«Հայաստան» դաշինք

Կառավարությունը բացասական եզրակացություն տվեց Հայոց ցեղասպանության ժխտման քրեականացման նախագծին |news.am|

news.am: ՀՀ կառավարությունն իր այսօրվա՝ մայիսի 22–ի նիստում բացասական եզրակացություն տվեց «Հայաստան» խմբակցության առաջարկած ՀՀ քրեական օրենսգրքի փոփոխությունների նախագծին, որով առաջարկվում էր քրեականացնել Հայոց ցեղասպանության ժխտումը։ Նշենք, որ ապրիլի 22–ին Ազգային ժողովում «Հայաստան» խմբակցության քարտուղար Արծվիկ Մինասյանը հայտարարել էր, որ Հայոց ցեղասպանության 110–րդ տարելիցին ընդառաջ իրենց խմբակցությունը շրջանառության մեջ է դրել Հայոց ցեղասպանության ուրացման դեպքում քրեական պատասխանատվություն նախատեսող օրինագիծ։ Այս հարցը բուռն քննարկման և վիճաբանությունների առիթ դարձավ ԱԺ նիստերի դահլիճում։ Օրենսդրական փոփոխություններով խմբակցությունն առաջարկում է սահմանել տուգանք՝ նվազագույն աշխատավարձի 100–պատիկից 300–պատիկի չափով կամ հանրային աշխատանքներով՝ 150–250 ժամ տևողությամբ, կամ ազատության սահմանափակմամբ՝ մեկ ամսից մինչև 4 տարի ժամկետով: Կառավարությունից նշել են, որ նախագծով առաջարկվող փոփոխությունների նպատակահարմարությունը բացակայում է:

11:42 - 22 մայիսի, 2025

«48 ժամվա երազանքի համար դեկորացիա չենք դառնա». Քոչարյանը՝ իմպիչմենտի գործընթացին միանալու մասին |civilnet.am|

civilnet.am: Հայաստանի երկրորդ նախագահ Ռոբերտ Քոչարյանը վարչապետ Նիկոլ Փաշինյանին իմփիչմենթի ենթարկելու նախաձեռնությունը որակել է «զրոյին ձգտող հավանականություն ունեցող» նախաձեռնություն։ «48 ժամվա երազանքի համար դեկորացիա չենք դառնա»,- ասել է նա մի քանի լրատվամիջոցների տված հարցազրույցում, որը հրապարակվել է այսօր։ Հասարակական-քաղաքական գործիչներ Նարեկ Մալյանի և Էդգար Ղազարյանի նախաձեռնած «Արթուն ենք» շարժումը փորձում է ԱԺ-ում նախաձեռնել վարչապետին անվստահություն հայտնելու գործընթաց և դրա համար ակնկալում է նաև «Հայաստան» խմբակցության աջակցությունը։ «Արթուն ենք» շարժման անունից Ազգային ժողովին հանձնվել են 107 պատգամավորի անունով նամակներ՝ վարչապետին անվստահություն հայտնելու գործընթաց սկսելու առաջարկով։ Շարժումը նախաձեռնել են ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը։ Շարժման անդամները հայտարարում են, որ Նիկոլ Փաշինյանը ձախողել է թե՛ ներքին, թե՛ արտաքին քաղաքականությունը և խախտել կառավարության ծրագրի հիմքերը։ Երկրորդ նախագահ Ռոբերտ Քոչարյանը վստահ է, որ շարժման որոշ դերակատարներ չեն պատկերացնում գործընթացի քաղաքական հետևանքները։ «Քարոզիչներ կան, որ մտել են այս խնդրի մեջ՝ իմ տպավորությամբ լավ չպատկերացնելով, թե ինչ են անում»,- ասել է նախկին նախագահը։ Քոչարյանի խոսքով՝ ինքը չի հանդիպել որևէ մեկին, որը այս գործընթացը իրատեսական համարի։ «Նույնիսկ նախաձեռնողները հաճախ հայտարարում են, թե՝ «փորձենք, եթե չստացվի, չստացվի»,- ասել է Քչարյանը։ Ըստ Քոչարյանի՝ ամբողջ գործընթացը նման է մեկ-երկու օրվա ուշադրության արժանանալու փորձի։ «Կարող է մարդ կա, ում համար 48 ժամ լինել վարչապետի թեկնածու՝ կյանքի երազանքն է։ Դու հայտնվում ես քննարկումների կենտրոնում, հարցազրույցներ ես տալիս, քեզ տաղավարներ են հրավիրում։ Բայց դա չի նշանակում, որ մենք պետք է դեկորացիա դառնանք այդ երազանքը իրականացնելու համար»,- ասել է Քոչարյանը։ Քոչարյանն անդրադարձել է նաև շարժման պնդումներին՝ փողոցի ճնշման միջոցով փոփոխությունների հասնելու վերաբերյալ։ Նրա կարծիքով, եթե իշխանությունը փողոցում ճնշում է զգում, դա պետք է դրսևորվի հրաժարականով կամ հեղափոխությամբ, այլ ոչ թե սահմանադրական հղումներով: «Փողոցի կոնտրոլը իշխանությունը պետք է կորցնի, սա նշանակում է՝ կա՛մ հրաժարական, կա՛մ հեղափոխություն»,- ասել է երկրորդ նախագահը։ Նա նշել է, որ իր գլխավորած դաշինքը վարչապետի թեկնածու չունի, քանի որ չի տեսնում հեռանկար։ «Մեր ֆրակցիայից ութ հոգի կան, որ կարող են վարչապետ լինել իրենց անցած ճանապարհով, բայց ուղղակի մարդ չկա, որ պատրաստ է այդ 48 ժամվա համար նման քայլի գնալ»,- ասել է նախկին նախագահը։ Քոչարյանը նաև ակնարկել է, որ այս նախաձեռնության գլխավոր շարժիչ ուժը, իր համոզմամբ, ՀՀԿ-ն է, և իր հասցեին հնչող քննադատություններին ինքը վաղուց է սովոր։ «Ես թիրախավորվելու իմունիտետն ունեմ, շատ երկար տարիների փորձ։ Բայց դա մի առավելություն ունի՝ դու չես խոսում, քո մասին բոլորը խոսում են»,- ասել է Քոչարյանը։ Հայաստանի երկրորդ նախագահը կրկնել է, որ նման գործընթացին մասնակցելն իր համար հետաքրքրություն չի ներկայացնում։ Գյումրիի ավագանու վերջին ընտրություններն օրինակ բերելով, Քոչարյանը նշել է, որ իշխանափոխության կարելի է հասնել ընտրություններով։

