ՌԴ ԱԳՆ

Անգլո-սաքսոնները Մերձավոր Արևելքը մղում են դեպի մեծ պատերազմ. Լավրով |tert.am|

tert.am: Անգլո-սաքսոնական ուժերը Մերձավոր Արևելքի տարածաշրջանը մղում են մեծ պատերազմի շեմին. Արևմուտքի այս գիծը ավանդաբար հանգեցրել է ահաբեկչության աճի և փախստականների բազմամիլիոն հոսքերի: Այդ մասին, ՏԱՍՍ-ի փոխանցմամբ, ասել է Ռուսաստանի Դաշնության արտգործնախարար Սերգեյ Լավրովը։ «Այժմ մենք տեսնում ենք, թե ինչպես են անգլո-սաքսոնները բառացիորեն մղում Մերձավոր Արևելքը մեծ պատերազմի շեմին»,- ասել է ՌԴ ԱԳ նախարարը։ Նրա խոսքով՝ Արևմուտքի այս գիծը միանգամայն դրսևորվում է Ուկրաինայում, Իրաքում, Լիբիայում և Սիրիայում։ «Նման քաղաքականության մյուս արդյունքներն են ահաբեկչության և ծայրահեղականության աճը, մարդկային ճակատագրերի խեղումը, փախստականների բազմամիլիոն հոսքերը», - հավելել է Լավրովը։ ՌԴ ԱԳՆ ղեկավարը նշել է, որ ԱՄՆ-ի և նրա դաշնակիցների մեթոդները ներառում են աշխարհի տարբեր տարածաշրջաններում քաոս սերմանելու, երկրների ու ժողովուրդների միջև վեճերի, ազգամիջյան և միջկրոնական հակասությունների սրման փորձերը։ «Արևմուտքը սովոր է սեփական խնդիրները լուծել ուրիշների հաշվին, օգտագործել այլ մարդկանց ռեսուրսները: Ինչպես ասել է Պուտինը, «հեգեմոնի վարձը հանելու համար»», - նշել է նա:

14:26 - 06 նոյեմբերի, 2023

Մոսկվան Հռոմի ստատուտը շրջանցելու առաջարկ է արել Երևանին նախքան դրա վավերացումը․ ՌԴ ԱԳՆ-ն արձագանքել է Հակոբ Արշակյանի հայտարարություններին |tert.am|

tert.am: Նախքան Հայաստանի կողմից Միջազգային քրեական դատարանի Հռոմի կանոնադրությունը վավերացնելը Մոսկվան Երևանին այն շրջանցելու առաջարկ էր ներկայացրել։ Այս մասին «Лента.ру»-ի հարցմանն ի պատասխան հայտնել է ՌԴ արտաքին գործերի նախարարության մամուլի ծառայությունը։ Հաղորդվում է, որ հարցումը վերաբերել է ՀՀ ԱԺ փոխխոսնակ Հակոբ Արշակյանի այն հայտարարությանը, թե Հայաստանը դիվանագիտական խողովակներով Ռուսաստանին առաջարկել է երկկողմ միջպետական համաձայնագիր ստորագրել, որը կբացառի միջազգային դատարանի որոշումների կիրառումը երկու երկրներին վերաբերող հարցերում, սակայն այդպես էլ պատասխան չի ստացել: «Դա չի համապատասխանում իրականությանը», - նշել են ՌԴ ԱԳՆ-ում՝ շեշտելով, որ Մոսկվան պատասխանել է Երևանի առաջարկին։ «Երկկողմ խորհրդակցությունների ընթացքում ռուսական կողմը պատասխան առաջարկներ է ներկայացրել՝ գնալ ՄՔԴ մեխանիզմների գործարկման ճանապարհով՝ առանց Հռոմի կանոնադրության վավերացման: Նման պրակտիկա կա։ Ցավոք, մեր փոխզիջումային լուծումներն անտեսվել են», - հայտնել են ՌԴ ԱԳՆ-ից։ ՌԴ ԱԳՆ-ում նաև հավելել են, որ Երևանը զուտ քաղաքական դրդապատճառներով է Հռոմի ստատուտի վավերացման մասին որոշում ընդունել։ «Եթե Երևանում շարունակում են շահագրգռված մնալ սեփական ձեռքերով ստեղծված խնդիրների լուծման հարցում, ապա, մեր կարծիքով, հայկական իրավական համակարգի շրջանակներում դրա հնարավորությունները կան»,- հավելել են ՌԴ արտաքին քաղաքական գերատեսչությունում: Հիշեցնենք, որ վերոնշյալ հայտարարությունը ԱԺ փոխխոսնակն արել էր նոյեմբերի 2-ին՝ պատասխանելով «Ազատության» հարցին: «Այսինքն՝ իրավական առումով մենք կարող ենք ունենալ երկկողմ համաձայանգիր, որը բացառում է միջազգային դատարանի որոշումների կիրառումը երկու երկրներին վերաբերող հարցերում։ Մենք դա առաջարկել ենք, արձագանք չենք ստացել, բայց դեռ ժամանակ կա մինչև ուժի մեջ մտնելը և հույս ունեմ, որ պրոգրես կլինի», - ասել էր Արշակյանը՝ տեղեկացնելով, որ օրինակ Վաշինգտոնի հետ Երևանը նման համաձայնագիր ստորագրել է։

