«Հայաստան» դաշինք

The “Armenia” (Hayastan) alliance was founded in 2021 to participate in the snap parliamentary elections.

The alliance was created by Robert Kocharyan, the "Armenian Revolutionary Federation" and the "Reviving Armenia" parties. The electoral list is headed by Robert Kocharyan.

Մեր ժողովուրդը բազմաթիվ հարցեր ունի ՌԴ-ի ու ՀԱՊԿ-ի վարքագծի կապակցությամբ, բայց անընդունելի է «Հավաստի աղբյուրի» անունից իրականացվող հակառուսական մթնոլորտ ձևավորելու քաղաքականությունը․ «Հայաստան» խմբակցություն

Մեր ժողովուրդը բազմաթիվ հարցեր ունի ՌԴ-ի ու ՀԱՊԿ-ի վարքագծի կապակցությամբ, բայց անընդունելի է «Հավաստի աղբյուրի» անունից իրականացվող հակառուսական մթնոլորտ ձևավորելու քաղաքականությունը․ «Հայաստան» խմբակցություն

«Հայաստան» խմբակցությունը հայտարարություն է տարածել, որը ներկայացնում ենք ստորև․  «Ադրբեջանը, օգտվելով Հայաստանի օրվա իշխանությունների հանցավոր անգործությունից ու մուրացկանային քաղաքականությունից, ոտնձգություններ է իրականացնում մեր երկրի նկատմամբ: Օկուպացված են ՀՀ տարածքները, վտանգված է մեր ինքնիշխանությունը և ՀՀ քաղաքացիների կյանքի իրավունքը: Միևնույն ժամանակ արձանագրում ենք «խաղաղության դարաշրջան» խոստացած ու այդ խոստմամբ խաբեությամբ քվե կորզած օրվա իշխանությունների լիակատար ձախողումն արտաքին քաղաքականության, բանակաշինության, պետական կառավարման ոլորտներում: Այս ամենը վկայում է Նիկոլ Փաշինյանի ոչ լեգիտիմության մասին։ Մեզ համար անընդունելի են Նիկոլ Փաշինյանի՝ ՀՀ անկախության հռչակագրին հակասող հայտարարությունները։ Մենք դրական ենք գնահատում Արցախի Հանրապետության անվտանգության խորհրդի նիստում վերահաստատված դիրքորոշումը Ղարաբաղյան հակամարտության կարգավորման վերաբերյալ, այն է՝ Արցախի ժողովրդի ինքնորոշման իրավունքի և դրա իրացման արդյունքների լրիվ ու անսակարկելի ճանաչում։ Դատապարտում ենք իշխանությունների ներքին ու արտաքին քաղաքականությունը, որը վերջնականապես փլուզում է անվտանգության այն փխրուն համակարգը, որը դեռևս հայկական պետականությանը հնարավորություն է տալիս գոյություն ունենալ: Թաքնվելով «Հավաստի Աղբյուրի» անվան տակ՝ օրվա իշխանությունը նախապատրաստում է հայ ժողովրդին նոր՝ մահացու զիջումների և զուգահեռաբար խրախուսում հակառուսական հիստերիան՝ փորձելով իր ձախողումների մեղավորներ նշանակել: Եվ դա այն դեպքում, երբ Արցախի անվտանգության ու արցախահայության կյանքի իրավունքը ռուսական խաղաղապահներն են ապահովում, իսկ հայ-թուրքական սահմանին ռուսական ռազմաբազա է տեղակայված: Հայաստանի ու Արցախի շուրջ տեղի ունեցող զարգացումների հետ կապված մեր ժողովուրդը բազմաթիվ հարցեր ունի Ռուսաստանի Դաշնության ու ՀԱՊԿ-ի վարքագծի կապակցությամբ, բայց այս ամենով հանդերձ անընդունելի է «Հավաստի Աղբյուրի» ու նրա քարոզչագործիքների անունից իրականացվող քաղաքականությունը՝ Հայաստանում հակառուսական մթնոլորտ ձևավորելու և մեր երկիրն աշխարհաքաղաքական սուր հակամարտության թատերաբեմ դարձնելու ուղղությամբ: Հայաստանը Ռուսաստան-Արևմուտք հակադրության մեջ մանրադրամ դարձնելու օրվա իշխանության արկածախնդրային քաղաքականությունը մեր երկրի համար կործանարար հետևանքների կարող է հանգեցնել: Համոզված ենք, որ միայն իշխանափոխության դեպքում է հնարավոր ռազմավարական-դաշնակցային-բարեկամական հարաբերությունները վերականգնել Ռուսաստանի ու Իրանի հետ, ինչպես նաև վստահելի, կանխատեսելի ու հարգանք վայելող գործընկեր դառնալ Արևմուտքի հետ հարաբերություններում: Հարգելի՛ հայրենակիցներ, ՀՀ անկախության հռչակագրում նշված դրույթները չեն կարող սակարկման առարկա դառնալ։ ՀՀ տարածքային ամբողջականությունը, ինքնիշխանությունը ենթակա են պաշտպանության բոլոր միջոցներով։ Մենք կողմ ենք հարևանների հետ համակեցության կանոններ գտնելուն ու հարաբերություններ հաստատելուն, բայց դրանք չպետք է լինեն մեր անվտանգության ու արժանապատվության հաշվին։ Դեմ ենք միջպետական կոմունիկացիաների գործարկումը միջանցքային տրամաբանությամբ իրականացնելուն։ Իրական ու արժանապատիվ խաղաղությունը հնարավոր է ապահովել միայն պետության արդյունավետ ներքին ու արտաքին քաղաքականությամբ, պրոֆեսիոնալ թիմով, բանակի վերականգնմամբ, հանրային լայն համախմբում ու համերաշխություն ապահովելով, Հայաստանի կողմից նոր բանակցողով»: Հիշեցնենք, որ հոկտեմբերի 3-ին armtimes.com կայքը հրապարակել էր «Ի գիտություն Վեհափառ հայրապետի, 3 նախագահների և փորձագիտական հանրության. ի՞նչ է ուզում Ադրբեջանը» վերտառությամբ հոդված, որտեղ, կայքի ձեւակերպմամբ, ներկայացվում են Ադրբեջանի հինգ հիմնական պահանջները Հայաստանից։ Իսկ հոկտեմբերի 4-ին «Հայկական ժամանակ» օրաթերթի armtimes.com կայքը հրապարակեց «Հավաստի աղբյուր» ստորագրությամբ «Ինչ է ուզում Ռուսաստանը․ ի գիտություն Վեհափառ հայրապետի, երեք նախագահների և փորձագիտական հանրության» վերտառությամբ հրապարակում, որտեղ, կայքի ձեւակերպմամբ, ներկայացվում են Ռուսաստանի ցանկություններն ու պահանջները Հայաստանից։
15:00 - 05 հոկտեմբերի, 2022
Զազրելի է խաղաղություն աղերսելով Ադրբեջանից քարտեզ խնդրելը, ընտանեկան թերթով տեղակատվական արտահոսքի կազմակերպումը. «Հայաստան» դաշինք

