Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։

Երևանում երթևեկության կազմակերպման փոփոխություններ կկատարվեն

Երևանում տրանսպորտային հոսքերի անցանելիությունն ավելացնելու նպատակով դեկտեմբերի 17-ից երթևեկության կազմակերպման փոփոխություններ կկատարվեն։ Երևանի քաղաքապետարանից հայտնում են, որ փոփոխություն կկատարվի Գասպարյան-Երևանյան փողոցների խաչմերուկում: Մասնավորապես՝ Երևանյան փողոցից (Իսակովի պողոտայից եկող ուղղությամբ) դեպի Գասպարյան փողոց ձախ շրջադարձը կկազմակերպվի առանձին լուսացույցով: Փոփոխություն կկատարվի նաև Դավիթ Բեկի-Հունան Ավետիսյան փողոցների խաչմերուկում: Մասնավորապես՝ Դավիթ Բեկի փողոցում (Էրեբունի վարչական շրջանից եկող ուղղությամբ) հետադարձը կկազմակերպվի առանձին լուսացույցով: Երթևեկության կազմակերպման փոփոխություն կկատարվի նաև Հանրապետության փողոցում: Մասնավորապես՝ Հանրապետության փողոցում երթևեկությունը կկազմակերպվի 2 երթևեկելի գոտիներով` նախկին 3-ի փոխարեն:

19:23 - 16 դեկտեմբերի, 2024

Դիսպետչերական կետերը կվերանան, կներդրվի կառավարման մեկ կենտրոն. Երևանի քաղաքապետ |armenpress.am|

armenpress.am: Երևանի քաղաքապետարանում կայացած գործակարգավարական նիստի ընթացքում քաղաքապետ Տիգրան Ավինյանը ներկայացրեց մայրաքաղաքի տրանսպորտային համակարգի բարելավման ծրագրերի ուղղությունները՝ ընդգծելով «Երևանտրանս» ընկերությունում և քաղաքի տրանսպորտային հոսքերի կառավարման մեջ նախատեսվող փոփոխությունները։ Քաղաքապետը նշեց, որ «Երևանտրանս»-ում ավանդույթային դիսպետչերական կետերը պետք է վերանան՝ փոխարինվելով GPS համակարգի վրա հիմնված վերահսկողությամբ։ «Մեր ավտոբուսների վրա տեղադրված GPS համակարգը թույլ է տալիս արդյունավետորեն հավաքագրել և համակարգել տրանսպորտային տվյալները։ Պետք է այս ամբողջ տեղեկատվությունը կենտրոնացնել մեկ սենյակում՝ ապահովելով ամբողջական վերահսկողություն և արդյունավետ կառավարում»,- ընդգծեց Ավինյանը։ Քաղաքապետի խոսքով՝ կարևորագույն նախաձեռնություններից մեկն է տրանսպորտային հոսքերի կառավարման կենտրոնի ստեղծումը, որն ուղղված է ամբողջական լուսացուցային համակարգի արդիականացմանը և խցանումների նվազեցմանը։ «Կարծում եմ՝ սա մեր առաջնային խնդիրներից է և չի վերաբերվում միայն հանրային տրանսպորտին, այլ վերաբերվում է ամբողջական լուսացուցային նոր համակարգի ներդրմանը։ Համենայնդեպս, հաջորդ տարի պետք է սկսենք դա իրականացնել։ Նախաձեռնությունը վերաբերվում է ընդհանուր հոսքերի գրագետ և խելացի կառավարմանը, որը մեր քաղաքը վստահորեն ունի։ Այսինքն՝ լուսացույցերի ավելի ստատիկ մոդելից պետք է անցնենք ավելի դինամիկ մոդելի, երբ լուսացույցը տարբեր ժամերին տարբեր ժամանակ է պահում՝ ըստ իրավիճակի և ըստ հաշվարկների։ Կարծում եմ, որ սա է լինելու հաջորդ տարվա մեր ամենամեծ խնդիրը, որի արդյունքում մենք պետք է արձանագրենք Երևան քաղաքում ընդհանուր տրանսպորտային հոսքերի հետ, խցանումների հետ կապված բարելավում»,- նշեց քաղաքապետը։