13:42 - 19 մայիսի, 2025

Իմ նախագահության ընթացքում ո՛չ Ելցինը, ո՛չ Պուտինը, ո՛չ էլ Լուկաշենկոն ինձ չեն դիմել միութենական պետության անդամ դառնալու հարցով. Քոչարյան |tert.am|

tert.am: Հայաստանը պետք է վերականգնի ռազմավարական հարաբերությունները Ռուսաստանի հետ և ռազմավարական գործընկերություն կնքի Իրանի հետ։ Այս մասին լրատվամիջոցների հետ զրույցում հայտարարել է ՀՀ երկրորդ նախագահ Ռոբերտ Քոչարյանը։ Քոչարյանի խոսքով, անհրաժեշտ է վերականգնել Ռուսաստանի հետ ռազմավարական գործընկերությունը և ներառել իրանական գործոնը։ Հայ-ռուսական հարաբերություններին պետք է ավելացնել իրանական բաղադրիչը՝ դրանք վերածելով եռակողմ ձևաչափի: Անհիմն են այն մեղադրանքները, թե ինքը ցանկանում է իշխանության գալ և Հայաստանը դարձնել Ռուսաստանի և Բելառուսի հետ միութենական պետության անդամ։ «Իմ նախագահության ընթացքում ո՛չ նախագահ Ելցինը, ո՛չ նախագահ Պուտինը, ո՛չ էլ նախագահ Լուկաշենկոն երբեք չեն դիմել ինձ այս հարցով։ Ես դեռ չգիտեմ, թե ինչ նախապայմաններ կլինեին, եթե մենք դիմեինք նրանց այս հարցով, նշել է Քոչարյանը:

12:07 - 19 մայիսի, 2025

Այս իշխանությունից ազատվելու համար կոալիցիա կկազմենք, բայց միասին ընտրությունների գնալու հնարավորություն չեմ տեսնում. Ռոբերտ Քոչարյան |tert.am|

tert.am: ՀՀ երկրորդ նախագահ Ռոբերտ Քոչարյանը հանդիպել է լրագրողների հետ և պատասխանել նրանց հարցերին: Հարցին՝ 2026-ին, եթե Նիկոլ Փաշինյանը իշխանություն չձևավորի և ընդդիմության ուժերից որևէ մեկին էլ չհաջողվի իշխանություն ձևավորել, հնարավոր կլինի՞ կոալիցիա կազմել, ՀՀ երկրորդ նախագահ Ռոբերտ Քոչարյանը պատասխանել է. «Այո, ես չեմ կարծում, որ մենք այլընտրանք ենք ունենալու, իհարկե, եթե հարցն այնպիսին է լինելու, որ այս իշխանություններից ազատվելու համար պետք է ձևավորել կոալիցիա, այո պետք է ձևավորել: Չեմ կարծում բայց, որ ընտրությունների միասին կարող ենք գնալ, նման հնարավորություն չեմ տեսնում: Գոնե գաղափարական հարաբերությունների տեսանկյունից իրար հետ լավ կոմունիկացիաներ ունեցող ուժերը կարող են կոալիցիա կազմել, միասին գնալ ընտրությունների»: Երկրորդ նախագահը նաև անտրամաբանական համարեց այն կարծքիները, թե Նիկոլ Փաշինյանին անհնար է հեռացնել ընտրությունների մեջոցով: «Անտրամաբանական է, որ ասում են՝ Նիկոլ Փաշինյանին հնարավոր չէ ընտրությունների միջոցով հեռացնել, ի՞նչ է նա Սասունցի Դավիթն է, չի կարելի նման խոսույթ բերել: Գյումրիում դա եղավ, հնարավոր է այս մոդելը լինի ուրիշ տեղ»,- ասաց նա:

11:51 - 19 մայիսի, 2025

Էդմոն Մարուքյանը հայտնեց՝ համաձայնել է վարչապետին անվստահություն հայտնելու գործընթացում լինելու վարչապետի թեկնածուն

