aysor.am: Երևան համայնքը և անձամբ Երևանի քաղաքապետն ունի ուղղակի պարտավորություն՝ ապահովելու Երևանի աղբահանությունը և սանիտարական մաքրումը, այսօր լրագրողների հետ ճեպազրույցի ընթացքում հայտարարեց Երևանի քաղաքապետի մամուլի խոսնակ Հակոբ Կարապետյանը։
«Այդ պարտավորությունը 2013 և 2015 թվականների պայմանագրերի համաձայն քաղաքապետարանը պատվիրակել է «Սանիթեք» ընկերությանը։ Եվ քանի որ մենք բոլորս արձանագրում ենք, որ «Սանիթեքը» պատշաճ կերպով իրեն պատվիրակված լիազորությունը չի իրականացնում, քաղաքապետարանը ձեռնարկում է միջոցառումներ, որպեսզի իր ուղղակի պարտականությունը կատարի։ Այդ միջոցառումների թվում են աղբատար մեքենաների ձեռքբերումը և կիրառումը, և աղբամանների ձեռքբերումն ու տեղադրումը», - ասաց Հակոբ Կարապետյանը։
«Սանիթեք» ընկերությունը, հիշեցնենք, հայտարարություն է տարածել, որում նշված է, թե քաղաքապետարանի կողմից ապօրինի կերպով հեռացվում են «Սանիթեք» ընկերության աղբադույլերը, չեն կատարվում սահմանված վճարումները, որի արդյունքում իրավիճակը դուրս է գալիս վերահսկողությունից:
Քաղաքապետի ամուլի խոսնակն ասաց, որ աղբամանների տեղադրումը Դավթաշեն վարչական շրջանում եղել է օրենքի տառին համապատասխան։
«Քաղաքապետարանը համապատասխան գրություններ է ուղարկել «Սանիթեքին» և այլ կառույցներին, որպեսզի տեղյակ պահի իր գործողությունների մասին։ Տեղափոխված աղբամանները հիմա գտնվում են պահպանվող տարածքում», - նշեց Կարապետյանը։
Ինչ վերաբերում է վճարումներին, Հ. Կարապետյանն ասաց, որ քաղաքապետարանը կիրառում է տույժեր և պահումներ «Սանիթեք» ընկերության նկատմամբ այն չափով, որ չափով իրենք չեն կատարում իրենց պարտավորությունները։