Իմ Քայլը

«Իմ քայլը» Հայաստանում գործող քաղաքական դաշինք է, որի հիմքը Քաղաքացիական պայմանագիր կուսակցությունն է։ Այն ձեւավորվել է 2018 թվականի օգոստոսին Երեւանի ավագանու 2018 թվական ընտրություններից առաջ։ Դաշինքի առաջնորդը ՀՀ վարչապետ Նիկոլ Փաշինյանն է։

2018 թվականի սեպտեմբերի 23-ին «Իմ քայլը» դաշինքը մասնակցել եւ քաղաքապետի թեկնածու Հայկ Մարությանի հետ հաղթել է Երեւանի ավագանու ընտրություններին՝ ստանալով ավագանու 65 տեղերից 57-ը։

«Քաղաքացիական պայմանագիր» եւ «Առաքելություն» կուսակցությունները 2018 թվականի դեկտեմբերի 9-ին կայացած ԱԺ ընտրությունների նախաշեմին ձեւավորեցին «Իմ քայլը» դաշինքը։ 

Ընտրություններում հավաքելով 70․37 տոկոս ձայն՝ «Իմ քայլը» դաշինքը ստացավ 88 պատգամավոր ունենալու մանդատ։

47 խոստում, 5 տարի․ ինչ է արել եւ ինչ չի արել «Իմ քայլը» Երեւանում

47 խոստում, 5 տարի․ ինչ է արել եւ ինչ չի արել «Իմ քայլը» Երեւանում

Վաղը՝ սեպտեմբերի 17-ին, Երեւանում տեղի են ունենալու ավագանու ընտրություններ։ Նախորդ ընտրությունները հինգ տարի առաջ էին՝ 2018թ․-ի սեպտեմբերի 23-ին։ Ինչպես այս անգամ, այնպես էլ նախորդ ընտրություններին մասնակցել է նաեւ «Քաղաքացիական պայմանագիր» կուսակցությունը, միայն թե 2018-ին որպես «Իմ քայլը» դաշինք։ Դաշինքն այդ տարի ներկայացրել էր 47 կետից բաղկացած ծրագիր։ Այդ ծրագիրն այսօր համացանցում որոնմամբ հնարավոր չէ գտնել, ԿԸՀ ներկայացնելու օրենքով սահմանված պահանջ էլ չի եղել, ուստի ԿԸՀ պաշտոնական կայքում այն առկա չէ։ Չնայած այդ օրերին նախընտրական ծրագիրը հրապարկվել էր «Քաղաքացիական պայմանագիր» կուսակցության պաշտոնական կայքում, այսօր այնտեղից հեռացված է։ 2018-ին «Իմ քայլը» դաշինքի քաղաքապետի թեկնածու Հայկ Մարությանը ֆեյսբուքյան իր էջում տեղադրել էր Դաշինքի՝ ՔՊԿ կայքում զետեղված ծրագիրը, միայն թե այժմ այդ հղումն այլեւս հասանելի չէ։ Ս․թ․ սեպտեմբերի 1-ին Infocom-ը գրավոր հարցում է ուղարկել Երեւանի ավագանու «Իմ քայլը» խմբակցույթուն՝ խնդրելով տրամադրել եւ 2018-ի նախընտրական ծրագիրը եւ առանձին-առանձին ներկայացնել, թե ծրագրի յուրաքանչյուր դրույթի իրականացման ուղղությամբ ինչ քայլեր, ծրագրեր ու գործողություններ են կատարվել 2023թ. օգոստոսի 31-ի դրությամբ, եւ թե որ դրույթի իրականացումն ինչպես է գնահատում ավագանու «Իմ քայլը» խմբակցությունը (իրականացվել է մասամբ, իրականացվել է ամբողջությամբ, չի իրականացվել)։ Հարցման պատասխանը ստացել ենք միայն սեպտեմբերի 13-ին․ խմբակցությունը տրամադրել է 2018-ի ծրագիրը՝ նշելով, որ հինգ տարիների ընթացքում իրականացրած աշխատանքներին ոլորտ առ ոլորտ անդրադարձ է կատարվել նոր ծրագրում։ Ինչ վերաբերում է ծրագրի դրույթների իրականացման գնահատականին՝ խմբակցության ղեկավար Արմեն Գալջյանը պատասխանել է, որ ծրագրի իրականացումն «ընդհանուր առմամբ գնահատվում է դրական»։ Infocom-ը ՔՊԿ՝ այս ընտրությունների նախընտրական ծրագրի եւ բաց աղբյուրներում առկա տեղեկությունների միջոցով փորձել է հասկանալ, թե «Իմ քայլը» դաշինքի՝ 2018թ․ Երեւանի ավագանու ընտրությունների նախընտրական ծրագրի որ խոստումը որքանով է իրականություն դարձել հինգ տարիների ընթացքում։ Այս հրապարկման մեջ կարմիրով նշված ենթավերնագրերը նշանակում են, որ ծրագրով նախատեսված տվյալ դրույթը, ըստ էության, չի իրականացվել, կանաչով նշվածը՝ մեծ մասամբ կամ ամբողջությամբ իրականացվել է, դեղինով նշվածը՝ մասամբ է իրականացվել կամ իրականացման փուլում է, մանուշակագույնով նշված են այն դրույթները, որոնց իրականացման մասին գնահատական հնչեցնելու համար տեղեկություններ առկա չեն կամ առկա տեղեկությունները բավարար չեն։ Հարկ է նշել, որ որոշ դրույթների գնահատումն իրականացվել է՝ հիմնվելով բացառապես նախընտրական նոր ծրագրում ներառված տվյալների հիման վրա։ Ըստ մեր դիտարկման՝ 47 կետից բաղկացած ծրագրի 11 խոստումներն իրականություն են դարձել, 11-ը՝ չեն կատարվել, 17-ը՝ մասամբ են իրականացվել, իսկ 8 կետերի իրականացման մասին գնահատական հնչեցնելը բարդ է։ Տեղական հանրաքվեներ չեն անցկացվել Այսպես, 2018թ․-ի Երեւանի ավագանու ընտրությունների նախընտրական ծրագրի 1-ին կետն «Իմ քայլը» դաշինքը հատկացրել են ուղիղ ժողովրդավարության մեխանիզմներից մեկին՝ տեղական հանրաքվեներին՝ նշելով․ «Քաղաքային օրակարգի հանրային մեծ հնչեղություն ունեցող հարցերը որոշել տեղական հանրաքվեներով»: Դժվար է գնահատել՝ թե Դաշինքն ինչ տեսակ հարցերն է համարել հանրային մեծ հնչեցություն ունեցող, բայց փաստն այն է, որ հինգ տարիների ընթացքում որեւէ հարցի շուրջ հանրաքվե չի կազմակերպվել։  Աղբահանության երկրորդ օպերատոր չի ներգրավվել, բայց ստեղծվել է «Երեւանի աղբահանություն եւ սանիտարական մաքրում» համայնքային հիմնարկը  Ծրագրի 2-րդ կետում նշված է եղել․ «Վերանայել Երեւանի փողոցների մաքրման, աղբահանության եւ ձնամաքրման աշխատանքների կազմակերպման գործընթացը։ Դիտարկել բաց եւ թափանցիկ մրցույթի միջոցով երկրորդ օպերատորի ներգրավման անհրաժեշտության հարցը»։  2019թ․ գարնանը Երեւանի ավագանին, հաշվի առնելով, որ «Սանիթեք»-ը ձախողում է ստանձնած պարտավորությունների կատարումը, բնակչության առողջության եւ շրջակա միջավայրի վրա աղբի բացասական ներգործության նվազեցման եւ չեզոքացման, բնակության համար հարմարավետ եւ էկոլոգիապես անվտանգ պայմանների ապահովման նպատակով ընդունեց «Երեւանի աղբահանություն եւ սանիտարական մաքրում» համայնքային հիմնարկ ստեղծելու մասին որոշումը։ Աղբահանության երկրորդ օպերատոր չընտրվեց։ Երեւանի աղբահանությունն այժմ իրականացնում է «Երեւանի աղբահանության եւ սանիտարական մաքրում» համայնքային հիմնարկը։ Աղբի վերամշակման գործարան չի ստեղծվել Ծրագրի 3-րդ կետով նախատեսված էր ստեղծել աղբի վերամշակման գործարան։ Աղբի վերամշակման գործարան չի ստեղծվել։ 2023թ․ Երեւանի ավագանու ընտրությունների նախընտրական ծրագրում Քաղաքացիական պայմանագիր կուսակցությունը նշել է, որ «կառուցելու են կենցաղային թափոնների քաղաքային նոր աղբավայր, կոնսերվացնելու են գործող աղբավայրը եւ ստեղծելու են կոշտ կենցաղային թափոնների վերամշակման ենթակառուցվածք»։ Աղբը տարանջատված տարաներում թափելու հնարավորություններն ավելացնելու աշխատանքները շարունակվում են Ծրագրի 4-րդ կետով նախատեսված էր տնտեսվարող սուբյեկտների համար ստեղծել աղբը տարանջատված տարաներում թափելու հնարավորություն: ՔՊԿ-ն նոր ծրագրում նշել է, որ քաղաքի 140 տարբեր հասցեներում տեղադրվել են աղբի տեսակավորման 420 թափոնաման, ձեռք են բերվել եւս 930 թափոնաման, որոնք կտեղադրվեն մինչեւ տարեվերջ։ Միաժամանակ, նոր ծրագրով նախատեսված է թափոնների տեսակավորման ոլորտում առաջիկա հինգ տարում ավելացնել տեսակավորման կետերը՝ 140-ից հասցնելով առնվազն 300-ի, ավելացնել վերամշակելի թափոնների տեսակը՝ ներառելով ալյումինե թափոնների համար նախատեսված տարաները, աղբի տեսակավորման թափոնամանների թիվը հասցնել 3000-ի։ Միասնական տոմսային համակարգի միայն պիլոտային տարբերկան է ներդրվել 2018-ի ծրագրի 5-րդ կետում նշված էր, որ պետք է արդիականացնել տրանսպորտային ցանցը ներդրումների ներգրավմամբ՝ ամբողջությամբ փոխելով շարժակազմը, ներդնելով միասնական տոմսային համակարգ, վերանայելով երթուղիներն ու կանգառները: Ուղեւորների հատուկ խմբերի համար ներդնել զեղչային համակարգ:  Ինչպես հայտնի է՝ Երեւանի տրանսպորտային ցանցն արդիականացել է, շարժակազմից դուրս են եկել բոլոր գազելները, սակայն տարիներ առաջ ձեռք բերված ավտոբուսները դեռեւս սպասարկում են քաղաքացիներին։ Ներդրվել է միասնական տոմսային համակարգի միայն  պիլոտային տարբերակը։ ՔՊԿ-ն նոր ծրագրում խոստացել է, որ «մինչեւ 2023թ. ավարտը կունենանք ներդրված միասնական տոմսային համակարգ վերգետնյա եւ ստորգետնյա հասարակական տրանսպորտի համար, կունենանք նաեւ միասնական տոմսի տարբեր տեսակներ։ […] »: Տոմսային համակարգի ամբողջական ներդրման ձգձումներին մեր անդրադարձը՝ այստեղ։ Մինչեւ քանի՞սն է աշխատում քաղաքային տրանսպորտը  2018-ի ծրագրի 6-րդ կետում նշված էր, որ քաղաքային տրանսպորտի հասանելիությունը պետք է ապահովվի առնվազն մինչեւ 24:00: Առանց մշտադիտարկում անելու հստակ տվյալ ներկայացնելը դժվար է, սակայն առնվազն սոցիալական ցանցերում այս հարցի առնչությամբ տարբեր տեսակետներ են հնչում։ Ընթերցողը կարող է սեփական փորձով գնահատել։ Նյութի հեղինակի դիտարկմամբ՝ Նոր Նորքի զանգվածներ գնացող տրանսպորտը հաճախ մինչեւ կեսգիշեր աշխատում է։ Մետրոյի նոր կայարան չի կառուցվել  2018-ի ծրագրի 7-րդ կետով նախատեսվում էր տանսպորտային ցանցի ընդլայման նպատակով կառուցել մետրոյի առնվազն մեկ նոր կայարան: Նոր կայարան չի կառուցվել։ Հայտարարվել է, որ 2024թ․-ին են մեկնարկելու Աջափնյակի մետրոյի կայարանի կառուցման աշխատանքները։ Սա նշված է նաեւ ՔՊԿ նոր ծրագրում։ Ս․թ․ մարտի 2-ին կառավարության նիստում Երեւանի փոխքաղաքապետ Տիգրան Ավինյանը հայտարարել է, որ նախնական հաշվարկներով Աջափնյակի կայարանի շինարարությունը տեւելու է 48 ամիս` 4 տարի։ Հանրային տրանսպորտի մատչելիությունը՝ հաշմանդամություն ունցեցող անձանց համար 2018-ի ծրագրի 8-րդ կետով սահմանված էր, որ հաշմանդամություն ունեցող անձանց համար պետք է ապահովել տրանսպորտի մատչելիություն եւ տարածական կողմնորոշման հնարավորություն:  Տարածական կողմնորոշման հնարավորության մասին բաց աղբյուրներում տեղեկություններ գտնել հնարավոր չեղավ։ Այս դրույթին անդրադարձ չկա նաեւ նոր ծրագրում։ Միաժամանակ, նոր ծրագրում ՔՊԿ-ն խոստացել է «շարունակել ապահովել հանրային տրանսպորտի մատչելիությունը հաշմանդամություն ունեցող եւ մանկասայլակով անձանց համար, շարունակել իրականացնել հանրային տրանսպորտի վարորդների վերապատրաստման գործընթացը՝ սահմանված ստանդարտների, վարվեցողության կանոնների, ինչպես նաեւ հաշմանդամություն ունեցող ուղեւորներին համապատասխան օժանդակություն ցուցաբերելու ընթացակարգերի ուղղությամբ»։ Չի մշակվել Երեւանի քաղաքաշինական նոր ռազմավարությունը 2018-ի ծրագրի 9-րդ կետով նախատեսված էր մասնագիտական ու հանրային քննարկումների միջոցով մշակել քաղաքի զարգացման ռազմավարություն (City Development Strategy)։  Երեւան քաղաքի զարգացման 2023 թվականի ծրագրում նշված է, որ Երեւանի զարգացման 2023թ․ գերակայություններից է Երեւանի քաղաքաշինական նոր ռազմավարության մշակման անհրաժեշտությունը։ Այդ ռազմավարությունը դեռեւս մշակված չէ։ Այս դրույթի իրականացման վերաբերյալ մեր հարցին, ինչպես եւ մյուս հարցերին, ավագանու «Իմ քայլը» խմբակցությունից առանձին պատասխան չի հնչել։ Նոր ծրագրում այս մասին որեւէ նշում չկա։  Ապօրինի շինարարության դեմ պայքար․ ապամոնտաժվում են ապօրինի կառույցները 2018-ի ծրագրի 10-րդ կետով նախատեսված էր ապօրինի շինարարությունը բացառելու նպատակով իրականացնել խիստ վերահսկողություն:  2020թ․-ի դեկտեմբերին, օրինակ, ավագանու Իմ քայլը խմբակցության անդամ Լեւոն Զաքարյանը ֆեյսբուքյան էջում գրել էր, որ քանդվել եւ ապամոնտաժվել են ապօրինի շինություններ։ 2021թ․-ի հունիսին Հայկ Մարությանը ֆեյսբուքյան էջում գրել էր, որ մի շարք հասցեներում ապամոնտաժվել են ապօրինի շինություններ:  2021թ․-ի հուլիսին էլ Դալմայի այգիներից էին ապամոնտաժվել ապօրինի շինություններ։ Վթարային շենքերի բնակիչների վերաբնակեցման ծրագիրը 2018թ․ ծրագրի 11-րդ կետով նշված էր, որ 4-րդ կարգի վթարային շենքերի բնակիչների համար պետք է իրականացվի վերաբնակեցման ծրագիր՝ օգտագործելով սոցիալական բնակարանաշինության ոլորտում «համայնք - մասնավոր սեկտոր» համագործակցության հնարավորությունները։ ՔՊԿ նոր ծրագրում նշված է, որ մշակել եւ արդեն իրականացնում են Աջափնյակ վարչական շրջանի Արզումանյան 10 եւ 17 վթարային շենքերի վերաբնակեցման ծրագիրը, որով նախատեսվում է բնակիչներին տրամադրել նոր բնակարաններ՝ վթարային շենքերի տեղում կառուցվող նոր բազմաբնակարան շենքերում։  2022թ․ նոյեմբերի 17-ին Կառավարությունն ընդունել էր Արզումանյան 10 եւ 17 հասցեների 4-րդ կարգի վթարային շենքերը գերակա շահ ճանաչելու առաջին փուլի նախագիծը: Տիգրան Ավինյանը ֆեյսբուքյան էջում գրել էր, որ այդպիսով հայտարարում են 4-րդ կարգի վթարային շենքերի խնդիրների լուծման մեկնարկը: Փողոցների լուսավորման