Շառլ Միշել

Շառլ Միշելն ու նրա գործընկերները պետք է մտածեին ԼՂ-ի հայերի ճակատագրի մասին. Պուտին |armeniasputnik.am|

armeniasputnik.am: ԵՄ առաջնորդները պետք է մտածեին Լեռնային Ղարաբաղի ժողովրդի ճակատագրի մասին, երբ համոզում էին ՀՀ վարչապետին Ղարաբաղն Ադրբեջանի մաս ճանաչել։ Այս մասին «Վալդայ» միջազգային ակումբի նիստի ժամանակ ասել է ՌԴ նախագահ Վլադիմիր Պուտինը։ «Պարոն Միշելն ու նրա գործընկերները պետք է այն ժամանակ մտածեին, երբ համոզում էին պարոն Փաշինյանին... Հավանաբար, չգիտեմ, պետք է նրանց հարցնել... Ետնաբեմում համոզում էին ՀՀ վարչապետին նման քայլի գնալ, պետք է մտածեին Ղարաբաղի հայերի ճակատագրի մասին, պետք է գրեին, ինչ է նրանց սպասում այս իրավիճակում», - նշել է նա։ Նա կարծում է, որ պետք է ինտեգրման ինչ-որ կարգ սահմանեին, նրանց անվտանգության ապահովման և իրավունքների պահպանման հետ կապված որևէ կարգ։ Բայց Պրահայի հռչակագրում նման բան չկա, կա միայն հայտարարություն այն մասին, որ Ղարաբաղն Ադրբեջանի մաս է։ ՌԴ նախագահը հավելել է նաև, որ ԼՂ-ում տեղի ունեցող վերջին իրադարձությունները, ինչպես նաև Լաչինի միջանցքի փակումը, անխուսափելի էին Ադրբեջանի կազմում Ղարաբաղը Հայաստանի կողմից ճանաչելուց հետո։ Նա նշել է, որ դա զուտ ժամանակի հարց էր, թե երբ և ինչպես Ադրբեջանն «այնտեղ սահմանադրական կարգ կսկսեր հաստատել»։

20:03 - 05 հոկտեմբերի, 2023

Գրանադայի քառակողմ հանդիպման արդյունքում հայտարարություն ընդունվեց |azatutyun.am|

azatutyun.am: Հայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը, Ֆրանսիայի նախագահ Էմանյուել Մակրոնը և Գերմանիայի կանցլեր Օլաֆ Շոլցը այսօր Գրանադայում կայացած հանդիպման արդյունքում հայտարարություն են ընդունել։ Հայտարարությունում Եվրոպական խորհրդի նախագահը, Ֆրանսիայի նախագահը և Գերմանիայի կանցլերն ընդգծում են «իրենց անսասան աջակցությունը Հայաստանի անկախությանը, ինքնիշխանությանը, տարածքային ամբողջականությանը և սահմանների անձեռնմխելիությանը»։ «Նրանք նաև իրենց աջակցությունը հայտնեցին ԵՄ-Հայաստան հարաբերությունների ամրապնդմանը՝ իր բոլոր չափումներով՝ հիմնված Հայաստանի Հանրապետության կարիքների վրա», - ասված է հայտարարությունում։ «Նրանք համաձայնեցին Հայաստանին հավելյալ մարդասիրական օգնություն տրամադրելու անհրաժեշտության շուրջ, քանի որ այն բախվում է Ղարաբաղի հայերի վերջին զանգվածային տեղահանման հետևանքներին։ Նրանք ընդգծեցին, որ այդ փախստականները պետք է ազատորեն օգտվեն իրենց տներ և իրենց բնակության վայրեր վերադառնալու իրավունքից՝ առանց որևէ պայմանների, միջազգային մոնիտորինգի ներքո և հարգելով իրենց պատմությունը, մշակույթը և մարդու իրավունքները», - նշված է քառակողմ հայտարարությունում։ «Նրանք հավատարիմ են մնում Հայաստանի և Ադրբեջանի միջև հարաբերությունների կարգավորմանն ուղղված բոլոր ջանքերին՝ հիմնված Հայաստանի (29 հազար 800 քկմ) և Ադրբեջանի (86 հազար 600 քկմ) ինքնիշխանության, սահմանների անձեռնմխելիության և տարածքային ամբողջականության փոխադարձ ճանաչման վրա, ինչպես նշված է նախագահ Միշելի հայտարարությունում։ 2023 թվականի մայիսի 14-ին և հուլիսի 15-ին նրանք կոչ են արել խստորեն պահպանել ուժի չկիրառման և ուժի կիրառման սպառնալիքի սկզբունքը։ Նրանք ընդգծել են սահմանազատման ուղղությամբ աշխատելու հրատապ անհրաժեշտությունը՝ հիմնվելով ԽՍՀՄ Գլխավոր շտաբի ամենավերջին քարտեզների վրա, որոնք տրամադրվել են կողմերին և պետք է հիմք հանդիսանան նաև ուժերի միջև հեռավորություն պահպանելու, խաղաղության պայմանագիրը վերջնական տեսքի բերելու և հումանիտար բոլոր խնդիրների լուծման համար», - ասված է հայտարարությունում։ «Նրանք կոչ արեցին ավելի մեծ տարածաշրջանային համագործակցության և բոլոր սահմանների, այդ թվում՝ Հայաստանի և Թուրքիայի միջև սահմանների բացման, ինչպես նաև տարածաշրջանային կապերի բացման՝ երկրների ինքնիշխանության և իրավասության լիակատար հարգման, ինչպես նաև հավասարության և փոխադարձության սկզբունքների հիման վրա», - նշված է հայտարարությունում։ «Եվրոպացի առաջնորդները կոչ արեցին Հայաստանին և Ադրբեջանին ազատ արձակել բոլոր ձերբակալվածներին և համագործակցել անհետ կորածների ճակատագրին լուծում տալու և ականազերծման աշխատանքները հեշտացնելու համար», - ասված է քառակողմ փաստաթղթում։