12:22 - 16 դեկտեմբերի, 2024

Մյասնիկյան պողոտային և Լվովյան փողոցին հարող շուրջ 30 հա տարածքում կհիմնվի քաղաքային նոր այգի

Երևանի քաղաքապետարանից տեղեկացնում են, որ Մյասնիկյան պողոտային և Լվովյան փողոցին հարող շուրջ 30 հա տարածքում կհիմնվի քաղաքային նոր այգի: Զավթված հողակտորների մի մասը վերադարձվել է համայնքին, որոշ հողակտորների ուղղությամբ աշխատանքները կշարունակվեն հաջորդ տարի: Այն կլինի հինգերորդ քաղաքային ուրբան-անտառը և իր մակերեսով ամենամեծը: Հանգստի գոտին կունենա հեծանվաուղի, մարզական հատված, արհեստական լճակ, ամֆիթատրոն, էկո սրճարան:

12:20 - 16 դեկտեմբերի, 2024

Հիմա սա է ամենակարևորը. Ավինյանը հանձնարարեց կենտրոնանալ վալիդատորների միջոցով վճարային համակարգի նախապատրաստման վրա |1lurer.am|

1lurer.am: Երկշաբաթյա ժամանակահատվածում քաղաքային էլեկտրատրանսպորտի ծառայությունից օգտվել է 376.224 ուղևոր, նրանցից 24.188-ը՝ 6,64 տոկոսը, վճարումը կատարել է վալիդատորի վավերացնող սարքի միջոցով: Այդ մասին զեկուցվեց Երևանի քաղաքապետարանի՝ դեկտեմբերի 16-ի գործակարգավարական խորհրդակցության ժամանակ: Քաղաքապետ Տիգրան Ավինյանն արձագանքեց՝ տոկոսի հետ կապված խնդիրը մեծ է, և մինչև հունվարի 1-ը անցումը պետք է մեղմ իրականացնել, ուստի ակնկալում է, որ իրավիճակի լուծման համար առաջարկներ ներկայացվեն, քանի որ հունվարից մեծ թվով մարդիկ միանգամից անցում են կատարելու ամբողջապես նոր համակարգի: «Խոսքն այն մասին է, որ 6 տոկոսն օգտվում է այս համակարգից էլեկտրատրանսպորտում, 94 տոկոսը դեռևս կոպեկով է օգտվում, և այս 94 տոկոսը պետք է անցում կատարի նոր համակարգի: Կամ 36 տոկոսը «Երևանի ավտոբուս» ՓԲԸ-ում օգտվում է համակարգից, դա նշանակում է, որ 64 տոկոսը դեռ 100 դրամից է օգտվում, և 64 տոկոսը ամբողջապես պետք է անցում կատարի նոր համակարգի: Սրանք լուրջ թվեր են: Մետրոպոլիտենում արդեն անցում ենք կատարել, 100 տոկոսն է օգտվում համակարգից, բայց այս դեպքում էլ որոշ տուրբուլենտ դժվարություններով հասանք այդտեղ: Այնուամենայնիվ, այնտեղ ունենք անցարգելներ, որոնք այլընտրանք թույլ չեն տալիս»,- ասաց նա: Տիգրան Ավինյանը նաև հիշեցրեց՝ կա մոտ 15 օր աշխատանքն իրականացնելու համար, ապա հանձնարարեց. «Խնդրում եմ՝ բոլորը կենտրոնանան սրա վրա, հիմա սա է ամենակարևորը, և այս աշխատանքը պետք է իրականացնենք մինչև նոր տարի»:

11:51 - 16 դեկտեմբերի, 2024

Մեր հետագա քայլերը պետք է լինեն այն ուղղությամբ, որ սկսենք լուծել ծայրահեղ ծանր գծերի հարցերը. Ավինյանը՝ հանրային տրանսպորտի մասին |1lurer.am|

1lurer.am: Հիմնական խնդիրը, որ բարձրաձայնվում է, մնում է ավտոբուսների հաճախականությունը, կան նաև գծեր, որոնք գերծանրաբեռնված են: Այդ մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը՝ անդրադառնալով մայրաքաղաքի տրանսպորտի համակարգին: «Ունենք թաղամասեր, որտեղ իրապես վատացել է իրավիճակը, մասնավորապես՝ Նորագավիթում: Կարծում եմ՝ մեր հետագա քայլերը պետք է լինեն այն ուղղությամբ, որ մենք սկսենք լուծել ծայրահեղ ծանր գծերի հարցերը»,- ասաց քաղաքապետը: Ըստ քաղաքապետի՝ նաև 171 նոր ավտոբուսների հետ կապված՝ կա փոխարինման խնդիր, մասնավոր ավտոբուսները, որոնք շարքից դուրս են եկել, դրանք ևս պետք է փոխարինվեն: «Կան թաղամասեր, որտեղ խնդիրը սուր է կանգնած, և այդ թաղամասերի խնդիրը լուծելու համար մենք մի փոքր ավելի ջանք պետք է գործադրենք, նույնիսկ հաջորդ տարի էլի միջանկյալ լուծումներ պետք է գտնենք՝ մինչև 250 հատ 18 մետրանոց ավտոբուսների գնում»,- ասաց նա և հավելեց, որ այս պահին աշխատում են այն ուղղությամբ, որ Երևանում ավտոմեքենաների հոսքը նվազի, իսկ հանրային տրանսպորտից օգտվողների թիվն ավելանա։ «Դա նշանակում է, որ մենք պատշաճ մակարդակի ծառայություն պետք է մատուցենք: 171 նոր ավտոբուսները այդ հարցում, վստահորեն, մեզ օգնելու են, այս տարվա 15 նոր տրոլեյբուսները, վստահորեն, մեզ օգնելու են, մյուս տարվա 15 նոր տրոլեյբուսները, վստահորեն, մեզ օգնելու են, բայց դեռ ունենք կոնկրետ հարցեր, որոնք պետք է լուծումներ ստանան»,- ասաց նա՝ խնդրելով առաջարկներ ներկայացնել։

11:04 - 16 դեկտեմբերի, 2024

Երևանի օդի որակի բարելավման ուղղությամբ նոր ծրագիր կմշակվի |civilnet.am|

civilnet.am: Դեկտեմբերի 16-ին Երևանի քաղաքապետարանի գործակարգավարական նիստի ընթացքում քննարկվեց մայրաքաղաքի օդի աղտոտվածության խնդիրը։ Քաղաքապետ Տիգրան Ավինյանը ներկայացրեց արդեն իրականացված ծրագրերը և առաջարկեց նոր նախաձեռնություններ՝ ուղղված օդի որակի բարելավմանը։ Ավինյանը նախ տեղեկացրեց, որ քաղաքում տեղադրվել է 149 օդի որակի չափիչ սարքեր։ Այդ սարքերն առցանց ռեժիմով տրամադրում են տեղեկատվություն օդի որակի մասին։ Քաղաքապետի խոսքով՝ այդ տվյալները հատկապես ձմռան ամիսներին տեղ-տեղ մտահոգիչ են, սակայն քաղաքապետարանը պատրաստ է քայլեր ձեռնարկել իրավիճակը վերահսկելու և բարելավելու համար։ Քաղաքապետարանի բնապահպանության վարչության պետի տեղակալ Գորիկ Ավետիսյանը հայտնեց, որ ձմռան ամիսներին աղտոտվածության մակարդակը գերազանցում է նորմաները՝ օդափոխության նվազման պատճառով։ «Ուրախալի է, որ նոր աղտոտվածություն չի ավելանում, և եղած աղտոտվածությունը ժամանակի ընթացքում ցրվում է»,- ասաց նա։ Տիգրան Ավինյանը նրան առաջարկեց նոր ծրագիր ներկայացնել, որը կներառի ինչպես ծառատունկն ու անտառատունկը, այնպես էլ ժամկետանց ավտոմեքենաների շահագործման արգելքը։ «Այս ծրագիրը կներկայացնենք երկու ամիս հետո և կանդրադառնանք բոլոր հնարավոր ոլորտներին, որտեղ քաղաքապետարանը լիազորություններ ունի»,- նշեց քաղաքապետը։ Նախորդ շաբաթ քաղաքացիները սոցիալական ցանցերում բարձրաձայնել էին Երևանում օդի աղտոտվածության խնդիրը։ Ըստ օդի աղտոտվածության մոնիթորինգի ցուցանիշների՝ մայրաքաղաքում օդի աղտոտվածությունը 5-7 անգամ գերազանցում է համաշխարհային առողջապահական չափանիշները։