Զազրելի է խաղաղություն աղերսելով Ադրբեջանից քարտեզ խնդրելը, ընտանեկան թերթով տեղակատվական արտահոսքի կազմակերպումը. «Հայաստան» դաշինք

ԱԺ «Հայաստան» խմբակցության ընդլայնված կազմով նիստը, քննության առնելով Աժ հերթական նիստերին նախորդող զարգացումներն, արձանագրեց, որ Հայաստանի Հանրապետության և Արցախի Հանրապետության առջև ծառացած մարտահրավերները մեղմացման փոխարեն առավել ուժգնացել են: Այս մասին ասված է Դաշինքի տարածած հաղորդագրության մեջ: Ադրբեջանը՝ Թուրքիայի անթաքույց աջակցությամբ, շարունակում է հայատյաց և ցեղասպան քաղաքականությունը, որի վերջին վկայությունը դիրքերում հայ զինծառայողների նկատմամբ իրականացված՝ միջազգային ռազմական հանցագործություն գնահատվող վայրագությունն է, որի իրավաքաղաքական պատասխանը պետք է լինի ինչպես միջազգային, այնպես էլ ներպետական իրավական մեխանիզմների գործադրումը՝ մեղավոր անձանց պատասխանատվության ենթարկելու համար: Իրականությունը առավել մռայլ է Հայաստանի գործող իշխանությունների անձեռնահաս և ապիկար քաղաքականության պայմաններում: Ակնհայտ է. Հայոց պետականությունը և Հայ ժողովուրդը կանգած են գոյաբանական սպառնալիքի առջև: Խմբակցությունը վերահաստատեց նախկինում տրված իր գնահատականն առ այն, որ նման պայմաններում Հայաստանի ներկա քաղաքական իշխանություններն անվտանգության հարցերը և դրանց լուծումները օրակարգային դարձնելու փոխարեն շարունակում են հասարակությանը հրամցնել ոչ առաջնային, հաճախ նաև վտանգավոր օրենսդրական և այլ նախաձեռնություններ: Մասնավորապես. 1. Զազրելի է Հայաստանը ներկայացնող անձի կողմից ՄԱԿ-ի ամբիոնից խաղաղություն աղերսելով՝ Ադրբեջանից քարտեզ խնդրելը, իր ընտանեկան թերթով Հայոց պետականության ոչնչացմանն ուղղված ադրբեջանական պահանջների, ինչպես նաև դաշնակիցների վերաբերյալ տեղակատվական արտահոսքի կազմակերպումը, որով զուգահեռաբար ահաբեկում է հանրությանը և փորձում ստեղծել անելանելիության զգացում և քաոս: Սա այն դեպքում, երբ այս վիճակի ստեղծման թիվ մեկ պատասխանատուն ինքն ու իր քաղաքական խմբակն են: Խմբակցությունը որոշեց այս հարցի, ինչպես նաև Արցախի Հանրապետության անվտանգության խորհրդի հայտարարության առնչությամբ հանդես գալ առանձին հրապարակմամբ: 2. Դաշնակիցների վերաբերյալ իրարամերժ և սպառազինություն ձեռք բերելու անկարողության վերաբերյալ վտանգավոր հայտարարություններով, զինված ուժերի թուլացման պատճառ դարձած օրենսդրական և գործադիր նախաձեռնություններով, բանակին ժողովրդային աջակցության մերժման վարքագծով, արտաքին սպառնալիքներին դիմագրավելուն կոչված երկրի ռազմաքաղաքական և ռազմարդյունաբերական համակարգը ակնհայտ անգործունակ դարձնելով, արտաքին մարտահրավերներին դիմագրավելու համար կենսականորեն անհրաժեշտ ներազգային համերաշխությունն ու Հայաստան-Արցախ-Սփյուռք եռամիասնությունը ջարդելով՝ Հայաստանի գործող քաղաքական իշխանությունը կանխամտածված կամ ակամայից օժանդակում է Հայաստանի թշնամիներին և արտաքին աշխարհում նպաստում հակահայ մթնոլորտի ձևավորմանը: 3. Վերը նշված վարքագծին զուգահեռ կեղծ խաղաղասիրական թեզեր հրապարակ նետելով՝ Հայաստանի գործող քաղաքական իշխանությունը չի անդրադառնում հանգամանքին, որ իրական և արժանապատիվ խաղաղությունը ձեռք է բերվում վերոնշյալ համարժեք երաշխիքներով, որոնք ներկայումս պետք է լինեն Հայաստանի իրական օրակարգի հարցեր: Խմբակցությունն, անդրադառնալով Աժ՝ ս.թ. հոկտեմբերի 4-ի հերթական նիստերի օրակարգին, արձանագրում է, որ ԱԺ քաղաքական մեծամասնությունը շարունակում է Հայաստանի իրական օրակարգին անհաղորդ լինել: Ապօրինի կերպով մերժելով խորհրդարանական ընդդիմության առաջադրած նախաձեռնությունները՝ քաղաքական մեծամասնությունը և Աժ ղեկավարությունը իրենց մեծամտությամբ և ոչ ադեկվատ վարքածով ապալեգիտիմացնում են առաջնային մանդատով օժտված բարձրագույն ներկայացուցչական մարմինը: Դեմ լինելով հերթական նիստերի օրակարգային այն հարցերին, որոնք խեղաթյուրում են Հայաստանի իրական օրակարգը, խմբակցությունը հարկ է համարում անդրադառնալ օրկարագում ներառված երեք հարցի: Մասնավորապես, ԱԺ օրակարգում ներառված է 44-օրյա պատերազմի հանգամանքներն ուսումնասիրող հանձնաժողովի գործունեության ժամկետը 6-ամսով երկարացնելու հարցը: Ինչպես նշել ենք, այս հարցով ԱԺ գործող պաշտպանության և անվտանգության հարցերի հանձնաժողովը ունակ չէ իրականացնելու արդյունավետ աշխատանք, քանի որ նրանում մեծամասնությունը կազմում են այն նույն իշխանության ներկայացուցիչները, որոնց բացթողումների ու առերևույթ հանցագործությունների արձանագրմամբ պետք է զբաղվի այս քննիչ հանձնաժողովը: Հետևաբար, այն անկախ չէ և չի կարող արձագրել դրական արդյուքներ, ինչի վկայությունն է նախորդ վեց ամիսների ընթացքում հանձնաժողովի գործունեությունը: Ավելին՝ փորձ է արվում և արվելու խեղաթյուրել պարտության իրական պատճառները: Մինչդեռ, «Հայաստան» խմբակցությունը դեռևս ամիսներ առաջ առաջադրել էր 44-օրյա պատերազմի բոլոր հանգամանքներն ուսումնասիրող, իրականում անկախ ինքնավար մարմնի ստեղծման օրինագիծ, որի քննարկումն ու ընդունումը սակայն մերժվեց իշխանության կողմից: «Հայաստան» խմբակցության առաջարկությունը ընդունվելու դեպքում ուսումնասիրության առարկա կլինեին նաև 44-օրյա պատերազմից հետո Հայաստանի և Արցախի անվտանգության համակարգերի բացերն ու թերությունները, որոնց վերացումը հիմք կտար կանխարգելելու Ադրբեջանական նոր և շարունական ագրեսիան և պատերազմական գործողությունները: «Հայաստան» խմբակցությունը, դեմ լինելով ԱԺ պաշտպանության և անվտանգության հարցերի մշտական հանձնաժողովի, որպես քննիչ հանձնաժողովի ժամկետի երկարացմանը, շարունակելու է հետամուտ լինել իր նախաձեռնության կյանքի կոչմանը: Աժ օրակարգի մեկ այլ հարցով կառավարությունն առաջարկում է ընդունել Հայաստանի Հանրապետության կրթության մինչև 2030 թվականի զարգացման պետական ծրագիրը: Խիստ կարևորելով այս թեման, որպես Հայաստանի երկարաժամկետ զարգացման կարևոր հենասյուն, խմբակցությունը որոշեց այս հարցով կազմակերպել հանրային, մասնագիտական լայն քննարկում՝ առկա մարտահրավերների հատկորոշման և առաջարկվող լուծումների համարժեքության գնահատման առումով: Անդրադառնալով աշխատանքի և սոցիալական պաշտպանության ոլորտին վերաբերող օրինագծերին, խմբակցությունը կրկին փաստում է, որ քննարկվող հարցերը վերաբերելի չեն ոլորտում առկա հրատապ խնդիրներին, այդ թվում՝ խորացող աղքատությանը»:
17:42 - 04 հոկտեմբերի, 2022
 «Հայաստան» խմբակցության պատգամավոր Մխիթար Զաքարյանը վայր է դնում մանդատը

