Արթուր Հովհաննիսյան

Արթուր Հովյաննիսյանն 8-րդ գումարման Ազգային ժողովի պատգամավոր է, «Քաղաքացիական պայմանագիր» խմբակցության քարտուղարը։

Ծնվել է 1990թ. Երևանում։

2008-2010թթ. ծառայել է ՀՀ զինված ուժերում։ 2016թ. ավարտել է Երևանի պետական համալսարանի լրագրության ֆակուլտետը:

2012-2013թթ. աշխատել է «Ա1+» հեռուստաընկերության լրագրող: 2013-2015թթ. զբաղվել է անհատ ձեռներեցությամբ: 2015-2016թթ. եղել է Հ3 հեռուստաընկերության լրագրող, 2016-2017թթ.՝ 1in.am կայքի լրագրող, լրատվական թողարկումների մեկնաբան, տեսանկարահանման  բաժնի պրոդյուսեր, 2017-2018թթ.՝ para.tv-ի գլխավոր պրոդյուսեր։

2018-2019թթ. եղել է ՀՀ վարչապետի աշխատակազմի հանրային կապերի եւ տեղեկատվության կենտրոն ՊՈԱԿ-ի տնօրենի առաջին տեղակալ։

10.06.2019-02.08.2021թթ.՝ ԱԺ պատգամավոր։

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

 

Օրենքը նպատակ ունի կանխարգելել բռնության այն տեսակները, որոնք մինչև այժմ օրենսդրությամբ չէին կանոնակարգվում. Հովհաննիսյան |1lurer.am|

Օրենքը նպատակ ունի կանխարգելել բռնության այն տեսակները, որոնք մինչև այժմ օրենսդրությամբ չէին կանոնակարգվում. Հովհաննիսյան |1lurer.am|

1lurer.am: Անդրադառնում ենք չափազանց կարևոր հարաբերությունների: Պետք է հստակություն մտցնենք առաջինից երկրորդ ընթերցում մեզ տված ժամանակահատվածում: Մենք սահմանել ենք «ընտանիքում» և «կենցաղային բռնություն» տերմինը, ես էլ եմ կարծում՝ որոշակիորեն անհասկանալի է, և կառաջարկեմ ֆիքսել «ընտանեկան բռնություն» հասկացությունը՝ դրա տակ նկատի ունենալով և՛ ընտանիքում բռնությունը, և՛ բոլոր այն բռնության տեսակները, որ թվարկվել են այս օրենսդրական փոփոխությամբ: Այս մասին ԱԺ ամբիոնից ելույթ ունենալով՝ հայտարարեց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով ԱԺ պատգամավորներ Զարուհի Բաթոյանի, Սոնա Ղազարյանի և Ծովինար Վարդանյանի՝ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում փոփոխություններ և լրացումներ կատարելու մասին նախագծին: «Կարծում եմ, որ domestic violence-ի թարգմանությունը այս տրամաբանությունն ավելի շատ է արտահայտում հայերենով, քան «կենցաղային բռնություն» հասկացությունը: Քանի որ խոսք գնաց վարչական և քրեական պատասխանատվության մասին, կիսում եմ Կառավարության մեր գործընկերների մոտեցումն այս իմաստով: Քանի որ նոր բռնության ձևի հետ գործ ունենք, կարծում եմ, որ սկզբի համար պետք է սահմանենք աստիճանական մոտեցում այս հանցակազմին՝ առաջին դեպքի համար՝ վարչական և երկրորդ դեպքի համար՝ քրեական»,- նշեց «Քաղաքացիական պայմանագիր» խմբակցության քարտուղարը: Նրա խոսքով՝ օրենքի նախագիծը երկու տարի քննարկման փուլում է և անցել է բոլոր հնարավոր փորձագիտական, իրավաբանական փուլերը: «Եվս մեկ անգամ արձանագրում ենք՝ օրենքը ընտանեկան բռնության կանխարգելման մասին է, օրենքում արծարծվում են թեմաներ, սահմանվում են նոր հասկացություններ, որոնք նպատակ ունեն կանխարգելելու բռնության այն տեսակները, որոնք մինչև այժմ օրենսդրությամբ որևէ կերպ չէին կանխարգելվում և քաղաքացիներն օրենսդրությամբ պաշտպանվելու հնարավորություն չունեին: Այս իմաստով նորամուծություն է հասկացություններից «հետամտման» երևույթը: Սա հնարավորություն է քաղաքացիներին, նոր պաշտպանության միջոց է՝ պաշտպանելու իրենց իրավունքները ՀՀ բոլոր քաղաքացիների համար»,- պարզաբանեց Հովհաննիսյանը:  Հեղինակներն առաջարկում են վերանայել ՀՀ քրեական օրենսգրքի մի շարք հոդվածների ծանրացնող հիմքերը, ՀՀ քաղաքացիական դատավարության օրենսգրքով սահմանված պաշտպանական որոշմանն առնչվող քննության և ծանուցման ժամկետները և պայմանները, սահմանել ավելի բարձր տուգանք «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքով սահմանված անհետաձգելի միջամտության որոշումը կամ պաշտպանական որոշումը դիտավորությամբ չկատարելու դեպքում: Առաջարկվում է նոր կարգավորում նախատեսել ՀՀ քրեական օրենսգրքում` «Հետամտում» վերնագրով:
12:35 - 07 փետրվարի, 2024
Առաջարկվում է սահմանափակել «քրեական ենթամշակույթի քարոզ պարունակող» ֆիլմերի ցուցադրության ժամերը |news.am|

Առաջարկվում է սահմանափակել «քրեական ենթամշակույթի քարոզ պարունակող» ֆիլմերի ցուցադրության ժամերը |news.am|

