Եթե խաղաղության պայմանագիրը ստորագրվի այն բովանդակությամբ, որ ես նկարագրեցի, Արցախը կվերածվի Ջավախքի, մի քանի տարի հետո՝ Նախիջեւանի. Օսկանյան
Հիմնավոր փաստ կա, որ Հայաստանի իշխանությունները այս պահին բանավոր, ինչ-որ տեղ նաեւ փաստաթղթային, որի վկայությունն է Պրահայի եռակողմ հայտարարությունը, որ համաձայնություն են տվել, որ Արցախը լինի, մնա Ադրբեջանի կազմում: Այս մասին այսօր՝ փետրվարի 24-ին, «Արցախի Հանրապետության միջազգային ճանաչման հրամայականը» խորագրով գիտագործնական համաժողովում նշեց Հայաստանի ԱԳ նախկին նախարար Վարդան Օսկանյանը:
Նրա խոսքով այդ միտքն արտահայտվում է նաեւ «մեր իշխանությունների, հակառակորդների հայտարարություններով, նույնիսկ միջնորդների որոշ ասածներով, շրջանառվող փաստաթղթերով»։
«Սա շատ վտանգավոր հանգամանք է: Դա իր միջազգային ճանաչումն է ստանալու, երբ ստորագրվի այսպես կոչված, խաղաղության համաձայնագիրը: Այն, ինչ կտարվում է այսօր դիվանագիտական հարթությունում, Հայաստանը՝ համագործակցությամբ Ադրբեջանի եւ միջնորդների, Ադրբեջանի տարածքային ամբողջականությունը ընդունելուն, ինչպես նաեւ Արցախը դրա կազմում ընդունելուն փորձում է տալ մի այնպիսի փաթեթավորում, որը կքողարկի հենց այս հանգամանքը: Այսօր այդ դիվանագիտական աշխատանքն է գնում: Եթե դա իրենց մոտ ստացվի, դա կներկայացնեն որպես ձեռքբերում: Այս փաթեթավորումը երկու դրսեւորում ունի. մեկը լեզվական, բովանդակային, մյուսը ոճային PR-ային դրսեւորումներն են: Այստեղ ՀՀ իշխանությանը շատ դժվար կլինի լղոզել, փաթեթավորել կամ քողարկել հենց Արցախը Ադրբեջանի կազմում թողնելու հանգամանքը: Պարզ է, որ Ադրբեջանը կպարտադրի, որ սեւը սպիտակի վրա այդ հարցը հստակ ձեւակերպվի խաղաղության պայմանագրում: Քողարկումը վերաբերելու է նրան, որ այնտեղ դրույթ է լինելու, որ իբր, հակառակ նրան, որ Հայաստանը ընդունում է, որ Արցախը պետք է Ադրբեջանի կազմում լինի, բայց երկխոսություն է լինելու Արցախի հայության եւ Բաքվի միջեւ, որը տպավորություն է ստեղծելու, թե Արցախի ժողովուրդը հնարավորություն ունի ինքնորոշվելու: Իբր այդ պատուհանը բաց է թողնվում»,-ասաց Օսկանյանը:
Օսկանյանը հայտարարեց․
«Եթե իրոք իմ գնահատականները, ենթադրությունները ճիշտ են, եւ եթե ես սխալվում եմ, իհարկե, մեծ գոհունակությամբ ներողություն կխնդրեմ, ու սա այն հարցն է, որ ես կուզենամ սխալվել, բայց եթե այդ պայմանագիրը ստորագրվի այն բովանդակությամբ, որ ես նկարագրեցի, Արցախը կվերածվի Ջավախքի»։
Նրա խոսքով ինչպես կա ջավախահայություն, այնպես էլ կլինի Արցախում, բայց Ջավախքի ու Արցախի տարբերությունը այն կլինի, որ մի քանի տարի հետո Արցախը կվերածվի Ջավախքից Նախիջեւանի:
Նա անդրադարձավ նաեւ խաղաղության պայմանագրի ոճային ու PR-ային փաթեթավորմանը՝ նշելով. «Սրա տեղ երկու գործոն է՝ անխուսափելիության եւ այլընտրանքի բացակայության հիմնավորումները: Ես ժխտում եմ այդ թեզը, որով իշխանությունը արդարացնում է իր անզորությունը, անգործությունն ու ձախողումները: Ասում են՝ պատերազմ եղավ, որն անխուսափելի էր, որովհետեւ վատ ժառանգություն էինք ստացել: Պարտվեցինք, անխուսափելի էր, որովհետեւ բանակ չունենք, այսօր անխուսափելի է, որ Արցախը մնա Ադրբեջանի կազմում, որովհետեւ այլընտրանք չկա: Այս երեքն էլ սին ու սուտ թեզեր են»,-ասաց Օսկանյանը:
14:56 - 24 փետրվարի, 2023