ԿԳՄՍՆ

Կապի օպերատորների հետ համագործակցության արդյունքում ձևավորվել են կրթական մատչելի սակագներ՝ հատուկ հեռավար կրթության համար

ՀՀ ԿԳՄՍ նախարար Արայիկ Հարությունյանը ֆեյսբուքյան իր էջում գրում է․ «Ինտերնետ կապի մատչելի սակագին՝ աշակերտների և ուսուցիչների համար Ինչպես արդեն տեղեկացրել էի, կապի օպերատորների հետ համագործակցության արդյունքում ձևավորվել են կրթական մատչելի սակագներ՝ հատուկ հեռավար կրթության համար: Կրթական սակագների մանրամասները՝ ստորև, ինչպես նաև ընկերությունների պաշտոնական կայքերում: Յուքոմն առաջարկում է՝Հեռավար ուսուցման հավելվածները` zoom, viber, whatsupp, skype և կայքերը (www.emis.am, www.kahoot.am, etwinning.net; www.armedu.am) հասանելի են Յուքոմի կանխավճարային և հետվճարային բաժանորդներին առանց տարիֆիկացման, գումարած 2GB ինտերնետ ծավալ, անսահմանափակ զանգեր Յուքոմ ցանցի ներսում սկսած 1000 ՀՀ դրամ ամսավճարից՝ U1000 փաթեթի համար, ինտերնետի ծավալն ու այլ ցանցեր զանգերի հնարավորությունները առավել են u1500, u2000 և u3000 փաթեթների համար: Վիվասելի առաջարկը՝ Անսահմանափակ Zoom, Skype, Viber, WhatsApp, Messenger, Zangi, Telegram, 3 ԳԲ ինտերնետ, Անսահմանափակ զանգեր Վիվա-ՄՏՍ-ի ցանցում, 200 SMS դեպի ՀՀ ցանցեր, Հեռավար ուսուցման նպատակով առաջարկվող հետևյալ կայքէջերը.• www.emis.am• www.armedu.am• www.escs.am՝ առանց վճարիամսավճարի չափը՝ 1800 ՀՀ դրամ Բիլայնի առաջարկը՝ 1․ Ֆիքսված ինտերնետի համար՝ սկսած 2000 ՀՀ դրամ ամսավճարից, որը ներառում է նաև ֆիքսված ինտերնետ սարքավորումը (Wi-Fi router), մինչև 10 Մբիթ/վրկ արագությամբ, հասանելի է ՀՀ գրեթե ամբողջ տարածքում: Հեռավար ուսուցման կայքերը (www.emis.am, www.kahoot.am, etwinning.net; www.armedu.am) հասանելի են առանց տարիֆիկացման:2.Շարժական ինտերնետի համար՝ Կանխավճարային Սակագնային փաթեթ- Տրամադրվում է 50ԳԲ 30 օրով – 1500 դրամի դիմաց- 50ԳԲ սպառելուց հետո արագությունն իջնում է 1024 ՄբՀեռավար ուսուցման կայքերը (www.emis.am, www.kahoot.am, etwinning.net; www.armedu.am) հասանելի են առանց տարիֆիկացման:Առկա են նաև օպտիկական ինտերնետի և շարժական կանխավճարային սակագնային փաթեթներ՝ իրենց առաջարկներով»:

17:40 - 10 ապրիլի, 2020

Առանձնապես խոշոր չափերի առերևույթ հափշտակություն՝ dasaran.am-ի դրամաշնորհային ծրագրի իրականացման գործընթացում

