Նիկոլ Փաշինյան

Նիկոլ Վովայի Փաշինյան, ՀՀ գործող վարչապետն է։ ՀՀ Ազգային ժողովի նախկին պատգամավոր, «Քաղաքացիական պայմանագիր» կուսակցության վարչության անդամ։

Ծնվել է 1975 թվականի հունիսի 1-ին՝ Իջեւան քաղաքում։ 1999-2012 թվականներին եղել է քաղաքական ուղղվածության «Հայկական ժամանակ» օրաթերթի գլխավոր խմբագիրը, 2012 թվականի մայիսի 6-ից մինչեւ վարչապետի պաշտոնում ընտրվելը՝ Հայաստանի Հանրապետության Ազգային ժողովի պատգամավոր` ընդդիմադիր «Ելք» խմբակցությունից։ Որպես կուսակցական գործիչ համարվում է «Քաղաքացիական պայմանագիր» կուսակցության, ինչպես նաեւ «Իմպիչմենտ» եւ «Ելք» դաշինքների համահիմնադիր։

2018 թվականին Սերժ Սարգսյանի երրորդ պաշտոնավարման դեմ պայքարող Նիկոլ Փաշինյանը սկսում է «Իմ քայլը» նախաձեռնությունը եւ իր համախոհների հետ միասին Գյումրուց քայլարշավով ուղեւորվում Երեւան։ Գործողությունների արդյունքում ապրիլի 23-ին Սերժ Սարգսյանը հրաժարական է տալիս։

Մայիսի 8-ին Փաշինյանն ընտրվում է Հայաստանի Հանրապետության 16-րդ վարչապետ։ Վարչապետի պաշտոնում Նիկոլ Փաշինյանը վերընտրվում է 2018-ի դեկտեմբերի և 2021-ի հունիսի խորհրդարանական արտահերթ ընտրությունների ժամանակ;

Ոչ թե պետական հեղաշրջման և ներքին բախումների սցենարներ մտմտանք, այլ ժողովրդին տանք այս իրավիճակը հանգուցալուծելու հնարավորություն․ Նիկոլ Փաշինյան

