Արդարադատության նախարարություն

ՀՀ արդարադատության նախարարությունը գործադիր իշխանության պետական մարմին է։ Նախարարության կազմի մեջ է մտնում 14 կառուցվածքային ստորաբաժանում, 7 առանձնացված ստորաբաժանում, ինչպես նաև ՀՀ ԱՆ-ն ունի տարբեր ոլորտներում գործունեություն իրականացնող 7 իրավաբանական անձ։

ՀՀ արդարադատության նախարարն է Ռուստամ Բադասյանը։

ՀԿԱԾ-ը ոչ թե պատժող մարմին է, այլ՝ արդարությունը վերականգնող. կառույցը նշում է 25-ամյակը

Բոլոր ջանքերը ներդրվելու են Հարկադիր կատարումն ապահովող ծառայության ամբողջական բարեփոխմանը, հարկադիր կատարողի պաշտոնի գրավչության և Ծառայության հասարակական ընկալման վերաիմաստավորմանը։ Հարկադիր կատարումն ապահովող ծառայության 25-ամյակին նվիրված միջոցառմանն այս մասին ասաց Արդարադատության նախարար Գրիգոր Մինասյանը, ով շնորհավորեց հարկադիր կատարողներին՝ նշելով, որ աշխատակիցների կատարած աշխատանքն անգնահատելի է: Նախարարը բարձր գնահատեց Ծառայության 2022 թվականի ցուցանիշները, ընդգծելով, որ կատարված աշխատանքը արդարացրել և նույնիսկ գերազանցել է սպասելիքները: «Օրն իսկապես շատ կարևոր է, քանի որ 25 տարի առաջ այս օրը ձևավորվեց մի կառույց, մի համակարգ, առանց որի մեր երկրում արդարության և արդարադատության հասնելը անհնարին է։ Ունեմ համոզմունք և այդ համոզմունքը ամրապնդվել է այս ծանր օրերին, երբ մեր երկիրը ամեն օր կռիվ է տալիս իր տնտեսական բարեկեցության և ձեզ հասկանալի ու տեսանելի այլ արհավիրքների դեմ, որ չի կարելի ունենալ ուժեղ պետություն, եթե չունես երկրում արդարադատություն և կայացած դատարան, իսկ կայացած դատարան ունենալու համար պետք է լինի մի կառույց, որը կկարողանա կյանքի կոչել դատարանի կայացրած որոշումները, վերականգնելով մարդկանց իրավունքները և ապահովելով այն սպասումների իրականացումը, որ մեր քաղաքացիներն ունեն այս կառույցից»,- ընդգծեց Մինասյանը։ Նախարարը նաև առանձնացրեց Ծառայության այն ձեռքբերումները և խոստումները, որոնք կարողացել են մի քանի տարիների ընթացքում կյանքի կոչել։ «Մենք ձեզ տվել էինք երկու շատ կարևոր խոստում և կարող եմ հպարտությամբ արձանագրել՝ այդ խոստումներն իրականություն են։ Առաջինը խոստումը այն է, որ օրակարգից ամբողջությամբ և անվերադարձ հանվել է չարաբաստիկ մասնավորեցման գաղափարը։ Երկրորդ խոստումը, որը կարողացանք ապահովել, դա արդյունքահեն աշխատավարձի համակարգի ներդրումն էր։ Եվ անցած տարի կարողացանք, աշխատելով մեր ֆինանսական համակարգի հետ, բերել զգալի գումար, իսկ այս տարի կարողացանք ավելի քան 1 միլիոն դոլար ուղղել հենց այս գաղափարին։ Երբ ներդրվեց արդյունքահեն աշխատավարձի համակարգը, միայն 