Լիբանան

Լիբանանահայերին օգնություն ցույց տալու փաթեթը կառավարությունում է․ շուրջ 850 հոգի ժամանել է Հայաստան՝ երկարատեւ բնակության |hetq.am|

hetq.am: Սեպտեմբերի 1-ին, կառավարության շրջանառությանն է հանձնվել օգոստոսի 4-ին Բեյրութի նավահանգստում տեղի ունեցած ողբերգական պայթյունի հետեւանքով տուժած լիբանանահայերին աջակցություն ցույց տալու փաթեթի նախագիծը։ Այս մասին մեզ հետ հեռախոսազրույցում հայտնեց սփյուռքի գործերի գլխավոր հանձնակատար Զարեհ Սինանյանը։ Կառավարությունը սեղմ ժամկետներում պետք է քննարկի նախագիծը՝ հաշվի առնելով հարցի հրատապ լինելը։ Փաթեթը ներառում է առողջապահական, կրթական եւ սոցիալական բաղադրիչներ։ Այն ընդգրկում է նաեւ կացարանի հարցում որոշակի պետական աջակցության տրամադրումը։ Ըստ Զարեհ Սինանյանի՝ փաթեթն ուղղված է Հայաստան ժամանող 5 հազար լիբանանահայերի կողմից այստեղ երկարատեւ բնակություն հաստատելուն։ Կառավարության ներկայացուցիչն ասում է, որ Լիբանանում մնացած հայերին ցուցաբերվող աջակցությունը եւս շարունակական է լինելու։ Այն լինելու է տարբեր ձեւաչափերով, ինչպես, օրինակ, «Հայաստան» համահայկական հիմնադրամի կազմակերպած համերգ-դրամահավաքը, որից ստացած հասույթն ուղղվելու է լիբանանահայերի կարիքներին։ Սփյուռքի գլխավոր հանձնակատարի փոխանցմամբ՝ հուլիսի 14-ից մինչ օրս Հայաստան է ժամանել ավելի քան 1100 լիբանանահայ, որոնցից 250-ը կարճատեւ ժամանակով է եկել։ Դա նշանակում է, որ երկարատեւ բնակության նպատակով ժամանած լիբանանահայերի թիվը մոտ 850 է։ Նրանց թվում են նաեւ պայթյունի հետեւանքով տուն կորցրած մեր հայրենակիցները։ Լիբանանից վերադարձած երկու ընտանիք ցանկություն է հայտնել բնակվել Արցախում։ Զարեհ Սինանյանն ասում է, որ առաջիկա օրերին պատրաստվում է Արցախ մեկնել՝ տեղի գործընկերների հետ քննարկելու լիբանանահայերի աջակցությանն ուղղված ծրագիրը։ Հիշեցնենք, որ օգոստոսի 25-ին ԱՀ նախագահ Արայիկ Հարությունյանի գլխավորությամբ տեղի ունեցած աշխատանքային խորհրդակցությանը նախագահի գլխավոր խորհրդական-հատուկ հանձնարարություններով դեսպան Ռուդիկ Հյուսնունցը հայտնել էր, որ Լիբանանից Արցախ են ժամանել առաջին երկու հայրենադարձ ընտանիքները, որոնց կացության համար ստեղծված են բոլոր պայմանները:

09:32 - 03 սեպտեմբերի, 2020

Մակրոնը չի բացառում Լիբանանի դեմ պատժամիջոցների կիրառման հնարավորությունը |azatutyun.am|