Էդմոն Մարուքյանը ֆեյսբուքյան ուղիղ եթերում հայտարարեց, որ ՄԱՍԿ կուսակցությունից առաջարկ է ստացել՝ վարչապետին անվստահություն հայտնելու ՄԱՍԿ-ի նախաձեռնած գործընթացում լինելու վարչապետի թեկնածուն։ Նա նշեց՝ քննարկումների արդյունքում տվել է համաձայնությունը։ Մարուքյանը հայտնեց նաև, որ հանդիպումներ կնախաձեռնի ԱԺ «Հայաստան» և «Պատիվ ունեմ» խմբակցությունների հետ։ Հիշեցնենք՝ ԱԺ պատգամավորներ Հովիկ Աղազարյանն ու Հակոբ Ասլանյանը հայտարարել են, որ վարչապետին անվստահություն հայտնելու նախագծով վարչապետի թեկնածու են առաջադրում Էդմոն Մարուքյանին։ Հիշեցնենք, որ գործընթացն ԱԺ-ում կարող է քննարկվել, երբ առնվազն 36 պատգամավոր տրամադրի ստորագրություն։ Ավելի վաղ՝ «Արթուն ենք» շարժման նախաձեռնած անվստահության գործընթացի շրջանակում «Պատիվ ունեմ»-ը հայտարարել էր, որ առանց որեւէ նախապայմանի կքննարկեն թեկնածուի հարցը ու կնախաձեռնեն վարչապետին անվստահություն հայտնելու գործընթաց։ Խմբակցությունն ունի 6 պատգամավոր։ «Հայաստան» խմբակցությունն էլ նշել էր, որ կտրամադրի իր բոլոր 28 պատգամավորների ստորագրությունները մեկնարկի համար, եթե նման գործընթաց նախաձեռնողները կարողանան ապահովել պակասող 8 պատգամավորի ստորագրությունը։

15:26 - 16 մայիսի, 2025

Ըստ Սեյրան Օհանյանի՝ Ռոբերտ Քոչարյանի ունեցվածքն օրինական է |armenpress.am|

armenpress.am: Ազգային ժողովի ընդդիմադիր «Հայաստան» խմբակցության ղեկավար Սեյրան Օհանյանը համարում է, որ իրենց քաղաքական ուժի ղեկավար, ՀՀ երկրորդ նախագահ Ռոբերտ Քոչարյանի ունեցվածքն օրինականության շրջանակներում է: Օհանյանը նման դիրքորոշում հայտնեց խորհրդարանական ճեպազրույցում՝ անդրադառնալով ՀՀ երկրորդ նախագահից դատախազության կողմից պահանջվող բռնագանձման ենթակա գույքերի վերաբերյալ հարցին: Օհանյանը շեշտեց՝ այն, ինչ տիրում է Հայաստանում և ինչպիսի գործընթացներ կան հակակոռուպցիոն ոլորտում, դատաիրավական ոլորտում, տեսանելի են բոլորի համար: Դրանց պատասխանատվության հարցը իրավապահ ոլորտի խնդիրներից է: «Այդ հարցերին մեկ անգամ չէ, որ պարոն Քոչարյանը և նրա հարազատները պատասխանել են: Դատաիրավական գործընթացներն ընթանում են: Եթե այնտեղ ինչ–որ խախտումներ կան, դրանց շրջանակներում թող օրինական որոշումներ ընդունեն: Մեզանից ոչ ոք այդ պատասխանատվությունից չի խուսափում»,–ասաց խմբակցության ղեկավարը: Անդրադառնալով հարցին, թե իր մոտ կասկած չի՞ հարցում Ռոբերտ Քոչարյանի գույքի օրինականության հարցը՝ Օհանյանը պատասխանեց. «Կարծում եմ, որ նրանք գործել են օրինականության շրջանակներում և նրանց գործունեությունը, նաև ձեռքբերումներն օրինականության շրջանակներում են»: Դատախազությունն ապօրինի ծագում ունեցող գույքի բռնագանձման հայցով պահանջում է երկրորդ նախագահ Ռոբերտ Քոչարյանից և նրա հետ փոխկապակցված անձանցից բռնագանձել 22 անշարժ գույք, 2 գույքի գնման իրավունք, ավելի քան 3 միլիոն դոլար, 985 մլն դրամ արժեքով ձեռք բերված պարտատոմսեր, ավելի քան 1.4 մլն դոլարի չափով ավանդ, 15 իրավաբանական անձում մասնակցություն (իրավաբանական անձանցից են «Նաիրի Ինշուրանսը», «Տոյոտա Երևան» ընկերությունը, «Թարգեթ գրուպը» և մի շարք այլ ընկերություններ), ավելի քան 4 մլն դոլարի, 8.3 մլրդ դրամի, 260 մլն ռուբլիի և շուրջ 590 հազար եվրոյի չափով փոխառությունների պահանջի իրավունք, 2 տրանսպորտային միջոց, ավելի քան 3.8 մլրդ դրամին համարժեք գումարով գույքերի ձեռքբերման արժեքներ և ավելի քան 20 մլրդ դրամ:

