ՀԾԿՀ - infocom.am

ՀԷՑ-ը 20 միլիոն դրամով տուգանվեց

Այսօրվա նիստում հանձնաժողովը 20 միլիոն դրամ գումարի չափով տուգանեց «Հայաստանի էլեկտրական ցանցեր» ՓԲԸ-ին ցանցին միացման ժամկետները խախտելու համար: Այս մասին տեղեկացնում են Հանրային ծառայությունները կարգավորող հանձնաժողովից: ՀՀ հանրային ծառայությունները կարգավորող հանձնաժողովն իրականացրել է (2023 թվականի 1-3-րդ եռամսյակների ընթացքում) «Հայաստանի էլեկտրական ցանցեր» ՓԲԸ-ի կողմից սպառման համակարգերի բաշխման ցանցին միացման գործընթացի վերլուծություն։ Արդյունքում պարզվել է, որ մի շարք դեպքերում խախտվել են սպառման համակարգերն էլեկտրական ցանցին միացման ժամկետները, որն ուղղակիորեն հանգեցրել է մի խումբ դիմող անձանց (սպառողների) իրավունքների կամ օրինական շահերի խախտման։ Ուստի, այսօրվա նիստում հանձնաժողովը «Հայաստանի էլեկտրական ցանցեր» ՓԲԸ-ին տուգանեց 20 000 000 (քսան միլիոն) դրամ գումարի չափով։ Հիշեցնենք, որ փետրվարի 28-ին ընկերությունը տուգանվել է 10 միլիոն դրամով։

13:57 - 13 մարտի, 2024

Գարեգին Բաղրամյանը վերընտրվեց ՀԾԿՀ նախագահի պաշտոնում, իսկ ՄՊՀ նախագահ ընտրվեց Գեղամ Գևորգյանը։

Ազգային ժողովը Հանրային ծառայությունները կարգավորող հանձնաժողովի նախագահի պաշտոնում ընտրեց Գարեգին Բաղրամյանին: Իսկ Մրցակցության պաշտպանության հանձնաժողովի նախագահի պաշտոնում՝ Գեղամ Գևորգյանը։ ԱԺ երկու 2 քվեարկություններին էլ 107 պատգամավորներից մասնակցել է 67-ը՝ կողմ քվեարկելով։ Հիշեցնենք, որ Գարեգին Բաղրամյանը Ազգային ժողովի կողմից Հանրային ծառայությունները կարգավորող հանձնաժողովի նախագահ է ընտրվել 2019 թվականի ապրիլի 19-ին:

16:08 - 29 փետրվարի, 2024

Խորհրդարանը շարունակել է ՀՀ հանրային ծառայությունները կարգավորող հանձնաժողովի նախագահի ընտրության հարցի քննարկումը

Ազգային ժողովը փետրվարի 29-ի նիստում շարունակել է քննարկել Հայաստանի Հանրապետության հանրային ծառայությունները կարգավորող հանձնաժողովի նախագահի ընտրության հարցը: Կառավարությունն այդ պաշտոնում առաջադրել է Գարեգին Բաղրամյանի թեկնածությունը: ՀՀ ԱԺ «Հայաստան» խմբակցության անունից ելույթ է ունեցել Արծվիկ Մինասյանը: Խմբակցության քարտուղարն անդրադարձել է Սահմանադրական դատարանի դատավորի ընտրության հարցին, որը տեղի է ունեցել երեկ: Հիշեցնենք, որ ՀՀ դատավորների ընդհանուր ժողովը Սահմանադրական դատարանի դատավորի թափուր տեղում ընտրելու համար առաջարկել էր Դավիթ Բալայանի թեկնածությունը: Արծվիկ Մինասյանը քննադատել է իշխող խմբակցությանը, որը չէր մասնակցել գաղտնի քվեարկությանը, ինչի արդյունքում Դավիթ Բալայանը չէր ընտրվել։ ՀՀ ԱԺ «Քաղաքացիական պայմանագիր» խմբակցության անունից ելույթ է ունեցել Բաբկեն Թունյանը: Արձագանքելով Արծվիկ Մինասյանի ելույթին՝ Բաբկեն Թունյանը նշել է, թե երեկ հավանաբար առաջին նախադեպն էր, որ ընդդիմությունն ամբողջ կազմով մասնակցել է ընտրության: Պատգամավորը հստակեցրել է՝ խմբակցությունն օգտվել է իրեն վերապահված իրավունքից, քանի որ համապատասխան օրենքի համաձայն պատգամավորը կարող է ընտրել, չընտրել կամ չմասնակցել ընտրության: «Շատ կարեւոր կառույցի նախագահի ընտրության հարցն է»,- վերադառնալով քննարկվող հարցին՝ ասել է Բաբկեն Թունյանը՝ նշելով, որ սա այն կառույցն է, որի հետ կապված խնդիրներն ու հարցերը բազմաթիվ են, քանի որ առնչվում են բոլոր քաղաքացիներին ամենօրյա գործունեության մեջ: Պատգամավորը տեղեկացրել է, որ ԱԺ տնտեսական հարցերի մշտական հանձնաժողովն արդյունավետ աշխատել է կառույցի հետ, ունեցել բազմաթիվ քննարկումներ: Եզրափակիչ ելույթում Գարեգին Բաղրամյանն անդրադարձել է պատգամավորների հարցադրումներին, տվել պարզաբանումներ:

12:46 - 29 փետրվարի, 2024

«Սպառողների անորակ ծառայություն ստանալու դեպքում պատճառված վնասի փոխհատուցման հարցը պետք է քննարկվի»․ Գարեգին Բաղրամյան |aravot.am|

aravot.am: «Մենք ամենօրյա աշխատանքի արդյունքում փորձում ենք խրախուսել ներդրումների իրականացումը»,- ԱԺ նստաշրջանում Հանրային ծառայությունները կարգավորող հանձնաժողովի նախագահի թեկնածուի ընտրության հարցի քննարկման ժամանակ ասաց ՀԾԿՀ նախագահի թեկնածու Գարեգին Բաղրամյանը։ Նա նշեց, որ վերջին երեք տարիների ընթացքում հանրային ծառայությունների համակարգում 256 մլրդ դրամի ներդրում է կատարվել։ «Դա նախ և առաջ ընդունված մեթոդիկաների արդյունք է, առավելապես իրականացնում ենք այնպիսի կարգավորում, որ մարդկային գործոնը նվազագույնի հասցնենք։ Ներդրումային դաշտը պետք է լինի գրավիչ ընկերությունների համար, որպեսզի իրենք շահագրգռված լինեն վերաներդնելու իրենց շահույթը համակարգի մեջ»,- ասաց նա։ Գարեգին Բաղրամյանը նշեց, որ վերջին երկու տարվա ընթացում նաեւ ներդրումների առաջնահերթություններ են սահմանվել։ «Այսինքն՝ այն տնտեսական ներդրումները, որոնք ընկերության համար ավելի շահավետ են, պետք է համաչափ լինեն այն ներդրումների հետ, որոնք ուղղված են սպասարկման որակի բարելավման ներդրումներին։ Առնվազն, եթե այդ համաչափությունը չի պահպանվում, ապա համապատասխանորեն չեն ընդունվում նաեւ տնտեսական ավելի նպատակահարմար ներդրումները»,- հավելեց նա։ Ըստ Բաղրամյանի՝ մենաշնորհի կրճատումը օրենքով իրենց վրա դրված կանոնադրական պարտավորություններից է։ «Եվ դրա ամենամեծ քայլերից մեկը եղել է շուկայի ազատականացումը։ Ինքը բավական բարդ գործընթաց է, անընդհատ խնդիրներ են առաջանում, այդ խնդիրներն օպերատիվ լուծում են ստանում։ Օրինակ՝ 2016 թվականից Վրաստանը սկսել է այդ գործընթացը եւ մինչ օրս չի կարողանում ազատականացնել շուկայի որեւիցե հատված»,- նշեց նա՝ նկատի ունենալով էներգետիկ ոլորտի ազատականացմանը։ Գարեգին Բաղրամյանն ասաց․ «Բարձրաձայնված խնդիրների լուծման համար ձեր վստահության քվեն ստանալու արդյունքում պատրաստ եմ ավելի արդյունավետ աշխատել։ Մասնավորապես, պետք է ավելի արդյունավետ դարձնենք սպառողների իրազեկման միջոցառումները, այդ թվում՝ անորակ ծառայություն ստանալու դեպքում պատճառված վնասի փոխհատուցման, տույժերի ստացման եւ իրենց իրավունքների պաշտպանության հարցում»։

