Աշխատանքի և սոցիալական հարցերի նախարարություն

Online.ssa.am կայքում արդեն հասանելի են Կորոնավիրուսի տնտեսական հետևանքների չեզոքացմանն ուղղված 8-րդ միջոցառման շրջանակում իրականացված դրամական փոխանցումների վերաբերյալ տեղեկությունները

ՀՀ աշխատանքի և սոցիալական հարցերի նախարարությունը հայտարարություն է տարածել, որում ասվում է «Online.ssa.am կայքում արդեն հասանելի են Կորոնավիրուսի տնտեսական հետևանքների չեզոքացմանն ուղղված 8-րդ միջոցառման շրջանակում իրականացված դրամական փոխանցումների վերաբերյալ տեղեկությունները: Այս պահին տեղեկությունները կարելի է ներբեռնել «Բեռնել վճարման ցանկը» կոճակով, ժամեր անց շահառուների համար հասանելի կլինի տվյալների ստուգման ինքնաշխատ գործիքը, որում անհրաժեշտ կլինի ուղղակի մուտքագրել անուն-ազգանունը և անձը հաստատող փաստաթղթի համարը: Այս պահին կայքում հասանելի են միայն այն քաղաքացիների տվյալները, ովքեր քարտային հաշիվ չեն ներկայացրել և որոնց անունով դրամական փոխանցումներն արդեն իսկ կատարված են: Բոլոր այն քաղաքացիները, ովքեր ներկայացրել են քարտային հաշիվ՝ որպես աջակցության փոխանցման նախընտրելի տարբերակ, ցանկում ներառված չեն, քանի որ քարտային տվյալները դեռ նույնականացվում են՝ բանկերի կողմից: Նույնականացված շահառուների տվյալները ևս կներառվեն ներկայացված ցանկում»:

17:07 - 16 ապրիլի, 2020

Կարևոր է, որ աջակցությունը րոպե առաջ հասնի մարդուն. Վարչապետը հանձնարարականներ տվեց |armenpress.am|

armenpress.am: Վարչապետ Նիկոլ Փաշինյանն անձամբ կարդացել է Ֆեյսբուքի միջոցով իրեն ուղղված նամակները և պարզել, որ կառավարության աջակցության ծրագրերից օգտվելու համար մարդիկ տեղեկատվության պակաս ունեն: Աշխատանքի և սոցիալական հարցերի նախարար Զարուհի Բաթոյանն ասաց, որ հեռախոսով իրենց մասնագետներն աջակցում են քաղաքացիներին, թե այդ ծրագրերից օգտվելու համար որ դաշտում ինչ տվյալներ պետք է լրացնել օնլայն համակարգում: Նրա խոսքով՝ կան քաղաքացիներ, որ շատ պարզ տեղեկատվության կարիք ունեն, օրինակ, ինչ է ՀԾՀ-ն, սոցիալական քարտը և այլն: Վարչապետ Նիկոլ Փաշինյանը վրոդովվեց, որ ինքն էլ չգիտի՝ ինչ է ՀԾՀ-ն, ինչո՞ւ մատչելի չեն հրապարակում տեղեկատվությունը: «Դե տեսնում եք, դա նշանակում է, որ մեր լրատավական համակարգը չի աշխատում: Եթե այդ ՀԾՀ կոչվածը սկզբունքային նշանակություն ունի այն հարցում, որ մարդը կկարողանա ճիշտ լրացնել դիմումը, ինչո՞ւ չի բացատրվում: Հիմա, կներեք, բայց ես չգիտեմ՝ ՀԾՀ-ն ի՞նչ է, ասեք՝ ի՞նչ է, ներկաներից ո՞վ գիտի: Եթե միջոցառում ենք անում, որտեղ ՀԾՀ-ի բացվածքն իմանալը սկզբունքորեն կարևոր է, ուրմեն մենք պետք է ուրիշ բանով չզբաղվենք»,- նշեց վարչապետը՝ ընդգծելով, որ յուրաքանչյուր քաղաքացու պետք է պարզաբանել ՀԾՀ-ն ինչ է, ՀՎՀ-ն ինչ է: Միջոցառումները կառավարությունն ընդունել է՝ նպատակ ունենալով օգնել քաղաքացիներին տարբեր հարցերով: Բայց այսօր խնդիր կա այդ օգնությունը ժամանակին և արդյունավետ տեղ հասցնելու գործում: «Հետևաբար, բոլոր ուժերը պետք է կենտրոնանան՝ տեղեկատվական համակարգը, սոցիալական ապահովության, տեխնոլոգիական համակարգերը: Կարևոր է, որ այդ աջակցությունը րոպե առաջ հասնի մարդուն:Եվ մենք հիմա արդեն ստիպված ենք հրապարակային սա քննարկել, աշխատանքային ռեժիմով արդեն 5-6 անգամ քննարկել ենք այս հարցը»,- ասաց նա: Վարչապետը փոխվարչապետ Մհեր Գրիգորյանին հանձնարարեց, որպեզի անձամբ նա երկու ժամը մեկ ստուգի, թե ինչպես է աշխատում համակարգը, ինչ է արվում այս հանձնարարականները կատարելու ուղղությամբ: «Այո օգնությունների ծրագրերը մենք չենք ընդունում, որ ուղիղ եթերում հայտարարենք այդ մասին, որ՝ վայ, մարդկանց օգնեցինք: Դա նրա համար է, որ այդ օգնությունը գնա ու մարդկանց տեղ հասնի րոպե առաջ: Հետևաբար, ամբողջ պետական համակարգը պետք է ծառայի այդ մարդկանց, որ օգնությունը մարդուն տեղ հասնի րոպե առաջ»,- նշեց վարչապետը:

16:08 - 16 ապրիլի, 2020

Կառավարության որոշմամբ ընդլայնվեց 8-րդ և 9-րդ միձոցառումների շրջանակը

Կառավարության որոշմամբ ընդլայնվեց 8-րդ և 9-րդ միձոցառումների շրջանակը։ Ընտանիքը 9-րդ միջոցառման շահառու կհանդիսա նաև այն դեպքում, երբ գրանցված աշխատանք ունեցող ծնողը 2020 թ. մարտի 12-ի դրությամբ գտնվել է մինչև 3 տարեկան երեխայի խնամքի արձակուրդում։ 8-րդ միջոցառման շահառու կհանդիսանան նաև հետևյալ ոլորտներում ներգրավված քաղաքացիները և անհատ ձեռնարկատերերը. ցամաքային տրանսպորտի գործունեություն (երթուղային տրանսպորտ) նախադպրոցական կրթություն (մասնավոր մանկապարտեզներ) սպորտի բնագավառում գործունեություն (սպորտային ակումբներ, լողավազաններ) զվարճությունների և հանգստի կազմակերպման այլ գործունեություն։

12:03 - 16 ապրիլի, 2020

Կառավարությունը հաստատեց կորոնավիրուսի տնտեսական հետևանքների չեզոքացման տասներեքերորդ միջոցառումը

Կառավարությունը հաստատեց կորոնավիրուսի տնտեսական հետևանքների չեզոքացման տասներեքերորդ միջոցառումը։ Կորոնավիրուսի տնտեսական հետևանքների չեզոքացման տասներեքերորդ միջոցառման նպատակն է օժանդակել կորոնավիրուսի տարածման հետևանքով գոյացած դժվարությունների արդյունքում սոցիալական խնդիրների առջև կանգնած սոցիալապես անապահով ընտանիքներին: Միջոցառման շահառու են 2020 թվականի ապրիլ ամսվա դրությամբ ընտանեկան և սոցիալական նպաստների իրավունք ունեցող ընտանիքները: Աջակցությունը տրամադրվում է սույն Միջոցառման 2-րդ կետով նախատեսված յուրաքանչյուր ընտանիքին իր նպաստի չափի 50% -ի չափով, որի 70%-ը ընտանիքին տրամադրվում է կանխիկ վճարման ձևով՝ ապրիլ ամսվա նպաստի վճարման հետ միասին, 70%-ը ընտանիքին տրամադրվում է կանխիկ վճարման ձևով՝ ապրիլ ամսվա նպաստի վճարման հետ միասին, 30%-ը փոխանցվում է որպես բաժանորդի կողմից սպառվող էլեկտրական էներգիայի դիմաց վճար, իսկ շահառուի բաժանորդ չհանդիսանալու դեպքում գումարը տրամադրվում է շահառուին սույն կետի 1-ին ենթակետով սահմանված ձևով: Սույն Միջոցառման 3-րդ կետի 2-րդ ենթակետով նախատեսված գումարը յուրաքանչյուր բաժանորդ հանդիսացող նպաստառու ընտանիքի անվամբ փոխանցվում է էլեկտրական էներգիա մատակարարող ընկերությանը: Ընդ որում՝ շահառուի պարտքի առկայության դեպքում այդ գումարն ուղղվում է բնակիչ բաժանորդի ունեցած պարտքի մարմանը, իսկ դրա բացակայության դեպքում՝ ձևակերպվում որպես կանխավճար:

11:46 - 16 ապրիլի, 2020

ԱԺ-ի քննարկմանն է ներկայացվել կենսաթոշակների՝ ամբողջությամբ անկանխիկ վճարման անցնելու հարցը |armenpress.am|

17:12 - 15 ապրիլի, 2020

7-րդ աջակցման ծրագրի շահառու կլինեն նաև այն հղի կանայք, որոնց ամուսիններն ընդհանրապես չեն աշխատել մարտի 30-ի դրությամբ․ Զարուհի Բաթոյան

ՀՀ աշխատանքի և սոցիալական հարցերի նախարար Զարուհի Բաթոյանն այսօր հրավիրված մամուլի ասուլիսի ժամանակ ասաց, որ այս պահին սոցիալական աջակցության 4-րդ ծրագիրը, որը վերաբերում է մինչև 14 տարեկան երեխա ունեցող և աշխատանքից ազատված անձանց, ընթացքի մեջ է։ Ծրագրի համար դիմելու անհրաժեշտություն չկա, պարզապես պետք է մուտք գործել ssa.am կայք, մուտքագրել տվյալները և տեսնել՝ ծրագրի շահառու հանդիսանո՞ւմ են, թե՞ ոչ։ Հանդիսանալու դեպքում վճարումներն իրականացվում են բանկում։ «6-րդ ծրագրի փոխանցումներն իրականացված են, շահառուները 6723-ն են։ 7-րդ ծրագիրի շրջանանկն ընդլայնել ենք։ Այս ծրագրի շահառու կհանդիսանան ոչ միայն այն կանայք, որոնք չեն աշխատում, և իրենց ամուսինն ազատված է մարտի 13-ից մինչև 30-ն ընկած ժամանակահատվածում, այլ նաև այն հղի կանայք, որոնց ամուսիններն ընդհանրապես չեն աշխատել մարտի 30-ի դրությամբ։ Այս ծրագրի շահառու են այս պահին 5957 քաղաքացիներ, բայց ցանկը թարմացվում է»,- նշեց նա։ Նախարարի փոխանցմամբ՝ 8-րդ ծրագիրը, որը վերաբերում էր տուժած ոլորտների գրանցված աշխատակիցներ, մեկնարկել է երեկ։ «Երեկ՝ մի քանի ժամվա ընթացքում, մենք ստացել ենք ավելի քան 45 հազար դիմում ֆիզիկական անձանցից, որոնցից 27 հազարը հաստատվել է, այս 27 հազար հոգին ընդհանուր 1,8 միլիարդ դրամի չափով աջակցություն կկարողանա ստանալ արդեն այսօր բանկերի կամ իրենց անձնական հաշիվների միջոցով»,- նշեց նա։ Զարուհի Բաթոյանը հայտնեց, որ 9-րդ ծրագիրի դիմումների ընդունումը ևս երեկ մեկնարկել է։ Այս ծրագրի շահառուների ցանկը դեռևս կազմվում է։ Նա նշեց, որ 8-րդ և 9-րդ ծրագրերի դեպքում նաև հրապարակվելու է շահառուների ցանկը, և միայն այս երկու ծրագրի դեպքում է, որ անհրաժեշտություն կա դիմում գրելու։ Նախարարն անդրադարձավ նաև սննդի փաթեթների, տեխնիկական, մաքրող միջոցների կարիքների մասին բնակիչներից ստացվող զանգերին։ Նա հայտնեց, որ այս կարիքներին համապատասխան աշխատում են մարզպետարանները ՀԿ-ների և կամավորական խմբերի հետ համատեղ։ «Մենք նաև աջակցում ենք սոցիալական տարբեր խմբերի թիրախավորելու, նրանց գտնելու, նրանց հասցեական օգնությունը հասցնելու ուղղությամբ։ Ավելի շատ համակարգում ենք և տեղեկություն ենք փոխանակում, բայց այս ամբողջ գործընթացն իրականացվում է քաղաքացիների, հասարակական կազմակերպությունների, միջազգային մեր գործընկերների միջոցով։ Պետք է հորդորեմ, որ այս աջակցության համար դիմեն համայնքներին, քաղաքապետարաններին, մարզպեարաններին։ Գործընթացը շատ կազմակերպված ձևով իրականացվում է»,- նշեց նա։