2022 թվականի օգոստոս-դեկտեմբեր ամիսներին կարողացանք շուրջ 25 միլիարդ դրամ մուտք անել բյուջե, իսկ կատարողական ծախսը մոտ 1,5 միլիարդ դրամ էր, որը 2021 թվականի համեմատ ավելի է 48 տոկոսով։ Դա նշանակում է 48 տոկոս ավելի շատ հավատացող մարդիկ, 48 տոկոս վերականգնված խախտված մարդու իրավունք և 48 տոկոս ավելի սպասելիք մեր դատական համակարգից, ինչի համար ձեզ շնորհակալ եմ»,- շեշտեց Մինասյանը։ Գրիգոր Մինասյանը վերահաստատեց, որ բոլոր ջանքերը ներդրվելու են ոլորտի ամբողջական բարեփոխմանը, հարկադիր կատարողի պաշտոնի գրավչության և Ծառայության հասարակական ընկալման վերաիմաստավորմանը: «Թվայնացում, աշխավարձի բարձրացում, գույքային բարելավում, նոր մեքենաներ, նոր սրահ, բայց ամենակարևորը, որ մենք բոլորովս պետք է հասնենք նրան, որ կարողանանք հանրային ընկալումը փոխել, որ այս ծառայությունը ոչ թե պատժող է, մարդկանց դատափետող է, այլ բոլոր խախտված իրավունքների վերականգնողն է և արդարադատությունը հետ բերողն է»,- եզրափակեց Մինասյանը։ Գլխավոր հարկադիր կատարող Արսեն Մնացականյանը ևս շնորհավորեց իր աշխատակիցներին և նշեց, որ հիմնական նպատակն ու առաքելությունը վերջնական արդարադատության իրականացման ապահովումն է, քաղաքացու խախտված իրավունքի վերականգնումը։ «Հարկադիր կատարման ծառայության քառորդդարյա պատմությունը վկայություն է այն, որ մեզանում Հարկադիր կատարման ծառայությունն այլևս իրողություն է։ Այն գործող մեխանիզմ է, որի հիմնական նպատակն ու առաքելությունն է վերջանական արդարադատության ապահովումը, քաղաքացու խախտված իրավունքի վերականգնումը։ Այս ճանապարհին Հարկադիր կատարման ծառայությունը ունեցել է շատ դժվարություններ։ 25 տարի առաջ ձևավորվելով Արդարադատության նախարարության կազմում որպես պետական ծառայության նոր տեսակ, Հարկադիր կատարման ծառայությունը աստիճանաբար իր կարևոր ու ուրույն տեղն է զբաղեցնում պետական մարմինների համակարգում։ Այսօր էլ նշանակալի է կառույցի դերակատարումը Հայաստանի Հանրապետության անունից կայացվող դատական ակտերի և հարկադիր կատարման ենթակա այլ ակտերի կատարման ոլորտում օրինականության ապահովման, իրավակարգի ամրապնդման, քաղաքացիների իրավունքների և օրինական շահերի երաշխավորման գործում»,- ասաց Մնացականյանը։ Միջոցառման ընթացքում նախարար Գրիգոր Մինասյանն ու գլխավոր հարկադիր կատարող Արսեն Մնացականյանը շրջայց կատարեցին ՀԿԱԾ նոր վերանորոգված սպասարկման սրահում: Միջոցառմանը նաև ցուցադրվել է Հարկադիր կատարումն ապահովող ծառայության 25-ամյա տարեգրության ֆիլմը, հարկադիր կատարողներին շնորհվել են շնորհակալագրեր, տրվել են հուշանվերներ և արտահերթ կոչումներ:

14:56 - 05 մայիսի, 2023

ԲԴԽ անդամ Նաիրա Հովսեփյանի նկատմամբ կարգապահական վարույթ չի հարուցվել |factor.am|

factor.am: Բարձրագույն դատական խորհրդի անդամ, դատավոր Նաիրա Հովսեփյանի նկատմամբ կարգապահական վարույթ չի հարուցվել։ Արդարադատության նախարարության մամուլի խոսնակ Մարիամ Մելքոնյանը Factor.am-ի հետ զրույցում ասաց, որ Արդարադատության նախարարությունը հնարավորություն չի ունեցել Նաիրա Հովսեփյանի վերաբերյալ մամուլի հրապարակումների հիման վրա կատարել անհրաժեշտ ուսումնասիրություն և բավարար հիմքերի առկայության պայմաններում հարուցել կարգապահական վարույթ։ Հիշեցնենք, որ Բարձրագույն դատական խորհուրդը 2022 թվականի դեկտեմբերի 26-ին որոշել էր դադարեցնել դատավոր Աննա Փիլոսյանի լիազորությունները, որը 4 գործով դատական ակտեր էր ուշացրել։ ԲԴԽ-ի այս որոշումից հետո փաստաբան Լուսինե Սահակյանը ֆեյսբուքյան իր էջում հրապարակել էր դատավոր Աննա Փիլոսյանի լիազորությունները դադարեցնելուն կողմ քվերակած դատավոր Նաիրա Հովսեփյանի կողմից դատական ակտերն ուշ տրամադրելու վերաբերյալ տվյալներ՝ հրավիրելով Արդարադատության նախարարության ուշադրությունը։ «Ասում են ֆեյսբուքյան գրառումները կարգապահական վարույթ հարուցելու առիթ են հանդիսանում։ Եթե կարևոր չէ, թե գրառումն ով է կատարել և որ դատավորի վերաբերյալ, ապա ՀՀ արդարադատության նախարարության ուշադրությանն եմ ներկայացնում հաղորդում առ այն, որ դատավոր Նաիրա Հովսեփյանը բազմաթիվ գործերով ուշացնում է դատական ակտերի հրապարակումը, որով խախտում է կողմերի իրավունքները։ Մինչ իրական դատավոր Աննա Փիլոսյանի լիազորությունների դադարեցմանը Ն.Հովսեփյանի կողմ քվեարկելը մենք նշված խախտումը փորձում էինք մեկնաբանել դատարանների ծանրաբեռնվածությամբ և չէինք բարձրաձայնում։ Բայց պարզվում է՝ դա լրջագույն խախտում է և նման խախտում թույլ տված դատավորի լիազորությունները պետք է դադարեցվեն։ Համենայնդեպս այդպես է կարծում նմանատիպ բազմաթիվ խախտումներ թույլ տված դատավորը։ Եվ ուրեմն ներկայացնում եմ դրանցից ընդամենը երկուսը։ Այսպես, ԵԴ/16183/02/20 քաղաքացիական գործով ըստ հայցի Արթուր Վանեցյանի ընդդեմ Սկիզբ Մեդիա Կենտրոն ՍՊԸ-ի (1in.am) դատական ակտի հրապարակման օր է նշանակվել 18.02.2022 թվականը։ Մինչ օրս դատական ակտը չի տրամադրվել։ ԵԿԴ/1912/02/16 քաղաքացիական գործով ըստ իմ հայցի ընդդեմ ՀՀ Փաստաբանների պալատի դատական ակտի հրապարակման օր է սահմանվել 24.09.2020 թվականը։ ԵՐԿՈՒ ՏԱՐԻ, ԵՐԵՔ ԱՄԻՍ ԱՆՑ, մինչ օրս դատական ակտը ոչ միայն չի տրամադրվել, այլ նաև չի հրապարակվել»,-գրել է Լուսինե Սահակյանը։ Փաստաբան Արսեն Բաբայանը ևս Դատական-տեղեկատվական համակարգից գործեր էր մեջբերել, որոնցով Նաիրա Հովսեփյանը ուշացրել է դատական ակտերի տրամադրումը։ «Արդեն տեղյակ եք, որ ԲԴԽ-ի կողմից երեկ դատավոր Աննա Փիլոսյանի լիազորությունները դադարեցվեցին: ԲԴԽ-ն տույժի այդպիսի անհամարժեք տեսակ կիրառեց այն հիմնավորմամբ, որ Աննա Փիլոսյանը 5000-ից ավել գործ քննելու ընթացքում ընդամենը 4 հատ գործով 1 տարուց ավելի ուշացրել է դատական ակտի հրապարակումը: Այդ որոշմանը, պարզվում է, կողմ է քվեարկել նաև դատավոր, ԲԴԽ անդամ Նաիրա Հովսեփյանը: Իսկ այժմ մի փոքրիկ տեղեկանք այն մասին, թե այդ նույն Նաիրա Հովսեփյանի մոտ հենց այդ նույն խախտման վիճակն ինչիպիսին է․ Այսպես` ԵԴ/7402/02/19 գործով դատավոր Նաիրա Հովսեփյանը ակտը հրապարակել է 19.06.2020-ին, սակայն մինչ օրս, 2.5 տարուց ավել, դեռևս չի տրամադրել դատական ակտը: ԵԴ/7515/02/19 գործով – տառացի նույն վիճակն է, ԵԴ/7275/02/19 – տառացի նույն վիճակն է, ԵԴ/7319/02/19 – դատավոր Նաիրա Հովսեփյանը ակտը հրապարակել է 21.07.2020-ին, սակայն մինչ օրս, 2.5 տարի անց, դեռևս չի տրամադրել դատական ակտը: ԵԴ/7483/02/19 գործով – նույն վիճակն է, ԵԴ/9029/02/19 գործով ավելի վատ վիճակ է Ներկայացրեցի ընդամենը 6 գործեր (դրանք մի քանի տասնյակն են), որոնցով ԲԴԽ անդամ Նաիրա Հովսեփյանը արել է նույն բանը (ավելի ծանր), ինչը վերագրվել է Աննա Փիլոսյանին, սակայն Աննա Փիլոսյանին Նաիրա Հովսեփյանի քվեարկությամբ տրված տույժով ազատել են դատավորի պաշտոնից, իսկ Նաիրա Հովսեփյանը շարունակում է պաշտոնավարել: Արդարադատության նախարարին առաջարկում եմ ընթացք տալ և համապատասխան միջնորդություն ներկայացնել ԲԴԽ-ի»,- գրել էր Արսեն Բաբայանը։ Նշենք, որ «Դատական օրենսգիրք» ՀՀ սահմանադրական օրենքի 146-րդ հոդվածի 1-ին մասի 2-րդ կետի համաձայն՝ կարգապահական խախտման մասին զանգվածային լրատվության միջոցների հրապարակումը կարգապահական վարույթ հարուցելու առիթ է։ Շարունակությունը՝ factor.am-ում

14:41 - 28 մարտի, 2023