Փաստաբանների պալատ

53 փաստաբան հանցագործության մասին հաղորդում են ներկայացրել գլխավոր դատախազին՝ ՀՀ նախագահ Արմեն Սարգսյանի երկքաղաքացիության փաստը թաքցնելու հետ կապված

53 փաստաբան հանցագործության մասին հաղորդում են ներկայացրել ՀՀ գլխավոր դատախազին՝ կապված ՀՀ նախագահ Արմեն Սարգսյանի երկքաղաքացիության փաստը թաքցնելու հետ: Այս մասին ֆեյսբուքյան իր էջում տեղեկացրել է Փաստաբանների պալատի նախագահ Արա Զոհրաբյանը: «Ըստ հաղորդման՝ Արմեն Սարգսյանը 2003-2012թթ. առնվազն 10 տարվա Միացյալ Թագավորության քաղաքացիություն է ունեցել և ՀՀ նախագահ է ընտրվել 02.03.2018թ. այն դեպքում, երբ չի բավարարել վերջին վեց տարում միայն ՀՀ քաղաքացի հանդիսանալու պահանջը: Արմեն Սարգսյանը կարող էր ՀՀ նախագահ ընտրվել միայն, եթե նրա ՄԹ քաղաքացիությունը դադարեցված լիներ մինչև 01.03.2012 թվականը (01.03.2018 — 6 տարի): ՀՀ նախագահի աշխատակազմի ղեկավարը նախագահի քաղաքացիության մասով հղում է կատարել ՀՀ օրենսդրությամբ նախատեսված տեղեկանքին, որը ՀՀ նախագահի ընտրության գործընթացում ներկայացվել է ՀՀ ԱԺ: Ուշագրավ է ՀՀ ոստիկանության անձնագրային և վիզաների վարչության պետ Ա.Մկրտչյանի 25.03.2021թ. գրությունը, որով հայտնվել է՝ ՀՀ ոստիկանության անձնագրային և վիզաների վարչության բնակչության պետական ռեգիստրում ՀՀ նախագահ Արմեն Սարգսյանի այլ պետության քաղաքացի հանդիսանալու վերաբերյալ տեղեկատվություն առկա չի եղել , այդ թվում՝ 2018թ. մարտի 2-ի դրությամբ: ՀՀ ոստիկանության ԱՎՎ բնակչության պետական ռեգիստրում համապատասխան տվյալները մշակվում են քաղաքացու տրամադրված կամ ՀՀ իրավասու մարմիններից ստացված տեղեկությունների հիման վրա: Օտարերկրյա պետության քաղաքացիությունը համարվում է մշակման ենթակա տվյալ և մուտքագրվում է ռեգիստր, եթե անձը ներկայացնում է այլ պետության քաղաքացիությունը հավաստող փաստաթուղթ: ՀՀ նախագահի ընտրության համար Ա.Սարգսյանին վեց տարում միայն Հայաստանի Հանրապետության քաղաքացի հանդիսանալու մասին տեղեկանքը տրվել է հիմք ընդունելով ՀՀ ոստիկանության անձնագրային և վիզաների վարչության բնակչության պետական ռեգիստրում առկա տեղեկատվությունը և Արմեն Սարգսյանի կողմից իր դիմումում նշված՝ այլ պետության քաղաքացի չհանդիսանալու վերաբերյալ հայտարարությունը: Այս կապակցությամբ հարկ է նշել նաև, որ որևէ իրավական ակտով սահմանված չէ միայն Հայաստանի Հանրապետության քաղաքացի հանդիսանալը ստուգելու այլ կարգավորումներ: Փաստաբանների անունները՝ Արա Գագիկի Զոհրաբյան Սիմոն Ալբերտի Բաբայան Մանե Գուրգենի Կարապետյան Մարիաննա Սերգեյի Մխիթարյան Ստելլա Հովակիմի Բաղրամյան Վահրամ Բեգոյան Արաքս Վարդանյան Քրիստինե Ավագյան Լուսինե Աշոտի Սարգսյան Վահագն Մովսեսի Քեշիշյան Անդրանիկ Հակոբյան Անժելիկա Հակոբյան Արշակ Անդրանիկի Վարդանյան Արմինե Գևորգի Կարապետյան Հարություն Բաղդասարյան Սարգիս Խաչատուրի Խաչատրյան Լիանա Գրիգորյան Վիկտորիա Պետրոսյան Աննա Լեմսիկի Մանթաշյան Անի Միհրանի Գրիգորյան Ծովինար Կարապետյան Սերգեյ Վաչագանի Մանուկյան Հասմիկ Եղնիկի Մարտիրոսյան Դավիթ Իսրայելյան Լևոն Աշոտի Վարդանյան Վրեժ Խաչիկյան Նազելի Արամի Տեր֊Պետրոսյան Տաթևիկ Բուջատյան Տաթևիկ Շայջյան Գագիկ Մաիլյան Սոնա Գուլակյան Հրայր Խաչատրյան Անժելա Գրիշայի Հովհաննիսյան Գայանե Պապոյան Լյուդվիգ Խորենի Ավետիսյան Աստղիկ Ղազարի Ղազարյան Կարինե Բաղդասարյան Վարդուհի Սարգսյան Անի Բարսեղյան Աննա Վարդանյան Ֆերդինանդ Սարգսյան Գարիկ Ռաֆայելի Հախնազարյան Շուշան Մհերի Հարությունյան Աննա Արթուրի Ծառուկյան Էդուարդ Բորիսի Աղաջանյան Արմեն Մարտունի Հայրապետյան Արտաշես Լեոնիդի Հովհաննիսյան Արմինե Կառլոսի Ֆանյան Հրայր Մերգելոսի Քալաշյան Փափազ Խաչիկի Ավագյան Դավիթ Գրիշայի Դանելյան Լիաննա Գասպարյան Պավլիկ Փոլադյան