Հեղափոխական էյֆորիայի պայմաններում մեր քաղաքական թիմը պարտվել է Կապանի, Աբովյանի քաղաքապետարանի և մի շարք այլ ՏԻՄ ընտրություններում։ Այս մասին ասաց ՀՀ վարչապետ Նիկոլ Փաշինյանը՝ անդրադառնալով այն պնդումներին, թե եթե իրենք անցկացնեն ընտրությունները, կկեղծեն դրանք։ «Մեզ ասում են մենք ձեզ հետ խոսելու ոչ մի բան չունենք։ Մենք չենք առաջարկում մեզ հետ խոսել, առաջարկում ենք խոսել ժողովրդի հետ։ Այս ընթացքում ընդդիմությունն ունեցել է բոլոր հնարավորությունները վարչապետի հրաժարականի շուրջ ժողովրդական զանգվածների գեներացիա ապահովելու։ Նրանք ունեն լրատվական, ֆինանսական, կազմակերպչական հսկայական ռեսուրսներ, ինչպիսին չունի կառավարությունը, բայց ակնհայտ է, որ այդ պահանջը հրապարակում առնվազն չի արժանացել և չի արժանանալու ժողովրդական աջակցության։ Մենք մեզ համար ասում ենք, որ մեզ համար էլ է կարևոր, որ գնանք կանգնենք ժողովրդի առաջ և մեր ասելիքն ասենք։ Ոչ թե պետք է անընդհատ պետական հեղաշրջման և ներքին բախումների սցենարներ մտմտանք, այլ ժողովրդին տանք այս իրավիճակը հանգուցալուծելու հնարավորություն»,- նշեց նա՝ դարձյալ նշելով Կապանի և Աբովյանի ընտրությունները։ Վարչապետի խոսքով՝ այո, կառավարությանը չեն վստահում, բայց ընդդիմությանն ավելի շատ չեն վստահում, դրա համար է ինքն առաջարկում արտահերթ ընտրությունների գնալ, տեսնել՝ ում և ինչքան են վստահում։ Սգո երթի ժամանակ վարչական լծակներ կիրառելու մասին պնդումների վերաբերյալ Նիկոլ Փաշինյանը խնդրեց ապացույց ներկայացնել՝ պնդելով, որ նման բան չի կարող լինել։ Նա նշեց, որ ընդդիմությունը չի կարողացել իր թեզն ապացուցել, ինչը հանգեցրել է ծանր ճգնաժամի ՀՀ-ում։ «Տեսեք՝ հրապարակում հավաքված ընդդիմության պահանջներին աջակցող ինչքան հայտարարություններ են եղել, ընդ որում, այդ հայտարարություններն արել են էլիտայի ներկայացուցիչներ։ Այս պրոցեսը բացահայտել է էլիտայի ճգնաժամն իրականում։ Այս պրոցեսը ցույց է տվել, որ մինչև 2018-ը գոյություն ունեցած և դեռ գոյություն ունեցող էլիտան, վերնախավը կապ չունի ժողովրդի հետ։ Իմ կարծիքով՝ դա պսևդո էլիտա է, որն ունի կարգավիճակ, բայց չունի հեղինակություն։ Այդքան մարդիկ, ինստիտուտներ հանդես են գալիս վարչապետի հրաժարականի պահանջով, բայց մարդիկ դուրս չեն գալիս իրենց վերնախավի պահանջները պաշտպանելու։ Դա նշանակում է այդ վերնախավի, պսևդո վերնախավի նկատմամբ անվստահություն։ Ինչ-որ մեկը հայտարարություն է անում, ասում են՝ սրանք կաշառքով գնահատական դնողներն են, սրանք գրագողությամբ թեկնածուական, դոկտորական են պահանջել, իրենք են։ Բանակի նախկին պաշտոնյանե՞րն են արձագանքում՝ հա, սրանք այն մարդիկ են, որ զինվորի հացը գողացել են և իրենց համար դղյակներ և բարեկեցություն են կառուցել։ ԱԱԾ նախկին բարձրաստիճան պաշտոնյանե՞րն են հայտարարություն տարածում, սրանք այն մարդիկ են, որ 25 տարի մարդկանց գլխին գործ են սարքել, ես մարդկանց խոսքն եմ փոխանցում»,- նշեց վարչապետը։ Վարչապետն անդրադարձավ Սերժ Սարգսյանի և Բելառուսի նախագահ Ալեքսանդր Լուկաշենկոյի խոսակցության ձայնագրությանը՝ ասելով, որ ընդդիմության՝ այդ ձայնագրությունով պայմանավորված քարոզչությունը մի քաղաքացի «ջախջախել է» մի