ԲԴԽ

Բարձրագույն դատական խորհուրդը Սահմանադրական մարմին է, որը կոչված է ապահովելու դատական իշխանության անկախությունը եւ բնականոն գործունեությունը։

1. ԲԴԽ-ն`
1) կազմում եւ հաստատում է դատավորների թեկնածուների, ներառյալ առաջխաղացման ենթակա թեկնածուների ցուցակները.
2) Հանրապետության նախագահին առաջարկում է նշանակման ենթակա, ներառյալ առաջխաղացման կարգով նշանակման ենթակա դատավորների թեկնածուներին, դատարանների նախագահների եւ Վճռաբեկ դատարանի պալատների նախագահների թեկնածուներին. 
3) ԱԺ-ին առաջարկում է Վճռաբեկ դատարանի դատավորների եւ նախագահի թեկնածուներին.
4) լուծում է դատավորներին մեկ այլ դատարան գործուղելու հարցը, իր լիազորությունների իրականացման կապակցությամբ դատավորի նկատմամբ քրեական հետապնդում հարուցելու կամ նրան ազատությունից զրկելու վերաբերյալ համաձայնություն տալու հարցը, դատավորին կարգապահական պատասխանատվության ենթարկելու, դատավորների լիազորությունների դադարեցման հարցերը։

2. Դատավորին կարգապահական պատասխանատվության ենթարկելու վերաբերյալ հարց քննարկելու, ինչպես նաեւ Դատական օրենսգրքով սահմանված այլ դեպքերում Բարձրագույն դատական խորհուրդը հանդես է գալիս որպես դատարան:

3. Օրենքով սահմանված դեպքերում եւ կարգով Բարձրագույն դատական խորհուրդն ընդունում է ենթաօրենսդրական նորմատիվ իրավական ակտեր:

Խորհրդի գործող նախագահը Ռուբեն Վարդազարյանն է։

Բարձրագույն դատական խորհուրդը չի համապատասխանում դատական խորհուրդների միջազգային լավագույն փորձին. Հայկ Հովհաննիսյանը հրաժարական է ներկայացրել

Բարձրագույն դատական խորհուրդը չի համապատասխանում դատական խորհուրդների միջազգային լավագույն փորձին. Հայկ Հովհաննիսյանը հրաժարական է ներկայացրել

Բարձրագույն դատական խորհրդի անդամ Հայկ Հովհաննիսյանը հրաժարական է ներկայացրել: Ըստ նրա՝ հրաժարականի պատճառաբանությունը հետևյալն է. «Հայաստանի Հանրապետության ժողովրդի առջև երդմանս համաձայն, բարձր պաշտոնը ստանձնելուց ի վեր նախաձեռնել և առաջնորդել եմ մի շարք ծրագրեր` միտված դատարանների արդյունավետության, թափանցիկության և հաշվետվողականության բարձրացմանն ու միջազգային լավագույն չափանիշերին համապատասխանեցմանը։ Համոզված եմ, որ այդ ծրագրերի գործարկումն ու իրականացումը կբարձրացնի դատական իշխանության հանդեպ հանրային վստահությունը և կնպաստի Հայաստանի տնտեսական մրցակցային դաշտի ու ներդրումային միջավայրի գրավչության բարելավմանը։Ցավոք, Բարձրագույն Դատական Խորհրդի, որպես անկախ սահմանադրական մարմնի, գործունեությունն այդպես էլ չի համապատասխանում դատական խորհուրդների միջազգային լավագույն փորձին։ Միաժամանակ, ես պարտավոր էի իմ կողմից իրականացվող ծրագրերը հասցնել տրամաբանական ավարտի և նպատակահարմար չէի գտնում ավելի վաղ հրաժարական ներկայացնել։ Վստահ եմ, որ դատական բարեփոխումները պետք է իրականացվեն հրատապ և արդյունավետ կարգով, ինչի մասին բազմիցս բարձրաձայնել եմ։ Մինչդեռ, իմ կողմից առաջ քաշված մի շարք գաղափարներ և ծրագրեր Խորհրդում չեն կարևորում։ Վերոհիշյալի հաշվառմամբ, այսօր Բարձրագույն դատական խորհրդին ներկայացրել եմ հրաժարականի դիմում, հորդորելով լիազորություններիս դադարման հարցը քննարկել իմ բացակայությամբ»։
08:07 - 11 նոյեմբերի, 2019
Բարձրագույն դատական խորհուրդը դատապարտում է դատավորի նկատմամբ ցանկացած ոտնձգություն և ճնշում