12:03 - 29 փետրվարի, 2024

«Հայաստանի էլեկտրական ցանցեր» ՓԲԸ-ն տուգանվել է տասը միլիոն դրամով

Հանրային ծառայությունները կարգավորող հանձնաժողովի 2023 թվականի մարտի 1-ի №61-Ն որոշմամբ փոփոխություններ են կատարվել սպառման համակարգերն էլեկտրական ցանցին միացման մասին պայմանագրերի օրինակելի ձևերում, որոնց համաձայն՝ էլեկտրական ցանցին միացման վճարների վճարման համար սահմանված 24-ամսյա ժամկետը փոխարինվել է տասնօրյա ժամկետով։ Այս մասին տեղեկացնում են ՀԾԿՀ-ից: «Նույն որոշման 2-րդ կետով «Հայաստանի էլեկտրական ցանցեր» ՓԲԸ-ին հանձնարարվել է սահմանված ժամկետում ապահովել կատարված փոփոխությունների մասին օրինակելի ձևերին համապատասխան կնքված պայմանագրերի կողմ հանդիսացող այն սպառողների և դիմող անձանց պատշաճ ծանուցումը, ովքեր որոշման ուժի մեջ մտնելու պահին ամբողջությամբ չեն վճարել միացման վճարը։ Հանձնաժողով մուտքագրված մի շարք դիմում-բողոքների քննարկման արդյունքում պարզվել է, որ որոշ դեպքերում ընկերությունը չի ապահովել վերոնշյալ որոշման 2-րդ կետի պահանջը, ուստի հանձնաժողովը հարուցել է վարչական վարույթ։ Վարույթի շրջանակում պարզվել է, որ «Հայաստանի էլեկտրական ցանցեր» ՓԲԸ-ն համապատասխան ծանուցումներն ուղարկել է ոչ թե պայմանագրերով ամրագրված ծանուցման հասցեներով, այլ միացման հասցեներով, ինչի արդյունքում դիմող անձանց պատշաճ ծանուցումը չի ապահովվել Ուստի հանձնաժողովն այսօրվա նիստում ընկերությանը տուգանեց 10 000 000 (տասը միլիոն) դրամ գումարի չափով»,- ասվում է հաղորդագրության մեջ։

17:51 - 28 փետրվարի, 2024

ԱԺ-ն քննարկում է ՀԾԿՀ նախագահի պաշտոնում Գարեգին Բաղրամյանին ընտրելու հարցը. ինչ ծրագրեր ունի թեկնածուն |1lurer.am|

15:48 - 28 փետրվարի, 2024

Կառավարությունը ՀԾԿՀ նախագահի պաշտոնի համար կրկին առաջարկեց Գարեգին Բաղրամյանի թեկնածությունը |azatutyun.am|

azatutyun.am: Կառավարությունը Հանրային ծառայությունները կարգավորող հանձնաժողովի (ՀԾԿՀ) նախագահի պաշտոնի համար կրկին առաջարկեց գործող նախագահ Գարեգին Բաղրամյանի թեկնածությունը, որոշումն ուղարկեց խորհրդարան՝ հաստատման։ Բաղրամյանը 2019-ից է ղեկավարում ՀԾԿՀ-ն, պաշտոնավարման ժամկետը լրանում է այս տարվա ապրիլի 18-ին։ Վարչապետ Նիկոլ Փաշինյանն այսօր ասաց, որ լսել են Բաղրամյանի նախորդող շրջանի գործունեության հաշվետվությունը՝ արձանագրելով՝ «բավական աշխատանք արված է, բայց նաև շատ մեծ աշխատանք կա անելու»։ «Մասնավորապես, հանրային ծառայությունների ոլորտում գնումների գործընթացն առավելագույնս կանոնակարգելու, թափանցիկ դարձնելու և մրցակցային դարձնելու խնդիր կա, որովհետև դա մի թեմա է, որը նաև մեր սակագնային բանաձևերի վրա է ուղղակի շատ ազդեցություն ունենում», - հայտարարեց գործադիրի ղեկավարը։ Բաղրամյանը շնորհակալություն հայտնեց վստահության համար։