16:08 - 04 նոյեմբերի, 2023

Պաշտոնական Երևանը հայտնում է՝ Հռոմի ստատուտի վավերացման գործընթացի մասով ՌԴ-ից առաջարկություններ ստացել է, արձագանքել է |azatutyun.am|

azatutyun.am: Պաշտոնական Երևանը, «Ազատության» հարցմանն ի պատասխան, հաստատում է՝ Հայաստանի կողմից Հռոմի կանոնադրության վավերացման գործընթացի մասով ռուսաստանյան կողմից առաջարկություններ ստացել է։ Ըստ արտգործնախարարության՝ Երևանը նաև արձագանքել է առաջարկություններին։ Արտաքին քաղաքական գերատեսչությունը, սակայն, չի հստակեցնում, թե ինչ առաջարկությունների մասին է խոսքը։ «Ազատության» հարցմանն ի պատասխան, արտաքին քաղաքական գերատեսչությունից միայն նշել են․ - «Հայաստանի կողմից Հռոմի կանոնադրության վավերացման գործընթացի մասով ռուսաստանյան կողմից փոխանցված առաջարկությունների համատեքստում հայաստանյան կողմը հանդես է եկել համապատասխան երկկողմ պայմանագիր կնքելու առաջարկությամբ, որը կարող է փարատել ՌԴ մտահոգությունները, ինչի վերաբերյալ պաշտոնական գրավոր պատասխան ռուսաստանյան կողմից հայաստանյան կողմին չի ներկայացվել»։ Առավել մանրամասն՝ azatutyun.am-ում։

12:09 - 01 նոյեմբերի, 2023

ՌԴ ԱԳՆ է կանչվել ՌԴ-ում Հայաստանի գործերի ժամանակավոր հավատարմատարը․ Զախարովա

ՌԴ-ում Հայաստանի գործերի ժամանակավոր հավատարմատարը երեկ կանչվել է ՌԴ ԱԳՆ: Այս մասին հայտնել է Մարիա Զախարովան։ «Նրա ուշադրությանն են հրավիրվել ամենազազրելի հրապարակումները՝ ուղղված Ռուսաստանի ղեկավարությանը, ռուս դիվանագետներին և, ի դեպ, ռուս խաղաղապահներին, ովքեր վտանգում և զոհում են իրենց կյանքը, այդ թվում՝ Հայաստանի ժողովրդի անվտանգության համար։ Մատնանշվել է Հանրապետության տեղեկատվական դաշտում հակառուսական անսանձ արշավի անընդունելիությունը»,- ասել է Զախարովան։ Հիշեցնենք, որ դրանից մեկ օր առաջ՝ հոկտեմբերի 24-ին ՀՀ-ում ՌԴ դեսպանը նույնպես կանչվել էր ՀՀ ԱԳՆ․ նրան հանձնվել է համապատասխան բողոքի հայտագիր:

18:21 - 26 հոկտեմբերի, 2023

ՌԴ-ն պատրաստ է օգնել հայ-ադրբեջանական սահմանի սահմնազատմանը. Լավրով |hetq.am|

hetq.am: Մոսկվան պատրաստ է գործնականում օգնել Ադրբեջանի և Հայաստանի միջև սահմանազատման գործընթացի մեկնարկին։ Այդ մասին TACC գործակալության փոխանցմամբ լրագրողներին հայտնել է Ռուսաստանի արտաքին գործերի նախարար Սերգեյ Լավրովը՝ Թեհրանում «3+3» հարթակի հանդիպումից հետո։ «Բոլոր փորձագետներին քաջ հայտնի է, որ սահմանազատումը քննարկելու և համաձայնեցնելու համար անհրաժեշտ ամեն ինչ, առաջին հերթին խորհրդային տարիներից մնացած քարտեզները, գտնվում են Ռուսաստանի Դաշնության մոտ։ Գործընկերները դա հասկանում են: Մենք չենք փորձում դրանից մեծ խնդիր սարքել։ Թող իրենց բախտը փորձեն նաև Բրյուսելում, եթե ցանկություն ունեն, բայց մենք միշտ պատրաստ ենք իրապես օգնել իրական սահմանազատմանը»,- հայտարարել է ռուսաստանցի պաշտոնյան։ Լավրովը նշել է, որ վերջին մեկ տարվա ընթացքում Եվրամիությունը և ԱՄՆ-ն փորձել են ներգրավվել սահմանազատման գործընթացի մեջ և շարունակում են դա անել: «Վերջին մեկ տարվա ընթացքում փորձեր են եղել ներգրավվել սահմանազատման գործընթացում, առաջին հերթին, Եվրոպական միության և որոշ չափով Միացյալ Նահանգների կողմից։ Մենք դեմ չենք ցանկացած շփման, որը և հայերը, և ադրբեջանցիները իրենց համար օգտակար կհամարեն»,- հավելել է նա: Ռուսաստանցի նախարարը նաև հիշեցրել է, որ հայ-ադրբեջանական սահմանի սահմանազատման հարցին է նվիրված եղել Մոսկվայի, Բաքվի և Երևանի առանձին պայմանավորվածությունը: «Նրանք՝ հայերն ու ադրբեջանցիները, պայմանավորվել են ստեղծել սահմանազատման հանձնաժողով, որի աշխատանքներին իրենց համաձայնությամբ որպես խորհրդատու կմասնակցի ռուսական կողմը։ Ցավոք, բավական երկար ժամանակ այդ հանձնաժողովը չի գումարվել»,- հավելել է նա։

11:36 - 24 հոկտեմբերի, 2023

Լավրովը հայտնել է՝ Մոսկվան տարածաշրջանում «ՆԱՏՕ-ի երկրների շահերը Հայաստանի միջոցով առաջ տանելու փորձեր է տեսնում» |1lurer.am|

1lurer.am: Բիշքեկում ընթացող ԱՊՀ երկրների արտգործնախարարների խորհրդի նիստի շրջանակում Ռուսաստանի արտգործնախարար Սերգեյ Լավրովը պատասխանել է լրագրողների հարցերին, անդրադարձել Հայաստանի հետ հարաբերություններին: «Այն, ինչ վերաբերում է հակառուսական տրամադրությունների սրմանը, հիմնականում արհեստականորեն է արվում։ Մենք գիտենք այն հասարակական կազմակերպությունների քանակը, որոնք Հայաստանում ստեղծվել են վերջին տարիներին, թեև նախկինում ևս դրանք քիչ չեն եղել։ Այդ կազմակերպությունները չեն ստեղծվում Հայաստանի և Ռուսաստանի միջև բարեկամական հարաբերություններն առաջ մղելու նպատակով։ Ճիշտ հակառակը։ Դրանք միտված են հակառուսական տրամադրությունների և Հայաստանի միջոցով այդ տարածաշրջանում առաջին հերթին ԱՄՆ-ի, Եվրամիության, ինչպես նաև ՆԱՏՕ-ի երկրների շահերի առաջմղմանը հարմար հող նախապատրաստելուն։ Այդ փորձերը մենք տեսնում ենք, դրանք որոշ արդյունքների են հասնում։ Մենք խորապես համոզված ենք, որ հայ ժողովրդի ճնշող մեծամասնությունը շահագրգռված է Ռուսաստանի հետ ավանդաբար, պատմականորեն եղբայրական կապերի զարգացմամբ։ Եվ ձեր ուշադրությունը հրավիրեմ այն փաստին, որ մի քանի օր առաջ վարչապետ Փաշինյանը հարցազրույցի ընթացքում հստակ նշել է, որ Հայաստանը չի փոխում իր ուղենիշները։ Հուսանք, որ այդ դիրքորոշումը կգերակշռի՝ չնայած Երևանն այլ ուղղությամբ տանելու փորձերին»,- ասել է Լավրովը։