azatutyun.am: Եթե Լիբանանում շուտափույթ կերպով արմատական բարեփոխումներ չիրականացվեն, երկիրը կարող է շատ լուրջ բարդությունների բախվել միջազգային ասպարեզում։ Երեքշաբթի երեկոյան, Բեյրութ կատարած այցի ավարտին, նման հայտարարությամբ է հանդես եկել Ֆրանսիայի նախագահ Էմանուել Մակրոնը։ «Այս երեկո ես իմ վստահությունն եմ հայտնում Լիբանանի կառավարությանը։ Դրա հետ մեկտեղ, ես ստիպված եմ շատ հստակորեն զգուշացնել՝ եթե մինչև հոկտեմբերի վերջ Լիբանանի ղեկավարները չկատարեն իրենց իսկ ստանձնած պարտավորությունները, լինելու են նաև հետևանքներ։ Կարծում եմ անգամ, որ կարող է գալ պատժամիջոցների կիրառման պահը։ Իրադարձությունների նման զարգացումը ես ամբողջությամբ չէի բացառի», - հայտարարել է Մակրոնը։ Ֆրանսիայի նախագահը Բեյրութ էր ժամանել Լիբանանի ստեղծման 100-ամյակին նվիրված տոնակատարություններին մասնակցելու, ինչպես նաև օգոստոսի 4-ին տեղի ունեցած պայթյունի հետևանքների վերացմանն ուղղված աշխատանքներին ծանոթանալու նպատակով։ Մակրոնի այցը Լիբանան ուղեկցվում էր բողոքի գործողություններով։ Արմատական բարեփոխումների անցկացման պահանջով հանդես եկող հարյուրավոր ցուցարարներ երեքշաբթի երեկոյան փորձել են ներխուժել Լիբանանի խորհրդարանի տարածք, ինչին ի պատասխան ոստիկանությունը արցունքաբեր գազ է կիրառել՝ ցրելով ակցիայի մասնակիցներին։

12:24 - 02 սեպտեմբերի, 2020

Բեյրութում ցուցարարների հետ բախումներից հետո բանակը վերահսկողության տակ է առել քաղաքի կենտրոնը |tert.am|

tert.am: Բեյրութի կենտրոն են ժամանել բանակային ստորաբաժանումները՝ ցրելու կենտրոնական հրապարակում և խորհրդարանի հարակից փողոցներում անկարգություններ հրահրած ցուցարարներին: Ինչպես հաղորդում է РИА Новости-ն, Լիբանանի մայրաքաղաքում խորհրդարանի շենքի մոտ հավաքված ցույցը շատ արագ վերածվել է անկարգությունների: Ակցիայի մասնակիցները սկսել են քարեր և այլ առարկաներ նետել իրավապահների ուղղությամբ: Ցուցարարերը փորձել են անցնել խորհրդարանի առջև դրված արգելապատնեշների վրայով: Նրանք կոտրել են լուսացույցները և գրասենյակային շենքերում տեղադրված վերահսկման տեսախցիկները: Ի պատասխան՝ ոստիկանությունն արցունքաբեր գազ է կիրառել: Բանակային ուժերի ժամանելուց հետո բախումները տեղափոխվել են Բեյրութի գլխավոր՝ Նահատակների հրապարակ, որտեղ ցուցարարներն հրդեհել են «Ան-Նահար» թերթի խմբագրության առաջին հարկը: Ներկա պահին բախումները դադարել են: Բոլոր կենտրոնական փողոցներն ու հրապարակները գտնվում են բանակայինների վերահսկողության տակ: Հիշեցնենք, որ զանգվածային ցույցերին զուգահեռ Բեյրութում տեղի է ունենում Ֆրանսայի նախագահ Էմանուել Մակրոնի պաշտոնական մեկօրյա այցը: Ցույցի մասնակիցները հակակառավարական կարգախոսներ են հնչեցրել և բարեփոխումներ պահանջել իշխանություններից:

09:26 - 02 սեպտեմբերի, 2020

Ջրի սղության պատճառով Բեյրութում բազմաթիվ ընտանիքներ հուսահատ վիճակում են |hetq.am|

