Լիբանան

Լիբանանում 1 օրում Իսրայելի հարվածներից զոհվել է 45 մարդ. «Հեզբոլլահ»-ը կրկին հրթիռակոծել է Իսրայելի տարածքը |tert.am|

tert.am: Լիբանանի առողջապահության նախարարությունը հայտնում է, որ մեկ օրվա ընթացքում ամբողջ երկրի տարածքում Իսրայելի հարձակումների հետևանքով զոհվել է 45 և վիրավորվել 179 մարդ, հայտնում է Аl Jazeera-ն։ Ընդհանուր առմամբ, Լիբանանում զոհվածների թիվը հասել է 2,412-ի, վիրավորներինը՝ 11,267-ի. այս ամենը տեղի է ունենում լիբանանյան «Հեզբոլլահ» շիական շարժման և Իսրայելի միջև շարունակվող մարտերի հետևանքով: Մինչդեռ Times of Israel-ը հայտնում է, որ Լիբանանի տարածքից 15 հրթիռ է արձակվել հյուսիսային Իսրայելի ուղղությամբ: Հրթիռներից մի քանիսը որսացել են ՀՕՊ համակարգերը, մի քանիսն ընկել են Իսրայելի տարածքում։ Հրթիռակոծության հետևանքով տուժածների կամ ավերածությունների մասին տեղեկություններ չկան։ Նախօրեին Իսրայելի ԱԳ նախարար Իսրայել Կացը հայտարարել է, որ Լիբանանի հարավում իր երկրի ներխուժմամբ սկսված ռազմական գործողությունը, որի թիրախում լիբանանյան «Հեզբոլլահ» շարժումն է, կտևի ևս մի քանի շաբաթ: Սեպտեմբերի 23-ին Իսրայելը հայտարարել է Լիբանանում «Հյուսիսի նետեր» գործողության մեկնարկի մասին։ Հոկտեմբերի 1-ին Իսրայելի պաշտպանության բանակը հարձակողական գործողություն է սկսել երկրի հարավում։ Գործողության նպատակն է վերացնել «Հեզբոլլահ»-ի սպառնալիքը՝ 60,000 տարհանված իսրայելցիներին հյուսիսի սահմանային բնակավայրեր անվտանգ վերադարձնելու համար։

09:41 - 18 հոկտեմբերի, 2024

Իտալիայի վարչապետն այցելելու է Լիբանան |1lurer.am|

1lurer.am: Իտալիայի վարչապետ Ջորջիա Մելոնին Բեռլինում ԱՄՆ նախագահ Ջո Բայդենի հետ երեք եվրոպական երկրների ղեկավարների հանդիպմանն իր բացակայությունը բացատրել է Մերձավոր Արևելք նախատեսված հրատապ այցով։ Այդ մասին նա հայտարարել է հինգշաբթի՝ հոկտեմբերի 17-ին, Եվրամիության գագաթնաժողովին մասնակցելու համար Բրյուսել կատարած այցի ժամանակ։ «Ես ոչ մի դեպքում չեմ կարողանա ներկա լինել»,- ասել է Մելոնին՝ հավելելով, որ հաջորդ օրը ինքը լինելու է Լիբանանում։ «Միգուցե ավելի օգտակար է խոսել տարածաշրջանի խաղացողների հետ, քան դա անել իրար հետ: Այդ իսկ պատճառով այս ուղևորությունն այժմ իմ առաջնահերթությունն է»,- հավելել է Իտալիայի վարչապետը: Հայտարարությունը «վրդովմունք է առաջացրել Հռոմում»՝ նշել է dpa գործակալությունը։ Ներկայումս Իտալիան նախագահում է Մեծ Յոթնյակում (G7):