10:50 - 16 դեկտեմբերի, 2024

Դեկտեմբերի 20-ին կթողարկվի կոմպոզիտոր Տիգրան Մանսուրյանի կինոերաժշտությունների ալբոմը

Դեկտեմբերի 20-ին կթողարկվի հայ մեծանուն կոմպոզիտոր Տիգրան Մանսուրյանի կինոերաժշտությունների ալբոմը` Հայաստանի պետական սիմֆոնիկ նվագախմբի կատարմամբ` Սերգեյ Սմբատյանի ղեկավարությամբ: Այս մասին հայտնում են Երևանի քաղաքապետարանից։ Մանսուրյանական սիրված ստեղծագործությունների ձայնագրությունն ու ալբոմի թողարկումն իրականացվել է Երևանի քաղաքապետարանի աջակցությամբ` կոմպոզիտորի ծննդյան 85-ամյակին նվիրված միջոցառումների շրջանակում: Այն հասանելի կլինի բոլոր առաջատար հարթակներում (Spotify, Apple Music, Amazon Music, YouTube և այլ)։

14:25 - 14 դեկտեմբերի, 2024

«Երևանի ավտոբուս» ՓԲԸ-ն կներկրի Euro 5 բնապահպանական ստանդարտին համապատասխան միջին դասի 171 ավտոբուս |1lurer.am|

1lurer.am: «Երևանի ավտոբուս» ընկերությունը մայրաքաղաքի բնակչության կանոնավոր տրանսպորտային սպասարկումն ապահովելու համար նախատեսում է շարունակել ավտոբուսային երթուղիների շահագործման աշխատանքների կազմակերպումը քաղաքային նշանակության նոր ներկրվող թվով 171 ավտոբուսներով՝ Երևանի հանրային տրանսպորտի նոր երթուղային ցանցի ներդրման գործընթացի շրջանակներում։ Նախատեսվում է ներկրել Zhongtong bus LCK6860HGN մակնիշի Euro 5 բնապահպանական ստանդարտի, 4*2 անիվների դասավորությամբ, քաղաքային կոնֆիգուրացիայի, հաշմանդամություն ունեցող անձանց սպասարկման համար հարմարեցված, առնվազն 22+1 նստատեղերի առկայությամբ և 38 կանգնած ուղևորների տեղափոխման հնարավորությամբ թվով միջին դասի 171 ավտոբուս, ինչը թույլ կտա քաղաքային տրանսպորտի թվով 67 ավտոբուսային երթուղիները համալրել նոր շարժակազմով և ավելացնել ավտոբուսային երթուղիների քանակը ևս 8-ով, միաժամանակ՝ ուղևորափոխադրումների ծավալն ավելացնելով շուրջ 20.4 մլն ուղևորով: Ծրագրի շրջանակում նախատեսվում է իրականացնել 6․3 մլրդ դրամի ներդրում ավտոբուսների ձեռքբերման համար։ Ներկայումս առկա է 1433 աշխատատեղ 391 հազար դրամ միջին ամսական աշխատավարձով, մինչև 2026 թ. նախատեսվում է աշխատատեղերի թվաքանակը հասցնել մինչև 1878-ի՝ 407 հազ. դրամ միջին ամսական աշխատավարձով։ Արտոնություն ստանալու համար ներկայացված ապրանքների արժեքը կազմում է 6.3 մլրդ դրամ: Մաքսատուրքից ազատման արտոնությունը գնահատվում է 945 մլն դրամ:

21:17 - 12 դեկտեմբերի, 2024

Երևանի Բագրևանդի և Նելսոն Ստեփանյան փողոցների խաչմերուկում երթևեկությունը կկարգավորվի լուսացույցներով

Մայրաքաղաքում տրանսպորտային հոսքերի անցանելիությունն ավելացնելու նպատակով դեկտեմբերի 12-ից Բագրևանդի և Նելսոն Ստեփանյան փողոցների խաչմերուկում երթևեկությունը կկարգավորվի լուսացույցներով: Այս մասին տեղեկացնում են Երևանի քաղաքապետարանից։

18:44 - 11 դեկտեմբերի, 2024

ԿԸՀ-ն ավագանու անդամ Արեգ Գևորգյանի մանդատը տրամադրել է ՔՊ ցուցակի հաջորդ թեկնածու Աշոտ Սարգսյանին

ՀՀ կենտրոնական ընտրական հանձնաժողովը դեկտեմբերի 10-ին ստացել է Երևանի ավագանու անդամ Արեգ Գևորգյանի՝ ավագանու անդամի լիազորությունները վաղաժամկետ դադարեցնելու վերաբերյալ Երևանի քաղաքապետի արձանագրությունը։ ԿԸՀ-ն դեկտեմբերի 11-ի հերթական նիստում Երևանի ավագանու «Քաղաքացիական պայմանագիր» կուսակցության ընտրական ցուցակից ընտրված և լիազորությունները վաղաժամկետ դադարած ավագանու անդամի մանդատը տրամադրել է նույն կուսակցության ընտրական ցուցակի հերթական հաջորդ թեկնածու Աշոտ Արտյուշայի Սարգսյանին։

16:09 - 11 դեկտեմբերի, 2024

Հասարակական տրանսպորտի բնականոն աշխատանքը վերականգնվել է. Երևանի քաղաքապետարան

Հասարակական տրանսպորտի բնականոն աշխատանքը վերականգնվել է. շարժակազմները դուրս են եկել երթուղիներ։ Այս մասին հայտնում են Երևանի քաղաքապետարանից։ Դեկտեմբերի 3-ի առավոտյան «Երևանի ավտոբուս» ՓԲԸ-ի մեծ թվով վարորդներ հրաժարվել են դուրս գալ երթուղիներ։ Վարորդները հայտարարել էին, որ իրենք վճարային նոր համակարգին դեմ չեն և սաբոտաժ չեն անում, պարզապես ցանկանում են պայմաններ՝ մեքենաները լվանալու, լվացման կետերի հերթերից ազատվելու, պահանջում են ժամավճարով աշխատանքի դեպքում վճարի բարձրացում, աշխատավարձերի բարձրացում, զուգարաններ: Վերջիններիս գործադուլին արձագանքելով՝ քաղաքապետարանը հայտնել էր, որ նրանց գործողություններին գնահատական է տրվելու աշխատանքային օրենսդրության շրջանակներում։ Փոխքաղաքապետն էլ հայտնել է, որ գործադուլի հարցով հանցագործության մասին հաղորդում է ներկայացրել Դատախազություն:

09:27 - 04 դեկտեմբերի, 2024

Սա շանտաժի մեթոդ է, որովհետև բոլոր թեմաներով, որոնցով խնդիրներ են բարձրաձայնվում, իրականացվում են աշխատանքներ․ Ավինյանը՝ վարորդների գործադուլի մասին

Սա շանտաժի մեթոդ է, որովհետև բոլոր թեմաներով, որոնցով խնդիրներ են բարձրաձայնվում, իրականացվում են աշխատանքներ։ Այս մասին Հանրային հեռուստաընկերության եթերում հայտնեց Երևանի քաղաքապետ Տիգրան Ավինյանը։ «Որոշ խնդիրներ առհասարակ լուծվել են, որոշները լուծման ընթացքում են։ Կա շատ կարևոր փոփոխություն, որը տեղի է ունեցել նոյեմբերի 1-ից՝ այլևս կանխիկ գործարք ավտոբուսում տեղի չի ունենում։ Սրանով է այս ամենը պայմանավորված։ Ես վստահաբար կարող եմ ասել, որ վաղը ավտոբուսները աշխատելու են Երևանում, հաճախականության խնդիր կարող է ունենանք, բայց եթե պետք լինի մենք անձնապես կգնանք, կնստենք մեքենաները և կտեղափոխենք ուղևորներին, մարդկանց էլ կոչ կանենք տեղափոխել ուղևորներին»,-ասաց Ավինյանը:

22:59 - 03 դեկտեմբերի, 2024

Եթե վարորդները գնան աշխատանքի, ազատվածների հարցը կվերանայվի. ինչ են ասել վարորդներին

Ակցիա իրականացնող վարորդներից մի քանիսը հանդիպել են «Երեւանի ավտոբուս» ընկերության տնօրենի հետ։ Հանդիպմանը մասնակցած, աշխատանքից ազատված վարորդներից մեկը հայտնեց, որ այսօր աշխատանքից 35 վարորդ է ազատվել: «Մեզ ասել են, որ եթե մյուս վարորդները վերադառնան աշխատանքի, մեր հարցը վաղը կվերանայեն: Մենք հորդորել ենք մեր գործընկեր վարորդներին, որ վաղը դուրս գան աշխատանքի, իսկ երեկոյան կհասկանանք մեր հարցը վերանայել են, թե ոչ։ Դեռ չգիտենք՝ վաղը ինչ ենք անելու, կքննարկենք»,-ասաց նա: Բողոքի ակիցայի մասնակիցներից մեկը հայտնեց, որ նաև գրավոր են ներկայացրել իրենց պահանջները։

20:07 - 03 դեկտեմբերի, 2024

Երևանի Տիգրան Պետրոսյան փողոցում կկատարվի երթևեկության կազմակերպման փոփոխություն

Մայրաքաղաքում տրանսպորտային հոսքերի անցանելիությունն ավելացնելու նպատակով Տիգրան Պետրոսյան փողոցում դեկտեմբերի 5-ից կկատարվի երթևեկության կազմակերպման փոփոխություն։ Այս մասին հայտնում են Երևանի քաղաքապետարանից: Սասնա Ծռեր փողոցի շրջանաձև խաչմերուկից դեպի Եղվարդի խճուղի ուղղությամբ երթևեկությունը կկազմակերպվի երկու երթևեկելի գոտիներով, իսկ հանդիպակաց ուղղությունը՝ մեկ երթևեկելի գոտիով: Բացի այդ, Տիգրան Պետրոսյան-Փիրումյանների խաչմերուկում, Տիգրան Պետրոսյան փողոցից դեպի Եղվարդի խճուղի ձախ շրջադարձի համար կառանձնացվի գոտի:

18:21 - 03 դեկտեմբերի, 2024

Ավտոբուսի վարորդների աշխատանքային իրավունքներին առնչվող խնդիրները մշտադիտարկում է ՄԻՊ աշխատակազմը

