Սուրեն Պապիկյան

Սոււրեն Պապիկյանը ՀՀ պաշտպանության նախարարն է, «Քաղաքացիական պայմանագիր» կուսակցության վարչության նախագահը։

Ծնվել է 1986 թվականի ապրիլի 26-ին։ 2003 թվականին ավարտել է Ստեփանավանի թիվ 1 վարժարանը և ընդունվել ԵՊՀ պատմության ֆակուլտետ: Ուսումնառության ընթացքում զորակոչվել է ՀՀ Զինված Ուժեր: 2010-2012 թվականներին սովորել է ԵՊՀ պատմության ֆակուլտետի մագիստրատուրայում: Մագիստրատուրան ավարտել է գերազանց առաջադիմությամբ: 2009-2012 թվականներին գլխավորել է ԵՊՀ պատմության ֆակուլտետի Ուսանողական գիտական ընկերությունը: Գերազանց առաջադիմության համար արժանացել է ֆակուլտետի «Թաթուլ Կրպեյան» անվանական կրթաթոշակի: Ուսմանը զուգահեռ՝ 2010-2016 թվականներին, որպես պատմության ուսուցիչ՝ աշխատել է Երևանի թիվ 54 ավագ դպրոցում, 2011 թվականից՝ «Քվանտ» վարժարանում: 2012-2016 թվականներին սովորել է Սանկտ Պետերբուրգի պետական համալսարանի ասպիրանտուրայում:

«Քաղաքացիական պայմանագիր» կուսակցության հիմնադիր անդամ է:

2016թ. հոկտեմբերի 30-ին ընտրվել է «Քաղաքացիական պայմանագիր» կուսակցության վարչության անդամ: 2017թ. ապրիլի 2-ի խորհրդարանական ընտրություններում «ԵԼՔ» դաշինքի կողմից ռեյտինգային ընտրակարգով առաջադրվել է պատգամավորի թեկնածու Լոռու մարզն ընդգրկող թիվ 9 ընտրատարածքում։

2018թ. մարտի 31-ին մեկնարկած «Իմ քայլը» շարժման նախաձեռնող անդամ է։

2018թ. մայիսի 11-ին ՀՀ վարչապետ Նիկոլ Փաշինյանի առաջարկությամբ, ՀՀ նախագահ Արմեն Սարգսյանի հրամանագրով նշանակվել է ՀՀ տարածքային կառավարման և զարգացման նախարար:

2018թ. դեկտեմբերի 9-ի արտահերթ խորհրդարանական ընտրությունների քարոզարշավի ժամանակ ղեկավարել է «Իմ քայլը» դաշինքի նախընտրական շտաբը, ինչպես նաև ռեյտինգային ընտրակարգով առաջադրվել «Իմ քայլը» դաշինքի պատգամավորի թեկնածու Լոռու մարզն ընդգրկող թիվ 9 ընտրատարածքում և ընտրվել ԱԺ պատգամավոր։

2019թ. հունվարի 4-ին հրաժարվել է պատգամավորական մանդատից։

2019թ. հունվարի 18-ին վերանշանակվել է ՀՀ տարածքային կառավարման և ենթակառուցվածքների նախարարի պաշտոնում։

2021 թ. օգոստոսի 2-ին Հանրապետության նախագահի հրամանագրով նշանակվել է ՀՀ փոխվարչապետ։ 2021-ի նոյեմբերի 15-ին նշանակվել է ՀՀ պաշտպանության նախարար։

«Մի տարի է՝ իմ տունն ուզում եմ վաճառել, որ ես էլ բնակարան ձեռք բերեմ, չեմ կարողանում իմ ուզած գնով վաճառել»․ Փաշինյան

