Դավիթ Տոնոյան

ՀՀ պաշտպանության նախկին նախարար:

Ծնվել է 1967թ.դեկտեմբերի 27-ին։ Մասնագիտությամբ ռազմական դիվանագետ է: Ծառությունը սկսել է 1992թ.-ից` ՀՀ ՆԳՆ կազմակերպված հանցավորդության դեմ պայքարի գլխավոր վարչությունից: 1994-2017 տարբեր պաշտոններ է զբաղեցրել ՀՀ Պաշտպանության նախարարությունում` հասնելով մինչև ՊՆ նախարարի տեղակալի պաշտոնը։ 2017թ.-ին նշանակվել է ՀՀ ԱԻՆ նախարար։

2018թ.-ի մայիսից ՀՀ վարչապետ Նիկոլ Փաշինյանի որոշմամբ նշանակվել է պաշտպանության նախարար։ 2020 թվականի նոյեմբերի 20-ին՝ արցախա-ադրբեջանական պատերազմի ավարտից տասն օր անց ազատվել է պաշտոնից։

Տոնոյանի դեպքի հետ կապված բոլոր մարդիկ այլևս չեն աշխատում համակարգում․ նախարար
 |arm.sputniknews.ru|

Տոնոյանի դեպքի հետ կապված բոլոր մարդիկ այլևս չեն աշխատում համակարգում․ նախարար |arm.sputniknews.ru|

arm.sputniknews.ru: Բոլոր այն մարդիկ, որոնք այս կամ այն կերպ ներգրավված են եղել ՀՀ պաշտպանության նախկին նախարար Դավիթ Տոնոյանի հետ կապված դեպքին, չեն աշխատում համակարգում։ ՀՀ ԱԺ պետաիրավական հարցերի մշտական հանձնաժողովի այսօրվա նիստի ժամանակ այս մասին հայտարարեց ՀՀ արդարադատության նախարար Գրիգոր Մինասյանը։ Հիշեցնենք, որ 2023 թ. օգոստոսի 1-ին ԱԱԾ մեկուսարանից ՀՀ պաշտպանության նախկին նախարար Դավիթ Տոնոյանին ԱԺ քննիչ հանձնաժողովի նիստին տեղափոխման ճանապարհին Տոնոյանը խնդրել է ուղեկցողներին, որ թույլ տան կարճ ժամանակով տեսակցել մորը: ՔԿ ծառայության պետը Դավիթ Տոնոյանին թույլատրել է տեսակցել մորը, ինչից հետո ազատվել է աշխատանքից։ «Դավիթ Տոնոյանի հետ կապվածը առեղծվածային պատմություն էր, որի պատճառով բազմաթիվ ազատումներ եղան համակարգում։ Այս պատմության մեջ ականատեսը եղանք բազմաթիվ տարօրինակությունների, քանի որ ինչ-որ մի բան այն չէր։ Դրա արդյունքում եղավ ծառայողական քննություն, եղան կարգապահական տույժեր և եղան հեռացումներ»,- հայտարարեց նախարարը։
11:16 - 26 մարտի, 2024
Իմ նկատմամբ քրեական հետապնդումն ուղղորդվում է անձամբ Փաշինյանի կողմից․ Դավիթ Տոնոյանի հայտարարությունը

Իմ նկատմամբ քրեական հետապնդումն ուղղորդվում է անձամբ Փաշինյանի կողմից․ Դավիթ Տոնոյանի հայտարարությունը

ՀՀ պաշտպանության նախկին նախարար Դավիթ Տոնոյանը հայտարարություն է տարածել, որը ներկայացնում ենք ստորև․ «Վերջին ամիսներին հարկ չէի համարում արձագանքել Քրեակատարողական ծառայության և «ԵՐԵՎԱՆ-ԿԵՆՏՐՈՆ» ՔԿՀ նախկին պետերին զբաղեցրած պաշտոններից ազատելը ինձ վերագրվող «միջադեպի» հետ կապելու մասին բազմաթիվ ուղորդված մանիպուլատիվ հրապարակումներին: Սակայն փետրվարի 14-ին կայացած Քրեակատարողական ծառայության 2023 թ․ գործունեության հաշվետվության քննարկման ընթացքում Նիկոլ Փաշինյանի հայտարարություններն անարձագանք թողնել չեմ կարող:   Ի սկզբանե պարզ էր, որ թեմայի շուրջ «կիսաճիշտ» հրապարակումներն ուղորդվում են անձամբ վարչապետի կողմից, ինչը փետրվարի 14-ին փաստացի հաստատեց ինքն անձամբ: Զավեշտալին այն է, որ վարչապետը փորձում էր դա քողարկել «պետության հեղինակության» մասին հոգ տանելու եւ «օրենքի հանդեպ վերաբերմունք» ձեւավորելու անհրաժեշտությամբ: Հիշյալ խորհրդակցության ժամանակ Նիկոլ Փաշինյանի և Արդարադատության նախարարի ելույթներով հիմնավորվեց 2 կարևոր փաստ: Նախ այն, որ իմ նկատմամբ քրեական հետապնդումն ունի քաղաքական ենթատեքստ, ուղղորդվում է անձամբ Փաշինյանի կողմից և այդ միջամտությունը այն աստիճան խորն է, որ վերջինս հետևում է իմ բոլոր քայլերին, այդ թվում՝ մորս հետ տեսակցություններին և այդ մասին չի խորշում խոսել հրապարակայնորեն: Թե ինչու է իմ նկատմամբ քրեական հետապնդումը կրում քաղաքական բնույթ, կարծում եմ, բոլորին էլ պարզ է։ Իսկ ինձ տրամադրված կարճաժամկետ մեկնման ընթացքի հանդեպ Փաշինյանի սևեռուն ուշադրությունը, համոզված եմ, կապված էր իմ` ԱԺ Քննիչ հանձնաժողովի նիստերում արտահայտված մտքերի և դիրքորոշումների հետ: Հիմնական «մտահոգիչ» պատասխանները հանրային չեն եղել և դրանց չհրապարակելը բխում է բացառապես ՀՀ անվտանգության ապահովման և ազգային շահերից եւ պայմանավորված չէ վարչապետի կերպարին չվնասելու «մտավախությամբ»: Հատկապես, որ դժվար է հավելյալ վնաս հասցնել անձի, որը չի խորշում անգամ դեպքից շուրջ 6,5 ամիս անց ներխուժել անձնական տարածք եւ շահարկման առարկա դարձնել այն, ինչը սրբություն է բոլոր նորմալ մարդկանց համար: Երկրորդ կարևոր փաստն այն էր, որ հիշյալ խորհրդակցության ժամանակ Արդարադատության նախարարն անդրադարձել է դատավորի «խնդրահարույց որոշմանը»՝ փաստացի հաստատելով, որ 2023 թվականի օգոստոսի 1-ին ՀՀ ԱԺ մեկնելիս և վերադառնալիս թե իմ, թե Քրեակատարողական ծառայության աշխատակիցների տրամադրության տակ եղել է բացառապես ինձ կարճաժամկետ մեկնում տրամադրելու մասին դատարանի 2023 թվականի հուլիսի 27-ին կայացված որոշման եզրափակիչ մասի քաղվածքը, ըստ որի դատարանը ինձ իրավունք էր վերապահել հանձնաժողովի աշխատանքներից դուրս առնվազն երկու ժամ լինել կարճաժամկետ մեկնման մեջ, ինչն էլ օգտագործելով՝ նախընտրել եմ հանդիպել մորս: Միգուցե այդ ժամանակը տրամադրվել էր այլ նպատակների համար, որը, սակայն որոշման մեջ հասկանալի պատճառներով չէր ընդգրկվել և փայլուն օգտագործվել է իմ և ՔԿՀ աշխատակիցների դեմ: Այսինքն, օգոստոսի 1-ին ո՛չ իմ, ո՛չ Քրեակատարողական ծառայության աշխատակիցների գործողությունները չեն հակասել ո՛չ օրենքին, ո՛չ առկա որոշմանը: Այս առումով, միգուցե կարիք կա, որ Արդարադատության նախարարը վարչապետին լրացուցիչ ներկայացնի «կարճաժամկետ մեկնում» գործիքակազմի մանրամասները: Իսկ իմ գործը քննող, առանց այդ էլ անկողմնակալությամբ չփայլող դատավորի կողմից կայացված որոշումը վարչապետի մասնակցությամբ նախարարի կողմից «խնդրահարույց» որակելն ու այդ կապակցությամբ ինչ-որ շարունակական ուսումնասիրության մասին հայտարարություններն անցնում են բացահայտ ճնշման սահմանները և հաստատում հանրության աչքից հեռու, իմ կամքին հակառակ հանրությունից ծածուկ իրականացվող փակ դատավարության ընթացքը գործադրի կողմից ուղղորդված լինելը:  Կարծում եմ, որ որևէ գիտակից մարդ՝ հետևելով գործով զարգացումներին և ծանոթանալով նշված խորհրդակցությունը, այլևս չի կարող հավատալ, որ իմ գործը շինծու և հրահանգավորված չէ, իմ նկատմամբ կալանքն օրինական է և հնարավորություն կա արդարադատություն իրականացնելու: Հ.Գ. Վարչապետին կամ իր խորհրդականներին նաեւ խորհուրդ կտամ մինչ «ընդհուպ արձակուրդ» տրամադրելու իրավասության մասին հրապարակային հայտարարություններ  կատարելը ուշադիր ուսումնասիրել կալանավորված անձանց մասին օրենսդրությունը և այն, թե արդյո՞ք այդպիսին գոյություն ունի ՀՀ օրենսդրության մեջ»:    
09:53 - 29 փետրվարի, 2024
Հաստատվում են մտահոգություններս, որ քննիչ հանձնաժողովի նախագահն իրական քննության փոխարեն զբաղված է եղել պարտությունը ԶՈւ-ի վրա «փաթաթելու» գործով. Դավիթ Տոնոյանի հայտարարությունը

