Գերմանիա

Գերմանիան (պաշտոնապես՝ Գերմանիայի Դաշնային Հանրապետություն) պետություն է Արեւմտյան Եվրոպայում։ Հյուսիսում սահմանակցում է Դանիային, արեւելքում՝ Չեխիային եւ Լեհաստանին, հարավում՝ Ավստրիային եւ Շվեյցարիային, հարավում՝ Ֆրանսիային, իսկ Լյուքսեմբուրգին, Բելգիային եւ Նիդերլանդներին՝ արեւմուտքում։ Մայրաքաղաքն է Բեռլինը։

ԳԴՀ-ն բաժանված է 16 վարչատարածքային միավորների՝ երկրամասերի, եւ ընդգրկում է շուրջ 357 386 քկմ տարածք։ Ունենալով շուրջ 83 միլիոն բնակչություն՝ համարվում է ՌԴ-ից հետո Եվրոպայի խոշորագույն պետությունը, ինչպես նաեւ ԵՄ ամենախիտ բնակեցված պետությունը։ Ամենաբնակեցված, արդյունաբերական խոշոր երկրամասը Ռուրն է, որի գլխավոր քաղաքներն են Դորտմունդն ու Էսսենը։ Գերմանիայի մյուս նշանավոր քաղաքներն են Մայնի Ֆրանկֆուրտը, Համբուրգը, Մյունխենը, Քյոլնը, Շտուտգարտը, Դյուսելդորֆը, Լայպցիգը, Դրեզդենը, Բրեմենը, Հաննովերը, Գելզենկիրխենը եւ Նյուրնբերգը։

Մերօրյա Գերմանիան դաշնային խորհրդարանական հանրապետություն (բունդեսհանրապետություն) է, որը կառավարվում է վարչապետի՝ կանցլերի կողմից։ Այժմ կանցլերն է Անգելա Մերկելը։

ԳԴՀ-ն 1957-ից ի վեր հանդիսանում է Եվրոպական տնտեսական համագործակցության, իսկ 1993-ից՝ Եվրոպական միության համահիմնադիր անդամ, 1999-ից՝ Շենգենյան գոտի։ Անդամակցում է նաեւ ՄԱԿ-ին, Հյուսիսատլանտյան դաշինքին (ՆԱՏՕ), «Մեծ յոթնյակին», Տնտեսական համագործակցության եւ զարգացման կազմակերպությանը եւ այլն։

Պուտինը կստորագրի Դոնեցկի և Լուգանսկի ինքնահռչակ հանրապետոթյունների անկախության ճանաչման վերաբերյալ հրամանագիր

Պուտինը կստորագրի Դոնեցկի և Լուգանսկի ինքնահռչակ հանրապետոթյունների անկախության ճանաչման վերաբերյալ հրամանագիր

ՌԴ նախագահ Վլադիմիր Պուտինը Ուկրաինայի շուրջ ստեղծված իրադրության առնչությամբ հեռախոսազրույց է ունեցել Էմմանուել Մակրոնի և Օլաֆ Շոլցի հետ։ «Ռիա Նովոստի»-ի փոխանցմամբ՝ Կրեմլից հայտնում են, որ Ռուսաստանի նախագահ Վլադիմիր Պուտինը հեռախոսազրույց է ունեցել Ֆրանսիայի նախագահ Էմմանուել Մակրոնի և Գերմանիայի կանցլեր Օլաֆ Շոլցի հետ։ Ռուսաստանի նախագահ Պուտինը Մակրոնի եւ Շոլցի հետ քննարկել Է իրադրությունը Դոնբասում։ Պուտինը Մակրոնին ու Շոլցին հայտնել է, որ Դոնեցկի և Լուգանսկի ինքնահռչակ հանրապետոթյունների անկախության ճանաչման վերաբերյալ հրամանագիր կստորագրի, ինչի առթիվ ղեկավարները հիասթափություն են հայտնել։