ցանցն ընդլայնվել է  2018-ի ծրագրի 12-րդ կետով նախատեսված էր արեւային էներգիայի եւ էներգախնայող համակարգերի օգտագործմամբ ընդլայնել փողոցների լուսավորման ցանցը։  ՔՊԿ նոր ծրագրում նշված է, որ 2019 թվականից սկսած տեղադրել են շուրջ 30.000 էներգախնայող ԼԵԴ լուսատուներ: Նոր ծրագրով նախատեսվում է կառուցելու արեւային կայաններ, որոնք հնարավորություն կտան օգտագործելու արեւային էներգիան քաղաքի լուսավորության համար:  Հաշմանդամություն ունեցող անձանց համար շենք-շինությունների ու ենթակառուցվաածքների մատչելիությունը 2018-ի ծրագրի 13-րդ կետով նախատեսված էր հաշմանդամություն ունեցող անձանց համար ապահովել շենք-շինությունների եւ ենթակառուցվածքների մատչելիություն։ ՔՊԿ նոր ծրագրում նշված է միայն, որ Երեւան քաղաքում տեղադրվող վերելակները հարմարեցված են հաշմանդամություն ունեցող անձանց համար։ Բեռնաթափման նպատակով վերգետնյա եւ ստորգետնյա ավտոկայանատեղիներ չեն կառուցվել 2018-ի ծրագրի 14-րդ կետով նախատեսված էր երթեւեկության բեռնաթափման նպատակով կառուցել վերգետնյա եւ ստորգետնյա ավտոկայանատեղիներ։  Նոր ծրագրում այս դրույթին անդրադարձ չկա, բաց աղբյուրներում եւս այլ տեղեկություններ առկա չեն։ Ստորգետնյա անցումների բարեկարգման աշխատանքներ են իրականացվել, բայց դժգոհություններ կան 2018թ․ ծրագրի 15-րդ կետով նախատեսված էր բարեկարգել առկա ստորգետնյա անցումները եւ ապահովել դրանց անվտանգությունը։  Նորոգվել էր Հալաբյան եւ Կիեւյան փողոցների խաչմերուկում գտնվող անցումը, մետրոյի Մարշալ Բաղրամյան կայարան տանող անցումը, հիմնանորոգվել էր Շենգավիթ վարչական շրջանի Արշակունյաց եւ Գ. Նժդեհ փողոցների հատման մասում գտնվող ստորգետնյա անցումը, ապա համայանքային բյուջեից 50 միլիոն դրամ հատկացնելով՝ Երեւանի քաղաքապետարանը հիմնանորոգել էր «Փակ շուկայի» դիմացի ստորգետնյա հետիոտնային անցումը: Թեեւ այն շահագործման հանձնելուց հետո համացանցում հանդիպում էին դժգոհություններ, որ հիմնանորոգումն ըստ պատշաճի չի արվել, օրինակ՝ աղակալում են գետնանցման պատերի սալիկները, եւ այլն։ Այս առնչությամբ նոր ծրագրում որեւէ նշում չկա։ Բազմաբնակարան շենքերի կառավարման արդյունավետությունը չի բարձրացել 2018-ի ծրագրի 16-րդ կետում նշված էր, որ բազմաբնակարանային շենքերի կառավարման եւ սպասարակման արդյունավետությունը բարձրացնելու նպատակով նախատեսվում է ներգրավել մասնագիտացված ընկերություններ՝ ոլորտում ապահովելով մրցակցային դաշտ։ Այս մասին ինչպես բաց աղբյուրներում, այնպես էլ նոր ծրագրում անդրադարձ չկա։ Միաժամանակ, նոր ծրագրով նախատեսվում է նախաձեռնել եւ մինչեւ 2025 թվականն ավարտին հասցնել բազմաբնակարան շենքերի կառավարման (համատիրությունների) մասին նոր օրենքի ընդունումը եւ կառավարման արդյունավետ մոդելի ներդնումը։ Վթարային վերելակների փոխարինման գործընթացը շարունակվում է 2018-ի ծրագրի 17-րդ կետով նախատեսված էր վերանորոգել վթարային վերելակները, իսկ անհրաժեշտության դեպքում դրանք փոխարինել նորերով:  ՔՊԿ նոր ծրագրում նշված է, որ Երեւան քաղաքում առկա փոխարինման ենթակա թվով 4239 վերելակներից 2023թ. ավարտին փոխարինված կլինի վթարային վիճակում գտնվող շուրջ 1600 վերելակ։  Իրականացվել են բակային տարածքների կահավորման աշխատանքներ 2018-ի ծրագրի 18-րդ կետում նշված էր, որ նախատեսվում է կահավորել բակային տարածքները խաղահրապարակներով եւ մարզասարքերով։ Ստեղծել պայմաններ ակտիվ ժամանցի համար:  Նոր ծրագրում նշված է, որ արդեն վերակառուցվել եւ հիմնանորոգվել է 315 բակային տարածք, որոնք ներառում են մարզասարքեր, խաղասարքեր՝ ռետինե պաշտպանիչ հատակով, զրուցարաններ, լուսավորության արդիականացում, կառուցել եւ հիմնանորոգել ենք թվով 68 ֆուտբոլի, 7 բասկետբոլի, 6 վոլեյբոլի, 4 թենիսի խաղադաշտեր: Նոր ծրագրով նախատեսվում է կառուցել եւ հիմնանորոգել Երեւանի բոլոր բակերն իրենց ենթակառուցվածքներով:  Դպրոցական ճաշարանների մասին հիշվել է միայն 2018-ի ծրագրում 2018-ի ծրագրի 19-րդ կետում նշված էր, որ նախատեսվում է դպրոցական ճաշարաններում աշակերտների համար սննդի վաճառքը կազմակերպել առողջ ապրելակերպի սկզբունքներով` խստիվ պահպանելով սննդի անվտանգության նորմերը:  ՔՊԿ նոր ծրագրում այս առնչությամբ ոչինչ նշված չէ։ 500 հազար ծառի փոխարեն՝ 30 հազար ծառ եւ 425 հազար թուփ 2018-ի ծրագրի 20-րդ կետով նախատեսված էր տնկել 500,000 ծառ մայրաքաղաքի տարբեր հատվածներում։  ՔՊԿ նոր ծրագրում նշված է, որ վերջին տարիներին տնկվել են շուրջ 30 հազար ծառ եւ 425 հազար թուփ: Նույն կետով նախատեսվում էր ստեղծելով ոռոգման համակարգ՝ կանաչապատել «Նորքի անտառները» եւ Սարալանջ փողոցին հարակից տարածքները։ Նորքի անտառում նախատեսված կաթիլային ոռոգման համակարգը չի կառուցվել։ 2020-ից առ այսօր դատական գործի վերաբերյալ չկա ոչ մի որոշում։ 2019-ին կառավարությունը պետք է սկսեր անտառի վերականգման աշխատանքները։ Անտառային կոմիտեն ասում է՝ կորոնավիրուսի համավարակը խանգարեց։ Այժմ չգիտեն ոչ ժամանակացույցը, ոչ էլ թե ինչ աշխատանքներ են կատարվելու։  2020թ․ մարտին Երեւանի քաղաքապետի խոսնակ Հակոբ Կարապետյանը ֆեյսբուքյան էջում տեղեկացրել էր, որ Սարալանջում կաթիլային ոռոգման համակարգ է անցկացվում, իսկ օգոստոսին հաղորդել էր, որ ոռոգման համակարգը պատրաստ է, ու շուտով լանջը կծառապատվի: Նույն կետում նշված էր նաեւ, որ ծանր մետաղներով աղտոտված տարածքներում նախատեսվում է տնկել դրանք չեզոքացնելու հատկություն ունեցող բուսատեսակներ: Այս առնչությամբ ինչպես բաց աղբյուրներում, այնպես էլ նոր ծրագրում ոչինչ նշված չէ։ Կանաչ տարածքներն ընդլայնվել են 2018թ․ ծրագրի 21-րդ կետով նախատեսված էր բարեկարգել եւ ընդլայնել հանրային կանաչ տարածքները։  Նոր ծրագրում նշված է, որ վերջին շրջանում Երեւան քաղաքում կանաչ տարածքներն ավելացել են շուրջ 33 հեկտարով, այդ թվում՝ Ծիծեռնակաբերդ՝ 8.5 հա, Սարալանջ՝ 6 հա, Ավան վարչական շրջան՝ 1 հա՝ արդյունքում մեկ անձին բաժին ընկնող կանաչ տարածքների մինիմալ մակերեսը 7.7 քմ-ից հասցնելով 8 քմ-ի:  Նշված է նաեւ, որ քաղաքում կանաչ տարածքներ ստեղծելու եւ պահպանելու նպատակով ի սկզբանե իրականացվել են ոռոգման ցանցի գույքագրման աշխատանքներ: Ըստ գույքագրման 8 արդյունքների՝ քաղաքային ոռոգման ցանցի մեծ մասը վատթար վիճակում է եղել: Այնուհետեւ առաջնահերթության կարգով վերականգնել եւ ընդլայնել են ոռոգման ցանցը: Ներկայումս, ըստ ծրագրի, առկա է շուրջ 25 կմ վերանորոգված եւ 35 կմ ընդլայնված ոռոգման ցանց: Նշված է, որ ընդհանուր օգտագործման նոր կանաչ տարածքներ ստեղծելու եւ պահպանելու նպատակով կառուցվել է 2 խորքային հոր Շենգավիթ եւ Նոր Նորք վարչական շրջաններում:  ՔՊԿ նոր ծրագրում կանաչ տարածքների վերաբերյալ մի շարք դրութներ կան։ Բոլոր շատրվանները չեն նորոգվել 2018թ․ ծրագրի 22-րդ կետով նախատեսված էր վերագործարկել բոլոր չգործող շատրվաններն ու նախաձեռնել նորերի կառուցումը:  2022թ․ մարտին Երեւանի քաղաքապետարանը հաղորդել է, որ այդ տարի նախատեսվում է վերագործարկել Երեւանի Մալաթիա-Սեբաստիա վարչական շրջանի շատրվանները, նույն տարվա սեպտեմբերին հրապարակվել է նյութ, ըստ որի՝ շատրվանները վերանորոգվում են։ Բաց աղբյուրներում, ինչպես նաեւ նոր ծրագրում շատրվանների նորոգման մասին նշում չկա։ Հիվանդ կենդանիները քնեցվում են, առողջ կենդանիները՝ ստերջացվում, պատվաստվում եւ վերադարձվում տարածք 2018թ․ ծրագրի 23-րդ կետով նախատեսված էր թափառող շների գլխաքանակի կառավարման համար կիրառել բացառապես ստերջացման մեթոդը:  Մայրաքաղաքում թափառող կենդանիների խնդիրների կանոնակարգման նպատակով ստեղծվել է «Թափառող կենդանիների վնասազերծման» կենտրոն ՀՈԱԿ-ը, որն իրականացնում է թափառող շների նախնական հետազոտություն, հիվանդ կենդանիների քնեցում, առողջ կենդանիների ստերջացում, պատվաստում եւ վերադարձ տարածք: 2023 թվականի կանոնադրական փոփոխություններից հետո ՀՈԱԿ-ը վերանվանվել է «Կենդանիների խնամքի» կենտրոն ՀՈԱԿ: Նոր ծրագրում, ի թիվս այլնի, նշված է, որ վերջին չորս տարիների ընթացքում հետազոտվել, ստերջացվել, պատվաստվել է շուրջ 15.600 թափառող կենդանի:  Վարչական բոլոր տարածքներում շների զբոսանքի համար վայրեր չեն հատկացվել 2018-ի ծրագրի 24-րդ կետով նախատեսված էր վարչական բոլոր տարածքներում հատկացնել վայրեր` շների զբոսանքի համար:  2021թ․ սեպտեմբերի 10-ին Երեւանի ավագանու «Իմ քայլը» խմբակցության անդամ Լեւոն Զաքարյանը ֆեյսբուքյան իր էջում հաղորդել էր, որ Մալաթիա-Սեբաստիա վարչական շրջանի «Սիրո եւ հավատի» այգուն կից կառուցվում է շների համար նախատեսված զբոսայգի։ 2021թ․ նոյեմբերի 15-ին հաղորդվել է, որ շահագործման է հանձնվել Երեւանի Օղակաձեւ զբոսայգու վեցերորդ հատվածը՝ Հանրապետությունում առաջին սքեյթ պարկով եւ շների համար նախատեսված զբոսանքի պարկով: «Կենդանիների խնամքի» կենտրոն ՀՈԱԿ-ի տնօրեն Հարություն Առաքելյանն էլ infocom.am-ի հետ զրույցում նշեց, որ այս ծրագրի մեկնարկն արդեն տրված է։ Նոր ծրագրում այս դրույթին անդրադարձ չկա։ Հանրային նշանակության տարածքների մաքրման աշխատանքները չեն ավարտվել 2018-ի ծրագրի 25-րդ կետով նախատեսված էր մաքրել հանրային նշանակության տարածքները, այդ թվում՝ Հրազդանի կիրճը, Երեւանյան լիճը եւ դրա շրջակայքը:  2022-ին Երեւանի քաղաքապետարանի տարեկան ծրագրով մեկնարկել են Երեւանյան լճի մաքրման աշխատանքները:  Նոր ծրագրում նշված է, որ իրականացվել են Երեւանյան լճի ափամերձ տարածքի մաքրման եւ բարեկարգման աշխատանքներ՝ վերածելով տարածքը հանգստի գոտու, իսկ աղբի հոսքը դեպի Երեւանյան լիճ կանխելու նպատակով Հրազդան գետի վրա տեղադրվել է աղբաորսիչ սարք: Նոր ծրագրում նշված է, որ Երեւանյան լճի ափամերձ տարածքից հեռացվել է շուրջ 9500 խմ աղբ: Նշված է, որ մեկնարկել է նաեւ Հրազդան գետի եւ ափամերձ տարածքի մաքրման աշխատանքները:  Պոլիկլինիկաների վերանորոգման աշխատանքները չեն ավարտվել 2018թ․ ծրագրի 26-րդ կետով նախատեսված էր վերանորոգել պոլիկլինիկաների շենքային եւ բակային տարածքները:  2022թ․ մայիսին Երեւանի քաղաքապետարանը հաղորդել է, որ Երեւանյան մի շարք պոլիկլինիկաներում արդյունավետ կառավարում ապահովելու, ինչպես նաեւ բնակիչներին մատուցվող ծառայություններն ու շենքային պայմանները բարելավելու նպատակով Երեւանի քաղաքապետարանը նախատեսում է որոշ բաժնետիրական ընկերությունների վերակազմակերպում: Նոր ծրագրում, օրինակ, պոլիկլինիկաների վերաբերյալ նշված է, որ մինչեւ 2023թ. ավարտը նախատեսվում է շահագործման հանձնել ամբողջությամբ հիմնանորոգված եւ վերազինված թվով 5 պոլիկլինիկա, իսկ մինչեւ 2026թ. հիմնանորոգել Երեւանի բոլոր պոլիկլինիկաները: Նշված է, որ մինչեւ 2025 թվականը նախատեսվում է հիմնանորոգել եւ շահագործման հանձնելու եւս 7 պոլիկլինիկա:  Պոլիկլինիկաներում առցանց հերթագրման համակարգի ներդրումը դեռ ավարտին չի հասցվել 2018թ․ ծրագրի 27-րդ կետով նախատեսված էր պոլիկլինիկաներում ներդնել այցելուների նախնական գրանցման, հերթերի կառավարման եւ սպասարկման որակի բարելավման այլ մեխանիզմներ:  2019թ․ սեպտեմբերին Երեւանի քաղաքապետարանը հաղորդել է, որ Երեւանի պոլիկլինիկաներում ներդվում է էլեկտրոնային հերթագրման համակարգ, իսկ դեկտեմբերին հաղորդել է, որ Երեւանի պոլիկլինիկաներ այցն արդեն հնարավոր է առցանց հերթագրմամբ։ ՔՊԿ նոր ծրագրում նշված է, որ համայնքային ենթակայության բոլոր պոլիկլինիկաները վերազինվել են ժամանակակից թվային նոր սարքավորումներով։ Նշված է, որ մեկնարկել եւ մինչեւ տարեվերջ ավարտին են հասցնելու էլեկտրոնային հերթագրման համակարգի ներդնումը պոլիկլինիկաներում։  Նոր ծրագրում նշված է, որ իրականացվում է պոլիկլինիկաներում ընթացող բոլոր պրոցեսների թվայնացում, ընթացիկ տարվա ավարտին «Մեկ պատուհանի» սկզբունքով աշխատող 19 պոլիկլինիկաներ կլինեն, ինչի արդյունքում կկրճատվի քաղաքացիների կրկնակի այցը պոլիկլինիկա։  Առաջնային օղակում տրամադրվող բուժօգնության որակի բարձրացում 2018թ․ ծրագրի 28-րդ կետով նախատեսված էր ներդնել համալիր ծրագրեր՝ առաջնային օղակում տրամադրվող բուժօգնության որակը բարձրացնելու նպատակով: Նոր ծրագրում այս մասին որեւէ նշում չկա։ 2022-ի մայիսին Երեւանի քաղաքապետարանը հաղորդել է, որ Երեւանում այսօր բնակիչների առաջնային