«Հայաստան» խմբակցության պատգամավոր Մխիթար Զաքարյանը վայր է դնում մանդատը

ՀՀ ԱԺ «Հայաստան» խմբակցության պատգամավոր, «Վերածնվող Հայաստան» կուսակցության վարչության անդամ Մխիթար Զաքարյանի հայտարարություն է տարածել՝ նշելով, որ վայր է դնում պատգամավորական մանդատը․   «Սիրելի՛ հայրենակիցներ,   Հայաստանն ու Արցախն այսօր լուրջ մարտահրավերների առաջ են կանգնած։ Արցախի անվտանգությանը, կարգավիճակին ու արցախահայության իրավունքների պաշտպանությանն առնչվող խնդիրները բոլորիս են հայտնի։ Միաժամանակ, վտանգված է նաև Հայաստանի անվտանգությունը․ թշնամու զինված ուժերը շարունակում են մնալ մեր սուվերեն տարածքում։ Խնդիրները բազմաթիվ են՝ ուժի ուղղակի սպառնալիքից մինչև հումանիտար հարցերի քաղաքականացում։ Սրանք բոլորը հրատապ լուծման կարիք ունեն, բայց դրանք արդյունավետ ու վերջնականապես լուծելու համար մեզնից յուրաքանչյուրը պիտի իր տեղում լինի։   Ես՝ որպես ՀՀ ԱԺ «Հայաստան» խմբակցության պատգամավոր, որոշում եմ կայացրել դադարեցնել պատգամավորական գործունեությունս՝ հայրենիքիս առավել արդյունավետ ծառայելու վճռականությամբ։ Միաժամանակ, ուզում եմ հայտնել, որ շարունակելու եմ քաղաքական գործունեությունս «Վերածնվող Հայաստան» կուսակցության շարքերում՝ անելով հնարավորություններիս սահմաններում առավելագույնը՝ ի նպաստ մեր առաջ ծառացած խնդիրների լուծման։   Հաջողություն եմ մաղթում խորհրդարանում իրենց առաքելությունն իրականացնող բոլոր գործընկերներիս։ Ինչպես արդեն նշեցի՝ իրական արդյունք ունենալու համար մեզնից յուրաքանչյուրը պիտի իր դիրքում լինի և անի այն, ինչ ամենից արդյունավետ է կարողանում անել»։
12:37 - 04 հոկտեմբերի, 2022
Պետք է մարդ գա, որը կմիավորի բոլորին, պատրաստ կլինի հանրային կոնսոլիդացիային․ Ռոբերտ Քոչարյան |news.am|

Պետք է մարդ գա, որը կմիավորի բոլորին, պատրաստ կլինի հանրային կոնսոլիդացիային․ Ռոբերտ Քոչարյան |news.am|

news.am: Եթե խոսք գնա խորհրդարանով նոր վարչապետի ընտրության մասին, պետք է լինի մի թեկնածու, որը ընկալելի է ե՛ւ իրենց, ե՛ւ ընդդիմության համար։ Այս մասին այսօր՝ սեպտեմբերի 28-ին, լրագրողների հետ հանդիպմանն ասաց ՀՀ երկրորդ նախագահ Ռոբերտ Քոչարյանը։ ««Մասնակի իշխանափոխություն» տերմինը ես կիրառեցի՝ փորձելով իրականությունն ավելի պարզեցնել։ Ես հասկանում եմ, որ այս խորհրդարանում ՔՊ-ական պատգամավորների մատները կտրես, ինձ համար չեն քվեարկի։ Իշխանափոխությունը կարող է լինել նոր ընտրությունների կամ էլ խորհրդարանի ճանապարհով։ Եթե խոսք գնա խորհրդարանով նոր վարչապետի ընտրության մասին, պետք է լինի մի թեկնածու, որը ընկալելի է ե՛ւ իրենց, ե՛ւ ընդդիմության համար»,- նշեց նա։ Ռոբերտ Քոչարյանի խոսքով՝ ուրիշ տարբերակ կարող է լինել հանրային այնպիսի ճնշման դեպքում, որը կպարտադրի մեծամասնությանն ընտրել հանրության կողմից ցանկալի թեկնածու, ինչպես 2018 թվականին էր։«Սա նշանակում է՝ տասնյակ հազարավոր մարդիկ շրջապատում են խորհրդարանի շենքը եւ պարտադրում մեծամասնությանն իրենց թեկնածուին։ Այսօր այդ հնարավորությունն ընդդիմությունը չունի։ Մենք տեսանք, որ դեռ չկա։ Կարող է վաղը լինել, այո՛։ Բոլորս էլ հասկանում ենք՝ ո՛չ ինձ կընտրեն, ո՛չ Իշխան Սաղաթելյանին, ո՛չ էլ ռադիկալ ընդդիմությունից որեւէ մեկին մինչեւ չլինի հանրային ճնշում։ Պետք է մարդ գա, որը կմիավորի բոլորին։ Հանրային կոնսոլիդացիային պատրաստ մարդ պետք է ընտրվի։ Բայց այդ նախաձեռնությունն արդեն պետք է գա քաղաքական մեծամասնությունից, ոչ թե մեզնից, եթե իրենք հասկանում են այս վիճակի բարդության խորությունը»,- ասաց Ռոբերտ Քոչարյանը։
13:34 - 28 սեպտեմբերի, 2022
ՄԱԿ-ում վարչապետի ելույթը խաղաղության դարաշրջանի հոգեհանգստի ելույթ էր. Ռոբերտ Քոչարյան
 |aysor.am|