ՀՀ պետական վերահսկողական ծառայությունից ՀՀ դատախազություն է ստացվել հասարակական կազմակերպությանը ՀՀ պետական բյուջեից 2017-2018թթ․ հատկացված միջոցների մշտադիտարկման արդյունքները և դրանց կից փաստաթղթերի պատճենները, որոնք ուսումնասիրության առարկա են դարձել պետական շահերի պաշտպանության հայց հարուցելու դատախազության գործառույթի շրջանակներում: Ուսումնասիրության լիարժեքությունն ապահովելու նպատակով անհրաժեշտ փաստաթղթեր են պահանջվել և ստացվել նաև ՀՀ պետական եկամուտների կոմիտեից: Արդյունքում պարզվել է, որ ՀՀ կրթության և գիտության նախարարության ու N հասարակական կազմակերպության միջև 2017թ փետրվարի 14-ին և 2018թ. փետրվարի 2-ին կնքված դրամաշնորհային պայմանագրերի հիման վրա «Աջակցություն «Դասարան» ուսումնատեղեկատվական ծրագրի» (dasaran.am) միջոցառման իրականացման նպատակով, որպես դրամաշնորհ, կազմակերպությանը հատկացվել է 180մլն ՀՀ դրամ։ Վերջինս ստանձնել է ֆինանսական միջոցները պայմանագրերով սահմանված նպատակներով ու չափաքանակներով օգտագործելու պարտականություն։ ՀՀ ՊԵԿ տեղեկատվական շտեմարանների և այլ աղբյուրների ուսումնասիրությամբ պարզվել է, որ դրամաշնորհային ծրագրի իրականացման շրջանակներում ՀԿ-ն 2017-2018թթ․մի առևտրային ընկերությունից ձեռք է բերել ծառայություններ: Վերջիններիս արժեքը համադրվել է նույն ժամանակաշրջանում ընկերության կողմից հաշվարկված աշխատավարձի և կատարված ձեռբերումների վերաբերյալ տվյալների հետ: Հաշվի է առնվել նաև այն հանգամանքը, որ ՀԿ-ի ունեցած ռեսուրսները բավարար են եղել իրականացնելու այն աշխատանքները, որոնք ներկայացվել են որպես ընկերությունից ձեռբերված ծառայություններ: Վերոնշյալի հիման վրա ՀՀ ՊՎԾ-ի կողմից արված մշտադիտարկմամբ հետևություններ են կատարվել այն մասին, որ նշված ՀԿ-ն առևտրային ընկերությունից ձեռք է բերել անապրանք փաստաթղթեր։ Ուսումնասիրությամբ տվյալներ են ստացվել նաև, որ միջոցառման իրականացման նպատակով ՀՀ պետական բյուջեով նախատեսվել են էականորեն ավելի շատ միջոցներ, քան պահանջում էին իրական կարիքները։ Մշտադիտարկման արդյունքներում արձանագրված ելակետային տվյալների հիման վրա ՀՀ ՊԵԿ-ի կողմից կատարված նախնական հաշվարկի համաձայն՝ անապրանք փաստաթղթեր դուրս գրելու կամ ստանալու դեպքում որպես տուգանք գանձման է ենթակա գործարքի փաստացի կատարումը հավաստող փաստաթղթերում նշված գումարից շեղումների չափով, որը տվյալ դեպքում կազմում է շուրջ 138.5մլն ՀՀ դրամ։ ՀԿ-ի կողմից անապրանք փաստաթղթեր ձեռք բերելու հանգամանքն առերևույթ վկայում է դրամաշնորհային պայմանագրերով սահմանված պահանջների խախտման, այն է՝ նախատեսված ֆինանսական աջակցության գումարները վերոնշյալ չափով պայմանագրով նախատեսված նպատակներով չօգտագործելու և կազմակերպության ծառայող(ներ)ի կողմից հնարավոր վատնելու մասին։ Նկատի ունենալով, որ ՀՀ ՊՎԾ-ի մշտադիտարկմամբ և ՀՀ գլխավոր դատախազությունում իրականացված ուսումնասիրությամբ ձեռք են բերվել ՀԿ-ի ծառայողների կողմից, պաշտոնեական դիրքն օգտագործելով, իրենց վստահված միջոցներից առանձնապես խոշոր չափերի վատնում կատարելու առերևութ հատկանիշների մասին վկայող փաստական տվյալներ, որոնց կապակցությամբ անհրաժեշտ է իրականացնել լրիվ, բազմակողմանի և օբյեկտիվ քննություն՝ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով: Քրեական գործի նախաքննությունը հանձնարարվել է ՀՀ քննչական կոմիտեին:

13:29 - 10 ապրիլի, 2020

ԿԳՄՍ նախարարությունն առցանց հարթակներ է ստեղծել սփյուռքահայերի համար

Կորոնավիրուսի տարածումը կանխարգելելու նպատակով տարբեր երկրներում հայտարարված արտակարգ դրության պայմաններում առաջացած իրավիճակում մեր սփյուռքահայ հայրենակիցների կրթական գործընթացի շարունակականությունը հնարավորինս ապահովելու նպատակով ԿԳՄՍ նախարարության յութուբի (https://www.youtube.com/user/armeduchannel) ալիքում տեղադրվել են հայագիտական առարկաների տեսադասեր՝ «Հայոց լեզու», «Հայ գրականություն» և «Հայոց պատմություն» առարկաներից` https://bit.ly/34m1Wtm։ «Բացի այդ, ԿԳՄՍՆ-ի գործարկած հեռավար կրթության ռեսուրսների համալիր էջում (heravar.armedu.am) ևս առկա են առցանց ռեսուրսներ և գործիքներ, մասնավորապես, Tumanyan.Online առցանց դպրոցը՝ https://armenian-language.org/, որի միջոցով մեր սփյուռքահայ հայրենակիցների երեխաները կարող են սովորել հայոց լեզու, այդ թվում՝ օտար լեզվով։ Վերոնշյալ էջում տեղադրված է նաև ՀԲԸՄ հայկական վիրտուալ համալսարանի (ՀՎՀ) գործարկած առցանց կրթության հարթակը, որտեղ տեղադրված է հայկական մշակութային ժառանգության վերաբերյալ տեղեկատվություն՝ լեզու, պատմություն, կրոն, ճարտարապետություն, խոհանոց, շախմատ: Ինտերակտիվ բովանդակության հիմքում ՀՎՀ-ի մուլտիմեդիա էլեկտրոնային գրքերն են, առցանց դասընթացները և վիրտուալ այցելությունները, որոնք ներկայացված են յոթ լեզուներով՝ արևելահայերեն և արևմտահայերեն, անգլերեն, ֆրանսերեն, ռուսերեն, իսպաներեն և թուրքերեն: Կրթական հարթակը նաև լավ հնարավորություն է ամենօրյա ինտերակտիվ հանդիպումների և առցանց հաղորդակցության համար: Կրթական ինքնուսույց նյութերից բացի ՀՎՀ-ի կրթահարթակում կազմակերպվում են նաև վիրտուալ այցելություններ դեպի պատմական և մշակութային վայրեր Հայաստանում և սփյուռքում: ՀՎՀ-ի ինտերակտիվ առցանց կրթական հարթակը հասանելի է անվճար www.avc-agbu.org կայքում, ինչպես նաև ՀՎՀ-ի սոցիալական ցանցերում: Բազմաթիվ հայագիտական նյութեր հասանելի են նաև Հայկական կրթական միջավայրի «Պաշարների շտեմարանում»»,- ասված է ՀՀ ԿԳՄՍ նախարարության տարածած հաղորդագրության մեջ։