11:32 - 12 հոկտեմբերի, 2023

Հույս ունենք, երբ այս հակամարտությունն ավարտվի, կստեղծվի Պաղեստին պետություն. Լավրով |tert.am|

tert.am: Ռուսաստանի Դաշնությունը հուսով է, որ մերձավորարևելյան հակամարտության ներկա թեժ փուլի ավարտից հետո բոլորը լրջորեն կվերաբերվեն Պաղեստին պետության ստեղծման վերաբերյալ ՄԱԿ-ի Անվտանգության խորհրդի որոշումները կատարելու պարտավորությանը, ասել է ՌԴ ԱԳ նախարար Սերգեյ Լավրովը։«Մենք լիահույս ենք, որ երբ այս հակամարտությունն ավարտվի, իսկ մենք կոչ ենք անում անհապաղ այն ավարտել, բոլորը լրջորեն կստանձնեն պատասխանատվությունը՝ իրականացնելու ՄԱԿ-ի Անվտանգության խորհրդի որոշումները Պաղեստին պետության ստեղծման վերաբերյալ՝ հիմնված ՄԱԿ-ի կողմից հաստատված սկզբունքների վրա»,- լրագրողներին ասել է Լավրովը։

11:23 - 12 հոկտեմբերի, 2023

Հարավային Կովկասում մեր միակ նպատակը Հայաստանի ու Ադրբեջանի միջև խաղաղության ապահովումն է. ԱՄՆ պետքարտուղարություն |1lurer.am|

1lurer.am: ԱՄՆ պետքարտուղարության ներկայացուցիչ Մեթյու Միլլերը ճեպազրույցի ժամանակ, հղում անելով ՌԴ ԱԳ նախարար Սերգեյ Լավրովի հոդվածին, նշել է, թե վերջինիս պնդումներն այն մասին, որ ԱՄՆ-ն միջամտում է Հարավային Կովկասի գործերին, իրականությանը չեն համապատասխանում: «Հարավային Կովկասում մեր միակ նպատակը Հայաստանի ու Ադրբեջանի միջև հարաբերություններում խաղաղության ու կայունության ապահովումն է, ինչպես նաև ԼՂ ժողովրդի իրավունքների ու հումանիտար կարիքների պաշտպանության ապահովումը»,- ասել է նա Միլլերը նաև նշել է, որ Հատուկ ներկայացուցիչ Լուիս Բոնոյի` տարածաշրջանային այցի վերաբերյալ հատուկ հայտարարություններ այս պահին չկան:

10:14 - 11 հոկտեմբերի, 2023

ՌԴ և Իրանի ԱԳ նախարարները հանդես են եկել «3+3» ձևաչափով համատեղ աշխատանքների վերսկսման օգտին |1lurer.am|

1lurer.am: Հոկտեմբերի 10-ին իրանական կողմի նախաձեռնությամբ կայացել է հեռախոսազրույց ՌԴ և Իրանի ԱԳ նախարարների` Սերգեյ Լավրովի և Հոսեյն Ամիր Աբդոլլահիանի միջև: Այս մասին հայտնում են ՌԴ ԱԳՆ-ից: Նախարարները մտքեր են փոխանակել մերձավորարևելյան օրակարգային թեմաների շուրջ` կենտրոնանալով պաղեստինաիսրայելյան հակամարտության հերթական սրման վրա: Ընդգծվել է զինված դիմակայության շուտափույթ դադարեցման և հայտնի միջազգային-իրավական հիմքով իրավիճակի կարգավորման կարևորությունը: Քննարկվել է ընթացիկ իրավիճակը Հարավային Կովկասում: Նախարարները հանդես են եկել Հարավային Կովկասի «3+3» տարածաշրջանային խորհրդատվական հարթակի շրջանակներում համատեղ աշխատանքի օպերատիվ վերականգնման օգտին: Անդրադարձ է եղել երկկողմ համագործակցության` փոխադարձ հետաքրքրություն ներկայացնող մի շարք հարցերի: Հիշեցնենք, որ ՀՀ վարչապետ Նիկոլ Փաշինյանը հոկտեմբերի 10-ին Հանրային ՀԸ «Հարցազրույց» հաղորդման շրջանակներում հայտարարեց, որ պատրաստ են շարունակել աշխատանքը 3+3 ձևաչափում:

09:20 - 11 հոկտեմբերի, 2023

Զախարովան մեկնաբանել է հայ գերիների ազատ արձակման հարցում աջակցելու Մոսկվայի հնարավորությունները |news.am|

news.am: ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Մոսկվայի կողմից Ադրբեջանի կողմից գերեվարված հայ գերիների ազատ արձակմանն աջակցելու հնարավորությունը, այդ թվում՝ 2020 թվականին Արցախում 44-օրյա պատերազմի ժամանակ գերի ընկածների: «Եթե մենք խոսում ենք Ռուսաստանի քաղաքացիների մասին, անկախ նրանից, թե որտեղ են նրանք հայտնվել դժվարին իրավիճակում, իհարկե, մենք նրանց օգնություն կտրամադրենք մեր հնարավորություններով։ Եթե խոսքը Ռուսաստանի քաղաքացիների մասին չէ, իսկ այս դեպքում դուք խոսում եք Լեռնային Ղարաբաղի հետ կապված տարածքի մասին, ապա այս հարցն ավելի լավ է ուղղել Ադրբեջանի և Հայաստանի իշխանություններին։ Մենք ելնում ենք նրանից, որ ցանկացած իրավիճակում կալանավորված անձանց նկատմամբ պետք է կիրառվեն մարդասիրական իրավունքի նորմերը։ Իր հերթին մենք բազմիցս կոչ ենք արել գործընկերներին երկկողմ և եռակողմ ձևաչափերում ավարտին հասցնել գերիների փոխանակումը «բոլորը բոլորի հետ» սկզբունքով։ Հիմա, մեր կարծիքով, դրա համար շատ լավ պայմաններ են ստեղծված, հուսով ենք, որ այդ հարցը հաջողությամբ կլուծվի»,- նշել է նա։

18:04 - 10 հոկտեմբերի, 2023

ՌԴ խաղաղապահների գործունեությունը Լեռնային Ղարաբաղում կադապտացվի նոր իրողությանը․ Զախարովա |armeniasputnik.am|

armeniasputnik.am: ՌԴ խաղաղապահների գործունեությունը Լեռնային Ղարաբաղում կադապտացվի նոր իրողություններին։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ «Արդեն փակվել են ՌԴ խաղաղապահ զորակազմի մի շարք ստացիոնար ժամանակավոր դիտակետեր։ Մեր խաղաղապահներին վերաբերող սկզբունքային հարցերը քննարկվում են Բաքվում»,-ասել Է Զախարովան։ Նրա խոսքով՝ իրավիճակը Լեռնային Ղարաբաղում վերջին մեկ տարվա ընթացքում արմատապես փոխվել է, 2022 թվականի հոկտեմբերին Հայաստանի վարչապետը ԵՄ հովանու ներքո Պրահայում կայացած գագաթնաժողովում ԼՂ–ն ճանաչել է ադրբեջանական տարածք, վերահաստատել է իր դիրքորոշումը Բրյուսելում ընթացիկ տարվա մայիսին և հունիսին կայացած գագաթնաժողովներում։ Զախարովան հայտնել է, որ այս ամենից հետո պայմանները, որոնց համաձայն ՌԴ խաղաղապահները տեղակայվել էին 2020 թվականին, ճշգրտվել են սեպտեմբերի 19 տեղի ունեցած բախումների արդյունքում բնակչության զանգվածային արտագաղթիֆոնին:

17:27 - 10 հոկտեմբերի, 2023

ՌԴ խաղաղապահները պատրաստ են աջակցել խաղաղությանը՝ ի տարբերություն ԱՄՆ-ի և ԵՄ-ի. Լավրով |armeniasputnik.am|

