Ազգային ժողով

Հատվածական սահմանազատումն ու սահմանագծումը հակասում է Հայաստանի շահերին․ Արմեն Ռուստամյան |armenpress.am|

armenpress.am: Սահմանազատումը և սահմանագծումը իրար հաջորդող միջազգային գործընթացներ են և պետք է համապատասխանեն միջազգային լավագույն պրակտիկային։ Ազգային ժողովի նիստում իր ելույթում այս մասին ասաց Ազգային ժողովի ընդդիմադիր «Հայաստան» խմբակցության պատգամավոր Արմեն Ռուստամյանը։ Նրա խոսքով՝ հիմնարար սկզբունք է համարվում այն, որ առ ոչինչ է ուժի կամ ուժի սպառնալիքի կիրառմամբ ձեռք բերված որևէ համաձայնությունը։ «Առաջնային պայման է սահմանակից պետությունների միջև երկկողմ բնականոն, այդ թվում՝ դիվանագիտական հարաբերությունների առկայությունը։ Այս գործընթացներն իրականացնելու համար ձևավորվում է երկկողմ միջպետական կառավարական հանձնաժողով, կայացվում է համաձայնություն սահմանազատման հիմքերի և համատեղ սահմանագծում իրականացնելու գործընթացի շուրջ, կնքվում է երկու պետությունների միջև սահմանի մասին համաձայնագիր, որն արձանագրում է սահմանային բոլոր խնդիրների լուծված լինելու հանգամանքը։ Հետևաբար՝ սահմանների ճանաչման գործընթացի միջազգային պրակտիկայում խոսք չի կարող լինել ավարտված որևէ հատվածական սահմանազատման և սահմանագծման մասին առանց ունենալու սահմանային բոլոր խնդիրների լուծումն արձանագրող համաձայնություն։ Ուստի հատվածական սահմանազատումն ու սահմանագծումն Ադրբեջանի հորինածն է և հակասում է մեր շահերին և միջազգային լավագույն պրակտիկային»,- ընդգծեց Ռուստամյանը։ Պատգամավորը նշեց, որ այդ ապօրինի պահանջին տուրք տալը նշանակում է ուղղակիորեն ուժի սպառնալիքի տակ անվերապահորեն կատարել Ադրբեջանի կամքը։ «Այս եզրահանգումն ամրապնդում է Ադրբեջանի այն պահանջով, որ սահմանի հստակեցումն իրականացվի հենց Տավուշի հատվածից, որտեղ մեր առաջնագիծն ամենաամուրն է»,-եզրափակեց Ռուստամյանը։

18:28 - 09 ապրիլի, 2024

Կարող է ինչ-որ պահի հրաժարենք որևէ բան ստորագրելուց, եթե չգանք համաձայնության. Ալեն Սիմոնյան |armenpress.am|

armenpress.am: Հայաստանի տարածքից Ադրբեջանին որևէ մաս զիջելու հարց չի քննարկվում և քննարկման ենթակա չէ: Այս մասին ԱԺ ամբիոնից վստահեցրեց Հայաստանի ազգային ժողովի նախագահ Ալեն Սիմոնյանը: «Բանակցությունները, խոսակցությունները վարվում են, աշխատանքային խմբերը հանդիպում են, բայց դա որևիցե բան չի ենթադրում: Կարող է ինչ-որ մի պահի մենք ընդհանրապես հրաժարվենք որևիցե ձևով որևիցե բան ստորագրելուց, եթե չգանք համաձայնության»,-ասաց Սիմոնյանը: Նա վստահեցրեց՝ ՀՀ տարածքից՝ Տավուշի կամ այլ մարզից որևիցե մաս զիջելու հարց քննարկման ենթակա չէ:

18:18 - 09 ապրիլի, 2024

Ում հետ է բանակցում Փաշինյանը, եթե իր սահմանագծման, սահամանզատման հանձնաժողովը դրա մեջ չկա, ԱԳՆ-ն չկա․Գեղամ Մանուկյանը՝ սահմանագծումը Տավուշից սկսելու հայտարարությունների մասին

