Հայաստան

ՀԱՊԿ-ը կվերանայի 2024-ի բյուջեն, քանի որ ՀՀ-ն հրաժարվում է վճարել հաշվարկված վճարը․ ՌԴ ԱԳՆ
 |tert.am|

ՀԱՊԿ-ը կվերանայի 2024-ի բյուջեն, քանի որ ՀՀ-ն հրաժարվում է վճարել հաշվարկված վճարը․ ՌԴ ԱԳՆ |tert.am|

tert.am: Հաշվի առնելով, որ Հայաստանի ղեկավարությունը հրաժարվել է վճարել հաշվարկված վճարը, հարկավոր է ՀԱՊԿ-ի ընթացիկ տարվա բյուջեի ճշգրտում անել։ Այս մասին ՌԻԱ Նովոստիին հայտնել են ՌԴ ԱԳՆ-ից: «Այժմ մշակվում է Հավաքական անվտանգության խորհրդի որոշման համապատասխան նախագիծը»,– նշել են ՌԴ արտաքին քաղաքական գերատեսչությունում՝ հավելելով, որ ներդրումների վերաբաշխման մասին խոսք չկա։ Գերատեսչությունում պարզաբանել են, որ ՀԱՊԿ քարտուղարությունը և ՀԱՊԿ միացյալ շտաբը կրճատել են ծախսային մասը Երևանի կողմից իր աշխատակիցներին քվոտային պաշտոններում չնշանակելու հաշվին: Քարտուղարությունը նաև կօգտագործի առկա պահուստները՝ աշխատանքը բնականոն ռեժիմով շարունակելու համար։ «Ամեն դեպքում մենք ելնում ենք նրանից, որ Երևանը պարտավոր է կատարել ֆինանսական պահանջները՝ համաձայն Կազմակերպության կանոնադրության և ՀԱՊԿ անդամ երկրների ղեկավարների կողմից հաստատված այլ փաստաթղթերի»,- նշել են ՌԴ ԱԳՆ-ից։  ՌԴ ԱԳՆ-ում ընդգծել են, որ միջազգային կազմակերպությունների ֆինանսական կարգապահությունը պահպանվում է անկախ կողմերից մեկի՝ անդամակցությունը կասեցնելու կամ դադարեցնելու ցանկությունից: Հիշեցնենք, որ ավելի վաղ ՀՀ ԱԳՆ մամուլի քարտուղար Անի Բադալյանը հայտարարել էր, որ Երևանը մտադիր է ձեռնպահ մնալ ՀԱՊԿ Հավաքական անվտանգության խորհրդի 2023 թվականի նոյեմբերի 23-ի «ՀԱՊԿ 2024 թվականի բյուջեի մասին» որոշմանը միանալուց և կազմակերպության գործունեության ֆինանսավորմանը մասնակցելուց:
09:44 - 10 հունիսի, 2024
Հայաստանի հավաքականը 2։1 հաշվով հաղթեց Ղազախստանի ընտրանուն
 |tert.am|

Հայաստանի հավաքականը 2։1 հաշվով հաղթեց Ղազախստանի ընտրանուն |tert.am|

tert.am: Վ. Սարգսյանի անվան «Հանրապետական» մարզադաշտում տեղի է ունեցել  Հայաստան- Ղազախստան ընկերական խաղ։ Հայաստանի հավաքականը 2։1 հաշվով հաղթել է Ղազախստանի ընտրանուն։ Հանդիպման հաշիվը խաղի 4-րդ րոպեին բացվել է ինքնագոլի արդյունքում: Էդուարդ Սպերցյանի և Նաիր Թիկնիզյանի գերազանց կոմբինացիայի արդյունքում վերջինս գնդակը ձախ եզրից ուղարկել է կենտրոն, որտեղ Արթուր Միրանյանի հետ պայքարում Ղազախստանի հավաքականի պաշտպան Ալեքսանդր Մարոչկինը գնդակն ուղարկել է սեփական դարպասը: Հանդիպման 58-րդ րոպեին Հայաստանի ազգային թիմի առավելությունն ընկերական խաղում կրկնապատկել է Վահան Բիչախչյանը՝ դառնալով գեղեցիկ գոլի հեղինակ: Վարազդատ Հարոյանի՝ խորքից կատարած փայլուն փոխանցումից հետո գնդակն աջ եզրում ստացավ Էդգար Սևիկյանն ու այն ուղարկեց կենտրոն, որտեղ Բիչախչյանը գեղեցիկ հարվածով գրավեց մրցակցի դարպասը: Հանդիպման վերջին րոպեին Ղազախստանի հավաքականը մեկ գնդակ ետ է բերել: Սերգեյ Մուրադյանի՝ ձեռքով խաղի համար նշանակված 11-մետրանոցն անվերպ է իրացրել թիմի հարձակվող Բաուրժան Իսլամխան:
22:12 - 07 հունիսի, 2024
Ալեն Սիմոնյանը հայտարարել է, որ Հայաստանից ոչ մի պատվիրակություն Ուկրաինա չի մեկնել
 |armenpress.am|