news.am: Կառավարությունն իր այսօրվա՝ հունվարի 25-ի նիստում հավանություն տվեց «Տեսալսողական մեդիայի մասին» օրենքում լրացումներ կատարելու մասին նախագծին, որը հեղինակել են ԱԺ նախագահ Ալեն ՍԻմոնյան ու ՔՊ խմբակցության քարտուղար Արթուր Հովհաննիսյանը: Մասնավորապես, առաջարկվում է օրենքի 9-րդ եւ 57-րդ հոդվածներում «ակնհայտ բռնություն պարունակող ֆիլմերը» բառերից հետո լրացնել «քրեական ենթամշակույթի քարոզ պարունակող ֆիլմերն ու տեսալսողական հաղորդումները,» բառերով: Օրենքի 9-րդ հոդվածը վերաբերում է նրան, որ էրոտիկ բնույթի տեսալսողական հաղորդումները և սարսափ ու ակնհայտ բռնություն պարունակող ֆիլմերը, ինչպես նաև անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող հաղորդումները կարող են եթեր հեռարձակվել ժամը 24:00-6:00-ն: Իսկ օրենքի 57-րդ հոդվածը վերաբերում է հետեւյալին. Էրոտիկ բնույթի տեսալսողական հաղորդումները և սարսափ ու ակնհայտ բռնություն պարունակող ֆիլմերը, ինչպես նաև անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող տեսալսողական հաղորդումների եթեր հեռարձակման պահանջները խախտելը առաջացնում է տուգանքի նշանակում` Հասույթի 0.02 տոկոսի, բայց ոչ պակաս, քան սահմանված նվազագույն աշխատավարձի չորսհարյուրապատիկի չափով: Որոշման հիմնավորման մեջ, մասնավորապես, ասվում է. «Նախագծում կիրառվող «քրեական ենթամշակույթի քարոզ» եզրույթը հստա¬կեցման կամ վերաձևակերպման կարիք ունի, քանի որ կարող է իրավակիրառ պրակտիկայում տարաբնույթ հայեցողական մեկնաբանությունների տեղիք տալ: Մասնավորապես, պարզ չէ, թե ինչ չափորոշիչներ են հիմք ընդունվելու ֆիլմերն ու տեսալսողական հաղորդումերը «որպես քրեական ենթամշակույթ քարոզող» դիտարկելիս, արդյո՞ք քրեական ենթամշակույթին հարող անձի վերաբերյալ ֆիլմը կամ տեսալսողական հաղորդումը, որտեղ տվյալ անձը հանդես է գալիս որպես բացասական կերպար կամ ֆիլմի և հաղորդման շրջանակներում նման անձին ինչ-որ ձևով անդրադառնալը համարվելու է քրեական ենթամշակույթի քարոզ: Հարկ է նկատի ունենալ նաև, որ կինոարտադրական արդյունքը (ֆիլմը, ֆիլմաշարը, սերիալը) ինքնին հանդիսանում է քարոզչության ազդեցիկ մեխանիզմ, և առկա ձևակերպմամբ ցանկացած տեսարան և արտադրանք կարելի է որակել որպես «քարոզ»: Առավել մտահոգիչ է «քրեական» դրամա և «մարտաֆիլմ» ժանրերի արտադրանքի և գեղարվեստական արժեք ներկայացնող կամ հեղինակային ֆիլմերի տարածման տեսանկյունից:
11:38 - 25 հունվարի, 2024
Խաղաղության օրակարգը խնդիրների է հանդիպում թե՛ Հայաստանի ներսում, թե՛ Հայաստանից դուրս․ Արթուր Հովհաննիսյան
 |tert.am|

Խաղաղության օրակարգը խնդիրների է հանդիպում թե՛ Հայաստանի ներսում, թե՛ Հայաստանից դուրս․ Արթուր Հովհաննիսյան |tert.am|

tert.am: Խաղաղության օրակարգը խնդիրների է հանդիպում թե՛ Հայաստանի ներսում, թե՛ Հայաստանից դուրս, բայց պետք է արձանագրենք, որ իշխանության օրակարգը խաղաղության օրակարգն է։ Այս մասին խորհրդարանական ճեպազրույցների ժամանակ հայտարարեց «Քաղաքացիական պայմանագիր» խմբակցության քարտուղար Արթուր Հովհաննիսյանը։ Իշխանական պատգամավորն ընդգծեց՝ հենց սկզբից էլ հանրությանը տեղեկացրել են, որ այն հեշտ գործընթաց չէ։ «Մենք այդ խոչընդոտներին հանդիպում ենք հատկապես ագրեսիվ հռետորաբանության տեսանկյունից։ Կիսում ենք վարչապետի այն մոտեցումը և հույսը, որ Ալիևի հայտարարությունները փորձ չեն խաղաղության օրակարգը փակուղի տանելու։ Եթե սա Ադրբեջանի կողմից փորձ է խաղաղության օրակարգը փակուղի տանելու, սա որևէ կերպ մեզ հետ չի կանգնեցնելու մեր օրակարգից, որը խաղաղության օրակարգն է»,- նշեց ՔՊ պատգամավորը՝ ընդգծելով, որ Հայաստանը պատերազմի օրակարգ չունի, ունի խաղաղության օրակարգ, և շարժվելու է այդ ճանապարհով։
11:34 - 18 հունվարի, 2024
Շրջանառության մեջ է դրվել քրեական ենթամշակույթի քարոզ պարունակող հաղորդումների հեռարձակման ժամային սահմանափակում նախատեսող օրենքի նախագիծ

Շրջանառության մեջ է դրվել քրեական ենթամշակույթի քարոզ պարունակող հաղորդումների հեռարձակման ժամային սահմանափակում նախատեսող օրենքի նախագիծ

ԱԺ պատգամավոր Արթուր Հովհաննիսյանի և Ազգային Ժողովի նախագահ Ալեն Սիմոնյանի կողմից այսօր շրջանառության մեջ է դրվել քրեական ենթամշակույթի քարոզ պարունակող ֆիլմերի ու տեսալսողական հաղորդումների հեռարձակման ժամային սահմանափակում նախատեսող օրենքի նախագիծ: Այս մասին ֆեյբուքյան իր էջում հայտնել է Հովհաննիսյանը։  «Դրանք այսուհետ հեռուստատեսությամբ կարող են հեռարձակվել միայն 00:00-06:00-ն: Սա առաջին քայլն է այդ ուղղությամբ, հետագայում նաև չի բացառվում սահմանափակումներ, ինչպես նաև հարկային հավելյալ բեռ և այլ օրենսդրական սահմանափակումներ նախատեսվեն նման նյութեր պատրաստող կազմակերպությունների նկատմամբ: Ուստի հեռուստաընկերությունները և կինոարտադրությամբ զբաղվող կազմակերպությունները պետք է սկսեն հրաժարվել նման արտադրանքից և դրանով չքարոզեն այդ բարքերը մեր հասարակությունում»,- ասված է հաղորդագրության մեջ։ 
15:04 - 22 դեկտեմբերի, 2023
«Ադրբեջանին կոչ ենք անում կառուցողական քննարկումների դաշտ վերադառնալ, ԱՄՆ եւ ԵՄ գործընկերները կանգնած են խաղաղության օրակարգի կողքին»․ ՔՊ պատգամավոր |aravot.am|