22:11 - 21 փետրվարի, 2022

Lufthansa-ն և Austrian Airlines-ը դադարեցնում են թռիչքները Ուկրաինա |hetq.am|

Lufthansa-ն և Austrian Airlines-ը դադարեցնում են թռիչքները Ուկրաինա |hetq.am|

hetq.am: Lufthansa ավիաընկերությունը հայտարարել է, որ փետրվարի 21-28-ը դադարեցնում է թռիչքները դեպի Կիև։ Այդ մասին հայտնում է AFP-ն։ Ավիափոխադրողը կդադարեցնի թռիչքները նաև դեպի Օդեսա։ «Lufthansa-ն մշտապես հետևում է իրավիճակին և ավելի ուշ որոշում կընդունի հետագա թռիչքների վերաբերյալ»,- նշվում է ընկերության կայք էջում։ Համանման որոշման մասին հայտնել է նաև Ավստրիայի ազգային ավիափոխադրողը՝ Austrian Airlines-ը, որը փետրվարի 20-ից մինչև այս ամսվա վերջ կդադարեցնի թռիչքները դեպի Կիև ու Օդեսա։ Իրավիճակը խիստ լարված է Դոնբասում։ Լուգանսկի և Դոնեցկի ինքնահռչակհանրապետությունների ղեկավարները հայտարարել էին Ռուսաստան բնակչության տարհանման մասին։ Նրանց պնդմամբ՝ Ռոստովի մարզի իշխանությունները համաձայնվել են ընդունել Դոնբասի բնակիչներին։ Զուգահեռաբար, Դոնեցկում միացվել են քաղաքացիական պաշտպանության շչակները։ Բարձրախոսներով քաղաքացիներին կոչ են անում մեկնել Ռուսաստան։ Դոնբասի ինքնահռչակ երկու հանրապետությունների ղեկավարները տարհանումը բացատրել են տարածաշրջանում լարվածության աճով։ Լուգանսկի ինքնահռչակ հանրապետության ղեկավար Լեոնիդ Պասեչնիկը, հղում անելով «հետախուզության տվյալներին», հայտարարել է, որ «ուկրաինական ագրեսորը» պլանավորում է սադրանքներ իրականացնել շփման գծում և «խորը ներթափանցել» ԼԺՀ տարածք։ Ուկրաինայում տարբեր մակարդակներով հերքել են դեպի Դոնբաս դիվերսիոն հարձակումների նախապատրաստման և հարձակողական օպերացիայի անցկացման մեղադրանքները։ «Ուկրաինան չի իրականացնում և չի նախատեսում նմանատիպ որևէ գործողություն իրականացնել Դոնբասում։ Մենք ամբողջությամբ հավատարիմ ենք բացառապես դիվանագիտական կարգավորմանը»,- թվիթերյան իր միկրոբլոգում գրել էր Ուկրաինայի ԱԳ նախարար Դմիտրի Կուլեբան։

11:06 - 20 փետրվարի, 2022

Շոլց․ «Ուկրաինական ճգնաժամի դինամիկան հնարավոր կլինի փոխել միայն բանակցությունների միջոցով» |azatutyun.am|

Շոլց․ «Ուկրաինական ճգնաժամի դինամիկան հնարավոր կլինի փոխել միայն բանակցությունների միջոցով» |azatutyun.am|

azatutyun.am: «Ուկրաինական ճգնաժամի դինամիկան հնարավոր կլինի փոխել միայն բանակցությունների միջոցով»,- այսօր, դիմելով Մյունխենի անվտանգության հարցերով միջազգային համաժողովի մասնակիցներին, հայտարարել է Գերմանիայի դաշնային կանցլեր Օլաֆ Շոլցը։ «Ես պատրանքներ չունեմ, արագորեն հաջողության հասնելու ակնկալիքներ չկան, սակայն մենք պետք է սատարենք դիվանագիտությունը՝ առանց միամտություն ցուցաբերելու», - հայտարարել է գերմանական կառավարության ղեկավարը։ «Ուկրաինայի շուրջ զորքերի կուտակումը որևէ արդարացում չունի, իսկ այդ երկրի վրա [ռուսական] հարձակումը մեծագույն սխալ կլինի», - հայտարարել է Շոլցը՝ հատուկ ընդգծելով, որ Արևելյան Ուկրաինայում իրադրության հանգուցալուծման համար «Նորմանդյան ձևաչափը որոշիչ նշանակություն ունի»։ «Եվրոպայում այսօր պատերազմի վտանգ է առկա։ Վտանգը դեռ չեզոքացված չէ», - հավելել է Գերմանիայի դաշնային կանցլերը։

15:39 - 19 փետրվարի, 2022

Արարատ Միրզոյանը Գերմանիայի ԱԳ պետնախարարի հետ քննարկել է հայ գերիների հայրենադարձման հարցը