19:35 - 05 հոկտեմբերի, 2023

Գրանադայում քառակողմ հանդիպում՝ Ֆրանսիայի նախագահի, Գերմանիայի կանցլերի և ԵԽ նախագահի հետ. Փաշինյան

Գրանադայում քառակողմ հանդիպում՝ Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի և Եվրոպական խորհրդի նախագահ Շառլ Միշելի հետ: Այս մասին Ֆեյսբուքում գրառում է կատարել ՀՀ վարչապետ Նիկոլ Փաշինյանը՝ հրապարակելով տեսանյութ:

18:42 - 05 հոկտեմբերի, 2023

ԵՄ-ն կոչ է արել Հայաստանին եւ Ադրբեջանին ճանաչել միմյանց տարածքային ամբողջականությունը |news.am|

news.am: Եվրոպական խորհրդի նախագահ Շառլ Միշելը հայտնել է, որ Ադրբեջանի նախագահ Իլհամ Ալիեւի հետ վերջերս ունեցած զրույցի ընթացքում նշել է, որ նա «չի կարող տարածքային հավակնություններ ունենալ Հայաստանի նկատմամբ», եւ պահանջել է երաշխավորել տարածքային ամբողջականության Բաքվի եւ Երեւանի փոխադարձ ընդունումը։ Սա պետք է բարձրաձայն ասվի, եւ պետք է երաշխավորել, որ կա [Հայաստանի եւ Ադրբեջանի] տարածքային ամբողջականության փոխադարձ ճանաչում»,- ասել է նա Գրանադա (Իսպանիա) ժամանելով, որտեղ մասնակցելու է Եվրոպական քաղաքական ընկերակցության գագաթաժողովին։ «Ես մտադիր չեմ մեկնաբանել Ալիեւի Գրանադա չգալու որոշումը այստեղ, մարդկանց մեջ, ես ամեն ինչ կասեմ նրան անձամբ, թե ինչ եմ մտածում այդ մասին»,- ավելացրել է Միշելը։ ԵՄ միջնորդությունը Հայաստանի եւ Ադրբեջանի միջեւ ուղղված է այս տարածաշրջանում Եվրամիության շահերի պաշտպանությանը»,- նշել է Միշելը։ Մենք դեռ չենք սկսել այդ միջնորդությունը, մենք առանձնապես ակտիվ չենք եղել Կովկասում։ Եվրամիության այդ միջնորդական ջանքերը նշանակում են, որ մենք պաշտպանում ենք մեր շահերը, մենք առաջ ենք տանում մեր արժեքներն այդ տարածաշրջանում»,- ասել է Միշելը։ Պատասխանելով թուրք լրագրողների այն հարցին, թե «ինչու է ԵՄ-ն լռել 30 տարի եւ հիմա նոր է սկսել խոսել Հայաստանի անունից, եւ կարող է արդյոք նա դրանից հետո անվանվել անաչառ միջնորդ», Միշելը նշել է. «Իհարկե կարող է, քանի որ մենք գաղտնի օրակարգ չունենք, մենք պարզապես ցանկանում ենք կայունություն, բարգավաճում բոլորի համար»։ Նա ավելացրել է, որ ԵՄ-ն մտադիր է հումանիտար օգնություն տրամադրել Հայաստանին Արցախից փախստականներին աջակցելու համար։ «Մենք նաեւ ողջունում ենք Հայաստանի մտադրությունը՝ ամրապնդել կապերը Եվրամիության հետ»,- ընդգծել է Եվրոպական խորհրդի ղեկավարը։ «Մենք Հայաստանին չորս տարի առաջ խոստացել ենք 2 մլրդ եվրոյի ներդրումային փաթեթ, եւ [հիմա] մենք պետք է կատարենք մեր խոստումը, մենք չպետք է հետաձգենք այն»,- ասել է նա։