11:12 - 10 ապրիլի, 2020

Պատգամավորը հեռավար կրթության մեջ ներառական կրթության իրականացման խոչընդոտ է տեսնում |armenpress.am|

armenpress.am: Ազգային ժողովի «Իմ քայլը» խմբակցության պատգամավոր Սոֆիա Հովսեփյանը հեռավար կրթության հարցում ներառական կրթություն ստանալու խոչընդոտ է տեսնում։ Սյս մասին Հովսեփյանն ասաց ապրիլի 9–ին ՀՀ Ազգային ժողովի գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի կազմակերպած «Հեռավար կրթության մարտահրավերներն ու հնարավորությունները արտակարգ իրավիճակի պայմաններում» թեմայով հեռավար քննարկման ընթացքում։ «Հեռավար կրության մեջ մենք ունենք մեկ բաց, դա ներառական կրթության առումով է։ Ուսուցիչները դժվարություն ունեն ներառված երեխաների և ներառական դասի ապահովման առումով։ Ներառված աշակերտներից շատերն ունեն սարքավորումներին միանալու, խոսքի դժվարություն։ Այս առումով դուրս են մնում կրթական գործընթացից»,– ասաց Հովսեփյանը։ Պատգամավորը նշեց, որ այսօր ներառական կրթություն ստացող աշակերտների 90%–ը չեն օգտվում հեռավար կրթության համակարգից։

17:43 - 09 ապրիլի, 2020

Տեսակոնֆերանս գիտական կազմակերպությունների հետ

ՀՀ ԿԳՄՍ նախարար Արայիկ Հարությունյանի նախաձեռնությամբ և Գիտության կոմիտեի նախագահ Սարգիս Հայոցյանի մասնակցությամբ տեղի է ունեցել տեսակոնֆերանս Հայաստանի գիտական կազմակերպությունների տնօրենների հետ: Հանդիպմանը քննարկվել են արտակարգ իրավիճակի պայմաններում ստեղծված խնդիրների հաղթահարման աջակցության վերաբերյալ վերջիններիս առաջարկները: Տեսակոնֆերանսին մասնակցել են ՀՀ ԳԱԱ մոլեկուլային կենսաբանության ինստիտուտի, «Հայկենսատեխնոլոգիա» գիտա-արտադրական կենտրոնի, Հնագիտության և ազգագրության ինստիտուտի, Ինֆորմատիկայի և ավտոմատացման պրոբլեմների ինստիտուտի, ֆիզիկական հետազոտությունների ինստիտուտի, ֆիզիկայի կիրառական պրոբլեմների ինստիտուտի, Ռադիոֆիզիկայի և էլեկտրոնիկայի ինստիտուտի, Օրգանական և դեղագործական քիմիայի գիտա-տեխնոլոգիական կենտրոնի, ինչպես նաև Ա. Ալիխանյանի անվան ազգային գիտական լաբորատորիայի տնօրենները: Մի քանի ինստիտուտներ առաջարկել են տարածքների և իրերի ախտահանության համակարգերի մշակում և արտադրություն, ինչպիսիք են օզոնատորները և ՈւՄ խցիկները: Պայմանավորվածություն է ձեռք բերվել այդ սարքերի համատեղ ուսումնասիրման և դրանց արդյունավետության բացահայտման ուղղությամբ: Մեկ այլ առաջարկի համաձայն՝ գամմա ճառագայթման միջոցով հնարավոր է ստեղծել ախտահանման շարժական համակարգ, որի արդյունավետությունը վիրուսային մասնիկների վրա ևս պետք է ուսումնասիրել:Ներկայացվել են առաջարկություններ ինքնամեկուսացմանն ռեժիմին առնչվող հասարակագիտական հետազոտությունների իրականացման վերաբերյալ ինչպես իրադրության սոցիալ-հոգեբանական, այնպես էլ հեռավար կրթության և կառավարման մոդելների մասով: Առաջարկների մյուս խումբը վերաբերել է համավարակի տարածման մոդելավորման խնդիրներին, որոնց լուծման համար առաջարվել է կիրառել հասանելի հաշվողական հնարավորությունները և տեխնոլոգիաները: Հնչել են նաև առաջարկներ իմունախթանիչներ հանդիսացող պրոբիոտիկներով հարուստ սննդանյութերի, ինչպես նաև բնական ծագման այլ կենսաակտիվ նյութերի արտադրության և դրանց կիրառման վերաբերյալ: Առաջարկների մյուս բաժինը վերաբերել է ախտածին հարուցիչների ուսումնասիրության ենթակառուցվածքների ստեղծմանը, որոնք հնարավորություն կընձեռեն ՀՀ տարածքում ունենալ ախտածինների ուսումնասիրությամբ զբաղվող հետազոտողների խմբեր, որոնց մասնագիտական կարողությունները կկիրառվեն ինչպես նոր դեղամիջոցների և հակահամաճարակային միջոցների մշակման, այնպես էլ առավել առաջադեմ հետազոտական աշխատանքներ իրականացնելու նպատակով:Նշվել է նաև միջազգային ստանդարտներին համապատասխանող ԴՆԹ/ՌՆԹ թեստերի մշակման և սինթեզի ենթակառուցվածքներ ունենալու անհրաժեշտությունը, որը ներկայացնում է ոչ միայն գիտական, այլ նաև կիրառական հետաքրքրություն: Հանդիպման վերջում մասնակիցները համաձայնության են եկել համագործակցել բարձրացված խնդիրների լուծման ուղղությամբ, ինչպես նաև առաջարկել են ստեղծել արտակարգ իրավիճակներում գիտական ինստիտուտների ներուժի համախմբումն ապահովող հարթակ և համապատասխան ընթացակարգեր, որոնց միջոցով հնարավոր կլինի ավելի համակարգված և էֆեկտիվ կիրառել հանրապետության գիտական ներուժը՝ ճգնաժամային կառավարման մարմինների աշխատանքներում ներգրավելով համապատասխան ոլորտների գիտնականների:

15:12 - 09 ապրիլի, 2020

Հայկական դուդուկը ՅՈՒՆԵՍԿՕ-ի ցանկում գրանցվել է 2008 թվականին․ ԿԳՄՍՆ

ՀՀ կրթության, գիտության, մշակույթի և սպորտի նախարարությունը հայտնում է, որ Հայկական դուդուկի երաժշտությունը դեռ 2005 թ. ՅՈՒՆԵՍԿՕ-ն հռչակել է Մարդկության բանավոր և ոչ նյութական մշակութային ժառանգության գլուխգործոցներից մեկը, և 2008 թ. «Դուդուկն ու իր երաժշտությունը» վերնագրով հայկական ոչ նյութական մշակութային ժառանգության տարրն ընդգրկվել է ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում։ «Դուդուկ հայկական նվագարանը և դրա երաժշտությունը հայկական ժողովրդական երաժշտական մշակույթի բնութագրական դրսևորումներից է, այն տարածված ու կենսունակ է ոչ միայն նվագարանային կատարողական արվեստում, այլև հասարակության մեջ՝ ընտանիքներում, համայնքներում, մշակութային, կրթական տարբեր կազմակերպություններում։ Վերջին տարիներին բազում ծրագրեր են իրականացվում դուդուկի պահպանության, փոխանցման և հանրահռչակման ուղղությամբ, կազմակերպվում են տեղական և միջազգային փառատոներ, ֆլեշմոբեր և այլ միջոցառումներ։ Դրա վկայություններից է Ֆրանսիայի Գրենոբլ քաղաքում մեկնարկած «Արի պարի քոչարի» ֆլեշմոբը, որն այս տարի նվիրվում է Դուդուկ (ծիրանափող) հայկական նվագարանին։ Նպատակը՝ բացահայտել տաղանդավոր դուդուկահարներին և հայկական դուդուկի նվագը ճանաչելի դարձնել համայն աշխարհին։ ՅՈՒՆԵՍԿՕ-ի մարդկության ոչ նյութական մշակութային ժառանգության ցանկում 2021 թ. գրանցելու նպատակով ՅՈՒՆԵՍԿՕ-ի 2003 թ. «Ոչ նյութական մշակութային ժառանգության պաշտպանության մասին» կոնվենցիայի անդամ երկու պետություններ՝ Ադրբեջանը և Թուքիան, համատեղ հայտ են ներկայացրել «Բալաբանի կատարողական արվեստը և արհեստագործությունը» վերնագրով։ Բալաբան անվանմամբ երաժշտական նվագարանի մասին հայտը դեռևս 2012 թվականից էր Ադրբեջանը ներկայացել ՅՈՒՆԵՍԿՕ գրանցմանը, և գործընթացը կասեցվել էր ու գտնվում էր սպասողական հայտերի ցանկում։ Այն ՅՈՒՆԵՍԿՕ-ի Ոչ նյութական մշակութային ժառանգության պահպանման միջկառավարական կոմիտեի քննարկմանը կներկայացվի միայն 2021 թ., եթե արժանանա կոնվենցիայի գնահատման մարմնի անկախ փորձագետների դրական գնահատականին։ Նշենք նաև, որ, ըստ կոնվենցիայի, այս կամ այն երկրի՝ ոչ նյութական մշակութային ժառանգության ցանկերում որևէ տարրի վերաբերյալ հայտի գրանցումը չի ենթադրում տարրի հանդեպ սեփականության իրավունք։ Ցանկում տարրը գրանցելիս ճանաչվում են տվյալ երկրում (կամ բազմազգ հայտերի դեպքում՝ տվյալ երկրներում) համայնքների, խմբերի կամ անհատ կրողների՝ տվյալ տարրի մշակութային դրսևորումները, առանձնահատկությունները և կենսունակությունը»,- ասված է հաղորդագրության մեջ։