Ալեն Սիմոնյանը հայտարարել է, որ Հայաստանից ոչ մի պատվիրակություն Ուկրաինա չի մեկնել |armenpress.am|

armenpress.am: Հայաստանի Հանրապետության Ազգային ժողովի նախագահ Ալեն Սիմոնյանն, անդրադառնալով նրան, որ Ռուսաստանի ԱԳՆ ներկայացուցիչ Մարիա Զախարովան կոչ է արել հայ խորհրդարանականներին ներկայացնել Բուչայում իբր սպանվածների ցուցակը, որը նրանց է փոխանցել Կիևը, հայտարարեց, որ Հայաստանից ոչ մի պատվիրակություն չի գնացել Ուկրաինա։ «Արմենպրես»-ի հաղորդմամբ՝ այս մասին ՀՀ ԱԺ նախագահը հայտարարեց լրագրողների հետ ճեպազրույցի ընթացում՝ ընդգծելով, որ չի մեկնաբանում Մարիա Զախարովային։ «Ասել է նաեւ, որ ինչ-որ պատվիրակություն է գնացել Ուկրաինա: Ոչ մի պատվիրակություն չի գնացել Հայաստանից, բայց կարող եմ տիկին Զախարովային կամ ԱԳՆ-ին խնդրել, որ իմ լրատվականը կամ իմ օգնականը փոխանցի, օրինակ, ԼՂ-ում վերջին ռազմական գործողությունների ժամանակ 200-ից ավելի մահացած հայերի անունը: Կարող եմ 100 հազարից ավելի փախստականների անունները փոխանցել տամ, եթե իրենց հետաքրքիր է, այն տարածքում, որտեղ իրենք խաղաղապահ գործունեություն էին ծավալում»,- ասաց Սիմոնյանը։ Նա նշեց, որ արդեն գործելաոճ դարձած աբսուրդներ ու ստեր չի մեկնաբանում։ «Նա ուղղակի սուտ է խոսում»,- ասաց Ալեն Սիմոնյանն՝ անդրադառնալով Մարիա Զախարովայի ենթադրություններին։ Դիտարկմանը, որ Նոր Նորքի թաղապետն էր մեկնել Ուկրաինա, Ալեն Սիմոնյանը նշեց, որ կփոխանցի Նոր Նորքի թաղապետարանին, Նոր Նորքի թաղապետարանը պաշտոնապես կպատասխանի Ռուսաստանի ԱԳՆ ներկայացուցչությանը: «Ես խոսք եմ տալիս, որ թաղապետարանը կպատասխանի կամ կգրի: Կարող է մեր հարեւանի ամուսինն էլ է գնացել Ուկրաինա: Չի կարող որեւէ պատգամավոր տեղ գնա ու որեւէ մեկը դրա մասին չիմանա, էլ չեմ ասում պատգամավորական խումբ: Սուտ է, ստեր»,- եզրափակեց ԱԺ նախագահը։
19:17 - 07 հունիսի, 2024
Հերիք եղավ մեզ սպառնան. Սիմոնյանը՝ Գալուզինի հայտարարությունների մասին
 |azatutyun.am|

Հերիք եղավ մեզ սպառնան. Սիմոնյանը՝ Գալուզինի հայտարարությունների մասին |azatutyun.am|