Հաստատվում են մտահոգություններս, որ քննիչ հանձնաժողովի նախագահն իրական քննության փոխարեն զբաղված է եղել պարտությունը ԶՈւ-ի վրա «փաթաթելու» գործով. Դավիթ Տոնոյանի հայտարարությունը

ՀՀ պաշտպանության նախկին նախարար Դավիթ Տոնոյանը հանդես է եկել հայտարարությամբ, որը ներկայացնում ենք ստորև․ «Քաղաքական շահարկումներ ու բամբասանքներ՝ փաստերի փոխարեն 2024 թվականի հունվարի 11-ին Հանրային հեռուստաընկերության եթերում ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը, պատասխանելով 44-օրյա պատերազմում պարտության պատճառների վերաբերյալ «համապարփակ հարցին», արել է հայտարարություններ, որոնք հաստատել են 44-օրյա պատերազմի հանգամանքների ուսումնասիրման նպատակով ստեղծված քննիչ հանձնաժողովի իրական նպատակների վերաբերյալ նախկինում բազմիցս արտահայտված իմ մտահոգությունները։ Խոսելով պարտության պատճառներից՝ Անդրանիկ Քոչարյանը հիշատակել է «առանձին դրվագներ», մասնավորապես անդրադարձել է այն քրեական գործին, որով անցնում եմ ես ու մի շարք նախկին բարձրաստիճան զինվորականներ, որն արժանացել է հանձնաժողովի նախագահի «մանրամասն ուսումնասիրությանը»։ Հատկանշական է, որ Անդրանիկ Քոչարյանի հայտարարությունները ոչ միայն բամբասանք ու զրպարտանք պարունակող քաղաքական շահարկումներ են, այլև հակասում են ՀՀ «Ազգային ժողովի կանոնակարգ» սահմանադրական օրենքի 23-րդ հոդվածի 2-րդ մասի պահանջներին, որով հստակ ձևակերպված է, որ Քննիչ հանձնաժողովի քննության առարկա չեն կարող հանդիսանալ նախնական քննության կամ դատավարության որևէ այլ փուլում գտնվող հարցերը, ինչպես նաև այն հարցերը, որոնք հաստատվել կամ հերքվել են օրինական ուժի մեջ մտած դատական ակտով: «Անորակ հրթիռների» գործով դատավճիռ դեռևս չի կայացվել, իսկ դատարանն այդպես էլ չընդունեց բաց դատավարություն անցկացնելու վերաբերյալ իմ և մյուս «մեղադրյալների» բազմաթիվ միջնորդությունները, քանզի բաց դատավարության անցկացման պարագայում հանրությանը հնարավորություն էր տրվելու տեսնել, որ գործ ունենք ոչ միայն անհիմն մեղադրանքի, այլև, ինչպես նախկինում հայտարարել եմ, քրեադատավարական փաթեթավորմամբ «թավշյա» քաղաքական հետապնդման հետ։ Ուստի, հաստատվում են դեռևս ԱԺ քննիչ հանձնաժողովի բաց նիստում բարձրաձայնված այն մտահոգություններս, որ 44-օրյա պատերազմի քննիչ հանձնաժողովի նախագահն իր ողջ գործունեության ընթացքում, իրական քննության փոխարեն, զբաղված է եղել պարտությունը զինված ուժերի վրա «փաթաթելու» գործով, և հենց այդ տրամաբանությունից են բխում Հանրային հեռուստաընկերության եթերում հնչեցված զրպարտիչ և օրենքին հակասող հայտարարությունները։ Սույն հայտարարությամբ ՀՀ Գլխավոր դատախազի ուշադրությունն եմ հրավիրում օրենքի վերը նշված կոպտագույն խախտման փաստի վրա»:
09:17 - 16 հունվարի, 2024
Դավիթ Տոնոյանը կշարունակի մնալ կալանքի տակ. դատարանը մերժել է միջնորդությունը
 |armeniasputnik.am|

Դավիթ Տոնոյանը կշարունակի մնալ կալանքի տակ. դատարանը մերժել է միջնորդությունը |armeniasputnik.am|

armeniasputnik.am: ՀՀ պաշտպանության նախկին նախարար Դավիթ Տոնոյանը կշարունակի մնալ կալանավորված։ Հակակոռուպցիոն դատարանը՝ դատավոր Վահե Դոլմազյանի նախագահությամբ, մերժել է նրա նկատմամբ ընտրված խափանման միջոց կալանավորումն առավել մեղմ խափանման միջոցով փոխարինելու միջնորդությունը։ Տեղեկությունը Sputnik Արմենիային հայտնեց փաստաբան Անդրանիկ Մանուկյանը։ Տոնոյանի խափանման միջոցի փոփոխման հարցը երեկ քննարկվել է Հակակոռուպցիոն դատարանում։ Նրա կալանքն անազատության հետ չկապված խափանման միջոցով փոխարինելու միջնորդություն ներկայացրել է պաշտպանական կողմը՝ պնդելով, որ Տոնոյանին կալանքի տակ պահելու հիմքեր չկան։ Հիշեցնենք` 2021-ի սեպտեմբերի 30-ին ԱԱԾ-ն հայտնեց, որ Դավիթ Տոնոյանն ու զենքի մատակարարմամբ զբաղվող Դավիթ Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։ Նույն օրն ևեթ Տոնոյանն ու Գալստյանը կալանավորվեցին։ Այս գործով մեղադրանք է առաջադրվել նաև ԳՇ նախկին պետ Արտակ Դավթյանին, ԳՇ պետի նախկին տեղակալ Ստեփան Գալստյանին, ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին: Ստեփան Գալստյանը 2023 թվականի դեկտեմբերին ազատ արձակվեց 25 մլն դրամ գրավի դիմաց։
17:01 - 10 հունվարի, 2024
Այսպես կոչված «խաղաղության օրակարգը» զուտ «ցանկության» հռչակում է․ Դավիթ Տոնոյան |mediamax.am|