13:11 - 08 ապրիլի, 2020

Հեռավար կրթության հնարավորությունները և առաջացած խնդիրները. պատմում են աշակերտներն ու ուսուցիչները |armenpress.am|

armenpress.am: Հայաստանում արտակարգ դրություն հայտարարելուց ի վեր դասերը դասասենյակներից տեղափոխվեցին օնլայն տիրույթ: Եթե նախկինում սմարթֆոնները աշակերտներին խանգարում էին դասի վրա կենտրոնանալուց, ապա այսօր առանց դրանց պարզապես հնարավոր չէ: Ուսուցիչները ստեղծված իրավիճակում հեռավար դասերը համարում են փրկություն, այսպիսով թույլ չեն տալիս երեխաներին մոռանալ սովորածը, օգտվում են համացանցի ընձեռած այլ հնարավորություններից, սակայն միևնույն է նախընտրում են դասերի անցկացման «ավանդական տարբերակը»: Զրույցում աշակերտները կարծես թե ևս «ավանդական տարբերակի» կողմնակիցն էին: Արտաշատի համար 3 հիմնական դպրոցի պատմության ուսուցչուհի Հրանուշ Վարդանյանը ստեղծված պայմաններում կրթության այս տարերակը համարում է պարզապես փրկություն: Նա հիշում է՝ 1990-ականներին վառարնների մոտ դաս անցկացնելն երբեմն ավելի դժվար էր, դասերը երբեմն 15-20 րոպե էին տևում կամ ինչ-որ ժամանակով ընդհատվում: Պատմության ուսուցչուհին դասերն անցկացնում է հայտնի Zօօm-ով և Viber-ով, հարմարվում է աշակերտների հնարավորություններին: «Չի կարելի պարտադրել մեկ ծրագիր, որ աշակերտը ներգրավվի: Պետք է այնպես անել, որ աշակերտը ներգրավված լինի՝ ըստ իր հնարավորության: Սակայն երեխաները մեծ պատասխանատվությամբ ու սիրով են ներգրավվում»,-նկատեց Վարդանյանը: Դասապրոցեսին երբեմն խանգարում են միայն տեխնիկական խնդիրները: Ուսուցչուհին նկատեց՝ որոշ ընտանիքներում կապ հաստատելու համար մեկ տեխնիկա կա, իսկ տանը աշակերտները մի քանիսն են, այսպիսով նրանցից մեկն ու մեկը տուժում է: Վարդանյանն ըմբռնումով է մոտենում, լրացուցիչ հանձնարարականներ այս ընթացքում շատ չի տալիս, սակայն երբեմն օգտվում է համացանցի ընձեռած հնարավորություններից, աշակերտներին ուղարկում է դասերի թեմաների վերաբերյալ տարբեր տեսանյութեր, որոնք հնարավորություն են տալիս ուսուցչից բացի լսել օրինակ մեկ այլ դասախոսի: Օնլայն դասերին «գլուխ պահող» աշակերտներ ևս լինում են, սակայն ուսուցչուհին նկատեց՝ այնպես, ինչպես սովորական դասերի ժամանակ է պատահում: Տեխնիկական խնդիրներից զատ, Վարդանյանը հեռավար կրթության տարբերակում գտել է նաև դրական կողմեր. «Հիմա ծնողներն էլ աշակերտների կողքին են, նրանք ավելի զգոն են: Ծնողներն ավելի շատ ուշադրություն են դարձնում»։ Աշակերտ-ուսուցիչ անմիջական շփումը, սակայն, ոչնչով չի փոխարինվի: Նույն դպրոցի 6-րդ դասարանի աշակերտ Հայկ Սայադյանին տնից դաս անելն այնքան էլ դուր չի գալիս, բայց միևնույն ժամանակ հասկանում է՝ անհրաժեշտ է: «Օրինակ իմ հեռախոսի հետ խնդիր է առաջանում, երբեմն ձայները չեմ լսում»,-ասում է նա: Սակայն Հայկն այս ամենում դրական կողմ ևս գտել է. «Տնայիններս անում եմ, երբ ուզում եմ»,-կատակում է: Առարկաների մի հատվածի առաջադրանքները Հայկը ստանում է Viber-ով, անում դրանք, նկարում և ուղարկում ուսուցչին: Ոգևորությամբ է նշում. «Դասատուն ասում է՝ եթե չեք հասկանում, զանգեք, կպատասխանեմ: Մենք էլ զանգում ենք»: Շարունակությունը՝ armenpress.am-ում

09:49 - 08 ապրիլի, 2020

56 նոր պլանշետ է տրամադրվել Լոռու մարզին հեռավար դասապրոցեսն անխափան իրականացնելու նպատակով

Կրթության, մշակույթի և սպորտի նախարարության կողմից Լոռու մարզպետարանին հատկացվել է 56 նոր պլանշետ, որոնք կտրամադրվեն մարզի թվով 24 համայնքների դպրոցների: Այս մաին գրել է Լոռու մարզպետարանի լրատվական ծառայությունը: Վերջիններիս կողմից ժամանակավոր օգտագործման նպատակով դրանք կտրվեն հեռավար դասապրոցեսին մասնակցելու համար տեխնիկական միջոցներ չունեցող, 4 և ավելի դպրոցահասակ երեխաներ ունեցող ընտանիքներին: Օգտագործման անհրաժեշտության ավարտից հետո պլանշետները կվերադարձվեն դպրոցներին՝ հետագա տնօրինման նպատակով:

23:03 - 07 ապրիլի, 2020

56 համակարգչային տեխնիկա է հատկացվել Արմավիրի սոցիալապես խոցելի խմբերում գտնվող ընտանիքների երեխաներին