Այն, ինչ հնչեց ԱԺ այդ նիստի ընթացքում, որևէ գաղտնիք չկար։ Այս մասին հայտարարեց «Հայաստան» խմբակցության պատգամավոր Գեղամ Մանուկյանը՝ ԱԺ-ում փակ հանդիպումից հետո հայտարարությունների ժամին։ Մանուկյանի խոսքով՝ այն ավելի շատ հասարակությունից էր փակ, քան գաղտնի տեղեկություն էր։ «Մեզ համար շատ ավելի պարզվեց հետևյալ իրավիճակը․ ՀՀ-ն Ադրբեջանի հետ սահմանազատման, սահմանագծման գործընթացը իրականացնում է Մհեր Գրիգորյանի ղեկավարած պետական հանձնաժողովի միջոցով․ 7 հանդիպում են ունեցել արդեն, դեռ տեխնիկական, կազմակերպչական խնդիրներն են շատ։ Այսօր Մհեր Գրիգորյանն ասաց՝ սահմանագծումը Տավուշից իրականացնելու համաձայնություն Ադրբեջանի հետ չկա, Փաշինյանի հայտարարած 4 տարածքների վերադարձի հետ կապված համաձայնություն չկա։ ԱԳՆ-ն առանձին ա բանակցում Ադրբեջանի հետ․ 2 դրույթ կա․ Ադրբեջանը մինչև հիմա չի համաձայնում, թե որ քարտեզի շուրջ ա լինելու սահմանագծում, սահմանազատումը։ Ու մեկ էլ էստեղ Նիկոլ Փաշինյանը հայտնվում ա մի հատ քարտեզ ձեռքը առած ու սպառնում ա տավուշեցիներին, հայ ժողովրդին, արձանագրում ա, լեգիտիմացնում ա Ադրբեջանի պահանջները, տարածքային հավակնությունները։ Որտեղից առաջ եկավ էս հարցը, ում հետ ա բանակցում Նիկոլ Փաշինյանը, եթե իր սահմանագծման, սահամանզատման հանձնաժողովը դրա մեջ չկա, ԱԳՆ-ն չկա, թե՞ պարզապես Նիկոլ Փաշինյանը Ադրբեջանի սպառնալիքները Հայաստանում փոխանցող դեսպանն է, ոչ թե Հայաստանի վարչապետը։ Արդարանում են, ասում են՝ որ Տավուշում սահմանազատում լինի, սահմանապահներ կկանգնեն, սիրելի հայրենակիցներ, խաբում են, որովհետև ՀՀ սահմանապահ զորքերը, որմն ի դեպ, մի տարի ա՝ հրամանատար չունի, զինված ա թեթև զենքերով, իսկ Ադրբեջանի սահմանապահ զորքերը, ի դեպ Տավուշում արդեն տարիներ շարունակ սահմանապահ զորքերն են կանգնած, ծանր տեխնիկա, ավիացիա, հրետանի ամեն ինչով զինված ա, դե հիմա դրանից հետո, երբ ԱԲ նախարարն ասում ա՝ դե դպրոցից 50 մետր սահման ա, երեխեքն ապահով կապրեն, կարա՞ք պատկերացնեք, ապահով կապրե՞ն»,- ասաց Գեղամ Մանուկյանը։

18:13 - 09 ապրիլի, 2024

ԱԺ-ում ընթանում է սահմանազատման հարցով փակ նիստը. որոշ պատգամավորներ դրան մասնակցելու համար գաղտնիության թույլտվություն չունեն

ԱԺ-ում տեղի է ունենում Հայաստանի և Ադրբեջանի միջև սահմանազատման և սահմանագծման հարցով հրատապ փակ նիստ․ դրան մասնակցելու գաղտնիության թույլտվություն չունեն ընդդիմադիր պատգամավորներ Սեյրան Օհանյանը, Լևոն Քոչարյանը, Արմեն Գևորգյանը, Ասպրամ Կրպեյանը, Արման Ղազարյանը, Մհեր Մելքոնյանը, Արմեն Ռուստմյանը, Մհեր Սահակյանը, Արթուր Սարգսյանը։ ՔՊ-ից թուլտվություն չունի Դավիթ Կարապետյանը, որը նոր է ստանձնել պաշտոնը։ Ալեն Սիմոնյանը մինչ նիստի մեկնարկը հայտարարեց պատգամավորների անունները։ Նշենք, որ նիստը փակ անցկացնելու որոշումը կայացրեց ԱԺ մեծամասնությունը․ ընդդիմությունը դեմ էր այս որոշմանը։ Նիստին մասնակցում են Մհեր Գրիգորյանն ու Արարատ Միրզոյանը։ Հիշեցնենք, որ հրատապ նիստի առաջարկով հանդես էին եկել ընդդիմադիր «Հայաստան» և «Պատիվ ունեմ» խմբակցությունները։

15:35 - 09 ապրիլի, 2024

Եթե վարչապետը խոստացել է՝ չի կարող չանել. Անդրանիկ Քոչարյանը՝ ոսկեպարցիներին տված խոստման մասին |news.am|