12:49 - 01 փետրվարի, 2024

ՀԾԿՀ-ն պարզաբանում է ներկայացրել «ՄՏՍ-Հայաստան»-ին առնչվող որոշման նախագծի վերաբերյալ |armenpress.am|

armenpress.am: Հանրային ծառայությունները կարգավորող հանձնաժողովը պարզաբանում է ներկայացրել «ՄՏՍ-Հայաստան»-ին առնչվող որոշման նախագծի վերաբերյալ, որը Հանձնաժողովը կքննարկի հունվարի 17-ի նիստում։ «Արմենպրես»-ի հետ զրույցում ՀԾԿՀ հեռահաղորդակցության վարչության պետի տեղակալ Արմեն Հունանյանը նշեց, որ մամուլում տարընկալում է եղել Հանձնաժողովի կողմից «ՄՏՍ Արմենիա»-ի վաճառքին առնչվող նախորդ որոշման և առաջիկայում քննարկվելիք որոշման նախագծի մասով։ Նա պարզաբանեց, որ նախորդ որոշմամբ Հանրային ծառայությունները կարգավորող հանձնաժողովը համաձայնություն է տվել «ՄՏՍ Արմենիա»-ի վաճառքին Կիպրոսում գրանցված «Ֆեդիլքո Գրուպ Լիմիթիդ» ընկերությանը, իսկ առաջիկայում քննարկվելիք որոշումը վերաբերվում է «Մոբիլնիե Տելեսիստեմի» (ՄՏՍ) ռուսական ընկերության կողմից «ՄՏՍ Արմենիա»-ի բաժնետոմսերը 100 տոկոսով ձեռք բերելու հայտին։ «Այսինքն՝ նախորդ որոշմամբ հանձնաժողովը տվել է այլ գործարքի համաձայնություն։ Իսկ այս նախագիծը, որը նախատեսվում է քննարկել հունվարի 17-ին, այլ գործարքի մասին է։ Ըստ այդմ՝ նախատեսվում է ներկորպորատիվ գործարք իրականացնել, այսինքն՝ ընկերության նկատմամբ իրավական վերահսկողություն իրականացնող «Մոբիլնիե Տելեսիստեմի» (ՄՏՍ) ռուսական ընկերությունը ցանկանում է «ԱՐԱՄԱՅՈ ԻՆՎԵՍԹՄԵՆԹ ԼԻՄԻԹԵԴ» ընկերությունից ձեռք բերել վերջինիս պատկանող ընկերության բաժնետոմսերի 100 տոկոսը՝ այդպես դառնալով ուղղակի բաժնետերը»,- տեղեկացրեց Հունանյանը։ Նրա խոսքով՝ գործարքի մերժման որոշման հիմքում, որը քննարկվելու է հունվարի 17-ին, ընկած է ՀՀ բարձր տեխնոլոգիական արդյունաբերության նախարարության բացասական դիրքորոշումը, ըստ որի՝ գերատեսչությունը ելնելով պետական շահից՝ առարկել է տվյալ գործարքին։ ՀՀ օրենսդրության համաձայն՝ ՀԾԿՀ-ն նման գործարքների վերաբերյալ դիրքորոշում է ձևավորում՝ այն քննարկելով իրավասու մարմնի, տվյալ դեպքում բարձր տեխնոլոգիական արդյունաբերության նախարարության հետ։ «Քանի որ նախարարությունն առարկել էր, ապա օրենքի և մեր նորմատիվ իրավական կարգավորումների հիմքերով մենք բնականաբար պետք է այդ գործարքի համաձայնեցման տրամադրումը մերժենք, ինչը և նախատեսել ենք քննարկել մեր հանձնաժողովի հունվարի 17-ի նիստում։ Իսկ ՀԾԿՀ-ի նախորդ որոշումը, որով համաձայնություն էր տրվել հսկողության փոխանցման գործարքին, ապա դրա առարկան այլ է։ Մեր հանձնաժողովը, որպես պետական կարգավորող մարմին, իրավունք է տալիս այս կամ այն գործարքը իրականացնել, իսկ թե հետագայում այդ գործարքը տեղի կունենա, թե ոչ, դա արդեն ընկերության և հնարավոր գնորդի կամ հնարավոր գործարքի մաս կազմող ընկերության միջև գտնվող տիրույթում է։ ՀԾԿՀ-ի որոշումներն, ըստ էության, իրավունքներ են՝ տալ կամ չտալ այդ գործարքներն իրականացնելու համար»,- պարզաբանեց Հունանյանը։ Ըստ նրա՝ ընկերությունը կարող է մի քանի հնարավոր գործարքի վերաբերյալ զուգահեռաբար մի քանի հայտ ներկայացնել, որպեսզի պետությունն էլ դրանք գնահատի և այդ գնահատականի հիման վրա էլ ընկերությունն իր հետագա քայլերն անի։ Նա հիշեցրեց, որ «ՄՏՍ Հայաստան» ՓԲԸ-ն երկու տարբեր հայտեր է ներկայացրել, որպեսզի դրանց մասով պետությունից ստանա համաձայնություն։ Հունանյանի կարծիքով՝ մամուլում տարընկալում է եղել ՀԾԿՀ-ի նախորդ որոշման և «ՄՏՍ Հայաստան» ՓԲԸ-ի այժմյան նախատեսվող նախագծի մասով։