21:10 - 17 հոկտեմբերի, 2024

Լիբանանում քաղաքապետարանի շենքին իսրայելական հարվածից 16 մարդ է զոհվել, այդ թվում՝ քաղաքապետը |azatutyun.am|

azatutyun.am: Լիբանանի հարավում գտնվող Նաբաթիե խոշոր քաղաքի քաղաքապետերանի շենքին իսրայելական երեկվա ավիահարվածներից 16 մարդ է զոհվել, այդ թվում՝ քաղաքապետը, հաղորդում է Reuters-ը։ Իսրայելական օդային հարվածների մեկնարկից ի վեր սա ամենամեծ հարձակումն է Լիբանանի պետական ենթակառուցվածքին։ Հաղորդվում է նաև ավելի քան 50 վիրավորի մասին։ Լիբանանի պաշտոնյաները դատապարտել են միջադեպը՝ շեշտելով, որ Իսրայելի արշավը «Հեզբոլա»-ի զինված խմբավորման դեմ այժմ տեղափոխվում է լիբանանյան պետության տարածք։ Իսրայելցիները «դիտավորյալ թիրախ են դարձրել քաղաքային խորհրդի նիստը՝ որը քննարկում էր իսրայելական հարձակումների հետևանքով տեղահանված մարդկանց օգնելու հարցը», - հայտարարել է ժամանակավոր վարչապետ Նաջիբ Միքաթին: Իսրայելն առաջին անգամ հոկտեմբերի 3-ին էր Նաբաթիեի տասնյակ հազարավոր բնակիչներին տարհանելու մասին ծանուցում ուղարկել: Այդ ժամանակ քաղաքի քաղաքապետ Ահմեդ Քահիլը Reuters-ին ասել էր, որ չի պատրաստվում հեռանալ: Իսրայելը հայտարարել է, որ հարվածներ է հասցրել Նաբաթիեում «Հեզբոլա»-ի տասնյակ թիրախներին։ Իսրայելը հարվածեց Լիբանանում «Հեզբոլա»-ի թիրախներին 2023-ի հոկտեմբերի 7-ից մեկ տարի անց, երբ «Համաս»-ի զինյալները Գազայի հատվածից անսպասելիորեն հարձակվեցին հրեական խաղաղ ավանների վրա: ԱՄՆ-ի և ԵՄ-ի կողմից ահաբեկչական կառույց ճանաչված «Համաս»-ի գրոհների հետևանքով սպանվել է մոտ 1200 իսրայելցի, ևս ավելի քան 250 իսրայելցի պատանդառվել է: Ըստ պաղեստինյան անկլավի առողջապահության նախարարության՝ Գազայի հատվածում իսրայելան ռազմական գործողությունների հետևանքով զոհված պաղեստինցիների թիվը գերազանցել է 41 հազարը։

10:38 - 17 հոկտեմբերի, 2024

Իսրայելը կրկին հարված է հասցրել Բեյրութի հարավին |armenpress.am|

armenpress.am: Իսրայելը հարվածներ է հասցրել Բեյրութի հարավային Դահիեի շրջանին։ Այս մասին հաղորդում է Իսրայելի պաշտպանության բանակը (ԻՊԲ)՝ շեշտելով, որ հարվածի թիրախը եղել է «Հեզբոլլահ» շարժման զինամթերքի ստորգետնյա պահեստը: «Մինչև հարվածը բազմաթիվ միջոցներ են ձեռնարկվել՝ նվազեցնելու քաղաքացիական անձանց պատճառվող վնասը, այդ թվում՝ տվյալ շրջանի բնակչությանը նախապես զգուշացումներ տալով», - գրված է ԻՊԲ-ի Telegram ալիքում հրապարակված հաղորդագրության մեջ։ Գերատեսչությունը նշում է նաև, որ հարվածը հասցվել է իսրայելական հետախուզության ստույգ տվյալների հիման վրա։ Լիբանանյան կողմը տուժածների կամ ավերածությունների մասին առայժմ չի հաղորդել։ Իր հերթին Reuters գործակալությունը հաղորդում է, որ ականատեսները երկու պայթյուն են լսել և երկու տարբեր թաղամասերից բարձրացող ծուխ տեսել։ Ըստ հրապարակման՝ հոկտեմբերի 16-ի վաղ առավոտյան Իսրայելը միայն մեկ շենքի բնակիչների է տարհանման հրահանգ տվել։ Ավելի վաղ ՄԱԿ-ը հայտնել էր, որ հոկտեմբերի 1-ին Լիբանանում ցամաքային գործողություն սկսելուց ի վեր Իսրայելը տարհանման հրահանգ է տվել Լիբանանի ավելի քան մեկ քառորդի բնակչությանը։ Բեյրութում մի քանի օր իրավիճակը հանդարտ էր, վերջին հարվածը քաղաքին հասցվել էր հոկտեմբերի 10-ին, երբ զոհվել էր 22 մարդ, փլուզվել էր մի քանի շենք խիտ բնակեցված թաղամասերում։ Սեպտեմբերի վերջից Իսրայելն ակտիվորեն ավիահարվածներ է հասցնում Լիբանանի հարավին և Բեյրութին՝ թիրախավորելով «Հեզբոլլահ»-ի ենթակառուցվածքները։ ԻՊԲ-ն հոկտեմբերի 1-ից նաև սահմանափակ ցամաքային գործողություն է սկսել Լիբանանի հարավի սահմանային շրջանում գտնվող «Հեզբոլլահ»-ի օբյեկտների դեմ: Իր հերթին «Հեզբոլլահ»-ն ամեն օր հրթիռներ է արձակում Իսրայելի վրա։