16:10 - 05 հոկտեմբերի, 2023

Ռուսաստանը դավաճանել է հայ ժողովրդին․ ռազմական գործողությունը սկսվել է՝ ՌԴ-ի կողմից առանց որևէ արձագանքի․ Շառլ Միշելը՝ Արցախում ստեղծված իրողությունների մասին |factor.am|

factor.am: ԵՄ Խորհրդի նախագահը կարծում է, որ Ռուսաստանը դավաճանել է էթնիկ հայերի։ Euronews-ին տված հարցազրույցում Շառլ Միշելն ասել է, թե դաս պետք է քաղել Ադրբեջանի հետ հակամարտությունից, որը ռազմական գործողության ընթացքում Լեռնային Ղարաբաղը վերադարձրեց իր վերահսկողությանը։ «Իրավիճակը պարզ է, ոչ ոք չի կարող դա չտեսնել, որ Ռուսաստանը դավաճանել է հայ բնակչությանը։ Ռուսաստանը ցանկություն է հայտնել, որ իր զինվորները ներկա գտնվեն այնտեղ ու երաշխավորեն կայունության և անվտանգության վերաբերյալ համաձայնագրերի իրականացումը։ Մենք տեսնում ենք, որ այս ռազմական գործողությունը սկսվել է՝ ՌԴ-ի կողմից առանց որևէ արձագանքի, որը եղել է իրադարձությունների վայրում՝ ի տարբերություն ԵՄ-ի, որն այնտեղ ռազմական ներկայություն չունի»,- ասել է Շառլ Միշելը։ Նա նշել է, որ մտադիր է միջնորդություն առաջարկել Հայաստանի և Ադրբեջանի միջև այս շաբաթվա վերջին Իսպանիայի Գրանադա քաղաքում կայանալիք ԵՄ գագաթնաժողովի ժամանակ։ Լրագրողի հարցին, թե հունվարի 1-ից Լեռնային Ղարաբաղի Հանրապետությունը կդադարի գոյություն ունենալ, և ինչպե՞ս է հնարավոր այս պայմաններում վստահություն ձևավորել, Միշելը պատասխանել է․ «Կարծում եմ, որ Ադրբեջանի վրա մեծ պատասխանատվություն է դրվել այն պահից, երբ նա սկսել է ռազմական գործողությունը։ Այժմ Ադրբեջանը պետք է բարի կամք դրսևորի և միջազգային հանրությանը ներգրավի իրավիճակի մշտադիտարկմանը, որպեսզի պաշտպանվեն Ադրբեջանում ապրող ողջ բնակչության, այդ թվում՝ հայ բնակչության իրավունքներն ու անվտանգությունը»։ Եվրոպացի պաշտոնյան հավելել է, որ Բրյուսելի և Բաքվի հարաբերությունները մնում են բարդ, բայց խոստումնալից: Անցյալ տարի Եվրամիությունը շատ բան արեց Ադրբեջանից ավելի շատ բնական գազ ստանալու համար։ Շարունակությունը՝ սկզբնաղբյուր կայքում

14:25 - 03 հոկտեմբերի, 2023

Բրյուսելում տեղի է ունեցել Արմեն Գրիգորյանի և Հիքմեթ Հաջիևի հանդիպումը, որին մասնակցել է նաև Շառլ Միշելը