օղակի բուժսպասարկումն իրականացնում է 24 պոլիկլինիկա, եւ որ տասնամյակներ շարունակ պոլիկլինիկաներում կուտակված խնդիրներն ու ոչ արդյունավետ կառավարումը համակարգային ու հիմնարար փոփոխություններ են պահանջում: Նշվել է, որ տեղերում իրականացված ուսումնասիրությունների ու նախնական կարիքների գնահատման արդյունքում ձեւավորել է հստակ պատկեր: Հաղորդվել է, որ ընթացիկ տարում սահմանված առաջնահերթությունների ուղղություններով տարբեր ծրագրեր կիրականացվեն։ Բնակչության առողջության վրա բացասական ազդեցության գործոնների նվազեցում  2018-ի ծրագրի 29-րդ կետով նախատեսված էր բարելավել շրջակա միջավայրը՝ նվազեցնելով բնակչության առողջության վրա բացասական ազդեցության գործոնները:  Երեւանում փոշու արտանետումների խնդրին բոլորն են բախվում։ Հինգ օր առաջ, օրինակ, Հիդրոօթերեւությաբանության եւ մոնիթորինգի կենտրոն ՊՈԱԿ-ը հաղորդել է, որ գոստոսի 31-սեպտեմբերի 6-ը փոշու պարունակությունը գերազանցել է սահմանային թույլատրելի կոնցենտրացիան Կենտրոն վարչական շրջանում ամբողջ շաբաթվա ընթացքում, Արաբկիրում եւ Նոր Նորքում՝ սեպտեմբերի 1-3-ը, 6-ին, Շենգավիթում՝ սեպտեմբերի 2-ին, 3-ին, 6-ին։ Ազոտի երկօքսիդի պարունակությունը գերազանցել է սահմանային թույլատրելի կոնցենտրացիան Կենտրոնում ամբողջ շաբաթվա ընթացքում, Նոր Նորքում՝ օգոստոսի 31-սեպտեմբերի 4-ը, Արաբկիրում՝ օգոստոսի 31-ին, սեպտեմբերի 3-ին, 4-ին։  ՔՊԿ-ն նոր ծրագրում նշել է, որ օդի որակի մշտադիտարկման նպատակով ձեռք ենք բերել հինգ սենսորային սարք, որոնց շնորհիվ արդեն մեկ տարի է, ինչ իրականացվում է ակտիվ եւ արդյունավետ վերահսկողություն օդի որակի կանոնների պահպանման ուղղությամբ։ Նոր ծրագրով նախատեսված է, որ ավելի ընդգրկուն տվյալներ ձեռք բերելու եւ իրավիճակին ճիշտ արձագանքելու նպատակով մինչեւ 2024թ. ավարտը բոլոր վարչական շրջաններում տեղադրվելու են օդի որակի մոնիթորինգի երեքական սենսորային սարք։ Նշված է, որ մշակվելու է կայուն էներգետիկ զարգացման եւ կլիմայի պահպանության գործողությունների ծրագիր, որի իրականացմամբ քաղաքը կկատարի իր առջեւ դրված հանձնառությունը եւ մինչեւ 2030 թվականը 30%-ով կկրճատի CO2-ի արտանետումները, ուսումնասիրվելու է շենքշինությունների ճակատային հատվածի մշակման արդյունքում հատուկ ներկերով պատելու եղանակով մթնոլորտում առկա արտանետումների կլանման հնարավորությունը, եւ այլն։ Մանկապարտեզների հիմնանորոգման կամ վերանորոգման աշխատանքները շարունակվում են 2018-ի ծրագրի 30-րդ կետում նշված է, որ նախատեսվում է բարելավել նախադպրոցական հաստատությունների շենքային եւ բակային պայմանները: ՔՊԿ նոր ծրագրում նշված է, որ վերակառուցվել եւ հիմնանորոգվել է 53 մանկապարտեզ, հիմնվել է մեկ նոր մանկապարտեզ Նուբարաշեն վարչական շրջանում: Բոլոր այս մանկապարտեզները, ինչպես նշված է ծրագրում, համալրվել են ժամանակակից չափորոշիչներին համապատասխան գույքով, սանհանգույցներով, բուժկետերով, խոհանոցային տեխնիկայով: Բարեկարգվել են նաեւ այդ մանկապարտեզների բակային տարածքները: Հհամայնքին է վերադարձրել մեկ մասնավորեցված մանկապարտեզ։  Վերանայել վարձակալությամբ տրված նախադպրոցական շենքերի պայմանագրերը 2018-ի ծրագրի 31-րդ կետով նախատեսված էր քարտեզագրել նախադպրոցական ուսումնական հաստատությունների շինություններն ու տարածքները։ Վերանայել վարձակալությամբ տրված նախադպրոցական շենքերի պայմանագրերը, եւ հնարավորության դեպքում դրանք կրկին օգտագործել որպես նախադպրոցական հաստատություն: Նախադպրոցական տարիքի երեխաների էլեկտրոնային հերթագրման գործընթացը բարելավվել է 2018-ի խրագրի 32-րդ կետով նախատեսված էր նախադպրոցական տարիքի երեխաների էլեկտրոնային հերթագրման գործընթացը դարձնել թափանցիկ եւ հասանելի առցանց տիրույթում:  Նոր ծրագրում նշված է, որ «Մանկապարտեզ» էլեկտրոնային կառավարման համակարգի կատարելագործմամբ հնարավորություն է ընձեռվել ծանոթանալու նախընտրելի մանկապարտեզի հերթագրումների առկա տվյալներին՝ ապահովելով երեխայի ընդունելության կանխատեսման նվազագույն հնարավորությունը, ինչպես նաեւ գործընթացի թափանցիկությունը՝ էականորեն նվազեցնելով կոռուպցիոն ռիսկերը:  Կրթական հաստատությունների ներառականությունը 2018-ի ծրագրի 33-րդ կետով նախատեսված էր ընդլայնել կրթական հաստատությունների մատչելիության եւ ներառականության հնարավորությունները։  ՔՊԿ նոր ծրագրում ներառականության վերաբերյալ նշված է միայն, որ հանրակրթական դպրոցներում եւ մանկապարտեզներում ապագայում բարելավելու են ուսումնական միջավայրը՝ ներդրված եւ գործարկվող համընդհանուր ներառական կրթության շրջանակում՝ բոլոր երեխաների համար ապահովելով հավասար հնարավորություններ եւ կրթության մատչելիություն:  Համայնքային բյուջեից միայն Երեւանի տոնն ու Ամանարոը չեն, որ ֆինանսավորվել են  2018-ի ծրագրի 34-րդ կետով նախատեսված էր համայնքային բյուջեից ֆինանսավորել միայն Երեւանի տոնն ու Ամանորը։ Տնտեսված միջոցներն ուղղել քաղաքային հրատապ հարցերի լուծմանը: ՔՊԿ նոր ծրագրում նման նշում ընդհանրապես չկա։ Բայց Երեւանի քաղաքապետարանը գումար է հատկացրել նաեւ այլ միջոցառումների համար, օրինակ՝ այս տարվա մարտի 30-ին քաղաքապետարանը 7 մլն 700 հազար դրամ արժեցող գնման պայմանագիր է կնքել Արսեն Խնգոյան Ա/Ձ-ի հետ՝ «Ջազի միջազգային օր» եւ «Մայրության եւ գեղեցկության օր» միջոցառումների կազմակերպման համար։ Արվեստ, երաժշտություն, գրադարաններ 2018-ի ծրագրի 35-րդ կետով նախատեսված էր արվեստի եւ երաժշտական դպրոցներում խթանել հասանելիությունն ու ներգրավվածությունը` համապարփակ ծրագրերի ներդրման միջոցով։ Նոր ծրագրում նշված է, որ երաժշտական եւ արվեստի դպրոցները համալրվել են 25 անուն շուրջ 600 նոր երաժշտական գործիքներով եւ պարագաներով։ Հիմնանորոգվել եւ վերազինվել են Հր. Ղափլանյանի անվան եւ Մ. Մկրտչյանի անվան թատրոնները, Սայաթ-Նովայի անվան երաժշտական դպրոցը։ Արված աշխատանքների մասին ավելի մանրամասն՝ ծրագրում։ Իրականացվել են մի շարք փառատոններ 2018-ի ծրագրի 36-րդ կետով նախատեսված էր խթանել տոնավաճառային եւ փառատոնային մշակույթը` տեղական արտադրողների ու ստեղծագործողների համար:  Նոր ծրագրում նշված է, որ կազմակերպվել է Երեւանի երաժշտական եւ արվեստի դպրոցների մրցույթ-փառատոնը, Արամ Խաչատրյանի անվան պատանի ստեղծագործողների ստուգատես-փառատոնը, Երեւանի քաղաքապետարանի աջակցությամբ կազմակերպվել են «Ոսկե ծիրան» Երեւանի միջազգային կինոփառատոնը, «Արտավազդ» թատերական մրցանակաբաշխությունը, «Երեւանի կարճամետրաժ ֆիլմերի», «Երեւանյան հեռանկարներ» միջազգային երաժշտական, Գրքի երեւանյան, Երեւանի միջազգային թատերական փառատոները, եւ այլն: Համայնքային գրադարանների արդիականացում 2018-ի ծրագրի 37-րդ կետով նախատեսված էր բարեկարգել եւ արդիականացնել համայնքային գրադարանները։ Նոր ծրագրում նշված է, որ համայնքապատկան գրադարանների գրքային ֆոնդը համալրվել է 730 անուն շուրջ 20000 նոր գրքերով Մշակութային կենտրոնների ստեղծում 2018-ի ծրագրի 38-րդ կետով նախատեսվում էր ստեղծել մշակութային կենտրոններ, որտեղ երիտասարդ ստեղծագործողները հնարավորություն կունենան մատչելի պայմաններով վարձակալել արվեստանոցներ եւ կազմակերպել ցուցահանդեսներ, համերգներ եւ այլ միջոցառումներ։ Նոր ծրագրում նշված է միայն, որ կառուցելու են մշակութային նշանակության կառույցներ։ Երեւանի զբոսաշրջային բրենդի մշակման աշխատանքներին նոր պետք է անդրադառնան 2018-ի ծրագրի 39-րդ կետով նախատեսված էր հանրային բաց քննարկման եւ մրցույթների միջոցով ստեղծել Երեւանի զբոսաշրջային ինքնությունը (brand)։ Նոր ծրագրով նախատեսվում է զբոսաշրջության զարգացման նպատակով իրականացնել Երեւան քաղաքի բրենդի մշակումը։ Պատմական միջավայրը գրավիչ դարձնելու ուղղությամբ արված աշխատանքները 2018-ի ծրագրի 40-րդ կետով նախատեսված էր նախաերեւանյան շրջանից մինչեւ սովետական մոդեռնիզմի նմուշներ պարունակող Շենգավիթի հնավայրը, Էրեբունի ամրոցը, Կարմիր բլուրը եւ Երեւանի պատմական այլ միջավայրերը դարձնել գրավիչ` թեմատիկ զբոսաշրջային այցերի համար: 2019-ի հոկտեմբերին հաղորդվել է, որ Կարմիր բլուրը մաքրվել է շինաղբից, այստեղ նաեւ բարեկարգման աշխատանքներ են իրականացվել։ 2022-ի հոկտեմբերին Երեւանի քաղաքապետարանը հաղորդել է, որ երեւանյան հնավայրերի պահպանման ու հանրահռչակման նպատակով համայնքը միջազգային ու տեղական գործընկերների հետ տարբեր նախագծեր է ձեռնարկել, Ուրարտական ժամանակաշրջանում կառուցված Կարմիր բլուրում եւս մի շարք ծրագրեր են մեկնարկել: Բացի դրանից՝ հաղորդվել է նաեւ Էրեբունի պատմահնագիտական արգելոց-թանգարանի եւ Լուվրի թանգարանի համագործակցության մասին։ Զբոսաշրջային թեմատիկ երթուղիների մշակում 2018-ի ծրագրի 41-րդ կետով նախատեսված էր մշակել եւ ներդնել զբոսաշրջային թեմատիկ երթուղիներ Երեւանի համակողմանի ճանաչման համար:  Նոր ծրագրում նշված է, որ արդիականացվել է «Երեւան Սիթի Տուր» երթուղին: Տուրիզմի խթանման մասով արված եւ խոստացվող քայլերի մասին կարող եք կարդալ նոր ծրագրում։ Հայրենական պատերազմի հաղթանակի 40-ամյակին նվիրված զբոսայգու բարեկարգման աշխատանքների առաջին փուլն է ավարտվել 2018-ի ծրագրի 42-րդ կետով նախատեսված էր վերակառուցել եւ արդիականացնել Հաղթանակ զբոսայգին` մասնավոր ընկերությունների ներգրավման միջոցով:  2022-ի հուլիսին Երեւանի քաղաքապետարանի Շինարարության եւ բարեկարգման վարչության ծրագրերով մեկնարկել են Հայրենական պատերազմի հաղթանակի 40-ամյակին նվիրված զբոսայգու հիմնանորոգման աշխատանքները: Այս տարվա փետրվարին վերաբացվել է «Հաղթանակ» զբոսայգու Սահմանապահների փառքի ծառուղին, 2022թ. շինբարեկարգման ծրագրերով համայնքը նախաձեռնել էր ծառուղու հիմնանորոգման աշխատանքներ. անցկացվել են արտաքին լուսավորության եւ ոռոգման նոր համակարգեր, կառուցվել են ճեմուղիներ, տեղադրվել նստարաններ։ Այս տարվա օգոստոսին հաղորդվել է, որ Հայրենական պատերազմի հաղթանակի 40-ամյակին նվիրված զբոսայգու բարեկարգման աշխատանքների առաջին փուլն ամբողջությամբ ավարտված է: Առաջիկայում կմեկնարկի երկրորդ հատվածի շինարարությունը:  Զուգարանների հասանելիություն 2018-ի ծրագրի 43-րդ կետով նախատեսված էր բացօթյա սրճարանների հետ համագործակցության միջոցով ապահովել զուգարաններից օգտվելու հնարավորություն` զբոսաշրջիկների եւ քաղաքի բնակիչների համար: Բաց հրապարակային աղբյուրներում, ինչպես եւ նոր ծրագրում այս դրույթին անդրադարձ չկա։ Փողոցային առեւտրի դեմ պայքար 2018-ի ծրագրի 44-րդ կետով նախատեսված էր կանոնակարգել եւ վերահսկել համայնքային սեփականության տարածքներում փողոցային առեւտուրը եւ գործունեության այլ տեսակները:  Նոր ծրագրում նշված է, որ Ազգային ժողովի հաստատմանն է ներկայացվել օրենսդրական նախագիծ, որի ընդունմամբ հնարավորություն կա ոչ միայն տուգանելու ապօրինի առեւտուր իրականացնողներին, այլ նաեւ առգրավելու ապօրինի առեւտրի առարկա հանդիսացող ապրանքը, ինչն էականորեն բարձրացրել է պայքարի արդյունավետությունն ապօրինի բացօթյա առեւտրի դեմ։  Նշված է, որ ձեւավորվել են հերթապահ խմբեր, որոնք 24/7 սկզբունքով պայքարում են բացօթյա ապօրինի առեւտրի դեմ։ Միջազգային համագործակցություն 2018-ի ծրագրի 45-րդ կետով նախատեսված էր շարունակել եւ ակտիվացնել միջազգային համագործակցությունը։ Քաղաքային կառավարման արդյունավետ միջազգային փորձը տեղայնացնել եւ ներդնել Երեւանում: 46-րդ կետով՝ ստեղծել Երեւանում իրագործվող միջազգային ծրագրերի համակարգման հարթակ:  Խելացի քաղաք Եւ վերջին՝ 47-րդ կետով նախատեսված էր շարունակել Երեւանի փոխակերպումը «Խելացի քաղաքի» (Smart City)՝ ներդնելով նորագույն տեխնոլոգիաներ․ ստեղծել միասնական տվյալների բազա, երթեւեկության հոսքերի կառավարում, իրական ժամանակում արտակարգ պատահարների մշտադիտարկում եւ համակարգված որոշումների ընդունում: Նոր ծրագրում այս դրույթին անդրադարձ չկա։ Նոր ծրագրի տրանսպորտի բաժնում նշված է, որ ստեղծելու են մոնիթորինգային կենտրոն, միասնական տվյալների բազա եւ տրանսպորտային միջոցների հոսքերի կառավարման համակարգ։Հայարփի Բաղդասարյան
14:30 - 16 սեպտեմբերի, 2023
Կախա Կալաձեն առաջարկել է Երևանում անցկացնել Թբիլիսիի օրեր, Թբիլիսիում՝ Երևանի