12:18 - 16 մայիսի, 2025

Ադրբեջանը սահմանը լարված է պահում, որ ազդի հայկական կողմի վրա, հասնի իր նպատակներին. Օհանյան |tert.am|

tert.am: Այսօր մենք ականատես ենք լինում մի վտանգավոր երևույթի: Իշխանության պետական ողջ քարոզչական ապարատը գործում է մեկ նպատակի համար՝ նսեմացնել այն ամենը, ինչ արվել է պետության ստեղծման և հզորացման համար՝ մինչև իրենց իշխանության գալը: Այս մասին Աժ ճեպազրույցում ասաց «Հայսատան» խմբակցության ղեկավար Սեյրան Օհանյանը: «Իշխանության հիմնական նպատակն ու թիրախներից մեկը նաև Ռոբերտ Քոչարյանն է ու նրա ընտանիքը, մարդ, ով իր անձնական օրինակով, իր գաղափարական ու մարտական ընկերների հետ միասին պատերազմից դուրս եկավ հաղթող և որի ղեկավարությամբ կառուցվեց պետական համակարգ»,-ասաց Օհանյանը: Լրագրողի հարցին, որ ադրբեջանական կողմը նորից կրակում է, անգամ տների տանիքներ էին վնասվել, հայկական կողմը չի արձագանքում, նախ այս որոշումը ինչպես է կարծում ճիշտ է թե ոչ, մինչև երբ կարելի է համբերել, և իր կարծիքով հայ-ադրբեջանական բանակցությունները հիմա ո՞ր կետին են հասել՝ պատասխանեց. «Նախ սահմանային իրավիճակը վերջին շրջանում բավականին, կարելի է ասել, նաև լարված է և արտահայտում են հրաձգությամբ, ընդ որում այդ հրաձգությունը տեղի է ունենում միայն Ադրբեջանի կողմից, և բացի դրանից, նաև իրենք ապատեղեկատվություն են տարածում: Դա նշանակում է, որ իրենք հենք են ստեղծում շարունակաբար ազդելու հայկական կողմի վրա։ Դրա գնահատականը պետք է տա պետությունը, անվտանգության խորհուրդը և հատկապես պաշտպանության նախարարությունը և պատասխանները պետք է համարժեք լինեն։ Գիտեք, որ նախկինում պարտադրողի դերում հայկական կողմն էր միշտ, համարժեք պատասխաններ էր տալիս, բայց Հայաստանի անվտանգության խորհուրդը, անվտանգային համակարգը լուրջ հետևություններ պետք է անի, սա նպատակը մեկն է՝ սահմանը լարված պահել, այդ լարվածությամբ նաև ազդել հայկական կողմի վրա, բացահայտել, ինչու չէ, նաև հայկական կողմից համապատասխան պատրաստակամություն և նաև շարունակական դարձնել այն ճնշումները, այն պարտադրումները, որ կան հայ-ադրբեջանական հարաբերություններում և նաև այդ խաղաղության օրակարգի իրենց նպատակներին հասնելու ուղղությամբ», -ասաց Օհանյանը: Օհանյանի խոսքով՝ այսօր խորությամբ մենք չենք տիրապետում ինչ է կատարվում հայ-ադրբեջանական հարաբերություններում, հատկապես խաղաղության ենթատեքստի ներքո, բայց մենք տեսնում ենք, որ Ադրբեջանի կողմից այդ ճնշումների հռետորաբանությունը չի պակասում, անընդհատ նոր պարտադրանքներ են, անընդհատ նոր ցանկություններ են իրենք ներկայացնում, բայց այն, ինչ որ նաև տեսանելի է, որը որ տիրում է Բաքվում շինծու դատավարությամբ, Արցախի ռազմաքաղաքական ղեկավարության և նաև մնացած գերիների նկատմամբ, Ադրբեջանը փորձում է իրենց ունեցած ձեռքի տակ տեղեկությունների շրջանակներում հիմք ստեղծել, ոչ թե դատապարտել ռազմաքաղաքական ղեկավարությանը, այլ նաև հայկական կողմին։ «Այսինքն, այսօր մենք այդ հարաբերություններում հասել ենք մի իրավիճակի, որ հանցագործ կողմը, Ադրբեջանի ռազմաքաղաքական ղեկավարությունը հայտնվել է մեղադրողի դերում և փորձում է մեղադրող կողմին, այսինքն հայկական կողմին դարձնել մեղադրյալ, ճնշումները շարունակել, և մենք գտնվում ենք պարզ մի դատավարության շրջանակներում, որտեղ որ հայկական կողմը նույնիսկ պատշաճ չունի, որովհետև դեմ առ դեմ է հայտնվել թուրք-ադրբեջանական տանդեմի դեմ, իսկ նրանք ինչ ցանկություններ ուզում են, պարտադրանքների ներքո իրականացնում են», -ասաց Օհանյանը:

12:17 - 16 մայիսի, 2025

ԱԺ-ում քննարկվում է Անդրանիկ Քոչարյանի վարքագծի վերաբերյալ էթիկայի հանձնաժողով ստեղծելու հարցը |armenpress.am|