Այսպես կոչված «խաղաղության օրակարգը» զուտ «ցանկության» հռչակում է․ Դավիթ Տոնոյան |mediamax.am|

mediamax.am: ՀՀ պաշտպանության նախկին նախարար Դավիթ Տոնոյանի հարցազրույցը Մեդիամաքսին - Պարոն Տոնոյան, սեպտեմբերի 19-ին հրահրված նոր պատերազմի արդյունքում Արցախը հայաթափվեց, սակայն ակնհայտ է, որ Ադրբեջանի ախորժակը դրանով չի բավարարվելու: Ակնհայտ է նաև, որ Հայաստանի իշխանությունները չեն դիտարկում Բաքվի նկրտումները ուժով զսպելու տարբերակը և առաջնորդվում են «խաղաղության օրակարգով»: Ո՞րն է ՀՀ Զինված ուժերի անելիքը այս պայմաններում: - Վերջին երեք տարիներն ի ցույց դրեցին այն դառն իրականությունը, որ այսօր մենք ունակ չենք ՀՀ շահերը պաշտպանելու համար դիմակայել թուրք-ադրբեջանական տանդեմին: Առաջին հերթին՝ ունակ չենք լիարժեք ռազմական դիմադրություն ապահովել: Խորքային պատճառներից մեկն այն է, որ 26 տարիների ընթացքում, 1994 թվականից ի վեր, ՀՀ Զինված ուժերը պաշտպանական կեցվածք որդեգրելու արդյունքում ենթարկվեցին առերևույթ լճացման, ինչը ռազմաքաղաքական ղեկավարությունը փորձում էր չեզոքացնել դաշնակից և գործընկեր երկրների հետ ռազմական համագործակցության միջոցով (կրթական ծրագրեր, վարժանքներ, զորավարժություններ) և, ի վերջո, ՀՀ-ում ռազմական ներկայությամբ: Այսօրվա պայմաններում Զինված ուժերը, չունենալով նախկին՝ Արցախի ժողովրդի անվտանգության ապահովման «շարժառիթավորումը», չունենալով վստահելի ռազմական համագործակցություն այնպիսի ռազմական ուժի հետ, որը հնարավորություններ կընձեռի նոր անվտանգային միջավայր ձևավորելու և նոր` ժամանակակից կարողություններ ստեղծելու համար, կարճ ժամանակահատվածում կարող են վերածվել «գաղթակայանը» պաշտպանող պահակախմբի: Իսկ այսպես կոչված «խաղաղության օրակարգը» զուտ «ցանկության» հռչակում է: Հանրությանն անհայտ է այն խաղաղության պայմանագրի բովանդակությունը, որը ՀՀ վարչապետը պատրաստ է ստորագրել մինչև տարվա վերջ: - Ի՞նչ եք առաջարկում անել ստեղծված իրավիճակում: - Հայաստանի Զինված ուժերը բարոյահոգեբանական շոկային իրավիճակից հանելու և մարտունակության նոր մակարդակի վրա դուրս բերելու համար պետք է առնվազն 5 տարի, իսկ ԱԺ ընտրություններ Հայաստանում կլինեն միայն 2.5 տարի հետո: Արդյո՞ք կառավարությունում առկա է ռիսկերի գնահատում առաջիկա 5 կամ 10 տարվա համար, թե «խաղաղության պայմանագրի» ստորագրումից կամ առավել ևս չստորագրելուց հետո ինչպիսին է լինելու մեր արտաքին և պաշտպանական քաղաքականությունը: Գրեթե համոզված եմ, որ այդպիսի միջգերատեսչական վերլուծություն կամ գնահատական իրավիճակին տրված չէ: Մասնավորապես, խիստ կասկածում եմ, որ ԶՈՒ Գլխավոր շտաբը կառավարությունից ստացել է ԶՈՒ կիրառման խնդիրները և նպատակները` նոր «հետ-Արցախյան» պայմաններում: Արդյո՞ք պաշտպանական բարեփոխումների տեմպը բավարար է: Ինչպես տեսնում եմ, հայ-ադրբեջանական մոտ 1 000 կիլոմետրանոց սահմանի երկայնքով մարտական հերթապահությունը մեծամասամբ շարունակում են իրականացնել ժամկետային զինծառայողները: Համոզված եմ, որ հրատապ է միջազգային ռազմական և ռազմատեխնիկական համագործակցության «տասնապատկումը»: Հակառակ դեպքում ՀՀ Զինված ուժերը Սահմանադրությամբ իրենց վրա դրված պարտականությունները, մասնավորապես` տարածքային ամբողջականության և սահմանների անձեռնմխելիության ապահովումը ունակ չեն լինելու իրագործել: Զինված ուժերի զարգացումն ապահովելու նպատակով հրատապ խնդիր է ՀՀ անվտանգության ապահովման համար ռազմաքաղաքական դաշինքային հարաբերությունների կամ ոչ բլոկային` չեզոքության կարգավիճակի ընտրությունը, որը նույնպես պետք է ամրագրվի միջազգային եղանակով: ՀՀ իշխանությունները պարտավոր են նաև աշխարհաքաղաքական տեսանկյունից հաշվի առնել Ռուսաստանի, Թուրքիայի և Իրանի՝ Հարավային Կովկասում «մնայուն շահերը» և հավաքական Արևմուտքի «մնայուն հավակնությունները»: Եթե այսօրվա իշխանություններն ունակ չեն այդպիսի հրատապ որոշում կայացնել և գնում են հայ ժողովրդի դիմակայունության պաշարի մնացորդները սպառելու ճանապարհով, ապա պետք է սեղմ ժամկետում գնալ նոր ընտրությունների՝ ՀՀ քաղաքացիներին հնարավորություն տալով ընտրել այն ուժերին, որոնց կվստահեն ՀՀ անվտանգության ապահովման, դաշնակիցներին ընտրելու կամ ոչ բլոկային չեզոքության կարգավիճակի ընտրության հարցը: Շարունակությունը՝ mediamax.am-ում
12:17 - 23 հոկտեմբերի, 2023
Դավիթ Տոնոյանի հայտարարությունը՝ Ադրբեջանի կողմից մի շարք անձանց ազատությունից ապօրինաբար զրկելու վերաբերյալ |hetq.am|

Դավիթ Տոնոյանի հայտարարությունը՝ Ադրբեջանի կողմից մի շարք անձանց ազատությունից ապօրինաբար զրկելու վերաբերյալ |hetq.am|

hetq.am: Պաշտպանության նախկին նախարար Դավիթ Տոնոյանը հայտարարություն է տարածել՝ անդրադառանալով Ադրբեջանի կողմից մի շարք անձանց ազատությունից ապօրինաբար զրկելուն։ Հայտարարությունն ամբողջությամբ ներկայացնում ենք ստորև. «Անտանելի ցավով տեղեկացա Ալիեւի վարչակարգի կողմից Ռուբեն Վարդանյանին և մեր գեներալներին առեւանգելու եւ ազատությունից ապօրինաբար զրկելու մասին:  Ռուբենը պարկեշտ մարդ է, հայ ժողովրդի նվիրյալ զավակ եւ բացառիկ հայրենասեր: Պատահական չէ, որ հենց նրան է թիրախավորել Ալիեւը՝ չներելով այն պայքարը, որը Ռուբենը ծավալեց Արցախում պետնախարարի պաշտոնում եւ այն թողնելուց հետո: Ռուբեն Վարդանյանին ճանաչելով մոտ 45 տարի, կարող եմ վստահաբար ասել, որ նա կորով ունեցող տղամարդ է, որը ոչ միայն պատվով դուրս կգա այս փորձությունից, այլեւ շատերի համար հայի արժանապատվության վերականգնման խորհրդանիշ կդառնա: Զորակցություն եմ հայտնում Լեւոն Մնացականյանին, Դավիթ Մանուկյանին, Դավիթ Բաբայանին եւ վստահ եմ, որ Արցախի ազատագրական պայքարում անուրանալի դերակատարություն ունեցած անձինք տոկունությամբ կհաղթահարեն նաեւ այս փորձությունը:: Ճակատագրի դառը հեգնանք կա նրանում, որ երկու տարի շինծու քրեական գործով գտնվելով անազատության մեջ, այսօր գրում եմ իմ դպրոցական ընկերոջ և զինակիցների մասին, ովքեր հայտնվել են թշնամական իշխանության բանտում: Հայրենի իշխանությունների բոլոր ճյուղերի «ջանասիրության» շնորհիվ կտրված եմ արտաքին աշխարհի հետ կապ ունենալու հնարավորությունից եւ, ցավոք, չեմ կարող միանալ բոլոր գերիների ազատության համար ձեռնարկվող ջանքերին: Վստահ եմ, որ դեռ առիթ կունենամ խոսելու գավառամտության հետևանքով չչեզոքացված մարդկային աղետի վերաբերյալ»։
10:52 - 01 հոկտեմբերի, 2023
Առկա են հիմնավոր կասկածներ առ այն, որ դատարանը միտումնավոր է հետաձգում Դավիթ Տոնոյանի խափանման միջոցը փոփոխելու վերաբերյալ միջնորդության քննարկումը․ փաստաբանական խմբի հայտարարությունը

Առկա են հիմնավոր կասկածներ առ այն, որ դատարանը միտումնավոր է հետաձգում Դավիթ Տոնոյանի խափանման միջոցը փոփոխելու վերաբերյալ միջնորդության քննարկումը․ փաստաբանական խմբի հայտարարությունը