news.am: Դրա համար հանձնաժողով կա, դրա համար այսօր՝ ժամը 14:30-ին, լսում ունենք, և՛ ԱԳ նախարար Արարատ Միրզոյանը, և՛ փոխվարչապետ Մհեր Գրիգորյանը լինելու են այստեղ, և հնարավորություն ունեք այդ հարցը տալ նրանց. Խոսքը վերաբերում է պետական սահմանի արձանագրման գաղափարի շուրջ գնացող քննարկումներին: Այս մասին, այսօր՝ ապրիլի 9-ին, ԱԺ-ում լրագրողների հետ զրույցում ասաց ԱԺ պաշտպանության հանձնաժողովի նախագահ Անդրանիկ Քոչարյանը՝ անդրչադառնալով հարցին, թե ո՞վ է նպատակահարմար գտել սահմանազատումը սկսել հենց Տավուշի մարզից: «Ամեն ինչ միտված է լինելու խաղաղության օրակարգին»,- ասաց նա՝ ընդգծելով՝ ԶՈՒ-ն ունի ծրագրով նախատեսված գործառույթներ, որն իրականացնում է: Լրագրողներից մեկի դիտարկմանը՝ կրակոցներով խաղաղություն լինո՞ւմ է՝ Քոչարյանը նշեց՝ կրակոցներ չպետք է լինեն. «Բայց կրակոցները մեզ 30 տարի ուղեկցում են, էլի են ուղեկցելու, ուրիշ բան, որ չպետք է թույլ տալ, որ այդ տրամաբանությունը մշտապես գործի: Կրակոցներն ի վերջո պետք է դադարեն, դրան հասնելու համար երկար ճանապարհ պետք է անցնենք, որովհետև այս թշնամանքը երկար տարիների հետևանք է: Այս թշնամանքը հաղթահարելն այդպես հեշտ չի լինելու, որովհետև խաղաղության հասնելը շատ ավելի բարդ է, քան պատերազմ մղելը, իսկ շատ դեպքերում պատերազմ անում են խաղաղությանը հասնելու համար»,- ասաց նա: Հարցին՝ իսկ կհասնե՞նք արդյոք խաղաղության, Անդրանիկ Քոչարյանը պատասխանեց՝ բոլոր պատերազմներն ի վերջո ավարտվում են: «Խաղաղության հասնելու համար պետք է ամեն օր զինված ուժերի կարողություններն ավելացնենք, պաշտպանական, բնականաբար»,- եզրափակեց խոսքը ԱԺ պաշտպանության և անվտանգության հարցերի մշտական հանձնաժողովի նախագահը: Լրագրողների դիտարկմանը, թե վարչապետը Ոսկեպարի բնակիչների հետ հանդիպման ժամանակ խոստացել էր, որ 10 օրից նորից կհանդիպի նրանց, սակայն արդեն 15 օրից ավելի է անցել՝ Քոչարյանը պատասխանեց. «Եթե վարչապետը խոստացել է, կարծում եմ՝ նա նկատի կունենա՝ հաշվի առնելով նաև իր զբաղվածությունը։ Եթե վարչապետը խոստացել է՝ չի կարող չանել»։

14:15 - 09 ապրիլի, 2024

Կառավարությունն առաջարկում է խստացնել սպանդանոցային գործունեության կանոնակարգմանն ուղղված վերահսկողությունը

12:32 - 09 ապրիլի, 2024

Բացահայտ սուտ են խոսակցությունները, թե սահմանազատումը և սահմանագծումը Տավուշից սկսելը ԳՇ-ն է առաջարկել. Օհանյան |aysor.am|

aysor.am: Կարծում եմ՝ բացահայտ սուտ են այն խոսակցությունները, թե սահմանազատումը և սահմանագծումը Տավուշից սկսելն առաջարկել է Գլխավոր շտաբը, այս մասին լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։ «Սահմանազատումը և սահմանագծումն իրականացնում է պետության ռազմաքաղաքական ղեկավարությունը, և իրենք պետք է հասկանան այն, որ Տավուշում մեր պաշտպանությունը բավականին բարձր մակարդակի է։ Այդ 4 գյուղերը, որոնց մասին խոսվում է, հայկական են, գտնվում են մեր տիրապետության տակ, միևնույն ժամանակ՝ այդ հատվածում բավականին տարածքներ գտնվում են Ադրբեջանի տիրապետության տակ։ Խոսել այն մասին, որ դրանք ադրբեջանական բնակավայրեր են, նշանակում է, որ մեր իշխանությունները չեն հասկանում, թե ինչ է նշանակում սահմանազատում և սահմանագծում, գնում են միակողմանի զիջումների»,-ասաց Սեյրան Օհանյանը։ Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը. «Դա միակողմանի պահանջ է»։

11:59 - 09 ապրիլի, 2024

Ռուբեն Ռուբինյանը ԵՄ խորհրդի ներկայացուցչին ներկայացրել է տարածաշրջանում տիրող անվտանգային իրավիճակը

Հայաստանի Ազգային ժողովի նախագահի տեղակալ Ռուբեն Ռուբինյանը, Արտաքին հարաբերությունների, Եվրոպական ինտեգրման ու Պաշտպանության և անվտանգության հարցերի մշտական հանձնաժողովների անդամներն ապրիլի 8-ին հանդիպել են Եվրոպական միության խորհրդի քաղաքական և անվտանգության հարցերով հանձնաժողովի նախագահ Դելֆին Պրոնկի գլխավորած պատվիրակությանը: Այս մասին հայտնում են ՀՀ ԱԺ-ից: Ողջունելով հյուրերի այցը Հայաստան՝ Ռուբեն Ռուբինյանը կարևորել է Հայաստան-ԵՄ բազմաշերտ համագործակցության խորացումը: ԱԺ փոխնախագահը ներկայացրել է տարածաշրջանում տիրող անվտանգային իրավիճակը, մարտահրավերները, խոսել Հայաստանի և Ադրբեջանի միջև խաղաղության գործընթացի առանցքային հարցերի շուրջ ՀՀ մոտեցումների մասին: Տարածաշրջանում անվտանգության ապահովման գործում հայ խորհրդարանականները կարևորել են Հայաստանում ԵՄ քաղաքացիական դիտորդական առաքելության դերը: Կողմերը քննարկել են մի շարք ոլորտներում ՀՀ-ԵՄ համագործակցության զարգացմանն առնչվող հարցեր: Անդրադարձ է կատարվել նաև ՀՀ-ԵՄ մուտքի արտոնագրերի ազատականացման շուրջ երկխոսության մեկնարկի անհրաժեշտությանը:

21:34 - 08 ապրիլի, 2024

Ալեն Սիմոնյանը և Մարիա Պեյչինովիչ Բուրիչը քննարկել են հայ ռազմագերիների և պատանդառված անձանց վերադարձի հրամայականը