12:10 - 16 հոկտեմբերի, 2024

Լիբանանում 24 ժամվա ընթացքում ավիահարվածների հետևանքով 41 մարդ է զոհվել |shantnews.am|

shantnews.am: Լիբանանի Առողջապահության նախարարությանն առընթեր շտապ գործողությունների կենտրոնը տվյալներ է տարածել Բաալբեկ-Հերմել, Բեքաա, Լիբանան լեռան, Նաբաթիա, Սաիդա և Տյուր գավառների վրա իսրայելական ավիահարվածների զոհերի վերաբերյալ: X-ում հրապարակված զեկույցում նշվում է, որ վերջին 24 ժամվա ընթացքում Լիբանանում զոհվել է 41 մարդ, վիրավորվել՝ 124-ը։ Ամենաշատ զոհերը գրանցվել են երկրի հյուսիսում՝ Զգորտա շրջանում, 6-ը վիրավորվել են հարավային Նաբաթիե, Սաիդա և Տյուր նահանգներում, 17-ը զոհվել են, իսկ 79-ը՝ վիրավորվել։ Բացի այդ, թարմացվել են 2023 թվականի հոկտեմբերին ռազմական էսկալացիայի մեկնարկից ի վեր իսրայելական ռմբակոծությունների և հրետանային հարձակումների զոհերի վերաբերյալ տվյալները։ Այսպիսով, զոհվածների թիվը կազմել է 2,4 հազար, վիրավորներինը՝ 10,9 հազար։

21:12 - 15 հոկտեմբերի, 2024

Հեզբոլլահը պայմաններ է սահմանել Իսրայելի հրթիռակոծումը դադարեցնելու համար |armenpress.am|

armenpress.am: Լիբանանյան «Հեզբոլլահ» շարժումը պատրաստ է դադարեցնել մարտերը Իսրայելի պաշտպանության բանակի կողմից հրադադարի հաստատման դեպքում։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է լիբանանյան շարժման գլխավոր քարտուղարի տեղակալ Նաիմ Քասեմը։ «Ես դիմում եմ Իսրայելին, միակ լուծումը հրադադարն է, մենք կշարունակենք կռվել, եթե թշնամին կանգ չառնի», - ասել է նա։ Ըստ Ղասեմի՝ անցած շաբաթվա ընթացքում իսրայելական բանակի կորուստները Լիբանանի հարավում կազմել են 25 սպանված և 150 վիրավոր։ «Ես դիմում եմ ներքին ճակատին. մի հավատացեք ձեր քաղաքական գործիչների խոսքերին մեր հնարավորությունների մասին, տեսեք, թե ինչ կարող ենք անել և իրականում արդեն իսկ արել ենք», - ավելացրել է Հեզբոլլահի փոխնախագահը։ Նա նշել է, որ շարժումը հարվածներ է հասցնելու Իսրայելի ողջ տարածքում՝ ի պատասխան հրեական պետության կողմից Լիբանանի վրա հարձակումների։ «Մենք ապացուցել ենք Թել Ավիվին և Հայֆային հարվածելու մեր կարողությունը, եթե հակառակորդը չդադարի, մեր հարվածների շրջանակը կընդլայնվի՝ ստիպելով ոչ թե հարյուր հազարավոր, այլ ավելի քան երկու միլիոն բնակիչների գնալ ռմբապաստարաններ», - ընդգծել է Քասեմը։ Նա հայտնել է, որ «Հեզբոլլահի» նպատակն Իսրայելի կողմից օկուպացված տարածքների ազատագրումն է և Գազայի հատվածում Իսրայելի պաշտպանության բանակի դեմ պայքարող պաղեստինյան շարժմանն աջակցելը։