Բարձրագույն դատական խորհուրդը դատապարտում է դատավորի նկատմամբ ցանկացած ոտնձգություն և ճնշում

Բարձրագույն դատական խորհուրդը ֆեյսբուքյան էջում հայտարարություն է տարածել Ռոբերտ Քոչարյանի գործը քննող դատավոր՝ Աննա Դանիբեկյանի հետապնդման վերաբերյալ, որը ներկայացնում ենք ստորև․ «Այսօր՝ 20:15-ի սահմաններում, մի խումբ անձինք հետապնդել են Երևան քաղաքի առաջին ատյանի ընդհանուր իրավասության դատարանի դատավոր Աննա Դանիբեկյանին՝ անհարկի հարցուպատասխանի միջոցով փորձելով հոգեբանական ճնշման ենթարկել, վիրավորել և նսեմացնել դատավորի անձը: Կատարվածի վերաբերյալ դատավոր Դանիբեկյանն անմիջապես տեղյակ է պահել Բարձրագույն դատական խորհրդին և այս պահին հաղորդում է ներկայացնում Ոստիկանությանը: Բարձրագույն դատական խորհուրդը դատապարտում է դատավորի նկատմամբ ցանկացած ոտնձգություն և ճնշում, որով կվտանգվի նրա անկախությունն ու մասնագիտական գործունեությունը, և հայտարարում, որ հետևողական է լինելու, որպեսզի օրենքի առաջ կանգնեն և խստագույնս պատասխանատվության ենթարկվեն բոլոր այն անձինք, ովքեր կփորձեն որևէ տեսակի ոտնձգություն գործել դատավորների, նրանց պատվի և արժանապատվության, մասնագիտական գործունեության դեմ: Բարձրագույն դատական խորհուրդ»։  
21:15 - 27 սեպտեմբերի, 2019
ԲԴԽ-ն արտագնա նիստ է անցկացրել

ԲԴԽ-ն արտագնա նիստ է անցկացրել

Բարձրագույն դատական խորհուրդը սեպտեմբերի 26-ին արտագնա նիստ անցկացրեց Գյումրիում։ Ինչպես հայտնեցին Բարձրագույն դատական խորհրդի աշխատակազմի մամուլի և հասարակայնության հետ կապերի ծառայությունից, Խորհուրդը հանդիպեց Շիրակի մարզի առաջին ատյանի ընդհանուր իրավասության դատարանի նախագահի և դատավորների հետ։ Հանդիպում-խորհրդակցության ժամանակ քննարկվեցին արդյունավետ արդարադատություն ունենալու գործիքակազմերը, դատական համակարգում առկա խնդիրները, դրանց լուծման հնարավոր ուղիները:Անդրադարձ եղավ դատավորներին հետաքրքրող տարբեր հարցերի ևս: Հիմնականում ուշադրության առանցքում էին դատավորների ծանրաբեռնվածությունը բեռնաթափելու անհրաժեշտությունը, գործերի բաշխման կարգը:Նշվեց, որ Խորհուրդը քաջատեղյակ է դատավորներին հուզող հարցերին, և գործուն քայլեր են ձեռնարկվում առաջնահերթ խնդիրներին հնարավորինս արագ լուծում տալու ուղղությամբ: Կարևորվեց նաև էլեկտրոնային արդարադատության համակարգի ներդրմամբ դատական իշխանության արդյունավետության և հանրային հաշվետվողականության բարձրացման ապահովումը:Հանդիպման ժամանակ տեղի ունեցավ բաց քննարկում: Դատավորների կողմից ներկայացվեցին նաև ոլորտում նկատելի խնդիրների հաղթահարման առաջարկություններ: Աշխատանքային հանդիպման ավարտին Բարձրագույն դատական խորհրդի նախագահն ու անդամները շրջայց կատարեցին Շիրակի մարզի առաջին ատյանի ընդհանուր իրավասության դատարանի Գյումրու և Մարալիկի, ինչպես նաև Արագածոտնի մարզի առաջին ատյանի ընդհանուր իրավասության դատարանի Թալինի նստավայրերում, տեղում ծանոթացան գրասենյակի, արխիվի և կարգադրիչների ծառայության աշխատանքների կազմակերպման գործընթացին:
12:07 - 27 սեպտեմբերի, 2019
Վստահորեն կարող եմ ասել, որ դատական համակարգի վրա որևէ ճնշում չկա. ԲԴԽ նախագահ |aysor.am|