«Ադրբեջանին կոչ ենք անում կառուցողական քննարկումների դաշտ վերադառնալ, ԱՄՆ եւ ԵՄ գործընկերները կանգնած են խաղաղության օրակարգի կողքին»․ ՔՊ պատգամավոր |aravot.am|

aravot.am: ԱԺ ճեպազրույցների ժամանակ ՔՊ խմբակցության պատգամավոր Արթուր Հովհաննիսյանն անդրադարձավ հարցին, որ Ադրբեջանը հրաժարվել է մասնակցել Վաշինգտոնում կայանալիք հանդիպմանը։ ՀՀ իշխանության ներկայացուցիչները պարբերաբար հույս են հայտնում, որ մինչեւ տարեվերջ հնարավոր է «խաղաղության պայմանագիր» ստորագրել։ Հարցին, թե այսինքն՝ կարո՞ղ ենք ասել, որ այս իրավիճակում գրեթե անհավանական է, որ մինչեւ տարվա վերջ հնարավոր կլինի «խաղաղության պայմանագիր» ստորագրել, Արթուր Հովհաննիսյանը պատասխանեց․ «Եկեք չշտապենք եզրակացություններ անել։ Բնականաբար, Ադրբեջանի հրաժարումը բացասաբար ենք գնահատում։ Կոչ են անում ավելի կառուցողական քննարկումների դաշտ վերադառնալ։ ԱՄՆ, Եվրամիության մեր գործընկերները հաստատապես կանգնած են խաղաղության օրակարգի կողքին, հայտնել են իրենց աջակցությունը, եւ մենք հույս ունենք, որ միջազգային գործընկերների միջնորդությամբ նաեւ հնարավորություն կստեղծվի առաջիկայում ստեղծել այն հարթակը, որտեղ Հայաստանն ու Ադրբեջանը կկարողանան նստել եւ կառուցողական կերպով քննարկել խաղաղության օրակարգը»։ Հարցին, թե այսինքն՝ հնարավորություն տեսնո՞ւմ են, որ հնարավոր է մինչեւ տարեվերջ փաստաթուղթ ստորագրել, Արթուր Հովհաննիսյանը պատասխանեց, որ որեւէ բան չեն բացառում։ «Մենք կառուցողական կերպով առաջ ենք շարժվում խաղաղության օրակարգով եւ հույս ունենք, որ մեր միջազգային գործընկերների միջնորդությամբ ու ջանքերով հնարավոր կլինի արդյունավետ կերպով առաջ շարժվել եւ Ադրբեջանին վերադարձնել կառուցողական դաշտ»,- հավելեց Արթուր Հովհաննիսյանը։
13:01 - 17 նոյեմբերի, 2023
Առաջիկա տարվա բյուջեն խաղաղության օրակարգը սպասարկող բյուջե է. Արթուր Հովհաննիսյան |1lurer.am|

Առաջիկա տարվա բյուջեն խաղաղության օրակարգը սպասարկող բյուջե է. Արթուր Հովհաննիսյան |1lurer.am|

1lurer.am: Բյուջեն մեր բարեկեցիկ և անվտանգ ապագան կառուցելու մասին առաջիկա կարճաժամկետ հատվածում փաստաթուղթն է, որի իրագործմանը պետք է մասնակցենք բոլորս՝ յուրաքանչյուր քաղաքացի իր հերթին, իր տեղում: Մեր նպատակներին, իմ խորին ընկալմամբ, կարող ենք հասնել կրթված, առողջ և խելացի հասարակություն ունենալու շնորհիվ: Այս իմաստով ես ցանկանում եմ առանձնացնել հատկապես ուսուցիչներին, բժիշկներին և զինվորականներին: Կարծում եմ, որ Կառավարության կողմից, մեր հասարակության կողմից այս մարդիկ պետք է արժանանան առանձնահատուկ ուշադրության, պետք է ապահովված լինեն սոցիալական բոլոր հնարավոր երաշխիքներով և մեկ վայրկյան անգամ չմտածեն այլ զբաղվածության մասին, որպեսզի կրթեն, առողջացնեն և ուժեղացնեն մեր հասարակությունը, մեր պետությունը: Այս մասին Ազգային ժողովի հերթական նիստում «Հայաստանի Հանրապետության 2024 թվականի պետական բյուջեի մասին» օրենքի նախագծի քննարկման ժամանակ ասաց ՀՀ ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը: Այս համատեքստում պատգամավորը բյուջեից առանձնացրեց կրթությանը, առողջապահությանը և պաշտպանությանը վերաբերող որոշ թվեր: «Կրթության ոլորտի բյուջեն 2018 թվականի համեմատ 2024-ին կլինի 130 տոկոսով ավելի, ինչն արդեն իսկ բավական շատ բան է փոխանցում մեր քաղաքացիներին»,- ասաց Հովհաննիսյանը՝ կարևորագույն ծրագրերից առանձնացնելով 500 մանկապարտեզի և 300 դպրոցի կառուցմանը վերաբերող ծրագիրը: «Առողջապահության ոլորտում բյուջեի միայն 86,6 միլիարդ դրամ ավելացումը ավելի է, քան 2018-ի ամբողջական բյուջեն»,- նշեց պատգամավորը՝ ընդգծելով՝ այստեղ ևս մի շարք ձեռքբերումներ ունենք՝ կառուցում ենք հիվանդանոցներ, ամբուլատորիաներ, հարյուր հազարավոր քաղաքացիների տրամադրվում է անվճար բուժօգնություն, դեղորայք: Ինչ վերաբերում է պաշտպանական բյուջեին՝ Հովհաննիսյանը նշեց՝ այն կավելանա 125 տոկոսով: «Որքան էլ մեր ընդդիմությունը փորձի ստվերել պաշտպանական ոլորտում տեղի ունեցող փոփոխությունները, մեր քաղաքացիները տեսնում են, որ աննախադեպ փոփոխություններ են տեղի ունենում: Իմ ընկալմամբ՝ այդ փոփոխություններն անկասելի են այլևս»,- հավելեց ՔՊ խմբակցության քարտուղարը՝ չժխտելով, որ այստեղ ևս կան խնդիրներ, որոնք առնչվում են ատեստավորմանը: «Ես, օրինակ, տարբեր դժգոհություններ եմ լսում, բայց այդ դժգոհությունների բովանդակությունը հետևյալն է՝ ինչու պետք է տարիներով ծառայած զինվորականներին նորից փորձաքննության ենթարկեն, երբ հասցնի ատեստավորմանը պատրաստվել: Նախ՝ մենք բոլորս հասկանում ենք, որ մեր սահմանները պետք է պաշտպանեն մեզանից ամենապատրաստվածները: Եվ այստեղ կրթության և առողջապահության ոլորտի ներդրումներն ուղղակի կապ ունեն պաշտպանության ոլորտի հետ, որովհետև մեր զինվորականները պետք է լինեն կիրթ, առողջ և ուժեղ, ու ատեստավորումը հենց դրա մասին է: Նրա մասին է, որ որևէ զինվորական պետք է այլ զբաղվածություն չունենա և այդ գիտելիքը ծառայեցնի բացառապես հայրենիքի պաշտպանությանը»,- ասաց պատգամավորը: Նրա խոսքով՝ այդ ամենը հնարավոր է իրականացնել բացառապես ժողովրդավարության շնորհիվ և խաղաղության պայմաններում: Այս համատեքստում Հովհաննիսյանը կարևորեց «Խաղաղության խաչմերուկ» նախագիծը, որի իրագործմանը պետք է լծվեն բոլորը՝ թե՛ Կառավարության, թե՛ ընդդիմության ներկայացուցիչները: «Այս մոլորակի վրա դեռևս միայն ընդդիմությունն է քննադատում «Խաղաղության խաչմերուկ» նախագիծը, սակայն ես կոչ եմ անում, որ նրանք ևս լծվեն ՀՀ-ի շուրջ և տարածաշրջանում խաղաղություն հաստատելու մեր օրակարգի իրականացմանը»,- ասաց Հովհաննիսյանը՝ ընդգծելով, որ հիմա վստահորեն կարող է ասել՝ առաջիկա տարվա բյուջեն խաղաղության օրակարգը սպասարկող բյուջե է: «Որովհետև ենթակառուցվածքների զարգացումը, տնտեսական առաջընթացը, կրթական և քաղաքակրթական ծրագրերը ՀՀ-ն միջազգային հանրության ընկալելի և առաջադեմ անդամ դարձնելու մասին է, որը հնարավորություն կտա Հայաստանի Հանրապետությանը դառնալ մի պետություն, որը կարող է առաջարկել աշխարհին և ոչ միայն լսել առաջարկներ ու իրականացնել դրանք»,- խոսքը եզրափակեց Հովհաննիսյանը:
11:41 - 16 նոյեմբերի, 2023
Եվրոպական հարթակը բավականին նպաստավոր ենք համարում բանակցությունների համար. պատգամավոր
 |armenpress.am|