Կախա Կալաձեն առաջարկել է Երևանում անցկացնել Թբիլիսիի օրեր, Թբիլիսիում՝ Երևանի

Պաշտոնական այցով Վրաստանի մայրաքաղաքում գտնվող Երևանի քաղաքապետի առաջին տեղակալ Լևոն Հովհաննիսյանի գլխավորած պատվիրակությունը հանդիպել է Թբիլիսիի քաղաքապետ Կախա Կալաձեի հետ: Երևանի քաղաքապետարանից տեղեկացնում են, որ պատվիրակության կազմում են Երևանի ավագանու «Իմ քայլը» խմբակցության ղեկավար Արմեն Գալջյանը, «Բարգավաճ Հայաստան» խմբակցության ղեկավար Միքայել Մանրիկյանը և «Լույս» խմբակցության ղեկավար Դավիթ Խաժակյանը: Ողջունելով երևանյան պատվիրակության անդամներին՝ Թբիլիսիի քաղաքապետը նկատել է, որ այցը ևս մեկ հնարավորություն է՝ նախանշելու առաջիկա անելիքներն ու քննարկելու նոր ծրագրերը: Կարևորելով երկու քույր քաղաքների միջև ձևավորված ջերմ հարաբերությունները՝ Կախա Կալաձեն առաջարկել է Երևանում անցկացնել Թբիլիսիի օրեր, և Թբիլիսիում՝ Երևանի: Շնորհակալություն հայտնելով հրավերի և ջերմ ընդունելության համար՝ Երևանի քաղաքապետի առաջին տեղակալն իր հերթին նշել է, որ Երևանը մեծապես կարևորում է տարբեր ոլորտներում Թբիլիսիի հետ գործակցության խորացումը: Լևոն Հովհաննիսյանը նաև նկատել է, որ երկու մայրաքաղաքներում մշակութային օրերի անցկացումը նոր որակ կհաղորդի ինչպես բարեկամական, այնպես էլ՝ գործընկերային կապերին: Հանդիպման ընթացքում կողմերն անդրադարձել են այն ոլորտներին, որոնց շրջանակում կարող են ծավալել փոխշահավետ և արդյունավետ գործակցություն՝ ի շահ երկու մայրաքաղաքների բնակիչների:
15:15 - 15 ապրիլի, 2022
Ազատության հրապարակի փոխարեն Քոչարյանն ու Սարգսյանը թող Արցախ գնան. Անդրանիկ Քոչարյան |azatutyun.am|

Ազատության հրապարակի փոխարեն Քոչարյանն ու Սարգսյանը թող Արցախ գնան. Անդրանիկ Քոչարյան |azatutyun.am|

azatutyun.am: Ազգային ժողովի իշխող «Իմ քայլը» խմբակցության պատգամավոր Անդրանիկ Քոչարյանն առաջարկում է Հայաստանի նախկին նախագահներ Ռոբերտ Քոչարյանին և Սերժ Սարգսյանին հրապարակում հանրահավաք անցկացնելու փոխարեն գնալ Արցախ և իրենց աջակցությունն ավելի շոշափելի դարձնել հենց Արցախից՝ շեշտելով՝ Արցախի հետ կապված խնդիրները պետք է լուծել բուն Արցախում։ «Առաջարկում եմ, որ ընդդիմադիր երկու ուժերի լիդերները՝ իրենց աշխատակազմերով և իրենց համակիրներով, փորձեն կազմակերպեն մեկ ամսյա բանակում Արցախում։ Փոքր խմբերով գնան և համալրեն Պաշտպանության բանակի կորցրած հնարավորությունները՝ իրենց նաև մասնակցությամբ, իրենց նաև ֆինանսներով։ Բայց էս պահի դրությամբ առայժմ բացի պետական իշխանության աջակցությունից, ընդդիմադիր ուժերի ծրագրային աջակցություն, գոնե սրտացավ աջակցություն, տեսանելի չէ մեր հասարակության համար, էդքանով էլ ես համոզված եմ, որ վաղվա իրենց միջոցառումը ոնց կսկսվի, այնպես էլ կավարտվի», - ասաց Անդրանիկ Քոչարյանը։ Քոչարյանն «Ազատության» հետ զրույցում շեշտեց՝ ընդդիմադիրներն այնուամենայնիվ ազնիվ չեն․ - «Իմանալով, որ ամսի 6-ին Բրյուսելում տեղի է ունենալու հանդիպում, իրենք այդ հանդիպումից առաջ, չգիտես ինչու, Արցախի անվտանգության խնդիրները բերում են Ազատության հրապարակ և Երևանի փողոցներ՝ մոռանալով, որ Արցախի խնդիրները պետք է լուծել հենց բուն Արցախում»։ Հարցին, թե ինչ-որ փաստաթուղթ, հայտարարություն ընդունվելո՞ւ է Բրյուսելում, Քոչարյանը պատասխանեց․ - «Նախ կլինի հանդիպումը, դրանից հետո, բնականաբար, թաքցնելու ոչինչ չունի իշխանությունը, և արձանագրությունները գոնե հասնելի կլինեն բոլորին»։ Անդրադառնալով ընդդիմադիրների այն քննադատությանը, թե իշխանությունները չեն զսպում Ադրբեջանի ախորժակը՝ Քոչարյանը պնդեց՝ Ադրբեջանի ախորժակը չափավոր զսպվածության միջավայրում է՝ ընդգծելով՝ այս պահին գործում է հրադադարի ռեժիմը և հրադադարի ռեժիմի պահպանման երաշխավորը Ռուսաստանի Դաշնությունն է։ «Հիմա էստեղ զսպել-չզսպելու պատկերացումները մի քիչ տարբեր են․ իշխանությունները շարժվում են խաղաղության օրակարգով, մեր ընդդիմադիր գործընկերները երազում են պատերազմ և, ամենայն հավանականությամբ, նաև պատերազմի ընթացքում իշխանությունների կողմից արձանագրված պարտություն, որը կլինի հայ ժողովրդի պարտությունը և պետականության կորուստ։ Իրենք երևի թքած ունեն, թե պատերազմն ինչ հերթական զոհեր կբերի, որովհետև զոհերի մեջ իրենք ո՛չ իրենց, ո՛չ իրենց հարազատներին չեն տեսնում», - ասաց իշխանական պատգամավորը։ Քոչարյանը պնդեց՝ իշխանությունը փորձում է կառավարել արտաքին քաղաքական ռիսկերը՝ դա համարելով հնարավոր պատերազմի դրսևորումները զսպելը առաջին պայմանը։ Հարցազրույցն ամբողջությամբ կարող եք դիտել այստեղ։
13:20 - 05 ապրիլի, 2022
Տիկին Մխոյանի հետ ունեցել ենք քաղաքական զրույց՝ քաղաքակիրթ եւ օրենքի շրջանակներում, բայց մեր տեսակետները չեն հատվել․ Արմեն Գալջյան

Տիկին Մխոյանի հետ ունեցել ենք քաղաքական զրույց՝ քաղաքակիրթ եւ օրենքի շրջանակներում, բայց մեր տեսակետները չեն հատվել․ Արմեն Գալջյան