17:06 - 15 հունվարի, 2024

Պետությունը դարձյալ արգելում է «ՄՏՍ-Հայաստանի» վաճառքը |civilnet.am|

civilnet.am: v class="entry-content"> «ՄՏՍ Հայաստան»-ի գործարքը կարող է տապալվել։ Բարձր տեխնոլոգիական արդյունաբերության նախարարությունը, որն ավելի վաղ համաձայնություն էր տվել կապի օպերատորի բաժնետոմսերի օտարմանը, հիմա արդեն դեմ է գործարքին։ Այդ մասին տեղեկանում ենք Հանրային ծառայությունները կարգավորող հանձնաժողովի (ՀԾԿՀ) հունվարի 17-ի նիստի օրակարգի հարցերից մեկից։ Նոյեմբերի 9-ին բարձր տեխնոլոգիական արդյունաբերության նախարարությունը հավանություն էր տվել գործարքին: ՀԾԿՀ- ի որոշումից տեղեկանում ենք, որ դեկտեմբերի 27-ին, սակայն, նախարարությունը առարկել է գործարքին։ Սա հաշվի առնելով` ՀԾԿՀ-ն որոշել է մերժել գործարքը։ «ՄՏՍ-Հայաստան»-ի գնորդը «Ֆեդիլքո գրուպ լիմիթեդ»-ն է։ Արդեն 1 տարուց ավելի է՝ պետական մարմինները չեն կողմնորոշվում՝ թույլատրել «ՄՏՍ-Հայաստան»-ի գործարքը, թե ոչ։ 2023-ի գարնանը Հանրային ծառայությունները կարգավորող հանձնաժողովն ու Մրցակցության պաշտպանության հանձնաժողովը դեմ հանդես եկան այդ գործարքին։ Նոյեմբերին արդեն ՀԾԿՀ-ն ու Բարձր տեխնոլոգիական արդյունաբերության նախարարությունը կողմ էին դրան։ Այժմ նորից պետական մարմինները դեմ են հանդես գալիս «ՄՏՍ-Հայաստան»-ի վաճառքին։ Նոյեմբերին, երբ Բարձր տեխնոլոգիական արդյունաբերության նախկին նախարար Ռոբերտ Խաչատրյանը խոսում էր կապի օպերատորի գործարքի մասին, ասում էր՝ վաճառքի հայտը նայել են, ստուգել, տվել թույլտվություն։ Թե որ ֆիզիկական անձն է «ՄՏՍ-Հայաստան»-ի գնորդը, նա ասել էր՝ չի հիշում։