Նախագահ Միշելի, նրա դիվանագիտական խորհրդականներ հովանու ներքո տեղի է ունեցել Հայաստանի անվտանգության խորհրդի քարտուղար Արմեն Գրիգորյանի և Ադրբեջանի նախագահի արտաքին քաղաքականության հարցերով խորհրդական Հիքմեթ Հաջիևի հանդիպումը՝ Ֆրանսիայի նախագահ Մակրոնի և Գերմանիայի կանցլեր Շոլցի դիվանագիտական խորհրդականների մասնակցությամբ, Ինչպես նաև Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի մասնակցությամբ: Այս մասին հայտարարություն է տարածել ԵՄ նախագահ Շառլ Միշելի խոսնակը։ «Նախագահ Միշելը միացավ մասնակիցներին՝ մտքերի կարճ փոխանակման համար: ԵՄ-ն մասնակիցներին հրավիրել է մտքեր փոխանակելու տեղում առկա իրավիճակի և տեղի բնակչության անհետաձգելի կարիքների բավարարմանն ուղղված տարբեր ջանքերի շուրջ։ Եվրամիությունը ուշադիր հետևում է այս բոլոր իրադարձություններին և ամենաբարձր մակարդակով մասնակցում է քաղաքացիական բնակչության համար ռազմական գործողությունների հետևանքների մեղմմանն ուղղված աջակցությանը: ԵՄ-ն այս համատեքստում վերահաստատել է անցած շաբաթ Ադրբեջանի ռազմական գործողության վերաբերյալ իր դիրքորոշումը: Հիքմեթ Հաջիևը խոսել է Ադրբեջանի կողմից տեղի բնակչությանը մարդասիրական օգնության անվտանգության ապահովման ծրագրերի մասին: ԵՄ-ն ընդգծել է միջազգային մարդասիրական կազմակերպությունների և իրավապաշտպանների համար թափանցիկության և հասանելիության, ինչպես նաև Ադրբեջանում Ղարաբաղի հայերի ապագայի վերաբերյալ Բաքվի տեսլականի մասին ավելի մանրամասն տեղեկատվություն ստանալու անհրաժեշտությունը: ԵՄ-ն օգնություն է ցուցաբերում ղարաբաղահայությանը։ Հանդիպումը նաև հնարավորություն տվեց մասնակիցների միջև կարծիքների ինտենսիվ փոխանակում իրականացնել երրորդ Եվրոպական քաղաքական համայնքի գագաթնաժողովի շրջանակներում առաջնորդների հնարավոր հանդիպման արդիականության վերաբերյալ, որը նախատեսված է 2023 թվականի հոկտեմբերի 5-ին Գրանադայում: Մասնակիցներն ի գիտություն ընդունեցին Հայաստանի և Ադրբեջանի ընդհանուր շահագրգռվածությունը՝ օգտագործելու Գրանադայի հնարավոր հանդիպումը՝ շարունակելու իրենց ջանքերը հարաբերությունների կարգավորման ուղղությամբ: Այս կապակցությամբ Արմեն Գրիգորյանը և Հիքմեթ Հաջիևը բանակցություններ են վարել առաջիկա հնարավոր հանդիպմանը հայ-ադրբեջանական խաղաղ գործընթացի առաջմղման հնարավոր կոնկրետ քայլերի շուրջ, ինչպիսիք են սահմանների դելիմիտացիան, անվտանգությունը, կապը, հումանիտար հարցերը և խաղաղության ավելի լայն պայմանագիրը: Անհրաժեշտ են կոնկրետ գործողություններ և վճռական փոխզիջումային լուծումներ կարգավորման գործընթացի բոլոր ուղղություններով։ ԵՄ-ն կարծում է, որ Գրանադայում հնարավոր հանդիպումը պետք է օգտագործվի ինչպես Երեւանի, այնպես էլ Բաքվի կողմից տարածքային ամբողջականությանը և միմյանց ինքնիշխանությանը իրենց հանձնառությունը հրապարակայնորեն հաստատելու համար՝ ավելի վաղ Պրահայում և Բրյուսելում ձեռք բերված պայմանավորվածությունների համաձայն»։

18:30 - 26 սեպտեմբերի, 2023

Բաքուն հրաժարվում է միջազգային միջնորդությունից․ մանրամասներ Միշել-Ալիև հեռախոսազրույցից |aztutyun.am|

azatutyun.am: «Ազատություն» ռադիոկայանին մանրամասներ են հայտնի դարձել Եվրոպական Խորհրդի նախագահ Շառլ Միշելի և Ադրբեջանի նախագահ Իլհամ Ալիևի երեկվա հեռախոսազրույցից։ Եվրոպացի բարձրաստիճան պաշտոնյաները փոխանցում են, թե Միշելը խիստ հիասթափություն է հայտնել Ղարաբաղում ուժի կիրառման կապակցությամբ և վերստին ընդգծել «հրադադարի պահպանման և ԼՂ հայերի իրավունքների և անվտանգության համար անհապաղ վստահելի երաշխիքներ տրամադրելու անհրաժեշտությունը»։ «Այն միջոցները, որ ձեռնարկել է Բաքուն, ուղղակի անընդունելի են։ Միջազգային մակարդակում, այդ թվում՝ Եվրամիությունում բացասական արձագանք կա», - փոխանցել է Միշելը Ալիևին, ընդգծելով, որ Բրյուսելում երեկ առավոտյան քննարկումներ են եղել Ադրբեջանի դեմ հնարավոր քայլեր ձեռնարկելու վերաբերյալ։ Մինչ այս պահը, սակայն, որևէ երկիր կամ կազմակերպություն չի հայտարարել Ադրբեջանի նկատմամբ պատժամիջոցներ կամ սահմանափակումներ կիրառելու մասին։ «Այժմ կարևոր է կենտրոնանալ մարդասիրական վիճակի վրա․ Ադրբեջանը պետք է երաշխավորի, որ հայերը հարգվեն և Ադրբեջանում ապագա ունենան», - ըստ «Ազատության» աղբյուրի, ասել է Միշելը, նշելով, որ անվտանգությունն ապահովելու հարցում պետք է դեր ունենա նաև միջազգային համայնքը։ Ադրբեջանի նախագահը մինչդեռ պնդել է, թե Ղարաբաղի դեմ գործողությունն արդարացված էր, «սա Ադրբեջանի ներքին գործն է», և միջազգային միջնորդության կարիք ինքը չի տեսնում։ «Բաքուն այժմ կենտրոնացած է վերաինտեգրման վրա»,- ասել է Ալիևը, հավելելով, թե Ադրբեջանը հրաժարվում է միջազգային միջնորդությունից: Կողմերը անդրադարձել են նաև Հայաստանի ու Ադրբեջանի միջև հարաբերությունների կարգավորմանը։ Ինչպես փոխանցում է Եվրամիության բարձրաստիճան պաշտոնյան, Եվրոպական խորհրդի ղեկավարն ընդգծել է, որ Հայաստանի դեմ ուժի ցանկացած գործադրում անընդունելի է, և ընդգծել՝ անհրաժեշտ է, որ Ադրբեջանը վերահաստատի հարգանքը Հայաստանի տարածքային ամբողջականության նկատմամբ։ Ալիևը վստահեցրել է, թե Բաքուն հավատարիմ է նախկինում ձեռք բերված պայմանավորվածությանը և տարածքային նկրտում չունի Հայաստանի հանդեպ։ Միաժամանակ, Ադրբեջանի նախագահը մեղադրել է պաշտոնական Երևանին՝ դելիմիտացիայի գործընթացը ձգձգելու մեջ: Շարունակությունը՝ սկզբնաղբյուր կայքում։