ՀՀ Ազգային ժողովի նախագահ Ալեն Սիմոնյանն ապրիլի 8-ին ընդունել է ԵԽ գլխավոր քարտուղար Մարիա Պեյչինովիչ Բուրիչի գլխավորած պատվիրակությանը: Ինչպես հայտնում են ՀՀ ԱԺ-ից, հանդիպման սկզբում ԱԺ նախագահը ներկայացրել է Հայաստան-ԵԽ գործողությունների 2023-2026 թթ. ծրագրի ընթացքը` գոհունակությամբ փաստելով, որ այն թե՛ քաղաքական, թե՛ փորձագիտական գնահատականներով ընթանում է արդյունավետ: «Կարևորում ենք ԵԽԽՎ-ի՝ Հայաստանի ժողովրդավարական ինստիտուտների գործունեության վերաբերյալ վերջին մոնիթորինգային զեկույցի բարձր գնահատականը: Այժմ նախապատրաստվում է «Հայաստանի կողմից ստանձնած պարտավորությունների և հանձնառությունների կատարումը» զեկույցը, որը մենք կարևորում ենք բարեփոխումների արդյունավետ իրականացման տեսանկյունից»,- նշել է խորհրդարանի նախագահը: Մարիա Պեյչինովիչ Բուրիչը վերահաստատել է Եվրոպայի խորհրդի բարձր գնահատականը Հայաստանում իրագործվող բարեփոխումների և ժողովրդավարությանն ու խաղաղությանը հավատարիմ լինելու հանձնառության իրականացմանը: «Հայաստանն իր ժողովրդավարությամբ և արժեքներով ապացուցել ու ապացուցում է, որ հավատարիմ է մարդու իրավունքների պահպանման, խաղաղության և տարածաշրջանային անվտանգության կայունությանը միտված օրակարգին: Խաղաղությունը չունի այլընտրանք, և պետք է անել ամեն բան, որպեսզի այն հաստատվի հնարավորինս շուտ և լինի հարատև»,- նշել է ԵԽ գլխավոր քարտուղարը: Քննարկվել են ԵԽ-ի հետ համատեղ իրականացվող ծրագրերը, Կանանց նկատմամբ բռնության, ընտանեկան բռնության կանխարգելման, դրա դեմ պայքարի մասին կոնվենցիայի շուրջ տարվող աշխատանքները, Հայաստան-Ադրբեջան բանակցությունների գործընթացը, տարածաշրջանում անվտանգային իրավիճակը, հայ ռազմագերիների և պատանդառված անձանց վերադարձի հրամայականը, ինչպես նաև Հայաստան-ԵՄ հարաբերությունների հեռանկարները: Հանդիպմանը մասնակցել են ՀՀ ԱԺ նախագահի տեղակալ, ԵԽԽՎ-ում ՀՀ Ազգային ժողովի պատվիրակության ղեկավար Ռուբեն Ռուբինյանը և Եվրոպայի խորհրդում Հայաստանի Հանրապետության մշտական ներկայացուցիչ Արման Խաչատրյանը:

18:04 - 08 ապրիլի, 2024

Հանձնաժողովը դրական եզրակացություն է տվել ընտանիքում բռնության կանխարգելմանը միտված օրենսդրական նախաձեռնությանը

Ակնկալվում է, որ օրենսդրական փաթեթի ընդունման արդյունքում իրավական հիմքեր կստեղծվեն իրավակիրառ պրակտիկայում ի հայտ եկած խնդիրների լուծման, ընտանիքում բռնության կանխարգելման եւ դրա դեմ պայքարի, ինչպես նաեւ բռնության ենթարկված անձանց պաշտպանության եւ աջակցության արդյունավետ միջոցների իրականացման համար: ԱԺ մարդու իրավունքների պաշտպանության եւ հանրային հարցերի մշտական հանձնաժողովի՝ ապրիլի 8-ի նիստում երկրորդ ընթերցմամբ քննարկվել է ԱԺ «Քաղաքացիական պայմանագիր» խմբակցության պատգամավորներ Զարուհի Բաթոյանի, Սոնա Ղազարյանի եւ Ծովինար Վարդանյանի հեղինակած ««Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքում փոփոխություններ եւ լրացումներ կատարելու մասին» օրենքի լրամշակված նախագիծը՝ կից օրենսդրական փաթեթով: Այս մասին հայտնում են ՀՀ ԱԺ-ից։ Հիմնական զեկուցող Զարուհի Բաթոյանի տեղեկացմամբ փաթեթի՝ առաջին ընթերցմամբ ընդունվելուց հետո մի շարք առաջարկներ են ստացվել Կառավարությունից եւ պատգամավորներից, ԱԺ «Հայաստան» խմբակցությունից, որոնց մի մասն ընդունվել է: Փոփոխություններ նախաձեռնել են նաեւ հեղինակները: Ի թիվս այլ փոփոխությունների՝ փոխվել է նաեւ նախագծի վերնագիրը՝ ստանալով «Ընտանիքում եւ կենցաղային բռնության կանխարգելման, ընտանիքում եւ կենցաղային բռնության ենթարկված անձանց պաշտպանության եւ ընտանիքում համերաշխության վերականգնման մասին» անվանումը: Փոխվել է օրենքն ուժի մեջ մտնելու ժամկետը: Նախատեսվում է, որ այն ուժի մեջ կմտնի 2024 թվականի հուլիսի 1-ից: Կառավարության դրական կարծիքը ներկայացրել է ՀՀ ներքին գործերի նախարարի տեղակալ Արփինե Սարգսյանը: Հանձնաժողովը դրական եզրակացություն է տվել օրենսդրական փաթեթին: Այն նախատեսվում է քննարկել ԱԺ առաջիկա հերթական նիստերի ընթացքում:

15:58 - 08 ապրիլի, 2024

Հայաստանի կողմից զինատեսակների ձեռքբերումը միտված է տարածաշրջանում բալանսի վերականգնմանը. Քոչարյան |armenpress.am|

armenpress.am: Հայաստանի կողմից զինատեսակների ձեռքբերումը միտված է տարածաշրջանում սպառազինության խախտված բալանսի վերականգնմանը: Այս մասին ասաց Ազգային ժողովի պաշտպանության և անվտանգության հարցերի հանձնաժողովի նախագահ Անդրանիկ Քոչարյանը լրագրողների հետ զրույցում: «Մենք հիմա կենտրոնացած ենք պաշտպանական խնդիրների լուծմամբ՝ լինի ինժեներական բնույթի, հակաօդային պաշտպանության: Մեր ձեռքբերած կամ ձեռքբերվելիք զինատեսակները միտված են տարածաշրջանում սպառազինության խախտված բալանսի կարգավորմանը, որովհետև դրա խախտումն էր, որ հակառակորդին տվեց հնարավորություն՝ անցնել ռազմական գործողությունների, մեկ անգամ՝ 2016 թվականին, լայնամասշտաբ՝ 2020-ին»,-ասաց Քոչարյանը: Նա կարծում է, որ եթե ԶՈՒ-ն իր բարեփոխումների ծավալը շարունակական դարձնի, ոչ միայն բալանսը կվերականգնվի, այլ նաև բանակում ծառայողները կունենան այդ ամենը տնօրինելու հմտություններ: Դրան միտված են նաև բազմաթիվ այլ ծրագրեր:

14:33 - 08 ապրիլի, 2024

«Արեւմուտքը պատժամիջոցներ չի կիրառի Ադրբեջանի դեմ, մեր պաշտպանության խնդրի լուծումը գտնվում է Հայաստան պետության ձեռքում»․ Անդրանիկ Քոչարյան |aravot.am|

aravot.am: Ազգային ժողովի պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը լրագրողների հետ ճեպազրույցում անդրադարձավ հարցին, թե հնարավո՞ր է Արեւմուտքը պատժամիջոցներ ու գործուն քայլեր կիրառի Հայաստանի նկատմամբ Ադրբեջանի ագրեսիվ քաղաքականությունը զսպելու համար։ «Այս կրակոցների արդյունքում՝ չէ։ Նույնիսկ 44-օրյա պատերազմում, դրանից առաջ, քառօրյա պատերազմի ընթացքում, դրանից հետո որեւէ պատժամիջոց եղե՞լ է Ադրբեջանի նկատմամբ, ոչ»,- ասաց նա։ Անդրադառնալով ԵՄ հայտարարությանը, որ Հայաստանին ոչ մահաբեր զինատեսակներ կմատակարարեն, Քոչարյանն ասաց, որ զինատեսակները մահաբեր եւ ոչ մահաբեր դիտարկելը սխալ է, խոսքը պաշտպանական եւ ոչ պաշտպանական բնույթի զինատեսակների մասին է։ «Բնականաբար մենք հիմա կենտրոնացած ենք պաշտպանական խնդիրների լուծման վրա, դա կլինի ինժեներական բնույթի, հակաօդային պաշտպանության։ Այսինքն՝ մեր կողմից ձեռք բերված կամ ձեռքբերվելիք զինատեսակները միտված են տարածաշրջանում սպառազինության խախտված բալանսի կարգավորմանը, որովհետեւ դրա խախտումն էր, որ հակառակորդին տվեց հնարավորություն՝ անցնել ռազմական գործողությունների»,- ասաց նա։ Դիտարկմանը, որ Ադրբեջանը հիմա էլ է զինվում, դարձյալ անհամաչափություն կա, նա պատասխանեց․ «Ափսոս, որ դուք չունեք հնարավորություն, որ մասնակցեիք 2023 թվականի բյուջեի կատարողականի փակ քննարկմանը, որտեղ պաշտպանության նախարարը մանրամասն ներկայացրեց ոչ միայն սպասվելիք պայմանագրերի կատարումը, այլ նաեւ կնքված պայմանագրերի կատարված լինելը։ Մեր ընդդիմադիր գործընկերները ուշադիր լսեցին, նրանց մեկը-երկուսը նույնիսկ դուրս եկան եւ ձեր ներկայությամբ ասացին, որ իրենք հուզվել են եւ իրենց լացը եկել է։ Ես պատասխանեցի, որ կարելի էր հուզվել նաեւ այն կատարված աշխատանքի ծավալը լսելուց հետո, որով պետք է վստահություն ձեռք բերել, որ երկիրը պարապ նստած չէ։ Բայց այնքան ուրախացա, որ վերջերս ադրբեջանցիներն ինչ-որ դիրքից նկարել էին մեր ինժեներական դիրքերը։ Եվ ինչ-որ մեկը շատ լավ համեմատել էր՝ Սեյրան Օհանյանի «բանկա-բուտուլկեքը» եւ 2018 թվականից հետո մեր ինժեներական կառույցների տարբերությունը։ Մինչեւ լայնածավալ պատերազմը այդպիսի մի դիրք Ղարաբաղում կահավորել էին, եւ այնտեղ մենք ոչ միայն զոհ չունեցանք, վիրավոր էլ չունեցանք։ Ես կարծում եմ, որ եթե մեր Զինված ուժերն իր բարեփոխումների ծավալը շարունակական դարձնի, կհասնենք այն նպատակին, որ ոչ միայն բալանսը վերականգնվի, այլ նաեւ բանակում ծառայողները կունենան այդ ամենը տնօրինելու հմտություններ։ Ես չեմ ուզում թերագնահատել հակառակորդի ցանկությունները եւ նպատակները, բայց ես ուզում եմ, որպեսզի մենք բոլորս մի բան գիտակցենք, որ մեր պաշտպանության հիմնական խնդրի լուծումը գտնվում է Հայաստան պետության ձեռքում եւ մեր յուրաքանչյուր քաղաքացու մասնակցության շնորհիվ»։