12:55 - 14 ապրիլի, 2020

Մեկնարկել է սոցիալական օժանդակության 8-րդ ծրագրի դիմումների ընդունման գործընթացը

Կառավարությունը հայտնում է, որ մեկնարկել է սոցիալական օժանդակության 8-րդ ծրագրի դիմումների ընդունման գործընթացը։Ծրագրով աջակցություն են ստանում տուժած ոլորտների անհատ ձեռնարկատերերը, մարտի 13-ից 30-ը գրանցված աշխատողները և մինչև 3 տարեկան խնամքի արձակուրդում գտնվող աշխատողները։ℹ️Եթե այս ծրագիրը վերաբերում է ձեզ, ապա անցեք հղումով https://dimum.ssa.am/ և լրացրեք դիմումը: Հավելյալ հարցերի դեպքում կարող եք զանգահարել 011֊300֊114 թեժ գծի հեռախոսահամարին։

11:27 - 14 ապրիլի, 2020

Կորոնավիրուսի տնտեսական հետևանքների չեզոքացման՝ հղի կանանց ուղղված ծրագրով վճարումները սկսված են

Այսօրվանից մեկնարկել է Կորոնավիրուսի տնտեսական հետևանքների չեզոքացման 7-րդ միջոցառման շահառուների համար վճարումների գործընթացը: Սա նշանակում է, որ ծրագրի շահառուներն արդեն այսօրվանից կարող են անձը հաստատող փաստաթղթով մոտենալ բանկեր և ստանալ իրենց հասանելիք գումարը: Ծրագրի շահառու կարող է դառնալ այն հղի կինը (առնվազն 12 շաբաթական և ոչ ավելի, քան 34 շաբաթական հղիություն), որը 2020 թ.-ի մարտի 30-ի դրությամբ չի աշխատում և ում ամուսինը 2020 թվականի մարտի 30-ի դրությամբ չունի աշխատանք` վարձու աշխատող չէ և չի հանդիսանում անհատ ձեռնարկատեր (ԱՁ) կամ, հանդիսանալու դեպքում, 2020 թ.-ի մարտի 30-ի դրությամբ նրա գործունեությունը կասեցվել է: Աջակցություն կարող է ստանալ նաև այն հղի կինը, ով միայնակ է՝ չունի ՔԿԱԳ-ում գրանցված ամուսնություն, ամուսնալուծված է կամ ամուսինը մահացած է, և 2020 թ.-ի մարտի 30-ի դրությամբ չի աշխատում: Ընդ որում՝ այս որոշման իրականացման կարգի իմաստով քաղաքացիաիրավական պայմանագրի հիման վրա աշխատող կամ ծառայություն մատուցող անձը չի համարվում վարձու աշխատող: Ստուգելու համար՝ արդյոք հանդիսանո՞ւմ եք աջակցության այս ծրագրի շահառու, մուտք գործեք online.ssa.am կայք, ընտրեք Կորոնավիրուսի տնտեսական հետևանքների չեզոքացման միջոցառումներ պատուհանը, այնուհետև՝ Կորոնավիրուսի տնտեսական հետևանքների չեզոքացման 7-րդ միջոցառում պատուհանը, այնուհետև՝ սեղմեք Ծրագրի շահառուներ կոճակը: Լրացրեք Ձեր անունը, ազգանունը, ՀԾՀ (սոցքարտ) կամ ՀԾՀ չունենալու մասին տեղեկանքի համարը: Եթե շահառու եք, ապա որոնման արդյունքում կնշվի այն բանկի անունը, որին փոխանցվել է գումարը: Անձը հաստատող փաստաթղթով կարող եք մոտենալ նշված բանկի յուրաքանչյուր մասնաճյուղ՝ գումարը ստանալու համար: Գումարը վճարվելու է բանկի միջոցով՝ առձեռն, միանվագ: Այն չի կարող արգելանքի տակ դրվել, բռնագանձվել կամ հաշվանցվել՝ շահառու դրամական պարտավորությունների դիմաց: Եթե գումարը բանկային հաշվին փոխանցելուց հետո 3 ամիսների ընթացքում շահառուն պահանջ չի ներկայացնում գումարի նկատմամբ, այն վերադարձվում է ՀՀ պետական բյուջե: Նշենք, որ շահառուների ցանկն ամբողջական չէ և պարբերաբար համալրվում է, ուստի, դրանում Ձեր անունը չգտնելու դեպքում, փորձեք որոշ ժամանակ անց:

17:49 - 10 ապրիլի, 2020

Ընդամենը 2 օրում սոցապի թեժ գիծ ստացվել է 12 հազար 233 զանգ

ՀՀ աշխատանքի եւ սոցիալական հարցերի նախարարության թեժ գիծ ապրիլի 7-9-ը գրանցվել են աննախադեպ մեծաքանակ զանգեր՝ 12 հազար 233: Այս զանգերը նախարարությունը ստացել է թեժ գծի նոր՝ 011 300 114 համարին: Փոխնախարար Գեմաֆին Գասպարյանը գրել է. «Մի քանի օրում ձեւավորել այսպիսի համակարգ՝ լավ մարտահրավեր էր. նոր 011 300 114 թեժ գծի 12,233 զանգերից 94.9% սպասարկվել է»:Նա նաև նշել է, որ ՀՀ ամբողջ տարածքից ցանցում 300 մասնագետներ են:

19:56 - 09 ապրիլի, 2020

Շուրջ 3750 հղի կին վաղը կկարողանա իր աջակցությունը ստանալ․ Աշխատանքի և սոցիալական հարցերի նախարար Զարուհի Բաթոյան

Այսօր հրավիրված մամուլի ասուլիսի ժամանակ փոխվարչապետ Մհեր Գրիգորյանը հայտնեց, որ ունենք 10 հաստատված աջակցման միջոցառումներ, որոնցից 6-ն արդեն լիարժեք ուժի մեջ են։ «Երեկվա դրությամբ ամփոփեցինք արդեն ուժի մեջ իմպլեմենտացված միջոցառումների ընթացքը։ Միջոցառումներով հասանելի գումարների ընդհանուր չափը երեկվա դրությամբ կազմել է 3 միլիարդ 670 միլիոն դրամ։ Մենք համարում ենք, որ սա վատ արդյունք չէ, ըստ էության՝ սա երկու օրվա արդյունք է»,- նշեց նա։ Փոխվարչապետն ասաց, որ այսօր ևս մեկ միջոցառում հաստատվեց, որը վերաբերում է միկրոբիզնեսին՝ ձեռնարկատերերին, որոնք գրանցված չեն որպես ԱՁ կամ իրավաբանական անձ։ Ըստ փոխվարչապետի՝ այս միջոցառման իմպլեմենտացիոն գործընթացը շատ արագ կիրականացվի, որովհետև թիրախը հստակ է, և շտեմարանները, որոնցով պետք է աշխատել, բավականին պարզ են։ «Մենք շտեմարանների ինտենսիվ մշակման փուլում ենք և ճշգրտման աշխատանքներ ենք իրականացնում 7-րդ, 8-րդ և 9-րդ միջոցառումների մասով։ 7-րդ միջոցառման սկիզբը մենք վաղը կհայտարարենք, մնացած միջոցառումների՝ 8-րդի, 9-րդի և 10-րդի փաստացի իրականացման գործընթացը ծրագրել ենք սկսել երկուշաբթի օրվանից»,- նշեց նա։ Աշխատանքի և սոցիալական հարցերի նախարար Զարուհի Բաթոյանն ասաց, որ արդեն հասանելի է 4-րդ և 6-րդ աջակցման ծրագրերի ֆինանսավուրումը, 2 օր է՝ քաղաքացիները, որոնք այս ծրագրերի շահառու են, կարողանում են ստանալ գումարը։ «4-րդ ծրագիրը վերաբերում է մինչև 14 տարեկան երեխա ունեցող այն անձանց, որոնք ազատվել են աշխատանքից մարտի 13-ից 25-ն ընկած ժամանակահատվածում, և 6-րդ ծրագիրը նույն ժամանակահատվածում աշխատանքից ազատված անձանց մասին է, որոնք երեխաներ չունեն»,- նշեց նա։ Նախարաը հիշեցրեց, որ քաղաքացին իր՝ ծրագրերի շահառու լինել/չլինելը կարող է ստուգել արդեն գործարկված օնլայն ssa.am կայքում՝ մուտքագրելով իր տվյալները։ Կայքում նշված է նաև այն բանկը, որտեղ քաղաքացին կարող է մոտենալ անձը հաստատող փաստաթղթով և ստանալ միանվագ աջակցությունը։ Զարուհի Բաթոյանը հավելեց, որ 4-րդ ծրագրի դեպքում ցանկն անընդհատ թարմացվում է։ Եթե մարդը տվյալ պահին իր անունը չի գտնում, պետք է փորձի ավելի ուշ։ «Վաղը սկսվի ֆինանսավորումը 7-րդ ծրագրի, որը վերաբերում է հղի կանանց, որոնց ամուսիններն ազատվել են աշխատանքից, կամ իրենք չեն աշխատում։ ՄԵնք ստացել ենք շուրջ 15 հազար հղի կնոջ մասին տվյալներ։ Այդ տվյալները մենք պետք է համադրենք մեր մյուս բազաների հետ՝ ՊԵԿ-ի, Բնակչության պետական ռեգիստրի և այլնի, և պետք է հասկանանք՝ այս խմբից ովքեր են ծրագրի շահառուները։ Շուրջ 3750 հղի կին վաղը կկարողանա արդեն իր աջակցությունը ստանալ։ Սա այն թիվն է, որ այս պահին իդենտիֆիկացված է»,- ասաց նախարարը։ Նա նշեց, որ 8-րդ և 9-րդ ծրագրերը դիմումի հիման վրա են իրականացվելու։ Նախորդ ծրագրերը դիմումի անհրաժեշտություն չունեն։