Արարատ Միրզոյանը Գերմանիայի ԱԳ պետնախարարի հետ քննարկել է հայ գերիների հայրենադարձման հարցը

Հայաստանի Հանրապետության ԱԳ նախարար Արարատ Միրզոյանը Մյունխենում փետրվարի 18-ին հանդիպում է ունեցել Գերմանիայի Դաշնային Հանրապետության ԱԳ պետնախարար Տոբիաս Լինդների հետ: Զրուցակիցները մտքեր են փոխանակել երկկողմ և բազմակողմ ձևաչափերում երկու պետությունների միջև արդյունավետ համագործակցության շուրջ: Հայաստանի արտաքին քաղաքական գերատեսչության ղեկավարը գոհունակությամբ է արձանագրել Հայաստանի և Գերմանիայի միջև ձևավորված բարեկամական հարաբերությունների դրական դինամիկան՝ խարսխված պատմական կապերի, ընդհանուր արժեքների և փոխադարձ շահերի վրա։Ինչպես տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, Արարատ Միրզոյանը և Տոբիաս Լինդները երկու երկրների միջև դիվանագիտական հարաբերությունների հաստատման 30-ամյակին ընդառաջ պատրաստակամություն են հայտնել խորացնելու երկու երկրների միջև համագործակցությունը։Կողմերը մտքեր են փոխանակել տարածաշրջանային և միջազգային օրակարգի մի շարք հրատապ հարցերի շուրջ։ Նախարար Միրզոյանը ներկայացրել է իրավիճակը Լեռնային Ղարաբաղում և Հայաստանի ու Ադրբեջանի սահմանին։Կարևորվել է ԵԱՀԿ Մինսկի խմբի համանախագահության մանդատի ներքո Լեռնային Ղարաբաղի հակամարտության համապարփակ և տևական կարգավորման անհրաժեշտությունը:Քննարկվել է հայ ռազմագերիների և այլ պահվող անձանց անհապաղ հայրենադարձման հարցը։Հանդիպման ընթացքում նաև անդրադարձ է կատարվել Հայաստանի և Թուրքիայի միջև հարաբերությունների կարգավորման գործընթացին։

10:58 - 19 փետրվարի, 2022

ԱՄՆ-ն F-35-եր է տեղակայել Գերմանիայում |factor.am|

ԱՄՆ-ն F-35-եր է տեղակայել Գերմանիայում |factor.am|

factor.am: ԱՄՆ-ը Գերմանիա է ուղարկել հինգերորդ սերնդի F-35 բազմաֆունկցիոնալ կործանիչներ՝ ՆԱՏՕ-ի պաշտպանությունն ուժեղացնելու համար։ Այս մասին երեկ հայտարարել է ԱՄՆ ռազմաօդային ուժերի պահեստային հրամանատարությունը։ Գործող 388-րդ և պահեստային 419-րդ ավիացիոն ստորաբաժանումների կործանիչները տեղափոխվել են Շպանգդալեմ ավիաբազա՝ օդաչուների ու սպասարկող անձնակազմի հետ միասին։ Նշվում է, որ F-35 A Lightning II-ը ամենաժամանակակից կործանիչներն են ԱՄՆ ռազմաօդային ուժերում, որոնք ունակ են իրականացնել տարատեսակ խնդիրներ ագրեսիայի զսպման ու դաշնակիցների պաշտպանության համար, եթե զսպումը չհաջողվի»։ «ԱՄՆ կործանիչների տեղակայումը Շպանգալեմի ավիաբազայում ուժեղացնում է ՆԱՏՕ-ի պաշտպանությունը և համատեղ գործելու մեր կարողությունը։ Մենք գործ ունենք դինամիկ միջավայրի հետ, և այս տեղակայումը մեծապես ուժեղացնում է ՆԱՏՕ-ն»,- ասել է ԱՄՆ ռազմաօդային ուժերի հրամանատար Ջեֆ Հարիգանը: Շարունակությունը՝ factor.am-ում