Դավիթ Տոնոյանի պաշտպանական խումբը հերթական հայտարարությունն է հրապարակել՝ կապված Դավիթ Տոնոյանի խափանման միջոցը փոփոխելու վերաբերյալ միջնոդրության քննության հետ։ Հայտարարությունն ամբողջությամբ ներկայացնում ենք ստորև. «Դավիթ Տոնոյանի նկատմամբ դեռևս 2021 թվականից մտացածին մեղադրանքների հիման վրա նախաձեռնված բացահայտ «քրեադատավարական փաթեթավորմամբ քաղաքական» հետապնդման առաջին իսկ օրվանից Դավիթ Տոնոյանի պաշտպանական խումբը հայտարարել է հարուցված քրեական գործի շինծու և անհիմն լինելու վերաբերյալ: Ակնհայտ ապօրինություններով և պաշտպանական որոլտի վերաբերյալ ոչ կոմպետենտ մեղադրանքներով զուգորդվող քրեական վարույթը նպատակ է հետապնդում Դավիթ Տոնոյանին հնարավորինս երկար ժամանակ հասարակությունից մեկուցացված պահել: Այդ ապօրինի մտադրության հերթական ապացույցը ներկայացվում է ստորև․ Այսպես, Դավիթ Տոնոյանի նկատմամբ իրականացվող քրեական վարույթի շրջանակներում դատարանի կողմից արդեն հարցաքննվել են բոլոր վկաները և երկու ամբաստանյալ։ Որևէ վկայի կողմից Դավիթ Տոնոյանի և մյուսների նկատմամբ առաջարդված մեղադրանքը հիմնավորող որևէ ցուցմունք չի տրվել։ Ի սկզբանե Դավիթ Տոնոյանին կալանքի տակ պահելու հիմքում դատարանը դրել էր հենց վկաների նկատմամբ ապօրինի ազդեցություն գործադրելու կասկածը։ Ակնհայտ էր, որ Դավիթ Տոնոյանին շարունակական կալանքի տակ պահելու համար անհրաժեշտ էր մոգոնել նոր հիմք, քանի որ դատակոչված վկաներին հարցաքննելուց հետո Դավիթ Տոնոյանին անազատության մեջ պահելու հիմքերը սպառվում էին և դատարանը ստիպված էր լինելու ազատել նրան կալանքից։ Ըստ այդմ՝ առանցքային վկաներին հարցաքննելուց հետո ՀՀ Հակակոռուպցիոն դատարանի դատավոր Վահե Դոլմազյանի կողմից Դավիթ Տոնոյանի կալանքը այլ խափանման միջոցով փոխարինելու միջնորդության քննության արդյունքում կայացվեց դատական ակտ, որով Դավիթ Տոնոյանին կալանքի տակ պահելու հիմքերին ավելացվեց նաև ամբաստանյալների նկատմամբ ապօրինի ազդեցություն գործադրելու կասկածը, որը զուրկ էր որևէ հիմնավորումից։         Ասվածը հաստատվել ՀՀ Վերաքննիչ հակակոռուպցիոն դատարանի 27.07.2023 թվականի որոշմամբ, որով դատարանի կողմից մասնակի բավարարվեց Դավիթ Տոնոյանի նկատմամբ կիրառված խափանման միջոցը գրավով փոխարինելու վերաբերյալ միջնորդությունը մերժելու մասին ՀՀ Հակակոռուպցիոն դատարանի վերոնշյալ որոշման դեմ ներկայացված վերաքննիչ բողոքը այն հիմնավորմամբ, որ Հակակոռուպցիոն դատարանն առանց որևէ հիմնավորման բողոքարկվող որոշման մեջ նշել է Դավիթ Տոնոյանին անազատության մեջ պահելու նոր հիմք (ամբաստանյալների նկատմամբ ապօրինի ազդեցություն գործելու կասկածը): Վերաքննիչ դատարանի վերոնշյալ դատական ակտը 08.08.2023 թվականից փոխանցվել է ՀՀ Հակակոռուպցիոն դատարան` նոր քննության։ Հակակոռուպցիոն դատարանը, նախագահությամբ դատավոր Դոլմազյանի, պարտավոր էր ՀՀ Սահմանադրության 27-րդ հոդվածի 5-րդ մասի պահանջների համաձայն ապահովվել այդ միջնորդության անհապաղ քննությունը: Այլ կերպ, դատարանը պարտավոր էր Վերաքննիչ դատարանի որոշումը ստանալուց հետո անմիջապես՝ սեղմ ժամկետում ձեռնամուխ լինել Վերաքննիչ դատարանի որոշման պահանջների կատարմանը, այն է` Դավիթ Տոնոյանի կալանքը այլ խափանման միջոցով փոխարինելու միջնորդությունը քննարկելուն: Մինչդեռ, դատավոր Դոլմազյանի կողմից Վերաքննիչ դատարանի որոշումը ստանալուց հետո արդեն տեղի է ունցել թվով երեք դատական նիստ,  սակայն դատարանը դեռևս չի քննարկել միջնորդությունը` այլ դատական նիստերով ծանրաբեռնված լինելու պատճառաբանություններով չավարտելով հարցաքննվող ամբաստանյալի հարցաքննությունը և դրանով փաստացի հետաձգելով օրինական ուժի մեջ մտած դատական ակտի պահանջի կատարումը։ Վերոգրյալով պայմանավորված առկա են հիմնավոր կասկածներ առ այն, որ դատարանը միտումնավոր է հետաձգում Դավիթ Տոնոյանի խափանման միջոցը փոփոխելու վերաբերյալ միջնորդության քննարկումը՝ մինչև դատախազության կողմից ՀՀ Վերաքննիչ հակակոռուպցիոն դատարանի որոշման դեմ վճռաբեկ բողոք ներկայացնելն ու վճռաբեկ դատարանում Դավիթ Տոնոյանի համար նշված հարցի կանխատեսելի անբարենպաստ լուծումը։ Վստահեցնում ենք, որ Դավիթ Տոնոյանին առաջադրված մեղադրանքը նույնքան անհիմն է, որքան նրան անազատության մեջ պահելու այս ապօրինի գործելաոճը և նշված հանգամանքների հաշվառմամբ Դավիթ Տոնոյանը դատավարության առաջին իսկ օրվանից մշտապես պահանջել է իր վերաբերյալ քննվող քրեական գործով դռնբաց և հրապարակային դատաքննության անցկացում` հանրությանը իրեն ներկայացված մեղադրանքի մերկությունը և դատավարության ընթացքում տեղի ունեցող ապօրինություններն ի ցույց դնելու համար։ Չնայած, որ նշված քրեական գործի գրեթե բոլոր հանգամանքները հանրությանը արդեն իսկ հայտնի են, Հակակոռուպցիոն դատարանը շարունակում է քրեական գործի վարույթը «քողարկել» պետական գաղտնիքի շղարշի տակ՝ մերժելով Դավիթ Տոնոյանի միջնորդությունները դատական նիստը դռնբաց ռեժիմով անցկացնելու և լրագրողների հետ վերջինիս հաղորդակցվելու արգելքը վերացնելու վերաբերյալ։ Մինչդեռ, համոզված ենք, որ առկա են բոլոր անհրաժեշտ նախադրյալները դատական քննությունը մասամբ կամ առնվազն նիստերի մի մասը նախկին ՀՀ Քրեական դատավարության օրենսգրքի 16-րդ հոդվածով սահմանված կարգով դռնբաց անցկացնելու համար: Միաժամանակ հայտնում ենք, որ Դավիթ Տոնոյանը պատրաստվում է 29.08.2023 թվականին նշանակված հերթական դատական նիստում Վերաքննիչ դատարանի որոշման կատարման արդյունքում խափանման միջոցի փոփոխության միջնորդության քննությունից առաջ միջնորդելու դատարանին` նախկին ՀՀ Քրեական դատավարության օրենսգրքի 16-րդ հոդվածով սահմանված կարգով միջնորդության քննությունն իրականացնել դռնբաց ռեժիմով: Հիշեցնենք, որ ՀՀ պաշտպանության նախկին նախարար Դավիթ Տոնոյանին անհիմն, առանց որևէ ապացույցի մեղսագրվում է 01․08․2003 թ․ ուժի մեջ մտած Քրեական օրենսգրքի 179-րդ հոդվածի 3-րդ մասի 1-ին կետով նախատեսված արարքը, որը Դավիթ Տոնոյանը չի ընդունում և հրաժարվում է ցուցմունք տալուց` քրեադատավարական վարույթն իրականացնող մարմինների նկատմամբ անվստահությամբ և «ցուցումով» արդարադատության իրականացման պատճառաբանությամբ։ Նշված քրեական գործով Դավիթ Տոնոյանն արդեն 1 տարի 11 ամիս է կրում է ապօրինի կալանք, որը զուրկ է իրավական հիմքից և ունի բացառապես պատժիչ բնույթ»։
09:14 - 28 օգոստոսի, 2023
Դավիթ Տոնոյանը մասնակցում է ԱԺ քննիչ հանձնաժողովի փակ ձևաչափով նիստին․ ընդդիմությունը կրկին ներկա չէ