«Պաշտպանության նախարար Սուրեն Պապիկյանը Երեւանի կենտրոնում թանկարժեք բնակարան է ձեռք բերել՝ մոտ 2-3-սենյականոցի կրկնակիի չափ։ Այդ գործարքի գինն այսօր 412 հազար դոլար է, իսկ գործարքի ժամանակ՝ վեց ամիս առաջ, այն արժեցել է 168 հազար դոլար։ Կառուցապատող ընկերությունը հայտնի նախկին ՀՀԿ-ական Աշոտ Արսենյանի Ջերմուկ գրուպն է․ վերջինս եւ Պապիկյանն առանձնապես չեն պարզաբանել, թե ինչպես է հնարավոր եղել մոտ 100մլն դրամով էժան ձեռք բերել բնակարանը։ Դուք ԱԺ-ում կառավարություն հարցուպատասխանի ժամանակ պաշտոնյաներին առաջարկեցիք գնալ ճշմարտության հետեւից, ընդհուպ դատի տալ․ այսօր ոչ Պապիկյանն է դատի տվել մեզ [Հետք-ին], ոչ առավել եւս Աշոտ Արսենյանի Ջերմուկ գրուպ ընկերությունը, իսկ իրավապահներին կարծես թե առանձնապես չի հետաքրքրում այս թեման․ ըստ Ձեզ՝ ի՞նչ հետեւություն անի այս ամենից հանրությունը»,- հարցրեց Նիկոլ Փաշինյանին «Հետք»-ի լրագրողը, ինչին ի պատասխան Փաշինյանը ասաց․ «Եթե դուք ճիշտ եք, ես Ձեզ առաջարկ ունեմ․ ասում եք՝ 412 հազար դոլար արժե, ես Ձեզ առաջարկում եմ, որ գնաք բանկի հետ բանակցեք, 300 հազար դոլարով գնեք էդ տունը, եւ 400 հազար դոլարով վաճառեք, ինչպես Դուք պնդում եք, եւ երբ 400 հազար դոլարով վաճառեք, մենք բոլորս կիմանանք, որ դուք ճիշտ եք, ընդ որում՝ դրա արդյունքում 100 հազար դոլար մաքուր շահույթ կունենաք։ Այսինքն, եթե էս գործարքը բանկին առաջարկեք, բանկը պիտի երջանիկ լինի, որովհետեւ ինքն էլ իր շահույթի մասն ունի։ Ես բոլոր էդ դեպքերում ՀԿ-ներին, լրագրողներին առաջարկում եմ գնալ այս ճանապարհով։ Ես ներողություն եմ խնդրում պարոն Պապիկյանից իր անձնական գործերին միջամտելու համար, բայց ես կպնդեմ, որ ինքը 300 հազար դոլարով էդ տունը վաճառի Ձեզ, եւ հետո կհետեւենք՝ Դուք 400 հազարով վաճառեցիք, թե չէ։ Ես մի տարի է իմ տունն ուզում եմ վաճառել, որ հնարավոր է՝ ես էլ բնակարան ձեռք բերեմ, չեմ կարողանում իմ ուզած գնով վաճառել։ Եւ Ձեր օրինակին հետեւելով՝ գուցե դա էլ անեմ։ Ներողություն խնդրելով՝ մի հարց տամ ներկաներին, բայց մինչ այդ անդրադառնամ իմ զեկույցում հրապարակված թվերին․ 2018-ից մինչ էսօր 25 հազար մարդ, օգտվելով եկամտային հարկի վերադարձի ծրագրից, նորակառույց տանը 1, 2, 3, 4- սենյականոց բնակարան ա գնել․ ներկաների մեջ կա՞ն մարդիկ, որոնք 2018-ից ի վեր բնակարան են ձեռք բերել եւ օգտվում են եկամտային հարկի ծրագրից։ Կա՞ն, էդ ի՞նչ, կոռուպցիայով ե՞ք զբաղվում դուք։ 25 հազար մարդ ՀՀ-ում 35 միլիարդ դրամ մարդկանց տվել ենք, որպեսզի իրենք իրենց բնակարանային հարցերն ապահովեն։ Իրավապահ մարմիններին հրահանգելու կարիք չկա, բայց եթե Ձեզ դա պետք ա, ուղիղ հրանագում եմ՝ ստուգեք բոլոր տվյալները, բոլոր»,- ասաց Նիկոլ Փաշինյանը։ Լրագրողը հիշեցրեց, որ Աշոտ Արսենյանն է կառուցել այդ շենքը, որի որդին բանակում չծառայելու համար քրեական հետապնդման էր ենթարկվում, հետո քրեական հետապնդումը դադարեցվեց, հետո այդ նույն որդին ՔՊ կուսակցության աջակցությանբ եւ վարչապետի որոշմամբ նշանակվեց նախ Ջերմուկ համայնքի ղեկավարի ժամանակավոր պաշտոնակատար, ապա նա դարձավ Ջերմուկ համայնքի ղեկավար, եւ այս կոնտեքստում լրագրողն իրավապահներին առաջարկեց նկատի ունենալ նաեւ այս ամենը։ Վարչապետն արձագանքեց, որ եթե կարճվել է գործը, ուրեմն հիմքեր են եղել, հակառակ պարագան ինքը պարզապես բացառում է։

14:09 - 14 մարտի, 2023