18:43 - 17 փետրվարի, 2022

Բայդենը և Շոլցը հեռախոսով քննարկել են ուկրաինական ճգնաժամը |azatutyun.am|

Բայդենը և Շոլցը հեռախոսով քննարկել են ուկրաինական ճգնաժամը |azatutyun.am|

azatutyun.am: Երեկ հեռախոսազրույց է կայացել Միացյալ Նահանգների նախագահ Ջո Բայդենի և Գերմանիայի կանցլեր Օլաֆ Շոլցի միջև։ Երկու երկրների ղեկավարները քննարկել են ուկրաինական սահմանի մոտ ռուսական ռազմական ուժի ամրապնդման հարցը և ընդգծել ՆԱՏՕ-ի արևելյան թևի ուժեղացման կարևորությունը Մոսկվայի կողմից Ուկրաինա ներխուժելու դեպքում, ասվում է Սպիտակ տան հաղորդագրությունում: Գերմանիայի կառավարության խոսնակի փոխանցմամբ՝ Բայդենը և Շոլցը համաձայնել են, որ իրավիճակը Ուկրաինայում պետք է գնահատել որպես «չափազանց լուրջ», քանի որ Ռուսաստանի կողմից հնարավոր ռազմական ագրեսիայի վտանգը դեռ պահպանվում է։ Միացյալ Նահանգների և Գերմանիայի ղեկավարները ողջունել են Ռուսաստանի նախագահի հայտարարությունը ներկայիս ճգնաժամի դիվանագիտական լուծումը շարունակելու անհրաժեշտության մասին։

10:14 - 17 փետրվարի, 2022

Պենտագոնի ղեկավարը պաշտոնակիցների հետ քննարկել է Ռուսաստանի հետ փոխգործակցության անհրաժեշտությունը |armenpress.am|

Պենտագոնի ղեկավարը պաշտոնակիցների հետ քննարկել է Ռուսաստանի հետ փոխգործակցության անհրաժեշտությունը |armenpress.am|

armenpress.am: ԱՄՆ-ի պաշտպանության նախարար Լլոյդ Օսթինը եւ նրա պաշտոնակիցները Ֆրանսիայից, Գերմանիայից եւ Մեծ Բրիտանիայից փետրվարի 16-ին Բրյուսելում կայացած հանդիպմանը քննարկել են Ռուսաստանի հետ դիվանագիտական փոխգործակցությունը եւ լարվածության նվազեցման անհարաժեշտությունն Ուկրաինայի շուրջ իրադրությունում: Այդ մասին ասված էՊենտագոնի մամուլի քարտուղար Ջոն Քիրբիի տարածած հայտարարության մեջ։ Հանդիպմանը, բացի Օսթինից, մասնակցել են Ֆրանսիայի զինված ուժերի նախարար Ֆլորանս Պառլին, նրա գերմանացի պաշտոնակից Քրիստինե Լամբրեխտը եւ Մեծ Բրիտանիայի պաշտպանական գերատեսչության ղեկավար Բեն Ուոլիսը: Նրանք «քննարկել են վերջերս կայացած դիվանագիտական փոխգործակցությունը Ռուսաստանի հետ եւ Ռուսաստանի կողմից ապաէսկալացիայի անհրաժեշտությունը»: Ինչպես հետեւում է փաստաթղթից, նախարարները հայտարարել են, որ «պաշպանում են Ուկրաինայի տարածքային ամբողջականությունը» եւ նշել են «ՆԱՏՕ-ի միասնության կարեւորությունը Ռուսաստանին դիմադարձելու, արեւելյան թեւում ՆԱՏՕ-ի դաշնակիցներն ոգեշնչելու եւ կանոնների վրա հիմնված միջազգային կարգը պահպանելու համար»: Ինչպես ճշտել Է Քիրբին, Օսթինը նաեւ առանձին հանդիպում Է ունեցել Լամբրեխտի հետ: Նրանք «քննարկել են լուրջ անհանգստությունն» Ուկրաինայի սահմանների մոտ ռուսական ուժերի իբր տեղ գտած կենտրոնացման պատճառով: Բացի դրանից նախարարներն արծարծել են հարցեր, որոնք վերաբերում են Ռուսաստանի դիմադարձմանը, ռազմական գնումներին եւ Հնդկա - խաղաղաօվկիանոսյան տարածաշրջանի իրադրությանը: Վերջին ժամանակներս Արեւմուտքի երկրներում, ինչպես նաեւ Կիեւում հնչում են հայտարարություններ Ուկրաինայի տարածք Ռուսաստանի հնարավոր ներխուժման մասին: Ռուսաստանի նախագահի մամուլի քարտուղար Դմիտրի Պեսկովը նման տեղեկատվությունը որակել Է լարվածության սին եւ անպատասխանատու բորբոքում եւ ընդգծել, որ Ռուսաստանը ոչ մեկի համար սպառնալիք չի ներկայացնում: Ըստ որում նա չի բացառել սադրանքների հնարավորությունն՝ այդ հայտարարությունների արդարացման համար, եւ նախազգուշացրել Է, որ Ուկրաինայի հարավ - արեւելքում ճգնաժամի ուժային լուծման փորձերը կունենան ամենալուրջ հետեւանքները, հաղորդել Է ՏԱՍՍ-ը:

10:09 - 17 փետրվարի, 2022

Շոլցը կոչ է արել շտապ դեէսկալացիա սկսել Ուկրաինայի շուրջ |armenpress.am|

Շոլցը կոչ է արել շտապ դեէսկալացիա սկսել Ուկրաինայի շուրջ |armenpress.am|

armenpress.am: Ուկրաինայի շուրջ իրավիճակի դեէսկալացիան շտապ անհրաժեշտ է, պատերազմ չպետք է սկսվի։ Այս մասին, ինչպես փոխանցում է «Ռիա նովոստի»-ն հայտարարել է Գերմանիայի կանցլեր Օլաֆ Շոլցը։ «Իմ այցը տեղի է ունենում Եվրոպայում վերջին տասնամյակների ընթացքում ամենածանր և սպառնացող ճգնաժամի ֆոնին։ Ռուսաստանի ռազմական գործունեությունը և սահմանի երկայնքով ռուսական զորքերի կենտրոնացումը, Ռուսաստանի կողմից ձևակերպված անվտանգության երաշխիքների վերաբերյալ հարցերը մեր բանակցություններում շատ ժամանակ խլեցին։ Ես իմ գնահատականը հայտնեցի անվտանգության իրավիճակի վերաբերյալ, և քննարկեցինք՝ ինչպես ենք մենք և մեր եվրոպացի գործընկերները գնահատում այս իրավիճակը»,- ասել է Շոլցը ՌԴ նախագահ Վլադիմիր Պուտինի հետ բանակցություններից հետո: Շոլցը նշել է, որ իրենք անհանգստացած են, որ ուկրաինական շփման գծում զինվորականներ են կենտրոնացված, դրա համար ակնհայտ պատճառ չկա․ «Ուստի շտապ անհրաժեշտ է դեէսկալացիա: Այս լարված իրավիճակում շատ կարևոր է պատերազմ չսկսել»։

20:08 - 15 փետրվարի, 2022

Մյունխենում էլեկտրագնացքների բախման հետևանքով 1 մարդ է զոհվել, 30-ը՝ վիրավորվել |factor.am|

Մյունխենում էլեկտրագնացքների բախման հետևանքով 1 մարդ է զոհվել, 30-ը՝ վիրավորվել |factor.am|

factor.am: Գերմանիայի Մյունխեն քաղաքի հարավում քաղաքային երկու էլեկտրագնացքների բախման հետևանքով 1 մարդ զոհվել է, մոտ 30-ը՝ վիրավորվել։ Այս մասին հաղորդում է DW-ի ռուսական ծառայությունը՝ հղում անելով Բավարիայի մայրաքաղաքի ոստիկանության թվիթերյան էջին։ Ըստ իրավապահ մարմինների ներկայացուցչի՝ Էբենհաուզեն Շեֆտլարն կայարանի մոտ տեղի ունեցած բախման պատճառը դեռ պարզված չէ։ Երկաթուղային Deutsche Bahn ընկերությունը, որին պատկանում են բախված գնացքները, հայտնել է, որ ճանապարհին օտար առարկաներ են եղել։ Երկաթգծի այն հատվածում, որտեղ տեղի է ունեցել դեպքը, գնացքների երթևեկությունը դադարեցվել է, իսկ ուղևորները տեղափոխվում են ավտոբուսներով։

10:48 - 15 փետրվարի, 2022

Գերմանիան ուսումնասիրում է սպառազինությունների մատակարարման Ուկրաինայի հարցումները. Շոլց |armenpress.am|