ՀՀ կրթության, մշակույթի և սպորտի նախարարության կողմից հավաքագրված համակարգչային տեխնիկայից 56-ը հատկացվել է Արմավիրի մարզպետարանին: Այս մասին տեղեկացնում է մարզպետարանի լրատվկական ծառայությունը: ԿԳՄՍ նախարարության համակարգմամբ` ստացված տեխնիկան ժամանակավոր շահագործման կտրամադրվի բազմազավակ և սոցիալապես խոցելի խմբերում գտնվող ընտանիքներին, մասնավորապես. -Քաղաքային համայնքների 5 և ավել երեխա ունեցող ընտանիքներին-Գյուղական համայնքների 4 և ավել երեխա ունեցող ընտանիքներին-Երկկողմանի ծնողազուրկ երեխաներին Ստեղծված իրավիճակում հեռավար դասընթացները նախաձեռնելու և դրանց ընդգրկվածությունն ու արդյունավետությունը բարձրացնելուն ուղղված գործուն քայլերի համար մարզպետարանը շնորհակալություն է հայտնում ԿԳՄՍ նախարարությանը և բոլոր այն անձանց, ովքեր արձագանքել են մարդասիրական այս ձեռնարկի իրագործմանը:

22:26 - 07 ապրիլի, 2020

Հավաքագրված համակարգչային տեխնիկայից 38-ը տրամադրվել է Արարատի մարզին

Արարատի մարզպետ Գարիկ Սարգսյանը ֆեյսբուքյան իր էջում գրում է․ «ՀՀ կրթության, գիտության, մշակույթի և սպորտի նախարարության կողմից հավաքագրված համակարգչային տեխնիկայից 38-ը տրամադրվել է Արարատի մարզպետարանին։ Նվիրաբերված սարքերը փոխանցվել են թվով 16 դպրոցների 3 և ավելի երեխաներ ունեցող սոցիալապես ծանր վիճակում գտնվող ընտանիքներին՝ հեռավար կրթության հասանելիությունն ընդլայնելու և արդյունավետությունը բարձրացնելու նպատակով»:

16:29 - 07 ապրիլի, 2020

Աշխատում ենք, որ նախարարության պատրաստած բոլոր նախագծերն ունենան նաև հստակ կրթական բաղադրիչ․ ԿԳՄՍ նախարարի տեղակալ Արայիկ Խզմալյան

Այսօր հրավիրված մամուլի ասուլիսի ժամանակ ԿԳՄՍ նախարարի տեղակալ Արայիկ Խզմալյանն ասաց, որ նախարարությունը սկսել է Սկսել ենք «Առականի» շարքը՝ Համազգային թատրոնի արտիստների մասնակցությամբ, արդեն առաջին հաղորդումը թողարկվել է։ «Աշխատում ենք, որ նախարարության պատրաստած բոլոր նախագծերն ունենան նաև հստակ կրթական ուղերձներ և կրթական բաղադրիչ։ Արտիստների կողմից այս առակների ընթերցումից հետո փոքրիկ քննարկում է կազմակերպվում հենց հաղորդման շրջանակներում, այնուհետև արտիստները կոչ են անում այս քննարկումը տեղափոխել տուն, ընտանիք։ Կա մի ակցիա, երբ առակի լավագույն մեկնաբանությունը ուղարկում են թատրոնի ֆեյսբուքյան էջին, և անակնկալներ են սպասվում լավագույն մեկնաբանությունն ուղարկողին»,-նշեց նա։ Արայիկ Խզմալյանը հայտնեց, որ նկարահանվել է և շուտով կմեկնարկի «Քո սերնդակիցը» նախագիծը, որը ցուցադրելու է երաժշտական ոլորտում տաղանդավոր պատանիների ձեռքբերումները, նվաճումները։ «Հայաստանի ազգային կինոկենտրոնի և Հայաստանի կինոմատոգրաֆիստների միության հետ համատեղ webtv.am կայքում մենք տեղադրել ենք արդեն 14 մուլտեր, անիմացիոն ֆիլմեր»,- ասաց նա։

14:19 - 07 ապրիլի, 2020

Ճգնաժամային իրավիճակում ոչ միայն հանրային հետաքրքրությունը մշակույթի հանդեպ չի նվազել, այլև որոշ դեպքերում նկատվում է այդ հետաքրքրության շեշտակի աճ․ ԿԳՄՍ նախարարի տեղակալ