13:05 - 09 ապրիլի, 2020

Միայնակ տարեցներն ու հաշմանդամություն ունեցողները մեկ ամիս սննդի ու հիգիենիկ պարագաների կարիք չեն ունենա |armtimes.com|

armtimes.com: Նախորդ ամսից ՀՀ աշխատանքի եւ սոցիալական հարցերի նախարարությունը սկսել է աջակցություն տրամադրել Հայաստանում սոցիալապես անապահով եւ թիրախային առաջին խմբում գտնվող անձանց: Գործընթացը շարունակվում է: Խմբերը, որոնց աջակցություն է տրամադրվել եւ շարունակվելու է, նախարարության կողմից դասակարգվել են ըստ խոցելիության աստիճանի: Առաջին երկու թիրախային խմբում միայնակ տարեցներն ու հաշմանդամություն եւ տեղաշարժման խնդիր ունեցող անձինք են: ՀՀ աշխատանքի եւ սոցիալական հարցերի նախարարության մամուլի պատասխանատու Սոնա Մարտիրոսյանը «Հայկական ժամանակի» հետ զրույցում հայտնեց, որ նախարարությունն այս աշխատանքներն ավելի արդյունավետ ու հասցեկան դարձնելու համար համագործակցում է պարետատան հետ: Պարենային եւ ոչ պարենային պաշարներն անընդհատ ավելացվում են ըստ կարիքի: Այս պահին Երեւանում եւ բոլոր մարզերում գործում են առանձնացված պահեստներ, որտեղ հավաքագրվում եւ տեսակավորվում են սննդամթերքի փաթեթները: Բացի բարեգործական մի շարք կազմակերպությունների աշխատակիցներից, ձեւավորվել է կամավորների հսկայական բանակ, ովքեր ցանկություն են հայտնել աջակցել եւ բարի գործ կատարել: Պարենային եւ ոչ պարենային պաշարներն անընդհատ ավելացվում են ըստ կարիքի: Սոնա Մարտիրոսյանը նկատեց՝ բոլորին տրվող փաթեթները միանման են, այսինքն լավի-վատի տարբերակում չի կարող լինեն: Դրանք նախատեսված են ոչ միայն աղքատության մինիմալ զամբյուղի չափով, այլեւ առողջապահական տեսանկյունից էլ պիտի բավարարեն, այսինքն լինեն բազմազան եւ վիտամիններով հարուստ սննդամթերքով: Փաթեթները միայնակ տարեցներին եւ հաշմանդամություն ունեցողներին բաժանվել է մեկամսյա եւ երկամսյա ժամկետով՝ ըստ կարիքի: Դրանց մեջ եղել են ամենաանհրաժեշտ սննդի տեսակներ եւ հիգիենայի պարագաներ: Նախարարության խոսնակը դժվարացավ ասել, թե օրինակ տարեց կնոջը տրվող փաթեթում կոնկրետ ինչ մթերք կարող էր լինել: «Արտակարգ դրության առաջին իսկ օրերին մի շարք կազմակերպություններ ինքնակազմակերպվեցին եւ դիմեցին մեր աջակցությանը, որպեսզի կարողանայինք համակարգել բնամթերքի, սննդամթերքի, հիգիենիկ պարագաների հավաքագրումն ու մարդկանց տեղ հասցնումը: Աջակցությունն ուղղված է եղել այն քաղաքացիներին, ովքեր այս օրերին տրամաբանորեն կարող էին տնից դուրս գալու խնդիր ունենալ»,- ասաց Մարտիրոսյանը: Նաեւ նշեց, որ այն բոլոր ցերեկային աջակցությունները, որոնք նախկինում խնամքի կենտրոներն ու բարեգործական ճաշարանները մատուցվում էին միայնակ տարեցներին, արտակարգ դրություն հայտարարելուց հետո սկսեցին փոխել իրենց աշխատանքի բնույթը: «Այժմ միայնակ տարեցները չեն գնում ճաշարան իրենց ուտելիքը վերցնելու, այլ այն սնունդը, որը նախատեսված է նրանց համար, ճաշարանը տեղափոխում եւ մատակարարում է նրանց բնակարաններում»,- ասաց Սոնա Մարտիրոսյանը: Շարունակությունը՝ armtimes.com կայքում։