16:59 - 30 մարտի, 2021

Դատական օրենսգրքի և մյուս օրենսգրքերի փոփոխությունների նախագծերի փաթեթը անթույլատրելի է և խիստ վտանգավոր․ Փաստաբանների պալատ

Շրջանառության մեջ է դրվել «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին ՀՀ սահմանադրական օրենքի, «Հայաստանի Հանրապետության քրեական դատավարության օրենսգրքում լրացումներ կատարելու մասին», «Հայաստանի Հանրապետության քաղաքացիական դատավարության օրենսգրքում փոփոխություններ և լրացումներ կատարելու մասին», «Հայաստանի Հանրապետության վարչական դատավարության օրենսգրքում փոփոխություններ և լրացումներ կատարելու մասին», «Պետական տուրքի մասին» օրենքում լրացումներ կատարելու մասին օրենքների նախագծերի փաթեթը:ՀՀ փաստաբանների պալատի փորձագիտական խումբը ներկայացրել է դիրքորոշում, ըստ որի դատական օրենսգրքի և մյուս օրենսգրքերի փոփոխությունների նախագծերի փաթեթը անթույլատրելի է և խիստ վտանգավոր: Փորձագիտական խմբի դիրքորոշումը՝ ստորև․«Նախագծային փաթեթով ի թիվս այլոց նախատեսվում են հետևյալ փոփոխությունները՝ Ա. Առաջարկվում է դատական սանկցիաների մեջ ավելացնել «որոշակի դատավարական իրավունքների սահմանափակումը» սանկցիան և այն կիրառել նաև փաստաբանների նկատմամբ. Բ. Առաջարկվում է սահմանել բարձրագույն դատական խորհրդի լիազորություն գործը մեկ դատավորից վերցնելու և մեկ այլ դատավորին փոխանցելու հարցում. Գ. Առաջարկվում է սահմանել պետական տուրք՝ դատավորներին կարգապահական պատասխանատվության ենթարկելու վերաբերյալ ԲԴԽ դիմումներ ներկայացնելու համար: ՀՀ փաստաբանների պալատը գտնում է, որ ներկայացված նախագծերի փաթեթը անթույլատրելի է և խիստ վտանգավոր, ուղղված է դատական պաշտպանության իրավունքի սահմանափակմանը, իրավական պաշտպանության իրավունքի ոտնահարմանը, անկախ դատական համակարգի վերացմանը և այլ հակասահմանադրական և հակաժողովրդավարական նպատակների իրագործմանը: Մասնավորապես, - Բացակայում է նախագծի ընդունման պատշաճ հիմնավորումը: Որպես հիմնավորում է ներկայացված մեկ նախադասություն, որով ըստ էության նշված է, որ Նախագծային փաթեթի նպատակն է ապահովել գործերի դատական քննության արդյունավետ իրականացումը ...: Այս մեկ նախադասությունը կրում է խիստ հռչակագրային բնույթ, չի պարունակում որևէ վերլուծություն, որևէ վիճակագրական տվյալ, որևէ երկրի օրինակ և այլն: Անգամ նախագծի հեղինակները չեն նշել, թե մասնավորապես ինչպես կարող են առաջարկվող փոփոխությունները ազդել գործերի դատական քննության արդյունավետության վրա, կամ դրանց չկատարումը որքանով է դարձնում անարդյունավետ գործերի դատական քննությունը: - Ըստ էության դատարանին հնարավորություն է տրվում սահմանափակել փաստաբանների ելույթ ունենալու, միջնորդություն ներկայացնելու և անգամ ապացույց ներկայացնելու իրավունքը, որպիսի պարագայում փաստաբանը չի ունենալու իրավական օգնություն տրամադրելու օբյեկտիվ հնարավորություն, ինչի արդյունքում նրա մասնակցությունը դատական գործընթացներին կրելու է ձևական բնույթ, իսկ քաղաքացիներն էլ զրկվելու են իրենց սահմանադրական հիմնարար իրավունքից: - Նշված փոփոխությունը Բարձրագույն դատական խորհրդին վերածում է դատական համակարգի վերադաս՝ 4-րդ ատյանի՝ դրանով իսկ կոպտորեն խախտելով իշխանությունների տարանջատման և անկախ դատական համակարգ ունենալու և վերջապես արդարադատության իրականացմանը որևէ միջամտություն արգելքի սահմանադրաիրավական պահանջը»:

17:09 - 18 մարտի, 2021

ՀՀ փաստաբանների պալատը կաջակցի պատերազմից տուժած փաստաբանների ընտանիքներին

ՀՀ փաստաբանների պալատի նախագահ Արա Զոհրաբյանը մարտի 17-ին որոշում է կայացրել յուրաքանչյուր տարվա համար պատերազմում զոհված, գերեվարված, անհայտ կորած կամ հաշմանդամություն ձեռք բերած ընտանիքի անդամ ունեցող փաստաբանների ընտանիքներին հարգանքի տուրք մատուցելու օրեր սահմանելու մասին, ինչպես նաև հաստատել է այդ օրերը ընտրելու կարգը: Այս մասին տեղեկացրին ՀՀ փաստաբանների պալատից։ «Ըստ այս նոր նախաձեռնության՝ փաստաբանական համայնքը պատերազմի հետևանքով զոհված, գերեվարված, անհայտ կորած կամ հաշմանդամություն ձեռք բերած ընտանիքի անդամ ունեցող փաստաբանների ընտանիքներին յուրաքանչյուր տարվա ընթացքում որոշված օրերին հատուկ ուշադրություն է դարձնելու, որը ներառելու են հետևյալ միջոցառումները՝ 1) զոհվածի շիրիմին այցելելը. 2) զոհվածի հիշատակի համար միջոցառում կազմակերպելը. 3) փաստաբանի ընտանիքին նվեր փոխանցելը. 4) փաստաբանի ընտանիքին անհրաժեշտ աշխատանքներին (այդ թվում՝ այգեգործություն, վերանորոգում) մասնակցելը. 5) փաստաբանի ընտանիքին հյուրընկալելը. 6) այլ միջոցառում իրականացնելը»,- ասվում է հաղորդագրության մեջ: Փաստաբանների պալատից նաև հայտնում են, որ նշված նախաձեռնության նպատակն է գոտեպնդել այն փաստաբաններին, որոնց ընտանիքի անդամները զոհվել են, գերեվարվել, անհայտ կորել կամ հաշմանդամություն են ձեռք բերել, ինչպես նաև օրինակ ծառայել հայրենիքի պաշտպանների նկատմամբ մյուս մասնագիտական համայնքների կողմից հատուկ ուշադրություն դարձնելու հարցում:

20:54 - 17 մարտի, 2021

Հայտնի են ՀՀ փաստաբանների պալատի խորհրդի անդամների և կարգապահական գործ նախապատրաստող անձանց անունները

ՀՀ փաստաբանների պալատի մարտի 6-ին կայացած հերթական ընդհանուր ժողովի օրակարգում ընդգրկված են եղել պալատի խորհրդի անդամների ընտրության և կարգապահական գործը նախապատրաստող անձանց ընտրության հարցերը: Ինչպես տեղեկացրին ՀՀ փաստաբանների պալատի մամուլի ծառայությունից, ընդհանուր ժողովին որպես խորհրդի անդամի թեկնածու առաջադրվել էր 23 փաստաբան: Փաստաբանների պալատի խորհրդի անդամի ընտրությունը կրում է վարկանիշային բնույթ և պալատի կանոնադրության համաձայն՝ առաջադրված թեկնածուներից վարկանիշային կարգով կարող են խորհրդի անդամ ընտրվել առավել շատ «կողմ» ձայներ ստացած 12 (տասներկու) թեկնածուները: Ընդհանուր ժողովին որպես պալատի կարգապահական գործը նախապատրաստող անձի թեկնածու առաջադրվել էր 16 փաստաբան: Վարկանիշային կարգով կարող են ընտրվել 20 փաստաբան: Փաստաբանների պալատի ընդհանուր ժողովին մասնակցելու իրավունք են ունեցել 2289 փաստաբան, քվեարկությանը մասնակցել են 1147 փաստաբան (50,1 տոկոս, քվորումը սահմանված է առնվազն մեկ երրորդ): Քվեարկության ամփոփման արդյունքում, ընդհանուր ժողովը որոշել է Փաստաբանների պալատի խորհրդի անդամներ ընտրել հետևյալ փաստաբաններին՝ Բաբայան Սիմոն Ալբերտի Կարապետյան Մանե Գուրգենի Ֆարմանյան Մարինե Պավլուշի Առուստամյան Մելանյա Սարգսի Մեժլումյան Կարեն Սուրիկի Սարդարյան Կարեն Հեկտորի Ասատրյան Սեդրակ Գառնիկի Հարությունյան Հարություն Գագիկի Բեգլարյան Էմին Արամի Հակոբյան Ռուբեն Մարատի Ղազանչյան Լիլիթ Արմենի Հարությունյան Արսեն Միխաելի Փաստաբանների պալատի կարգապահական գործ նախապատրաստող անձինք են ընտրվել հետևյալ փաստաբանները՝ Ալեքսանյան Վերոնիկա Հովսեփի Ալիխանյան Գայանե Գևորգի Բաբայան Հայկ Արթուրի Բաբայան Հունան Համլետի Բալաբեկյան Հասմիկ Վազգենի Բալոյան Ռուբեն Տիգրանի, Թադևոսյան Վահագն Հայկի Թովմասյան Մարինե Սարգսի Մաթևոսյան Հովհաննես Հայկազի Սակովա Զոյա Ալեկսեևնա Սարգսյան Նարինե Մելսիկի Սարգսյան Նվեր Պարգևի Սիմոնյան Արմեն Ալբերտի Փարսադանյան Հովհաննես Կարենի Քամալյան Կարեն Վոլոդյայի Քեշիշյան Վահագն Մովսեսի Հաշվիչ հանձնաժողովի որոշման համաձայն՝ նոր կազմն իր լիազորությունները կստանձնի 2021թ. մարտի 15-ից:

20:04 - 07 մարտի, 2021

Կոչ ենք անում Արմեն Սարգսյանին՝ դիմել Սահմանադրական դատարան. Փաստաբանների պալատ

19:21 - 05 մարտի, 2021

ՓՊ-ն հրատարակել է պատերազմի հետևանքով տուժած անձանց խնդիրների լուծման վերաբերյալ ուղեցույց |armenpress.am|

armenpress.am: Փաստաբանների պալատը ռազմական գործողությունների հետևանքով տուժած անձանց հնարավոր խնդիրների եվ դրանց լուծման ուղիների վերաբերյալ ուղեցույց է հրատարակել: Մամուլի ասուլիսի ժամանակ Հայաստանի փաստաբանների պալատի նախագահ Արա Զոհրաբյանը ասաց, որ 44-օրյա արցախյան պատերազմի ժամանակահատվածում առնչվելով քաղաքացիների խնդիրներին, հասկացել են, որ ռազմական գործողությունների հետևանքով տուժած անձանց որոշ խնդիրներ չեն լուծվում կամ լուծվում են դանդաղ, կամ էլ դրանց լուծման ճանապարհները շատ բազմիմաստ են, և պետք է դրանք դրանք բոլորը համախմբել։ «Այս առիթով մենք նախաձեռնեցինք և կազմեցինք մեկ ուղեցույց, որը կոչվում է «Ռազմական գործողությունների հետևանքով տուժած անձանց հնարավոր խնդիրների եվ դրանց լուծման ուղիների վերաբերյալ»: Փորձել ենք հնարավոր խնդիրները ներառել այս ուղեցույցում և արտացոլել դրանց լուծման ճանապարահները»,- ասաց Զոհրաբյանը: Ուղեցույցում տեղ են գտել զոհված զինծառայողի ընտանիքի, վիրավորում ստացած զինծառայողների, գերեվարված և անհետ կորած զինծառայողների ընտանիքների մասին, առողջական խնդիրներ և վնասվածքներ ստացած անձանց, տեղահանված անձանց, քաղաքացիական անձանց շրջանում զոհերի ընտանիքների և հաշմանդամություն ձեռք բերած անձանց, Սյունիքի մարզում հրետակոծություն կրած անձանց և մարտական գործողությունների մասնակիցների վերաբերյալ հարցեր:

13:27 - 16 փետրվարի, 2021

Փաստաբանների ներկայացուցիչները հանդիպում են գլխավոր դատախազի հետ |news.am|

news.am: Նիկոլ Փաշինյանի հրաժարականի պահանջից միացած եւ նրա նկատմամբ քրեական հետապնդում հարուցելու պահանջ ներկայացնող շուրջ 700 փաստաբանների ներկայացուցիչներն այս պահին հանդիպում են գլխավոր դատախազի հետ։ Այս մասին այսօր՝ դեկտեմբերի 22-ին, Հանրապետության հրապարակում ընդդիմության հանրահավաքին հայտարարեց ՀՅԴ անդամ Գեղամ Մանուկյանը։ Հիշեցնենք, որ այսօր փաստաբանների պալատի դիմաց հավաքվել էին մի քանի հարյուր փաստաբաններ, որոնք երթով շարժվեցին դեպի Ազգային ժողով, այնուհետեւ՝ գլխավոր դատախազություն։ Փաստաբանները հետեւյալ փաստաթղթերը ներկայացրին․ ա) ԱԺ նախագահին՝ ռազմական դրությունը վերացնելու եւ վարչապետին անվստահություն հայտնելու պահանջը բ) փաստաբան հանդիսացող պատգամավորներին՝ «Իմ քայլը» խմբակցությունից դուրս գալու հորդորը գ) ՀՀ գլխավոր դատախազին՝ հանցագործության մասին հաղորդումը։