hetq.am: ՅՈՒՆԻՍԵՖ-ը հաղորդագրություն է տարածել Լիբանանում դեռեւս չլուծված ջրի խնդրի վերաբերյալ։ Այն ներկայացնում ենք ստորեւ։ «ԲԵՅՐՈՒԹ, 1-ը սեպտեմբերի, 2020 թ. – Լիբանանում դեռևս լուծված չէ պայթյունի հետևանքով առաջացած ջրի խնդիրը: Ծանր իրավիճակում են հատկապես այն 300 000 մարդիկ, այդ թվում՝ մոտ 100 000 երեխա, որոնց տները պայթյունի հետևանքով վնասվել կամ ավերվել են: Նրանք զրկված են մաքուր ջրից և սանիտարահիգիենիկ ծառայություններից, ահազանգում է ՅՈՒՆԻՍԵՖ-ը: Վիճակը վատթարացել է հատկապես Բեյրութի մերձակա շրջաններում, որտեղ վնասվել են պայթյունին մոտ գնտվող բազմաթիվ շենքերի ջրամբարներն և ջրահեռացման համակարգերը։ Տուժած գոտիներում ջրամատակարարման ցանցից ամբողջությամբ անջատվել է շուրջ 130 շենք, վնասվել են ավելի քան 500 բնակելի շենքերի ջրամատակարարման համակարգերը։ «Քանի որ կորոնավիրուսով վարակման դեպքերը շարունակում են աճել, ավելի քան երբևէ, կարևոր է պայթյունից տուժած, կյանքերը տակնուվրա եղած ընտանիքներին և երեխաներն ապահովել մաքուր ջրով և սանիտարահիգիենիկ պայմաններով», - նշել է Լիբանանում ՅՈՒՆԻՍԵՖ-ի ներկայացուցիչ Յուկի Մոկուոն: «Երբ համայնքներին հասանելի չեն այս կենսական ծառայությունները, ջրի սղությամբ պայմանավորված հիվանդությունների, այդ թվում կորոնավիրուսի տարածման հավանականությունը կարող է ձայնի արագությամբ աճել», - ավելացրել է նա: Այն տներում, որտեղ ջրատարը չի հասնում, մտահոգիչ է ոչ միայն խմելու ջրի, այլև ջրահեռացման խնդիրը: Դժվարություններ են առաջանում նաև շշալցված կամ ցիստերներով ջուր գնելու հարցում, քանի որ բարձր ջերմաստիճանին զուգահեռ հնարավոր է ջրի արժեքի բարձրացում: Պայթյունից անմիջապես հետո ՅՈՒՆԻՍԵՖ-ը՝ գործընկերների և ջրամատակարարման ծառայությունների հետ գնահատել է ենթակառուցվածքին հասցված վնասը: Beirut Mount Lebanon BML Water Establishment ջրմուղ ընկերությունը ՅՈՒՆԻՍԵՖ-ի աջակցությամբ վերականգնել է ավելի քան 100 շենքերի ջրամատակարարման համակարգերը, տեղադրվել է անհրաժեշտ 3 300 ջրի բաքերից 570-ը: Բացի այդ, ՅՈՒՆԻՍԵՖ-ը ջրով է ապահովել առաջինը օգնության հասած ջոկատներին և տուժած ընտանիքներին, տրամադրել է ավելի քան 4 340 հիգիենայի հավաքածու և 620 մանկական հանդերձանք: ՅՈՒՆԻՍԵՖ-ի օգնութմաբ ցիստերներով ջուր է մատակարարվել 20 տնային տնտեսությունների և Լիբանանի Կարմիր խաչի երեք կենտրոնների: Սա հատկապես կարևոր է, քանի որ օճառով հաճախ լվացվելը կորոնավիրուսի կանխարգելման անհարժեշտ պայմաններից է: «Մեր առաջնահերթ խնդիրներից մեկը տուժած երեխաներին ու ընտանիքներին, ինչպես նաև առաջնագծում աշխատողներին մաքուր ջրով ապահովելն էր», - նշել է Յուկի Մոկուոն: «Համագործակցելով համապատասխան մարմինների և մեր գործընկերների հետ` մենք կարողացել ենք աջակցել ավելի քան 6 650 երեխաների և նրանց ընտանիքների։ Բայց ավելին անելու կարիք կա, իսկ ժամանակը չի սպասում»: ՅՈՒՆԻՍԵՖ-ը նաև աշխատում է տեղի հազարավոր երիտասարդների անհրաժեշտ հմտություններով զինելու ուղղությամբ, որպեսզի նրանք ևս երկրի վերակառուցման գործում իրենց դերն ունենան՝ այդ թվում ջրամատակարարման և ջրահեռացման համակարգերի պահմանման և նորոգման գործում»,- նշված է հաղորդագրության մեջ։