Եվրոպական հարթակը բավականին նպաստավոր ենք համարում բանակցությունների համար. պատգամավոր |armenpress.am|

armenpress.am: Հայաստանի իշխանությունը եվրոպական հարթակը բավականին նպաստավոր է համարում Ադրբեջանի հետ քննարկումների համար: Այս մասին ասաց Ազգային ժողովի իշխանական «Քաղաքացիական պայմանագիր» խմբակցության քարտուղար Արթուր Հովհաննիսյանն՝ անդրադառնալով հարցին, թե արդյոք հոկտեմբերի վերջին Բրյուսելի հանդիպման չկայանալու, նաև Գրանադայում նախատեսված հնգակողմ հանդիպումից Ալիևի հրաժարվելու փաստը վկայում են նրա մասին, որ Արևմուտքը ձախողել է գործընթացը: Հովհաննիսյանն ասաց, որ Բրյուսելի այցը չեղարկվել է, սակայն հայկական կողմը ևս մեկ անգամ հայտնել է եվրոպական հարթակում հանդիպելու իր պատրաստակամությունը: «Մենք ելնում ենք մեր պետական շահերից, պատրաստակամ ենք եվրոպական հարթակում շարունակել մեր քննարկումներն Ադրբեջանի հետ: Կարևոր պայմանավորվածություններ ենք ձեռք բերել Ադրբեջանի հետ եվրոպական հարթակում մի քանի փուլերով: Մենք այս պահին բավականին նպաստավոր հարթակ ենք համարում եվրոպական հարթակը և ակնկալում ենք, որ առաջիկայում նաև մեր եվրոպական գործընկերների ջանքերով կհաջողվի կազմակերպել հանդիպում եվրոպական հարթակներում»,-ասաց խմբակցության քարտուղարը: Հարավային Կովկասի և Վրաստանում ճգնաժամի հարցերով Եվրամիության հատուկ ներկայացուցիչ Տոյվո Կլաարը հայտարարել էր, որ հոկտեմբերի վերջին Եվրամիության խորհրդի նախագահ Շառլ Միշելի, Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպում տեղի չի ունենա: Հայաստանի վարչապետ Նիկոլ Փաշինյանն այս առնչությամբ ասել ՝ ենթադրում է, որ Բրյուսելի հանդիպումը չի կայանալու Ալիևի կողմից իր մասնակցությունը չհաստատելու պատճառով:
13:29 - 26 հոկտեմբերի, 2023
Միջանցքի հարց երբեք չենք քննարկել, հույս ունենք, որ տարածաշրջանի երկրները ընդառաջ կգնան խաղաղության մեր առաջարկին. Արթուր Հովհաննիսյան |tert.am|

Միջանցքի հարց երբեք չենք քննարկել, հույս ունենք, որ տարածաշրջանի երկրները ընդառաջ կգնան խաղաղության մեր առաջարկին. Արթուր Հովհաննիսյան |tert.am|

tert.am: Խաղաղության խաչմերուկը որպես տեսական տերմին մեր միջազգային գործընկերների մոտ շատ ընդունելի է: Այս մասին այսօր ԱԺ խորհրդարանական ճեպազրույցների ժամանակ ասել է «Քաղաքացիական պայմանագիր» խմբակցության պատգամավոր Արուսյակ Ջուլհակյանը։ «Վարչապետը երեկ ասում էր, որ արդեն գործնականում թղթի վրա ենք հանձնելու, թե խաղաղության խաչմերուկ ասելով ինչ ենք հասկանում: Իսկ միջազգային գործընկերների վերաբերմունքի ամենավառ  արտացոլումը Գրանադայի հայտարարություներն են»,- ասել է նա: Հարցին, թե արդյոք մենք կարող ենք համարել, որ միջանցքի հետ կապված հարցը փակված է, խմբակցության քարտուղար Արթուր Հովհաննիսյանը պատասխանեց. «Երբեք չի եղել նման հարց միջազգային օրակարգում, երբեք, և Հայաստանի Հանրապետությունը երբեք չի քննարկել նման հարց և նման քննարկման մասնակից չի եղել: 1 վայրկյան անգմ նման թեմայով քննարկման մասնակից չենք եղել: Հայաստանի Հանրապետություը քննարկում է ապաշրջափակումը՝ իրավազորության, տարածքային ամբողջականության սկզբունքների հիման վրա: Մեզ համար կարևոր է, որ բոլոր տերմինները բոլորի համար նույն կերպ հասկացվի»,- ասել է նա: Նա նշեց, որ Խաղաղության խաչմերուկը ՀՀ-ի կողմից տարածաշրջանի երկրներին արված խաղության բանաձևի առաջարկն է և հույս ունի, որ հատկապես տարածաշրջանի երկրիները ամենայն պատասխանատվությամբ և լրջությամբ կուսումնասիրեն մեր առաջարկը և ընդառաջ կգնան տարածաշրջանում խաղաղության մեր առաջարկին:
13:25 - 26 հոկտեմբերի, 2023
Ցնդաբանություն է․ այդպե՞ս է նա ուզում մտնել քաղաքականություն․ ՔՊ-ական պատգամավորը՝ Արշակ Կարապետյանի հայտարարության մասին
 |tert.am|