նախադասությամբ, թե «վեց միլիարդ կար, բանակի վրա ծախսեիք» (ձայնագրությունում Սերժ Սարգսյանն ասում է, որ Ադրբեջանին կարող է տալ 6 միլիարդ դոլար Արցախից հրաժարվելու համար - խմբ․)։ «Ես չեմ ասում՝ ես մեղավոր չեմ, ես ասում եմ՝ ես թիվ մեկ մեղավորը չեմ։ Ասում են՝ հեղափոխությունից հետո եկած իշխանությունը Արցախի հարցի բանակցային գործընթացում ունեցել է անհաջողություններ։ Ասում եմ՝ 2018-ից առաջ բանակցություններ արվել են ժամանակ ձգելու համար։ Հիմա հարց․ ժամանակ ինչքան կարելի է ձգել։ Դիվանագիտական հաջողությունն այն է, որ ժամանակ է ձգվե՞լ։ ժամանակ չի ձգվել, ոչ մեկը թող հույս չունենա, թե ինքն էնքան խելոք է եղել, որ ժամանակ է ձգել։ Ադրբեջանը պարզապես պատրաստ չի եղել պատերազմի, և այն ընթացքում, որ այստեղ դղյակներ էին կառուցվում, այնտեղ զենք-զինամթերք էր ձեռք բերվում ոչ թե ութսունականների, այլ ժամանակակից։ Պետք էր փորձել բանակցային գործընթացում շատ թե քիչ տանելի դիրքեր ունենալ, որովհետև գործընթացը մենք ժառագել ենք այն կետում, որ յոթ շրջանները պետք է անվերապահորեն վերադարձվեն, և դա ընդունել է Հայաստանը պաշտոնապես, հրապարակային, և ԼՂ կարգավիճակի հարցը դրվել է մի կետում, երբ ասում են, որ ԼՂ-ն Ադրբեջանի կազմից դուրս կարգավիճակ կարող է ունենալ, եթե դրան համաձայնի Ադրբեջանը»,- ասաց Նիկոլ Փաշինյանը։ Նա նշեց, որ իրենք կարող էին պատերազմը կանխել մոտավորապես նույն արդյունքներով՝ ներառյալ Շուշին՝ ընդգծելով, որ Շուշիի վերաբերյալ բանավեճը իր համար հասկանալի չէ։ «Ողջ բանակցային գործընթացում առանցքային դրույթներից մեկը եղել է փախստականների վերադարձը ԼՂ։ Սա նշանակում է, որ ԼՂ համար կանխորոշվել է Նախիջևանի ճակատագիր։ Այսինքն՝ երբ ասվում է՝ համաձայնեք, որ փախստականները վերադառնան Շուշի՝ 95 և ավել տոկոս ադրբեջանական բնակչությամբ։ Խնդիրը հետևյալն է, մենք պիտի՞ փորձեինք դիմադրել և դիմակայել, որ մեր շահերը մի քիչ ավելի լավ պաշտպանվեին, իմ կարծիքով՝ այո, ունեի՞նք հնարավորություն այդ շահերը պաշտպանելու, այո, ունեինք, որովհետև հիմա ընդդիմախոսներն էլ են ասում, որ պատերազմը հաղթելու հնարավորություն կար, հաղթելու մասին չէ խոսքը, առնվազն մեզ համար շատ թե քիչ տանելի պայմաններով պատերազմն ավարտելու մասին։ Իսկ ինչ կապ ունեն դրվագները, որ մտնում են խրամատներ, ասում են՝ Նիկոլը ծախել է հողերը, կամ ինչ կապ ունի այս ամենի հետ, երբ բարձրաստիճան ինչ-որ պաշտոնյա, ըստ վկայությունների, Հադրութի փողոցից փողոցային լամպերն է հանում, տանում Երևան»,- պատմեց վարչապետը։ Դառնալով ընտրությունների թեմային՝ վարչապետը դարձյալ ասաց, որ իրենք «Իմ քայլը» դաշինքի հետ կարող էին կազմակերպել դրանք, բայց ինքը ցանկանում է քննարկումներ ունենալ, որովհետև եթե, օրինակ, ընտրական օրենսգրքի մասին ինքն ունի պատկերացումներ, ուզում է լսել նաև այլ կարծիքներ դրա վերաբերյալ։ «Դատական համակարգը իմ ասած պսևդո էլիտայի մասն է դարձել։ Եկեք, օրինակ, որոշենք, որ դատական համակարգի հարցը լուծում ենք, նոր ենք գնում ընտրությունների։ Սա առաջարկ է, պարտադրանք չէ»,- հավելեց վարչապետը։ Նա ժամկետներ չնշեց ընտրությունների համար, բայց ընդգծեց, որ պետական հեղաշրջման սցենարները պետք է բացառվեն։