Այսօր հրավիրված մամուլի ասուլիսի ժամանակ ԿԳՄՍ նախարարի տեղակալ Արայիկ Խզմալյանը նշեց, որ, ըստ իրենց ուսումնասիրությունների, այս ճգնաժամային իրավիճակում ոչ միայն հանրային հետաքրքրությունը մշակույթի հանդեպ չի նվազել, այլև որոշ դեպքերում նկատվում է այդ հետաքրքրության շեշտակի աճ։ «Մեր պետական կառույցների ֆեյսբուքյան էջերի, կայքերի հետևորդների քանակը բազմապատկվում է, խնդիր ունենք անել այնպես, որ ճգնաժամի հաղթահարումից հետո այս տվյալները չնվազեն, և մենք ձևավորենք կայուն հետևորդների ինստիտուտը։ Այս շաբաթվանից մենք կսկսենք մեր պետական կառույցների PR մարքեթինգի պատասխանատուների հատվածի հետ համապատասխան վեբինարներ կազմակերպել, որ մշակենք այս տվյալները պահպանելու և զարգացնելու ձևաչափերը»,- նշեց նա։ Արայիկ Խզմալյանի խոսքով՝ Սպենդիարյանի անվան օպերայի և բալետի ազգային ակադեմիական թատրոնը մարտի 17-ից մինչև ապրիլի 5-ն իր ֆեյսբուքյան էջում հեռարձակել է 6 ներկայացում։ Նշված ժամանակահատվածում ցուցադրված նյութերի ընդհանուր դիտումների քանակն արդեն անցնում է 840 հազարը։ Թատրոնի ֆեյսբուքյան պաշտոնական էջի հետևորդների թիվը նշված ժամանակահատվածում ավելացել է 5000-ով։ «Սունդուկյանի անվան թատրոնում մեկնարկել է «Առցանց խաղացանկ» նախագիծը։ Երեկ ցուցադրվել է առաջին ներկայացումը, որ ունեցել է շուրջ 40 հազար դիտում։ Առցանց ցուցադրությունները շարունակվում են գրեթե բոլոր թատերահամերգային կազմակերպությունների սոցիալական ցանցերով և կայքէջերով։ Հայաստանի ազգային ֆիլհարմոնիկ նվագախմբի երաժիշտներն անհատական կամ խմբակային մակարդակներում տեսագրում են համերգային կատարումներ, հեռարձակում են դրանք, ինչպես նաև կոչ են անում մնալ տանը և հետևել պարետատան ցուցումներին»,- նշեց նա։ Արայիկ Խզմալյանն ասաց, որ մեծ հետաքրքրություն է առաջացրել Արամ Խաչատրյանի Երկրորդ սիմֆոնիայի հեռարձակումը։ Նրա խոսքով՝ սիմֆոնիան ձայնագրվել էր 2019 թ․ և երբևէ չէր հեռարձակվել, առաջին անգամ հեռարձակվեց այս պայմաններում։ « «Արմմոնո» մենաներկայացումների թատերական միջազգային փառատոնը ևս ընտրել է առցանց ձևաչատը։ Ստեղծվել է «Armmono Talking» խորագրով նախագիծ՝ զրույցներ ոլորտի տարբեր մասնագետների հետ։ Սա նաև կրթական ծրագիր է»,- նշեց նա։

13:51 - 07 ապրիլի, 2020

Ունենք հեռավար կրթության գործընթացում ավելի քան 80 տոկոսի մասնակցություն․ ԿԳՄՍ նախարարի տեղակալ Ժաննա Անդրեասյան

Այսօր հրավիրված մամուլի ասուլիսի ժամանակ ԿԳՄՍ նախարարի տեղակալ Ժաննա Անդրեասյանն ասաց, որ նախարարությունը մի շարք ուղղություններով քայլեր է ձեռնարկել կրթության շարունակականությության ապահովման համար։ Քայլերը հիմնականում ուղղված են եղել հեռավար ուսուցման հասանելիության բարձրացմանը, անհրաժեշտ բովանդակության պատրաստմանը և ուսուցիչներին աջակցությանը, ինչպես նաև մեթոդական կարգավորմանը։ «Շարունակել ենք մեր համագործակցությունը Հանրային հեռուստաընկերության հետ, որի շրջանակներում ամեն օր՝ առավոտյան 08։30-ից, եթերում են հանրային դասերը։ Այստեղ աշխատում ենք ներառել նաև մասնագիտական կողմնորոշման, ֆինանսական գործիքների օգտագործման և այլ թեմաներ, որոնք ոչ միայն ուսումնական նյութ են, այլ նաև պոտենցիալ կրթական բովանդակություն են ավելի լայն խմբերի համար։ Արձագանքները ցույց են տալիս, որ մենք ունենք շատ ավելի լայն լսարան, և այդ լսարանը այդ կրթական բովանդակությունը բավականին համարժեք է գնահատում։ Հանրային դասերը շարունակվում են նաև 11։30-ից 12։40։ Այս անգամ առանցքում բնագիտական առարկաներն ու մաթեմատիկան են՝ ավագ դասարանների համար»,- նշեց նա։ Ժաննա Անդրեասյանն ասաց, որ նախարարությունը պատրաստում է թեմատիկ պլաններին համապատասխան տեսադասեր։ «Արդեն իսկ ունենք ավելի քան 95 տեսադաս, որոնք հասանելի են ինչպես մեր յութուբյան էջում, այնպես էլ մենք դա տեղադրում ենք նախարարության ֆեյսբուքյան էջում և տարածում ենք հեռահաղորդակցության ընկերությունների հետ մեր համագործակցության շրջանակներում նրանց տրամադրծ տարածքներում․ խոսքը և՛ Ucom-ի, և՛ Rostelecom-ի, և Beeline-ի մասին է, որոնց հետ ձեռք բերած համաձայնությունների արդյունքում բոլոր դասերը անվճար հասանելի են դառնում այդ ընկերությունների բջջային հավելվածներում և թվային հեռուստատեսություններում։ YouTube-ում դրանց դիտելն ու բեռնելն անվճար է»,- նշեց նա։ Ժաննա Անդրեասյանի խոսքով՝ կա համագործակցություն մարզային հեռուստաընկերությունների հետ, և տեսադասերը նաև հասանելի են մարզային հեռուստաընկերությունների եթերում։ Նա նշեց, որ սա հատկապես կարևոր է, քանի որ կան տեղեկություններ, թե աշակերտների և ուսուցիչների որոշ խմբեր չունեն հասանելիություն սարքերին և չեն կարողանում միանալ հեռավար ուսուցմանը։ «Այս տարվա մարտի 29-ից Խաչիկ Դաշտենցի անվան թիվ 114 ավագ դպրոցում ընդունում ենք համակարգչային սարքավորումներ, արդեն իսկ հավաքագրել ենք շուրջ 600 սարքավորում, որոնց զգալի մասն ամբողջությամբ նոր է։ Սրանք տրամադրել ենք մարզերին, տրամադրել ենք նաև քարտեր։ Ունեցել ենք նվիրաբերություններ ինչպես կազմակերպությունների, այնպես էլ ֆիզիկական անձանց կողմից»,- ասաց նա։ Ժաննա Անդեասյանը նշեց, որ նախարարությունն այս ընթացքում մի շարք ուղեցույցներ է մշակել ծնողների, աշակերտների, ուսուցիչների համար։ Գործարկվել է էլեկտրոնային մատյան, որը հնարավորություն է տալիս արձանագրել, թե ինչպես են իրականացվում հեռավար դասերն առանձին դպրոցներում, ինչպիսի աշխատանք են կատարում ուսուցիչները։ Մատյանը գործարկվել է մարտի 26-ին, և այս պահին ուսուցիչների 80 տոկոսն այնտեղ գրանցված է։ «Մարզերից ստացված տեղեկությունների համաձայն՝ մենք ունենք հեռավար կրթության գործընթացում ավելի քան 80 տոկոսի մասնակցություն․ խոսքն աշակերտական համակազմի մասին է։ Կրթական տեխնոլոգիաների ազգային կենտրոնի միջոցով վերապատրաստման արագացված դասընթանցեր ենք կազմակերպել ուսուցիչների համար։ Դասընթացներն իրականացրել ենք թե՛ Հայաստանի, թե՛ Արցախի Հանրապետության ուսուցիչների համար»,- ասաց նա։