armeniasputnik.am: Ղարաբաղում ռուսական խաղաղապահ զորախումբը պատրաստ է նպաստել Հարավային Կովկասում խաղաղ կյանքի հաստատմանը, մինչդեռ ԱՄՆ-ն ու ԵՄ-ն անկայունություն են սերմանում: Այս մասին ասվում է ՌԴ արտաքին գործերի նախարար Սերգեյ Լավրովի «ՄԱԿ-ի Կանոնադրության սկզբունքների պահպանումը՝ իր ամբողջականությամբ և փոխկապակցվածությամբ, միջազգային խաղաղության և կայունության գրավականն է» հոդվածում։ «Ներկայումս Բրյուսելը, հոգալով իր աշխարհաքաղաքական հավակնությունների մասին, իր «միջնորդական ծառայություններն» է պարտադրում Ադրբեջանին և Հայաստանին՝ Վաշինգտոնի հետ միասին ապակայունացում բերելով Հարավային Կովկաս։ Հիմա, երբ Երևանի և Բաքվի ղեկավարները միմյանց միջև կարգավորել են երկու երկրների ինքնիշխանության փոխադարձ ճանաչման հարցը, եկել է խաղաղ կյանքը դասավորելու, վստահության ամրապնդման ժամանակը։ Ռուսական խաղաղապահ զորախումբը պատրաստ է ամեն կերպ նպաստել դրան»,- ընդգծել է Ռուսաստանի արտաքին քաղաքական գերատեսչության ղեկավարը։ Լեռնային Ղարաբաղում ռուսական խաղաղապահ զորախումբը տեղակայվել է 44-օրյա պատրեազմից հետո՝ 2020 թվականի նոյեմբերի 9-ին Ադրբեջանի, Հայաստանի և Ռուսաստանի ղեկավարների կողմից ստորագրված հրադադարի մասին հայտարարության հիման վրա։ Ըստ հայտարարության՝ ՌԴ խաղաղապահ զորակազմի գտնվելու ժամկետը կազմելու է 5 տարի՝ հերթական 5- ամյա ժամկետներով ավտոմատ կերպով երկարաձգմամբ, եթե Կողմերից որևէ մեկը ժամկետի ավարտից 6 ամիս առաջ չհայտարարի սույն դրույթի կիրառումը դադարեցնելու մտադրության մասին:

10:29 - 10 հոկտեմբերի, 2023

ԱԳՆ-ն դեռևս հոկտեմբերի 4-ին է տեղեկացրել, որ Բիշքեկում ԱՊՀ ԱԳ նախարարների խորհրդի նիստին կմասնակցի ՀՀ ԱԳ նախարարի տեղակալը. Անի Բադալյան |1lurer.am|

1lurer.am: ՀՀ ԱԳՆ-ն դեռևս ս.թ. հոկտեմբերի 4-ին է գրավոր տեղեկացրել ԱՊՀ գործադիր կոմիտեին, որ հոկտեմբերի 12-ին ք. Բիշքեկում նախատեսվող ԱՊՀ ԱԳ նախարարների խորհրդի նիստին կմասնակցի ՀՀ ԱԳ նախարարի տեղակալը: Այդ մասին «Լուրերին» հայտնել է ԱԳՆ մամուլի խոսնակ Անի Բադալյանը: Ավելի վաղ ՌԴ փոխարտգործնախարար Միխայիլ Գալուզինը РБК-ի հետ հարցազրույցում հայտնել էր, որ Մոսկվան ցանկանում է Բիշքեկում կայանալիք ԱՊՀ ԱԳ նախարարների խորհրդի նիստի շրջանակում կազմակերպել Հայաստանի, Ռուսաստանի և Ադրբեջանի ԱԳ նախարարների եռակողմ հանդիպում: Դիվանագետը հայտնել էր, որ ադրբեջանական կողմից արդեն կա հանդիպման համաձայնություն:

17:36 - 09 հոկտեմբերի, 2023

Գալուզինը նշել է, թե որ դեպքում ՌԴ-Ն, ԵՄ-ն և ԱՄՆ-ն կարող են համատեղ աշխատել հայ-ադրբեջանական հարաբերությունների կարգավորման ուղղությամբ |armenpress.am|