15:04 - 22 դեկտեմբերի, 2020

Փաստաբանները հասան ԱԺ․ նրանք «Իմ քայլից» 5 պատգամավորի հորդորեցին դուրս գալ խմբակցությունից |news.am|

news.am: Երթով շարժվող փաստաբանները քիչ առաջ հասան Ազգային ժողովի շենքի դիմաց, որտեղ նրանք երկու պահանջ ներկայացրեցին մեկն ուղղված ԱԺ նախագահին, մյուսն այն պատգամավորներին, որոնք կասեցրել են իրենց փաստաբանական արտոնագիրը՝ պայմանավորված պատգամավորական մանդատով։ Փաստաբանների պալատի նախագահը ընթերցեց «Իմ քայլից» Նիկոլայ Բաղդասարյանի, Սուրեն Գրիգորյանի, Հերիքնազ Տիգրանյանի, Աննա Կարապետյանի եւ Արթուր Դավթյանի անունները եւ կոչ արեց նրանց չդառնալ հայրենադավ գործընթացի մաս, կանգնել քաղաքացու եւ պետականության կողքին, նպաստել գերիների վերադարձմանը, ՀՀ սահմանների պաշտպանությանը, դրսեւորել բարձր քաղաքացիական գիտակցություն՝ դուրս գալով «Իմ քայլը» խմբակցությունից, բայց պահպանել մանդատը, որպեսզի հետագայում հնարավորություն ունենան քվեարկել հայանպաստ որոշումների օգտին։ «Մենք հիշելու ենք ձեզ եւ բնականաբար ձեր վարքագիծը»,-դիմելով այդ պատգամավորներին շեշտեց Արա Զոհրաբյանը։ Մյուս պահանջն ուղղված էր Ազգային ժողովի նախագահին եւ բոլոր պատգամավորներին, որպեսզի վերացվի ռազմական դրությունը, եւ հնարավորություն տրվի անվստահություն հայտնել վարչապետ Նիկոլ Փաշինյանին։ «Այսօր անհարկի ռազմական դրություն է հայտարարված եւ մենք պահանջում ենք դա վերացնել»,- ասաց Զոհրաբյանը։ Պահանջները ներկայացնելուց հետո, փաստաբանները երթով շարժվեցին դեպի գլխավոր դատախազություն, որպեսզի հանցագործության մասին հաղորդում ներկայացնեն։

13:12 - 22 դեկտեմբերի, 2020

Փաստաբանների պալատի շենքի մոտից մի խումբ փաստաբաններ երթով շարժվեցին դեպի Ազգային ժողով

Փաստաբանների պալատի շենքի մոտից մի խումբ փաստաբաններ երթով շարժվեցին դեպի Ազգային ժողով, այնուհետև շարժվելու են դեպի ՀՀ գլխավոր դատախազության շենք: «Ֆեյսբուք»-ի իր էջում ՀՀ փաստաբանների պալատի նախագահ Արա Զոհրաբյանը գրել է, որ պահանջելու են ԱԺ նախագահին ռազմական դրությունը վերացնել և վարչապետին անվստահություն հայտնել, հորդորելու են փաստաբան հանդիսացող պատգամավորներին՝ «Իմ քայլը» խմբակցությունից դուրս գալ, իսկ ՀՀ գլխավոր դատախազին ներկայացնելու են հանցագործության մասին հաղորդում: «Մենք՝ փաստաբաններս ցանկանում ենք մարդուն պաշտպանել Հայաստանի Հանրապետության դրոշը կրող դատարանում: Մեր պետականության կորստի վտանգն է ստիպել ոտքի կանգնել և օր առաջ ազատվել վտանգի աղբյուր հանդիսացող վարչապետից և իր թիմից»,- գրել է Զոհրաբյանը:

12:15 - 22 դեկտեմբերի, 2020

Փաստաբանների պալատը կմիանա Նիկոլ Փաշինյանին անվստահություն հայտնելուն ուղղված բողոքի ակցիաններին

Փաստաբանների պալատում տեղի է ունեցել փաստաբանների ակումբի նիստ, որին մասնակցել են ավելի քան վաթսուն փաստաբան: Ակումբի նիստում ելույթ են ունեցել փաստաբաններ Արա Զոհրաբյանը, Վահան Հովհաննիսյանը, Էդգար Բադեմյանը, Մանուշ Եսայանը, Տիգրան Սարգսյանը, Անահիտ Պետրոսյանը, Մելանյա Առուստամյանը, Սիմոն Բաբայանը, Տաթևիկ Բուջատյանը, Գոռ Մարգարյանը, Արմինե Ֆանյանը, Ազատ Շահբազյանը, Վրեժ Խաչիկյանը, Արսեն Համբարձումյանը, Գայանե Ղուլյանը, Հարութ Ակլունցը, Արամ Օրբելյանը, Մարինե Ֆարմանյանը, Հովհաննես Խուդոյանը և Սամվել Ջաղինյանը: Քննարկման ժամանակ փաստաբաններն ընդգծել են փաստաբանական հանրույթի կողմից Հայաստանի Հանրապետության պետական անվտանգությանը սպառնացող լուրջ վտանգին խիստ արձագանքելու մոտեցումը: Առաջարկվել է միանալ բողոքի ակցիաներին, այդ թվում դատական նիստերին և դատավարական (քննչական) գործողություններին չմասնակցելու ձևով: Հնչել են նաև կարծիքներ այն մասին, որ ստեղծված իրավիճակը Հայաստանի Հանրապետության համար այնքան օրհասական է, որ պետք է պետական շահի պաշտպանությանը տրվի առավելություն մասնավոր՝ վստահորդի շահի նկատմամբ և հնչեցվել է համոզմունք, որ վստահորդներն առավելապես կհասկանան և կընդունեն այդ մոտեցումը: Հնչել են նաև կարծիքներ, որ բողոքի ակցիային մասնակցող քաղաքացիներին բերման ենթարկելու և այլ անհետաձգելի դեպքերում, փաստաբանները կարող են բացառություն անել: Առաջարկվել է նաև փաստաբանների մասնագիտական ունակություններն օգտագործել ռազմական գործողությունների հետ կապված հանցագործությունների բացահայտմանը նպաստելու, ինչպես նաև հայրենիքին օգտակար այլ հարցերով: Քննարկման արդյունքում ակումբին մասնակցող փաստաբանները որոշել են՝ 1. 2020թ. դեկտեմբերի 22-ին ժամը 12:00-ից միանալ Նիկոլ Փաշինյանին անվստահություն հայտնելուն ուղղված բողոքի ակցիաններին, այդ թվում՝ գործադուլին: 2. 2020թ. դեկտեմբերի 22-ին ժամը 11:00-ին ՀՀ փաստաբանների պալատի գտնվելու վայրից երթով շարժվել դեպի ՀՀ Ազգային ժողով, իսկ այնուհետև՝ ՀՀ գլխավոր դատախազություն՝ հետևյալ փաստաթղթերը փոխանցելու նպատակով՝ ա) ԱԺ նախագահին՝ ռազմական դրությունը վերացնելու և վարչապետին անվստահություն հայտնելու պահանջը. բ) փաստաբան հանդիսացող պատգամավորներին՝ «Իմ քայլը» խմբակցությունից դուրս գալու հորդորը. գ) ՀՀ գլխավոր դատախազին՝ հանցագործության մասին հաղորդումը:

16:35 - 18 դեկտեմբերի, 2020

Ռազմական դրության ռեժիմը կարող է վնասել ռազմագերիների հայրենադարձման խնդրի լուծմանը. Փաստաբանների պալատը դիմել է ԱԺ նախագահին`ռազմական դրությունը վերացնելու հարցով

18:20 - 14 դեկտեմբերի, 2020