ԱՄՆ-ն պատրաստ է շարունակել աջակցել Ադրբեջանին և Հայաստանին խաղաղության պայմանագրի ստորագրման հարցում։ Այս մասին Բաքվում Իլհամ Ալիևի հետ հանդիպումից հետո լրագրողների հետ զրույցում հայտարարել է ԱՄՆ Պետդեպի կովկասյան բանակցությունների գծով ավագ խորհրդական Լուի Բոնոն։
«Խաղաղության պայմանագիրը պետք է կայուն լինի։ Եվ դա պետք է բխի կողմերից (Հայաստանից և Արբեջանից-խմբ․), այլ ոչ թե ԱՄՆ-ից կամ այլ երկրներից»,- ասել է Լուի Բոնոն։
Լուի Բոնոն նշել է՝ Վաշինգտոնի համար կարևոր է, որ Ադրբեջանը և Հայաստանը շփումներ ունենան՝ անկախ միջնորդական ձևաչափից։
«Մեր վերջնական նպատակը Ադրբեջանի և Հայաստանի միջև խաղաղության հասնելն է։ Խաղաղությունը երկու կողմերին էլ ձեռնտու է։ Մյունխենի հանդիպմանը երկու կողմերն էլ հայտարարել են, որ խաղաղություն են ուզում»,- ասել է նա։
Բոնոն հավելել է, որ վաղը՝ մարտի 7-ին, մեկնելու է Հայաստան։
«Իմ այցի նպատակը (տարածաշրջան-խմբ․) կողմերին երկխոսության և նոր հանդիպման խրախուսումն է»,- ասել է նա։
Հիշեցնենք, որ Ադրբեջանի նախագահ Իլհամ Ալիևը այսօր Բաքվում ընդունել է ԱՄՆ Պետդեպի կովկասյան բանակցությունների գծով ավագ խորհրդական Լուի Բոնոյին։ Զրույցի ընթացքում մտքեր են փոխանակվել Ադրբեջանի և Հայաստանի միջև հարաբերությունների կարգավորման և խաղաղության պայմանագրի շուրջ բանակցային գործընթացի մասին։
comment.count (0)