17:00 - 21 սեպտեմբերի, 2023

Ադրբեջանի ռազմական գործողությունները պետք է անհապաղ դադարեցվեն․ Շառլ Միշել

Եվրոպայի խորհրդի խորհրդարանական վեհաժողովի նախագահ Շառլ Միշելը գրառում է արել Թվիթերի իր միկրոբլոգում՝ անդրադառնալով Արցախի ուղղությամբ Ադրբեջանի այսօրվա հարձակմանը․ «Այսօր սարսափելի լուրեր են գալիս նախկին Լեռնային Ղարաբաղի տարածաշրջանից: Ադրբեջանի ռազմական գործողությունները պետք է անհապաղ դադարեցվեն՝ Բաքվի և Ղարաբաղի հայերի միջև երկխոսություն սկսելու համար»,- նշել է նա։ Հիշեցնենք՝ Ադրբեջանն այսօր կեսօրից լայնածավալ ռազմական գործողություններ է սկսել Արցախի հետ շփման գծի ողջ երկայնքով՝ կիրառելով հրթիռահրետանային միջոցներ, գերճշգրիտ զենքեր, ԱԹՍ-ներ։ Հակառակորդը փորձում է առաջանալ ՊԲ պաշտպանության խորքը, ՊԲ-ն հաղորդում է, որ յուրային զորքերը ցուցաբերում են համառ դիմադրություն։ Ադրբեջանը թիրախավորում է նաև քաղաքացիական բնակավայրերը, այդ թվում՝ Ստեփանակերտը, Ասկերանը, Մարտակերտը, Մարտունին։ Ստեփանակերտից եկող հաստատված լուրերի համաձայն՝ վիրավորներ են տեղափոխվում բժշկական կենտրոններ, այդ թվում՝ երեխաներ։

16:04 - 19 սեպտեմբերի, 2023

ԵՄ-ն ընդգծում է Ալիևի վարչակազմի և Ստեփանակերտի միջև բանակցությունների մեկնարկի կարևորությունը |azatutyun.am|

azatutyun.am: Եվրամիության խորհրդի նախագահ Շառլ Միշելը ողջունել է Լաչինի միջանցքով և Աղդամի ճանապարհով բեռների մատակարարումները Լեռնային Ղարաբաղի բնակչությանը և կոչ արել կարգավորել այդ գործընթացը։ Եվրամիության պաշտոնյան նաև կարևորել է Բաքու-Ստեփանակերտ բանակցությունների մեկնարկը։ «Նաև կարևոր է բանակցություններ սկսել Բաքվի և Ղարաբաղի հայերի միջև՝ իրավունքների և անվտանգության հարցով, Եվրամիությունը պատրաստ է աջակցել»,- X-ում գրել է Միշելը։ Այսօր Կարմիր Խաչի բեռնատարները միաժամանակ մուտք են գործել Լեռնային Ղարաբաղ Լաչինի և Աղդամի ճանապարհներով։ Ըստ Արցախի տեղեկատվական շտաբի՝ Լաչինի միջանցքով Ստեփանակերտ է տեղափոխվել մոտ 23 տոննա հայկական արտադրության ալյուր, իսկ Աղդամով՝ ռուսական, շվեյցարական արտադրության բժշկական և հիգիենայի պարագաներ։ Շտաբի փոխանցմամբ, մի քանի օր հետո կրկին նույն ուղղություններով Ռուսաստանի Ռոստով քաղաքից բեռների տեղափոխում է նախատեսվում ԿԽՄԿ-ի մեքենաներով:

16:58 - 18 սեպտեմբերի, 2023

Գուտերեշը Միշելի և Բորելի հետ քննարկել է պարենային անվտանգությունը |armenpress.am|

armenpress.am: ՄԱԿ-ի գլխավոր քարտուղար Անտոնիո Գուտերեշը Նյու Յորք ժամանած Եվրոպական խորհրդի նախագահ Շառլ Միշելի և ԵՄ արտաքին քաղաքականության հարցերով բարձր ներկայացուցիչ Ժոզեպ Բորելի հետ քննարկել է Ուկրաինայի հակամարտությունը և դրա ազդեցությունը գլոբալ պարենային անվտանգության վրա։ Այս մասին հաղորդում է ՄԱԿ-ի Գլխավոր քարտուղարի մամուլի ծառայությունը: «Նրանք քննարկել են Ուկրաինայում պատերազմը և դրա գլոբալ հետևանքները, հատկապես՝ պարենային անվտանգության վրա», - ասվում է հաղորդագրության մեջ։ Գուտերեշը Բորելի և Միշելի հետ քննարկել է նաև իրադրությունն Արևմտյան Աֆրիկայում, որտեղ վերջին ամիսներին մի շարք պետական հեղաշրջումներ են տեղի ունեցել։ Կողմերի քննարկման թեմաներից է եղել նաև կլիմայի փոփոխությունը։ ՄԱԿ-ի գլխավոր վեհաժողովի 78-րդ նստաշրջանի բացումը տեղի է ունեցել սեպտեմբերի 5-ին։ Գլխավոր վեհաժողովում առաջին բարձր մակարդակով քննարկումը տեղի կունենա սեպտեմբերի 19-ին։

11:56 - 18 սեպտեմբերի, 2023

Աղդամ-Ասկերան երթուղու բացումը կարևոր քայլ է, որը պետք է նպաստի նաև Լաչինի միջանցքի վերաբացմանը. Միշել |aysor.am|

aysor.am: ԵՄ նախագահ Շառլ Միշելի գրասենյակը անդրադարձել է Աղդամ-Ասկերան ճանապարհով ռուսական մարդասիրական մեքենայի մուտքին Ստեփանակերտ, խոսել Լաչինի միջանցքի ապաշրջափակման և Բաքու-Ստեփանակերտ ուղիղ երկխոսության անհրաժեշտության մասին․ «2023թ․ սեպտեմբերի 1-ի մեր հայտարարության մեջ հրապարակայնորեն ուրվագծված տարրերին և առաջարկներին համահունչ՝ նախագահ Միշելը շարունակել է սերտորեն ներգրավված լինել այդ և այլ մոտեցումների առաջմղմանը՝ առաջնային ուշադրություն դարձնելով լարվածության թուլացմանը և Ղարաբաղի հայերի առջև ծառացած հումանիտար իրավիճակին։ Մասնավորապես, նախագահ Միշելը սեպտեմբերի 9-ի հեռախոսազրույցների ժամանակ ինտենսիվ շփումներ է ունեցել ինչպես Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հետ, այնպես էլ Թուրքիայի նախագահ Ռեջեփ Թայիփ Էրդողանի հետ՝ Նյու Դելիում անցկացվող G20-ի գագաթնաժողովի շրջանակներում: Բաքվի, Երևանի և ղարաբաղահայության ներկայացուցիչների հետ նրա գրասենյակի և Տոյվո Կլաարի ամենօրյա աջակցությամբ իրականացվող այս ջանքերն ուղղված են լարվածության թուլացմանը և Ղարաբաղի հայերին հումանիտար հասանելիության ապաշրջափակման համար լուծում մշակելուն: Այս համատեքստում մենք նշում ենք այսօր ռուսական մարդասիրական առաքման անցումը Աղդամ-Ասկերան երթուղով։ Մենք հասկանում ենք այս զարգացման հետ կապված ողջ զգայունությունը։ Մեր ակնկալիքն է, որ դա խթանի տեղի բնակչությանը մարդասիրական կանոնավոր մատակարարումների վերսկսումը: Իրավիճակը տեղում արագորեն վատանում է. Կարևոր է ապահովել Ղարաբաղի հայերին առաջին անհրաժեշտության ապրանքների մատակարարումը։ Աղդամ-Ասկերան երթուղու բացումն այսօր կարևոր քայլ է, որը պետք է նպաստի նաև Լաչինի միջանցքի վերաբացմանը։ Մենք կոչ ենք անում բոլոր շահագրգիռ կողմերին՝ ցուցաբերել պատասխանատվություն և ճկունություն՝ ապահովելու, որ ինչպես Լաչինի, այնպես էլ Աղդամ-Ասկերան երթուղին օգտագործվեն։ Տեղում այս ծանր իրավիճակը չափազանց երկար է տևել։ Այժմ կարևոր է գտնել կայուն և փոխընդունելի լուծումներ՝ ապահովելու մարդասիրական հասանելիությունը նաև աշնան և ձմեռային սեզոններին ընդառաջ: Մենք վերահաստատում ենք մեր խորը համոզմունքը, որ Լաչինի միջանցքը պետք է ապաշրջափակվի՝ համաձայն անցյալի համաձայնագրերի և Միջազգային քրեական դատարանի (ՄՔԴ) հրամանի, և ընդգծում ենք մեր հավատամքը մատակարարման այլ ուղիների օգտակարության վերաբերյալ՝ ի շահ տեղի բնակչության։ ԵՄ-ն ակնկալում է, որ այսօրվա զարգացումներին կհետևեն ավելի կոնկրետ քայլեր առաջիկա օրերին և շաբաթներին՝ կապված նաև Բաքվի և Ղարաբաղի հայերի միջև իրենց իրավունքների և անվտանգության շուրջ երկխոսության, հաշտեցման ջանքերի և ընդհանուր հայ-ադրբեջանական խաղաղության գործընթացի հետ»։