Գերմանիան ուսումնասիրում է սպառազինությունների մատակարարման Ուկրաինայի հարցումները. Շոլց |armenpress.am|

armenpress.am: Գերմանիայի կանցլեր Օլաֆ Շոլցը հայտնել է, որ Բեռլինն ուսումնասիրում է Ուկրաինայի առանձին հարցումները զենքի մատակարարման առնչությամբ: Ինչպես տեղեկացնում է «ՌԻԱ Նովոստի»-ն, Գերմանիայի կանցլերն այս մասին ասել է Ուկրաինայի նախագահի հետ հանդիպմանը հաջորդած ճեպազրույցում: Նա ավելացրել է, որ վերլուծությունից հետո կհայտնի իր որոշման մասին: «Դուք գիտեք զենքի արտահանման գերմանական օրենսդրությունը ճգնաժամային շրջանների վերաբերյալ: Ես նշել եմ, որ մենք արդեն մեծ օգնություն ենք ցուցաբերել: Ցանկանում եմ կրկնել՝ Գերմանիան ամենաշատ ֆինանսական օգնությունն է տրամադրում Ուկրաինային, և մենք կշարունակենք դա անել»,-ասել է Շոլցը: Ուկրաինան վերջին շրջանում Գերմանիայից ակնկալում է զենքի մատակարարում: Գերմանիան հրաժարվում է տրամադրել՝ հղում կատարելով այն իրավական կարգավորումներին, որ կառավարությունն օրենքով չի կարող հավանության արժանացնել ճգնաժամային շրջաններին մահաբեր զենքի մատակարարումը:

21:01 - 14 փետրվարի, 2022

Շտայնմայերը վերընտրվել է Գերմանիայի նախագահ |armenpress.am|

Շտայնմայերը վերընտրվել է Գերմանիայի նախագահ |armenpress.am|

armenpress.am: Գերմանիայի Դաշնային ժողովը կիրակի սոցիալ-դեմոկրատ Ֆրանկ-Վալտեր Շտայնմայերին երկրի նախագահ է վերընտրել երկրորդ հնգամյա ժամկետով, հայտարարել է Բունդեսթագի խոսնակ Բերբել Բասը, որը նախագահել է Դաշնային ժողովում: Այդ մասին տեղեկացնում է «ՌԻԱ Նովոստի»-ն: Շտայնմայերի վերընտրությունը սպասելի էր. նրա թեկնածությանն աջակցել են ինչպես իշխող կոալիցիայի կուսակցությունները, այնպես էլ Քրիստոնեա-դեմոկրատական եւ Քրիստոնեա-սոցիալական միությունների ընդդիմադիր դաշինքը: Փոքր կուսակցություններն առաջադրել են իրենց թեկնածուներին, սակայն դրանց ընտրվելու շանսերը լուրջ չեն համարվել։ Շտայնմայերը Գերմանիայի նախագահի պաշտոնը զբաղեցնում է 2017 թվականի մարտի 19-ից, երբ նա փոխարինել է Յոահիմ Գաուկին։

18:34 - 13 փետրվարի, 2022

Կրեմլը հաստատել է «նորմանդական ձեւաչափի» քաղաքական խորհրդականների հանդիպումը |armenpress.am|

Կրեմլը հաստատել է «նորմանդական ձեւաչափի» քաղաքական խորհրդականների հանդիպումը |armenpress.am|

armenpress.am: ՌԴ նախագահի մամուլի քարտուղար Դմիտրի Պեսկովը հաստատել է, որ փետրվարի 10-ին կկայանա «նորմանդական ձեւաչափի» քաղաքական խորհրդականների հանդիպումը. Ռուսաստանի համար բանակցությունների դրական արդյունքները կապված են միայն Մինսկի համաձայնագրերի իրագործման հետ։ «Քաղաքական խորհրդականները շարունակում են իրենց զրույցը: Այո՛, նման հանդիպում կկայանա։ Հեռանկարները կարող են լինել միայն ընդհանուր: Եվ դրական հեռանկարները կարող են կապված լինել բացառապես Մինսկի միջոցառումների համալիրի իրագործման հետ»,- ընդգծել է Պեսկովը: «Նորմանդական քառյակը» Ռուսաստանի, Ուկրաինայի, Գերմանիայի եւ Ֆրանսիայի ղեկավարների խումբն է, որոնք ուղիներ են փնտրում Ուկրաինայի արեւելքում հակամարտության կարգավորման համար, հաղորդել է ՌԻԱ Նովոստին:

14:29 - 09 փետրվարի, 2022

Ֆրանսիան, Գերմանիան եւ Լեհաստանը ՌԴ-ին կոչ են արել՝ երկխոսություն սկսել Եվրոպայի անվտանգության շուրջ |armenpress.am|