Վստահորեն կարող եմ ասել, որ դատական համակարգի վրա որևէ ճնշում չկա. ԲԴԽ նախագահ |aysor.am|

aysor.am։ Հավատացեք, արվում է ամեն ինչ, որպեսզի ունենանք այնպիսի դատարան, որ մեր բնակչությունը, լսելով կամ կարդալով, որ ՀՀ որևէ դատարան որոշում է կայացրել, առանց որևէ կասկածի կամ վերապահման, ընդունի, որ դա ճշմարիտ է և համապատասխանում է իրականությանը և օրենսդրությանը, Գյումրիում այսօր լրագրողների հետ զրույցում ասաց Բարձրագույն դատական խորհրդի նախագահ Ռուբեն Վարդազարյանը։«Ես վստահաբար պնդում եմ, որ մենք ունենք նորմալ դատական համակարգ, իհարկե, թերություններով, բայց մեր դատական համակարգը բավական կայուն է։ Կան թերություններ, որոնց շտկման ուղղությամբ հիմա ակտիվ գործողություններ են կատարվում», - ասաց Ռուբեն Վարդազարյանը՝ ավելացնելով, որ վստահորեն կարող է ասել, որ դատական համակարգի վրա որևէ ճնշում չկա։ «Երբեք դատական համակարգը այսքան ազատ ու անկախ չի եղել», - ասաց ԲԴԽ նախագահը։
10:28 - 21 սեպտեմբերի, 2019
Բարձրագույն դատական խորհուրդն ընդունել է Վենետիկի հանձնաժողովի պատվիրակությանը

Բարձրագույն դատական խորհուրդն ընդունել է Վենետիկի հանձնաժողովի պատվիրակությանը

Բարձրագույն դատական խորհրդում տեղի է ունեցել հանդիպում «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) պատվիրակության ներկայացուցիչների հետ: Այս մասին հայտնեցին ՀՀ Բարձրագույն դատական խորհրդի աշխատակազմի մամուլի և հասարակայնության հետ կապերի մամուլի ծառայությունից: Պատվիրակության անդամներին՝ Գրիգորի Դիկովին, Նիկոլա Եսանուն, Յոհան Հիրշֆելդին, Մարտին Կույջերին, Լիլիթ Դանեղյանին, ընդունել են Խորհրդի նախագահ Ռուբեն Վարդազարյանը, Խորհրդի անդամներ Լիպարիտ Մելիքջանյանը, Գրիգոր Բեքմեզյանը, Անի Մխիթարյանը, Վիգեն Քոչարյանը, Հայկ Հովհաննիսյանը:Քննարկվել են Հայաստանում դատաիրավական և հակակոռուպցիոն ոլորտի բարեփոխումների իրականացման ռազմավարությանը, այդ գործընթացում Բարձրագույն դատական խորհրդի ունեցած առաքելությանը, դատաիրավական համակարգի առանցքային հարցերի շուրջ Վենետիկի հանձնաժողովի ունեցած դերին վերաբերող մի շարք հարցեր:Տեղի է ունեցել նաև մտքերի փոխանակում համագործակցության և ոլորտային այլ հարցերի շուրջ:
09:06 - 16 սեպտեմբերի, 2019
ԲԴԽ-ում տեղի է ունեցել հանդիպում Հայաստանում ԵՄ ներկայացուցիչների հետ |lragir.am|