13:07 - 01 սեպտեմբերի, 2020

Մուստաֆա Ադիբը նշանակվեց Լիբանանի վարչապետ |azatutyun.am|

azatutyun.am: Գերմանիայում Լիբանանի նախկին դեսպան Մուստաֆա Ադիբը նշանակվեց երկրի վարչապետ: 48-ամյա Ադիբը 2013 թվականից ղեկավարել է Բեռլինում լիբանանյան դիվանագիտական ներկայացուցչությունը, մասնագիտությամբ իրավաբան և քաղաքագետ է: Լրագրողների հետ զրույցում այսօր Ադիբը հայտարարել է, որ նպատակ ունի սեղմ ժամկետներում ձևավորել կաբինետ և անցնել երկիրը ճգնաժամից դուրս բերելու գործին՝ մասնավորապես անհապաղ բարեփոխումներ սկսել Արժույթի միջազգային հիմնադրամի հետ համաձայնության հասնելու շրջանակում: «Լիբանանցիները մտահոգ են իրենց ներկայով և ապագայում, այդ իսկ պատճառով դատարկ ելույթների և խոստումների ժամանակ չկա», - հայտարարել է Լիբանանի նորանշանակ վարչապետը: Կառավարական ճգնաժամը Լիբանանում ծագեց ավելի քան 150 մարդու կյանք խլածաղետի ֆոնին: Հազարավոր ցուցարարներ դուրս եկան փողոց՝ պահանջելով կառավարության հրաժարականը: Մինչև օգոստոսի 4-ի աղետալի պայթյունը Լիբանանն արդեն գտնվում էր ծանր տնտեսական կացության մեջ, ազգային տարադրամի փոխարժեքը ամերիկյան դոլարի հանդեպ վերջին ամիսներին նվազել էր շուրջ 80 տոկոսով։

17:06 - 31 օգոստոսի, 2020

Գերմանիայում Լիբանանի դեսպանը՝ Լիբանանի վարչապետի թեկնածու |azatutyun.am|

azatutyun.am: Գերմանիայում Լիբանանի դեսպան Մուստաֆա Ադիբի թեկնածությունն առաջադրվեց երկրի վարչապետի պաշտոնում: Նման որոշում է ընդունվել Լիբանանի խորհրդարանի խմբակցությունների և նախագահի միջև տեղի ունեցած խորհրդակցությունների արդյունքներով: 48-ամյա Ադիբը 2013 թվականից ղեկավարում է Բեռլինում լիբանանյան դիվանագիտական ներկայացուցչությունը, մասնագիտությամբ իրավաբան և քաղաքագետ է: Ադիբի թեկնածության շուրջ համաձայնության մասին հայտարարությունը հնչում է Ֆրանսիայի նախագահ Էմանյուել Մակրոնի Բեյրութ կատարելիք այցից ժամեր առաջ: Ելիսեյան պալատի ղեկավարն ուրբաթ օրը հայտարարել էր, թե միայնակ չի թողնի Լիբանանին, որտեղ քաղաքացիական պատերազմի վտանգը մեծ է: Կառավարական ճգնաժամը Լիբանանում ծագեց ավելի քան 150 մարդու կյանք խլած աղետի ֆոնին: Հազարավոր ցուցարարներ դուրս եկան փողոց՝ պահանջելով կառավարության հրաժարականը: Մինչև օգոստոսի 4-ի աղետալի պայթյունը Լիբանանն արդեն գտնվում էր ծանր տնտեսական կացության մեջ, ազգային տարադրամի փոխարժեքը ամերիկյան դոլարի հանդեպ վերջին ամիսներին նվազել էր շուրջ 80 տոկոսով։ Երկրի էլեկտրական ցանցերը դադարել էին երկրի ամբողջ տարածքում 24-ժամյա անխափան էլեկտրամատակարարում ապահովել։

