Դեպքի վայրում հայտնաբերվել է տարաներով լցված վառելիք, որը, ըստ նախնական տեղեկությունների, բենզին է․ զինվորական դատախազ
Դեպքի վայրում հայտնաբերվել է տարաներով լցված վառելիք, որը, ըստ նախնական տեղեկությունների, բենզին է։ Այս մասին Հանրային ՀԸ-ին տված հարցազրույցում ասաց ՀՀ զինվորական դատախազ, գլխավոր դատախազի տեղակալ Գրիգոր Էլիզբարյանը՝ անդրադառնալով հունվարի լույս 19-ի գիշերը ՀՀ Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանի հրդեհի դեպքին, որի ետևանքով 15 զինծառայող զոհվել է։
Նա նշեց, որ տարաները առգրավվել են, հետագայում փորձաքննություններով կպարզվի պարունակությունը՝ դա դիզվառելիք է, թե բենզին է․ «Ըստ նախնական տեղեկությունների՝ ավտոբենզին է»։
Հիշեցնենք, որ ավելի վաղ դեպքի վերաբերյալ նախնական տվյալներ էին հաղորդել ՀՀ վարչապետ Նիկոլ Փաշինյանն ու պաշտպանության նախարար Սուրեն Պապիկյանը։
Ինժեներասակրավորային վաշտի դասակի հրամանատարը, պատասխանելով լրագրողների հարցին, թե իրականությանը համապատասխանո՞ւմ է բենզինի օգտագործման՝ կառավարության նիստին նկարագրված տեսարանը, ասել է, որ դա միայն վարկած է, իսկ ինքը չի կարող հստակ ասել։ Նա նշել է, որ երեկոյան, երբ ինքն այնտեղ է եղել, բենզին չի եղել, եթե լիներ էլ, ինքը թույլ չէր տա կիրառել։ Դասակի հրամանատարը հավելեց, որ իրենց տրամադրվածը չոր փայտ է ու քարածուխ, և դրանք վառում են թղթով։
Նշենք նաև, որ դեպքի առթիվ նախաձեռնվել է քրեական վարույթ՝ Քրեական օրենսգրի 532-րդ հոդվածի 4-րդ մասով․ այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է 2 և ավելի անձանց մահ։
Զինդատախազ Գրիգոր Էլիզբարյանը հարցազրույցում հաստատեց այն նախնական տեղեկությունը, որ ինժեներասակրավորային վաշտի՝ կոչումով կապիտան սպան, գտնվելով տվյալ շինությունում և հանդիսանալով օրվա պատասխանատու հերթապահ, գիշերը՝ 01։30-ի սահմաններում, միջանցքում տեղակայված վառարանի կրակը թեժացնելու նպատակով դուրս է եկել և 5 լիտրանոց պլաստմասե տարայում գտնվող ավտոբենզինը լցրել է վառարանի մեջ․ «Լցնելու ընթացքում հրդեհ է բռնկվել, որից ինքն այրվել է, համազգեստը կպել է, մեխանիկորեն ձեռքից նետել է տարան, որի արդյունքում հրդեհը տարածվել և մեծ արագությամբ բռնկվել է, փորձել է բարձրաձայնել, գոռացել է, միջոց է ձեռնարկել զինվորներին հանելու, բայց կրակը շատ արագ տարածվել է, մուտքը արգելափակվել է, և զինվորները դռնից դուրս գալու հնարավորություն չեն ունեցել»։
Զինդատախազի խոսքով այդ սպան ողջ է և գտնվում է վերակենդանացման բաժանմունքում․ «Վիճակը գնահատվում է ծայրահեղ ծանր, գիտակցություն առկա է, բայց դեռևս կոնտակտի մտնելու հնարավորությունը քիչ է, դեմքի շրջանում և մարմնի այլ մասերում ունի բազմաթիվ վնասվածքներ, շփումը սահմանափակ է»։
Էլիզբարյանը նաև նշեց, որ մուտքի արգելափակումից հետո միջամտել են դրսում ծառայություն իրականացնող ժամկետային մի քանի զինծառայողներ, երկու ժամկետայինի ճաղավանդակով պատուհաններից մի կերպ հնարավորություն է եղել դուրս հանել, այնուհետև ծխի և մրի պայմաններում այլևս միջոցներ ձեռնարկելու հնարավորություն չի եղել, ահազանգվել է պատկան մարմիններին։
Զինդատախազի խոսքով ներկա պահին քննիչներն արդեն 2, 3 զինծառայողի հարցաքննել են, նաև հոսպիտալում գտնվող զինծառայողի։ Այս պահին հարցաքննությունների, փորձաքննությունների փուլն է․ «Տարբեր փորձաքննություններ [կիրականացվեն]․ հասկանալի է, որ դիակի դատաբժշկական փորձաքննություններն առանձին բնույթ են կրելու, որովհետև որոշ մասը անճանաչելի են, գենետիկական նմուշներ կվերցվեն, կնշանակվեն գենետիկական փորձաքննություններ»։
23:31 - 19 հունվարի, 2023