00:07 - 28 դեկտեմբերի, 2020

Նախընտրական քարոզարշավը հնարավորություն է, որ բոլորը կանգնեն ժողովրդի առաջ, մեղադրանքները բարձրաձայնեն, ապացույցները ներկայացնեն․ Նիկոլ Փաշինյան

Արտահերթ ընտրությունների մասին ես մի քանի անգամ խոսել եմ, այդ թվում՝ ԱԺ ամբիոնից, խոսել եմ հարցադրման ձևով՝ իսկ ինչո՞ւ այն ուժերը, որ պահանջում են վարչապետի հրաժարականը, չեն պահանջում ԱԺ արտահերթ ընտրություններ, որովհետև իշխանության ճակատագիրը պետք է որոշի ժողովուրդը, և ժողովրդի կամարտահայտությունը ի ցույց դնելու ձևերից մեկը խորհրդարանական ընտրություններն են, այն պարագայում, երբ հրապարակում ժողովրդի կամարտահայտություն հնարավոր չի լինում ի ցույց դնել այն պայմաններում, երբ ընդդիմությունը վայելում է հսկայական ֆինանսական, լրատվական, կազմակերպչական ռեսուրսների։ Այս մասին Հանրային ՀԸ-ին տված հարցազրույցում ասաց ՀՀ վարչապետ Նիկոլ Փաշինյանը՝ պատասխանելով հարցին, թե արդյո՞ք պլաններ են փոխվել վարչապետի հրապարակած ճանապարհային քարտեզում, քանի որ վերջինս խոսել է արտահերթ ընտրությունների մասին։ Նա նշեց, ոչ իր առաջարկի մեջ կոնկրետ ժամկետներ չկան, մյուս կողմից էլ կարող է հույս ունենալ, որ ճանապարհային քարտեզում նշված հարցերի առաջին շերտը առնվազն կարող է ավելի արագ լուծվել, քան ի սկզբանե նախանշվել է։ Հարցին, թե այդ դեպքում ինչ կոնսուլտացիաների մասին է խոսքը, վարչապետը պատասխանեց․ «Առաջին հերթին խորհրդարանական ուժերի հետ խորհրդակցությունների մասին է, քանի որ այսօրվա մեր օրենսդրությամբ խորհրդարանական արտահերթ ընտրություններ անցկացնելու միայն մի մեխանիզմ կա․ վարչապետը հրաժարական է տալիս, ԱԺ-ն երկու անգամ վարչապետ չի ընտրում, և նշանակվում են խորհրդարանական արտահերթ ընտրություններ, և սրա համար պետք է համաձայնություն ձեռք բերել խորհրդարանական ուժերի հետ։ Կամ կա այլ տարբերակ, որ մենք փոփոխություններ ենք իրականացնում Սահմանադրության մեջ, և խորհրդարանը ստանում է ինքնալուծարման և խորհրդարանական արտահերթ ընտրություններ նշանակելու լիազորություն։ Ինչու եմ խորհրդակցությունների հրավեր անում, քանի որ կարևոր է, որ որոշումը լինի ոչ թե կառավարության կամ խորհրդարանական մեծամասնության միանձնյա որոշմամբ, այլ դրա շուրջ որոշակի ըմբռնում ձեռք բերվի»,- նշեց նա։ Ընդդիմության այն պնդումներին, որ քանի դեռ Նիկոլ Փաշինյանը վարչապետ է և հավակնում է մնալ մինչ ընտրությունները, երկրում անկայունություն է լինելու, վարչապետն արձագանքեց, որ կան մարդիկ, որ պահանջում են, որ ինքը հրաժարական տա, կան մարդիկ, որ պահանջում են, որ հրաժարական չտա։ «Հարցը հետևյալն է․ ինչու ենք մենք ելնում այն կանխավարկածից, որ այդ մարդկանցից մի մասի ձայնը պետք է լսվի, մյուսինը չլսվի։ Ես առաջարկում եմ մեխանիզմ, որով լսվի բոլորի ձայնը, և դրանց հարաբերակցությունը լինի կշռելի և չափելի։ Սա հանրային համերաշխություն ձևավորելու մեխանիզմ է։ Բանավեճը հետևյալի մեջ է՝ ով պետք է որոշի իշխանության ճակատագիրը։ Իշխանության ճակատագիրը պետք է որոշի ժողովուրդը»,- ասաց Փաշինյանը։ Խոսելով պարտության մասին՝ նա պատմեց, որ երկու օր առաջ, երբ հանդիպել է զորացրված քաղաքացիների հետ, նրանք պատմել են մի դրվագ, թե ինչպես ջոկատը գնացել և փորձել է սպառված զենք-զինամթերքը համալրել, տալով կոնկրետ անձի անուն՝ ասել են, որ վերջինս հրաժարվել է իրենց զենք տալ, իսկ իրենք ստիպված են եղել կոտրել պահեստի դռները և տեսել են, որ այն ամբողջությամբ լիքն է անհրաժեշտ զենք-զինամթերքով։ Վարչապետի խոսքով՝ եթե սա հաստատվի, պարտության պատճառների դրվագներից մեկը կլինի։ «Երբեք չեմ խուսափի պատասխանատվությունից, բայց մյուս կողմից, նույնքան կարևոր եմ համարում, որ այս պատերազմի մասին ամբողջ ճշմարտությունը հայտնի դառնա։ Ես հիմա չեմ կարող դատավճիռ կայացնել․ հնարավոր է՝ իրականությունը մի փոքր այլ է եղել։ Ի վերջո, կան տասնյակ վկայություններ այն մասին, թե ինչպես մարդիկ, այդ թվում բարձրաստիճան դեռևս հայկական վերահսկողության ներքո գտնվող բնակավայրերից ընդհուպ հանել են փողոցի լուսավորությունը՝ նշելով, որ դա պետք է իրենց հետ տանել։ Կարող է` սուտ են ասում, բայց այս ամենը պետք է պարզաբանվի։ Եվ կան այդպիսի մարդիկ էլ, որ կապ ունեն ընդդիմության հետ»,- ընդգծեց նա։ Դարձյալ անդրադառնալով ընտրություններին՝ Փաշինյանն ասաց, որ նախընտրական քարոզարշավը հնարավորություն է, որ բոլորը կանգնեն ժողովրդի առաջ, մեղադրանքները բարձրաձայնեն, ապացույցները ներկայացնեն, և մարդիկ էլ կատարեն իշխանության տնօրինողի իրենց դերը։

22:07 - 27 դեկտեմբերի, 2020