Ֆրանսիան, Գերմանիան եւ Լեհաստանը ՌԴ-ին կոչ են արել՝ երկխոսություն սկսել Եվրոպայի անվտանգության շուրջ |armenpress.am|

armenpress.am: Ֆրանսիան, Գերմանիան եւ Լեհաստանը՝ Վեյմարյան եռանկյունու երկրները, հանդես են եկել հայտարարությամբ, որում Ռուսաստանին կոչ են անում՝ երկխոսություն սկսել եվրոպական մայր ցամաքում անվտանգության ապահովման հարցերի շուրջ։ Բեռլինում Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի եւ Լեհաստանի նախագահ Անջեյ Դուդայի բանակցությունների արդյունքներով ընդունված համատեղ փաստաթղթում Ռուսաստանին կոչ են արել՝ «ներդրում ունենալ ուկրաինական սահմանին իրադրության ապաԷսկալացման գործում եւ բովանդակալից երկխոսություն սկսել եվրոպական մայր ցամաքում անվտանգության շուրջ»: Նրանք ընդգծել են, որ պատրաստ են «կոնստուկտիվ կերպով մասնակցել անվտանգության այն հարցերի շուրջ բանակցություններին, որոնք փոխադարձ հետաքրքրություն են ներկայացնում»: Փաստաթղթում ասվում է. «Վեյմարյան եռանկյունու պետությունների ու կառավարությունների ղեկավարներն ընդգծել են իրենց հանձնառությունն անվտանգության եվրոպական ու անդրատլանտյան ճարտարապետության ամրապնդմանն ուղղված համատեղ ջանքերին»: Կողմերը հերթական անգամ հայտարարել են Ուկրաինայի ինքնիշխանությանն ու տարածքային ամբողջականությանն աջակցելու եւ Ռուսաստանի համար «հետեւանքների» մասին՝ ի դեպս իրադրության սրման, պաշտպանել են Նորմանդական ձեւաչափի դերը Մինսկի համաձայնությունների իրականացման գործում: Երեք երկրների ղեկավարները նշել են, որ ՆԱՏՕ-ն պետք է «մշտապես վերանայի պաշտպանության եւ զսպման իր ռազմավարությունը՝ հաշվի առնելով իրական իրադրության եւ «առաջնաթեւում ներկայության ընդլայնման մասին դաշինքի ծրագրի շրջանակներում փոփոխությունները», հաղորդել է «Ինտերֆաքս»-ը:

12:34 - 09 փետրվարի, 2022

ՆԱՏՕ-ի երկրները մեծացնում են ռազմական ներկայությունն Արևելյան Եվրոպայում |hetq.am|

ՆԱՏՕ-ի երկրները մեծացնում են ռազմական ներկայությունն Արևելյան Եվրոպայում |hetq.am|

hetq.am: Գերմանիան Ուկրաինայի շուրջ հակամարտության սրման ֆոնին ևս 350 զինծառայողի և սպայի կգործուղի Լիտվա՝ ՆԱՏՕ-ի անձնակազմի քանակական ավելացման համար։ «Այդպիսով մենք մեծացնում ենք մեր ներդրումն արևելյան ուղղությամբ»,- հայտարարել է Գերմանիայի պաշտպանության նախարար Քրիստին Լամբրեխտը՝ նշելով, որ Բունդեսթագը տեղեկացված է այդ որոշման վերաբերյալ։ Նրա խոսքով՝ Բունդեսվերի Եվրոպայի արևելք ուղարկվող 250 զինծառայողներ ծառայում են ցամաքային զորքերում, իսկ մնացած 100-ը՝ մյուս զորատեսակներում։ Ներկայում Լիտվայում, որը 2004 թվականից անդամակցում է ՆԱՏՕ-ին, տեղակայված է Արևելյան Եվրոպայում ՆԱՏՕ-ի ողջ անձնակազմի մոտ կեսը, որը կազմում է 1200 զինծառայող և սպա։ Փետրվարի 7-ին պաշտոնական Լոնդոնը հայտարարեց, որ ևս 350 զինծառայող և սպա կուղարկվի Լեհաստանի արևելյան սահման, որտեղ արդեն իսկ գտնվում են բրիտանացի 100 զինծառայող։ Մեծ Բրիտանիայի պաշտպանության նախարար Բեն Ուոլեսը հայտարարել է, որ սահմանին բրիտանական զորքերի ներկայության մեծացումը «ուժեղ ազդակ է ուղարկում, որ Մեծ Բրիտանիան ու Լեհաստանը կանգնած են մեջք մեջքի»։ Հունվարի վերջին Մեծ Բրիտանիայի վարչապետ Բորիս Ջոնսոնը հայտարարել էր, որ նախատեսում է կրկնապատկել բրիտանացի զինծառայողների թիվն Արևելյան Եվրոպայում։ Դրանից առաջ Արևելյան Եվրոպա զորքերի ուղարկման մտադրության մասին հայտարարել էր նաև ԱՄՆ նախագահ Ջո Բայդենը։ 2000 ամերիկացի զինծառայողից բաղկացած առաջին խումբը Գերմանիա և Լեհաստան է ժամանել փետրվարի 4-ին։

