունները։ Նրանք ընդգծել են իրենց ընդհանուր հանձնառությունը Ուկրաինային աջակցությանը, մինչ երկիրը պայքարում է ռուսական ագրեսիայի դեմ», - նշված է Սպիտակ տան հայտարարությունում։ Իր հերթին Բրիտանիայի վարչապետի գրասենյակը հավելել է, որ կողմերը համաձայնել են անել ամեն բան Ուկրաինային աջակցության համար և երաշխավորել, որ ՌԴ նախագահ Վլադիմիր Պուտինը չհաղթի պատերազմում։ Կողմերը նաև ընդգծել են Իսրայելի և պաղեստինյան ՀԱՄԱՍ արմատական շարժման միջև հրադադարի կարևորությունը՝ շեշտելով իրենց հանձնառությունը երկու պետությունների ստեղծման միջոցով խնդրի լուծմանը։ Բրիտանիայի վարչապետի գրասենյակը նաև հայտարարություն է տարածել Ուկրաինային մինչև 2030-2031 ֆինանսական տարին տարեկան առնվազն 3 մլրդ ֆունտ ստեռլինգի (3,85 մլրդ դոլար) ռազմական աջակցությունը շարունակելու մասին, ինչպես խոստացել էր իր նախորդ Ռիշի Սունակը։

10:15 - 11 հուլիսի, 2024