Ցնդաբանություն է․ այդպե՞ս է նա ուզում մտնել քաղաքականություն․ ՔՊ-ական պատգամավորը՝ Արշակ Կարապետյանի հայտարարության մասին |tert.am|

tert.am: Ինձ համար շատ տարակուսելի էր, որ պարոն Կարապետյանը աշխարհասփյուռ հայությանը դիմել է ռուսերենով։ Այս մասին խորհրդարանական ճեպազրույցների ժամանակ ասաց իշխանական պատգամավոր Արման Եղոյանը՝անդրադառնալով պաշտպանության նախկին նախարար Արշակ Կարապետյանի այն հայտարարությանը, որով Նիկոլ Փաշինյանին մեղադրում էր դավաճանության մեջ։ «Այդտեղ մեկնաբանելու բան չկա, ակնկալում եք, որ ես պետք է պատասխանե՞մ այդ հարցին։ Կարող եք նայել ժամանակագրությունը և տեսնել՝ երբ, ինչ է տեղի ունեցել։ Ես պետք է ասե՞մ՝ ում հրամանով ինչ է եղել»,- ասաց նա։ Անդրադառնալով Արշակ Կարապետյանի հնչեցրած այն հայտարարությանը, որ Նիկոլ Փաշինյանն է դիմել Ադրբեջանին՝ Ռուբեն Վարդանյանին ձերբակալելու համար, Եղոյանը ասաց․ «Դա ցնդաբանություն է, ամոթ է նույնիսկ։ Եթե մարդիկ հույս ունեն, որ նման ցնդաբանություններով պետք է մտնեն քաղաքականություն, չգիտեմ էլ՝ ինչ ասեմ։ Դուք չե՞ք տեսնում քաղաքական իրավիճակը մեր երկրում, չտեսա՞ք Երևանի ավագանու ընտրությունների արդյունքները։ Հիմա ուզում եք՝ մենք տեսախցիկների առաջ քննարկենք, թե սահմանների պաշտպանության ժամանակ ով ինչպե՞ս է կատարել իր գործառույթը։ ՀՀ սահմանները պաշտպանելու համար որևէ մեկը չի կարող պաշտոնանկ արվել, դրա համար մարդիկ ստանում են խրախուսում, կոչում, մեդալներ»։ ՔՊ խմբակցության քարտուղար Արթուր Հովհաննիսյանն էլ հավելեց, որ խորհրդարանական ճեպազրույցի ժամանակ տեսախցիկների առաջ նպատակահարմար չէ քննարկել այդ հարցը։ «Իմաստ չունի քննարկել մի մարդու արտահայտություններ, որոնցով նա իր ծառայություններն է առաջարկել կոնկրետ մարդկանց, կոնկրետ բևեռների, ինչպես շատերն են անում»,- ասաց Հովհաննիսյանը։
13:33 - 05 հոկտեմբերի, 2023
«Երկու երկրները բանավոր պայմանավորվել են փոխադարձ ճանաչել միմյանց տարածքային ամբողջականությունը, բայց գրավոր ձևակերպումը, որը կարող ենք ամրագրել խաղաղության պայմանագրով, դեռ ՀՀ-ին չի բավարարում»․ Արուսյակ Ջուլհակյան

 |aravot.am|

«Երկու երկրները բանավոր պայմանավորվել են փոխադարձ ճանաչել միմյանց տարածքային ամբողջականությունը, բայց գրավոր ձևակերպումը, որը կարող ենք ամրագրել խաղաղության պայմանագրով, դեռ ՀՀ-ին չի բավարարում»․ Արուսյակ Ջուլհակյան |aravot.am|

aravot.am: «Բավականին բարդ գործընթացում ենք, և որևէ մեկը չի ասել, որ խաղաղության, հարաբերությունների կարգավորման փաստաթուղթը հեշտ է տրվելու»,- հիշեցմանը՝ խաղաղության բանակցությունների արդեն հինգերորդ շրջափուլն է, սակայն սահմանին կուտակումներ են, լարվածությունը շարունակվում է և հարցին՝ սա չի՞ նշանակում, որ խաղաղության բանակցությունները փակուղի են մտել, լրագրողների հետ ճեպազրույցում այսպես պատասխանեց ՔՊ խմբակցության պատգամավոր Արթուր Հովհաննիսյանը։ Նա նշեց, որ բազմաթիվ դրվագներում մեր և Ադրբեջանի մոտեցումները դեռևս հեռու են իրարից․ «Հինգերորդ շրջափուլն է, հիմա ստացել ենք Ադրբեջանի կողմից առաջարկները, դրանք կուսումնասիրվեն մեր կողմից, և կլինի հետագա գործընթաց։ Գործընթացը շարունակվում է․ ոչ մի գործընթաց փակուղում չի գտնվում, որքան էլ որ բարդ է իրավիճակը, որքան էլ կուտակումներ կան սահմաններին»։ Հարցին՝ փակագծեր կբացե՞ք՝ նախկինում ասվել է, որ ադրբեջանական կողմը ՀՀ առաջարկները ջնջած հետ է ուղարկում, նա շարունակո՞ւմ է այս մոտեցումը, ՔՊ խմբակցության պատգամավոր Արուսյակ Ջուլհակյանը պատասխանեց․ «Ադրբեջանի վերջին առաջարկներին դեռ ծանոթ չենք։ Ամեն դեպքում ասեմ՝ ջնջած հետ ուղարկելը, վերաձևակերպվածն է՝ նույն բանն ավելի մեղմ ասած։ Համենայն դեպս, ինչպես նախկինում նշել ենք, կան կոնկրետ կետեր, որոնց շուրջ համաձայնության դեռ չենք կարողանում հասնել, բայց շարունակում ենք բանակցել։ Ասել ենք, որ ՀՀ-ի նպատակներից մեկը տարածաշրջանում խաղաղության ու կայունության հասնելն է»։ Արթուր Հովհաննիսյանն էլ «ջնջել» եզրույթի հետ կապված արձագանքեց․ «Առհասարակ խոսակցությունները և գործընթացը ջնջել, խմբագրել, վերախմբագրելը մոտեցումները մոտարկելու մասին են։ Ինչպես Ադրբեջանի առաջարկներին հայկական կողմից որոշակի առաջարկներ, խմբագրումներ են լինում, նորմալ գործընթաց է։ Գույները «ջնջել» բառով խտացնել պետք չէ»։
13:46 - 14 սեպտեմբերի, 2023
Փորձում ենք ճնշումների միջոցով հասնել ԼՂ-ում առկա սարսափելի հումանիտար վիճակի մեղմմանը. Հովհաննիսյան
 |armenpress.am|