11:03 - 13 սեպտեմբերի, 2023

Միշելը էրդողանի հետ G20 գագաթնաժողովի շրջանակներում քննարկել է նաև հայ-ադրբեջանական հարաբերությունները |tert.am|

tert.am: Եվրախորհրդի ղեկավար Շառլ Միշելը Թուրքիայի նախագահ Ռեջեփ Թայիփ էրդողանի հետ G20 գագաթնաժողովի շրջանակներում քննարկել է հացահատիկի սևծովյան նախաձեռնությունը, տարածաշրջանային իրավիճակը, մասնավորապես հայ-ադրբեջանական հարաբերությունները։ Այս մասին Միշելը գրել է X-ի իր միկրոբլոգում։ «G20-ի շրջանակներում Թուրքիայի նախագահ Էրդողանի հետ հանդիպմանը քննարկել եմ ԵՄ-Թուրքիա հարաբերությունների ողջ փաթեթը, հացահատիկի սևծովյան նախաձեռնությունն ու տարածաշրջանային իրավիճակը, մասնավորապես՝ Հայաստան-Ադրբեջան»,- գրել է Միշելը։

16:59 - 10 սեպտեմբերի, 2023

Որևէ փորձ՝ հավասարության նշան դնել Լաչինի միջանցքի և այլ ճանապարհների միջև, մեզ համար անընդունելի է․ Արցախի ԱԳ նախարար |news.am|

15:17 - 02 սեպտեմբերի, 2023

Բաքուն արձագանքում է Շառլ Միշելի հայտարարությանը |azatutyun.am|

azatutyun.am: Բաքուն արձագանքել է Եվրամիության խորհրդի նախագահ Շառլ Միշելի հայտարարությանը։ Ադրբեջանի արտգործնախարարությունը իր հերթին է հիշեցրել հուլիսի 15-ին կայացած Ալիև-Փաշինյան հանդիպման մասին և պնդել, որ այդ բանակցությունների ընթացքում «համաձայնեցվել է տարբեր երթուղիներով ապրանքների առաքումը Ադրբեջանի Ղարաբաղի շրջան, ինչպես նաև Լաչինի ճանապարհի օգտագործման ակտիվացումը՝ Աղդամ -Խանքենդի ճանապարհի բացմանը զուգահեռ»։ Ադրբեջանի դիվանագիտական գերատեսչությունը հայտարարում է՝ «պայմանավորվածությունները խախտվել են հայկական կողմի անօրինական պայմանների պատճառով»։ Ադրբեջանական կողմը չի արձագանքել Միշելի՝ Ղարաբաղի հայերի իրավունքների և անվտանգության ապահովման անհրաժեշտության մասին հայտարարությանը, փոխարենը Բաքուն կրկնել է՝ հայերը կունենան նույն իրավունքները, ինչ Ադրբեջանի մյուս քաղաքացիները: «Ադրբեջանը վճռական է Ղարաբաղի շրջանում բնակվող հայկական ծագումով բնակիչներին վերինտեգրելու հարցում՝ որպես իրավահավասար քաղաքացիների՝ նրանց ապահովելով Ադրբեջանի Սահմանադրությամբ նախատեսված իրավունքներով և ազատություններով», - ասված է Ադրբեջանի ԱԳՆ-ի հայտարարությունում։

18:05 - 01 սեպտեմբերի, 2023

«Չափազանց կարևոր է քայլեր ձեռնարկել տեղի բնակչության կարիքները բավարարելու համար». Շառլ Միշելի խոսնակը՝ Արցախում առկա իրավիճակի մասին |hetq.am|