ԲԴԽ-ում տեղի է ունեցել հանդիպում Հայաստանում ԵՄ ներկայացուցիչների հետ |lragir.am|

lragir.am:  Սեպտեմբերի 6-ին Բարձրագույն դատական խորհուրդը հյուրընկալեց Հայաստանում Եվրոպական միության պատվիրակության համագործակցության բաժնի ղեկավար Գոնզալո Սեռանոյին եւ ԵՄ միջազգային գծով օգնական Իրինա Մովսեսյանին: ԵՄ ներկայացուցիչների հետ հանդիպեցին Բարձրագույն դատական խորհրդի նախագահ Ռուբեն Վարդազարյանը, Խորհրդի անդամներ Վիգեն Քոչարյանը եւ Հայկ Հովհաննիսյանը: Հանդիպման ընթացքում քննարկվեցին արդարադատության շուրջ գործնական երկխոսության, դատաիրավական բարեփոխումների ռազմավարական ուղղությունների մշակման եւ դրանց իրագործման համար Եվրոպական միության հնարավոր ներգրավվածության եւ Խորհրդի հետ արդյունավետ համագործակցությանը վերաբերող մի շարք առանցքային հարցեր: Խորհրդի նախագահը շեշտեց, որ Բարձրագույն դատական խորհուրդը բաց է եւ պատրաստակամ դատական իշխանությանն առնչվող ցանկացած հարցի քննարկման եւ արդյունավետ համագործակցության համար: ԵՄ պատվիրակության համագործակցության բաժնի ղեկավարն իր հերթին ընդգծեց դատաիրավական բարեփոխումների իրականացման ճանապարհին Եվրոպական միության հնարավոր աջակցության եւ Խորհրդի հետ հետագա համագործակցության զարգացման պատրաստակամությունը:
15:10 - 06 սեպտեմբերի, 2019
ԲԴԽ անդամները պարտադիր անցնելու են վեթինգի գործընթաց, կարծում եմ՝ պետք է սկսել ինձնից. ԲԴԽ նախագահ |tret.am|

ԲԴԽ անդամները պարտադիր անցնելու են վեթինգի գործընթաց, կարծում եմ՝ պետք է սկսել ինձնից. ԲԴԽ նախագահ |tret.am|

tert.am։ ԲԴԽ-ում աշխատանքները կառուցողական ու դրական մթնոլորտում են ընթանում։ Այսօր լրագրողների հետ զրույցում նման տեսակետ հայտնեց Բարձրագույն դատական խորհրդի նախագահ Ռուբեն Վարդանյանը։ Նրա խոսքով՝ ԲԴԽ բոլոր անդամները զինված են համբերատարությամբ, պատրաստ են աշխատել, իրենց ցանկություններն ու կարողություններ ներդնել հանուն Հայաստանի։ «ԲԴԽ-ն ծանրաբեռնված է աշխատում, գրեթե ամեն օր քննարկումներ են լինում։ Փոփոխությունը, որ կարող եմ արձանագրել, այն է, որ այսուհետ լինելու ենք չափազանց բաց ու թափանցիկ, ցանկացած պահի պատրաստ ենք պատասխանել բոլոր լրագրողների հարցերին»,-ասաց նա։Վարդանյանը, խոսելով վեթինգի մասին, նշեց, որ ինքը ասել է ու հիմա էլ պնդում է, որ ԲԴԽ անդամներն անցնելու են բարեվարքության ստուգման գործընթացով։ «Պնդում եմ՝ ԲԴԽ անդամները պարտադիր անցնելու են բարեվարքության ստուգման գործընթաց։ Կարծում եմ՝ գործընթացը պետք սկսել ինձնից՝ որպես ԲԴԽ նախագահ, հետո ԲԴԽ անդամները, հետո՝ դատավորները»,-նշեց Ռուբեն Վարդանյանը։ԲԴԽ նախագահն անհիմն է համարում մեղադրանքները, թե այս ԲԴԽ-ն հարմար է գործող իշխանություններին։«Անհասկանալի է դա, քանի որ օրենքով է կարգավորված ԲԴԽ ձևավորման կարգը։ Եթե նկատի ունենք, որ ԲԴԽ 5 անդամներ պիտի ԱԺ-ից ընտրված լինեն, իսկ ԱԺ-մեծամասնությունը մեկ քաղաքական ուժ է, ապա կարող է ձեր ասածի մեջ ճշմարտության մեկ տոկոս լինել։ Հաշվի առնելով, որ հինգ դատավոր ընտրվում է դատավորների ընդհանուր ժողովի կողմից, կարծում եմ հավասարակշռվում է։ Միանշանակ այս ԲԴԽ-ն իշխանություններին ցանկալի չէ, ավելին ասեմ՝ ԲԴԽ-ում քննարկումների ժամանակ բազմաթիվ հարցերի վերաբերյալ նույն մոտեցում ենք ունենում»,- հավելեց Վարդանյանը։Ավելին՝ tert.am-ում
08:15 - 04 սեպտեմբերի, 2019
ԲԴԽ նախագահը հրաժարվում է կարծիք հայտնել ՍԴ-ի շուրջ խմորումների մասին |shantnews.am|