Լուսանկարը՝ «Ֆոտոլուր»-ի Եթե ավագանու «Իմ քայլը» խմբակցության անդամ Լուսինե Մխոյանը միանար Հայկ Մարությանին անվստահություն հայտնելու ստորագրահավաքին, այսօր բերելո՞ւ էիք նրա լիազորությունները դադարեցնելու հարցը։ Այսօր Երեւանի ավագանու նիստի ժամանակ այսպիսի հարց հնչեցրեց ավագանու անկախ անդամ Իզաբելլա Աբգարյանը՝ դիմելով «Իմ քայլը» խմբակցության ղեկավար Արմեն Գալջյանին։ Գալջյանը ներկայացնում էր Լուսինե Մխոյանի լիազորությունները վաղաժամկետ դադարեցնելու որոշման նախագիծը՝ հիմնավորմամբ, որ նա օրենքով թույլատրելիից ավելի բացակայություններ ունի։ Խմբակցության ղեկավարը պատասխանեց, որ տիկին Մխոյանի հետ ունեցել են քաղաքական զրույց՝ քաղաքակիրթ եւ օրենքի շրջանակներում, բայց իրենց տեսակետները չեն հատվել․ «Ինչ վերաբերում է սպառնալիքներին, շանտաժին, ամենեւին դա այդպես չէ։ Մենք տիկին Մխոյանին ասել ենք, որ կա բացակայությունների շեմ, որը հատվել է, եւ բացի քաղաքական հարցերից՝ կա նաեւ աշխատանքի մասով խնդիր»,- ասաց Գալջյանը՝ նշելով, որ խմբակցությունում կան անդամներ, որոնք չեն պաշտպանել իրենց որոշումը՝ Մարությանին հեռացնելու վերաբերյալ, բայց շարունակում ներկայացնել խմբակցությունը։ Աբգարյանն արձագանքեց, թե՝ շանտաժը «պոզով-պոչով» չի լինում, եթե մարդուն երկընտրանք են առաջարկում, դա հենց շանտաժն է։  Գալջյանի խոսքով՝ երկընտրանք չի առաջարկվել, ինքն այդ մեկնաբանությանը համաձայն չէ։  Երեւանի քաղաքապետ Հրաչյա Սարգսյանն ասաց, որ Մխոյանը մասնակցում էր ճարտարապետական այն խմբի աշխատանքներին, որը քաղաքապետի խորհրդական Դավիթ Ճգնավորյանն էր ստեղծել․ «Աշխատանքային տարբեր քննարկումներ էին տեղի ունենում, որտեղ ինքը ակտիվ մասնակցություն էր ունենում, այսինքն՝ անկախ երեխայի հանգամանքից, ինքը հնարավորություն ունեցել է մասնակցելու, կարծում եմ՝ նույն տրամաբանությամբ ավագանու նիստերին կարող էր մասնակցություն ունենալ»,- նկատեց քաղաքապետը։
12:14 - 08 փետրվարի, 2022
Մխոյանի պնդմամբ՝ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ

Մխոյանի պնդմամբ՝ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ

Երեւանի ավագանին մտադիր է «Իմ քայլը» խմբակցության անդամ Լուսինե Մխոյանին զրկել մանդատից՝ ավագանու նիստերին նրա բացակայությունների հիմնավորմամբ։  Մասնավորապես, ավագանու այսօրվա նիստում քննարկվում է Մխոյանի՝ Երեւան քաղաքի ավագանու անդամի լիազորությունները դադարեցնելու որոշման նախագիծը, որում նշված է, որ Լուսինե Մխոյանը չի մասնակցել ավագանու 7-րդ նստաշրջանի՝ 14.09.2021, 26.10.2021, 30.11.2021 թվականների հերթական նիստերին․ ««Երեւան քաղաքում տեղական ինքնակառավարման մասին» օրենքի 19-րդ հոդվածի 1-ին մասի 1-ին կետի համաձայն՝ ավագանու անդամը պարտավոր է մասնակցել ավագանու նիստերին, մինչդեռ Երեւան քաղաքի ավագանու անդամ Լուսինե Մխոյանը անհարգելի պատճառով բացակայել է ավագանու նիստերից, իսկ օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»,- ասված է նախագծում։ Նման որոշման իրական պատճառը, սակայն, ըստ Լուսինե Մխոյանի, իրականում այլ է․ նախ՝ նա կողմ չի եղել Հայկ Մարությանին անվստահություն հայտնելու գործընթացին, բացի դրանից՝ կարծում է՝ մեկ այլ պատճառ է նաեւ քաղաքաշինության, ճարտարապետության ոլորտում իր եւ մնացյալի պատկերացումների տարբերությունը։ Մխոյանը չի հերքում, որ ունի բացակայություններ, բայց ասում է՝ դրանք պայմանավորված են եղել իր երեխայի ծննդի, հետագայում իր վատառողջ լինելու հանգամանքով, այսինքն՝ դրանք, ըստ էության, հարգելի բացակայություններ են եղել․ «Հոկտեմբեր-նոյեմբեր ամիսներին բալիկս վատառողջ է եղել, ինչի մասին խմբակցութան ղեկավարին տեղյակ եմ պահել՝ նշելով, որ ոչ ոքի մոտ չեմ կարող թողնել եւ ստիպված եմ բացակայել»։ Մեր զրուցակցի հավաստմամբ՝ կան նաեւ տեղեկանքները, որոնք փաստում են, որ բացակայությունները հիվանդության պատճառով են եղել, սակայն իրենից այդ տեղեկանքները նույնիսկ չեն էլ ուզել։  Միեւնույն ժամանակ, Մխոյանը մեր զրույցում ընդգծում է, որ ինքը մասնակցել է հանձնաժողովի նիստերին, քանի որ հենց հանձնաժողովի նիստերի ընթացքում են նախագծերի վերաբերյալ քննարկումներն իրականացվում։ «Այո, բացակայություններ եղել են, քանի որ մանդատս վերցնելը համընկավ բալիկիս ծննդի հետ։ Այս ընթացքի բացակայությունների պատճառը նաեւ իմ ու երեխայի հիվանդություններն էին։ Սակայն բացակայությունները սկսեցին շահարկել, երբ քաղաքապետին անվստահություն հայտնելու համար ստորագրություն էին հավաքում»,- մեր զրույցում պատմեց ավագանու անդամը՝ նշելով, որ իրեն հորդորել են կամ ստորագրել անվստահություն հայտնելու նախագծի տակ, կամ վայր դնել մանդատը, այլապես բացակայությունների հիմքով կդադարեցնեն լիազորությունները։ «Ես ընթացքում ուզում էի դուրս գալ ավագանու կազմից, քանի որ բալիկիս հետ չէի հասցնում շատ ակտիվ լինել։ Ավագանու գործընկերներս համոզում էին, որ մնամ, քանի որ միակ ճարտարապետն եմ, Քաղաքաշինության եւ հողօգտագործման հարցերի մշտական հանձնաժողովում բացի ինձանից երեւի մեկն է մնացել ով գոնե մոտ մասնագիտություն ունի»,- ասաց մեր զրուցակիցը, որը մասնագիտությամբ ճարտարապետ է։ Infocom-ի հետ զրույցում Լուսինե Մխոյանն ասաց, որ անցած շաբաթ առաջարկի տեսքով հերթական սպառնալիքն է ստացել խմբակցության ղեկավար Արմեն Գալջյանից, թե՝ այլեւս անհնարին են համարում իր՝ ավագանու կազմում լինելը․ «Պարզաբանեցին, թե ես քաղաքական քայլեր եմ արել՝ բարձրաձայնելով ինձ ուղված սպառնալիքի մասին, եւ հիմա առաջարկում են մանդատը դնել կամ նախագիծ կբերեն եւ բացակաների հիմքով կհանեն, ինչն էլ անելու են այսօր»,- ասաց Մխոյանը։ Ինչ վերաբերում է քաղաքապետարանում եւ ավագանու կազմում իր գործունեությանը՝ Մխոյանը մեկնաբանեց, որ 2020թ․-ի դեկտեմբերին ինքը քաղաքապետի խորհրդական Դավիթ Ճգնավորյանից համագործակցելու հրավեր է ստացել՝ որպես ավագանու անդամ եւ ճարտարապետ, ով տասը տարուց ավել աշխատել է ՛՛Երեւանի 2005թ Գլխավոր Հատակագծի՛՛ համահեղինակ Գուրգեն Մուշեղյանի հետ, եւ անդամակցել է ճարտարապետներից եւ ուրբանիստներից կազմված խմբին, ակտիվ մասնակցել քննարկումներին եւ հնարավորինս աջակցել ռեֆորմների գործընթացին։ Ի հավելումն՝ մեր զրուցակիցը նշեց, որ կամավորական հիմքերով աշխատող խմբում էին այնպիսի մասնագետներ, ինչպիսիք են Տիգրան Պողոսյանը, Հայկ Մելիքյանը, Գառնիկ Ստեփանյանը, Մերուժան Մինասյանը, Արմեն Շատվորյանը, Հայկ Նիկոյանը, Զոհրաբ Զուրաբյանը, Մարիաննա Կարապետյան, Գեւորգ Եղիկյանը, Հեղինե Փիլոսյանը եւ այլք։  «Նաեւ արդեն նախկին փողքաղաքապետ Գայանե Մելքոմ Մելքոմյանի հրավերով ներգրավված եմ եղել մի քանի նախագծերում, որոնցից էր Էրեբունի թանգարանի հիմնանորոգման եւ արդիականացման նախագիծը»,- ասաց Մխոյանը։ Նա նշեց, որ իր գործունեության ընթացքում գլխավոր ճարտարապետի կողմից նախագծման թույլտվությունների եւ նախագծերի միանձնյա հաստատման գործառույթների փոխարեն կոլեգիալ որոշումների ձեւաչափի անցման նպատակով նախաձեռնվել էր ռոտացիոն ձեւաչափով գործող խորհրդի ստեղծման բազմափուլ գործընթացը։ Այն նախատեսվում էր իրականացնել ոլորտում հեղինակություն վայելող, փորձառու մասնագետների ներգրավմամբ, որոնք պետք է առաջադրվեին պրոֆեսիոնալ դաշտը ձեւավորող այնպիսի կառույցների կողմից, ինչպիսիք են Հայաստանի ճարտարապետաշինարարական համալսարանը, Հայաստանի ճարտարապետների պալատը, Միջազգային ճարտարապետների ակադեմիայի հայաստանյան մասնաճյուղը եւ այլն։ Նշենք նաեւ, որ այդ խորհրդի ստեղծման որոշումը հաստատվել էր ավագանու կողմից։ Մխոյանի փոխանցմամբ՝ ստեղծված աշխատանքային խմբի մասնակցությամբ «Քաղաքաշինություն» ՓԲԸ-ի հիման վրա ստեղծվել էր նոր բաժին, որը կոչված էր մշակել քաղաքի զարգացման ծրագիրն ու ռազմավարությունը, որն էլ իր հերթին պետք է ձեւավորեր գլխավոր հատակագծի համար տեխնիկական առաջադրանքը։  «Իրականացվեց նաեւ նախապատրաստական միջոցառումների եւ հանդիպումների մի մեծ գործընթաց՝ միտված քաղաքի կառավարման թվային համակարգի ներդրման ու ողջ ոլորտի գործառույթների, ինչպես նաեւ փաստաթղթաշրջանառության ամբողջական թվայնացմանը։ Մշակվեց, բայց չհասցրեց հաստատվել ճարտարապետահատակագծային առաջադրանքի տրամադրման նոր, պարզեցված ու ավելի տրամաբանական ձեւաչափ, որը կոչված էր կառուցապատող ընկերությունների եւ ճարտարապետների համար շատ ավելի հստակ եւ կանխատեսելի նախապայմաններ հաստատել՝ հիմնվելով գործող քաղաքաշինական նորմերի ու տարածական պլանավորման փաստաթղթերի վրա»,- ներկայացրեց մեր զրուցակիցը՝ հավելելով նաեւ, որ կամավորության սկզբունքների հիման վրա ստեղծվել էր խորհրդատվական մի հանձնաժողով, որի կազմում ընդգրկված էինք քաղաքաշինության ու ճարտարապետության ոլորտներում տարիների ընթացքում իրենց լավագույնս դրսեւորած մի քանի տասնյակ երիտասարդ մասնագետներ, վաստակաշատ ու փորձառու մասնագետներ (Հրաչիկ Պողոսյան, Սաշուր Քալաշյան, Ալեքսանդր Բադալյան, Ալբերտ Զուրաբյան, Մհեր Չերկեզյան, Միքայել Հասրաթյան, Միսաք Խոստիկյան, Զառա Մամյան եւ այլք)։ Խորհրդի մի քանի ամսվա աշխատանքի ընթացքում, մեր զրուցակցի վստահեցմամբ, քաղաքապետարանի աշխատակազմի մասնագետների հետ համատեղ նախաձեռնվել են բազում քննարկումներ ոլորտում ձեւավորված խնդիրների եւ դրանց իրատեսական կամ հեռանկարային լուծումների, նոր համագործակցության ձեւաչափերի վերաբերյալ»։ Ի հավելումն՝ Լուսինե Մխոյանը հայտնեց նաեւ, որ սկզբունքային վերաարժեվորման ենթարկվեց գլխավոր ճարտարապետի պաշտոնը՝ իբրեւ քաղաքի ուրբանիստական զարգացման համար պատասխանատուի, որը կոչված է ոչ թե ձեւավորել կամ թելադրել կառուցվող շենքերի ճարտարապետական ոճը, այլ համակարգել քաղաքաշինության ոլորտի կառավարման ու զարգացման մեջ ներգրավված բոլոր վարչական ու մասնագիտական միավորները։ «Ցավով պետք է նշեմ՝ ակնհայտ է, որ հիմա միտված են ղեկը լրիվ այլ ուղությամբ պտտել»,- եզրափակելով՝ ասաց ավագանու «Իմ քայլը» խմբակցության անդամ Լուսինե Մխոյանը։ Խխմբակցության ղեկավար Արմեն Գալջյանն ավագանու նիստի ժամանակ նշեց, որ տիկին Մխոյանի հետ ունեցել են քաղաքական զրույց՝ քաղաքակիրթ եւ օրենքի շրջանակներում, բայց իրենց տեսակետները չեն հատվել․ «Ինչ վերաբերում է սպառնալիքներին, շանտաժին, ամենեւին դա այդպես չէ։ Մենք տիկին Մխոյանին ասել ենք, որ կա բացակայությունների շեմ, որը հատվել է, եւ բացի քաղաքական հարցերից՝ կա նաեւ աշխատանքի մասով խնդիր»,- ասաց Գալջյանը՝ նշելով, որ խմբակցությունում կան անդամներ, որոնք չեն պաշտպանել իրենց որոշումը՝ Մարությանին հեռացնելու վերաբերյալ, բայց շարունակում ներկայացնել խմբակցությունը։ Հավելենք, որ Infocom-ը գրավոր հարցմամբ դիմել է Երեւանի քաղաքապետարանին՝ խնդրելով տեղեկություններ այն մասին, թե ավագանու բոլոր անդամները որքան բացակայություններ ունեն ավագանու նիստերից։ Հայարփի Բաղդասարյան
11:56 - 08 փետրվարի, 2022
Երեւանի ավագանին քննարկում է Լուսինե Մխոյանի՝ ավագանու անդամի լիազորությունները վաղաժամկետ դադարեցնելու որոշման նախագիծը