Դավիթ Տոնոյանը մասնակցում է ԱԺ քննիչ հանձնաժողովի փակ ձևաչափով նիստին․ ընդդիմությունը կրկին ներկա չէ

Այսօր շարունակվում է 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստը, բայց արդեն փակ ձևաչափով․ հանձնաժողովի անդամների հարցերին պատասխանում է Դավիթ Տոնոյանը։  Նիստին ներկա չէր զոհված զինծառայողի հրավիրյալ ծնողը, որի հարցերին ցանկանում էր պատասխանել Տոնոյանը, ուստի միանգամից մեկնարկեց նիստի փակ հատվածը։ Այսօր ևս ընդդիմադիրները նիստին ներկա չեն։ Հիշեցնենք, որ ՀՀ պաշտպանության նախկին նախարար Դավիթ Տոնոյանն երեկ Ազգային ժողովում էր՝ մասնակցելու 44-օրյա պատերազմի հանգամանքներն ուսումնասիրող քննիչ հանձնաժողովի նիստին։ Հանձնաժողովի հրապարակային աշխատանքներին մասնակցելու համար Տոնոյանը միջնորդություն էր ներկայացրել ՀՀ հակակոռուպցիոն դատարանի դատավոր Վ․Դոլմազյանին՝ խնդրելով թույլատրել ներկայանալ հանձնաժողովի աշխատանքների իրականացման վայր, միջնորդությունը բավարարվել էր: Տոնոյանը ցանկություն էր հայտնել մասնակցել նիստին՝ բաց ձեւաչափով, միաժամանակ այսօրվա նիստում նա նշեց, որ որոշ դրվագների անդրադառնալու համար փակ նիստի կարիք է լինելու։ Դավիթ Տոնոյանը քննիչ հանձնաժողովի նիստում հորդորել էր ընդդիմությանը գոնե հանձնաժողովի փակ նիստին ներկայանալ, ի պատասխան Գեղամ Մանուկյանը նշել էր՝ Դավիթ Տոնյանը չի կարող որոշել ինչ ձևաչափով գործի ընդդիմությունը և ինչ հարցերի շուրջ կարծիք արտահայտի։ Նա նշել էր, որ այս հանձնաժողվի աշխատանքները լոկ միտված են պատերազմի և պարտության հանգամանքները, ռազմաքաղաքական կառավարման ձախողումները կոծկելուն, ոչ թե դրանք քննելուն։
11:57 - 02 օգոստոսի, 2023
F16-ի խոցումը ՊԲ ՀՕՊ-ի կողմից հնարավոր էր, բայց չէր կատարվում, քանի որ որոշված էր չսադրել իրավիճակը․ Տոնոյան

F16-ի խոցումը ՊԲ ՀՕՊ-ի կողմից հնարավոր էր, բայց չէր կատարվում, քանի որ որոշված էր չսադրել իրավիճակը․ Տոնոյան

Պատերազմին նախորդող ժամանակաշրջանում, երբ Նախիջեւանի զորավարժություններում F16-երի վերաբազավորում եղավ դեպի Գյանջա, եւ ԳՇ-ի, եւ ինձ համար [պարզ էր], նաեւ ՆԱՏՕ-ի հետ համագործակցության իմ փորձը ինձ հուշեց, որ F16-երի տեղակայումն այնտեղ վարժանքի նպատակով չէ։ Այս մասին 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստի ժամանակ ասաց ՀՀ պաշտպանության նախկին նախարար Դավիթ Տոնոյանը․ «Երբ ամեն օր գրեթե 4 ինքնաթիռ անընդհատ չորս, հինգ, վեց, ութ ժամ գտնվում էր օդում եւ մոտենում մինչեւ 25 կմ, այնքան մոտ, որ ստիպում էին ՊԲ ՀՕՊ-ին միանալ, ավելացրեց մեր մտահոգությունը․ F16-երը ռոտացիայի ենթարկվեցին, եւ ոչ միայն օդաչուները, այլ ինքնաթիռները ռոտացիայի ենթարկվեցին, այսինքն՝ նշանակում է՝ դա համարյա մշտական ներկայություն էր կամ ռազմական գործողությունների սկսման լուրջ ազդակ»,- ասաց Տոնոյանը։  Նա նշեց, որ այդ ժամանակաշրջանում երեք հանդիպում է ունեցել ՌԴ գործընկերոջ հետ․ «Այո, կար որոշակի դիմում մեզ չսադրելու եւ սառնասրտություն ցուցաբերելու, որը հնարավորինս իրականացվել է մեր կողմից։ Ամեն դեպքում F16-ի խոցումը ՊԲ ՀՕՊ-ի կողմից հնարավոր էր, բայց չէր կատարվում, քանի որ իրենց իսկ կողմից որոշված էր չսադրել իրավիճակը»։  Տոնոյանն հիշեցրեց, որ ԱՄՆ պաշտպանական դեպարտամենտի փոխտեղակալի հետ է հանդիպել 2019թ․ սեպտեմբերի 11-ին եւ առաջարկեց ծանոթանալ այդ հանդիպման հաշվետվությունը՝ վստահեցնելով, որ դրանից շատ բան պարզ կդառնա։ Նա նշեց, որ նախաձեռնել է Թուրքիայի ներգրավվածությունը, F16-ի կիրառելիությունը չեզոքացնելու հարցով երկու խումբ հանդիպումներ ՀԱՊԿ եւ ՆԱՏՕ անդամ երկրների հետ․ «Օրական ունեցել եմ երեք-չորս հանդիպում, առաջնահերթությունը տրված էր ՆԱՏՕ անդամ երկրների դեսպաններին, բոլորին դիագրամներով տրվել են F16-երի օդային դիագրամները ու տրվել են ամենօրյա պարբերականությամբ։ Խնդրանքս եղել է՝ չեզոքացրեք այդ երկրի ներգրավումն արցախյան պատերազմի թատերաբեմում։ Հանդիպում եմ ունեցել 12 անդամ երկրների հետ, որոշների հետ երկու անգամ, [այնպիսի երկներ,] ինչպիսին են ԵԱՀԿ, ԵՄ եւ ՆԱՏՕ անդամ երկրները»,- ասաց Տոնոյանը՝ հավելելով, որ «խոսք էր տրվում փոխանցել»՝ ըստ ամենայնի նկատի ունենալով, որ երկրների ներկայացուցիչները խոստանում էին խնդրանքի մասին փոխանցել բարձրագույն ղեկավարությանը։
18:38 - 01 օգոստոսի, 2023
Պատերազմի ժամանակ ԱԹՍ-ների հագեցվածության խնդիր ունեինք, քանակական եւ որակական առումով զիջել ենք․ Տոնոյան

Պատերազմի ժամանակ ԱԹՍ-ների հագեցվածության խնդիր ունեինք, քանակական եւ որակական առումով զիջել ենք․ Տոնոյան