ԲԴԽ նախագահը հրաժարվում է կարծիք հայտնել ՍԴ-ի շուրջ խմորումների մասին |shantnews.am|

shantnews.am։ Լրագրողների հետ է հանդիպել ԲԴԽ նորընտիր նախագահ Ռուբեն Վարդանյանը: Նա պատասխանել է վերջին օրերին արդիական գրեթե բոլոր հարցադրումներին: Մասնավորապես, անդրադառնալով Քոչարյանի գործով դատավոր Դավիթ Գրիգորյանին քրեական հետապնդման ենթարկելու փաստին, նշեց, որ եթե ԲԴԽ-ն գտներ, որ ոտնահարում էին Գրիգորյանի անկախությունը, թույլ չէին տա: Իրականում, ըստ նրա, բավարար հիմքեր են եղել քրեական հետապնդման համար, վաղվա` 2 դատավորի դեմ դատական նիստն էլ դռնբաց է լինելու, ու, հավանաբար, արդարադատության նախարարն էլ ներկա կլինի: ԲԴԽ նախագահը նույնիսկ լրագրողներին է հրավիրել՝ վստահեցնելով՝ այսուհետ միշտ թափանցիկ են աշխատելու: ԲԴԽ-ն, սակայն, մտահոգություն հայտնել է Գրիգորյանի աշխատասենյակի խուզարկության ու այլնի հետ կապված. ավելին անել չէին կարող:Խոսելով դատարանների շրջափակումից՝ նա նշել է, որ միտինգային արդարադատությունն իր համար անընդունելի ու անհասկանալի է:Վահե Գրիգորյանի նամակի մասին ԲԴԽ ղեկավարը կարծիք չունի, ՍԴ-ի խմորումների մասին էլ սխալ է համարում այս պահին խոսելը: Այնուամենայիվ, կարծում է, որ 2 կողմն էլ փորձում են ճնշում գործադրել Քոչարյանի գործի վրա, բայց սա միայն փորձ է: Դիտարկմանը, թե նրան որակում են որպես ԱԱԾ հաճո մարդ, պատասխանում է` որպես դատավոր քննել է ոստիկանության միջնորդության գործերը, դա իր մասնագիտացումն է:
07:54 - 04 սեպտեմբերի, 2019
ԲԴԽ անդամի թափուր տեղի համար պայքարում է 5 դատավոր