Երեւանի ավագանին քննարկում է Լուսինե Մխոյանի՝ ավագանու անդամի լիազորությունները վաղաժամկետ դադարեցնելու որոշման նախագիծը

Երեւանի ավագանին քննարկում է ավագանու «Իմ քայլը» խմբակցության անդամ Լուսինե Մխոյանի լիազորությունները վաղաժամկետ դադարեցնելու որոշման նախագիծը։ Որոշման նախագիծում նշված է, որ Լուսինե Մխոյանը չի մասնակցել ավագանու 7-րդ նստաշրջանի՝ 14.09.2021, 26.10.2021, 30.11.2021 թվականների հերթական նիստերին․ ««Երեւան քաղաքում տեղական ինքնակառավարման մասին» օրենքի 19-րդ հոդվածի 1-ին մասի 1-ին կետի համաձայն՝ ավագանու անդամը պարտավոր է մասնակցել ավագանու նիստերին, մինչդեռ Երեւան քաղաքի ավագանու անդամ Լուսինե Մխոյանը անհարգելի պատճառով բացակայել է ավագանու նիստերից, իսկ օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»,- ասված է նախագծում։ Խմբակցության ղեկավար Արմեն Գալջյանը որոշման նախագիծը ներկայացնելիս նշեց, որ տիկին Մխոյանը ավագանու նիստերից բացակայել է մոտ 20 անգամ, չնայած՝ իրենք տեղեկանքում մի քանի ամսաթիվ են նշել․ «Այդ ժամկետն արդեն իսկ բավարար է օրենքով սահմանված կարգով լիազորությունները վաղաժամկետ դադարեցնելու համար։ Պետք է օբյեկտիվորեն ասեմ, որ բացակայությունների իմ նշած թվի մի մեծ հատվածն օբյեկտիվ պատճառներ ունի, այսինքն՝ տիկին Մխոյանը ֆիզիակապես օբյեկտիվ պատճառով չէր կարող գալ նիստի, մենք այդ ժամանակահատվածը չենք դիտարկել, այլ միայն այն, որն օբյեկտիվ հիմքեր չի ունեցել»։ Գալջյանը նշեց, որ իրենք որոշակի նախնական համաձայնության են եկել, որ Մխոյանը պետք է ակտիվություն դրսեւորի, բայց դա, Գալջյանի պնդմամբ, տեղի չի ունեցել․  «Ստիպված այս ճանապարհով ենք գնում։ Այո, էլի ունենք ավագանու անդամներ, որոնք բավարար բացակայություններ ունեն, այսինքն՝ թույլատրելիի շեմը հայտնել են, բայց ինչու ենք միայն տիկին Մխոյանի հետ կապված այս նախագիծը բերել, քանի որ այս դեպքում միակ լուծումը սա էր, իսկ մյուս դեպքերում այլ լուծումներ կան եւ այլ լուծումներ կտրվեն»,- մեկնաբանեց խմբակցության ղեկավարը։ Ավագանու անկախ անդամ Էռնեստ Ավանեսովը հարց հնչեցրեց․ «Լուսինե Մխոյանը, որքանով տեղյակ եմ, ֆիզարձակուրդում է, որքանով եք բարոյական եւ իրավական տեսանկյունից այս մոտեցումը համարում արդարացված»։ Արմեն Գալջյանը պատասխանեց, որ այս հարցն իր կարծիքով այն հարցը չէ, որ պետք է բարոյականության դաշտում քննարկել, քանի որ ֆիզարձակուրդը աշխատանքային հարաբերություններին է վերաբերում․ «Ավագանու անդամի կարգավիճակը գործատու աշխատող հարաբերություններ չի ենթադրում, ամսվա մեջ մեկ անգամ նիստի պետք է գալ, եւ չեմ կարծում, թե ֆիզարձակուրդը կարող է հիմնավոր լինել երկու տարում այդչափ բացակայությունների համար»,- ասաց խմբակցության ղեկավարը։ Մխոյանի պնդմամբ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ:
11:50 - 08 փետրվարի, 2022
Ունեք կառավարության և իմ լիարժեք աջակցությունը. վարչապետն ընդունել է Երևանի նորընտիր քաղաքապետին

Ունեք կառավարության և իմ լիարժեք աջակցությունը. վարչապետն ընդունել է Երևանի նորընտիր քաղաքապետին

Վարչապետ Նիկոլ Փաշինյանն ընդունել է Երևանի նորընտիր քաղաքապետ Հրաչյա Սարգսյանին, Երևանի ավագանու «Իմ քայլը» խմբակցության ղեկավար Արմեն Գալջյանին և քարտուղար Լևոն Հովհաննիսյանին: Իր խոսքում վարչապետ Փաշինյանը նշել է. «Հարգելի պարոնայք, ողջունում եմ ձեզ: Թույլ տվեք, նախ, պարոն Սարգսյան, շնորհավորել Ձեզ Երևանի քաղաքապետ ընտրվելու առիթով և շնորհակալություն հայտնել Երևանի ավագանուն, մասնավորապես՝ «Իմ քայլը» խմբակցությանը, ի դեմս՝ խմբակցության ղեկավար պարոն Գալջյանի, խմբակցության քարտուղար պարոն Հովհաննիսյանի, սկզբունքային դիրքորոշում ցուցաբերելու համար: Ուզում եմ արձանագրենք՝ այն իրավիճակը, որ ունեցանք Երևանի քաղաքապետարանում, ինստիտուցիոնալ իրավիճակ էր և ինստիտուցիոնալ խնդիր: Եվ այդ խնդիրն ինստիտուցիոնալ առումով հանգուցալուծվեց: Ի՞նչ նկատի ունեմ: Ի վերջո, Երևանում 2018 թվականի աշնանից սկսած իրականացվում է «Իմ քայլը» դաշինքի նախընտրական ծրագիրը, և քաղաքական պատասխանատվությունն էլ «Իմ քայլը» դաշինքինն ու քաղաքական մեծամասնությանն է: Ուզում եմ ընդգծել, որ այդ ծրագիրն էլ իր հերթին բխում էր 2017 թվականի Երևանի ավագանու ընտրություններում «Ելք» դաշինքի նախընտրական ծրագրի հիմնադրույթներից: Այս առումով կարևոր է, որ ծրագիրը լիարժեք, ամբողջական և ինստիտուցիոնալ առումով կայանա: Եվ պիտի նաև արձանագրեմ, պարոն Սարգսյան, որ Դուք մինչև այս փուլն այդ ծրագրի իրականացման լիարժեք մասնակից եք եղել՝ զբաղեցնելով Երևանի քաղաքապետի առաջին տեղակալի պաշտոնը: Երևանի ավագանու մեր գործընկերներն էլ իրենց գործառույթներն են իրականացրել այդ առումով: Նաև կարևորում եմ տեղի ունեցած գործընթացը պետական ինստիտուտների կայացման առումով: Որովհետև գիտեք, որ հիմա արդեն 4000 և ավելի բնակչություն ունեցող բոլոր համայնքներում տեղի են ունենում ավագանու ընտրություններ: Այսինքն՝ համայնքի ղեկավարի ընտրություններն անուղղակի են: Եվ ինստիտուցիոնալ առումով անհնար է համայնքի ղեկավարի աշխատանքը՝ առանց ավագանու մեծամասնություն ունենալու: Սա պարզ քաղաքական տրամաբանություն է: Եվ այս խնդիրն է, որ հանգուցալուծվեց: Պիտի արձանագրենք, որ այսօր ունենք ներդաշնակ իրավիճակ Երևանի քաղաքապետի, ավագանու և քաղաքական մեծամասնության միջև: Սա շատ կարևոր է: Իհարկե, շատ կարևորում եմ, որ քաղաքապետը համագործակցի ավագանու ընդդիմադիր խմբակցությունների հետ, որովհետև այստեղ էլ համախմբող դերակատարումը շատ կարևոր է: Այս պահին ուզում եմ ասել, որ մինչև օրս ամենայն աջակցություն ենք ցուցաբերել Երևանի քաղաքապետարանին, և, իհարկե, այսուհետ ևս այդ աջակցությունը պիտի շարունակվի: Ծրագրի իրականացման ուղղությունները, տեմպերը, միջոցները, ժամկետները, իհարկե, պետք է նաև լրացուցիչ քննարկենք և լուծումներ ստանանք: Այս առումով՝ մեզ բոլորիս հաջողություն եմ մաղթում: Պիտի իմանաք, որ ունեք կառավարության և իմ լիարժեք աջակցությունը: Քաղաքապետ, ավագանի, կառավարություն, քաղաքական մեծամասնություն ներդաշնակությունը պիտի սիներգիա ստեղծի, որն առավել արտահայտիչ երևա երևանցիների կյանքում»: Երևանի քաղաքապետ Հրաչյա Սարգսյանը շնորհակալություն է հայտնել վարչապետին վստահության և շնորհավորանքների համար: «Գիտակցում եմ, որ սա բավականին մեծ պատասխանատվություն է: Ընդհանուր առմամբ պատկերացնում եմ, թե ինչ ինստիտուտներ ունենք, որոնք պետք է ամբողջությամբ վերափոխենք, և որոնք են, որ դեռևս կաշխատեն որպես ինստիտուտներ, որպեսզի դիմադրեն տարբեր ցնցումների, իրականացնեն իրենց ֆունկցիոնալությունը: Կարծում եմ՝ կառավարության աջակցությամբ հնարավորություն կունենանք ամենամեծ բնակչություն ունեցող համայնքում՝ Երևանում, իրականացնել այն ծրագրերը, որոնք տարիների ընթացքում չեն իրականացվել, կարելի է ասել՝ անհասկանալի պատճառներով: Կարծում եմ՝ պոտենցիալը կա, պետք է պարզապես արդյունավետ կառավարում իրականացնել այդ պոտենցիալն օգտագործելու համար»: Հանդիպմանը քննարկվել են կառավարության և Երևանի քաղաքապետարանի միջև համագործակցությանը, մայրաքաղաքում իրականացվելիք ծրագրերին և նախագծերին առնչվող հարցեր:
14:17 - 23 դեկտեմբերի, 2021
Քանի որ ունեմ շատ խոր անհամաձայնություն այն ամենի հետ, ինչ տեղի ունեցավ երեկ, նպատակահարմար եմ գտնում դնել մանդատս․ Օվսաննա Հովսեփյան

Քանի որ ունեմ շատ խոր անհամաձայնություն այն ամենի հետ, ինչ տեղի ունեցավ երեկ, նպատակահարմար եմ գտնում դնել մանդատս․ Օվսաննա Հովսեփյան

Երևանի ավագանու «Իմ քայլը» խմբակցության անդամ, անկուսակցական Օվսաննա Հովսեփյանը իր ֆեսյբուքյան էջում գրել է․ «Երբեք չեմ հետաքրքրվել քաղաքականությամբ, չեմ կարդացել, լուրերին չեմ հետևել, եղել եմ քաղաքականության նկատմամբ բացարձակ անտարբեր քաղաքացի։ Բայց երբ հեղափոխությունից հետո ինձ առաջարկեցին առաջադրել իմ թեկնածությունը որպես ավագանու անդամ, միացա որպես անկուսակցական, որ թափառող կենդանիների ոլորտի տարիների իմ գիտելիքների ու փորձի շրջանակներում օգուտ տամ իմ քաղաքին։ Երկար տարիներ իմ բոլոր հարցազրույցներում միշտ ասել եմ, որ թափառող կենդանիներով զբաղվող համայնքային հիմնարկ է պետք, ոչ թե տարին մեկ տենդեր շահող մասնավոր կազմակերպություն։ Ու ուրախ եմ, որ նման կառույցի ստեղծման գործում ունեցա իմ համեստ ներդրումը։ Շնորհակալ եմ Հայկ Մարությանին, որ քաղաքապետ դառնալուն պես հայտարարեց, որ սպանդի արատավոր պրակտիկան այսուհետ անցյալում է։ Ասեց ու արեց։ Քանի որ ունեմ շատ խոր անհամաձայնություն այն ամենի հետ, ինչ տեղի ունեցավ երեկ, նպատակահարմար եմ գտնում դնել մանդատս։ Նիստից հետո շատ ընկերներ միանգամից գրեցին՝ «մանդատդ հանկարծ չդնես, խմբակցությունից դուրս արի, դարձիր անկախ ավագանու անդամ»։ Բայց այդպես չեմ անի, քանի որ «քաղաքականություն-քաղաքականություն» խաղալու հավես չունեմ։ Ես ափսոսում եմ այն էներգիան, որը ծախսվում է ինչ-որ բանի «դեմ» պայքարի վրա։ Ավելի լավ է այդ օգտագործեմ «հանուն» ինչ-որ բան անելու, քանի որ դեռ այնքան լավ գաղափարներ ունեմ իրականացնելու։  Որպես ավագանու անդամ իմ ճանապարհը համարում եմ ավարտված, ինձնից հասանելիք գործը՝ արված, իմ կյանքի այդ էջը՝ փակված։ p.s. նշեմ, որ վերջում աշխատում էի այն բանի վրա, որ ՀՈԱԿ-ում լեշմանիան ստուգվի ոչ թե մեկ թեստով, այլ լաբորատոր մեթոդով ու կանգնել էինք նրա վրա, որ քաղաքապետի կողմից համաձայնությունը կար ու նախահաշիվը կազմելիս արդեն դա նույնպես պետք է քննարկվեր ու ներառվեր։ Հուսամ դա անպայման կիրականացվի, քանի որ միայն 1 թեստի հիման վրա կենդանու քնեցումը անթույլատրելի է»։
12:49 - 23 դեկտեմբերի, 2021
ՔՊ թիմը համարում է, որ պետության վիճակն այնքան կայուն է, որ շատ հարմար պահ է՝ քաղաքապետարանում հեղաշրջում անելու․ Հայկ Մարությանի ելույթը ավագանու արտահերթ նիստին