armenpress.am: Ռուսաստանը, Եվրամիությունը և ԱՄՆ-ն կարող են համատեղ աշխատել Հայաստանի և Ադրբեջանի միջև հարաբերությունների կարգավորման ուղղությամբ միայն այն դեպքում, եթե Արևմուտքը հաշվի առնի Մոսկվայի միջնորդությամբ ձեռք բերված պայմանավորվածությունները: Այս մասին հայտարարել է ՌԴ փոխարտգործնախարար Միխայիլ Գալուզինը RBC-ին տված հարցազրույցում: «Կարող ենք միասին աշխատել հայ-ադրբեջանական կարգավորման ուղղությամբ, բայց այն ըմբռնմամբ, որ Եվրամիությունն ու ԱՄՆ-ն չեն վերցնելու մեր մշակումները և դրանք ներկայացնեն որպես իրենց առաջարկներ, այլ իրենց գործողությունները կտեղավորվեն հայ-ադրբեջանական կարգավորման այն ձևաչափերում, որոնք արդեն մշակվել են կողմերի միջև Ռուսաստանի միջնորդությամբ։ Հենց այս տեսանկյունից ենք մենք մոտենում Եվրամիության և ԱՄՆ-ի հետ շփումներին այդ հարցի շուրջ», - ասել է ՌԴ ԱԳ փոխնախարարը։ Գալուզինի խոսքով՝ կան խաղաղ կարգավորման ձևաչափեր, որոնք մշակվել են Ռուսաստանի, Ադրբեջանի և Հայաստանի միջև 2020 թվականին և դրան հաջորդող երկու տարիներին։ «Եվ եթե Եվրամիությունն ու ԱՄՆ-ն ցանկանում են օգնել դրանց իրագործմանը, ապա, իհարկե, մենք դրան չենք հակազդի: Բայց եթե խոսքը ռուսական մշակումներից օգտվելու և առանց Ռուսաստանի գործելու մասին է, հասկանալի է, որ նման մոտեցումը մեզ համար չի կարող ընդունելի լինել։ Եվրամիությունը ոչ այնքան մտահոգված է կարգավորմամբ, որքան տարածաշրջանից Ռուսաստանին դուրս մղելով։ Եվ դրանում ես տեսնում եմ անհասանելիին հասնելու արևմտյան կուրսի մի մասը, այն, ինչ նրանք փորձում են անվանել Ռուսաստանի միջազգային մեկուսացում։ Սա նման կուրսի դրսևորումներից մեկն է», - ասել է նա։

12:46 - 09 հոկտեմբերի, 2023

Հայաստանի վարչապետի կնոջ այցը Կիև վկայում է պաշտոնական Երևանի անբարյացակամ պահվածքի մասին. ՌԴ փոխարտգործնախարար |aysor.am|

aysor.am: Ռուսաստանը ակնկալում է, որ Հայաստանը համարժեք կգնահատի երկկողմ գործընկերության կարևորությունը, այս մասին ասել է ՌԴ փոխարտգործնախարար Միխայիլ Գալուզինը։ «Մենք մեծ հույս ունենք, որ Երևանը համարժեք կգնահատի ռուս-հայկական գործընկերության կարևորությունը, և դրանք կբխեն առաջին հերթին այն ամուր, դարավոր կապերից, որոնք միավորում են Ռուսաստանի և Հայաստանի ժողովուրդներին», - ասել է նա։ Խոսելով ռուս-հայկական հարաբերությունների մասին՝ Գալուզինը նշել է, որ Ռուսաստանի Դաշնությունը միշտ ելել է նրանից, որ բարդ հարցերը լուծելու է պրոֆեսիոնալ մակարդակով, դիվանագիտական ուղիներով։ «Բայց, ցավոք, հայկական կողմից մենք տեսանք Ռուսաստանի նկատմամբ հասարակական ոչ բարյացակամ հռետորաբանության ակտիվացում, ինչի արդյունքում մենք ստիպված եղանք սեպտեմեբրի 25-ին հրապարակել հայտարարությունը, այսինքն՝ այս հակասությունը հանրային տարածք տեղափոխեցինք միայն այն բանից հետո, երբ պաշտոնական Երևանի հակառուսական հռետորաբանության ինտենսիվությունը սկսեց մասշտաբներից դուրս գալ», - հավելել է նա։ «Չեմ ուզում այստեղ մեջբերել մեր բոլոր փաստարկները, որոնք վկայում են պաշտոնական Երևանի անբարյացակամ պահվածքի մասին, բայց միայն հիշեցնեմ այնպիսի քայլերի մասին, ինչպիսին է հայ-ամերիկյան զորավարժությունների անցկացումը, այնպիսի հանդուգն քայլեր, ինչպիսիք են Հայաստանի վարչապետի կնոջ այցը Կիև և շփումը Զելենսկու հետ, ինչպես նաև Հայաստանի խորհրդարանի նախագահ Ալեն Սիմոնյանի շփումը ուկրաինացի գործընկերոջ հետ։ Վերջերս Երևան են եկել տարբեր հյուրեր Եվրոպայից, որոնք նաև օգտագործել են Երևանը որպես հարթակ՝ տարբեր հակառուսական հայտարարությունների համար», - նշել է Գալուզինը։