Պատերազմի առաջին իսկ օրը ինչո՞ւ չեն հասցվել պլանավորված հրթիռային հարվածներ «Իսկանդեր», «Էլբրուս» եւ «Տոչկա» օպերատիվ մարտավարական հրթիռներով հակառակորդի օդանավակայաններում տեղադրված մարտական ինքնաթիռներին եւ ԱԹՍ-ներին՝ նախապես կանխելով դրանց կիրառումը թշնամու կողմից։ Այս հարցը հնչեցրեց 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նախագահ Անդրանիկ Քոչարյանը՝ դիմելով պաշտպանության նախկին նախարար Դավիթ Տոնոյանին․ «Գործողությունների վարման Ձեր հարցադրմանը ճիշտ կլինի՝ պատասխանեն զինվորականները, բայց երբ կարողացել են, երբ հնարավորությունները թույլ են տվել, ինչ ձեւաչափով թույլ են տվել, որտեղից թույլ են տվել՝ աշխարհագրության առումով, ուշ, թե շուտ՝ որոշում է հրամանատարությունը»,- ասաց նա։ Թե որոնք են պատերազմի ընթացքում մեր ԶՈՒ կողմից ԱԹՍ-ների կիրառման ցածր արդյունավետության հիմնական պատճառները, Տոնոյանն ասաց, որ մենք ԱԹՍ-ների հագեցվածության խնդիր ունեինք․ «Առաջնահերությունը տրված էր մեր ռազմարդյունաբերության զարգացման շրջանակում դա իրականացնելուն [ԱԹՍ-ներ արտադրելուն], քանի որ դրանք սպառազինության համեմատելի նոր տեսակներ են, եւ ըստ հիմնավորումների՝ ՀՀ ռազմարդյունաբերությունը պետք է ունակ լիներ ԱԹՍ-ների այդպիսի արտադրության։ Բայց քանակական եւ որակական առումով զիջել ենք։ Երկար տարիներ, ոչ միայն 2018-ից, փորձեր են առվել ձեռք բերելու, ՀՀ-ում արտադրելու, որոշ հաջողությունների հասել ենք, բայց քանի որ դրանք դեռեւս փորձարարակոնստրուկտորական մակարդակում էին, դեռեւս «սերիա» չէին մտել»,- մեկնաբանեց Դավիթ Տոնոյանը։ Անդրանիկ Քոչարյանը հարցրեց՝ ո՞րն է պատճառը, որ 44-օրյա պատերազմը մեր ԶՈՒ-ը դիմավորել են իրենց կազմում ունենալով ընդամենը վեց միավոր ինքնաթիռային տիպի ԱԹՍ, այն էլ առանց դրանց կիրառման պլանավորման։ Տոնոյանն ասաց՝ որովհետեւ ԱԹՍ-ների քանակի առումով սահմանափակ ենք եղել։
17:43 - 01 օգոստոսի, 2023
Պետական բյուջեից ոչ մի լումա չի ծախսվել․ ՍՈՒ-30-ները ձեռք են բերվել օրենքով չարգելված աղբյուրներից․ Դավիթ Տոնոյան

Պետական բյուջեից ոչ մի լումա չի ծախսվել․ ՍՈՒ-30-ները ձեռք են բերվել օրենքով չարգելված աղբյուրներից․ Դավիթ Տոնոյան

ՍՈՒ-30-ներն ինչո՞ւ չկարողացան մարտական թռիչքներ իրականացնել, 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստում հանձնաժողովի նախագահ Անդրանիկ Քոչարյանը հետաքրքրվեց պաշտպանության նախկին նախարար Դավիթ Տոնոյանից։ Վերջինս պատասխանեց, որ եթե ես չի սխալվում՝ նոյեմբերի սկզբի ժամանակաշրջանում իրեն զեկուցվել է, որ ՍՈՒ-30-ներն անցել են մարտական հերթապահության, քանի որ մարտական հրթիռների որոշակի համալրում իրականացվել է․ «Բացի դրանից՝ ՍՈՒ-30-ները բազմաֆունկցիոնալ միջոցներ էին, որոնք ունեին եւ գրոհային, եւ կործանիչ գործառույթ։ Գրոհային գործառույթների առումով մենք սպառազինության հետ կապված գոնե սկզբանական փուլի մեկ-երկու օրվա մարտական գործողությունների վարման առումով հագեցվածություն ունեինք նաեւ այն հրթիռների, որոնք հիմա ժողովրդի մեջ կոչվում են անպիտան կամ ժանգոտված։ Այդ հրթիռները նաեւ օգտագործվել են ուսումնական թռիչքների ժամանակ եւ խոցել են թիրախները»,- ասաց նախկին նախարարը։  Ինչ վերաբերում է ՍՈՒ-30-ների ձեռքբերումների հիմնավորվածությանը՝ Տոնոյանը հարց հնչեցրեց՝ իսկ ՍՌՏ-ի [սպառազինության եւ ռազմական տեխնիկայի] այդ ի՞նչ միջոցներ պետք է ձեռք բերվեին, որ ՍՈՒ-30-ների ձեռքբերումը հիմնավորված չէր․ «Ինչպես ես նշեցի՝ մենք հակառակորդի հետ համադրության մեջ կործանիչների գործառույթի, ՍՈՒ-30-ների՝ իրենց կործանիչի բաղադրիչի հետ կապված զրոյական վիճակ ունեինք հակառակորդի հետ, մեծ հեռավորությունների վրա, այն հնարավորությունները, որոնք ունեին ՍՈՒ-երը, ճշգրիտ կառավարվող հրթիռներով խոցելու հակառակորդի միջոցները եւ ենթակառուցվածքները, այդպիսի կարողություն մենք ԶՈՒ-ում չենք ունեցել»։  Տոնոյանի պնդմամբ՝ ՍՈՒ-30-ների ձեռքբերումը նաեւ ապագայի ձեռքբերում է, քանի որ դրանով բարձրացվել է մեր ԶՈՒ-ի մակարդակը․ «ՍՌՏ-ի պլանն իրականացվել է, ձեռքբերվել եւ մատակարարվել է ժամկետի մեջ։ Այն, ինչ Ադրբեջանը հիմա անում է Թուրքիայի հետ՝ մոդեռնիզացնում է ՍՈՒ-25-երը, այդ պայմանագիրը կնքվել է օգոստոսի 24-ին՝ Մոսկվայում ՍՈՒ-25-երի արդիականացման վերաբերյալ՝ իմ տեղակալի կողմից, ես ներկա եմ եղել այդ ստորագրմանը, մոդեռնիզացումը պետք է իրականացվեր երեք տարվա ընթացքում։ Երեք տարվա մեջ արդեն պետք է ունենայինք որոշ առաջխաղացում»,- ասաց Տոնոյանը։ ԱԺ ՔՊ խմբակցության պատգամավոր Հայկ Սարգսյանն ասաց, որ իրենք հարցում են արել եւ ստացել պատասխան, ըստ որի՝ պատերազմի ժամանակ ՍՈՒ-երը մեկ թռիչք են արել՝ հետախուզական․ «Այսինքն՝ գործնականում չի կիրառվել ՍՈՒ-30-ը, սա է մեզ անհանգստացնում, եթե կիրառվել է, ասեք»։ Տոնոյանը նշեց, որ ՍՈՒ-30-ների ձեռքբերումը պայմանավորված է եղել նաեւ ՀՀ սահմանները եւ ՀՀ հակաօդային պաշտպանությունն ուժեղացնելու եւ գրոհային կարողություններն ավելացնելու հարցով։ Նա ասաց, որ ձեռքբերումից հետո ժամանակ էր պետք, որ այդ միջոցը զսպման միջոց լինելուց բացի դրսեւորեր նաեւ իր գրոհային կարողությունը։ Տոնոյանը նաեւ ասաց, որ պետական բյուջեից ոչ մի լումա չի ծախսվել ՍՈՒ-30-երի ձեռքբերման համար․ «Ձեռքբերումներն իրականացվել են օրենքով չարգելված աղբյուրներից»,- ասաց նախկին նախարարը՝ նշելով, որ մնացյալ հարցերին կանդրադառնան փակ ձեւաչափում։ Նա շեշտեց, որ ՍՈՒ-երի ձեռքբերման համար սպառազինության եւ ռազմական տեխնիկայի ձեռքբերման պլանում փոփոխություններ չեն կատարվել։
17:15 - 01 օգոստոսի, 2023
Մովսես Հակոբյանի գտնվելը Արցախում՝ թե՛ հրամանատարական կետում, թե՛ այլ վայրում, ՊԲ հրամանատարի խնդրանքն էր ինձ․ Դավիթ Տոնոյան

Մովսես Հակոբյանի գտնվելը Արցախում՝ թե՛ հրամանատարական կետում, թե՛ այլ վայրում, ՊԲ հրամանատարի խնդրանքն էր ինձ․ Դավիթ Տոնոյան