12:59 - 07 ապրիլի, 2020

ԿԳՄՍ նախարարի տեղակալներ Արայիկ Խզմալյանի և Ժաննա Անդրեասյանի մամուլի ասուլիսը․ Ուղիղ

12:02 - 07 ապրիլի, 2020

Բարձր առաջադիմություն ունեցող ոչ մի ուսանող վարձի պատճառով դուրս չի մնալու բուհից. վարչապետ |armenpress.am|

armenpress.am: ՀՀ վարչապետ Նիկոլ Փաշինյանը «Ֆեյսբուք» սոցիալական ցանցի իր էջում քաղաքացիներից մեկի հարցին ի պատասխան անդրադարձել է ուսման վարձավճարների խնդիրներին: Քաղաքացին հարցնում էր, թե ինչպես ուսանողները վճարեն վարձը, որոնց ծնողներն այս օրերին զրկվել են գումար վաստակելու հնարավորությունից: Միգուցե հնարավոր լինի որոշակի առումով փոխհատուցե՞լ այդպիսի ուսանողների ուսման վարձը: Հարցին ի պատասխան Նիկոլ Փաշինյանը հիշեցրել է Կրթության, գիտության, մշակույթի և սպորտի նախարար Արայիկ Հարությունյանի վերջերս արած հայտարարությունը: Նախարարն առաջարկել է, որ բուհերը մինչև արտակարգ դրության ավարտը և դրանից հետո ևս երկու շաբաթ ոչ մի ուսանողից վարձ չպահանջեն, որից հետո յուրաքանչյուր ուսանողի հետ կկազմվի ուսման վարձ վճարելու անհատական գրաֆիկ: Միևնույն ժամանակ, նախարարը կոչ է արել ուսանողներին, ովքեր գումարի վճարման խնդիր չունեն, վճարեն, որ դասախոսներն աշխատավարձ ստանան: «Բարձր առաջադիմություն ունեցող ոչ մի ուսանող վարձի պատճառով դուրս չի մնալու բուհերից: Սիրելի ուսանողներ լավ սովորեք, լավ ցուցանիշներ ունեցեք, և մենք կապահովենք, որ վարձի պատճառով որևէ մեկը դուրս չմնա բուհից: Սա է իմ խորհուրդը և խնդրանքը»,-նշեց վարչապետը:

20:22 - 06 ապրիլի, 2020

Արտակարգ դրությունից հետո ուսանողների համար կկազմվի գրաֆիկ վարձավճարների պարտքերը մարելու համար․ Արայիկ Հարությունյան

ՀՀ ԿԳՄՍ նախարար Արայիկ Հարությունյանը ֆեյսբուքյան իր էջում գրառում է կատարել՝ կապված ուսանողների վարձավճարների հետ․ «Կրկին դիմում եմ ուսանողներին: Գիտեմ, որ այս օրերին ուսանողների մի մասը վարձավճարների խնդիրներ ունեն, և արդեն տեղեկացրել եմ, որ դիմել եմ ռեկտորներին արտակարգ դրության ժամանակահատվածում վարձավճարները չգանձելու բոլոր նրանցից, ովքեր ունեն ֆինանսական խնդիրներ: Իսկ Արտակարգ դրությունից հետո ուսանողների համար կկազմվի գրաֆիկ վարձավճարների պարտքերը մարելու համար: Բայց, կուզեմ դիմել բոլոր այն ուսանողներին, ովքեր այս պահին կարող են վարձավճարները մուծել: Շատ կարևոր է, որ դուք չհետաձգեք վճարումը և անեք դա հիմա, որպեսզի բուհերը չունենան ֆինանսական խնդիրներ: Չէ՞ որ դասախոսները հիմա էլ կատարում են իրենց պարտքը և դասավանդում են: Շնորհակալություն ռեկտորներին համագործակցության համար, ինչպես նաև ուսանողներին՝ կոչիս արձագանքելու և վճարումները չհետաձգելու համար»:

20:17 - 06 ապրիլի, 2020