22:25 - 17 սեպտեմբերի, 2024
Հայրենիքը պետություն է, սիրում ես հայրենիքդ, ուժեղացրու պետությունդ․ Հակոբ Արշակյանի ելույթը Համաշխարհային հայկական երկրորդ գագաթնաժողովում |armenpress.am|
armenpress.am: Հայաստանաբնակների և սփյուռքի մեր հայրենակիցների համատեղ շարժումը Հայաստան է բերում նոր գիտելիք, նոր հնարավորություններ, ներդրումներ, տեխնոլոգիաներ, հմտություններ, նոր միջոցներ ու ապրանքներ՝ Հայաստանը դարձնելով էլ ավելի զարգացած, աշխարհին կապակցված և համահունչ, որոշ դեպքերում նույնիսկ առաջանցիկ։
«Արմենպրես»-ի հաղորդմամբ՝ այդ կարծիքը հայտնեց ՀՀ ԱԺ փոխնախագահ Հակոբ Արշակյանը՝ ելույթ ունենալով Համաշխարհային հայկական երկրորդ գագաթնաժողովի բացման արարողության ժամանակ:
«Անհրաժեշտ է արձանագրել, որ տարեցտարի աշխարհն ավելի փոխկապակցված է դառնում։ Ավիացիան, տրանսպորտը, ինտերնետը, տեխնոլոգիաները միմյանց այնքան են մոտեցել, որ շատ հաճախ դժվարանում ենք նույնիսկ մտաբերել, թե այս կամ այն մեր գործընկերն արդյոք ապրում է Հայաստանում, թե արտերկրում։ Մեր շատ հայրենակիցներ զուգահեռաբար աշխատում են, արարում, կրթում, բուժում, բիզնեսով են զբաղվում, կառուցում և նորոգում են թե Հայաստանում, թե՛ արտերկրում, և այս շարժումը Հայաստան է բերում նոր գիտելիք, նոր հնարավորություններ, նոր ներդրումներ, նոր մարդիկ, նոր տեխնոլոգիաներ, հմտություններ, նոր միջոցներ ու ապրանքներ՝ Հայաստանը դարձնելով էլ ավելի զարգացած ու աշխարհին կապակցված և համահունչ, որոշ դեպքերում նույնիսկ առաջանցիկ»,- ասաց Արշակյանը։
ԱԺ փոխնախագահն արտերկրից ժամանած մեր հայրենակիցներին ասաց, որ նրանց ոչ մի քայլ, ոչ մի ներդրում, փոխանցված ոչ մի գիտելիք կամ ծառայություն անհետևանք չի մնում, բարիք է բերում հայ ժողովրդին և Հայաստանի Հանրապետությանը։ «Եվ ուրեմն եկեք մեկտեղենք մեր ջանքերը՝ կառուցելու էլ ավելի ուժեղ և զարգացած երկիր, կիրթ, առաջադեմ, հոգատար ու աշխատասեր հանրություն։ Այսօրվա օրակարգում ընդգրկված են ՀՀ անկախության, անվտանգության, ժողովրդավարության ամրապնդմանն ու համայնքային կապերի զարգացմանն առնչվող, ինչպես նաև հարցեր։ Անկախ այն հանգամանքից, թե որտեղ է ապրում յուրաքանչյուր հայ, այս գործընթացին մասնակից լինելը յուրաքանչյուրիս պարտականությունն է։ Հայրենիքը պետություն է, սիրում ես հայրենիքդ, ուժեղացրու պետությունդ»,- ասաց ԱԺ փոխնախագահը։
Արշակյանը հույս հայտնեց, որ գագաթնաժողովի արդյունքները նշանակալի կլինեն և հիմք կհանդիսանան մեր ազգային ինքնության և միասնականության խորացման համար։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)