lragir.am:  Հարցազրույց ԱԺ «Իմ քայլը» խմբակցության պատգամավոր Վլադիմիր Վարդանյանի հետ։

Պարոն Վարդանյան, գրեթե ամեն օր «օրենքով գողերի» են բերման ենթարկում, արդարադատության նախարար Ռուստամ Բադասյանն էլ ասում է, որ քրեական ենթամշակույթի դեմ պայքարին ուղղված օրենքն ինչ-որ առումով սկսել է գործել և իրեն արդարացնել: Ձեր կարծիքով հնարավոր լինելո՞ւ է այս պայքարը հասցնել տրամաբանական ավարտին և այդ ենթամշակույթը կրողներին պատասխանատվության ենթարկել:

Իմ մոտեցումը հստակ է. որևէ անձ, որը չի կատարել քրեորեն պատժելի արարք, չպետք է հայտնվի ազատազրկման վայրերում, և որևէ մեկը, ով կատարել է այդպիսի արարք, չպետք է մնա անպատիժ: Հիմա այն կանոնակարգումները, որոնք նախատեսված են քրեական ենթամշակույթի դեմ պայքարի առումով, այդ մեխանիզմներն ուղղված են նրան, որպեսզի այդ ենթամշակույթը վերացվի և արարքների մի մասը՝ քրեական ենթամշակույթին հարելը և այլն, դիտարկվում է որպես քրեորեն պատժելի արարք: Եթե իրավապահ մարմիններն այս առումով իրականացնում են համապատասխան միջոցառումներ, ապա որևիցե բան ես չեմ կարող ավելացնել: Պարզապես, մի բան է այստեղ կարևոր, որպեսզի բոլոր այն երաշխիքները, որոնք տրվում են անձին դատաիրավական պաշտպանության ոլորտում, պետք է պահպանվեն:

Իսկ ընդհանրապես ինչպիսի՞ն է ձեր մոտեցումը գրեթե ամեն օր «օրենքով գողերի» բերման ենթարկելու փաստի վերաբերյալ:

Ես չեմ ուզում կրկին դուրս գալ իմ լիազորություններից և չեմ ուզում մխրճվել իրավապահ մարմինների աշխատանքի մեջ, որովհետև ամեն մեկը Սահմանադրության 6-րդ հոդվածի համաձայն պետք է իրականացնի այն, ինչը սահմանված է օրենքով: Պետք է ասեմ, որ եթե նման մտավախություններ կան, ապա դրա համար կան դատական իշխանության շրջանակներում համապատասխան ընթացակարգեր, որոնց միջոցով հնարավոր է ի հայտ բերել, թե արդյոք իրավապահ մարմինը գործել է իրավաչափ, թե ոչ: Երկրորդ, ցանկացած անձ իրավունք ունի դատական պաշտպանության միջոցներից օգտվել և այստեղ օրենսդրական կարգավորման հետ կապված խնդիրներ այս պահին չեմ կարող վեր հանել: Այն, որ քրեական ենթամշակույթի դեմ պետք է պայքարել, և այդ պայքարը չափազանց կարևոր է և քաղաքական, և իրավական, նաև բարոյահոգեբանական մթնոլորտը բարելավելու տեսանկյունից, դա իմ կարծիքով, ոչ ոք չի վիճարկում: Օրենքը կա, օրենքի գործողությունը նոր է սկսել, այն, ինչպես նշել է պարոն Բադասյանը, զգալի արդյունք է տալիս: Մենք պարզապես պետք է հետևենք, թե ինչպես է կատարվում այդ օրենքը և ինչպիսի խնդիրների կարող ենք բախվել օրենսդրական մակարդակում:

Դուք տեսնո՞ւմ եք օրենքի ուժի մեջ մտնելուց հետո որոշակի փոփոխություն՝ քրեական ենթամշակույթի դեմ պայքարի առումով:

Ես տեսնում եմ, որ քրեական ենթամշակույթի դեմ բավականին ակտիվ պայքար է տարվում:

Շարունակությունը՝ Lragir.am-ում։