18:56 - 15 հոկտեմբերի, 2024

ԱՄՆ դեսպանատունը իր երկրի քաղաքացիներին հորդորել է անմիջապես հեռանալ Լիբանանից |armenpress.am|

armenpress.am: Բեյրութում ԱՄՆ դեսպանատունը հորդորել է իր երկրի քաղաքացիներին անմիջապես մեկնել Լիբանանից։ «Արմենպրես»-ի հաղորդմամբ՝ այս մասին դեսպանատունը հայտարարություն է տարածել իր պաշտոնական կայքում՝ նշելով, որ ԱՄՆ կառավարությունը լրացուցիչ հազարավոր տեղեր է ավելացրել կոմերցիոն թռիչքներ իրականացնող ինքնաթիռներով իր քաղաքացիների և նրանց ընտանիքների տեղափոխումն իրականացնելու համար։ Լիբանանում գտնվող ԱՄՆ քաղաքացիներին կոչ է արվում հիմա թռչել: «Այդ տեղերի մեծ մասը մնացել է չօգտագործված։ Խնդրում ենք հասկանալ, որ այս հավելյալ թռիչքները անվերջ չեն շարունակվելու»,-նշել է Լիբանանում ԱՄՆ դեսպանատունը՝ կոչ անելով օգտվել այդ հնարավորությունից և անմիջապես հեռանալ։

22:24 - 14 հոկտեմբերի, 2024

ԱՄՆ-ն զինվորներ է ուղարկում Իսրայել, Թեհրանը զգուշացնում՝ կարմիր գծեր չկան |azatutyun.am|

azatutyun.am: Իսրայելում անցած գիշեր չորս զինվոր է զոհվել, ևս յոթը` ծանր վիրավորվել, երբ «Հեզբոլահ»-ն անօդաչուներով հարվածել է Թել Ավիվից 60 կմ հարավ գտնվող Բինյամինա քաղաքի մերձակայքում գտնվող ռազմակայանին: Վիրավորվել են նաև քաղաքի տասնյակ բնակիչներ: Այս մասին հաղորդել է Իսրայելի պաշտպանության նախարարությունը։ Սա Իսրայելի դեմ ամենաարյունալի հարձակումներից մեկն էր արդեն ավելի քան մեկ տարի Մերձավոր Արևելքում շարունակվող պատերազմից ի վեր։ Կատարվածի համար պատասխանատվություն է ստանձնել Միացյալ Նահանգների կողմից ահաբեկչական ճանաչված «Հեզբոլահ» խմբավորումը, ըստ որի՝ «անօդաչուները հաղթահարել են իսրայելական ՀՕՊ համակարգերը և հասել թիրախներին»։ Իսրայելական բանակի խոսնակ Դանիել Հագարին փաստացի չի հերքել, որ իրենց Երկաթե գմբեթը կատարյալ չէ։ «Մենք կուսումնասիրենք տեղի ունեցածը և դասեր կքաղենք։ Անօդաչուներից բխող վտանգին բախվում ենք պատերազմի մեկնարկից ի վեր և պետք է բարելավենք մեր պաշտպանությունը»,- ասել է Հագարին։ «Հեզբոլահ»-ն սպառնում է շարունակել հարվածները, եթե Իսրայելը չդադարեցնի ներխուժումը Լիբանանի հարավ։ Տարածաշրջանում օր օրի սրվող իրավիճակի ֆոնին Միացյալ Նահանգները երեկ հայտարարեց, թե նախագահ Բայդենի հրահանգով արդիական ՀՕՊ համակարգ ու նաև դրանք գործարկող զինվորներ է ուղարկում Իսրայել։ «Այս քայլը ընդգծում է Նահանգների աներկբա հավատարմությունը Իսրայելի պաշտպանությանը»,- հայտարարել է Պենտագոնը՝ հավելելով․- «THAAD համակարգը կօգնի ամրապնդել Իսրայելի հակաօդային պաշտպանությունն Իրանի հնարավոր նոր սպառնալիքներից»։ Իրանի արտգործնախարարն ի պատասխան հրապարակել է, թե որքան զենք-զինամթերք է Միացյալ Նահանգները տվել Իսրայելին վերջին տասնամյակների ընթացքում, զգուշացնելով՝ դա Թեհրանին ետ չի պահի իր ժողովրդին ու շահերը պաշտպանելուց։ «Ամերիկան հիմա էլ իր զինվոների կյանքն է վտանգում՝ տեղակայելով նրանց Իսրայելում ամերիկյան համակարգերը գործարկելու համար։ Թեև մենք վերջին օրերին ահռելի ջանքեր ենք գործադրել մեր տարածաշրջանում լայնածավալ պատերազմը զսպելու համար, ես հստակ կարող եմ ասել, որ մեր ժողովրդին ու շահերը պաշտպանելու հարցում մենք կարմիր գծեր չունենք»,- հայտարարել է Աբբաս Արաղչին։ Առավել մանրամասն՝ azatutyun.am-ում