22:50 - 08 ապրիլի, 2020

Գործարկվել է կայք, որով կարող եք տեղեկանալ՝ կորոնավիրուսի տնտեսական հետևանքների չեզոքացման սոցիալական ծրագրերի շահառո՞ւ եք, թե՞ ոչ

ՀՀ Աշխատանքի և սոցիալական հարցերի նախարարությունը հայտնում է, որ գործարկել է online.ssa.am կայքը, որի միջոցով կարող եք տեղեկանալ՝ արդյոք հանդիսանո՞ւմ եք ՀՀ կառավարության կողմից կորոնավիրուսի տնտեսական հետևանքների չեզոքացմանն ուղղված սոցիալական ծրագրերի շահառու, թե` ոչ: Կայքի համապատասխան դաշտում հայատառ մուտքագրելով ձեր տվյալները՝ կարող է տեղեկանալ աջակցության ծրագրի տվյալ ցուցակում ներառված լինել կամ չլինելու մասին։ Ծրագրերի շահառու հանդիսանալու դեպքում կտեսնեք նաև այն բանկի անվանումը, որտեղ փոխանցվել է ձեզ համար նախատեսված գումարը: Անձը հաստատող փաստաթղթով անհրաժեշտ է մոտենալ տվյալ բանկի ցանկացած մասնաճյուղ և ստանալ միանվագ աջակցությունը: Նշենք, որ գումարը բանկում հասանելի կլինի երեք ամիս, եթե այդ ընթացքում գումարի նկատմամբ պահանջ չառաջադրեք, այն հետ կվերադարձվի ՀՀ պետական բյուջե: Նշենք, որ ‹‹Կորոնավիրուսի հետևանքով աշխատանքից ազատված ծնողներին հրատապ դրամական աջակցություն» (4-րդ միջոցառում) ծրագրի շահառուների ցանկը, ամբողջական չէ և պարբերաբար թարմացվում է: Ուստի, Ձեր տվյալները ցանկում չգտնելու պարագայում, փորձեք դրանք վերստուգել որոշ ժամանակ անց:

10:31 - 07 ապրիլի, 2020

Արտակարգ դրությամբ պայմանավորված` ԱԱՏՄ լիազորությունները կարող են ընդլայնվել. Զարուհի Բաթոյան |armenpress.am|