ՔՊ թիմը համարում է, որ պետության վիճակն այնքան կայուն է, որ շատ հարմար պահ է՝ քաղաքապետարանում հեղաշրջում անելու․ Հայկ Մարությանի ելույթը ավագանու արտահերթ նիստին

Ինչպես արդեն հայտնել ենք այսօր Երևանի ավագանու արտահերթ նիստի շրջանակներում քննարկվում է «Երևանի քաղաքապետ Հայկ Մարությանին անվստահություն հայտնելու մասին» «Իմ քայլը» խմբակցության նախագիծը։ Մարությանը եւս հանդես եկավ ելույթով, որն ամբողջությամբ ներկայացնում ենք ստորեւ․ «Այսօր տեղի է ունենում մի պրոցես, որը երբեք տեղի չի ունեցել Երեւանի պատմության մեջ։ Սա առաջին դեպքն է, երբ Երեւանի քաղաքապետին անվստահություն են հայտնում, եւ կարծես թե, այսպիսի բան անելու համար նախաձեռնողները պետք է շատ ծանրակշիռ փաստարկներ ունենային՝ ընդդեմ քաղաքապետի, օրինակ՝ բյուջեի խոշոր չափի գումարների հափշտակում, կամ ինչ-որ այլ աշխատանքային կամ կենցաղային զարհուրելի հանցանք, բայց ինչպես ելույթներից հասկացանք, այդպիսիները չկան։ Ներկայացվող հիմնական պատճառը լրիվ այլ է։ Ինչպես նախաձեռնող խումբն է ասում, քանի որ ես դուրս եմ եկել ՔՊ կուսակցությունից, ապա պետք է լքեմ նաեւ այս պաշտոնը։ Եկեք հասկանանք՝ արդյոք դա այդպես է, թե ոչ։ 2018-ին Հայաստանի ժողովուրդը հեղափոխություն իրականացրեց, որին բոլորս մասնակից ենք եղել, եւ ամեն մեկս մեր լուման ենք ներդրել այդ կարեւոր գործում։ Հեղափոխության հաղթանակից հետո առաջին ընտրությունները Երեւանի ավագանու ընտրություններն էին, որտեղ մենք՝ որպես հեղափոխական թիմ, խնդիր ունեինք ջախջախիչ հաղթանակ տանելու եւ թղթի վրա հստակ ամրագրելու ժողովրդի կամքը, ինչն էլ իր հերթին թույլ կտար գնալ ԱԺ արտահերթ ընտրություններին եւ ամրագրել այդ հաղթանակն արդեն համապետական մասշտաբով։ Այդ նպատակով ստեղծվեց հեղափոխական «Իմ քայլը» դաշինքը, որի մաս կազմեցին ՔՊ կուսակցությունը, «Առաքելություն» կուսակցությունը, մի շարք այլ կուսակցությունների անդամներ կամ անկուսակցական ակտիվ քաղաքացիներ։ Ավելորդ չէ հիշեցնել, որ ավագանու կազմում «Իմ քայլը» դաշինքով ընտրված առաջին 57 հոգուց միայն 27-ն էին այդ պահին ՔՊ անդամ, այսինքն՝ ավագանու 30 անդամ անկուսակցականներ էին կամ այլ կուսակցությունների անդամներ։ Սա, կարծում եմ, շատ հատկնաշնական տվյալ է, որն արտացոլում է մեր հեղափոխական թիմի իրական պալիտրը։ Ընտրությունների արդյունքում մենք ունեցանք շատ համոզիչ հաղթանակ՝ հավաքելով ձայների մոտ 82 տոկոսը, կրկնում եմ՝ ժողովուրդն իր ձայնը չտվեց որեւէ կուսակցության, ժողովուրդն իր ձայնը տվեց «Իմ քայլը» դաշինքին, հեղափոխությանը, հեղափոխական թիմին, հեղափոխության լիդեր Նիկոլ Փաշինյանին, քաղաքապետի թեկնածու Հայկ Մարությանին, թիմում ընդգրկված հայտնի եւ հարգված մարդկանց, օրինակ՝ հայտնի երգիչ Արթուր Իսպիրյանին, հայտնի բլոգեր Իզաբելլա Աբգարյանին, հայտնի ճարտարապետ Արսեն Կարապետյանին, եւ շատ այլ մարդկանց, որոնք տարիներ շարունակ իրենց նվիրել էին Հայաստանում հեղափոխության հաղթանակի գործին։ Հեղափոխական թիմը չգնաց ընտրությունների ՔՊ կուսակցության դրոշի ներքո, ոչ միայն նրա համար, որ հեղափոխությունն արեց ամբողջ ժողովուրդը, այլ ոչ թե ինչ-որ կուսակցություն, այլ նաեւ նրա համար, որ «Քաղաքացիական պայմանագիր» անունն այդ ժամանակ լայն զանգվածներին գրեթե ծանոթ չէր։ Այսպիսով, եկեք արձանագրենք, որ 2018-ի Երեւանի ավագանու ընտրությունների ժամանակ, եթե անձերին մի կողմ դնենք, ժողովուրդն ընտրեց «Իմ քայլը» հեղափոխական դաշինքը։ Այսօր այս պրոցեսը նախաձեռնող խումբը, որպես անվստահության հիմք, ասում է, որ քանի որ ես դուրս եմ եկել ՔՊ կուսակցությունից եւ «Իմ քայլը» դաշինքից, ապա չեմ կարող լինել քաղաքապետ։ Սիրելի հայրենակիցներ, ես պաշտոնապես ասում եմ՝ դուրս եմ եկել ՔՊ կուսակցությունից, բայց դուրս չեմ եկել «Իմ քայլը» դաշինքից, շարունակում եմ մնալ «Իմ քայլը» ֆրակցիայի անդամ, եւ անախձեռնող խմբի այս պնդումն ուղղակի կեղծիք է։ Ի դեպ, իրենց փաստարկներում, հիշատակելով «Քաղաքացիական պայմանագիր» կուսակցության անունը, այս մարդիկ փորձում են սեփականշնորհել հեղափոխությունը, փորձում են ՔՊ կուսակցությունը դարձնել հեղափոխական արժեքների միակ կրողն ու ժառանգորդը։ Սա անընդունելի է ինձ համար եւ ինձ նման հազարավոր մարդկանց համար, որոնք կուսակցական չեն եւ հեղափոխություն են արել ուղղակի ավելի լավ Հայաստանի երազանքով։ Ասեմ ավելին՝ ՔՊ-ականներն ավելի առաջ են գնացել։ Նրանք վերջերս արդեն առաջ են տանում այն թեզը, որ ով ՔՊ-ից չէ, դեմ է հեղափոխությանը, ով ՔՊ-ից չէ, սատարում է հակահեղափոխական ուժերին, սա նույնպես անընդունելի է եւ վիրավորական այն քաղաքացիների համար, որոնք կուսակցության անդամ չեն։ Հետեւաբար, որն է անվստահության հիմքը․ այս օրերին նախաձեռնության հեղինակներն ու նրանց կուսակցական ընկերներն ասում են, որ Հայկ Մարությանը շեղվել է հեղափոխական արժեքներից։ Հիմա տեսնենք, թե ով է իրականում շեղվել հեղափոխական արժեքներից։ 2018-ի արտահերթ ընտրություններից հետո սկսեցինք աշխատել, եւ հանկարծ մի օր իմացանք, որ կառավարության հեղափոխական անդամները գաղտնի որոշմամբ կտրուկ բարձրացրել են իրենց աշխատավարձերը, օրինակ՝ նախարարները 1,5մլն դրամ են ստանում, փոխնախարարները՝ 1մլն, եւ այսպես շարունակ, գաղտնի որոշմամբ, հեղափոխական նախարարները։ Ես չեմ խոսում պետական համակարգի, այսպես կոչված, տեխնոկրատ անդամների մասին, որոնք, անկախ ամեն ինչից՝ պրոֆեսիոնալներ են, եւ իրենց աշխատանքի համար պետք է գնահատվեն, ես խոսում եմ գաղափարական հեղափոխականների մասին, հեղափոխությանը մասնակցած եւ հեղափոխության շնորհիվ պաշտոն ստացած մարդկանց մասին։ Ես կարծում էի, թե հեղափոխականի գերնպատակը պետք է լինի բարելավել ուրիշների կյանքը, բայց, իրականության մեջ, նրանք եկան եւ անմիջապես սկսեցին բարելավել իրենց կյանքը, այն դեպքում, երբ երկրում բնակչության աղքատության ցուցանիշը շարունակում էր տատանվել 30 տոկոսի սահմաններում։ Կասեք՝ ինչո՞ւ շուտ չէիք խոսում սրա մասին։ Բազմիցս այդ հարցը բարձրացրել եմ ՔՊ-ում, թիմի ներսում, տարբեր մակարդակներում․ ոչ մի արձագանք, կարծես թե ամեն ինչ այդպես էլ պետք է լիներ։ Բացի դրանից՝ աշխատանքի ընթացքում բազմաթիվ զանգեր էի ստանում ամենաբարձր ռանգի պաշտոնյաներից, որոնք ասում էին՝ «պարոն Մարության, քաղաքապետարանի էսինչ աշխատակիցը «վատ քոմենթ» է գրել կամ վատ ստատուսի տակ լայք է դրել, իրենց պետք է աշխատանքից հեռանան»։ Տասնյակ նման զանգեր եմ ստացել, ինչին ի պատասխան՝ ասել եմ՝ ժողովուրդ ջան, հարգելիներս, հեղափոխությունը նաեւ դրա համար ենք արել, որ հին ժամանակների նման չլինի, երբ քաղաքական հայացքների համար մարդկանց հետապնդում էին, աշխատանքից հանում էին, ես դրա համար չեմ էստեղ եկել, կարճ ասած՝ մերժում էի նման բոլոր առաջարկները։ Բայց սրանք դեռ ծաղիկներն էին։ Հետո սկսեցին տարատեսակ պաշտոնատար անձինք զանգել եւ իրենց մերձավորների համար արտոնություններ խնդրել՝ էս ծաղիկի բուտկեն էստեղ դնենք, էն շինթույլտվությունը տանք, էս հողն ընդլայնենք եւ այլն։ Եվ, բնականաբար, բոլոր դեպքերում, ստացել են նույն պատասխանը՝ քանի ես էստեղ եմ, ամեն ինչ արվելու է օրենքի ու օրինականության շրջանակներում, եւ բոլորը հավասար են օրենքի առաջ։ Սա շատ տհաճ ազդակ էր ինձ համար, որովհետեւ ես այդպիսի զանգեր չէի սպասում, երբ միանում էի թիմին։ Եվ այդտեղ սկսեց ի հայտ գալ իմ եւ ՔՊ-ի միջեւ աշխարհայացքների խզումը։ Ու հիմա այս մարդիկ ասում են՝ Հայկը հեղափոխությունից շեղվել է։  Սա ասում են մարդիկ, որոնք երկրի համար էս նեղ պահին 200 հազար դոլարանոց մեքենա են գնում, հետո ամբողջ քաղաքական թիմով մեկ ամիս շարունակ լծվում են՝ արդարացնելու էդ որոշումը, որ ցույց տան, թե ինչքան անհրաժեշտ գնում է դա երկրի համար (նկատի ունի ՀՀ ԱԺ նախագահի համար գնվելիք մեքենան- խմբ․)»։ Մի երկիր, որը աղքատության բարձր շեմ ունի, որն իր միջազգային գործընկերներից փող է խնդրում՝ իր մանկապարտեզները վերանորոգելու, իր ճանապարհները կառուցելու, իր բյուջետային ծախսերը փակելու համար, արդարացնում է 200 հազար դոլարանոց մեքենայի գնումը, իբր դա պետության «պրիստիժի» համար է։ Ասեմ, հարգելիներս, դա պրիստիժ չէ, հակառակը, սա մովետոն (անկրթություն, անդաստիրակություն- խմբ․) է, սա շատ վատ տպավորություն է թողնում, դրանով դուք անգամ խղճահարություն չեք առաջացնում, այլ միայն տարակուսանք եւ քմծիծաղ։ Ու կարծում եմ՝ ավելորդ չի լինի ասել, որ ես դեռ 2019-ին վաճառքի եմ հանել քաղաքապետին կցված S դասի Մերսեդեսը, գումարը մուտք եմ արել քաղաքային բյուջե, էս ամբողջ ընթացքում էկոնոմ դասի Նիսսան եմ քշում, ընդ որում՝ առանց վարորդի, երբեք պարգեւավճար չեմ ստացել, թույլ չեմ տվել բարձրացնել աշխատավարձս։ Եվ սա հերոսություն չէ, սա, ինչպես ասում են, լավ չի, նորմալ ա։ Որովհետեւ դա իմ համոզմունքն է, ու դա պետք է լինի հեղափոխական մանդատ ստացած ցանկացած պաշտոնյայի համոզմունքը։ Դե հիմա ասեք՝ ով է շեղվել հեղափոխական արծեքներից։ Ես մի քանի դրվագ ներկայացրի, բայց դրանք շատ-շատ են։ Եվ հենց սա է հիմնական պատճառը, որ իմ եւ ՔՊ-ի կապն այդքան կարճ տեւեց։ Եվ ես անցած տարի որոշեցի դուրս գալ կուսակցությունից։ Ընդ որում՝ պատերազմը մի քանի ամսով հետաձգեց այդ որոշման իրագործումը։ Նոյեմբերի 9-ից հետո սպասել եմ, որ երկրում իրավիճակը հանդարտվի, կայունանա, եւ նոր դեկտեմբերի 7-ին ներկայացրի կուսակցությունից դուրս գալու դիմումը։ Սուրեն Պապիկյանին եմ դիմումս տվել եւ հանձնելիս ասել՝ «եղբայր, որպեսզի որեւէ քաղաքական ուժ իր քաղաքական նպատակների համար չփորձի շահարկել սա, ես սրա մասին հրապարակային չեմ ասելու, ոչ մի դեպքում»։ Ասել եմ՝ «դուք կխոսեք սրա մասին այն ժամանակ, երբ ձեզ հարմար կլինի»։ Ինչպես տեսնում եք, ես իմ խոսքը պահել եմ, եւ նրանք կուսակցությունից իմ դուրս գալու մասին հայտարարել են այն պահին, երբ իրենց հարմար է եղել, այսինքն՝ ինձ անվստահություն հայտնելու պահին։ Կարող եք հարցնել՝ ինչո՞ւ այս ամենի մասին մինչեւ հիմա չես խոսել։ Ասեմ՝ լռել եմ՝ ներքաղաքական իրավիճակը չսրելու համար, բայց այսօր ՔՊ-ի թիմը համարում է, որ պետության վիճակն այնքան կայուն է, որ շատ հարմար պահ է քաղաքապետարանում հեղաշրջում անելու համար։ Ուստի ես արդեն կարող եմ ինձ թույլ տալ ժողովրդի հետ խոսել այս ամենի մասին»Ж Վերադառնալով իրեն ներկայացվող անվստահության հիմքերին՝ Մարությանն ասաց․  «Ասում են՝ Մարությանը նախընտրակիան խոստումները բավարար չափով չի իրագործում։ Կներեք, բայց այս հարցում ինձ համար կարեւոր է երեւանցիների կարծիքը եւ գնահատականը, եւ հատկապես վերջին օրերին երեւանցիներին իրենց գնահատականը շատ հստակ տալիս են, ինչի համար շատ շնորհակալ եմ։ Հետո, նախաձեռնող խումբն ասում է՝ կոռուպցիայի դեմ պայքարի տեմպերը բավարար չեն։ Ասեմ՝ այս երեք տարիների ընթացքում քաղաքապետարանի վերահսկողության վարչությունը հարյուրավոր ստուգումներ է իրականացրել համակարգի ներսում, որոնց արդյունքում 64 գործ ուղարկվել է իրավապահներին, բացի դրանից՝ իրականացվել է 59 աուդիտորական ստուգում, որոնց արդյունքում տասը գործ ուղարկվել է իրավապահներին, բացի դրանից՝ վարչական շրջանների ղեկավարները տասնյակ դեպքեր են բացահայտել եւ ուղարկել իրավապահներին։ Ասում են՝ քաղաքապետը կորցրել է կապը ավագանու ֆրակցիայի հետ, այո կորցրել եմ, հիմա պատմեմ մի դրվագ բազմաթիվ դրվագներից, որ պարզ լինի՝ ինչու է դա տեղի ունեցել։ Անցած տարվանից սկսել ենք համայնքի միջոցներով ավտոբուսներ գնել, տենդեր էինք հայտարարել 8,6մ ավտոբուսների ձեռքբերման համար, որը կայացել էր, եւ ավագանին պետք է գնման համար գումար հատկացնելու որոշում կայացներ։ Դա այս տարվա փետրվարն էր, ահռելի աշխատանք էինք կատարել, եւ ավագանին ընդամենը պետք է գար, քվերակեր։ Եվ ահա, ավագանու նիստի նախորդ երեկոյան տեղեկություն ենք ստանում, որ ՔՊ վարչության որոշ անդմաներ, կառավարության որոշ անդամներ հրահանգել են, որ «Իմ քայլը» քվորում չապահովի, պարզ ասած՝ որոշել էին տապալել ավտոբուսների գնման գործընթացը, մենք մեծ դժվարությամբ, խնդրելով, բացատրելով կարեւորությունը՝ մեր գործընկերներին հրավիրեցինք նիստի, բայց «Իմ քայլը» ֆրակցիան բավարար չափով ձայներ չապահովեց՝ այդ կարեւորագույն որոշումն ընդունելու համար։ Բառացիորեն քվեարկությունից առաջ դահլիճից մարդկանց զանգով դուրս էին հանում, եւ որոշումը կարողացանք ընդունել միայն ավագանու ընդդիմադիր եւ անկախ անդամների ներկայության շնորհիվ։ Փաստացի, այս մարդիկ ուզում էին մեկ միլիոնանոց քաղաքը թողնել առանց ավտոբուսների՝ միայն մի բանի համար, որ ասեին՝ Մարությանը չի կարողանում կատարել իր նախընտրական խոստումները։ Այսինքն՝ նեղ խմբակային շահը վեր են դասում մի ամբողջ համայնքի շահից։ Ու թող հեքիաթներ չպատմեն, թե իբր կառավարությունն ուզում է ավելի լավ ավտոբուսներ բերել․․․ Բերող էիք՝ բերեիք։ Մենք 850 ավտոբուսի կարիք ունեինք, էդ պահին 211-ի գնումն էինք անում, մնացածն էլ դուք բերեիք, երեք տարի ժամանակ ունեիք, բերեիք, էսօր բերեք, վաղը բերեք, մի բան բերեք։ Այսքանից հետո խնդրում եմ ասեք՝ ինչ հարաբերություններ ես պետք է ունենամ ավագանու այս ֆրակցիայի հետ։  Իսկ հիմա խոսենք այն մասին, թե ինչ ցածր մեթոդներով են այս մարդիկ իրականացնում իմպիչմենտի գործընթացը։ Սկզբից մամուլով ակնհայտ սուտ լուրեր տարածեցին, թե իբր հանդիպել եմ ինչ-որ նախկին պաշտոնյաների հետ, ինչ-որ բաներ եմ պայմանավորվել, թե ինչ-որ նախկին պաշտոնյաների տներ եմ օրինականացրել, բայց չգիտես ինչու՝ չեն նշում, որ դա օրինականցվել է կառավարության 912Ն որոշման հիման վրա, որի դեմ մենք երեք տարի է՝ պայքարում ենք, բայց կառավարությունն այդ որոշումը համառորեն թողնում է ուժի մեջ, որ այդ նույն որոշմամբ օրինակացվեն նաեւ իշխանության ներկայացուցիչների ինքնակամ կառույցները, որովհետեւ մենք ստիպված ենք շարժվել կառավարության որոշումներով, այլ տարբերակ չկա։ Այնուհետեւ դեզինֆորմացիայից եւ մանիպուլյացիայից հետո սկսեցին գործի դնել շանտաժի գործիքները, ինչպես արդեն լսեցիք, վստահ եմ՝ նաեւ համացանցից եք տեղեկացել՝ ավագանու մի շարք անդամների ստիպելով ստորագրել իմ անվստահության որոշման տակ։ Բառացի՝ մեկին սպառնում էին աշխատանքից հանել, մյուսին ասում էին՝ փողիցդ կկտրենք, եւ այլն, եւ այլն, հին ու բարի մեթոդներով։ Կարճ ասած՝ ես այս ամբողջ պրոցեսը համարում եմ անարգանք ժողովրդավարության հանդեպ եւ անարգանք երեւանցու քվեի հանդեպ։ Կարծում եմ՝ դուք ձեր սկսածը, մեւնույն է, ավարտին եք հասցնելու, ուստի, քանի դեռ քաղաքապետ եմ, քաղաքի բոլոր ծառայությունների ղեկավարներին խնդրում եմ՝ ձեր ծառայությունն իրակաանցնել մաքսիմալ պատասխանատվությամբ, բարձր կարգապահությամբ, բազմապատկված նվիրումով, դուք պարտավոր եք ապահովել երեւանցիների անվտանգությունը եւ կոմֆորտը»։ Մարությանը շնորհակալություն հայտնեց աշխատակազմի բոլոր անդամներին՝ համատեղ աշխատանքի համար, իր թիմի անդմաներին եւ երեւանցիներին՝ վստահության համար, եւ ներողություն խնդրեց, եթե ինչ-որ բան չի հասցրել անել։
13:54 - 22 դեկտեմբերի, 2021
«Իմ քայլը» խմբակցության անդամների ելույթները ավելի արդարացում էին, քան հիմնավորում․ Էռնեստ Ավանեսով