ՄԱԿ-ում վարչապետի ելույթը խաղաղության դարաշրջանի հոգեհանգստի ելույթ էր. Ռոբերտ Քոչարյան |aysor.am|

aysor.am: Գտնվում ենք խորը անվտանգային ճգնաժամի մեջ, երբ իշխանությունն ի վիճակի չէ պաշտպանել երկրի տարածքային ամբողջականությունը, լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանը։ «Չեն կարողանում նաև ներգրավվել մեր գործընկեներին՝ պայմանագրերով սահմանված պարտավորությունները կատարելու համար։ Իշխանությունը տարվել է ուտոպիստական խաղաղության դարաշրջան բացելու թեզով և այդ թեզի ներքո ուղղակի անտեսել է անվտանգության բազմաթիվ հարցեր։ Սա հերթական ձախողումն է ընտրած կուրսի», - հայտարարեց Քոչարյանը։ Նա նշեց, որ վերջին իրադարձությունների ներքո Բաքվի և Անկարայի դերը շեշտակի աճել է։ Երկրորդ նախագահի խոսքով՝ Թուրքիայի և Ադրբեջանի վրա ազդելու լծակները ևս նվազել են, չափազանց սահմանափակ են Ռուսաստանի և ՀԱՊԿ-ի կողմից։ «Այս իրավիճակում անտեսել անվտանգային հարցերը սեփական ուժերի շրջանակներում, ուղղակի հանցավոր անգործություն է։ ՄԱԿ-ում վարչապետի ելույթը խաղաղության դարաշրջանի հոգեհանգստի ելույթ էր։ Իրականում իր բովանդակությամբ սա նշանակում էր, որ այդպիսի սպասելիքներ չկան, «պանիխիդայի» ժամանակ հանգուցյալին ոչ-ոք առողջություն չի ցանկանում, ուղղակի պետք է այդ էջը փակել և բացել նոր էջ՝ այլ հիմքերի վրա հենված», - հայտարարեց Քոչարյանը։
12:42 - 28 սեպտեմբերի, 2022
Չենք կարող բուժվել այն միջավայրում, որը մեզ հիվանդացրել է․ Քոչարյանը՝ իշխանության շուրջ միավորվելու առաջարկի մասին

Չենք կարող բուժվել այն միջավայրում, որը մեզ հիվանդացրել է․ Քոչարյանը՝ իշխանության շուրջ միավորվելու առաջարկի մասին

Ռոբերտ Քչարյանը ներկայացրեց, թե ըստ իրեն՝ ինչ քայլեր պետք է արվի հիմա․ «Կան շատ պարզ քայլեր, որոնք օրհասական վիճակում պետությունները անում են․ Առաջինը դա հանրային կոնսուլիդացիան է․ սա ուղղակի անհրաժեշտ պայման է․ առանց սրա ոչինչ չի ստացվելու․ դա աբստրակտ չի լինում, դա լինում է բարձր նպատակների հասնելու համար։ Հիմա ի՞նչ մտքեր են հնչում․ միավորվենք, որ օգնենք ծանր որոշումներ կայացնելու համար․ գիտե՞ք՝ կոնսուլիդացիան իրականցնում են ժողովրդին հաղթանակի մղելու համար, ոչ թե կապիտուլացիայի համար կոնսուլդիցիայի կարիք չկա, հակառակը՝ կապիտուլացիայի համար պետք է դեկոնսուլիդացիա։ Այս պարզ ճշմարտությունները իրար խառնել․ ուղղակի չեմ հասկանում՝ դա գիտակցաբար է արվում, թե ուղղակի նպատակասլված։ Կապիտուլացիան դեգրադացիա է առաջացնում, նաև անզորության զգացում․ սա է միգուցե պետք այն մարդկանց, որոնք կոչ են անում կոնսիդուլացվել, հանրային կոնսիդուլացիա կապիտուլացիայի համար»։  «Հնչում է նաև թեզ՝ միավորվենք իշխանության շուրջ։ Մոտավորապես ես ասացի նաև՝ ինչու է սա ինձ համար անհասկանալի, բայց փորձեմ պարզաբանել ավելի խորը։ Խնդիրը լուծելու համար առաջին հերթին պետք է ախտորոշես այդ խնդրի պրոբլեմը և չեզոքացնես այն։ Հիմա մեզ ասում են՝ միավորվենք պրոբլեմի շուրջ։ Մեր նպատակն ի՞նչն է՝ փրկել Հայաստա՞նը, թե՞ փրկել Հայաստանի պրոբլեմը։ Եվ սա բացարձակ ճշմարտությունը է ոչ միայն բժշկության մեջ․ կա ուռուցք, հեռացրեք»,- ասաց Քոչարյանը՝ նշելով, որ ոթե ուզում եք հանրային կոնսոլիդացիա, այն պետք է ունենալ բարձր, դժվար հասանելի, ժողովրդից կամք պահանջող նպատակների համար։ Այս կոնտեքստում, Քոչարյանի խոսքով, իշխանափոխությունը իմպերատիվ պահանջ է։ «Իշխանափոխությունը խորհրդարանական երկրում կարող է լինել ամբողջական, կարող է լինել մասնակի։ Օրինակ՝ եթե խորհրդարանը ընտրում է մեկ այլ վարչապետ, իրականում դա մասնակի իշխանափոխություն է, քանի որ վերահսկիչ փաթեթը մնւմ է այդ քաղաքական թիմի մոտ։ Եվ սա այն հարցն է, որ քննարկվելիք թեմա կարող է լինել քաղաքական դաշտում։ Մի բան ակնհայտ է․ մենք չենք կարող բուժվել այն միջավայրում, որը մեզ հիվանդացրել է, այդ միջավայրը մենք պետք է փոխենք»,- ընդգծեց նա։ Քոչարյանի խոսքով՝ երկրորդը պետք է լրջորեն զբաղվել բանակով։ «Վերջին իրադարձությունների հետ կապված կասեմ հետևյալը․ ինձ համար հասկանալի չէ, այն կորչուստների հարաբերակցցությունը, որը մենք ունեցանք։ Այդպիսի հարաբերակցություն չպետք է ունայինք, եթե զինվորը պաշտպանված լիներ։ Ասում ենք՝ փող ունենք․ ինչու մենք չենք կառուցել այնպիսի բնագիծ, որը լուրջ զսպող հանգամանք կլիներ հակառակորդի համար։ Ինձ համար ավելի քան երկու անգամ, երեք անգամ մեծ կորուստներ ունենալ պաշտպանության մեջ, նշանակում է մեկ բան․ որևէ դաս չենք քաղել 44-օրյա պատերազմից։ Երկու տարի անց ինչու չունենք հարվածային անօդաչու սարքեր․ և մի հավատացեք, որ հնարավոր չէ զենք գնել, մենք զենք գնում էինք և՛ ՌԴ-ից, և՛ Չինաստանից, և՛ Եվրոպայից և այլ տեղերից․ սա խնդիր չի»,- նշեց երկրորդ նախագահը։  Երրորդ քայլը, որը պետք է արվի, ըստ Քոչարյանի՝ անվտանգային ճարտարապետության վերագնահատումն է։ «Պետք է սթափ գնահատենք՝ ինչ գործոնները կամ ինչ պետույթունները կարող են ազդել Ադրբեջանի և Թուրքիայի վրա։ Եվ պետք է գնահատենք, որ այդ ազդեցության լծակները ՌԴ-ի կողմից և ՀԱՊԿ-ի կողմից շեշտակի նվազել են։ Ակնհայտ է, որ ՌԴ-ն անում է ամեն հնարավորը և անելու է ամեն հնարավորը, որ բախում չլինի ՀՀ-ի և Ադրբեջանի միջև, բայց դրանք լինելու են քաղաքական, դիվանագիտական քայլեր։ Այսօր ՌԴ-ն ունի դաշնակցային հարաբերություններ նաև Ադրբեջանի հետ և մտածել, որ ՌԴ-ն կարող է ռազմական գործողություններ սկսել Ադրբեջանի դեմ, ուղղակի անհեթեթություն է։ Այդ տեսանկյունից բավականին լավ միջավայր է ստեղծվել հակառուսական տրամադրությունները զարգացնելու համար Հայաստանում»,- նշեց Քոչարյանը։  Ռոբերտ Քոչարյանը հարց հնչեցրեց, թե բացի Հայաստանից էլ որ երկրի համար է կարևոր Սյունիքը։ Քոչարյանի խոսքով՝ Իրանի համար է կարևոր Սյունիքը։ Նրա կարծքով՝ երկու տարվա մեջ պետք է առնվազն երկու զորավարժություն իրականացնեինք Իրանի հետ հենց Սյունիքում, պայմանագրային բազա պետք է լիներ Իրանի հետ, և այդ ամենը զսպող հանգամանք կլիներ Ադրբեջանի համար։ Քոչարյանը նշեց, որ  նման կարգի խոսակցություն Իրանի հետ եղել է 2021թվականի մայիս ամսին, սակայն հայկական կողմը սառեցրել է, առաջարկն էլ, ինչպես Քոչարյանը նշեց, մերը չի եղել։  «Ես կարծում եմ՝ մենք պետք է վճռական քայլերի գնանք՝ գիտակցելով, որ այո, գուցե պետք է համոզել ՌԴ-ին, խոսքը չի գնում ՀԱՊԿ-ից դուրս գալու մասին, դա կլիներ ևս մեկ հիմարություն․ ՀԱՊԿ-ի շրջանակներում կան պայմանագրեր, որոնք շատ կարևոր են զենք-զինամթերք գնելու համար։ Ուղղակի համալրել նոր կոմպոնենտներով անվտանգային համակարգը․ ես համոզված եմ, որ դա հնարավոր է բացատրել դա ՌԴ-ին, միգուցե նաև եռակողմի մի նոր ֆորմատ ձևավորել, քանի որ շահերը համընկնում է, և ՌԴ-ն ջերմացնում է հարաբերությունները Իրանի հետ; Համոզված եմ, որ հնարավոր է պայմանավորվել, բացատրել նաև ԱՄՆ-ի հետ, դուր կգա՞ նրանց, առաջարկու՞մ են այլընտրանք, թե՞ ոչ»,- ասաց Քոչարյանը։ 
12:11 - 28 սեպտեմբերի, 2022
Գնանք տեսնենք՝ ինչպե՞ս է հանձնում Հայաստանը, մաս կազմե՞նք Հայաստանի հանձնելուն․ Սեյրան Օհանյանը՝ իշխանության հետ երկխոսելու առաջարկի մասին
 |tert.am|

