Արդեն ութ օր ընդդեմ Քարվաճառում փոքր հէկաշինության հացադուլ իրականացնող Ալեքսանդր Քանանյանի ինքնազգացողությունը նկատելիորեն վատացել է։ Այս մասին հայտնել է նրա ընկերներից մեկը։
Վերջինս մասնավորապես գրել է․ «Ահազանգ բոլոր ոչ անտարբեր մարդկանց. առավոտյան այցելեցի Ալեքսին, ով արդեն 8-րդ օրն է` հացադուլ է անում` ընդդեմ Քարվաճառում փոքր հէկաշինության: Նախորդ օրերի ընթացքում Ալեքսին այցելել են տասնյակներով մարդիկ, ինքն այցելել է Ստեփանակերտ, Քաշաթաղի շրջան, տարբեր հանդիպումներ ունեցել մտահոգ քաղաքացիների հետ, նրանց մանրամասնորեն բացատրել խնդրի էությունն ու շրջանում փոքր հէկաշինության վտանգները: Հանդիպել է նաև Արցախի մի քանի բարձրաստիճան պաշտոնյաների:
Ութնօրյա հացադուլն ու երկար զրույցներն ակնհայտ ազդել են Ալեքսի առողջական վիճակի վրա. չեմ ուզում խուճապ տարածել, բայց Ալեքսի ինքնազգացողությունն այսօր նկատելի վատթարացել է»:
Հիշեցնենք, որ Արցախի Շահումյանի շրջանի Քարվաճառ քաղաքի բնակիչ, քաղաքագետ Ալեքսանդր Քանանյանը հունվարի 21-ին հացադուլ էր հայտարարել իր տան բակին կից փոքր հէկ-երի շինարարական աշխատանքները դադարեցնելու պահանջով:
Դրանից երեք օր անց՝ հունվարի 24-ին, նա հանդիպել էր Արցախի պետնախարար Գեորգի Մարտիրոսյանի հետ։ Հանդիպումից հետո Քանանյանը նշել էր, որ այն անցել է կառուցողական ձգտման միջավայրում՝ միաժամանակ արձանագրելով, որ Արցախի «քաղաքական ղեկավարությունը» դեռ լիովին չի ըմբռնում իրավիճակի լրջությունը։ Արդյունքում որոշել էր շարունակել հացադուլը։
comment.count (0)