Իսրայել

Իսրայելի պետությունը ստեղծվել է 1948 թվականի մայիսի 14-ին՝ ՄԱԿ-ի Գլխավոր ասամբլեայի 1947 թվականի նոյեմբերի 29-ի որոշմամբ, ըստ որի Մեծ Բրիտանիայի ենթամանդատային Պաղեստինը հռչակվում էր անկախ եւ նրա տարածքում ստեղծվում էին երկու ինքնուրույն՝ արաբական եւ հրեական պետություններ։

Հրեական պետությանը՝ Իսրայելին, հատկացվում էր 14 հզ. կմ2 (Պաղեստինի տարածքի 56%) տարածություն՝ խառը բնակչությամբ։ Երուսաղեմը հանձնվում էր ՄԱԿ-ի կառավարմանը։ 1948 թվականի մայիսին Իսրայելում ստեղծվեց ժամանակավոր կառավարություն, որը կազմված էր բացառապես սիոնիստական կուսակցությունների ներկայացուցիչներից։ Կառավարության առաջին իսկ՝ «Անկախության դեկլարացիայով» սիոնիզմը հռչակվեց Իսրայելի պաշտոնական գաղափարախոսություն եւ քաղաքականություն։

Արաբա-իսրայելական պատերազմներից հետո` 1974 թվականի հունվարին եւ 1975 թվականի սեպտեմբերին Եգիպտոսի, իսկ 1974 թվականի մայիսին Սիրիայի հետ Իսրայելը կնքեց զորքերի տարանջատման եւ նրանց միջեւ բուֆերային գոտիներ ստեղծելու համաձայնագրեր։ 1979 թվականին Եգիպտոսը՝ առաջին արաբական երկիրն էր, որը խաղաղության դաշինք կնքեց Իսրայելի հետ։ Արդյունքում, Իսրայելը Սինայի թերակղզին Եգիպտոսին հետ վերադարձրեց։ Հորդանանը եւ Իսրայելը խաղաղության դաշինք կննքեցին 1994 թվականին։ Իսկ 2005 թվականին Իսրայելը իր բանակը դուրս բերեց Գազայի շրջանից։

Մահմուդ Աբասը Էնթոնի Բլինքենին հայտնել է Գազայի հատվածում զինադադար հաստատելու անհրաժեշտության մասին |1lurer.am|

1lurer.am: Պաղեստինի նախագահ Մահմուդ Աբասը ԱՄՆ պետքարտուղար Էնթոնի Բլինքենի հետ հանդիպմանը, որը տեղի է ունեցել Պաղեստինի վարչական կենտրոն Ռամալլա քաղաքում, հայտնել է Գազայի հատվածում անհապաղ զինադադարի անհրաժեշտության մասին, տեղեկացմում է ՏԱՍՍ գործակալությունը՝ հղում կատարելով Պաղեստինի առաջնորդի մամուլի քարտուղար Նաբիլ Աբու Ռուդեյնային։ «Աբասը Բլինքենին ասել է անհապաղ հրադադարի և Գազայի հատված մարդասիրական օգնության մուտքի անհրաժեշտության մասին», - Աբու Ռուդեյնայի խոսքերն է մեջբերել Al Hadath հեռուստաալիքը: ԱՄՆ պետքարտուղարն իր հերթին «հաստատել է իր հանձնառությունը Գազայի հատվածում մարդասիրական օգնություն տրամադրելու և կենսապահովման ծառայությունների վերսկսմանը»։ Նա նաև ընդգծել է, որ «Վաշինգտոնը մերժում է պաղեստինցիների բռնի տեղահանումը» և «հանձնառու է սեփական պետության համար պաղեստինցիների ձգտումներին հասնելու ջանքերին»։