14:21 - 31 օգոստոսի, 2020

Լիբանանի բնակչության կեսը կանգնած է պարենային ճգնաժամի վտանգի առաջ. ՄԱԿ |tert.am|

tert.am: Բեյրութի նավահանգստի պայթյունից հետո Լիբանանի բնակչության կեսը կարող է կանգնել պարենային ճգնաժամի առաջ: Ինչպես փոխանցում է «Ալ-Արաբիան», այս մասին կիրակի նախազգուշացրել է ՄԱԿ-ի Արևմտյան Ասիայի գծով տնտեսական և սոցիալական հանձնաժողովը: «Բնակչության կեսից ավելին կանգնած է հիմնական անհրաժեշտ սննդամթերքների հասանելիությունից զրկվելու վտանգի առաջ: Անհապաղ միջոցառումներ պետք է ձեռնարկվեն կանխելու սննդային ճգնաժամը»,- ասվում է ՄԱԿ-ի գործակալության հայտարարության մեջ: Հանձնաժողովի գործադիր քարտուղարի խոսքով՝ Լիբանանի կառավարությունը պետք է առաջնահերթություն տա Բեյրութի նավահանգստի պահեստների վերականգնմանը, որը երկրի հացահատիկի խոշորագույն պահեստն է: Լիբանանը տնտեսական խոր ճգնաժամում էր գտնվում անգամ մինչ օգոստոսի 4-ին տեղի ունեցած ողբերգական պայթյունը, որի հետևանքով հարյուրավոր զոհեր գրանցվեցին և ավերվեց մայրաքաղաքի մեծ մասը:

20:53 - 30 օգոստոսի, 2020

Լիբանանի հայկական համայնքին է փոխանցվել Արցախից ուղարկված հերթական դրամական օգնությունը

Օգոստոսի 27-ին Մերձավոր Արևելքի երկրներում Արցախի Հանրապետության մշտական ներկայացուցիչ Կարապետ Քաբաբջյանը Բեյրութում հանդիպել է Ն.Ս.Օ.Տ.Տ. Արամ Ա Մեծի Տանն Կիլիկիո կաթողիկոսի հետ։ Այս մասին տեղեկացնում է Արցախի Հանրապետության արտաքիին գործերի նախարարությունը։ Հանդիպման գլխավոր նպատակն էր Արամ Առաջին Վեհափառի հովանու ներքո գործող՝ Լիբանանի հայկական համայնքային բոլոր կառույցներն ընդգրկող հանձնախմբին փոխանցելու Արցախի Հանրապետության Նախագահ Արայիկ Հարությունյանի հանձնարարականով Արցախի կառավարության կողմից լիբանանահայությանը հատկացված 25 միլիոն ՀՀ դրամի չափով դրամական օգնությունը։ Նույն օրը Կարապետ Քաբաբջյանը Լիբանանի ազգային առաջնորդարանում հանդիպում է ունեցել Լիբանանի հայ համայնքի հոգևոր առաջնորդների հետ։ Հանդիպմանը Կարապետ Քաբաբջյանը նշել է, որ Արցախի համար դժվարին ժամանակներում Լիբանանի հայ համայնքը մշտապես սատար է կանգնել արցախահայությանը, և այժմ Արցախն է օգնության ձեռք մեկնում լիբանանահայությանը՝ Բեյրութում տեղի ունեցած աղետալի պայթյունի հետևանքների վերացմանն օժանդակելու համար։ Լիբանանի հայ համայնքի հոգևոր առաջնորդների անունից շնորհակալական խոսք է ասել Լիբանանի հայոց թեմի առաջնորդ Գերաշնորհ Տ. Շահէ արքեպիսկոպոս Փանոսեանը՝ նշելով, որ Արցախի կողմից տրամադրված ֆինանսական աջակցությունն ավելին է, քան պարզապես դրամական օգնություն. այն ուժ և կորով է ներշնչում լիբանանահայությանը։ Հանդիպմանը մասնակցել է նաև Լիբանանում ՀՀ դեսպան Վահագն Աթաբեկյանը։