Գնանք տեսնենք՝ ինչպե՞ս է հանձնում Հայաստանը, մաս կազմե՞նք Հայաստանի հանձնելուն․ Սեյրան Օհանյանը՝ իշխանության հետ երկխոսելու առաջարկի մասին |tert.am|

tert.am: Ես չեմ ուզում մեկնաբանել առաջին նախագահի ասածը, բայց փաստ է այն, որ ՀՀ-ն գտնվում է կապիտուլյացիոն վիճակում ու Հայաստանը այս վիճակում հենց այնպես չի հայտնվել։ Այս մասին Եռաբլուրում լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։ «Այս իրավիճակից դուրս գալու առաջին պայմանը այս իշխանություններին փոխելն է, պետք է գան մարդիկ, ովքեր կարող են արտաքին քաղաքականություն վարել, մեր բանակցողը այժմ մշտական ճնշման ներքո է գտնվում։ Ես գիտեմ, որ հայ ժողովուրդը ունակ է իշխանության բերել մարդկանց, ովքեր ունեն ամուր բռունցք այս անելանելի վիճակից դուրս գալու»,- նշեց «Հայաստան» խմբակցության ղեկավարը։ Հարցին՝ ում է տեսնում որպես Փաշինյանին փոխարինող, Օհանյանն ասաց, որ չի ցանկանում կանգ առնել անձերի վրա։ Անդրադառնալով Լևոն Տեր –Պետրոսյանի այն առաջարկին, որ ընդդիմությունը ստեղծված իրավիճակում պետք է իշխանության հետ երկխոսի և համատեղ լուծումներ գտնի, Օհանյանը ասաց․«Մենք գնանք ի՞նչ բանակցենք, գնանք կանգնենք իր կողքին ու տեսնենք ինչպե՞ս է հանձնում Հայաստանը, մաս կազմե՞նք Հայաստանի հանձնելուն»։ Առավել մանրամասն՝ tert.am-ում
12:44 - 27 սեպտեմբերի, 2022
«Եռաբլուր»-ում տեղի ունեցածը վարչապետի, ոստիկանության ամոթն ու խայտառակությունն է․ Գեղամ Նազարյան
 |azatutyun.am|

«Եռաբլուր»-ում տեղի ունեցածը վարչապետի, ոստիկանության ամոթն ու խայտառակությունն է․ Գեղամ Նազարյան |azatutyun.am|