17:30 - 05 նոյեմբերի, 2023

Իսրայելի զինվորականները մուտք են գործել Գազայի հատվածի տակ գտնվող թունելներ |armeniasputnik.am|

armeniasputnik.am: Իսրայելի զինված ուժերը Գազայի հատվածի հյուսիսում հայտնաբերել են ստորգետնյա թունելների մուտքեր, հայտնում է Իսրայելի պաշտպանության բանակը։ «Իսրայելի պաշտպանության ուժերը Գազայի հյուսիսում օպերատիվ գործողությունների ընթացքում հայտնաբերել են բազմաթիվ մուտքեր (թունելներ - խմբ.), - ասվում է բանակի հայտարարության մեջ, որը հրապարակվել է «X» սոցիալական ցանցում: Նոյեմբերի 4-ին Իսրայելի պաշտպանության բանակը հայտարարեց, որ «սպանել է տասնյակ մարտիկների և ոչնչացրել է պաղեստինյան ՀԱՄԱՍ շարժման ենթակառուցվածքը Գազայի հատվածում»:

10:52 - 05 նոյեմբերի, 2023

Էրդողանը հայտարարել է, որ խզում է կապերը Իսրայելի վարչապետի հետ |azatutyun.am|

azatutyun.am: Թուրքիայի նախագահ Ռեջեփ Էրդողանը այսօր հայտարարել է, որ խզում է կապերը Իսրայելի վարչապետ Բենյամին Նեթանյահուի հետ Գազայի հատվածում Իսրայելի գործողությունների պատճառով։ «Նեթանյահուն այլևս որևէ մեկը չէ, ում հետ մենք կարող ենք խոսել, մենք նրան դուրս ենք գրել», - Աստանայից Թուրքիա վերադառնալու ճանապարհին նախագահական օդանավում ասել Էրդողանը լրագրողներին, հավելելով, թե ջանքեր կգործադրվեն, ամեն ինչ կանի Իսրայելի կողմից մարդու իրավունքների խախտումների և պատերազմական հանցագործությունների գործը Միջազգային քրեական դատարան հասցնելու համար։ «Մեր համապատասխան գերատեսչությունները, մասնավորապես, Արտգործնախարարությունը կանի այդ աշխատանքը», - նշել է Թուրքիայի ղակավար։ Էրդողանը միաժամանակ ասել է, որ կապերը լիովին խզել հնարավոր չէ, հատկապես միջազգային դիվանագիտության մեջ։ Նա հայտնել է, որ Թուրքիայի հետախուզական ծառայության ղեկավար Իբրահիմ Քալընը գլխավորում է Թուրքիայի միջնորդական ջանքերը պատերազմը ավարտելու համար։ Նա բանակցում է իսրայելական կողմի, ինչպես նաև Պաղեստինի ու «Համաս»-ի հետ։ Իսկ Նեթանյահուն, Էրդողանի խոսքերով՝ կրում է բռնության գլխավոր պատասխանատվությունը և կորցրել է իր քաղաքացիների աջակցությունը։ Էրդողանը հայտարարել է, որ բախումներից հետո Թուրքիան պատրաստ է Գազայի համար հանդես գալ որպես երաշխավոր երկիր։ Միեւնույն ժամանակ Թուրքիան հետ է կանչել Թել Ավիվում Անկարայի դեսպան Շաքիր Թորունլարին՝ Գազայի հատվածում տեղի ունեցող իրադարձությունների հետ կապված խորհրդակցությունների համար։

17:04 - 04 նոյեմբերի, 2023

Իսրայելի բանակի և պաղեստինյան դիմադրության ուժերի միջև կատաղի բախումներ են Գազայի հյուսիսում և Հորդանան գետի արևմտյան ափին |1lurer.am|