12:57 - 15 հունվարի, 2024

Էլեկտրաէներգիայի սակագինը ՀՀ–ում չի փոխվի 2024 թվականի փետրվարի 1–ից

ՀՀ -ում էլեկտրաէներգիայի սակագինը 2024 թ. փետրվարի 1–ից չի փոխվի։ Այս մասին որոշումը հաստատել է ՀՀ հանրային ծառայությունները կարգավորող հանձնաժողովն այսօրվա իր նիստում։ Ձեռնարկությունների համար ամենացածր սակագինը գործում է 110 կՎտ լարման համար (մոտ 1 կՎտ/ժ ցերեկը՝ 41.98 դրամ, գիշերը՝ 37.98 դրամ), իսկ 220 կՎտ լարմամբ սնվող փոքր բիզնեսի համար սակագինը կկազմի 53,48 և 43,48 դրամ: Ինչ վերաբերում է անապահով ընտանիքներին, ապա նրանց համար սակագինը կկազմի 29,99 և 19,99 դրամ: Մինչև 200 կվտ սպառում ունեցող ընտանիքների համար մեկ կՎտ/ժ կկազմի 46,48 և 36,48 դրամ, սպառողների համար՝ 200-400 կՎտ/ժ–ն՝ 48,48, ինչպես նաև` 38,48 դրամ՝ 400 կՎտ/ժ սպառողների համար։

11:55 - 27 դեկտեմբերի, 2023

Վաղը քննարկելու ենք ջրի սակագնի փոփոխության հարցը. սակագինը 2,4 դրամով դրամով կնվազի, բայց սպառողը դա չի զգա. Բաղրամյան |news.am|

news.am: Վաղը` նոյեմբերի 29-ին, ջրի սակագնի վերաբերյալ որոշում է կայացվելու, սակայն սպառողը չի զգա փոփոխությունները։ Այս մասին այսօր՝ նոյեմբերի 28-ին, «Հայաստանի էներգետիկայի բնագավառի ներկան և ապագան» խորագրով համաժողովի ժամանակ լրագրողների հետ զրույցում նշեց Հանրային ծառայությունները կարգավորող հանձնաժողովի նախագահ Գարեգին Բաղրամյանը։ «Գործող 208,4 դրամ սակագինը նվազեցվում է մինչեւ 206 դրամ: Կա արդեն քննարկում և համաձայնեցում կառավարության հետ, որ սուբսիդավորումը շարունակվելու է, ընդամենը սուբսիդիայի մեծությունը կփոխվի: Սպառողն իր վրա ոչինչ չի զգա։ Սոցիալապես անապահով սպառողների համար ջրի սակագինը հաշվարկային 180 դրամ է, այսօրվա գործող 208.4 դրամը դառնում է 206 դրամ, սակայն սպառողի համար կշարունակի գործել 200 դրամով»,–ասաց նա։

13:16 - 28 նոյեմբերի, 2023

ՀԾԿՀ-ն հավանություն է տվել «ՄՏՍ Հայաստան»-ի վաճառքին

Հայաստանի հանրային ծառայությունները կարգավորող հանձնաժողովը հավանություն է տվել «ՄՏՍ Հայաստան» ընկերության վաճառքի գործարքին։ ՀԾԿՀ-ն նման որոշում է կայացրել նոյեմբերի 15-ին կայացած նիստի ընթացքում։ Ընկերության բաժնետոմսերի 100 տոկոսը ձեռք կբերի Կիպրոսում գրանցված «Ֆեդիլքո Գրուպ Լիմիթիդ» ընկերությունը։ ՀԾԿՀ-ի որոշման մեջ նշվում է՝ ԲՏԱ-ն հայտնել է, որ գործարքի կայացման վերաբերյալ իր իրավասությունների շրջանակում առարկություններ չունի՝ գրությանը կից ներկայացնելով Հայտի առնչությամբ դիտողություն չունենալու վերաբերյալ ՀՀ ԱԱԾ դիրքորոշումը։ Հիշեցնենք, որ այս տարվա ապրիլին ԾԿՀ-ն մերժել էր «ՄՏՍ Հայաստան»-ի վաճառքի գործարքին համաձայնության տրամադրումը։ ԲՏԱ նախարարությունը՝ որպես իրավասու մարմին, առարկել էր գործարքի կնքումը՝ հաշվի առնելով, որ այն վնասում է կամ կարող է վնասել ազգային անվտանգությանը կամ պետական շահերին։