10:02 - 14 հոկտեմբերի, 2024

Լիբանանում ՄԱԿ-ի խաղաղապահները պատահաբար են հայտնվել Իսրայելի թիրախում. ՑԱՀԱԼ |1lurer.am|

1lurer.am: v>Իսրայելը հայտարարել է, որ Լիբանանում ՄԱԿ-ի խաղաղապահ շտաբի տարածքում գտնվող հաստատությունը պատահաբար է հայտնվել թիրախում։ «Իսրայելի զինվորները անմիջական սպառնալիք են տեսել և պատասխան կրակ բացել: Վտանգի աղբյուրը գտնվել է խաղաղապահներից 50 մետր հեռու»,- ասված է ՑԱՀԱԼ-ի հաղորդագրության մեջ։ Նշվում է, որ միջադեպից մի քանի ժամ առաջ զինվորականները ՄԱԿ-ի խաղաղապահներին հորդորել են ապաստան գտնել:

20:44 - 11 հոկտեմբերի, 2024

ՀՀ ԱԳՆ-ն դատապարտել է Լիբանանում ՄԱԿ-ի ժամանակավոր ուժերի կենտրոնակայանի վրա հարձակումը |armenpress.am|

armenpress.am: Հայաստանի արտաքին գործերի նախարարությունը դատապարտել է Լիբանանում ՄԱԿ-ի ժամանակավոր ուժերի կենտրոնակայանի վրա Իսրայելի հարձակումը: Այս մասին ասված է ՀՀ ԱԳՆ-ի X-ի միկրոբլոգում։ «Որպես Լիբանանում ՄԱԿ-ի ժամանակավոր ուժերում մասնակցություն ունեցող երկիր՝ Հայաստանը խստորեն դատապարտում է կենտրոնակայանի վրա հարձակումը: ՄԱԿ-ի ժամանակավոր ուժերը կոչված են ամրապնդելու կայունությունը՝ համաձայն ՄԱԿ-ի Անվտանգության խորհրդի համապատասխան բանաձևերի»,- նշել է ԱԳՆ-ն։ Ավելի վաղ հայտնի էր դարձել, որ ՄԱԿ-ի երկու խաղաղապահներ վիրավորվել են Լիբանանում գտնվող նրանց կենտրոնակայանի վրա իսրայելական հարձակման հետևանքով։

16:18 - 11 հոկտեմբերի, 2024

Իսրայելի ռազմաօդային ուժերի ինքնաթիռները հարվածել են Բեյրութի կենտորնական շրջաններին

Իսրայելի ռազմաօդային ուժերի ինքնաթիռները հարձակվել են շիական «Հեզբոլլահ» կազմակերպության թիրախների վրա Լիբանանի մայրաքաղաքի կենտրոնական հատվածում։ Այս մասին հայտնում է ՌԻԱ Նովոստին։ «Երկու նպատակաուղղված հարված է հասցվել Ռաս ալ-Նաբա և Նուայրի թաղամասերի շենքերին, որտեղ գտնվում էին «Հեզբոլլահի» բժշկական կենտրոնները»,-նշել է աղբյուրը: Շտապօգնության մեքենաները շտապել են ավիահարվածներից տուժած շենքեր։ Նախնական տվյալներով՝ Բեյրութի կենտրոնում իսրայելական հարվածների զոհ է դարձել 11 մարդ, վիրավորվել՝ 48-ը: Հայտնում է Լիբանանի առողջապահության նախարարությունը։