armenpress.am: Նիստի ընթացքում քննարկվում է պատգամավոր Անդրանիկ Քոչարյանի վարքագծի վերաբերյալ ժամանակավոր էթիկայի հանձնաժողով ստեղծելու հարցը։ Նախաձեռնությունը ներկայացրել են «Հայաստան» և «Պատիվ ունեմ» խմբակցությունները։ Հիմնական զեկուցող, ԱԺ պատգամավոր Թագուհի Թովմասյանը նշեց, որ նախաձեռնությունն ուղղված է Ազգային ժողովում տեղի ունեցած կոնկրետ միջադեպի ուսումնասիրությանը։ «Առաջարկվում է հիմք ընդունելով ՀՀ Սահմանադրության 107-րդ հոդվածը և «Ազգային ժողովի կանոնակարգ» Սահմանադրական օրենքի 16-րդ հոդվածը՝ ստեղծել ժամանակավոր հանձնաժողով՝ պատգամավոր Անդրանիկ Քոչարյանի վարքը քննելու նպատակով։ Հանձնաժողովը նախատեսվում է կազմել 5 անդամից և սահմանել դրա գործունեության առավելագույն ժամկետը՝ մինչև 2 ամիս»,-ասաց Թովմասյանը։ Նախաձեռնող խմբակցությունների ներկայացրած հիմնավորման մեջ նշվում է, որ հարցը ծագել է 2025 թվականի մարտի 20-ին Ազգային ժողովի միջանցքում տեղի ունեցած միջադեպի պատճառով, երբ Անդրանիկ Քոչարյանը, ըստ հաղորդման, լրագրող Հռիփսիմե Ջեբեջյանի նկատմամբ դրսևորել է ակնհայտ անհարգալից և խտրական վերաբերմունք՝ ասելով «շուրթերդ մաքրիր» և արգելելով կանգնել իր կողքին՝ նշելով, թե «դուք լրագրող չեք»։ «Ազգային ժողովի պատգամավորի գործունեության և երաշխիքների մասին օրենքի 3-րդ հոդվածի 2-րդ և 8-րդ կետերը հստակ սահմանում են, որ պատգամավորը պարտավոր է հարգել հանրության բարոյական նորմերը, հարգալից վերաբերմունք ցուցաբերել քաղաքական ընդդիմախոսների, Ազգային ժողովում հարցերի քննարկման մասնակիցների, լրագրողների, ինչպես նաև բոլոր այն անձանց նկատմամբ, որոնց հետ պատգամավորը շփվում է իր լիազորությունները իրացնելիս»,-ընդգծեց Թովմասյանը։ Պատգամավորը նաև հիշեցրեց «Զանգվածային լրատվության մասին» օրենքի դրույթները, որոնք արգելում են լրագրողի մասնագիտական գործունեության խոչընդոտումը։ «Հաշվի առնելով այս իրողությունները, ՀՀ ԱԺ «Հայաստան» և «Պատիվ ունեմ» խմբակցություններն անհրաժեշտություն են համարում նման դեպքերը բացառելու նպատակով ստեղծել ԱԺ Էթիկայի ժամանակավոր հանձնաժողով՝ քննելու պատգամավորի վարքը և տալու եզրակացություն՝ նման վարքի կրկնությունը բացառելու նպատակով»,-եզրափակեց Թովմասյանը։

14:02 - 06 մայիսի, 2025

«Հայաստան» խմբակցությունը կմիանա Նիկոլ Փաշինյանին իմպիչմենտ հայտնելու գործընթացին

14:47 - 02 մայիսի, 2025

ԱԺ հանձնաժողովը մերժեց Անդրանիկ Քոչարյանի վարքագծի հարցով էթիկայի հանձնաժողով ստեղծելու ընդդիմության առաջարկը |armenpress.am|

16:21 - 25 ապրիլի, 2025

ԱԺ որոշմամբ փոխվեցին ֆիզիկական անձանց՝ հայտարարագիր ներկայացնելու վերջնաժամկետը և սկզբնաժամկետը

Ֆիզիկական անձանց կողմից հայտարարագիր ներկայացնելու վերջնաժամկետ սահմանվեց նոյեմբերի 1-ը՝ 2025 և 2026 թվականների համար, և հուլիսի 1-ը՝ հետագա տարիների համար: «ՀՀ հարկային օրենսգրքում լրացումներ և փոփոխություններ կատարելու մասին» օրենքի նախագիծը երկրորդ ընթերցմամբ և ամբողջությամբ ընդունվեց ՀՀ ազգային ժողովի արտահերթ նիստի ժամանակ 60 կողմ, 1 դեմ, 29 ձեռնպահ ձայներով: Բացի վերջնաժամկետից՝ սահմանվել է նաև, որ հայտարարագրերի ներկայացման ժամկետի սկիզբը լինելու է մարտի 2-ը: «Հայաստան» խմբակցության քարտուղար Արծվիկ Մինասյանը քվեարկությունից առաջ վարման կարգով հայտնեց, որ իրենք ձեռպահ են քվեարկելու նախագծին. «Չենք կարող կողմ լինել, որովհետև սա կիսատ-պռատ լուծում է, համակարգը պատրաստ չէ, նոյեմբերին ունենալու ենք պրոբլեմներ: Դեմ էլ չենք կարող քվեարկել, քանի որ մայիսի 1-ը այն վերջնաժամկետն է սահմանված, որից հետո սկսվելու է իրավական շղարշով հետապնդումների շարք»: Նախագծի հեղինակը ԱԺ ՔՊ խմբակցության պատգամավոր Բաբկեն Թունյանն է: Նա երեկ մանրամասնել էր նախագիծը. «Այն մարդիկ, որոնք հայտարարագիր են լրացնում այս տարի նախորդ տարվա եկամուտների համար, իրենց հայտարարագրերի ներկայացման վերջնաժամկետը սահմանվում է նոյեմբերի 1-ը, և ովքեր հայտարարագիր են լրացնելու հաջորդ տարի այս տարվա եկամուտների համար, իրենց համար նույնպես վերջնաժամկետը դառնում է նոյեմբերի 1-ը: Նրա խոսքով նաև մարտի 2-ից շուտ հայտարարագիր պետությունը չի ընդունելու, որպեսզի պետական համակարգը հնարավորություն ունենա նաև գործատուներից ու հարկային գործակալներից որոշակի ինֆորմացիա ստանալ և ավելի ամբողջական, ինքնաշխատ տարբերակով լրացնել այդ հայտարարագրերը:

12:16 - 22 ապրիլի, 2025

Մեկնարկել է ԱԺ նիստը. օրակարգում է նաև տրանսպորտում չվճարելու դեպքում տուգանք սահմանելու նախագիծը

Մեկնարկեց ՀՀ ազգային ժողովի հերթական քառօրյա նիստը: Նախ «Քաղաքացիական պայմանագիր» խմբակցության նոր պատգամավոր Արտյոմ Մեհրաբյանը երդվեց խորհրդարանում։ ՀՀ ռազմարդյունաբերության կոմիտեի նախկին ղեկավարը պատգամավորի մանդատ ստացավ Վիլեն Գաբրիելյանի փոխարեն: Օրակարգում 21 հարց է, այդ թվում՝ Երևանի տրանսպորտից օգտվելիս չվճարելու դեպքում տուգանք սահմանելու նախագիծը: Երևանի ավագանու «Մայր Հայաստան» խմբակցության անդամները ԱԺ մուտքի մոտ են, հարցեր են ուղղում ներս մտնող պատգամավորներին, թե արդյոք կարծո՞ւմ են, որ «քաղաքացին տուգանքի մատերիալ է»: Պատգամավորները չեն պատասխանում նրանց հարցերին: Ըստ նախագծի՝ առանց վճարման կրիչը վավերացում կատարելու տրանսպորտից օգտվելու համար տուգանքը կլինի 10 000 դրամ, վճարի արտոնության կիրառմամբ այլ անձի՝ նշված ծառայություններից օգտվելու համար՝ 15 000 դրամ, որոշակի ժամանակահատվածում անսահմանափակ ուղևորությունների համար վճարված լինելու կամ արտոնություն ստացած լինելու դեպքում ծառայությունից նույն ժամանակահատվածում առանց տրանսպորտային միջոցում վավերացում կատարելու օգտվելու համար՝ 30 000 դրամ: Նիստի սկզբում քննարկվեց համընդհանուր հայտարարագրման համակարգը չեղարկելու նախագիծը օրակարգում ներառելու հարցը: Այն ներկայացրել է ընդդիմադիր «Հայաստան» խմբակցությունը. ԱԺ գլխադասային հանձնաժողովը բացասական եզրակացություն է տվել նախագծին: ԱԺ ՔՊ խմբակցության ղեկավար Հայկ Կոնջորյանը նշեց, որ դեմ են քվեարկելու նախագիծը օրակարգում ներառելուն: «Հայաստան» խմբակցության պատգամավոր Արթուր Խաչատրյանը հայտարարեց. «Սիրելի՛ հայրենակիցներ, ձեզ խաբում են, այս նախագիծը ոչ թե եկամուտների պատկերը ճշտելու նպատակ է հետապնդում, այլ հավելյալ հարկեր մտցնելու նպատակ»: Այս հայտարարությունից հետո ՔՊ պատգամավոր Վահագն Ալեքսանյանն արձագանքեց՝ նշելով. «Ընդդիմության նպատակը մեկն է. այնպես անել, որ հնարավորինս քիչ քաղաքացի կարողանա օգտվել սոցիալական կրեդիտներից, որոնք հնարավոր է լինում ստանալ այս նախաձեռնությամբ»: Արծվիկ Մինասյանը վարման կարգով արձագանքեց՝ նշելով, որ ընդդիմության նպատակը «ազգակործան իշխանությանը հեռացնելն է» և քվեարկությունից առաջ 20 րոպե ընդմիջում վերցրեց խմբակցության անունից:

10:28 - 15 ապրիլի, 2025

Տիկի՛ն դատախազ, Դուք քաղաքական հայտարարություններ չեք անում, բայց քաղաքական պատվեր եք կատարում. Խամոյանը՝ գլխավոր դատախազին |tert.am|