1lurer.am: Արաբական լրատվամիջոցները գրում են, որ իսրայելական բանակի և պաղեստինյան դիմադրության մարտիկների միջև կատաղի բախումներ են Գազայի հատվածի հյուսիսում՝ Էրեզ անցակետի մոտ և Հորդանան գետի արևմտյան ափին։ Իսրայելի պաշտպանության բանակը հայտնում է Գազայի հատվածում ՀԱՄԱՍ-ի կարևոր հենակետի գրավման մասին։ ՑԱԽԱԼ-ի տվյալով՝ հայտնաբերվել են հետախուզության համար արժեքավոր նյութեր: Ըստ իսրայելական կողմի՝ պատասխան հարվածներ են հասցվել նաև Լիբանանի տարածքին: Al Jazeera-ն տեղեկացրել է, որ Իսրայելը հարվածել է Գազա քաղաքի՝ ՄԱԿ-ին պատկանող կրթական հաստատությանը, որտեղ հազարավոր փախստականներ են եղել, կան տասնյակ զոհեր և վիրավորներ: Պաղեստինյան Կարմիր մահիկն էլ հայտնել է իսրայելական ուժերի կողմից Ալ-Շիֆա հիվանդանոցի շտապօգնության մեքենաների թիրախավորման մասին, նշվում է, որ մեքենաները վիրավորների էին տեղափոխում Եգիպտոսի հետ սահման: Հայտնի է տասնյակ զոհերի և վիրավորների մասին: ՑԱԽԱԼ-ը հայտարարել է՝ հարվածել են շտապօգնության մեքենաներին, քանի որ դրանք տեղափոխել են ոչ թե քաղաքացիական անձանց, այլ ՀԱՄԱՍ-ի զինյալների: Իսրայելի բանակը հիշեցրել է՝ բազմիցս զգուշացրել են խաղաղ բնակիչներին՝ լքել ռազմական գործողությունների գոտին: Իսրայելի նախագահ Իսահակ Հերցոգն էլ հայտարարել է, որ պաղեստինցիների տառապանքը կավարտվի, երբ ՀԱՄԱՍ-ը ոչնչացվի։

14:48 - 04 նոյեմբերի, 2023

Ոմանք կցանկանային, որ «Հըզբոլլահը» ներքաշվեր լայնամասշտաբ պատերազմի մեջ․ Հասան Նասրալլա |factor.am|

factor.am: Լիբանանի «Հըզբոլլահ» արմատական խմբավորման ղեկավար Հասան Նասրալլան Իսրայելի և ՀԱՄԱՍ-ի միջև պատերազմի սկսվելուց ի վեր առաջին անգամ դիմել է Լիբանանում և ամբողջ աշխարհում իր կողմնակիցներին: Նա ՀԱՄԱՍ-ի հարձակումը 100 տոկոսով պաղեստինյան գործողություն է անվանել, սակայն չի բացառել ապագայում «Հըզբոլլահի» զինյալների և Իսրայելի միջև հակամարտության սրման հավանականությունը: BBC-ի ռուսական ծառայության փոխանցմամբ՝ Հասան Նասրալլան գովաբանել է ՀԱՄԱՍ-ին հոկտեմբերի 7-ին Իսրայելի վրա հարձակման համար՝ հայտարարելով, որ զինյալները գործել են «ճիշտ, իմաստուն և արդար»: Նա նաև շնորհակալություն է հայտնել Եմենում և Իրաքում ծայրահեղական խմբավորումներին՝ Իսրայելի դեմ իրենց պայքարին մասնակցելու համար: «Հըզբոլլահը» Լիբանանի ամենամեծ ռազմաքաղաքական ուժն է։ ԱՄՆ-ը և Արևմուտքի այլ երկրներ այն ահաբեկչական կազմակերպություն են ճանաչել ։ Այս պահին «Հըզբոլլահի» զինյալները հարձակումներ են իրականացնում իսրայելցի զինվորականների վրա լիբանանա-իսրայելական սահմանին և գնդակոծում Իսրայելի տարածքը: Բախումները գնահատվում են բավականին ինտենսիվ, ՑԱԽԱԼ-ը լրացուցիչ ուժեր է կենտրոնացրել իր հյուսիսային սահմանների մոտ, սակայն մինչ օրս չի համարվում, որ «Հըզբոլլահ»-ը ՀԱՄԱՍ-ի կողմից պաշտոնապես պատերազմի մեջ է մտել Իսրայելի դեմ: Ա մեն ինչ կարող էր փոխվել Նասրալլայի երկար սպասված ելույթից հետո, բայց կարծես թե լիբանանյան խմբավորումը պատրաստ չէ բարձրացնել հակամարտության խաղադրույքները: Շիա խմբավորման առաջնորդի ելույթը համընկել է ԱՄՆ պետքարտուղար Էնթոնի Բլինքենի Իսրայել այցի հետ։ Շեյխ Հասան Նասրալլայի խոսքերով՝ Իսրայելի կանխարգելիչ հարվածը Լիբանանին կլինի Իսրայելի ամենամեծ սխալը իր գոյության ամբողջ ընթացքում: Նա հավելել է, որ իր գլխավորած «Հըզբոլլահ» շարժման գործողությունները ստիպել են ՑԱԽԱԼ-ին ուժերի մի մասը տեղափոխել Լիբանանի հետ սահման: «Ոմանք ասում են, որ «Հըզբոլլահը» պատրաստվում է պայքարի մեջ մտնել։ Ես ձեզ ասում եմ՝ մենք այդ մարտը վարում ենք հոկտեմբերի 8-ից։ Ոմանք կցանկանային, որ «Հըզբոլլահը» ներքաշվեր լայնամասշտաբ պատերազմի մեջ, բայց ես կարող եմ ձեզ ասել, որ այն, ինչ հիմա տեղի է ունենում իսրայելա-լիբանանյան սահմանի երկայնքով, մեծ նշանակություն ունի, և դա վերջը չէ»,- հայտարարել է Նասրալլան։ Իսրայելի վրա ՀԱՄԱՍ-ի հարձակումից հետո իր առաջին հրապարակային հայտարարության մեջ Նասրալլան նաև հայտարարել է, որ «Հըզբոլլահ» շարժումը, իբր, ոչինչ չի իմացել ՀԱՄԱՍ-ի՝ հոկտեմբերի 7-ի հարձակմանը նախապատրաստվելու մասին:

10:53 - 04 նոյեմբերի, 2023

Իսրայելի Պաշտպանության բանակը հայտարարել է Գազա քաղաքի շրջափակման մասին |panorama.am|

panorama.am: Իսրայելի պաշտպանության բանակի (ՑԱԽԱԼ) ուժերն այս պահին գտնվում են Գազայի հատվածի վարչական կենտրոնի տարածքում և շրջապատում են այն մի շարք ուղղություններից: Այս մասին հայտարարել է Իսրայելի բանակի գլխավոր շտաբի պետ Հերցի Հալևին, փոխանցում է «Իզվեստիա»-ն։ «Մեր զինվորներն այժմ արդեն Գազա քաղաքում են՝ շրջապատելով այն մի քանի կողմերից, և ես տեսնում եմ, թե ինչպես ենք մենք առաջընթաց գրանցում: Մենք ստիպված ենք կռվել շատ ծանր իրավիճակում՝ խիտ բնակեցված, կառուցապատված տարածքում»,- ասվում է Իսրայելի պաշտպանության բանակի Telegram-ի ալիքում։ Ավելի վաղ ՑԱԽԱԼ-ը հայտնել էր Գազայի հատվածի հյուսիսում մի քանի ահաբեկչական բջիջների հետ բախման մասին: Նշվում է, որ ռազմական գործողությունների ընթացքում սպանվել են տասնյակ ահաբեկիչներ։ Զինծառայողները նաև հարված են հասցրել ջոկատին, որը նախատեսում էր հակատանկային հրթիռներ արձակել իսրայելցիների ուղղությամբ:

09:32 - 03 նոյեմբերի, 2023

Բահրեյնը խզել է տնտեսական հարաբերություններն Իսրայելի հետ և հետ կանչել իր դեսպանին |factor.am|

factor.am: Բահրեյնը Իսրայելից հետ է կանչել իր դեսպանին և խզել տնտեսական հարաբերությունները հրեական պետության հետ։ Այս մասին հայտնել է երկրի Ներկայացուցիչների խորհուրդը (խորհրդարանի ստորին պալատը), փոխանցում է ՌԻԱ Նովոստին։ «Սա Բահրեյնի ամուր պատմական դիրքորոշման հաստատումն է Պաղեստինի գործին և եղբայրական պաղեստինյան ժողովրդի օրինական իրավունքների պաշտպանությանը, ինչպես Նորին Մեծություն թագավորը հայտարարել է բոլոր համաժողովների և միջոցառումների ժամանակ»,- ասել են օրենսդիրները: Բահրեյնում Իսրայելի դեսպանը նույնպես լքել է թագավորությունը։

22:41 - 02 նոյեմբերի, 2023

Ջաբալիա ճամբարի վրա հարձակումների հետևանքով, ըստ ՀԱՄԱՍ-ի տվյալների, զոհվել է մոտ 200 մարդ |shantnews.am|

shantnews.am: Առնվազն 195 մարդ է զոհվել, ևս 777-ը վիրավորվել է երեքշաբթի և չորեքշաբթի Գազայի հատվածում գտնվող Ջեբալիա ճամբարին իսրայելական բազմակի հարվածների հետևանքով, հայտնում է Reuters-ը՝ հղում անելով ՀԱՄԱՍ շարժմանը։ «Առնվազն 195 պաղեստինցի է զոհվել երեքշաբթի և չորեքշաբթի Գազայի հատվածում գտնվող Ջաբալիա փախստականների ճամբարի վրա Իսրայելի հարձակումների հետևանքով»,- ասվում է գործակալության հաղորդագրության մեջ։ Մոտ 120 մարդ անհետ կորել է, եւս 777-ը վիրավորվել է։ CNN-ը, հղում անելով Գազայի հատվածում գտնվող ինդոնեզական հիվանդանոցի տնօրենին, ավելի վաղ հայտնել էր, որ չորեքշաբթի օրը Գազայի Ջաբալիա ճամբարին իսրայելական նոր հարվածի հետևանքով առնվազն 80 մարդ է զոհվել: ՄԱԿ-ի Մարդու իրավունքների գերագույն հանձնակատարի գրասենյակը չորեքշաբթի նախազգուշացրել է, որ իսրայելական ուժերի կողմից Գազայի հատվածում փախստականների Ջաբալիա ճամբարի գնդակոծումը կարող է համարվել ռազմական հանցագործություն:

10:34 - 02 նոյեմբերի, 2023

Իսրայելի հարվածները Գազայում փախստականների ճամբարին կարող են ռազմական հանցագործություն ճանաչվել․ ՄԱԿ |tert.am|

tert.am: Գազայի հատվածում գտնվող Ջեբալիյա փախստականների ճամբարի գնդակոծությունն իսրայելական ուժերի կողմից կարող է ռազմական հանցագործություն ճանաչվել։ Այս մասին, ինչպես հաղորդում է ՌԻԱ Նովոստին, ասված է ՄԱԿ-ի Մարդու իրավունքների գերագույն հանձնակատարի գրասենյակի X-ի միկրոբլոգում արված գրառման մեջ։ «Հաշվի առնելով Ջեբալիա փախստականների ճամբարին Իսրայելի հասցրած ավիահարվածներից հետո քաղաքացիական անձանց շրջանում զոհերի մեծ թիվը և ավերածությունների մասշտաբները , մենք լուրջ մտավախություն ունենք, որ դրանք անհամաչափ հարձակումներ են, որոնք կարող են հավասարեցվել ռազմական հանցագործության», - ասված գրառման մեջ:

09:40 - 02 նոյեմբերի, 2023

Հորդանանը հետ է կանչել Իսրայելում իր դեսպանին |tert.am|

tert.am: Հորդանանն անհապաղ հետ է կանչում Իսրայելում իր դեսպանին։ Այս մասին հաղորդում է ՌԻԱ Նովոստին՝ թագավորության արտաքին գործերի նախարարությանը հղումով։ «Փոխվարչապետ և արտաքին գործերի նախարար Այման աս-Սաֆադին այսօր (չորեքշաբթի - խմբ.) որոշում է կայացրել անհապաղ հետ կանչել Իսրայելում Հորդանանի դեսպանին», - ասված է Հորդանանի ԱԳՆ-ի հաղորդագրության մեջ: Հայտարարության համաձայն՝ աս-Սաֆադին հրահանգել է նաև Իսրայելի ԱԳՆ-ին տեղեկացնել ավելի վաղ Հորդանանը լքած Իսրայելի դեսպանի վերադարձի անհնարինության մասին։

19:20 - 01 նոյեմբերի, 2023

Էրդողանը Իսրայելին մեղադրել է մարդկության դեմ հանցագործությունների իրականացման մեջ |hetq.am|

hetq.am: Թուրքիայի նախագահ Ռեջեփ Թայիփ Էրդողանը հայտարարել է, որ Իսրայելը Գազայի հատվածում մարդկության դեմ հանցագործություններ և ռազմական հանցագործություններ է կատարում: «Իսրայելը, ստանալով Արևմուտքի և ԱՄՆ-ի անվերապահ աջակցությունը, Գազայում մարդկության դեմ հանցագործություններ է կատարում։ (Իսկական, խմբ.) պետությունը պետք է հետևի պատերազմի կանոններին: Բայց Իսրայելը հարվածներ է հասցնում հիվանդանոցներին։ Մենք շարունակում ենք շփումները գործընկերների հետ, աշխատանք ենք տանում, որպեսզի իսրայելցի ռազմական հանցագործություն կատարած յուրաքանչյուր անձ օրենքի առաջ կանգնի»,- TACC գործակալության փոխանցմամբ թուրքական կառավարության նիստից հետո լրագրողներին հայտարարել է Էրդողանը։ Նա նշել է, որ հոկտեմբերի 7-ից ի վեր Գազայում զոհվել է ավելի քան 8,5 հազար մարդ և ավելի քան 20 հազար մարդ էլ ստացել տարբեր աստիճանի մարմնական վնասվածքներ: «Գազայի զգալի մասը ոչնչացվել է կամ ավերակների մեջ է։ Գազ, էլեկտրականություն և ջուր չկա։ Եվ այս ամենը տեղի է ունենում համաշխարհային հանրության աչքի առաջ։ ԵՄ-ն չի կարողանում նույնիսկ հրադադարի կոչ անել, առավել ևս՝ դատապարտել այն։ Ավելին, նրանք փորձում են թաքցնել Իսրայելի վայրագությունները։ ՄԱԿ-ի Անվտանգության խորհուրդը պարզապես հետևում է: 25 օր շարունակ իրավապաշտպան կազմակերպությունները ոչ մի արձագանք չեն հայտնում մարդկության դեմ կատարված այս հանցագործություններին»,- ասել է Թուրքիայի նախագահը։ Ավելի մանրամասն՝ hetq.am-ում։

13:13 - 01 նոյեմբերի, 2023

Բոլիվիան խզել է դիվանագիտական հարաբերությունները Իսրայելի հետ, լատինամերիկյան մի շարք երկրներ դեսպաններին են հետ կանչել Թել Ավիվից |factor.am|