Հստակ հիշում եմ, որ գեներալ-գնդապետ Մովսես Հակոբյանի գտնվելը Արցախում՝ թե՛ հրամանատարական կետում, թե՛ այլ վայրում, ՊԲ հրամանատարի անձամբ ինձ խնդրանքն էր։ Այս մասին 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստի ժամանակ ասաց պաշտպանության նախկին նախարար Դավիթ Տոնոյանը․ «Նա [Արցախի ՊԲ հրամանատար Ջալալ Հարությունյանը] ինձ դիմել է, որ ՊԲ նախկին հրամանատարը, ԳՇ նախկին պետը գտնվի [Արցախում] եւ աջակցի ՊԲ հրամանատարին։ Կարող եք ճշտել այդ հարցը Ջալալ Հարությունյանից։ Ռազմական գործողությունների ընթացքում հնարավոր է՝ գործուղման հետ կապված փաստաթղթավորման խնդիրներ [եղած լինեն], բայց դա կարող եք ստուգել, ես հիմա չեմ կարող ասել»,- ասաց Տոնոյանը։ Անդրանիկ Քոչարյանը հարցրեց՝ ի պաշտոնե իրավասո՞ւ էր արդյոք ՊՆ վերահսկողական ծառայության պետը [որն այդ ժամանակ Մովսես Հակոբյանն էր] գտնվել ՊԲ հրամանատարական կետի մարտական կառավարման կենտրոնում, ժամանակավոր փոխարինել ՊԲ հրամանատարին եւ տալ առաջարկություններ կամ ընդունել որոշումներ՝ օպերացիա վարելու վերաբերյալ։ Դավիթ Տոնոյանն ասաց, որ տվյալ դեպքում Հակոբյանը գտնվել է ՊՆ ուղիղ ենթակայության տակ, եւ իր գտնվելը ՊԲ-ում պայմանավորված է եղել ՊԲ հրամանատարի խնդրանքով․ «Չէր կարող ինքը հրամանատարական ուղղահայացում որեւէ հրաման իջեցնել, ես կարծում եմ՝ ինքը դա չի էլ արել, բայց խորհրդատվություն տրամադրելու առումով չեմ բացառում։ Բացի դրանից՝ նա հետո, եթե չեմ սխալվում, հիվանդացել է կովիդով, հետագայում շարունակել է իր գործունեությունը ՊՆ-ում։ Դա եղել է սկզբնական փուլը, ամեն դեպքում Ջալալ Հարությունյանի պաշտոնավարման սկզբնական փուլում»։ Դավիթ Տոնոյանն առաջարկեց քննիչ հանձնաժողովում լսել նաեւ ՊԲ հրամանատար ՄՄիքայել Արզումանյանին։ Անդրանիկ Քոչարյանն ասաց, որ խնդիրն այն է, որ նրա վերաբերյալ գործը դատարանում է։ Տոնոյանն արձագանքեց, որ կարելի է միջնորդել, քանի որ անհրաժեշտություն կա․ «Էն շահարկումները, որ կան Շուշիի հետ կապված, անընդունելի են, եւ ես կարծում եմ՝ ինքը պետք է խոսի»։ Քոչարյանն ասաց, որ առաջարկը քննարկման առարկա կդարձնի։
16:25 - 01 օգոստոսի, 2023
Դավիթ Գալստյանը ՀՀ-ի մատակարարման ուղիների զմռսված լինելու պայմաններում մատակարարումների կազմակերպման կարողություններ ուներ․ Տոնոյան

Դավիթ Գալստյանը ՀՀ-ի մատակարարման ուղիների զմռսված լինելու պայմաններում մատակարարումների կազմակերպման կարողություններ ուներ․ Տոնոյան

ՀՀ պաշտպանության նախկին նախարար Դավիթ Տոնոյանն Ազգային ժողովում է՝ մասնակցելու 44-օրյա պատերազմի հանգամանքներն ուսումնասիրող քննիչ հանձնաժողովի նիստին։ Հանձնաժողովի հրապարակային աշխատանքներին մասնակցելու համար Տոնոյանը միջնորդություն էր ներկայացրել ՀՀ հակակոռուպցիոն դատարանի դատավոր Վ.Դոլմազյանին՝ խնդրելով թույլատրել ներկայանալ հանձնաժողովի աշխատանքների իրականացման վայր, միջնորդությունը բավարարվել էր: Տոնոյանը ցանկություն էր հայտնել մասնակցել նիստին՝ բաց ձեւաչափով, միաժամանակ այսօրվա նիստում նա նշեց, որ որոշ դրվագների անդրադառնալու համար փակ նիստի կարիք է լինելու։ Մարտական կառավարման կենտրոնը չի սահմանափակվում մեկ դահլիճով, այնպիսի անձինք, որոնք որոշումների կայացման վրա ազդելու իրավունք չունեն կամ տեղեկություններ իմանալու իրավունք չունեն, գտնվում են հատուկ կահավորված դահլիճում, որտեղ իրականացվում են նաեւ նկարահանումներ, ընդ որում՝ հակառակորդին մոլորության մեջ գցելու, մեր ԶՈՒ եւ հանրության բարոյահոգեբանական վիճակը բարձրացնելու։ Այն սենյակներում, որտեղ կայացվում էին որոշումներ, այդ սենյակներում այլ անձինք ներկա չեն եղել։ Այս մասին 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստում ասաց ՀՀ պաշտպանության նախկին նախարար Դավիթ Տոնոյանը։ Հանձնաժողովի նախագահ Անդրանիկ Քոչարյանը հարցրեց՝ 2020թ․ սեպտեմբերին Դավիթ Գալստյանը՝ Պատրոն Դավոն, ինչ պաշտոն է զբաղեցրել ՊՆ-ում։ Դավիթ Տոնոյանը միանգամից ասաց, որ Դավիթ Գալստյանը չի եղել իր խորհրդականը [մամուլում Դավիթ Գալստյանն այդպես է ներկայացվել]․ «Նա եղել է այն անձը, որն անհրաժեշտ էր, եւ ես չգիտեի՝ 44 օր է տեւելու, ինչքան է տեւելու, նա եղել է այն անձը, որը հնարավորություն եւ կարողություններ ուներ մատակարարումների կազմակերպման՝ ՀՀ-ի մատակարարման ուղիների զմռսված լինելու պայմաններում, որը եւ իրականացրել է։ Եթե ձեզ անհրաժեշտ է [իմանալ], թե քանի թռիչքներ են եղել կամ ցամաքային ուղիներով, կներեք, «աճպարարության» շրջանակներում է հայտնվել սպառազինությունը ՀՀ-ում, կխոսենք փակ նիստի ժամանակ։ Այդ անձը որեւէ ձեւ չի մասնակցել որոշումների կայացմանը եւ ներկա չի եղել քննարկումներին»,- ասաց Տոնոյանը։ ԱԺ ՔՊ խմբակցության պատգամավոր Վահագն Ալեքսանյանն ասաց, որ թե ԳՇ պետի հետ զրույցը, թե այլ տեղեկություններ իրենց հանգեցրել են այն մտքին, որ պատերազմի օրերին Հայաստան մտած սպառազինությունը եղել է չնչին քանակի։ Ալեքսանյանը Տոնոյանին հարցրեց՝ սա հաստատո՞ւմ է, թե՞ հերքում։ Վերջինս ասաց, որ ծավալի վերաբերյալ հարցին էլ կպատասխանի փակ նիստի ժամանակ․ «Խնդիրը պահանջարկի մասին չէ, որովհետեւ ԶՈՒ-ն պահանջարկ է ձեւավորում, իրենց համար, իհարկե, բավարար չէր, բայց ապահովման առումով արվել է համարյա թե անհնարինը, որի վերաբերյալ հակառակորդ երկրի նախագահը երկու անգամ հրապարակային բողոքել է»,- ասաց նախկին նախարարը։
15:55 - 01 օգոստոսի, 2023
Տոնոյանը ներկայացրեց, թե որն է եղել պատերազմի օրերին Մեղրիում լինելու պատճառը

