Մենք չիրացված մեծ հնարավորություններ ունենք. Միրզոյանը՝ հայ-ղազախական հարաբերությունների մասին |tert.am|

tert.am: ՀՀ-ն շահագրգռված է երկկողմ հարաբերությունների զարգացմամբ, և իհարկե, Ղազախստանի հետ հարաբերությունները շատ մեծ դեր ունեն։

Այս մասին այսօր Հայաստանի և Ղազախստանի ԱԳ նախարարների համատեղ մամուլի ասուլիսի ժամանակ հայտարարեց ՀՀ ԱԳ նախարար Արարատ Միրզոյանը։

«Այսօր կոնկրետ պայմանավորվածություններ կան՝ հարաբերությունները զարգացնելու համար։ Չենք կարող չանդրադառնալ տրանսպորտային կապերին։ Նոր հնարավորությունների բացահայտումը կարևոր ու առանցքային է մեզ համար։

Մենք մեր տեսլականն ունենք՝ խաղաղության խաչմերուկ, այն է՝ լոգիստիկ հնարավորություններ հիմնված երկրների հավասարության ու ինքնիշխանության սկզբունքների պահպանման վրա։ Ես մեկ անգամ ընդգծել եմ, որ ՀՀ-ն հավատարիմ է խաղաղության օրակարգին և գործադրում է բոլոր ջանքերը՝ դրան հասնելու համար»,- նշեց նա։

Նախարարը հիշեցրեց, որ այս տարվա սեպտեմբերին լրանում է Հայաստանի և Ղազախստանի միջև բարեկամության և համագործակցության մասին պայմանագրի 25-րդ տարեդարձը։

«Նշելով այս տարեդարձը՝ մենք միևնույն ժամանակ լավ հնարավորություն ունենք ամփոփել 25 տարվա գործընկերությունը և նոր էջ բացել մեր հարաբերություններում՝ ի շահ երկու երկրների բարօրության։

Անշուշտ, մենք ընդլայնում ենք մեր փոխգործակցության հիմքերը, մեր քաղաքական երկխոսության բարձր մակարդակը վկայում է անհրաժեշտ նախադրյալների մասին, մեր առևտրատնտեսական հարաբերությունները դինամիկ զարգանում են։ Այս ամենով հանդերձ՝ մենք չիրացված մեծ հնարավորություններ ունենք։

Այս հանդիպման ընթացքում եկել ենք եզրահանգման, որ երկու կողմն էլ ունեն պատրաստակամություն զարգացնել այդ հարաբերությունները և իրացնել այդ չիրացված հնարավորությունները»,- եզրափակեց Միրզոյանը։