ԲԴԽ անդամի թափուր տեղի համար պայքարում է 5 դատավոր

Դատավորների արտահերթ ընդհանուր ժողովի կողմից Բարձրագույն դատական խորհրդի դատավոր անդամի թափուր տեղի համար պայքարում է 5 դատավոր։ Այդ թեկնածուներն են՝ Վճռաբեկ դատարանի քաղաքացիական և վարչական պալատի դատավորներ Սուրեն Անտոնյանը, Մամիկոն Դրմեյանը, Գոռ Հակոբյանը, Ստեփան Միքայելյանը և Տիգրան Պետրոսյանը։ ««Հայաստանի Հանրապետության դատական օրենսգիրք» սահմանադրական օրենքի 76-րդ հոդվածի 4-րդ և 5-րդ մասերի կարգավորումների ուժով` Դատական դեպարտամենտի ղեկավարի կողմից սույն թվականի օգոստոսի 1-ին ծանուցագրեր են ուղարկվել Բարձրագույն դատական խորհրդի դատավոր անդամ ընտրվելու իրավունք ունեցող Վճռաբեկ դատարանի քաղաքացիական և վարչական պալատի 9 դատավորի: Վճռաբեկ դատարանի քաղաքացիական և վարչական պալատից ստացվել է Բարձրագույն դատական խորհրդի դատավոր անդամի թեկնածուների 4 դիմում՝ իրենց անունները քվեաթերթիկում չներառելու մասին: Դատական դեպարտամենտի ղեկավարի կողմից Բարձրագույն դատական խորհրդի դատավոր անդամի թափուր տեղի ընտրության քվեաթերթիկում ներառվելու է ներքոնշյալ՝ 5 դատավորի անուն։   ԲԴԽ
11:42 - 12 օգոստոսի, 2019
Դավիթ Գրիգորյանի աշխատասենյակում քննիչի կողմից կատարվել է օրենսգրքով չնախատեսված գործողություն. ԲԴԽ

Դավիթ Գրիգորյանի աշխատասենյակում քննիչի կողմից կատարվել է օրենսգրքով չնախատեսված գործողություն. ԲԴԽ

Բարձրագույն դատական խորհուրդը հաղորդագրություն է տարածել Երևան քաղաքի առաջին ատյանի ընդհանուր իրավասության դատարանի դատավոր Դավիթ Գրիգորյանի աշխատասենյակում իրականացված առգրավման, խուզարկո­ւ­թյան, ինչպես նաև աշխատասենյակի դուռը կնքելու և աշխատասենյակ մուտք գործելու հնարավորությունը սահմանափակելու իրավաչափության վերաբերյալ: «Բարձրագույն դատական խորհուրդ է դիմել Երևան քաղաքի առաջին ատյանի ընդհանուր իրավասության դատարանի դատավոր Դավիթ Գրիգորյանը՝ հայտնելով նկա­տա­­ռումներ իր աշխատասենյակում իրականացված առգրավման, խուզարկո­ւ­թյան, ինչպես նաև աշխատասենյակի դուռը կնքելու և աշխատասենյակ մուտք գործելու հնարավորությունը սահմանափակելու իրավաչափության վերաբերյալ: Նշված հարցերի կապակցությամբ պարզաբանումներ ստանալու նպատակով Խորհուրդը 23.07.2019 թ. դիմել է ՀՀ գլխավոր դատախազի պաշտոնակատարին և 26.07.2019 թ. ստացել ՀՀ գլխավոր դատախազի պաշտոնակատարի պատասխանը: Քննարկման առարկա դարձնելով ինչպես Երևան քաղաքի առաջին ատյանի ընդհանուր իրավասության դատարանի դատավոր Դավիթ Գրիգորյանի հարցադրումները, այնպես էլ ՀՀ գլխավոր դատախազի պաշտոնակատարի պարզաբանումները` Բարձրագույն դատական խորհուրդը գտնում է, որ հիշյալ քննչական գործողություններն իրականացնելիս քննիչի կողմից կատարվել է ՀՀ քրեական դատավարության օրենսգրքով չնախատեսված գործողություն, այն է՝ կնքվել է դատավոր Դ. Գրիգորյանի աշխատասենյակի մուտքի դուռը, ինչով սահմանափակվել է վերջինիս մուտքն իր աշխատասենյակ: «ՀՀ դատական օրենսգիրք» սահմանադրական օրենքի 51-րդ հոդվածի 7-րդ մասով սահմանված է, որ քրեական վարույթի շրջանակում դատավորի նկատմամբ գործողությունները կատարվում են՝ առավելագույնս ապահովելով մինչդատական քրեական վարույթի գաղտնիությունը, դատավորի հեղինակության ու անկախության նկատմամբ հարգանքը, բացառելով դատավորի գործունեությանն ուղղակի կամ անուղղակի որևէ միջամտություն: Վերոգրյալի արձանագրմամբ Բարձրագույն դատական խորհուրդն իր մտահոգությունն է հայտնել վարույթն իրականացնող մարմնի կողմից հիշյալ գործողությունն իրականացնելու կապակցությամբ և միջնորդել ձեռնարկել օրենքով սահմանված համապատասխան միջոցներ»:
09:18 - 30 հուլիսի, 2019
Այլ տարբերակ չունեն պարկեշտ դատավորներից ազատվելու. Ազարյանը՝ Դավիթ Գրիգորյանի լիազորությունների կասեցման մասին |news.am|