17:19 - 15 նոյեմբերի, 2023

«Յուքոմ»-ի բաժնետոմսերը գրավադրվել են |civilnet.am|

civilnet.am: Հեռահաղորդակցության օպերատոր «Յուքոմ»-ի բաժնետոմսերի մոտ 78 տոկոսը կգրավադրվի «Արդշինբանկ»-ում։ «Յուքոմ»-ը դիմել էր Հանրային ծառայությունները կարգավորող հանձնաժողով (ՀԾԿՀ)՝ բաժնետոմսերի գրավադրմանը համաձայնություն տալու համար, հանձնաժողովն էլ համաձայնություն է տվել գործարքին։ Այս տարվա օգոստոսի 31-ին, սակայն, ՀԾԿՀ-ն նույն գործարքի կատարումը մերժել էր, քանի որ դրան դեմ էր արտահայտվել Ազգային անվտանգության ծառայությունը։ Շուրջ 2 ամիս անց, այնուամենայնիվ, ՀԾԿՀ-ն գործարքին համաձայնություն է տվել։ Դրանով կգրավադրվեն «Յուքոմ»-ի բաժնետոմսերի մոտ 78 տոկոսը։ Դրանից ավելի քան 29 տոկոսը պատկանում է «Այյու թելեքոմյունիքեյթ» ընկերությանը, որի սեփականատերը Պետեկամուտների կոմիտեի նախկին նախագահ Գագիկ Խաչատրյանի ընտանիքն է։ Գրավադրվել են նաև Գագիկ Խաչատրյանի որդիներին՝ Գուրգեն Խաչատրյանին պատկանող 11,9 տոկոս, Արտյոմ Խաչատրյանին պատկանող 11,9 տոկոս, Գագիկ Խաչատրյանի հորեղբոր որդուն՝ Արամ Խաչատրյանին պատկանող 24 տոկոսի բաժնետոմսերը։ Սա որպես ապահովության միջոց է՝ «Արդշինբանկ»-ից վարկ ներգրավելու համար։ Բարձր տեխնոլոգիական արդյունաբերության նախարարությունն ու ԱԱԾ-ն գործարքի հարցում առարկություններ չեն ներկայացրել։ «Սիվիլնեթ»-ի հարցին, թե ինչու՞ է օգոստոսին մերժված գործարքը հավանության արժանանում հոկտեմբերին, ՀԾԿՀ նախագահ Գարեգին Բաղրամյանն ասաց՝ նախորդ անգամ բացասական եզրակացությունը եղել էր ԱԱԾ կողմից, իսկ հիմա «որոշման պայմանները փոխվել են, փոխվել է նաև ներգրաված գումարի չափը»։ Չնշելով ներգրավվելիք վարկի չափը՝ Բաղրամյանը տեղեկացրեց, որ վարկային միջոցներն ուղղվելու են ընկերության վերաֆինանսավորմանը. «Ամենագլխավոր նպատակը եղել է թեթևացնել ընկերության հիմնական ֆինանսական բեռը՝ վերցրած վարկերի մարում և այլն։ Կային նաև այլ նպատակներ»,- փոխանցեց Բաղրամյանը։ «Յուքոմ»-ը Հայաստանում ֆիքսված ինտերնետի մատուցման առաջատարն է, ունի սեփական օպտիկամանրաթելային ցանց։ Ընկերությունն ունի շուրջ 1 400 աշխատակիցներ։ «Յուքոմ»-ի ֆիքսված և շարժական կապի ծառայություններից օգտվում է ավելի քան 700 000 բաժանորդ։ Այս տարվա մարտին «Յուքոմ»-ի գլխավոր տնօրեն դարձավ «ՄՏՍ-Հայաստան»-ի երկարամյա նախկին տնօրեն Ռալֆ Յիրիկյանը։

16:28 - 24 հոկտեմբերի, 2023

Դատախազությունը պահանջում է ՀԾԿՀ նախկին նախագահ Ռոբերտ Նազարյանից բռնագանձել 8 անշարժ գույք և շուրջ 1 մլրդ դրամ