hetq.am: Եվրոպական խորհրդի նախագահ Շառլ Միշելը շարունակում է ինտենսիվորեն զբաղվել Հայաստանի և Ադրբեջանի միջև հարաբերությունների կարգավորման գործընթացի առաջմղման ուղղությամբ։ Այդ մասին նշվում է ԵԽ նախագահի մամուլի քարտուղարի տարածած հաղորդագրության մեջ։ Ի թիվս այլ հարցերի խոսնակն անդրադարձել է նաև Լաչինի միջանցքով արցախահայության տեղաշարժի պայմաններին ու Աղդամի ճանապարհի հնարավոր կիրառմանը։ Հայտարարության սկզբում նշվում է, որ Շառլ Միշելի ջանքերն ուղղված են Լեռնային Ղարաբաղում հայերի հումանիտար իրավիճակի լուծմանը՝ որպես գերակա ուղղություն։ «Հատուկ ներկայացուցիչ Կլաարը և նախագահ Շառլ Միշելի թիմը մշտական շփումներ են պահում Բաքվի, Երևանի ու Ղարաբաղում ապրող հայերի ներկայացուցիչների հետ՝ մուտքի ապաշրջափակման լուծում մշակելու համար»,- նշված է հաղորդագրության մեջ։ Ըստ Միշելի խոսնակի՝ ներկայիս հումանիտար իրավիճակը Արցախում սրընթաց վատթարանում է։ «Չափազանց կարևոր է քայլեր ձեռնարկել տեղի բնակչության կարիքները բավարարելու համար»,- ասված է հաղորդագրության մեջ։ Խոսնակը նշում է, որ ԵԽ նախագահ Շառլ Միշելն առաջարկել է քայլ առ քայլ մոտեցումը, որը կնպաստի Լաչինի միջանցքի լիարժեք գործարկմանն ու Աղդամի ճանապարհի բացմանը։ «Այս քայլերի հաջորդականությունը և այս ճանապարհներից յուրաքանչյուրով առաքվող բեռի տեսակը, ինչպես նաև հարակից ընթացակարգերը վերջին քննարկումների առանցքում էին (նկատի ունի Բրյուսելում Փաշինյան-Ալիև վերջին բանակցությունները-խմբ.)»,- ընդգծվում է հաղորդագրության մեջ։ ԵԽ նախագահի խոսնակը նաև պնդում է, որ ԵՄ-ն կոչ է անում բացել Լաչինի միջանցքը, ապահովել Արդարադատության միջազգային դատարանի որոշումը ու նշում, որ «Աղդամի ճանապարհի օգտագործումը, մատակարարումների ապահովման համար, կարող է նաև լինել կոնկրետ ու կայուն լուծումների մաս՝ հրատապ և ամենօրյա հիմնական կարիքները բավարարելու համար»։ Ըստ Միշելի խոսնակի՝ այս ուղղությամբ քննարկումները սկսվել էին 2023 թվականի հուլիսի 15-ին Բրյուսելում եռակողմ հանդիպումից հետո։ Եվրամիությունը նաև ընդգծում է, որ «Բաքուն պետք է հստակություն մտցնի Ղարաբաղի հայերին Լաչինի միջանցքով դեպի Հայաստան և Հայաստանից իրենց տեղաշարժի ընթացակարգերի վերաբերյալ»։ Զուգահեռաբար, խոսնակը նաև նշում է, որ եռակողմ վերջին հանդիպման ժամանակ քննարկվել է նաև Արցախին էլեկտրականության ու գազի մատակարարումների շուտափույթ վերականգնումը։ Հայտարարության մեջ Եվրոպական խորհրդի նախագահի խոսնակն անդրադառնում է նաև Բաքվի ու Ստեփանակերտի միջև երկխոսությանը՝ համարելով այն կարևոր։ «Ղարաբաղի հայության իրավունքներն ու անվտանգությունը պետք է երաշխավորվեն, և կոնկրետ պայմանների քննարկումը պետք է սկսվի որքան հնարավոր է շուտ»,- ասված է հաղորդագրության մեջ։Խոսնակը նաև հավելում է, որ Բաքվի ու Ստեփանակերտի երկխոսությունը «պետք է ամրապնդի վստահությունը»։ Եվրոպական կողմի պնդմամբ՝ իրենց ներդրած ջանքերն ունեն միայն մեկ նպատակ. «ապահովել Բաքվի և Երևանի միջև հարաբերությունների անշրջելի կարգավորումը՝ ի շահ այդտեղ ապրող ողջ բնակչության»։ «Այժմ եկել է համարձակ փոխզիջումային լուծումների ժամանակը, այդ թվում՝ այսօրվա էսկալացիայի լույսի ներքո»,- նշվում է հաղորդագրության վերջում։

16:50 - 01 սեպտեմբերի, 2023

ԵՄ խորհրդի նախագահ Շառլ Միշելը Կանադայի ԱԳ նախարար Մելանի Ջոլիի հետ քննարկել է Արցախի հարցը |news.am|

news.am: Եվրոպական խորհրդի նախագահ Շառլ Միշելը Կանադայի արտաքին գործերի նախարար Մելանի Ջոլիի հետ քննարկել է Լեռնային Ղարաբաղի հարցը։ Այս մասին X–ի (նախկին` Twitter) էջում հայտնել է նախարար Ջոլին։ Նա նշել է, որ հանդիպման ժամանակ անդրադարձ են կատարել տարբեր տարածաշրջաններում առկա հարցերի։ «Մենք քննարկել ենք Բալկաններում ընդլայնվելու նրա տեսլականը, Լեռնային Ղարաբաղի հակամարտությունը և Հայիթիի ճգնաժամի կարգավորմանն ուղղված հետագա քայլերը»,– գրել է նախարար Ջոլին: Շեշտել է, որ այս զրույցներն առանցքային են գործընկերային աշխատանքի համար։ Նշենք, որ հանդիպումը կայացել է Բլեդի ռազմավարական համաժողովի շրջանակներում, որին մասնակցում է նաև ՀՀ արտաքին գործերի նախարար Արարատ Միրզոյանը։ Համաժողովն անցկացվում է Սլովենիայում օգոստոսի 28-29–ը։

11:54 - 29 օգոստոսի, 2023