azatutyun.am: «Եռաբլուր»-ում տեղի ունեցածը երկրի վարչապետի, ոստիկանության ամոթն ու խայտառակությունն է, «Ազատության» հետ զրույցում ասաց Ազգային ժողովի ընդդիմադիր «Հայաստան» խմբակցության պատգամավոր Գեղամ Նազարյանը։ Սեպտեմբերի 21-ին ոստիկանները վարչապետ Փաշինյանի այցից առաջ «Եռաբլուր»-ից քաշքշելով բերման էին ենթարկել 44-օրյա պատերազմում որդիներին կորցրած շուրջ չորս տասնյակ ծնողների: Զոհվածների հարազատները փակել էին ճանապարհը, որ Փաշինյանը չմոտենար իրենց որդիների գերեզմաններին։ Նազարյանն, ում որդին ևս զոհվել է 44-օրյա պատերազմում, միջադեպի ժամանակ «Եռաբլուր»-ում չի եղել, ակցիային չի մասնակցել։ Ընդդիմադիր պատգամավորը նկատեց՝ ծնողները իրավունք ունեն և՛ քաղաքականապես ակտիվ լինելու, և՛ իրենց դիրքորոշումը հայտնելու, բայց պետք է մի գիծ չանցնեն, որից հետո իրենց քարշ տալով տանեն մենքենաները։ «Գիտեք էս հերոսածինը մեր ձեռքբերումը չէ, մեր երեխեքի ձեռքբերումն է, իրենց հերոսությամբ մենք դարձել ենք հերոսածին։ Մենք ունենք կարգավիճակ, որ պետք է հասկանանք, դա ինչ է և երբեք ու երբեք չմոռանանք, թե մենք ում ծնողներն ենք», - ասաց պատգամավորը՝ շարունակելով․ - «Այո՛, մենք ունենք անգիտակից հատուկջոկատայիններ, որոնց պահվածքը, մեղմ ասած, ամոթալի է, խայտառակ է, չգիտեմ ինչ է, բայց մենք գիտենք, որ այնտեղ տենց մարդիկ կան։ Հասարակությունը պետք է այնտեղից առաջինը հեռացնի ծնողներին, որովհետև չի կարելի հերոսների ծնողներին քարշ տալ»։ Նազարյանն, ով պարբերաբար բողոքի ակցիաներ է կազմակերպում՝ շեշտեց՝ իր նախաձեռնած ակցիաների, հանդիպումների ժամանակ երբեք չի արել այնպես, որ հանկարծ հայտնվեն մի վիճակում, որ ոստիկան-ծնող բախում լինի՝ ընդգծելով՝ «հասկանում է ծնողներին՝ իրենց վերաբերմունքն են ուզում Նիկոլին հայտնել, բայց ոչ իրենց էդպես գետնին գցելու գնով»։ «Այո՛, դա երկրի վարչապետի, ոստիկանության ամոթն ու խայտառակությունն է, բայց, օրինակ, եթե ինձ հարցնեին՝ «իսկ մենք չենք ուզում, որ Նիկոլը գա «Եռաբլուր», ի՞նչ պետք է անենք»։ Ո՛չ, դուք այնտեղ պահակություն պետք չի անեք», - եզրափակեց պատգամավորը։
10:35 - 27 սեպտեմբերի, 2022
Հետամուտ ենք լինելու որպեսզի «Եռաբլուրում» տեղի ունեցածի բոլոր մեղավորները ենթարկվեն պատասխանատվության. «Հայաստան դաշինք»

Հետամուտ ենք լինելու որպեսզի «Եռաբլուրում» տեղի ունեցածի բոլոր մեղավորները ենթարկվեն պատասխանատվության. «Հայաստան դաշինք»

Հայաստանի Հանրապետության Անկախության օրը՝ սեպտեմբեր 21-ը, դրսևորվեց իշխանության, մասնավորապես՝ ոստիկանության կողմից գործադրված անբարո վարքագծով, աննախադեպ բռնությամբ։ Այս մասին հայտարարություն է տարածել ԱԺ «Հայաստան» խմբակցությունը: Հայտարարությունում նաեւ ասվում է. «Եռաբլուրից վայրագությամբ և ապօրինաբար բերման ենթարկվեցին Հայրենիքի պաշտպանության համար իրենց կյանքը զոհած մեր զինվորների ու սպաների ծնողները, հարազատները։ Ոստիկանական բաժանմունքներ տեղափոխված 37 քաղաքացիներից ոմանք մարմնական վնասվածքներ են ստացել, այդ թվում՝ բռնության ենթարկվել ոստիկանությունում։ Ոստիկանների նման վարքագիծը ոչ միայն չի բխում նրանց լիազորություններից, այլ ակնհայտորեն պայմանավորված էր Նիկոլ Փաշինյանի՝ Եռաբլուր այցից առաջ ճանապարհը «մաքրելու» հանձնառությամբ։ Հանցավոր գնահատելով իշխող կուսակցության ներկայացուցիչների կողմից ոստիկանական բռնությունների արդարացման փորձերը, դրանք դիտարկելով որպես անարգանք հայ ժողովրդի, մեր հերոսների հիշատակի և նրանց հարազատների նկատմամբ, -խստորեն դատապարտում ենք տեղի ունեցածը, այն գնահատում ենք որպես իշխանությունների՝ մեր երկրի պաշտպանության և նվիրական արժեքների նկատմամբ որդեգրած վերաբերմունք, -մեկ անգամ ևս արձանագրում ենք, որ այս իշխանությունները ոչ միայն անկարող են դիմագրավել երկրի գոյաբանական մարտահրավերների առջեւ, այլև սպառնալիք են մեր պետականությանն ու ազգային միասնականությանը, -համոզումով, որ ոստիկանությունը կոչված է ծառայելու հանրային և ոչ օրվա քաղաքական մեծամասնության շահերին, հետամուտ ենք լինելու որպեսզի բոլոր մեղավորները ենթարկվեն պատասխանատվության։  
19:03 - 22 սեպտեմբերի, 2022
Ոստիկանությունը չպետք է լինի իշխանության կցորդը, այն ծառայում է օրենքին, ոչ թե ինչ-որ մեկի հրամաններին․ Վարդևանյանը՝ «Եռաբլուր»-ում տեղի ունեցածի մասին |tert.am|

Ոստիկանությունը չպետք է լինի իշխանության կցորդը, այն ծառայում է օրենքին, ոչ թե ինչ-որ մեկի հրամաններին․ Վարդևանյանը՝ «Եռաբլուր»-ում տեղի ունեցածի մասին |tert.am|

tert.am: Մենք չենք կարող այսպիսին լինել, սա՛ չէ մեր տեսակը, այդ ո՞ւմ եք դուր գալիս՝ հերոսը մորը քաշքշելով։ Այս մասին «Եռաբլուր» զինվորական պանթեոնում լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը։ «Ոստիկանությունը չպետք է լինի իշխանության կցորդը, այն ծառայում է օրենքին, ոչ թե ինչ-որ մեկի հրամաններին։ Ցանկացած հանրային գործունեություն իրականցնող գիտի, որ իր նկատմամբ էլ կա դժգոհոթյուն, ես էլ, որ գալիս եմ, գիտեմ այստեղ, գիտեմ, որ մի ծնող գուցե գա և ինձ նախատի, քննադատի, ես էլ գլուխս կախ պետք է լսեմ, որովհետև ո՞վ ենք մենք այդ մարդկանց առաջ»,- ասաց Վարդևանյանը։  Նա նշեց, որ Եռաբլուրում չկա քաղաքականություն և չկան քաղաքական դեմքեր։ «Այստեղ գալիս ես խոնարհվելու, ուրիշ խորհուրդ չկա այստեղ։ Ինչ է, թե ինչ-որ պաշտոնյա եկել է այստեղ, նրա հանգստության համար հազարավոր բերետավորներ պետք է գան այստե՞ղ։ Այդ բերետավորը գիտի՞, որ ինքը ողջ է, որովհետև ադ ծնողների երեխաներն են այստեղ թաղված»,- ասաց Արամ Վարդևանյանը։
13:25 - 21 սեպտեմբերի, 2022
Այսօր, ավելի քան երբեք, մեզ պետք է միավորի Անկախ պետականության, ազգային գոյատևման և ազգային արժանապատվության խորհուրդը․ «Հայաստան» դաշինք