factor.am: Բոլիվիան խզել է դիվանագիտական հարաբերությունները Իսրայելի հետ Գազայում պատերազմի պատճառով, Լատինական Ամերիկայի երկու այլ երկրներ էլ հետ են կանչել Թել Ավիվում իրենց դեսպաններին խորհրդակցությունների համար, գրում է Al Jazzira-ն։ Հարավամերիկյան երկիրը մեղադրում է Իսրայելին Գազայի հատվածում մարդկության դեմ հանցագործությունների մեջ։ Այս մասին մամուլի ասուլիսի ժամանակ հայտարարել է երկրի փոխարտգործնախարար Ֆրեդի Մամանին։ Ըստ նրա՝ Բոլիվիան որոշել է խզել դիվանագիտական հարաբերությունները Իսրայելի հետ՝ «մերժելով և դատապարտելով Գազայի հատվածում տեղի ունեցող իսրայելական ագրեսիվ և անհամաչափ ռազմական հարձակումը»։ Բոլիվիան Իսրայելի հետ հարաբերությունները խզել էր 2009 թվականին, սակայն դրանք վերականգնել էին 2020 թվականին։ Բոլիվիան նաև մտադիր է մարդասիրական օգնություն ուղարկել Գազա։ Հարևաններ երկրները՝ Կոլումբիան և Չիլին էլ հետ են կանչել իրենց դեսպաններին խորհրդակցությունների համար և հրադադարի կոչեր արել։ Իր հերթին Չիլիի նախագահ, ձախ քաղաքական գործիչ Գաբրիել Բորիչը հայտարարել է, որ իր երկիրը «Գազայի հատվածում Իսրայելի կողմից միջազգային մարդասիրական իրավունքի խախտումների պատճառով» հետ է կանչում Իսրայելից իր դեսպանին խորհրդակցությունների համար։

11:46 - 01 նոյեմբերի, 2023

Իսրայելական սուպերմարկետները դադարեցրել են թուրքական ապրանքների ներմուծումը Համասի նկատմամբ Էրդողանի դիրքորոշման պատճառով |hy.armradio.am|

hy.armradio.am: Իսրայելական բազմաթիվ սուպերմարկետների ցանցեր դադարեցրել են ներկրումը Թուրքիայից այն բանից հետո, երբ Թուրքիայի նախագահ Ռեջեփ Թայիփ Էրդողանը հրաժարվեց արմատական պաղեստինյան ՀԱՄԱՍ շարժումը որակել որպես ահաբեկչական խմբավորում, հայտնում է իսրայելական Haaretz թերթը։ Նշվում է, որ իսրայելական խոշորագույն Shufersal սուպերմարկետների ցանցը, ինչպես նաև նրա մրցակիցներ Ռամի Լևին և Յոհանանոֆը հրաժարվել են թուրքական արտադրանքից։ Նրանք այս քայլին գնացել են հասարակական ուժեղ ճնշման պատճառով։ Մասնավորապես, Rami Levy ցանցին մեղադրել են թուրքական լոլիկը իսրայելականից գերադասելու մեջ։ «Մանրածախ առևտրով զբաղվողները կարծես թե հասկանում են, որ սպառողներն այժմ թուրքական լոլիկը համարում են արգելված»,- գրում է թերթը։ Շուկայի խոշոր խաղացողների օրինակին հետևել են փոքր ներկրողները։ Haaretz-ը հայտնում է, որ Թուրքիան վերջին տարիներին դարձել է Իսրայելի հիմնական արտահանողներից մեկը։ 2022 թվականին այն համապատասխան վարկանիշում զբաղեցրել է հինգերորդ տեղը Չինաստանից, ԱՄՆ-ից, Շվեյցարիայից և Գերմանիայից հետո։ Թուրքիայի նախագահ Ռեջեփ Թայիփ Էրդողանը հոկտեմբերի 25-ին հայտարարել է, որ Անկարան Համասին ահաբեկչական կազմակերպություն չի համարում։ Խորհրդարանում ելույթի ժամանակ նա ասել է, որ ՀԱՄԱՍ-ը ազատագրական և մոջահեդների խմբավորում է, որը պայքարում է իր հողը պաշտպանելու համար: Ի պատասխան սրան՝ Իսրայելի ազգային անվտանգության նախարար Իտամար Բեն-Գվիրը Թուրքիայի ղեկավարին հրավիրել է ՀԱՄԱՍ-ի կողմնակիցներին իր երկիր տեղափոխել։ Դրանից հետո Իսրայելի արտգործնախարար Էլի Քոհենը հայտարարել է, որ իր երկիրը անհապաղ հետ է կանչում իր դիվանագետներին Թուրքիայից՝ երկկողմ հարաբերությունները վերանայելու համար։