Այլ տարբերակ չունեն պարկեշտ դատավորներից ազատվելու. Ազարյանը՝ Դավիթ Գրիգորյանի լիազորությունների կասեցման մասին |news.am|

news.am։ Դատավոր Դավիթ Գրիգորյանի նկատմամբ իրականացվող գործընթացը նման է հաշվեհարդարի։ Նման կարծիք  հայտնեց ՀՀ Վերաքննիչ քրեական դատարանի դատավոր Ալեքսանդր Ազարյանը՝ անդրադառնալով Դավիթ Գրիգորյանի լիազորությունների կասեցմանը։ Վերջինս, հիշեցնենք այն դատավորն է, որն առաջին անգամ կալանքից ազատ արձակեց Ռոբերտ Քոչարյանին՝ արձանագրելով, որ երկրորդ նախագահն անձեռնմխելի է։ «Այն, որ դատավոր Գրիգորյանի նկատմամբ հաշվեհարդար է իրականացվում, ինձ ասել և ասում են սովորական մարդիկ, այսինքն անկողմնակալ դիտորդները»,–ասաց նա։ Ըստ Ազարյանի՝ դատավոր Գրիգորյանի լիազորությունների կասեցումը կարող է նախադեպ լինել, որպեսզի մյուս դատավորների նկատմամբ ևս ճնշումներ լինեն։«Չեմ կասկածում, որ այդպես է լինելու, իրենք այլ տարբերակ չունեն պարկեշտ դատավորներից ազատվելու»,–ասաց նա։ Հարցին, կարելի՞ է արձանագրել, որ ԲԴԽ–ն այսօր ի զորու չէ ապահովելու դատավորների անկախությունը, դատավոր Ազարյանը պատասախնեց, որ այդ մասին վաղ է խոսելը։
13:49 - 29 հուլիսի, 2019
ԲԴԽ-ն ընդունել են ՄԱԿ-ի փորձագիտական խմբին