22:24 - 10 հոկտեմբերի, 2024

«Հեզբոլլահ»-ը մեկ օրում 360 արկ է արձակել Իսրայելի ուղղությամբ․ Իսրայելի ՊԲ |factor.am|

factor.am: Իսրայելի պաշտպանության բանակը հայտնել է, որ լիբանանյան «Հեզբոլլահ» շարժումը հոկտեմբերի 9-ին օրվա ընթացքում 360 արկ է արձակել երկրի ուղղությամբ։ Դրանցից 220-ը հասել է Իսրայել: «Հեզբոլլահ»-ի հարձակումների մասին իսրայելական բանակը հայտնել է Telegram-ում հաղորդագրությամբ։ Նշվում է նաև, թե հոկտեմբերի լույս 10-ի գիշերը Իսրայելի օդուժը հարվածներ է հասցրել Բեյրութում և Լիբանանի հարավում գտնվող մի քանի զենքի պահեստարանների: Իսրայելական կողմի պնդմամբ՝ հարձակումների հետևանքով զոհվել են լիբանանցի հրամանատար Ահմադ Մուսթաֆա ալ-Հաջա Ալին և հրամանատար Մոհամմադ Ալի Համդանը: Երեկ՝ հոկտեմբերի 9-ին, Իսրայելի իշխանությունները հայտնել էին, որ Լիբանանից հարձակումների հետևանքով 2 մարդ է զոհվել, ևս 6-ը՝ վիրավորվել։ Հարվածները գրանցվել են Հայֆա և Կիրյաթ Շմոնա քաղաքներին։ Նույն օրը երեկոյան հայտնի է դարձել նաև Իսրայելի կողմից սիրիական Դամասկոսի Մեցզա շրջանի վրա հարձակման մասին, որտեղ գտնվում են Իրանի դիվանագիտական կառույցները։

15:44 - 10 հոկտեմբերի, 2024

Վերջին շաբաթներին Լիբանանում ավելի քան 1500 մարդ է զոհվել, հայտնում է երկրի ԱՆ-ն |azatutyun.am|

azatutyun.am: Ավելի քան 1500 մարդ է զոհվել, 8 հազարը վիրավորվել սեպտեմբերից «Հեզբոլա»-ի դեմ Լիբանանում իսրայելական հարվածներից, փոխանցում է CNN-ը՝ վկայակոչելով Լիբանանի առողջապահության նախարարության հայտարարությունը։ Ավելի վաղ Լիբանանի կառավարությունը հաղորդել է, որ երկրից շուրջ 1․2 միլիոն մարդ է տեղահանվել՝ նշելով, որ մարդասիրական ճգնաժամն աճում է, Իսրայելի ռազմական գործողություններն էլ ընդլայնվում։ ՄԱԿ-ի տվյալներով՝ Լիբանանի մեկ քառորդն այժմ գտնվում է իսրայելական զինվորականների հրամանատարության տակ։ Իսրայելը հայտարարել է, որ իր նպատակը Լիբանանի սահմանամերձ հատվածներում «Հեզբոլա»-ի ռազմական ենթակառուցվածքները վերացնելն է՝ պնդելով, որ խմբավորումը հենց սահմանամերձ բնակավայրերից է մի ամբողջ տարի գրոհել՝ այդ շրջաններում բնակվող իսրայելցիներին ստիպելով հեռանալ իրենց տներից։

13:52 - 10 հոկտեմբերի, 2024

Լիբանանը հայտարարել է, որ ԱՄՆ-ն ոչինչ չի ձեռնարկում Իսրայելի ագրեսիան կասեցնելու համար |news.am|

