civilnet.am: Կառավարությունը ապրիլի 3-ի նիստին որոշեց խստացնել պարտադիր զինվորական կամ այլընտրանքային ծառայությունից, ինչպես նաև վարժական հավաքներից խուսափելու համար նախատեսված քրեական պատիժները։

Նախագծով առաջարկվում է փոփոխություններ կատարել Քրեական օրենսգրքի 461-րդ և 462-րդ հոդվածներում՝ խստացնելով պատասխանատվությունը։ Մասնավորապես, պարտադիր զինվորական կամ այլընտրանքային ծառայության զորակոչից խուսափելու համար նախատեսված ազատազրկման ներկայիս 2-5 տարվա սահմանը կփոխարինվի 3-6 տարվա ազատազրկմամբ։ Վարժական հավաքներից խուսափելու համար նախատեսված պատիժը կդառնա 1-3 տարի ազատազրկում, կխստացվի նաև տուգանքի չափը։

Փոփոխությունները պայմանավորված են զինվորական կամ այլընտրանքային ծառայության զորակոչից, ինչպես նաև վարժական հավաքներից խուսափելու դեպքերի աճով։

Կառավարության ներկայացրած հիմնավորման համաձայն՝ 2023 թվականին նախաձեռնվել է 1,499 քրեական վարույթ, 2024 թվականին՝ 1,779 քրեական վարույթ։

«Սա վկայում է քրեական քաղաքականության վերանայման և հիշյալ արարքները կատարած անձանց նկատմամբ պատժողական խիստ քաղաքականության որդեգրման անհրաժեշտության մասին»,- նշված է հիմնավորման մեջ։