tert.am: Այս դահլիճում ներկա գտնվող յուրաքանչյուր անձնավորություն գիտի, թե հիմա ինչ է այստեղ կատարվում՝ Հովիկ Աղազարյանը հրաժարվել է կատարել Նիկոլ Փաշինյանի խնդրանքը, այսպես կոչված մանդատը վայր դնելու մասով, և Դուք եկել եք նրա հետևից Ազգային ժողով: Այս մասին Աժ-ում պատգամավոր Հովիկ Աղազարյանին անձեռնմխելիությունից զրկելու հարցի քննարկման ժամանակ գլխավոր դատախազ Աննա Վարդապետյանից հարցրեց «Հայաստան» խմբակցության պատգամավոր Ագնեսա Խամոյանը: «Ուզում եմ այդուհանդերձ 2 դրվագի վրա մենք կանգ առնենք։ Ի՞նչ են ասում մեր գործընկերները։ Հովիկ Աղազարյանի հեռախոսն ինչ-ինչ քրեական գործի շրջանակներում հայտնվել է պատկան մարմինների մոտ։ Հետո այդ հեռախոսի անձնական նամակագրությունները հայտնվել է իշխող ՔՊ վարչության, եթե չեմ սխալվում, 15 հոգանոց կազմի նիստին՝ պարզ տարբերակով մարդիկ ծանոթացել են անձի անձնական նամակագրությանը։ Շատ պարզ հարց են ձեզ տալիս, սա նորմա ՞լ է, թե՞ նորմալ չի։ Տիկին դատախազ, դեկտեմբերի չորսի հարցուպատասխանի ժամանակ, ի պատասխան իմ հարցի, Նիկոլ Փաշինյանը հայտարարեց, որ հեռախոսի ուսումնասիրության ժամանակ պատկան մարմինները հանդիպել են տեղեկությունների, որոնք իրենց մեջ պարունակում են պետական անվտանգության սպառնալիքներ, այդ թվում հակահետախուզական սպառնալիքներ։ Դուք բոլորից լավ եք հասկանում այս բառերի նշանակությունը»,- ասաց պատգամավորը։ Խամոյանը նշեց, որ հիմա Ազգային ժողով եկել է ոչխարների գործով, Հովիկ Աղազարյանի հետևից։ «Սա փաստորեն ձեզ համար հիմք չի հանդիսացել հաղորդում հանցագործության մասին, թե՞ մենք հերթական անգամ կարող ենք արձանագրել, որ ինչպես այս դրվագով, այնպես էլ բազմաթիվ այլ դրվագներով, Նիկոլ Փաշինյանը հերթական անգամ ստել է և զրպարտել է»,- ասաց պատգամավորը: Վարդապետյանն, ի պատասխան, նշեց, որ ինքը քաղաքական հայտարարություններ չի անում: «Ես ներկայացրել եմ միջնորդագիր, երրորդ անգամ ստիպված եմ կրկնել, որ միջնորդագրի հետ կապ չունեցող և միջնորդագրի շրջանակներում չներկայացված ապացույցի վերաբերյալ որևէ դիրքորոշում չեմ հայտնելու»,- ասաց գլխավոր դատախազը։ «Տիկի՛ն դատախազ, դուք քաղաքական հայտարարություններ չեք անում, ներողություն եմ խնդրում, բայց դուք քաղաքական պատվեր եք անում, որովհետև նույն հարցուպատասխանի ժամանակ Նիկոլ Փաշինյանը էլի բառացի մեջբերում եմ, հայտարարել է՝ ժողովրդավարության բաստիոնը պետք է գտնի լծակներ քաղաքական, բարոյական և այլ լծակներ, նման կարմիր գծեր հատած պատգամավորին ժողովրդի կողմից տրված մանդատից զրկելու համար: Դուք հիմա կատարում եք քաղաքական պատվեր, տիկին Վարդապետյան»,- ի պատասխան ասաց Խամոյանը: Վարդապետյանը նորից նշեց, որ քաղաքական հայտարարության չի արձագանքում:

13:52 - 26 մարտի, 2025

ԵՄ-ին ՀՀ անդամակցության գործընթացի մեկնարկի մասին օրենքն ամբողջությամբ ընդունվեց՝ չնայած ընդդիմության պնդմանը, որ այն բաժակաճառ է

11:01 - 26 մարտի, 2025

Քննարկվել են «Հայաստան» խմբակցության հեղինակած «Պետական կենսաթոշակների մասին» օրենքում առաջարկվող լրացումները