18:41 - 29 օգոստոսի, 2020

800-ից ավելի լիբանանահայ հուլիսի 1-ից մինչ օրս ժամանել է Հայաստան |armenpress.am|

armenpress.am: Հուլիսի 1-ից մինչ այսօր և Բեյրութում օգոստոսի 4-ին տեղի ունեցած պայթյունից հետո 800-ից ավելի լիբանանահայ է ժամանել Հայաստան: Այս մասին օգոստոսի 28-ին Ազգային ժողովում լրագրողների հետ զրույցում ասաց Սփյուռքի գործերի գլխավոր հանձնակատար Զարեհ Սինանյանը: «Մինչ այս պահը 800-ից ավելի լիբանանահայ է ժամանել Հայաստան, նրանց մի մասը ժամանել էր Բեյրութի պայթյունից առաջ, բայց հուլիսի 1-ից հետո, երբ առաջին ինքնաթիռը ժամանեց Երևան, մյուս մասն էլ՝ պայթյունից հետո: Այս հոսքը շարունակական է, շաբաթը երկու անգամ Բեյրութից Հայաստան եկող թռիչք ունենք, գրեթե բոլոր թռիչքները լի են գալիս»,- ասաց Սինանյանը: Սփյուռքի գործերի գլխավոր հանձնակատարը նշեց, որ ժամանողներն ունեն տարբեր խնդիրներ, սակայն իրենց գրասենյակն ամեն կերպ ընդառաջում է Լիբանանից Հայաստան ժամանածներին:

10:23 - 29 օգոստոսի, 2020

Բեյրութում պայթյունի հետևանքով զոհված հայերի թիվը հասավ 15-ի |lragir.am|

lragir.am: Օգոստոսի 4-ին Բեյրութի նավահանգստում պայթյունի հետևանքով զոհված հայերի թիվը հասավ 15-ի։ Այս մասին հայտնում է Արևելքը։ Մահացել է Անեթ Խաչիկյանը, ում կյանքը փրկելու համար բժիշկները 24 օր պայքարել են։

17:19 - 28 օգոստոսի, 2020

Լիբանանահայ բժիշկները իրենց մասնագիտությամբ աշխատանքի կանցնեն Արցախում. Զարեհ Սինանյան |armtimes.com|

armtimes.com: Լիբանանից Արցախ ժամանած 2 բժիշկների ընտանիքների կեցության հարցը շուտով լուծվելու է. նրանք այժմ հյուրանոցում են, սակայն կարճ ժամանակահատվածում վերանորոգվելու են նրանց կացարանները: Արցախի Հանրապետության կառավարությունը հայրենադարձ բժիշկներին նաև աշխատանքով է ապահովելու: Այս մասին տեղեկացրեց Սփյուռքի գլխավոր հանձնակատար Զարեհ Սինանյանը: Սփյուռքի գլխավոր հանձնակատարի գրասենյակը երեկ տեղեկացրել էր, որ երկու լիբանանահայ բժիշկների ընտանիքներ բնակություն են հաստատել Արցախի Շուշի քաղաքում: Արցախի Հանրապետության իշխանությունները պատրաստակամություն են հայտնել 100-150 լիբանանահայ ընտանիքի ընդունել: ԱՀ նախագահ Արայիկ Հարությունյանը, անդրադառնալով Լիբանանում ստեղծված իրավիճակին երեկ ընդգծել է, որ տեղի հայ համայնքի խնդիրների լուծման գործում շատ կարևոր է համահայկական ջանքերի ներդրումը: -Պարո՛ն Սինանյան, լիբանանահայ ընտանիքների որոշո՞ւմն է եղել Արցախում բնակվելը: Միանշանակ իրենց որոշումն է եղել: Արցախի Հանրապետությունը, տեղյակ լինելով, որ լիբանանահայ մեր որոշ հայրենակիցներ որոշել են տեղափոխվել հայրենիք, նրանց առաջարկ է արել, որ պատրաստ է իրենց ընդունել և լավ պայմաններ ստեղծել իրենց կեցության համար, և ոմանք սկսել են արձագանքել: -Արդեն լուծվե ՞լ է Արցախ ժամանած բժիշկների կեցության հարցը: - Կեցության հարցը անցումային փուլում է: Գիտենք, որ նրանք արդեն գտնվում են Շուշիում: Որքանով մենք տեղյակ ենք՝ այս պահին հյուրանոցում են մնում, մինչև կացարանները վերանորոգվեն և պատրաստ լինեն իրենց ընդունելու: Խոսքը կարճ ժամկետի մասին է: -Ինչպե ՞ս է լուծվելու հայրենադարձ ընտանիքների աշխատանքի, կրթության հարցը: - Որքան հասկացա Արցախի կառավարությունը արդեն լուծել է աշխատանքի հարցը: Նրանք բժիշկ են և իրենց մասնագիտությամբ են աշխատելու Արցախում: -Պարոն Սինանյան, մե՞ծ է այն լիբանանահայերի թիվը, ովքեր Հայաստան գալու ցանկություն են հայտնել: - Այս պահին մենք կապի մեջ ենք բազում դիմորդների հետ: Մարդիկ, ընդհանուր առմամբ, ուզում են գալ Հայաստան: Մենք, իհարկե, տեղեկացնում ենք, որ Արցախ գնալը ևս տարբերակ է: Այս պահին մենք արձագանք ունենք 9 ընտանիքներից: Դեսպանատունը որոշ ժամանակով ընդհատել էր դիմումների ընդունումը, բայց երկուշաբթի օրվանից նորից հավաքագրում է դրանք: Մեզ դիմում են գրասենյակի միջոցով, սոցիալական մեդիայով՝ ֆեյսբուքով, ինստագրամով, այսնիքն՝ մտքներովդ ինչ ֆորմատ որ անցնի, մարդիկ դիմում են Հայաստան գալու համար: Շարունակությունը՝ armtimes.com-ում