11:30 - 09 հոկտեմբերի, 2023

Հայաստանի միացումը Հռոմի ստատուտին համարում ենք բացարձակապես ոչ բարեկամական քայլ. ՌԴ փոխարտգործնախարար |news.am|

news.am: Մենք մեր դաշնակից Հայաստանի միացումը Հռոմի ստատուտին համարում ենք բացարձակապես ոչ բարեկամական քայլ։ Այս մասին RBC-ին տված հարցազրույցում ասել է Ռուսաստանի փոխարտգործնախարար Միխայիլ Գալուզինը։ Նրա խոսքով, «բոլորի համար ակնհայտ է, որ ՄՔԴ-ն բառի բուն իմաստով արդարադատության հետ կապ չունի»։ «Սա քաղաքականացված արևմտամետ կառույց է, որը կատարում է Արևմուտքի չսիրած գործիչների քրեական հետապնդման հրամանները։ Այս դատարանը որոշ ժամանակ առաջ կալանքի օրդեր է տվել Ռուսաստանի բարձրագույն ղեկավարության ներկայացուցիչների նկատմամբ։ Փակագծերում նշեմ, որ, իհարկե, այդ հրամանները բացարձակապես իրավաբանորեն առոչինչ են։ Ռուսաստանի և նրա ղեկավարության նկատմամբ ՄՔԴ-ի բացարձակապես քաղաքականացված թշնամական դիրքորոշման ֆոնին մեր դաշնակից Հայաստանը որոշում է վավերացնել այս դատարանի կանոնադրությունը։ Ինչպե՞ս պետք է ընկալենք նման քայլը։ Միայն որպես, մեղմ ասած, ոչ բարեկամական»։ Նրա խոսքով՝ Ռուսաստանը հույս ուներ, որ Հայաստանը զերծ կմնա նման քայլից։ «ՄՔԴ-ի նույն կանոնները թույլ են տալիս, որ այն երկրների համար, որոնք ինչ-ինչ պատճառներով չեն ստորագրել Հռոմի ստատուտը, միանգամայն հնարավոր է դիմել այս դատարանի ծառայություններին՝ նույնիսկ առանց Հռոմի ստատուտը վավերացնելու: Այս պարադիգմում ես Հայաստանի առաջարկին լուրջ վերաբերվելու հնարավորություն չեմ տեսնում»,- նշել է դիվանագետը՝ մեկնաբանելով հայկական կողմի՝ այս հարցում երկկողմ համաձայնագիր կնքելու առաջարկը։ «Եվս մեկ անգամ կրկնում եմ՝ մեջբերում եք հայկական կողմի առաջարկը, որ ՄՔԴ-ի բացարձակապես անօրինական, անարդար, քաղաքականացված գործողությունների ֆոնին, որոնք արտահայտված են այսպես կոչված օրդերների արձակման մեջ, մենք փնտրելու ենք ինքներս մեզ՝ ապրիորի անօրինական որոշումներից պաշտպանվելու ուղիներ, որոնք մենք չենք ընդունում։ Ահա թե ինչի մասին է խոսքը: Եվ այս համատեքստում բացարձակապես ոչ բարեկամական քայլ ենք համարում մեր դաշնակից Հայաստանի՝ Հռոմի ստատուտին միանալը հիշյալ օրդերի առկայության ֆոնին։ «Այստեղ երկխոսության տեղ չեմ տեսնում»,- նշել է նա՝ հավելելով, որ այս հարցով խորհրդակցություններ են եղել Երևանի հետ։ «Մենք որոշակի առաջարկներ ենք արել։ Բայց, ըստ երեւույթին, կա՛մ Երեւանը դեռ մտածում է նրանց մասին, կա՛մ որոշել են չընդունել»,- ասաց նա։ Հիշեցնենք, որ հոկտեմբերի 3-ին Հայաստանի ԱԺ-ն վավերացրել է Հռոմի ստատուստը։

11:24 - 09 հոկտեմբերի, 2023