Կանադան, Մեծ Բրիտանիան, Ավստրալիան, ԵՄ երկրներն արձագանքել են Թրամփի սահմանած մաքսատուրքերին |armenpress.am|
armenpress.am: Մի շարք երկրներ արձագանքել են ԱՄՆ ներմուծվող ապրանքների նկատմամբ նախագահ Դոնալդ Թրամփի կողմից ապրիլի 2-ին հայտարարված մաքսատուրքերին։ Կանադայի վարչապետ Մարկ Քառնին հայտարարել է, որ մաքսատուրքերը հիմնավորապես կփոխեն միջազգային առևտրային համակարգը։ Այս մասին հաղորդում է «Ինտերֆաքս» գործակալությունը։
«Նախագահ Թրամփը հենց նոր հայտարարեց այն միջոցների մասին, որոնք հիմնավորապես կփոխեն միջազգային առևտրային համակարգը։ Մենք պատրաստվում ենք այս մաքսատուրքերի դեմ պայքարել հակամիջոցների օգնությամբ: Մենք պատրաստվում ենք պաշտպանել մեր աշխատողներին», - ասել է Քառնին։
Մինչդեռ Մեծ Բրիտանիայի առևտրի և ձեռնարկատիրության նախարար Ջոնաթան Ռեյնոլդսը հայտնել է, որ Միացյալ Թագավորությունը կշարունակի հետամուտ լինել ԱՄՆ-ի հետ առևտրային համաձայնագրի կնքմանը։
«Ոչ ոք չի ցանկանում առևտրային պատերազմ, և մենք առաջվա պես մտադիր ենք համաձայնագիր կնքել.... Կառավարությունն անհրաժեշտ ամեն բան կանի Մեծ Բրիտանիայի ազգային շահերը պաշտպանելու համար», - ասել է Ռեյնոլդսը:
Դանիայի ԱԳ նախարար Լարս Լոկկե Ռասմուսենը կարծում է, որ ոչ ոք չի շահի սահմանված մաքսատուրքերից։
«Եվրոպան միասնական կլինի, Եվրոպան վճռական և համաչափ պատասխաններ կտա», - հայտնել է նա սոցցանցերում։
Իսկ Իտալիայի վարչապետ Ջորջա Մելոնին Դոնալդ Թրամփի կողմից սահմանած մաքսատուրքերը համարել է «սխալ»։ Նրա կարծիքով՝ դրանք օգուտ չեն բերի ԱՄՆ-ին։
Թրամփի սահմանած մաքսատուրքերին արձագանքել են Իսպանիայի վարչապետ Պեդրո Սանչեսը, Լեհաստանի վարչապետ Դոնալդ Տուսկը, Նորվեգիայի առևտրի և արդյունաբերության նախարար Սեսիլի Միրսեթը, Շվեդիայի վարչապետ Ուլֆ Քրիստերսոնը, Ավստրալիայի վարչապետ Էնթոնի Ալբանիզը:
Նոր Զելանդիայի առևտրի նախարար Թոդ Մաքքլայնը հայտարարել է, որ ԱՄՆ-ի մաքսատուրքերը կազդեն երկրի արտահանողների վրա, որոնցից ոմանք կարող են ուշադրություն դարձնել այլ շուկաների:
Միևնույն ժամանակ նա ասել է, որ Նոր Զելանդիան չի պատրաստվում պատասխան մաքսատուրքեր սահմանել ԱՄՆ-ի նկատմամբ։
«Դա կհանգեցնի նորզելանդական սպառողների համար գների բարձրացման և դա կհանգեցնի ինֆլյացիայի», - նշել է նա:
Մեքսիկայի վարչապետ Կլաուդիա Շեյնբաումը խոստացել է Թրամփի սահմանած մաքսատուրքերին պատասխանել ապրիլի 3-ին, տեղական ժամանակով ժամը 14:00-ին:
Իսկ Պեկինը դեմ է հանդես եկել ներմուծվող չինական ապրանքների նկատմամբ ԱՄՆ-ի կողմից մաքսատուրքերի սահմանմանը և հայտարարել է, որ պատասխան միջոցներ կձեռնարկի։
Ապրիլի 2-ին Թրամփը հայտարարել է, որ 10% բազային մաքսատուրքեր է սահմանում Միացյալ Նահանգներ ներկրվող բոլոր ապրանքների համար և ավելի բարձր մաքսատուրքեր՝ երկրի տասնյակ խոշորագույն առևտրային գործընկերների համար։
14:32 - 03 ապրիլի, 2025