10:15 - 28 օգոստոսի, 2020

Լիբանանահայ բժիշկների ընտանիքները բնակության են տեղափոխվել Շուշի

Լիբանանահայ երկու բժշկի ընտանիքներ բնակության են տեղափոխվել Արցախ՝ Շուշի: Այս մասին տեղեկանում ենք Սփյուռքի գլխավոր հանձնակատարի գրասենյակից: «Արցախը շարունակում է լիբանանահայության կողքին լինել: Բեյրութի աղետալի պայթյունից հետո Արցախը ոչ միայն հումանիտար օգնություն ուղարկեց Լիբանան, այլև շարունակաբար իրականացնում է հանգանակություն լիբանանահայության կարիքների համար: Համայնքին հատկացվել է 25 մլն ՀՀ դրամ: Միևնույն ժամանակ, Արցախի իշխանությունները բազմիցս հայտարարել են, որ պատրաստակամ են 100-150 հայրենադարձ ընտանիքներ ընդունել»,- ասված է հաղորդագրության մեջ:

10:03 - 27 օգոստոսի, 2020

Լիբանանը մտադիր Է բողոք ներկայացնել ՄԱԿ-ի ԱԽ Իսրայելի ավիահարվածների պատճառով |armenpress.am|

armenpress.am: Լիբանանի Պաշտպանության բարձրագույն խորհուրդը որոշում Է ընդունել բողոք ներկայացնել ՄԱԿ-ի Անվտանգության խորհուրդ հանրապետության սահմանի շրջանում Իսրայելի ռազմաօդային ուժերի հարվածների պատճառով: Օգոստոսի 26-ին այդ մասին հայտնել Է Al-Jazeera հեռուստաալիքը: «Արտաքին գործերի նախարարին հանձնարարվել Է բողոք ներկայացնել Անվտանգության խորհուրդ՝ օգոստսի 25-ին (Լիբանանի) հարավային սահմանների վրա Իսրայելի հարձակումների վերաբերյալ»,- մեջբերում Է անում հեռուստաալիքը զինվորական գերատեսչության հայտարարությունից: Օգոստոսի 26-ին ավելի վաղ զինվորականները հայտնել են, որ Իսրայելի պաշտպանության բանակը (ՑԱԽԱԼ) օգոստոսի 25-ի երեկոյան ավիահարվածներ Է հասցրել շիաների «Հըզբոլլահ» կազմակերպության դիտակետերին Լիբանանի հետ սահմանի մոտ՝ ի պատասխան հրաձգության: Միջադեպի առնչությամբ Իսրայելի վարչապետ Բենիամին նաթանյահուն հայտարարել Է, որ «Հըզբոլլահը» հերթական անգամ Լիբանանին վտանգի Է ենթարկում իր ագրեսիայի պատճառով, հաղորդել Է ՏԱՍՍ-ը:

16:32 - 26 օգոստոսի, 2020

Լիբանանահայ գաղթօջախի պահպանմանը նպաստում է նաև Արցախը. նախագահը խորհրդակցություն է անցկացրել