ԲԴԽ-ն ընդունել են ՄԱԿ-ի փորձագիտական խմբին

Հուլիսի 23-ին Բարձրագույն դատական խորհրդում նորընտիր նախագահ Ռուբեն Վարդազարյանի գլխավորությամբ տեղի ունեցավ հանդիպում ՄԱԿ-ի փորձագիտական խմբի հետ, որին մասնակցում էին Խորհրդի անդամներ Վիգեն Քոչարյանը, Հայկ Հովհաննիսյանը, Դատական դեպարտամենտի ղեկավար Կարեն Փոլադյանը, Հայաստանում ՄԱԿ-ի Զարգացման ծրագրի, Մարդու իրավունքների, օրենքի գերակայության ծրագրերի պատասխանատու Մարինա Մալխասյանը, խմբի ղեկավար Ջեյսոն Գլուկը, ՄԱԿ-ի գլխավոր գրասենյակի եւ մասնագիտացված կենտրոնների ներկայացուցիչները: Հանդիպման նպատակն էր քննարկել արդարադատության ոլորտի բարեփոխումների եւ հակակոռուպցիոն ռազմավարության գործընթացի ներկա վիճակին, դատաիրավական համակարգում առկա մարտահրավերներին, արդարադատությունն արդյունավետ դարձնելու ռազմավարական ուղենիշերին առնչվող հարցերը, եւ այդ գործընթացում Խորհրդի ունեցած դերակատարությունը: Ողջունելով հյուրերին՝ Խորհրդի նախագահ Ռուբեն Վարդազարյանը նկատեց, որ ուրախ է՝ հյուրընկալելու կարեւոր առաքելությամբ Հայաստան ժամանած հյուրերին, որոնց հետ ակտիվ համագործակցությունը կարող է իր դրական ազդեցությունն ունենալ դատաիրավական բարեփոխումների այն համալիր ծրագրերի իրագործման հարցում, որոնք կարեւոր են ցանկալի դատական իշխանություն ունենալու համար: Դատական իշխանության առջեւ ծառացած մարտահրավերները չափազանց էական են զարգացման այս փուլում, եւ դրանց լուծման համար կարեւոր կլինի նաեւ միջազգային գործընկերների աջակցությունը: Նա նաեւ կարեւորեց օրենսդրական փոփոխությունների մշակման գործընթացում Խորհրդի ներգրավվածության անհրաժեշտությունը, որը գործընթացն առավել արդյունավետ կդարձնի: Խորհրդի անդամներ Հայկ Հովհաննիսյանի եւ Վիգեն Քոչարյանի մասնակցությամբ տեղի ունեցավ մտքերի փոխանակում՝ կապված դատաիրավական բարեփոխումների, դատական իշխանության արդյունավետ կառավարման, էլ-արդարադատության համակարգերի ներդրման, դատակենտրոնի ստեղծման, արխիվների թվայնացման, օրենսդրական փոփոխությունների, դատավորների թեկնածուների ընտրության գործընթացի օրենսդրական ընթացակարգերի, դատավորների գնահատման մեխանիզմների ապահովման, կարգապահական վարույթների օրենսդրական ընթացակարգերի, վեճերի լուծման այլընտրանքային մեխանիզմների հետ: Խմբի ղեկավար Ջեյսոն Գլուկը հանդիպման ավարտին շնորհակալություն հայտնեց հյուրընկալության եւ արդյունավետ քննարկման համար՝ ընդգծելով Խորհրդի կարեւոր դերակատարությունը դատաիրավական բարեփոխումների իրականացման գործում եւ իրենց պատրաստակամությունը՝ աջակցելու ոլորտում առկա խնդիրների լուծմանը: Բարձրագույն դատական խորհուրդ
07:27 - 24 հուլիսի, 2019
Դավիթ Գրիգորյանի հետ հանդիպեցինք, քննարկեցինք իր բոլոր մտահոգությունները. ԲԴԽ անդամ |aysor.am|

Դավիթ Գրիգորյանի հետ հանդիպեցինք, քննարկեցինք իր բոլոր մտահոգությունները. ԲԴԽ անդամ |aysor.am|

aysor.am։ Երևանի ընդհանուր իրավասության դատարանի դատավոր Դավիթ Գրիգորյանի հետ հանդիպեցինք, քննարկեցինք իր բոլոր մտահոգությունները, տվեցինք մեզ հուզող բոլոր հարցերը կապված և՛ իր, և՛ մեր մտահոգությունների հետ, որովհետև մենք էլ ունեինք որոշակի հարցեր, որոնք պետք է պատասխաններ ստանային, լրագորղների հետ զրույցում ասաց ԲԴԽ անդամ Գրիգոր Բեքմեզյանը։ «Հիմա դիմելու ենք գործը հսկող դատախազին, որպեսզի նրանից էլ մի քանի պարզաբանում ստանանք, որի արդյունքում կձևավորվի մեր վերջնական դիրքորոշումը, և մենք կկատարենք մեր հայատարարությունը։ Մի կողմի դիրքորոշումը մեզ համար բավարար չէ», - ասաց նա։ Հարցին՝ արդյոք Դավիթ Գրիգորյանը դժգոհե՞լ է, ԲԴԽ անդամը պատասխանեց. «Ինքը կասկածներ հայտնեց, որ այս գործը կարող է կապ ունենալ Ռոբերտ Քոչարյանի գործի հետ։ Մենք Դավիթ Գրիգորյանի բոլոր մտահոգությունները քննարկել ենք, մեզ հուզող բոլոր հարցերն իրար հետ պարզաբանել ենք։ Եվս մի քանի հարցի պարզաբանում կլինի, ամեն դեպքում այս գործին հետևում ենք և արագ կարձագանքենք»։
13:52 - 19 հուլիսի, 2019