Տոնոյանը ներկայացրեց, թե որն է եղել պատերազմի օրերին Մեղրիում լինելու պատճառը

ՀՀ պաշտպանության նախկին նախարար Դավիթ Տոնոյանն Ազգային ժողովում է՝ մասնակցելու 44-օրյա պատերազմի հանգամանքներն ուսումնասիրող քննիչ հանձնաժողովի նիստին։ Հանձնաժողովի հրապարակային աշխատանքներին մասնակցելու համար Տոնոյանը միջնորդություն էր ներկայացրել ՀՀ հակակոռուպցիոն դատարանի դատավոր Վ.Դոլմազյանին՝ խնդրելով թույլատրել ներկայանալ հանձնաժողովի աշխատանքների իրականացման վայր, միջնորդությունը բավարարվել էր: Տոնոյանը ցանկություն էր հայտնել մասնակցել նիստին՝ բաց ձեւաչափով, միաժամանակ այսօրվա նիստում նա նշեց, որ որոշ դրվագների անդրադառնալու համար փակ նիստի կարիք է լինելու։ 44-օրյա պետրազմի հանգամանքներն ուսումնասիրող ԱԺ քննիչ հանձնաժողովի աշխատանքներին մասնակցող Դավիթ Սանասարյանը պաշտպանության նախարար Դավիթ Տոնոյանին խնդրեց մանրամասնել, թե հոկտեմբերի 21-29 ինչու էր Մեղրիում, արդյոք հիմնավո՞ր էր այդ օրերին ոչ թե ՊՆ-ում, այլ Մեղրիում գտնվելը։ Տոնոյանն ասաց, որ Մեղրիում գտնվելու հիմնավորության գնահատականը պետք է տա այդ ժամանակվա իր վերադասը՝ Նիկոլ Փաշինյանը։ Նա շարունակեց, որ այդ ժամանակ Մեղրու մոտ՝ ՀՀ պետական սահմանի ընդամենը 2-3 կմ-ի վրա արդեն ունեինք բավականին մեծ թվով զոհեր ինչպես զինծառայողների, այնպես էլ զորահավաքային ռեսուրսի, կամավորական ջոկատների շրջանում, վիրավորված էր Մեղրի համայնքի ղեկավարը, վիրավորված էր Մեղրու գնդի հրամանատարը․ «Ձեւավորվում էր հարավային շրջանի հատուկ հրամանատարություն, որը ղեկավարեց այսօր արդեն գեներալ Գյոզալյանը։ Ես կարծում եմ, որ պաշտպանության նախարարի հայտնվելը Մեղրիում բավականին լուրջ ազդեցություն ունեցավ եւ բնակչության, եւ ԶՈՒ սոտրաբաժանումների վրա, որոնք առաջնագծում խնդիրներ էին կատարում»,- ասաց Տոնոյանը։  Նախկին նախարարի խոսքով՝ կան եւ փաստական, եւ տեսագրական տվյալներ, որոնք ապացուցում են, որ ԶՈՒ ստորաբաժանումները բավականին հաջող են գործել այդ ուղղությամբ՝ դարանակալելով, ոչնչացնելով, չեզոքացնելով հակառակորդին․  «Ես ինքս իմ աչքերով տեսա, թե ինչպես էր գնդակոծվում ռուսական սահմանապահ զորքերի կայանը, ինքս եմ նկարահանել։ Դա եղել է հրապարակային, դրա վերաբերյալ եղան մեր հրապարակային արձագանքները։ Նաեւ ունեի այլ գործառույթ՝ հստակ համագործակցություն տեղի ՌԴ սահմանապահ ուժերի հետ։ Այնպես ստացվեց, որ ՌԴ սահմանապահներն անմիջական մարտական գործողությունների վարման շատ հասանելի, գնդակոծման, հրետակոծման շատ հասանելի տարածքում էին գտնվում։ Կազմակերպչական որոշ խնդիրներ կային մոբիլիզիացիոն, տարածքային պաշտպանության կազմակերպման առումով»,- ասաց նա՝ միաժամանակ բարձր գնահատելով ԱԱԾ, ոստիկանության, ԱԻՆ աշխատակցիների ծառայությունը տեղում․ «Աշխատում էր մի կուռ թիմ։ Հետո հետ եմ կանչվել վարչապեի կողմից՝ ըստ երեւույթին իրավիճակի գնահատման առումով»։   Հանձնաժողովի նախագահ Անդրանիկ Քոչարյանն ասաց, որ տեղեկություններ կան, որ Տոնոյանը Մեղրիում զրույց է ունեցել հարավային թեւում մեր խմբավորման հիմնական ղեկավար Տիրան Խաչատրյանի հետ։ Տոնոյանի մտաբերմամբ՝ այդ ժամանակ Տիրան Խաչատրյանը վիրավոր է եղել, եւ ղեկավարը եղել է Փիլոյանը [ըստ ամենայնի նկատի ունի Արտակարգ իրավիճակների նախկին նախարար Անդրանիկ Փիլոյանին, որն Ազգային հերոսի կոչում էր ստացել, իսկ այժմ մեղադրվում է խոշոր չափի կաշառք ստանալու համար]։
15:21 - 01 օգոստոսի, 2023
Դավիթ Տոնյանը չի կարող որոշել՝ ինչ ձևաչափով գործի ընդդիմությունը և ինչ հարցերի շուրջ կարծիք արտահայտի․ Գեղամ Մանուկյան

Դավիթ Տոնյանը չի կարող որոշել՝ ինչ ձևաչափով գործի ընդդիմությունը և ինչ հարցերի շուրջ կարծիք արտահայտի․ Գեղամ Մանուկյան

Դավիթ Տոնյանը չի կարող որոշել՝ ինչ ձեւաչափով գործի ընդդիմությունը և ինչ հարցերի շուրջ կարծիք արտահայտի։ Այս մասին իր ֆեյսբուքյան էջում գրել է ՀՀ ԱԺ «Հայաստան» խմբակցության պատգամավոր Գեղամ Մանուկյանը՝ պատասխանելով պաշտպանության նախկին նախարար Դավիթ Տոնոյանի հայտարարության ընդդիմության վերաբերյալ։ «ԱԺ Քննիչ հանձնաժողովի վերաբերյալ մեր դիրքորոշումն եղել է խորքային, համակարգային, եւ պայմանավորված չի եղել որեւէ անձով, որեւէ մեկի ցուցմունքով կամ տեղեկություն ստանալու անհրաժեշտությամբ, քանի որ ամեն դեպքում, այս հանձնաժողովը չունի հանրային լեգիտիմություն, եւ վերջնարդյունքը պարզ է ու հայտնի։ Այս հանձնաժողվի աշխատանքները լոկ միտված են պատերազմի և պարտության հանգամանքները, ռազմա-քաղաքական կառավարման ձախողումները կոծկելուն, ոչ թե դրանք քննելուն։ Դավիթ Տոնյանը չի կարող որոշել ինչ ձեւաչափով գործի ընդդիմությունը եւ ինչ հարցերի շուրջ կարծիք արտահայտի։ Առնվազն հրապարակային խոսքում Դավիթ Տոնյանը այդպես էլ չասաց, թե շարունակու՞մ է պնդել 2020 թվականի նոյեմբերի 10-ին Հանրային հեռուստաընկերության եթերում արտահայտած իր կարծիքը, երբ դեմ էր հանդես գալիս Նիկոլ Փաշինյանի հրաժարականի պահանջին ու քննադատում ընդդիմությանը։ Ու վերջապես, կրկին շեշտեմ՝ բոլորին հարցեր, ու շատ հարցեր տալու հերթը դեռ գալու է, երբ ձեւավորվի իրոք անկախ, հանրային վստահություն ունեցող ու բոլորը հարցերի պատասխանը ստանալ ցանկացող ԱԺ քննիչ հանձնաժողով։ Մինչ այդ շարունակում ենք պնդել, որ Նիկոլ Փաշինյանը և իր վարչախումբը չեն կարող անաչառորեն քննել իրենց իսկ արաքները։ Հ.Գ. Կմաղթեմ միայն, որ Դավիթ Տոնոյանը, ինչպես նաեւ իշխանության թիրախում հայտնված, պատանդի կարգավիճակում պահվող բոլոր զինվորականները հնարավորինս շուտ լինեն ազատության մեջ», - գրել է պատգամավորը։ ՀՀ պաշտպանության նախկին նախարար Դավիթ Տոնոյանն ԱԺ 44-օրյա պատերազմի հանգամանքները քննող հանձնաժողովի նիստի ժամանակ կոչ էր արել ԱԺ ընդդիմադիր պատգամավորներին ներկա գտնվել հանձնաժողովի նիստին, իսկ հակառակ դեպքում այլև հրապարակային հայտարարություններ չանեն իր գործունեության վերաբերյալ։ «Ես խնդրում եմ, որ գոնե փակ նիստի ժամանակ ընդդիմության մասնակցությունը լինի, առնվազն երկու ուժի մասնակցությունը՝ ՀՅԴ-ի և ՀՀԿ-ի: Հակառակ դեպքում ես կխնդրեի այդ կուսակցությունների ներկայացուցիչներին այլեւս հրապարկային չարտահայտվել առնվազն իմ գործունեության հետ կապված հարցերում»,- նշել է Տոնոյանը:
15:06 - 01 օգոստոսի, 2023