Փորձում ենք ճնշումների միջոցով հասնել ԼՂ-ում առկա սարսափելի հումանիտար վիճակի մեղմմանը. Հովհաննիսյան |armenpress.am|

armenpress.am: Հայաստանի իշխանություններն ամեն բան անում են, որ աշխարհը նկատի շրջափակման հետևանքով Լեռնային Ղարաբաղում առկա սարսափելի հումանիտար վիճակը և միջազգային գործընկերների հետ խոսակցության, ճնշումների միջոցով հասնել նրան, որ այդ վիճակը մեղմվի: Այս մասին խորհրդարանում ասուլիսում վստահեցրեց «Քաղաքացիական պայմանագիր» խմբակցության քարտուղար Արթուր Հովհաննիսյանն՝ անդրադառնալով հարցին, թե Հայաստանն ի՞նչ դեր պետք է ունենա այս պահին Արցախում առկա խնդիրների լուծման համատեքստում: Արթուր Հովհաննիսյանը վստահեցրեց՝ ամեն բան անում են, որ ամբողջ աշխարհը նկատի, որ ԼՂ-ում այսօր սարսափելի հումանիտար ճգնաժամ է: «Եվ այս հարցերը օպերատիվ կերպով կոմունիկացնում ենք մեր բոլոր միջազգային գործընկերների հետ, որը ենթադրում է նաև որոշակի օպերատիվ գործողությունների, խոսակցությունների, միջամտության, հումանիտար բեռների տեղափոխման վերաբերյալ բանակցությունների ընթացք»,-ասաց Հովհաննիսյանը: Նա վստահեցրեց, որ օպերատիվ կերպով են հասցեագրում կոնկրետ խնդիրները՝ կոնկրետ լուծումներով: «Հիմա մենք փորձում ենք մեր միջազգային գործընկերների հետ խոսակցության, ճնշումների միջոցով հասնել նրան, որ ԼՂ-ում այս պահին առկա սարսափելի հումանիտար վիճակը մեղմվի հումանիտար բեռների անցման շնորհիվ, որը պետք է ապահովվի նոյեմբերի 9-ի հայտարարության տեքստով, և Լաչինի միջանցքով պետք է բեռներն անխափան տեղափոխվեն»,-ասաց Հովհաննիսյանը: Ստեփանակերտում վաղ առավոտից մեկնարկել է համաժողովրդական հանրահավաք, ադրբեջանական շրջափակման հետևանքով վտանգված է 120 հազար հայի կյանք, ԼՂ-ում լուրջ հումանիտար ճգնաժամ է:
13:36 - 14 հուլիսի, 2023
Հայաստանը հավատարիմ է մեր տարածաշրջանում խաղաղության հաստատմանը և ամեն քայլ ձեռնարկում է այդ ուղղությամբ. Արթուր Հովհաննիսյան

Հայաստանը հավատարիմ է մեր տարածաշրջանում խաղաղության հաստատմանը և ամեն քայլ ձեռնարկում է այդ ուղղությամբ. Արթուր Հովհաննիսյան

Կանադայի Վանկուվեր քաղաքում տեղի է ունեցել Եվրոպայի անվտանգության և համագործակցության կազմակերպության խորհրդարանական վեհաժողովի (ԵԱՀԿ ԽՎ) տարեկան 30-րդ նստաշրջանը, որին մասնակցել է ՀՀ ԱԺ պատվիրակությունը: Ազգային ժողովի պատվիրակության անդամ Արթուր Հովհաննիսյանը ելույթ է ունեցել ԵԱՀԿ ԽՎ ժողովրդավարության, մարդու իրավունքների և հումանիտար հարցերի հանձնաժողովի նիստում: «Տիկնա՛յք և պարոնա՛յք, Թեև մեզ շրջապատող խոր մտահոգությունները կարող են վախ սերմանել շատերի մեջ, սակայն մեզ համար` որպես ԵԱՀԿ անդամ երկրների ներկայացուցիչներ, կարևոր է գնահատել իրավիճակը և վճռական գործողություններ ձեռնարկել մարդկանց իրավունքների և անվտանգության ապահովման համար: Հայաստանը հավատարիմ է մեր տարածաշրջանում խաղաղության հաստատմանը և ամեն քայլ ձեռնարկում է այդ ուղղությամբ: Մինչդեռ Լեռնային Ղարաբաղի 120 000 բնակիչ արդեն երկու հարյուր օրից ավելի շրջափակման մեջ է: Ուզում եմ հիշեցնել, որ փետրվարի 22-ին Արդարադատության միջազգային դատարանն Ադրբեջանի դեմ իրավականորեն պարտադիր ժամկետային միջոց է կիրառել` ի պատասխան Հայաստանի գործի: Դատարանը որոշեց, որ առկա է Ռասսայական խտրականության վերացման կոնվենցիայով նախատեսված հայերի իրավունքներին անուղղելի վնաս հասցնելու անմիջական վտանգ: Հանձնարարվել է Ադրբեջանին ձեռնարկել բոլոր անհրաժեշտ միջոցները` Լաչինի միջանցքով երկու ուղղություններով մարդկանց, մեքենաների և բեռների անսահմանափակ տեղաշարժն ապահովելու համար: Ցավոք, Ադրբեջանը չի կատարել միջազգային դատարանի որոշումը և ավելի է սրել հումանիտար իրավիճակը Լեռնային Ղարաբաղում: Հունիսի 15-ից Ադրբեջանն ամբողջությամբ փակել է Լաչինի միջանցքով անցնելու հնարավորությունը, այդ թվում` Կարմիր խաչի և խաղաղապահ ուժերի համար: Իրավիճակը սարսափելի է, քանի որ Լեռնային Ղարաբաղի ժողովուրդը բախվում է սննդի, դեղորայքի և այլ անհրաժեշտ արագ վերջացող պաշարների սպառվելու խնդրի հետ: Այժմ, առավել քան երբևէ, հրամայական է մեր ուշադրությունը կենտրոնացնել Լեռնային Ղարաբաղում տեղի ունեցող զարգացումների վրա` հայտարարությունների, բանաձևերի եւ, ամենակարևորը, կոնկրետ գործողությունների միջոցով: Մենք պետք է ընդունենք, որ այս մարդկանց իրավունքները նույնքան կարևոր են, որքան մեր բոլորինն այսօր այստեղ: Հանդես գալով Լեռնային Ղարաբաղում ժողովրդի իրավունքների և անվտանգության համար` մենք պաշտպանում ենք մարդու իրավունքների մեր արժեքները, որոնք համամարդկային են` անկախ իրենց աշխարհագրությունից: Շնորհակալություն»,- նշել է Արթուր Հովհաննիսյանը:  
12:16 - 04 հուլիսի, 2023
Լաչինի միջանցքում պետք է վերահսկողություն իրականացնի բացառապես ՌԴ խաղաղապահ զորախումբը. Հովհաննիսյան
 |armenpress.am|