21:28 - 08 փետրվարի, 2022

Բայդենն ու Շոլցը քննարկել են Ուկրաինայի շուրջ ստեղծված իրավիճակը |1lurer.am|

Բայդենն ու Շոլցը քննարկել են Ուկրաինայի շուրջ ստեղծված իրավիճակը |1lurer.am|

1lurer.am: ԱՄՆ նախագահ Ջո Բայդենը Գերմանիայի կանցլեր Օլաֆ Շոլցի հետ հանդիպմանը իր հավատարմությունն է հայտնել երկու երկրների հարաբերությունների հետագա ամրապնդմանը և նոր կանցլերի հետ համագործակցությանը՝ տրանսատլանտյան գործընկերության խորացման համար: Այդ մասին նշված է Սպիտակ տան հաղորդագրության մեջ: Բայդենն ու Շոլցը քննարկել են Ուկրաինայի շուրջ ստեղված լարվածությունը հաղթահարելուն ուղղված դիվանագիտական ջանքերը: Նրանք վերահաստատել են իրենց աջակցությունը Ուկրաինայի ինքնիշխանությանն ու տարածքային ամբողջականությանը և հավաստել են «Ռուսաստանի կողմից էներգակիրների օգտագործումը որպես զենք թույլ չտալու իրենց հանձնառությունը»: «Ղեկավարներն անդրադարձել են նաև «Մեծ յոթնյակում» Գերմանիայի նախագահությանը, ներառյալ՝ COVID-19- դեմ պայքարի, առողջապահական անվտանգության ամրապնդման, կլիմայական ճգնաժամի հաղթահարման և գլոբալ տնտեսության համապարփակ վերականգնմանն աջակցելու վերաբերյալ ավելի վճռական համատեղ միջոցների ձեռնարկմանը»,- նշվում է հաղորդագրության մեջ: ԱՄՆ նախագահն ու Գերմանիայի կանցլերը պարտավորվել են սերտորեն համագործակցել Չինաստանի հարցում և շարունակել նպաստել Արևմտյան Բալկաններում կայունությանն ու բարգավաճմանը: Փետրվարի 15-ին նախատեսվում է Օլաֆ Շոլցի այցը Մոսկվա և հանդիպումը Ռուսաստանի նախագահ Վլադիմիր Պուտինի հետ:

12:36 - 08 փետրվարի, 2022

Սպիտակ տանը կայացավ ԱՄՆ նախագահի և Գերմանիայի կանցլերի հանդիպումը |azatutyun.am|

Սպիտակ տանը կայացավ ԱՄՆ նախագահի և Գերմանիայի կանցլերի հանդիպումը |azatutyun.am|

azatutyun.am: Միացյալ Նահանգների նախագահ Ջո Բայդենը երեկ Վաշինգտոնում հանդիպել է Գերմանիայի կանցլեր Օլաֆ Շոլցի հետ: Կանցլերի պաշտոնը ստանձնելուց հետո Շոլցն առաջին անգամ է մեկնել Վաշինգտոն: Բանակցությունները վերաբերել են Ուկրաինայի և Ռուսաստանի սահմանին տիրող լարված իրավիճակին, որտեղ տեղակայված է մոտ 100 հազար ռուս զինծառայող։ Շոլցը հավաստիացրել է Բայդենին, որ իր երկիրը կանգնած է ԱՄՆ-ի և ՆԱՏՕ-ի մյուս գործընկերների կողքին՝ Ուկրաինայի դեմ ռուսական ցանկացած ագրեսիայի հակազդելու հարցում։ ԱՄՆ նախագահն, իր հերթին, ասել է, որ երկու երկրներն էլ «զուգահեռ աշխատում են»՝ զսպելու ռուսական ագրեսիան։

10:37 - 08 փետրվարի, 2022