Արցախի Հանրապետության նախագահ Արայիկ Հարությունյանն օգոստոսի 25-ին հրավիրել է աշխատանքային խորհրդակցություն՝ նվիրված լիբանանահայությանը ցուցաբերվող աջակցության ծրագրերին։ Զեկուցմամբ հանդես է եկել Լիբանանի հայկական համայնքին նյութական օգնություն ցուցաբերելու աշխատանքները կազմակերպող և համակարգող աշխատանքային խմբի ղեկավար, ԱՀ նախագահի գլխավոր խորհրդական-հատուկ հանձնարարություններով դեսպան Ռուդիկ Հյուսնունցը։ Նրա խոսքով՝ բացի պետական բյուջեի պահուստային ֆոնդի միջոցներից օրերս հատկացված 25 մլն ՀՀ դրամ օժանդակությունից, ԱՀ կառավարության մարդասիրական օգնության արտաբյուջետային հաշվին հավաքագրվել է ավելի քան 17 մլն ՀՀ դրամ, և այն ավելացնելու համար տարբեր նախաձեռնություններ են իրականացվում: Հյուսնունցը տեղեկացրել է նաև, որ Լիբանանից Արցախ են ժամանել առաջին երկու հայրենադարձ ընտանիքները, որոնց կացության համար ստեղծված են բոլոր պայմանները: Նախագահ Հարությունյանը շեշտել է, որ, թեպետ չափազանց կարևոր է պահպանել Լիբանանի հայկական համայնքի՝ որպես կայացած գաղթօջախի ամբողջականությունը, ինչին իր ուժերի ներածին չափով նպաստում է նաև Արցախի կառավարությունը, այնուամենայնիվ, բոլոր մեր այն հայրենակիցներին, ովքեր ցանկություն կունենան տեղափոխվելու, պատրաստ են ընդունելու և ապահովելու կացարանով, աշխատանքով, ինչպես նաև սոցիալական այլ երաշխիքներով։

09:17 - 26 օգոստոսի, 2020

Թելեթոն՝ ի աջակցություն լիբանանահայության |armenpress.am|

armenpress.am: Արևմտյան Ամերիկայի Համագաղութային Խորհուրդը կազմակերպել է Թելեթոն՝ ի աջակցություն Բեյրութում տեղի ունեցած պայթյունից տուժած լիբանանահայերի: Այս մասին հայտնում է «Ասբարեզը»: Արևմտյան Ամերիկայի hամագաղութային խորհուրդը, շարունակելով իր հանգանակությունները, ծրագրել է նաև հեռուստատեսային հանգանակություն՝ Թելեթոն, որը տեղի կունենա օգոստոսի 30-ին, երեկոյան ժամը 17:00-20:00 և կհեռարձակվի հայկական ARTN, Horizon, Pan Armenian TV, և US Armenia հեռուստաալիքներով, ինչպես նաև առցանց՝ ուղիղ եթերով: Լիբանանում ավերածություններն աննկարագրելի են, և դրանք հաղթահարելը կարիք ունի ամբողջ հայության միակամ և անվերապահ աջակցության:

11:42 - 25 օգոստոսի, 2020

Բեյրութի նավահանգստի մոտակայքում քիմիական պայթյունավտանգ նյութերով բեռնված 79 կոնտեյներ է հայտնաբերվել |tert.am|

tert.am: Բեյրութում լիբանանցի ռազմական փորձագետները ֆրանսիացի գործընկերների հետ մայրաքաղաքի նավահանգստի մոտակայքում քիմական թունավոր նյութեր պարունակող 79 կոնտեյներ են հայտնաբերել, РИА Новости-ի փոխանցմամբ՝ հայտնել է Լիբանանի զինված ուժերի լրատվական ծառայությունը: «Օգոստոսի 14-22-ն ընկած ժամանակահատվածում հիդրոքլորաթթու պարունակող 25 և այլ նյութեր պարունակող 54 կոնտեյներ է հայտնաբերել, որոնցից քիմիական այդ նյութերի արտահոսքը կարող էր աղետալի հետևանքներ ունենալ»,- ասված է տարածված հաղորդագրությունում:

10:19 - 25 օգոստոսի, 2020