«Իմ քայլը» խմբակցության անդամների ելույթները ավելի արդարացում էին, քան հիմնավորում․ Էռնեստ Ավանեսով

Երևանի ավագանու անդամ Էռնեստ Ավանեսովը այսօր՝ քաղաքապետ Հայկ Մարությանին անվստահություն հայտնելու հարցով գումարված արտահերթ նիստի ընթացքում նշեց, որ այս գործընթացը, որքանով ինքն է տեղեկացված, «Քաղաքացիական պայմանագիր» կուսակցության վարչության որոշումն է։ «Ես շատ կուզեի՝ վարչությունը որոշում կայացներ մի շարք օրենսդրական փոփոխությունների առումով՝ կապված համատիրությունների հետ, խնդիրները, որոնք ծառացած են այսօր մեր քաղաքացիների առջև, կապված նաև ապօրինի առևտուրը բացառելու առումով, ապօրինի շինարարությունը բացառելու առումով, բայց «Քաղաքացիական պայմանագիր» կուսակցության վարչությունը որոշել է, որ սա է ամենալուրջ խնդիրը և փորձում են քաղաքապետից՝ Հայկ Մարությանից, հրաժարվել»։ Ավանեսովն անդրադարձավ  նաև ավագանու արտահերթ նիստի ընթացքում հնչած ելույթներին․ «Ի դեպ՝ այստեղ շատ ելույթներ եղան նաև, գուցե հետագայում ավելի այլ բնույթի կլինեն, հիմնականում «Իմ քայլը» խմբակցության անդամների ելույթները արդարացում էին, քան հիմնավորում։ Խնդրում եմ, ոչ թե արդարացեք, արդեն բերել եք այդ նախագիծը, հիմնավորեք քաղաքացիների համար, որպեսզի մարդիկ հասկանան՝ ինչու եք դուք ուզում փոխել Հայկ Մարությանին պարոն Հրաչյա Սարգսյանով, որի հանդեպ նույնպես ունեմ դրական վերաբերմունք, ինչպես այստեղ ցանկացածի մասին»։ Նա նաև նշեց, որ «Իմ քայլը» խմբակցությունը շատ է շեղվել հեղափոխության արժեքներից։
13:22 - 22 դեկտեմբերի, 2021
Քաղաքապետին անվստահություն հայտնելու քվեարկությունը չի կարող լեգիտիմ համարվել․ Վահե Գեւորգյան

Քաղաքապետին անվստահություն հայտնելու քվեարկությունը չի կարող լեգիտիմ համարվել․ Վահե Գեւորգյան

Մի քանի կետ կա, որոնց համար ես կատեգորիկ մերժում եմ այս պրոցեսը․ Երեւանի քաղաքապետին անվստահություն հայտնելու գործընթացը բացառապես չի բխում Երեւանի եւ ժողովրդավարության շահերից, երկրորդն այն գործիքակազմն է, շանտաժի ու սպառնալիքի այն լեզուն, որն օգտագործվել է ավագանու անդամների կամարտահայտման վրա ազդելու համար։ Այս մասին այսօր Հայկ Մարությանին անվստահություն հայտնելու հարցով ավագանու նիստի ժամանակ իր ելույթում ասաց «Իմ քայլը» խմբակցության անդամ Վահե Գեւորգյանը՝ նշելով, որ այս քվեարկության արդյունքների օրինականությունը կասկածի տակ է դրվում․ «Այս քվեարկության արդյունքների օրինականությունը կասկածի տակ է դրվում, քանի որ երեկ բացահայտվեց, որ ավագանու անդամներին շանտաժի եւ սպառնալիքների ենթարկելով՝ փորձել են ստորագրություններ կամ վկայություններ կորզել, ինչի առիթով «Իրազեկ քաղաքացիների միավորում» ՀԿ-ն հանցագործության մասին հաղորդում է ներկայացրել ՀՀ գլխավոր դատախազությանը։ Հարգելի՛ երեւանցիներ, այս ոչ լեգիտիմ պրոցեսի ընթացքում բացահայտվեց կազմակերպիչների շանտաժային գործելաոճը՝ ավագանու անդամների վրա տարբեր լծակներ կիրառելով՝ ստիպել են կամ վայր դնել մանդատը, կամ ստորագրել քաղաքապետին անվստահություն հայտնելու նախագծի տակ»,- ասաց Գեւորգյանը՝ շեշտելով, որ ինչպես այս երեք տարիների ընթացքում, այնպես էլ հիմա, նրանք ունակ չեն եղել պարզ քաղաքական հաշվարկներ իրականացնել․ «Նրանք չէին հաշվարկել, որ գուցե հաջողվի որոշ մասին շանտաժի ենթարկել, բայց ոչ բոլորին։ Այս մարդիկ թրծվել են տարիների պայքարի մեջ։ Մասնավորապես, Լուսինե Մխոյանը եւ Գրիգորի Երիցյանը երեկ բարձրաձայնել են, որ Արմեն Գալջյանը («Իմ քայլը» խմբակցության ղեկավար,-խմբ․) եւ Լեւոն Հովհաննիսյանը («Իմ քայլը» խմբակցության քարտուղար,-խմբ․) իրենց շանտաժի են ենթարկել։ Պարզ դարձավ, որ նրանց միակ մտավախությունը քաղաքապետի աճող, եւ ՔՊ-ի նվազող վարկանիշն է, պարզ դարձավ, որ նրանք պատրաստ են ճնշման տարբեր լծակներ կիրառելով՝ ավագանու անդամներին դրդել բոյկոտի, ազդել նրանց ազատ կամարտահայտման վրա եւ զրկել երեւանցիներին նոր տրանսպորտային համակարգից՝ միեւնույն ժամանակ վտանգի ենթարկելով նույն տրանսոպրտային համակարգը։ Պարզ դարձավ, որ նրանց համար անձնային շահը, կարիերան, պաշտոնը վեր են դասվում հանրային շահից»։ Գեւորգյանը շեշտեց՝ հաշվի առնելով ավագանու անդամների հայտարարությունները, թե ինչպես են իրենց շանտաժի ենթարկել, ակնհայտ է դառնում, որ այս քվեարկությունը չի կարող լեգիտիմ համարվել այն պարզ պատճառով, որ ավագանու անդամների որոշման վրա ազդելու նպատակով անօրինական գործիքակազմ է կիրառվել։ Վահե Գեւորգյանն ավագանու անդամներին կոչ արեց քվեարկել իրենց խղճով եւ համոզմունքներով։ Ի դեպ՝ Գեւորգյանը հարց ուղղեց «Իմ քայլը» խմբակցության ղեկավար Արմեն Գալջյանին․ «Դուք ընդունո՞ւմ եք, որ շանտաժի կամ այլ սպառնալիքների միջոցով փորձել եք ազդել ավագանու անդամների ազատ կամարտահայտման վրա»։ Գալջյանն էլ արձագանքեց՝ ասելով․ «Ոչ, չեմ ընդունում»։ Հիշեցնենք, որ երեկ Infocom-ի հետ զրույցում Երեւանի ավագանու նախկին անդամ Արփենիկ Մարությանը հայտնել էր, որ ԱԺ ՔՊ խմբակցության պատգամավոր, Պետգույքի կառավարման կոմիտեի նախկին ղեկավար Նարեկ Բաբայանն իրեն հաղորդագրությամբ հորդորել է չմասնակցել ավտոբուսների գնման համար գումար հատկացնելու հարցով նիստին, քանի որ ավտոբուսների գնման ընթացակարգը եւ վճարումը չէր համաձայնեցվել կառավարության հետ։
12:24 - 22 դեկտեմբերի, 2021