Այսօր, ավելի քան երբեք, մեզ պետք է միավորի Անկախ պետականության, ազգային գոյատևման և ազգային արժանապատվության խորհուրդը․ «Հայաստան» դաշինք

«Հայաստան» դաշինքը ուղերձ է հղել Անկախության օրվա առթիվ․   «1991 թվականի սեպտեմբերի 21-ին՝ Այո' ասելով անկախությանը, Հայ ժողովուրդն իրացրեց իր դարավոր երազանքն ու հունավորեց պատմական մի ընթացք, որի պսակն Արցախյան ազատամարտն էր, մեծագույն ձեռքբերումը՝ Հայոց երկրորդ պետականության փաստացի գոյությունը։   Անկախության տարեգրության արժանապատվության էջերը կերտեց մի սերունդ, որն անկախ պետականության երազանքի, ազգային իրավունքների և դրանց իրականացմանը լծված պետականության համար պատրաստ էր անասելի խիզախումի։   Համառ և ոչ միշտ սահուն ընթացքով, համազգային նվիրումով մեզ հաջողվեց ամրացնել Հայոց պետականությունը՝ ՀՀ քաղաքացի լինելու հպարտություն ներշնչելով ողջ հայությանը։ Ցավոք, Անկախության 31-րդ տարեդարձը դիմավորում ենք իրական պատերազմի միջավայրում, անվտանգային անասելի սպառնալիքներով, խոցված ինքնիշխանության և տարածքային ամբողջականության, համազգային նվաստացման մթնոլորտում, անդառնալի մարդկային կորուստների ցավով։   Եվ, այդուհանդերձ, այսօր, ավելի քան երբեք, մեզ պետք է միավորի Անկախ պետականության, ազգային գոյատևման և ազգային արժանապատվության խորհուրդը։   Անկախություն նվաճած ու հաղթանակներ պարտադրած ժողովուրդն ընկրկելու իրավունք չունի։ Հայոց պետականության ապագան կասկածի տակ դնող այս իրականությունը հնարավոր է հաղթահարել միայն համազգային նպատակներ բանաձևելով, միասնականությամբ և ազգային պետական մտածողություն կրող իշխանությամբ։   Այդ ներուժը մենք ունենք, մենք կարող ենք, մենք նոր պարտությունների իրավունք չունենք։ Միասին պաշտպանենք մեր Անկախությունը, տեր լինենք պետականություն և արժանապատիվ գոյություն ունենալու մեր իրավունքին»:
13:10 - 21 սեպտեմբերի, 2022
Ոչ մի այլ երկրի զինվոր չի գալու մեր տարածքներում խրամատ փորի. Սեյրան Օհանյանը՝ ՀԱՊԿ-ի մասին
 |news.am|

Ոչ մի այլ երկրի զինվոր չի գալու մեր տարածքներում խրամատ փորի. Սեյրան Օհանյանը՝ ՀԱՊԿ-ի մասին |news.am|

news.am: Մենք գտնվում ենք Արեւմուտքի ու Արեւելքի հատման կետում, բայց աշխարհագրությամբ մենք ավելի շատ ՀԱՊԿ-ի տարածաշրջանին ենք մոտ, էլ չեմ ասում որպես հետխորհրդային երկիր  ինտեգրված ենք եղել եւ պաշտպանական, եւ մնացած բոլոր խնդիրներում, հատկապես սպառազինության ու ռազմական տեխնիկայի տիրապետման առումով: Այս մասին այսօր՝ սեպտեմբերի 21-ին, «Եռաբլուր» պանթեոնում լրագրողների հետ զրույցում նշեց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը՝ անդրադառնալով ՀԱՊԿ-ից դուրս գալու տրամադրություններին: «Տարիներ ի վեր Հայաստանը լուրջ աշխատանք է կատարել հատկապես այդ ռազմաքաղաքական կառույցի ռազմական բաղադրիչի զարգացման ուղղությամբ: Գոնե երեք ուղղություններով մենք օրինակել ենք եղել. առաջինը օպերատիվ արձագանքման հավաքական ուժերի ձեւավորման մեջ, երկրորդը խաղաղապահ ուժերի ձեւավորման մեջ, եւ երրորդը ռազմական կոմիտեն է: ՀԱՊԿ-ի շրջանակներում գլխվոր շտաբների պետերը չեն ունեցել այն հարթակը, որտեղ կարող էին քննարկել ռազմական իրավիճակը: Մեր առաջարկությամբ է ստեղծվել ռազմական կոմիտեն: Ուզում եմ ասել, որ մեր իշխանության ժամանակ լուրջ աշխատանք է կատարվել»,-ասաց նա: Սեյրան Օհանյանը նկատեց, որ յուրաքանչյուր կազմակերպություն էլ ունի եւ առաջատար կողմեր, եւ թերություններ. «Նույն թերություններն ունի նաեւ ՆԱՏՕ-ն: Այդ կառույցում էլ կան երկրներ, որ հակամարտության մեջ են, օրինակ, Թուրքիան եւ Հունաստանը: Եթե ՀԱՊԿ-ում որոշումների ընդունման ընթացակարգերում կան որոշակի թերություններ, ինչի՞ հաար ենք մենք ուրախանում դրանից: Ի՞նչ են այսօրվա իշխանություններն արել ՀԱՊԿ-ի որոշումների ընդունման ընթացակարգերն ամրապնդելու, ԱՀՊԿ-ն ամրապնդելու համար, էլ չեմ ասում, որ ՀԱՊԿ մեր գլխավոր քարտուղարին փորձել են ազատազրկել: Կարծում եմ՝ ՀԱՊԿ-ի ամրապնդման համար մեր երկիրն էլ պետք է իր ներդրումն ունենալ: Մինչեւ ՀԱՊԿ-ին դիմելը ՀՀ իշխանությունները, ներսում պետք է որոշում ընդունեին, մոբիլիզացնեին երկիրը, բանակին թիկունք կանգնեին: Տպավորություն է ստացվում, որ այսօրվա իշխանությունները նիրհում են իրենց բազկաթոռներին, օթյակներում, դափնիների վրա, ուրիշնմերին ասում են՝ եկեք մեր երկիրը պաշտպանեք: Ոչ մի այլ երկրի զինվոր չի գալու մեր տարածքներում խրամատ փորի»,-ասաց ընդդիմադիր գործիչը:  
12:19 - 21 սեպտեմբերի, 2022
Բանակցողին փոխելով մենք կփոխենք ամեն ինչ. Սեյրան Օհանյան
 |news.am|