Լաչինի միջանցքում պետք է վերահսկողություն իրականացնի բացառապես ՌԴ խաղաղապահ զորախումբը. Հովհաննիսյան |armenpress.am|

armenpress.am: Հայկական կողմը խոսել է և ուղիղ կապի մեջ է Ռուսաստանի Դաշնության  գործընկերների հետ՝ նաև Հակարիի կամրջին տեղի ունեցած ադրբեջանական վերջին սադրանքի առիթով:  Այս մասին ասաց ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը խորհրդարանական ճեպազրույցում։ Նա տեղեկացրեց, որ Հակարիի կամրջին ադրբեջանական կողմի առաջխաղացման փորձի կանխումից հետո նոր իրավիճակ, ըստ էության, չկա: «Մեր արտաքին գերատեսչության գործընկերները մշտական կապի մեջ են Ռուսաստանի մեր գործընկերների հետ, մենք ոչ մեկ անգամ ենք արձանագրել, որ Լաչինի միջանցքում կա խնդիր, այնտեղ ՌԴ խաղաղապահների պատասխանատվության գոտին է: Այն, ինչ տեղի է ունեցել, խնդիր է, որի շուրջ մենք խոսել ենք և ուղիղ կապի մեջ ենք մեր գործընկերների հետ»,-ասաց Հովհաննիսյանը:  Նա հավելեց, որ Լաչինի միջանցքում՝ ՌԴ խաղաղապահների պատասխանատվության գոտում առաջացած խնդիրների վերաբերյալ գնահատականները ոչ մեկ անգամ են հնչեցրել: «Եվս մեկ անգամ արձանագրում ենք, որ Լաչինի միջանցքում պետք է վերահսկողություն իրականացնի բացառապես ռուսական խաղաղապահ զորախումբը։ Տեղի ունեցածը շատ մեծ ծավալի խնդիր է: Եվ, բնականաբար, մեր ռուս գործընկերների հետ խոսակցություն տեղի ունենում է: Թե ինչ կոնտեքստում և ինչ արդյունքներով, կխոսի ԱԳՆ-ն»,- նշեց պատգամավորը: Հակարիի կամրջին տեղի ունեցածը Հայաստանը գնահատում է որպես հերթական սադրանք Ադրբեջանի կողմից՝ խաթարելու գործընթացները, բայց հայկական կողմը շարժվելու է իր քաղաքականությամբ և ամեն բան անելու է՝ զսպելու էսկալացիոն բոլոր ռիսկերը նաև միջազգային բոլոր գործընկերների ճնշման միջոցով: Հունիսի 15-ին Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը  կանխվել էր:  
12:46 - 16 հունիսի, 2023
Պապիկյանի՝ ՀԱՊԿ նիստին չմասնակցելը կապ չունի Հայաստան-ՀԱՊԿ հարաբերությունների հետ. Արթուր Հովհաննիսյան
 |news.am|

Պապիկյանի՝ ՀԱՊԿ նիստին չմասնակցելը կապ չունի Հայաստան-ՀԱՊԿ հարաբերությունների հետ. Արթուր Հովհաննիսյան |news.am|

news.am: ՀՀ պաշտպանության նախարար Սուրեն Պապիկյանի` ՀԱՊԿ ՊՆ ղեկավարների նիստին չմասնակցելը կապ չունի Հայաստան–ՀԱՊԿ հարաբերությունների հետ։ Այս մասին, այսօր՝ մայիսի 25-ին, ԱԺ-ում լրագրողների հետ զրույցում ասաց ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը` անդրադառնալով հարցին, արդյոք սրանք ՀԱՊԿ–ից դուրս գալու նախանշաններ չեն։ «Մանրամասներին չեմ տիրապետում, վստահ եմ, որ քաղաքական մեկնաբանություն չկա այս հարցի վերաբերյալ։ Կարծում եմ` դրանք կապ ունեն պաշտպանության նախարարի այլ գործերի, այլ տեխնիկական հարցերի հետ»,– նշեց Հովհաննիսյանը։ Նա վստահեցրեց` նիստին չմասնակցելու ենթատեքստը քաղաքական չէ։ Հիշեցնենք` Բելառուսի մայրաքաղաք Մինսկում ընթանում է Հավաքական անվտանգության պայմանագրի կազմակերպության (ՀԱՊԿ) անդամ երկրների պաշտպանության նախարարների նիստը։ ՀՀ պաշտպանության նախարար Սուրեն Պապիկյանի փոխարեն Բելառուսի մայրաքաղաք է մեկնել կազմակերպության միացյալ շտաբում Հայաստանի պաշտպանության նախարարության ներկայացուցիչ Արտակ Տոնոյանը։ Նիստին մասնակցում են ՀԱՊԿ գլխավոր քարտուղար Իմանգալի Տասմագամբետովը և ՀԱՊԿ միացյալ շտաբի պետ Անատոլի Սիդորովը։
15:26 - 25 մայիսի, 2023
Որևէ մեկը չի վիճարկում այն փաստը, որ Ալիևը կառուցողական չէ ու ռազմական հանցագործ է, բայց Հայաստանը պետք է բանակցի ու պայքարի․ Արթուր Հովհաննիսյան
 |armenpress.am|