news.am: Լիբանանի խորհրդարանի նախագահ Նաբիհ Բերին լուրջ անհանգստություն է արտահայտել լիբանանա-իսրայելական սահմանին հրադադարի պահպանմանն ուղղված ջանքերում առաջընթացի բացակայության կապակցությամբ: Asharq Al-Awsat պարբերականին տված հարցազրույցում նա խոստովանել է, որ միջազգային միջնորդներին չի հաջողվում կասեցնել իսրայելական պատերազմը։ «Դեռևս դրական արդյունք չկա, դեռ զգում ենք ֆրանսիացիների աջակցությունը»,- ասել է խոսնակը։ «Սակայն ինչ վերաբերում է ամերիկացիներին, նրանք ասում են՝ իբր մեզ հետ են և հրադադար են ուզում հաստատել, բայց Իսրայելի ագրեսիան կասեցնելու համար ոչինչ չեն ձեռնարկում»: Բերին հայտնել է, որ ինչպես 2006-ին հարավային Լիբանանում տեղի ունեցած հակամարտության ժամանակ, նա իրավասու է բանակցել զինված շիական «Հըզբոլլահ» կազմակերպության անունից։ «Ես անում եմ նույնը, ինչ արել եմ 2006 թվականին, ես պատասխանատու եմ քաղաքական բանակցությունների համար, այս մանդատի մեջ ոչ մի նոր բան չկա»,-նշել է նա։ Իր հերթին, հանրապետության վարչապետ Նաջիբ Միքաթին հաստատել է, որ «արաբական և միջազգային ջանքերը չեն դադարել և դեռ շարունակվում են»։ Սակայն նա նշել է, որ «Իսրայելական կամակորությունը խանգարում է այդ ջանքերի հաջողությանը»: «Ոմանք շտապում են եզրակացություններ անել, որ դիվանագիտական ջանքերը դադարել են, և կա Իսրայելի գործողությունների լռելյայն հաստատման նման մի բան»,-նշել է վարչապետը: -Բայց այդ տպավորությունը ճիշտ չէ, քանի որ մենք շարունակում ենք անհրաժեշտ շփումները»։ Միքաթին ընդգծել է, որ Լիբանանի բարեկամ պետությունները պնդում են հրադադարի մասին որոշակի ժամկետով քննարկելու համար քաղաքական քայլեր, որոնցից ամենագլխավորը ՄԱԿ-ի Անվտանգության խորհրդի 1701 բանաձևի կատարումն է և ստիպելը, որ իսրայելական հակառակորդը հետևի այդ բանաձևին:

11:25 - 10 հոկտեմբերի, 2024

Լիբանանում Իսրայելի հարվածների մեկնարկից ի վեր զոհվել է 2 141 մարդ |arm.sputniknews.ru|

arm.sputniknews.ru: Անցյալ տարվա հոկտեմբերից Լիբանանում իսրայելական հարվածների հետևանքով զոհերի թիվը հասել է 2141-ի, վիրավորվել է 10,099 խաղաղ բնակիչ, ասվում է Լիբանանի առողջապահության նախարարության հայտարարության մեջ, փոխանցում է «ՌԻԱ Նովոստի»-ն: «Ագրեսիայի սկզբից ի վեր զոհվածների ընդհանուր թիվը հասել է 2141-ի, վիրավորվել է 10,099 քաղաքացի»,- ասված է հաղորդագրությունում։ Լիբանանի առողջապահության նախարարության տվյալներով՝ վերջին 24 ժամվա ընթացքում զոհվել է 22 մարդ, վիրավորվել՝ 80-ը։

19:55 - 09 հոկտեմբերի, 2024

ԵՄ-ն հայտարարել է Լիբանանին օգնություն հասցնելու համար «մարդասիրական օդային կամուրջի» գործարկման մասին |news.am|

news.am: Եվրամիությունը հայտարարել է, որ գործարկել է «մարդասիրական օդային կամուրջ»՝ Լիբանանին օգնություն հասցնելու նպատակով՝ երկրում կատաղի ռազմական գործողությունների պայմաններում: Եվրահանձնաժողովը հայտնել է, որ երեք նախնական չվերթ է նախատեսել՝ Իտալիայից և Դուբայից մատակարարումներ հասցնելու համար հակամարտությունից տուժած երկիր, որոնցից առաջինը Բեյրութ կժամանի արդեն ուրբաթ: «ԵՄ-ն աջակցում է Լիբանանի ճգնաժամից տուժած մարդկանց»,- գրել է Եվրահանձնաժողովի նախագահ Ուրսուլա ֆոն դեր Լայենը X սոցիալական ցանցի իր միկրոբլոգում։ «Վերմակներից մինչև կացարանների լրակազմեր և դեղամիջոցներ: Ավելի շատ օգնություն կլինի»,- հավելել է նա: Անցյալ շաբաթ ԵՄ-ն հայտարարել էր, որ ի պատասխան շարունակվող բռնությունների 30 միլիոն եվրոյով ավելացնում է Լիբանանում մարդասիրական օգնության ծախսերը:

19:31 - 09 հոկտեմբերի, 2024