Բանակցողին փոխելով մենք կփոխենք ամեն ինչ. Սեյրան Օհանյան |news.am|

news.am: Վերջին 30 տարիներին մենք անկախության օրը յլ կերպ ենք տոնել, հպարտությամբ, այցելել ենք «Եռաբլուր» շնորհավորել ենք մեր մարտական ընկերներին, անկախության տոնին զորահանդեսներ ենք անցկացրել, հպարտացել ենք մեր բանակով: Այս մասին այսօր՝ սեպտեմբերի 21-ին, «Եռաբլուր» պանթեոնում լրագրողների հետ զրույցում նշեց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը: «Այս օրերին վերջին սադրանքներից հետո, եւ սկսած 2020-ի 44-օրյա պատերազմից մենք այլ կերպ ենք տոնում անկախությունը, որովհետեւ կարծում եմ՝ ակնհայտ է, որ օրստօրե մեր անկախության ու ինքնիշխանության տարրեր կորցնում ենք եւ հիմնական պատճառը պարտությունն է: Պարտության իրականացնողներից երկուսի անունը ես պետք է տամ. Առաջինը հանցագործ Ադրբեջանն է, թուրք-ադրբեջանական տանդեմն է, որ այսօր էլ շարունակում են իրենց ճնշումն արտահայտված սադրանքներով եւ մարտական գործողություններով: Երկրորդ շահռուն այսօրվա իշխանություններն են. ցավով եմ ասում, որ  հայ ժողովուրդն արժանի չէ այսպիսի իշխանությունների, որոնք ներքաշեցին մեր երկիրը պատերազմի մեջ, պատերազմի ժամանակ ոչինչ չարեցին, այսօր էլ ոչինչ չեն անում մեր ինքնիշխանությունը պաշտպանելու համար: Իսկ դրա համար մնք պետք է ոչ թե ժողովրդին տանենք կեղծ խաղաղության, այլ ռեալ երաշխիքներ պետք է ստեղծենք մեր ժողովրդի խաղաղությունը պաշտպնելու համար: Երաշխիքները երկուսն են. առաջինը ազգային երաշխիքներն են՝ բանակը, մեր միասնությունը, տնտեսությունը, մեր ռազմավարական կմքը պատրաստ լինելու երկիրը  պաշտպանելու համար: Երկրորդը միջազգային երաշխիքներն են՝ լայն ընդգրկվածություն ունեցող համարձակ արտաքին քաղաքականության շրջանակներում բանակցային խելացի գործունեության իրականացնումն է: Կարծում եմ՝ բոլորդ տեսնում եք, որ այսօրվա իշխանությունները պարտվողական կերպարի մեջ են, չեն կարողանում բանակցել: Մեր խնդիրը պետք է լինի ձերբազատվել պարտված իշխանություններից եւ փոխել բանակցողին: Միայն այդկերպ կարող ենք հասնել հաջողության»,-ասաց նա: Սեյրան Օհանյանը հայտարարեց, որ բանակցողին փոխելով մենք կփոխենք ամեն ինչ. «Մեզ պետք է ամուր բռունցքն: Յուրաքանչյուր իրավիճկում էլ հնարավոր է ոտքի կանգնել ծնկի իջած վիճակից, մեջքն ուղղել եւ նաեւ արտաքին քաղաքականության մեջ  համարձակ տեսակետից արտահայտվել, դուրս գալ պարտվողի կերպարից» Ինչ վերաբերում է թշնամու սադրանքներին, նա ասաց. «Մենք այնպիսի տարածաշրջանում ենք, որտեղ անվտանգության միջավայրը փխրուն է, սպառնալիքները միշտ ահագնացող են լինելու այնքան, մինչեւ մեր մեջքը չուղղենք: Միշտ պետք է պատրաստ լինենք արտաքին սադրանքներին պատասխանելու համար»:
12:00 - 21 սեպտեմբերի, 2022
Ագնեսա Խամոյանը մանրամասներ է ներկայացրել  Ռոբերտ Քոչարյանի ու մի խումբ քաղաքացիների հանդիպումից

Ագնեսա Խամոյանը մանրամասներ է ներկայացրել Ռոբերտ Քոչարյանի ու մի խումբ քաղաքացիների հանդիպումից

 «Հայաստան» խմբակցության պատգամավոր Ագնեսա Խամոյանը Ռոբերտ Քոչարյանի՝ մի խումբ քաղաքացիներ հետ հանդիպումից հետո հայտնեց, որ հանդիպումը Ռոբերտ Քոչարյանի ու մասնակիցների ցանկությամբ անցկացվել է փակ ձևաչափով։  Ագնեսա Խամոյանի խոսքով՝ ՀՀ երկրորդ նախագահն արձանագրել է, որ որևէ տեղ չի գնացել ու շարունակում է պայքարի մեջ մնալ․ «Ամենակարևոր արձանագրումն այն էր, որ ՀՀ երկրորդ նախագահն ընդգծեց, որ վերջին շրջանում գուցե իր հանրային ակտիվությամբ կամ չակտիվությամբ առաջին հայացքից կարող էր տպավորություն ստեղծվել, թե ետ է քաշվել, սակայն Ռոբերտ Քոչարյանը արձանագրեց, որ որևէ տեղ չի գնացել, չի պատրաստվում գնալ։  Նախագահը արձանագրեց, որ ամբողջությամբ պետք է իրավիճակի գնահատում տեղի ունենա, այս պահին որոշակի ծրագիր է մշակվում, այնուհետև քաղաքացիներին կներկայացվի քայլերի ընթացքը»,- ասաց պատգամավորը։ 
18:41 - 19 սեպտեմբերի, 2022
Արդեն տարբեր ձևաչափերով տեղի են ունեցել մի շարք կարևոր հանդիպումներ․ Սաղաթելյանը՝ իր՝  նախկին նախագահների, ազդեցիկ գործիչների հետ համատեղ լուծումներ գտնելու առաջարկի մասին

Արդեն տարբեր ձևաչափերով տեղի են ունեցել մի շարք կարևոր հանդիպումներ․ Սաղաթելյանը՝ իր՝ նախկին նախագահների, ազդեցիկ գործիչների հետ համատեղ լուծումներ գտնելու առաջարկի մասին

Սեպտեմբերի 14-ին հանդես եմ եկել հրապարակային առաջարկությամբ առ այն, որ ստեղծված իրավիճակում անհրաժեշտ է Վեհափառ Հայրապետի, նախկին նախագահների, զինվորականների, ազդեցիկ գործիչների հանդիպում, որտեղ պետք է գտնվեն ստեղծված իրավիճակից դուրս գալու ելքեր: Այս մասին ֆեյսբուքյան իր էջում գրել է ԱԺ «Հայաստան» խմբակցության պատգամավոր Իշխան Սաղաթելյանը։   «Նշեմ, որ առաջարկս ձևակերպված ներկայացրել եմ բոլոր կողմերին: Այս ընթացքում արդեն տարբեր ձևաչափերով տեղի են ունեցել մի շարք կարևոր հանդիպումներ:   Ես վստահ եմ, որ սա ստեղծված իրավիճակից լավագույն, գուցե և միակ ելքն է: Ուստի շարունակելու եմ ջանք չխնայել այդ ուղղությամբ` հուսով, որ շուտով կլինեն տեսանելի արդյունքներ», - գրել է Սաղաթելյանը:     Գլխավոր լուսանկարը՝ Ազգային ժողովի
22:15 - 18 սեպտեմբերի, 2022