Որևէ մեկը չի վիճարկում այն փաստը, որ Ալիևը կառուցողական չէ ու ռազմական հանցագործ է, բայց Հայաստանը պետք է բանակցի ու պայքարի․ Արթուր Հովհաննիսյան |armenpress.am|

armenpress.am: Որևէ մեկը չի վիճում այն փաստի հետ, որ Ադրբեջանի նախագահ Իլհամ Ալիևը կառուցողական չէ, սակայն դա չի նշանակում, որ հայկական կողմը պետք է ամեն ինչ թողնի բախտի հույսին և չպայքարի։ Լրագրողների հետ ճեպազրույցում այս մասին ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը։ «Բրյուսելյան բանակցություններից 3 օր առաջ Ադրբեջանը շարունակաբար կրակում էր Հայաստանի Հանրապետության սուվերեն տարածքների և Հայաստանի դիրքերի ուղղությամբ, որ բանակցային սեղանին ռազմական առավելության պայմաններում հասնեն այլ առավելությունների։ Մեր զինված ուժերը արժանի մարտեր են տվել այդ օրերին եւ թույլ չեն տվել, որպեսզի Ադրբեջանը ռազմական առավելության պայմաններում մտնի մեզ հետ բանակցությունների»,- ասաց Հովհաննիսյանը։ Նրա խոսքով՝ Ալիևը կառուցողական չէ, ռազմական հանցագործ է և չի իրականացնում միջազգային դատարանների վճիռները․ որևէ մեկը չի վիճում այդ փաստի հետ։ «Մենք գնում ենք խաղաղության, որպեսզի ճանապարհները ապաշրջափակվեն, որպեսզի կարողանանք զարգանալ, բանակը հզորացնել, որ այլևս երբեք որեւէ մեկը չկարողանա մեր սահմաններին կրակել։ Մենք մեր միջազգային գործընկերների հետ շատ հստակ հարաբերվում ենք՝ թե Ռուսաստանի, թե ՛Արևմուտքի, թե՛ ԱՄՆ-ի, և նրանց ստեղծած հարթակներում փորձում ենք հնարավորինս կառուցողական լինել։ Այո, Ադրբեջանը կառուցողական չէ, բայց դա չի նշանակում, որ մենք պետք է հետ քաշվենք և թողնենք այնպես, ինչպես կա կամ թողնենք բախտի հույսին։ Պարզ է, որ պետք է պայքարենք, որ միջազգային մեխանիզմներ ստեղծվեն Բաքու-Ստեփանակերտ երկխոսության համար և պարզ է, որ պետք է ամեն ինչ անենք, որ Ադրբեջանը դուրս գա Հայաստանի Հանրապետության օկուպացված տարածքներից և պարզ է, որ պետք է ամեն ինչ անենք, որ կարողանանք ստորագրել խաղաղության և հարաբերությունների կարգավորման մասին փաստաթուղթը, որի շնորհիվ կկարողանանք Հայաստանի շուրջ ապահովել երկարատև խաղաղություն և զարգացում»,- ասաց Հովհաննիսյանը։
15:49 - 23 մայիսի, 2023
Խնդիրը լուծվել է բացառապես մեր ԶՈՒ-ի և զինվորականության քաջարի գործողությունների արդյունքում․ Անդրանիկ Քոչարյանը՝ Զախարովայի հայտարարության մասին |news.am|

Խնդիրը լուծվել է բացառապես մեր ԶՈՒ-ի և զինվորականության քաջարի գործողությունների արդյունքում․ Անդրանիկ Քոչարյանը՝ Զախարովայի հայտարարության մասին |news.am|

news.am: Կասկածի տակ չեմ դնում ՌԴ ԱԳՆ պաշտոնական ներկայացուցիչ Մարիա Զախարովայի ասածները, որ ինչ-որ ձեւաչափով մասնակցել են իրենք, բայց կռվել է ՀՀ զինված ուժերը, եթե մենք չկռկվեինք, զոհեր չտայինք, ինչքան ուզում է՝ ՌԴ արտաքին գերատեսչությունը զանգեր աներ աջ ու ձախ: Այս մասին այսօր՝ ապրիլի 14-ին, ԱԺ-ում հայտարարեց «Քաղաքացիական պայմանագիր» խմբակցության պատգամավոր Անդրանիկ Քոչարյանը: «Տիկին Զախարովան նաեւ ասել էր, որ Ռուսաստանի Դաշնության անմիջական մասնակցությամբ գործողությունները ստացել են դադար: Կասկածի տակ չեմ դնում տիկին Զախարովայի ասածները, որ ինչ-որ ձեւաչափով մասնակցել են, բայց կռվել է ՀՀ զինված ուժերը, եթե մենք չկռկվեինք, զոհեր չտայինք, ինչքան ուզում է՝ ՌԴ արտաքին գերատեսչությունը զանգեր աներ աջ ու ձախ, դա խնդրի լուծմանը չէր տանելու եւ խնդիրը լուծվել է բացառապես մեր ԶՈՒ-երի եւ մեր զինվորականության քաջարի գործուղությունների արդյունքում»,- ասաց Քոչարյանը: Հիշեցնենք, որ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ  Ռուսաստանի ԱԴԾ-ի Սահմանապահ ծառայության եւ ԶՈՒ ներկայացուցիչները միջոցներ են ձեռնարկել ՀՀ Սյունիքի մարզի Տեղ գյուղի մոտ իրավիճակի դեէսկալացիայի համար։  Անդրադառնալով Զախարովայի այն հարցին, թե ինչո՞ւ է Հայաստանը մասնակցելու ՆԱՏՕ-ի զորավարժություններին, ՔՊ-ական Արթուր Հովհաննիսյանը արձագանքեց. «Հայաստանի Հանրապետությունն առաջ է շարժվում ՀՀ պետական շահերով եւ ամեն ինչ անում է իր զինված ուժերի մարտունակությունը բարձրացնելու ուղղությամբ, եւ այդպես էլ շարունակվելու է: Հայաստանի Հանրապետությունը իր ռազմավարական գործընկերոջ՝ Ռուսաստանի հետ շարունակում է ջերմ, բարեկամական հարաբերությունները: Իր ջերմ հարաբերությունները շարունակում է նաեւ այլ երկրների մեր գործընկերների հետ»: ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Մոսկվան Երեւանից պարզաբանում է խնդրել ՆԱՏՕ-ի հետ համատեղ զորավարժություններին Հայաստանի մասնակցության վերաբերյալ։  «Պատասխան ստանալուց հետո մենք կորոշենք մեր արձագանքը։ Իհարկե, Երևանի հրաժարումը  իր տարածքում ՀԱՊԿ զորավարժություններ անցկացնելուց ցավալի է և չի նպաստում տարածաշրջանային անվտանգության ամրապնդմանը»,- ասել էր Զախարովան։  Ավելի վաղ ՀՀ ՊՆ մամուլի խոսնակը հայտնել էր, որ Հայաստանը ընթացիկ տարում պլանավորում է մասնակցել Եվրոպայում ԱՄՆ ցամաքային զորքերի հրամանատարության կողմից կազմակերպվող 2 այլ զորավարժությունների՝ KFOR (Կոսովոյի՝ ՆԱՏՕ-ի ղեկավարությամբ միջազգային ուժեր) և Saber Junction (Միաձուլված սուր) զորավարժություններին։ 
12:50 - 14 ապրիլի, 2023