14:22 - 08 ապրիլի, 2024

Հայաստանը Նիդեռլանդներում կունենա կապի սպա՝ Եվրոպոլի հետ փոխգործակցությունն ապահովելու համար |armenpress.am|

armenpress.am: Հայաստանն ընդլայնում է համագործակցությունը Եվրոպական միության իրավապահ ոլորտում համագործակցության գործակալության հետ անդրազդային հանցավորության դեմ պայքարում։ «Արմենպրես»-ի հաղորդմամբ՝ Ազգային ժողովի պաշտպանության և անվտանգության հարցերի մշտական հանձնաժողովի նիստում նախագիծը ներկայացրեց ՀՀ ներքին գործերի նախարարի տեղակալ Արփինե Սարգսյանը՝ ներկայացնելով 2023 թվականի հունիսի 27-ին եւ 2024 թվականի փետրվարի 5-ին ստորագրված «Հայաստանի Հանրապետության ներքին գործերի նախարարության եւ Եվրոպական միության իրավապահ ոլորտում համագործակցության գործակալության միջեւ փոխգործակցության մասին համաձայնագրի վավերացման նախագիծը։ Նախարարի տեղակալի խոսքով՝համաձայնագիրը միտված է անդրազդային հանցավորության դեմ պայքարին, մասնավորապես՝ թմրանյութերի ապօրինի շրջանառության, միգրանտների մաքսանենգության, կիբերհանցավորության, ակտիվների վերականգնման, փողերի լվացման, մարդկանց թրաֆիկինգի եւ այլ ոլորտներում: «Հաշվի առնելով Եվրոպոլի դերն ու նշանակությունը հատկապես Եվրոպայի տարածաշրջանում հանցավորության դեմ պայքարի ոլորտում՝ մեզ համար շատ կարևոր ձեռքբերում կլինի ապահովելու ներքին գործերի նախարարության և Եվրոպոլի միջև փոխգործակցությունը։ Մեր կապի սպան, որը կներկայացնի ամբողջ իրավապահ համակարգը, կունենա Նիդեռլանդներում համապատասխան նստավայր, որի միջոցով Եվրոպոլը կպարտավորվի ապահովել անվտանգ կապուղու համար անհրաժեշտ թե՛ ենթակառուցվածքները, թե՛ մնացյալ բոլոր համալրող սարքավորումները։ Համանման ենթակառուցվածք կունենանք նաև Հայաստանի Հանրապետության ներքին գործերի նախարարության շենքում։ Կապի սպան կունենա հասանելիություն իրավապահ համակարգի բոլոր հնարավոր դատաբազաներին, որոնք թույլ կտան ապահովելու փոխգործակցությունը Եվրոպական Միության և Հայաստանի Հանրապետության միջև։ Սա կապահովի 24/7 ռեժիմով սահուն համագործակցություն Եվրոպոլի և Հայաստանի միջև»,-եզրափակեց Սարգսյանը։

13:00 - 08 ապրիլի, 2024

Խանդանյանը Կանադայի դեսպանի հետ հանդիպմանը բարձր է գնահատել ոչ ԵՄ անդամ երկիր Կանադայի մասնակցությունը ԵՄ դիտորդական առաքելությանը

Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանն ապրիլի 5-ին ընդունել է մեր երկրում Կանադայի արտակարգ և լիազոր դեսպան Էնդրյու Թըրներին: Այդ մասին հայտնում են ԱԺ-ից: Ողջունելով հյուրին խորհրդարանում՝ Սարգիս Խանդանյանը շնորհավորել է Էնդրյու Թըրներին առաջին ռեզիդենտ դեսպան նշանակվելու կապակցությամբ և ընդգծել, որ Հայաստանում Կանադայի դեսպանության բացումը կնպաստի երկու երկրների միջև համագործակցության խորացմանը: Խոսելով հայ-կանադական միջխորհրդարանական կապերի զարգացման դրական դինամիկայի մասին՝ հանձնաժողովի նախագահը համոզմունք է հայտնել, որ մի շարք ոլորտներում առկա է համագործակցության չիրացված ներուժ: Հանդիպմանը քննարկվել են տարածաշրջանային անվտանգությանն առնչվող հարցեր: Կարևորելով Հայաստանի սահմանին ԵՄ դիտորդական առաքելության տեղակայումը՝ Սարգիս Խանդանյանը բարձր է գնահատել ոչ ԵՄ անդամ երկիր Կանադայի մասնակցությունն առաքելությանը: Հանձնաժողովի նախագահը երախտագիտություն է հայտնել կանադական կողմին Լեռնային Ղարաբաղից բռնի տեղահանվածների կարիքները հոգալուն ուղղված մարդասիրական օգնություն տրամադրելու համար: Շնորհակալություն հայտնելով ընդունելության համար՝ դեսպանը նշել է, որ կանի առավելագույնը նպաստելու խորհրդարանական կապերի սերտացմանը: Էնդրյու Թըրները նույնպես կարևորել է Կանադայի և Հայաստանի միջև ոլորտային համագործակցության զարգացումը:

17:45 - 05 ապրիլի, 2024

ԱԺ-ում քննարկվել են բենզինի և հեղուկ գազի վաճառքով զբաղվող ընկերությունների խնդիրները

ԱԺ տնտեսական հարցերի մշտական հանձնաժողովի՝ ապրիլի 4-ին կազմակերպած աշխատանքային քննարկման օրակարգում բենզինի և հեղուկ գազի վաճառքով զբաղվող ընկերությունների խնդիրներն էին: Քննարկմանը մասնակցում էին վառելիքի վաճառքով զբաղվող ընկերությունների, ոլորտի հետ առնչվող պետական մարմինների ներկայացուցիչներ: Այդ մասին հայտնում են ԱԺ-ից: Հանձնաժողովի նախագահի տեղակալ Բաբկեն Թունյանի տեղեկացմամբ՝ դեռևս փետրվարի 5-ին հանդիպել էին ոլորտի տնտեսվարողների հետ և քննարկել տարբեր հարցեր, որոնց մեծ մասը կապված է եղել գործող կարգավորումների հետ: Վառելիքի լիցքավորմամբ զբաղվող տնտեսվարողները ներկայացրել էին առաջարկներ և դժգոհություններ: «Պարզ դարձավ, որ խնդիրը կապված է ոչ թե տեսչական մարմինների հետ, այլ այն կարգավորումների, որոնց հիման վրա տեսչական մարմիններն աշխատում են»,- ասել է Բաբկեն Թունյանը և հավելել, որ այսօրվա հանդիպումը միտված է համապատասխան մարմինների ներկայացուցիչների հետ վերստին քննարկելու խնդիրները: «Հույս ունենք, որ այս հանդիպումը կավարտվի ավելի առարկայական եզրահանգումներով»,- ասել է նա: Տնտեսվարողների ներկայացուցիչ Արա Հովհաննիսյանը հայտնել է՝ խնդիրն այն է, որ ոլորտի գործունեության սկզբից ի վեր Հայաստանում առկա է այն իրավիճակը, որը գրեթե չի համապատասխանում միջազգայնորեն ընդունված կարգերին, ձևերին և նորմերին: «Այսօր իրողությունն այն է, որ ունենք բազմաթիվ՝ սեփականության վկայական ունեցող, շինարարական և համապատասխան բոլոր թույլտվություններով կառուցված ավելի քան 20-30 տարի շահագործվող օբյեկտներ, որոնք այսօր փակման վտանգի տակ են, քանի որ կիրառվում են մի քանի շինարարական նորմեր և կանոններ, որոնք անթույլատրելի են դարձնում համապատասխան տեսչական մարմնի կողմից տվյալ օբյեկտի գործունեությունը»,- ասել է նա: Արա Հովհաննիսյանը փոխանցել է տնտեսվարողների առաջարկը, այն է՝ վերանայել գործող շինարարական կանոնները և նորմերը, որ արդյունքում լինի այնպես՝ հնարավոր լինի տարանջատել գոյություն ունեցող և գործող օբյեկտը նոր կառուցվող և նախագծվող օբյեկտից: Ըստ նրա՝ 40-50 տարի առաջ մշակված նորմերն այլևս արդիական չեն տեխնոլոգիական և այլ առումներով: Ելույթ ունեցողը ներկայացրել է միջազգային փորձը, նշել, որ այսօրվա վառելիքը որակապես տարբերվում է մի քանի տասնյակ տարի առաջ եղած վառելիքից, հետևաբար բենզալցակայաններին ներկայացվող պահանջները պետք է համապատասխան լինեն: Ըստ նրա՝ վառելիքի վաճառքով զբաղվող օբյեկտների գործունեության արդյունքում այսօր 100 մլրդ դրամ մուտք է լինում պետբյուջե: Նշվել է, որ բենզալցակայանների մեծ մասում առկա է մեկ հրշեջ ջրածորան (հիդրանտ), սակայն պահանջվում է ունենալ երկուսը, ինչը խնդրահարույց է՝ ըստ տնտեսվարողների: Նշվել են նաև այլ պահանջներ: Պետական մարմինների ներկայացուցիչները բարձրաձայնել են իրենց կառույցների դիրքորոշումները, ինչպես նաև օրենսդրական այն պահանջները, որոնց պետք է համապատասխանեն ոլորտի կարգավորումները: Փաստարկվել է երկրորդ հիդրանտի կարևորությունն անվտանգության ապահովման տեսանկյունից: «Հայնախագիծ» ԲԲԸ տնօրենի խորհրդական Սաշուր Քալաշյանի խոսքով քաղաքաշինական նորմերը մի նպատակ ունեն. ապահովել բնակչության, մարդու ապրելու և արարելու անվտանգ միջավայրը: Նրա խոսքով ոչ մեկի համար գաղտնիք չէ, որ վերջին 20 տարիներին բենզալցակայանների մեծ մասը գործել է հախուռն կերպով, շատ անգամ առանց թույլտվության կամ սխալ թույլտվությամբ, այնուհետև, երբեմն անօրինական կերպով, ստացել կադաստրային գրանցում: «Բոլոր դեպքերում, բենզալցակայանների անվտանգությունը պետք է ապացուցվի կամ հիմնավորվի օրենքով, գիտականորեն՝ նկատի ունեմ: Գիտականորեն հասկացվի, վերլուծվի և որոշում կայացվի»,- ասել է նա: Ամփոփելով քննարկումը՝ հանձնաժողովի նախագահի տեղակալ Բաբկեն Թունյանը նշել է՝ պետք է այնպես անել, որ հաշվի առնվեն ե՛ւ տնտեսվարողների շահերը, ե՛ւ քաղաքացիների անվտանգության ապահովման հարցերը: Որոշվել է համապատասխան կառույցի համակարգմամբ շարունակել հարցի քննարկումը՝ նպատակ ունենալով վերանայել ոլորտի կանոնակարգումները:

18:28 - 04 ապրիլի, 2024

ՀԿ-ները հնարավորություն կունենան վերահսկելու ապաստան հայցողների ժամանակավոր տեղավորման կենտրոնի գործունեությունը |armenpress.am|

armenpress.am: Կառավարությունն առաջարկում է հասարակական կազմակերպություններին հնարավորություն ընձեռել վերահսկողություն իրականացնելու ապաստան հայցողների ժամանակավոր տեղավորման կենտրոնի գործունեության նկատմամբ։ ԱԺ պետական-իրավական հարցերի մշտական հանձնաժողովի նիստում նախագիծը ներկայացրեց Ներքին գործերի նախարարության միգրացիայի և քաղաքացիության ծառայության պետ Արմեն Ղազարյանը՝ մանրամասնելով ««Փախստականների և ապաստանի մասին» օրենքում լրացում կատարելու մասին» օրենքի նախագիծը։ Հիմնական զեկուցողի խոսքով՝ ակնկալվում է, որ նման վերահսկողության առկայությունը Միգրացիայի և քաղաքացիության ծառայությանը հնարավորություն կտա վեր հանել ապաստան հայցողների ժամանակավոր տեղավորման կենտրոնում առկա խնդիրները և այնտեղ բնակվող անձանց իրավունքների պաշտպանության համար անհրաժեշտ քայլերն ավելի արդյունավետ կազմակերպել: Նախագծի ընդունման արդյունքում կսահմանվեն համապատասխան իրավական հիմքերն ապաստան հայցողների ժամանակավոր տեղավորման կենտրոնում հասարակական վերահսկողություն իրականացնելու նպատակով հասարակական դիտորդների խմբի ստեղծման համար, ինչը կամրապնդի հասարակական կազմակերպությունների ու Միգրացիայի և քաղաքացիության ծառայության համագործակցությունը, հնարավորություն կստեղծի ապահովելու ապաստան հայցողների ժամանակավոր տեղավորման կենտրոնի գործունեության թափանցիկությունը: ՀՀ ԱԺ «Հայաստան» խմբակցության պատգամավոր Գեղամ Նազարյանը հետաքրքրվեց ապաստան հայցողների թվով և թե ո՞ր երկրներից են ապաստան հայցողները, ինչին ի պատասխան` Արմեն Ղազարյանը հայտնել է, որ 2020 թվականին ապաստան հայցողների թիվը կազմել է 206, 2021 թվականին` 260, 2022 թվականին` 968, ինչը հիմնականում պայմանավորված է եղել Ուկրաինայում տեղի ունեցող դեպքերով, 2023 թվականին` 817 անձ: Առաջին տեղերում ավանդաբար Մերձավոր Արևելքի երկրներից` Իրաքից, Սիրիայից, Եգիպտոսից դիմողներն են, 2022 և 2023 թվականներին միտումը փոխվել է. հիմնականում դիմել են Ուկրաինայից, Սիրիայից, Իրաքից: Հնդկաստանի քաղաքացիներից ապաստանի դիմումներ չեն եղել, ստացվել է 1-2 դիմում: Հարակից զեկույցող, «Քաղաքացիական պայմանագիր» խմբակցության պատգամավոր Ալխաս Ղազարյանը դրական գնահատեց նախագիծը` նշելով, որ այն միտված է ապաստան հայցողների իրավունքների պաշտպանությանը, ինչպես նաև ժամանակավոր տեղավորման կենտրոնի գործունեության թափանցիկության ապահովմանը: Հանձնաժողովը դրական եզրակացություն է տվել նախագծին:

14:59 - 02 ապրիլի, 2024