Մարդու իրավունքների պաշտպան Անահիտ Մանասյանի հանձնարարությամբ՝ աշխատակազմում վաղ առավոտից իրականացվում են զանգվածային լրատվության միջոցների և սոցիալական մեդիայի մշտադիտարկման աշխատանքներ՝ Երևանում ավտոբուսի վարորդների աշխատանքային իրավունքների ապահովման հետ կապված խնդիրներն արձանագրելու և օպերատիվ հասցեագրումն ապահովելու նպատակով: «Պաշտպանի աշխատակազմում ուսումնասիրվում և վերլուծության են ենթարկվում նաև աշխատանքային հարաբերությունների կողմերի իրավունքներին և պարտականություններին առնչվող առկա փաստերը՝ միջազգային և ներպետական չափանիշների տեսանկյունից։ Պաշտպանը հարկ է համարում նաև ընդգծել, որ բոլոր դեպքերում գործատուների ջանքերը պետք է նպատակաուղղված լինեն յուրաքանչյուր աշխատողի համար աշխատանքի արդարացի պայմանների իրավունքի ապահովմանը (ներառյալ` հիգիենայի պահանջները բավարարող պայմանները, հանգստի իրավունքը և այլն), յուրաքանչյուր աշխատողի` ամբողջությամբ աշխատանքի արդարացի վարձատրության իրավունքի ապահովմանը։ Մշտադիտարկման աշխատանքների արդյունքում վերհանված խնդիրների քննարկման ու դրանց լուծման համար անհրաժեշտ ուղիների նախանշման նպատակով Պաշտպանը կդիմի իրավասու մարմիններին։ Մարդու իրավունքների պաշտպանի «Թեժ գիծ» հեռախոսահամարներն են՝ 116, (096) 116-100»,- ասված է հաղորդագրության մեջ: Ավելի վաղ Երևանի քաղաքապետի մամուլի խոսնակ Հայկ Կոստանյանը տեղեկացրել էր, որ հասարակական տրանսպորտի վարորդների կողմից իրականացված գործադուլի հետևանքով 18 վարորդ ազատվել է աշխատանքից։ Երևանի քաղաքապետարանը անդրադարձել էր վարորդների գործադուլին՝ նշելով, որ գործողություններին գնահատական է տրվելու աշխատանքային օրենսդրության շրջանակներում:

17:52 - 03 դեկտեմբերի, 2024

Սուրեն Գրիգորյանը գործադուլի հարցով հանցագործության մասին հաղորդում է ներկայացրել Դատախազություն

Երևանի փոխքաղաքապետ Սուրեն Գրիգորյանը գործադուլի հարցով հանցագործության մասին հաղորդում է ներկայացրել Դատախազություն: «Հանցագործության մասին հաղորդում եմ ներկայացրել ՀՀ գլխավոր դատախազին, որ նախաքննություն իրականացվի ու պարզվի՝ արդյո՞ք գործ ունենք աշխատանքային պարտականությունների չկատարման հետ, որն առաջացնում է որոշակի հետևանքներ, թե՞ առնվազն առանձին անձանց մասով գործ ունենք երևույթի հետ, որ իրենց հակաօրինական վարքագիծը հատել է ոչ միայն աշխատանքային օրենսդրությամբ իրենց պարտականությունների սահմանը, այլ նաև քրեական օրենսդրության սահմանը: Ես չեմ բացառում, որ նաև այդ արարքների մեջ կան քրեաիրավական գնահատականի արժանի տարրեր»,- ասաց Գրիգորյանը: Նա նաև հավելեց, որ աշխատանքային խնդիրները բարձրաձայնելու կերպեր կան, չի կարելի դա հանրության հաշվին անել. «Եվ մենք մեզնից կախված գործիքակազմը կիրառելու ենք, որ նախ այս իրավիճակը հնարավորինս շուտ լուծվի և կանխենք հետագայում անգամ որևէ միտք, որ կարելի է նման իրավիճակ նորից ստեղծել»:

14:01 - 03 դեկտեմբերի, 2024