11:31 - 01 նոյեմբերի, 2023

Իսրայելը հարվածել է Գազայի բազմամարդ ճամբարին, նշվում է «Համաս»-ի մեկ հրամանատարի զոհվելու մասին․ Reuters |azatutyun.am|

azatutyun.am: Գազայի հատվածում խիտ բնակեցված փախստականների ճամբարին Իսրայելի օդային հարվածների հետևանքով զոհվել են առնվազն 50 պաղեստինցիներ և «Համաս»-ի մեկ հրամանատար, հաղորդում է Reuters-ը։ Ըստ Գազայի հատվածի՝ բժիշկները դժվարանում են սննդի, վառելիքի և հիմնական պաշարների սակավության պայմաններում օգնություն ցուցաբերել տուժածներին։ Հոկտեմբերի 30-ի երեկոյան դրությամբ երկու կողմերի զոհերի ընդհանուր թիվը գերազանցել է 9 հազար 800-ը:

09:36 - 01 նոյեմբերի, 2023

Մախաչկալայի օդանավակայանում անկարգություններին մասնակցելու համար 15 մարդ է ձերբակալվել |panorama.am|

panorama.am: Մախաչկալայի օդանավակայանում զանգվածային անկարգություններին մասնակցելու համար ձերբակալվածների թիվը հասել է 15-ի: Այս մասին «Ռիա Նովոստի»-ին հայտնել է շրջանի Գերագույն դատարանի մամուլի ծառայության ղեկավար Զարեմա Մամաևան: «Դատարանի որոշումներով նրանք բոլորը մեղավոր են ճանաչվել վարչական իրավախախտում կատարելու մեջ։ Նրանցից 8-ի նկատմամբ նշանակվել է վարչական կալանք՝ 8 օր ժամկետով, երկուսին՝ հաշվի առնելով առողջական վիճակը, նշանակվել է 60-ական ժամ պարտադիր աշխատանք»,- ասել է գործակալության զրուցակիցը։ Մամաևայի խոսքով՝ նրանց մեղադրանք է առաջադրվել «Հավաք, հանրահավաք, ցույց, երթ կամ պիկետ կազմակերպելու կամ անցկացնելու համար սահմանված կարգի խախտում» հոդվածով։ Հոկտեմբերի 31-ին Դաղստանի դատարանները զանգվածային անկարգությունների 7 մասնակիցների մեղավոր են ճանաչել մանր խուլիգանության մեջ և ձերբակալել նրանց երեքից տասը օր ժամկետով: Հիշեցնենք, որ հոկտեմբերի 29-ին Մախաչկալայի բնակիչները ներխուժել են Ույթաշ օդանավակայանի թռիչքուղի, որտեղ ժամանել է Թել Ավիվից չվերթը: Հաղորդվում էր, որ նրանք փնտրում էին Իսրայելի ժամանող քաղաքացիներին, ինչպես նաև ստուգում էին տարածքից դուրս եկող մեքենաները: Արդյունքում՝ անկարգություններ են սկսվել։ Օդանավակայանը ժամանակավոր փակվել է։

09:34 - 01 նոյեմբերի, 2023

Բլինքենի ելույթի ժամանակ ցուցարարները ներխուժել են Կոնգրես |1lurer.am|

1lurer.am: Գազայի հատվածում Իսրայելի գործողության դեմ բողոքող մի քանի անձ ներխուժել է ԱՄՆ Կոնգրես պետքարտուղար Էնթոնի Բլինքենի ելույթի ժամանակ: Ակցիայի մասնակիցների ձեռքին եղել են պաստառներ, որոնք պարունակել են Գազայի հատվածում կրակը դադարեցնելու կոչեր։ Անվտանգության աշխատակիցները նրանց դուրս են բերել Կոնգրեսից։

21:32 - 31 հոկտեմբերի, 2023