ԱԺ հաղորդագրության համաձայն՝ «Հայաստան» խմբակցության հեղինակած ««Պետական կենսաթոշակների մասին» օրենքում լրացումներ կատարելու մաuին» նախագծով քննարկվել է ԱԺ-ում։ «Նախագծով առաջարկվում է 2026 թվականի հունվարի 1-ից նվազագույն կենսաթոշակի չափը սահմանել այնպես, որ պակաս չլինի պարենային ամսական զամբյուղի արժեքից, իսկ միջին աշխատանքային կենսաթոշակի չափը պակաս չլինի սպառողական զամբյուղի ամսական արժեքից: Առաջարկվում է նաեւ, որ սպառողական զամբյուղների էներգետիկ արժեքը, դրանում ներառվող սննդամթերքի կազմը, կառուցվածքը սահմանելու իրավասությունը վերապահել Կառավարությանը: «Հայաստան» խմբակցության կողմից արտահերթ համարված օրենքի նախագիծն ԱԺ մարտի 25-ին գումարված հերթական նիստում ներկայացրել է խմբակցության քարտուղար Արծվիկ Մինասյանը: Հարակից զեկուցող, Աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը նշել է, որ ներկայացված նախագծի կարգավորումներն իրենց քաղաքական թիմի հանձնառությունն է, որը ստանձնել են 2021 թվականին եւ հաստատել Ազգային ժողովի կողմից ընդունված Կառավարության ծրագրով: Նա ընդգծել է, որ նախորդ 4 տարիների ընթացքում Կառավարությունը հետեւողական է եղել եւ գրեթե 22 տոկոսով ավելացվել են կենսաթոշակի չափերը: «Այս պահին մեր նվազագույն կենսաթոշակը մեկ շնչի հաշվով գերազանցում է պարենային զամբյուղի արժեքը»,- ասել է հանձնաժողովի նախագահը: Անդրադառնալով հանձնաժողովում տրված բացասական եզրակացությանը՝ Հերիքնազ Տիգրանյանը նշել է, որ ներկայացված նախագծի կարգավորումներն առկա են նույն օրենքում, ուստի կրկնության կարիք չկա: ՀՀ աշխատանքի եւ սոցիալական հարցերի նախարարի տեղակալ Դավիթ Խաչատրյանի խոսքով Կառավարության 2021-2026 թվականների ծրագրով աշխատանքի եւ սոցիալական բնագավառում Կառավարությունն արդեն սահմանել է ռազմավարական նպատակ՝ մինչեւ 2026 թվականը քայլեր ձեռնարկելու նվազագույն կենսաթոշակի եւ կենսաթոշակի միջին չափերը հավասարեցնելու, համապատասխանաբար, պարենային եւ սպառողական զամբյուղների արժեքներին: Փոխնախարարն ընդգծել է, որ ներկայացված կարգավորումներն առկա են վերոնշյալ ծրագրի 19-րդ կետում, համաձայն որի՝ մինչեւ 2026 թվականը քայլեր են ձեռնարկվելու այդ ուղղությամբ: Կարավարութունը կարծում է, որ ներկայացված օրենքի նախագծի ընդունումը նպատակահարմար չէ: Արտահերթ ելույթ է ունեցել ԱԺ փոխնախագահ Հակոբ Արշակյանը: «Մեր քաղաքական հանձնառություններից մեկն արժանապատիվ կենսաթոշակներ տալն է թոշակառուներին, եւ դրան են ուղղված մեր քաղաքական ու տնտեսական քաղաքականությունները, ինչը մեր ամենօրյա աշխատանքն է»,- ասել է խորհրդարանի փոխնախագահը: ԱԺ «Հայաստան» խմբակցության անունից ելույթ է ունեցել Թադեւոս Ավետիսյանը: Պատգամավորը նշել է, որ համաշխարհային բանկի հաշվարկով ամենացածր սպառողական զամբյուղը կազմում է 68,000 դրամ, իսկ դա նշանակում է, որ կենսաթոշակը 50,000 դրամից պետք է դառնա 68,000 դրամ: «Քաղաքացիական պայմանագիր» խմբակցության անունից ելույթ է ունեցել Հայկ Կոնջորյանը: Խմբակցության ղեկավարը, դիմելով կենսաթոշակառուներին, նշել է, որ ընդդիմության ներկայացրած նախագծի նպատակն է ցուցադրել, որ Կառավարությունը չի ուզում բարձրացնել կենսաթոշակները, սակայն, ըստ նրա, դա այդպես չէ: Հայկ Կոնջորյանը եւս ընդգծել է, որ Կառավարության հանձնառությունն է բարձրացնել կենսաթոշակները»,- ասված է հաղորդագրության մեջ:

17:41 - 25 մարտի, 2025

«Ավինյանն անհարգալից արտահայտություն է թույլ տվել քուրդ համայնքի նկատմամբ, դատապարտե՛ք», «Թևավոր խոսք է, ոչ մեկին վիրավորելու նպատակ չի ունեցել». քննարկում՝ ԱԺ-ում |tert.am|

tert.am: Խորհրդարանում մեկնարկել է հերթական քառօրյան: Նիստի մեկնարկին «Հայաստան» խմբակցության պատգամավոր Գեղամ Մանուկյանը նախ շնորհավորեց քրդերին Նավրոզի առթիվ, ապա անդրադարձավ օրերս ավագանու նիստին Երևանի քաղաքապետ Տիգրան Ավինյանի հնչեցրած հայտարարությանը, երբ ընդդիմությանն ասել էր՝ մարդիկ «փափախով քուրդ» չեն, որ ձեզ հավատան: «Քուրդ համայնքը կարևոր դեր ու ներկայություն է ունեցել Հայաստանում և պատահական չէ, որ ՀՀ օրենսդրության համաձայն, քուրդ համայնքը ներկայացնում է պատգամավոր: Պարո՛ն Սիմոնյան, օրերս Երևանի քաղաքապետ Տիգրան Ավինյանն անհարգալից արտահայտություն է թույլ տվել քուրդ համայքնի նկատմամբ: Որպես ԱԺ նախագահ, ակնկալում եմ, որ Ձեր կողմից դիրքորոշում կլինի՝ առնվազն դատապարտող կարճ արտահայտություն»,- ասաց Մանուկյանը: ԱԺ նախագահ Ալեն Սիմոնյանն էլ նշեց, որ մեր խոսակցականի մեջ արտահայտություններ կան, որոնք հենց ուղիղ իմաստով չեն գործածվում: «Այսինքն, մենք ասում ենք մի բան, որն ասացվածք է և նպատակ չունենք որևէ մեկին վիրավորելու, տարանջատելու: Մենք հաճախ մեր հարևանների ազգությունն անվանելով՝ փորձում ենք իրար վիրավորել այն պարագայում, որ դա ընդամենն ազգության անվանում է: Վստահ եմ, որ պարոն Ավինյանը ոչ մեկին վիրավորելու նպատակ չի ունեցել, ես դրա մեջ ավելի քան վստահ եմ»,- արձագանքեց Սիմոնյանը:

11:54 - 25 մարտի, 2025