armenpress.am: Արտակարգ դրության ժամանակահատվածում Առողջապահական և աշխատանքի տեսչական մարմինն ունենալու է լիազորություն՝ ստացված բողոքների հիման վրա աշխատանքային օրենսդրության խախտումների մասով վերահսկողություն իրականացնել։ ՀՀ աշխատանքի և սոցիալական հարցերի նախարար Զարուհի Բաթոյանը նշել է, որ հրատապ ռեժիմով նախաձեռնվել է «Աշխատանքային օրենսգրքում» փոփոխությունների նախագծի մշակում:-Տիկին Բաթոյան, երկրում ստեղծված ճգնաժամով պայմանավորված` հաճախ բարձրաձայնվում է աշխատանքային իրավունքների ոտնահարման հարցը։ Այս ամենի համատեքստում առաջ է քաշվում աշխատանքի տեսչություն ունենալու կամ գործող Առողջապահական և աշխատանքի տեսչական մարմնին հավելյալ լիազորություններ տալու անհրաժեշտությունը։ Այս ուղղությամբ նախարարությունում կային քննարկումներ, ասացեք խնդրեմ` ի՞նչ փուլում են:-Այո, ճիշտ եք: Անհրաժեշտությունը կա, և մենք բազմիցս բարձրաձայնել ենք այդ մասին: Կարող եմ ասել, որ 2019 թ․ Աշխատանքային օրենսգրքի համապատասխան փոփոխությունների արդյունքում ընդամենը 1 տարի հետո Հայաստանում կրկին կներդրվի աշխատանքային օրենսդրության պահանջների կատարման նկատմամբ ամբողջական վերահսկողության համակարգ։-Հաշվի առնելով այն, որ այս պահին ո՛չ նախարարությունը, ո՛չ տեսչական մարմինը լիազորություններ չունեն միջամտելու աշխատանքային հարաբերություններին, հնարավոր է արագացված կարգով նախագիծ դրվի շրջանառության մեջ` գործող տեսչական մարմնի լիազորություններն ավելացնելու համար։-Այո, հաշվի առնելով ստեղծված իրավիճակը, Աշխատանքի և սոցիալական հարցերի նախարարությունը հրատապ ռեժիմով նախաձեռնել է Աշխատանքային օրենսգրքում փոփոխությունների նախագծի մշակում, որում, ի թիվս այլ կարգավորումների, նախատեսվում է նաև ամրագրել, որ արտակարգ դրության ժամանակահատվածում Առողջապահական և աշխատանքի տեսչական մարմինն ունենալու է լիազորություն՝ ստացված բողոքների հիման վրա աշխատանքային օրենսդրության խախտումների մասով վերահսկողություն իրականացնել:Ավելին՝ armenpress.am-ում

12:59 - 06 ապրիլի, 2020

Պարետատունը նվիրատվությունների համար Երեւանում և մարզերում առանձնացրել է հատուկ պահեստներ (տեսանյութ)

Պարետատունը նվիրատվությունների համար Երևանում և մարզերում առանձնացրել է հատուկ պահեստներ՝ առաջին անհրաժեշտության ապրանքները հավաքագրելու, այնուհետև առավել խոցելի խմբերին տրամադրելու համար։ Այս մասին տեղեկանում ենք ՀՀ կառավարության ֆեյսբուքյան էջից։ «Մենք իրար հետ կապված պետք է լինենք ոչ միայն օրենքներով և որոշակի պարտականություններով, այլ նաև հոգատարությամբ, որպեսզի իրար հետ այս դժվարին իրավիճակը հաղթահարենք»,-այս մասին ասել է ՀՀ աշխատանքի և սոցիալական հարցերի նախարարի առաջին տեղակալ Գեմաֆին Գասպարյանը։

15:50 - 05 ապրիլի, 2020

Չգրանցված աշխատողները կարող են վճարվել փաստացի աշխատած ժամերի համար. նախարար |news.am|

news.am: Մենք առաջարկել ենք փոփոխություն կատարել Աշխատանքային օրենսգրքում, ինչը թույլ կտա վճարել չգրանցված աշխատողներին փաստացի աշխատած ժամերի համար: Այս մասին ապրիլի 2-ին լրագրողների հետ հանդիպման ժամանակ հայտարարեց ՀՀ աշխատանքի եւ սոցիալական հարցերի նախարար Զարուհի Բաթոյանը: Նրա խոսքով՝ նման փոփոխությունները կլուծեն առկա խնդիրը, սակայն նախագիծը պետք է քննարկվի կառավարությունում, ապա ուղարկվի ԱԺ: «Դեռ հայտնի չէ՝ ինչպիսին կլինի օրենքի վերջնական տեսքը»,- նշեց նա:

17:57 - 02 ապրիլի, 2020

Կառավարությունը հաստատեց կորոնավիրուսի տնտեսական հետևանքների չեզոքացման իններորդ միջոցառումը

11:50 - 02 ապրիլի, 2020