Հակակոռուպցիոն դատարանը 2023 թվականի օգոստոսի 24-ին վարույթ է ընդունել ապօրինի ծագում ունեցող գույքի բռնագանձման վերաբերյալ հերթական հայցադիմումը․ տեղեկացնում են ՀՀ գլխավոր դատախազությունից։ Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ հանրային ծառայությունները կարգավորող հանձնաժողովի նախկին նախագահ Ռ.Ն.-ից և նրա հետ փոխկապակցված անձանցից հօգուտ Հայաստանի Հանրապետության բռնագանձել մասնավորապես՝ 8 անշարժ գույք Երևան քաղաքում, 3 տրանսպորտային միջոց, իսկ անհնարինության դեպքում՝ դրանց միջին շուկայական արժեքը՝ ավելի քան 1 մլրդ 430 մլն դրամ. 734 մլն դրամին համարժեք ավանդներ և պարտատոմսեր. ավելի քան 1 մլրդ 705 մլն դրամ:

16:20 - 15 սեպտեմբերի, 2023

Եթե ջրանջատումները կապված լինեն սպասարկման որակի կամ ժամային խախտումների հետ, ապա օպերատորը կստանա ավտոմատ տուգանք. ՀԾԿՀ |armeniasputnik.am|

armeniasputnik.am: Եթե հանրապետությունում ջրանջատումները կապված լինեն սպասարկման որակի կամ ժամային խախտումների հետ, ապա օպերատորը կստանա ավտոմատ տուգանք։ Այս մասին այսօր կառավարության նիստից հետո հայտարարեց ՀՀ հանրային ծառայությունները կարգավորող հանձնաժողովի նախագահ Գարեգին Բաղրամյանը` պատասխանելով վերջին շրջանում հաճախակի դարձած ջրանջատումների մասին հարցին։ «Այս դեպքում մենք երկարաժամկետ վարույթ չենք իրականացնում, ավտոմատ տուգանքները փոխանցվում են սպառողի հաշիվներին»,- ասաց նա։ Գարեգին Բաղրամյանը հայտնեց, որ կա նաև տուգանքների այլ ձև, երբ հանձնաժողովը վարույթ է իրականացնում ու տուգանքներն այդ դեպքում փոխանցվում է պետական բյուջե։ Նա նշեց, որ այս պահին բազմաթիվ բողոք–դիմումներ կան իրենց մոտ քննվող, որոնք ուղղված են «Վեոլիա ջուր» ընկերությանը, բայց հավելեց, որ դա սեզոնային է ու ամեն ամառ էլ լինում է։ Բաղրամյանը նշեց նաև, որ ջրի որակի հետ կապված վարույթ իրականացնելու հնարավորություն ՀԾԿՀ-ն չունի։ Նշենք, որ վերջին շրջանում հաճախակի են դարձել ջրանջատումները հատկապես ցերեկվա ժամերին։ Սա հանրության շրջանում բողոքի ալիք է բարձրացրել, քանի որ Հայաստանի որոշ հատվածներում օդի ջերմաստիճանն այս օրերին հասնում է +40–ի։

13:10 - 17 օգոստոսի, 2023

Հիմնականում խնդիրը սեզոնային է. Գարեգին Բաղրամյանը՝ շոգ օրերին ջրանջատումների մասին |1lurer.am|

1lurer.am: Ջրամատակարարման խնդիրները հիմնականում սեզոնային են: Այդ մասին Կառավարության ճեպազրույցների ժամանակ հայտարարեց ՀՀ հանրային ծառայությունները կարգավորող հանձնաժողովի նախագահ Գարեգին Բաղրամյանը՝ անդրադառնալով «Վեոլիա ջուր» ընկերության աշխատանքին ու շոգ օրերի ընթացքում հաճախակի ջրանջատումների դեպքերին: «Վերահսկողության մեխանիզմներ ունենք: Պարբերաբար բողոքներ ստանում ենք, և սեզոնային առումով միշտ ամառային ամիսներին բողոքներն անգամներով շատանում են իրոք: Այո՛, հսկողությունը կա, ցանկացած բողոք իր արձագանքը մեր կողմից ստանում է: Մենք էլ ենք արձանագրում, որ կան խնդիրներ: Որոշակի խնդիրներ, իհարկե, առաջանում են, որովհետև համակարգում ներդրումային միջավայրը սուղ է, և որոշակի ներդրումների կարիք կա: Բայց հիմնականում խնդիրը սեզոնային է»,- ասաց նա:

13:53 - 11 օգոստոսի, 2023