azatutyun.am: Ազգային ժողովի նախագահ Ալեն Սիմոնյանն աբսուրդ է որակում Մոսկվայից հնչած հերթական հայտարարությունը, որ եթե Հայաստանը անվտանգությանը վերաբերող զգայուն տեղեկատվությունը հասանելի դարձնի արևմտյան պետություններին, դա կարող է անդառնալի հարված հասցնել Ռուսաստանի հետ հարաբերություններին: «Նախ խնդրում եմ դադարել մեզ սպառնալ, հերիք եղավ մեզ սպառնան, երկրորդը՝ հերիք եղավ ՀԱՊԿ-ի մասին խոսել, երբ որ ՀԱՊԿ-ի մասին խոսում են, ՀԱՊԿ-ի մասին խոսելիս թող գան, ասեն՝ ՀԱՊԿ-ի սահմանը որտեղով է անցնում ու ինչ պարտավորություններ ունեն թե՛ որպես ՀԱՊԿ գործընկեր, թե՛ որպես Հայաստան-Ռուսաստան պայմանագրի կողմ։ Հերիք են մեր ինքնիշխան տարածքի հետ կապված նման հայտարարությունները», - այսօր լրագրողների հետ ճեպազրույցում ասաց խորհրդարանի ղեկավարը։ Ռուսաստանի ԱԳ փոխնախարար Միխայիլ Գալուզինը, մասնավորապես, զգուշացրել էր, թե «Հայաստանի չմտածված քայլերը, որոնք արևմտյան երկրների համար կապահովեն ազգային տվյալների բազաներ և երկրի անվտանգության համար զգայուն տեղեկությունների ամբողջական հասանելիություն, ոչ միայն սպառնում են պետության ինքնիշխանությանը, այլև կարող են օբյեկտիվորեն անհնար դարձնել Ռուսաստանի և ՀԱՊԿ-ում այլ դաշնակիցների հետ միասնական պաշտպանական տարածքի կառուցման համատեղ աշխատանքին վերադառնալը»: Հայաստանը որևէ երկրի հետ բանակցություն չի վարում, չի քննարկում որևէ ռազմաբազա տեղադրելու կամ ռազմավարական որևէ ալյանսի միանալու վերաբերյալ հարց, հավելեց Ալեն Սիմոնյանը. - «Ի՞նչ տեղեկություններ պետք է հասցնենք։ Աբսուրդ է։ Հերիք է մեզ հետ կապված նման հռետորաբանությամբ խոսել, հերիք է մեզ սպառնալ ուղիղ և անուղղակի»։
18:45 - 07 հունիսի, 2024
ՀՀ-ն չունի տարածքային պահանջներ իր որևէ հարևանից, այդ թվում՝ Ադրբեջանից․ ԱԳՆ

ՀՀ-ն չունի տարածքային պահանջներ իր որևէ հարևանից, այդ թվում՝ Ադրբեջանից․ ԱԳՆ

ՀՀ ԱԳՆ հայտարարություն է տարածել Ադրբեջանի նախագահի՝ 2024թ. հունիսի 6-ին արած հայտարարությունների վերաբերյալ։ «Հայաստանի Հանրապետությունը չունի տարածքային պահանջներ իր որևէ հարևանից, այդ թվում և` Ադրբեջանից։ ՀՀ Սահմանադրությունը և նրա փոփոխությունները ՀՀ ներքին գործն են, և դրա շուրջ դեռևս 2018 թվականից մեկնարկած ներհայաստանյան քննարկումներին միջամտելու պաշտոնական Բաքվի փորձերը գնահատում ենք որպես կոպիտ միջամտություն մեր երկրի ներքին գործերին: Միաժամանակ համարում ենք, որ նման խոսույթը տորպեդահարում է խաղաղության գործընթացը և կասկածի տակ է դնում Ադրբեջանի ղեկավարության՝ խաղաղության հասնելու անկեղծությունը: Հայաստանի և Ադրբեջանի միջև բանակցվող Խաղաղության համաձայնագիրը հստակորեն ամրագրում է, որ Կողմերը ճանաչում են միմյանց տարածքային ամբողջականությունը և տարածքային պահանջներ չունեն միմյանց նկատմամբ: Խաղաղության համաձայնագրի նախագծում համաձայնեցված դրույթ կա նաև այն մասին, որ կողմերից որևէ մեկը չի կարող հղում անել իր ներքին օրենսդրությանը Խաղաղության համաձայնագրով ստանձնած պարտավորությունները չկատարելու համար: Համաձայնագրի ստորագրումը և ներպետական ընթացակարգերով վավերացումը վերջնականորեն կամրագրեն այս սկզբունքները: Ըստ այդմ համարում ենք, որ Կողմերի բոլոր մտահոգությունները փարատելու ամենահստակ և ուղիղ ճանապարհը հենց Համաձայնագրի ստորագրումն է, որով երկարաժամկետ խաղաղության էջ կբացվի Հայաստանի և Ադրբեջանի միջև: Հայաստանի և Ադրբեջանի միջև Խաղաղության համաձայնագիրը բավականաչափ հասունացած է ստորագրման համար, և հայկական կողմն արտահայտում է իր պատրաստակամությունը կառուցողական և ինտենսիվ աշխատել՝ առաջիկա մեկ ամսվա ընթացքում այն ամբողջացնելու և ստորագրելու ուղղությամբ», - նշված է հաղորդագրությունում:
12:37 - 07 հունիսի, 2024
ՌԴ–ն չի նախատեսում իջեցնել Հայաստանի հետ դիվանագիտական հարաբերությունների մակարդակը. դեսպանը շուտով կվերադառնա Երևան
 |armenpress.am|

ՌԴ–ն չի նախատեսում իջեցնել Հայաստանի հետ դիվանագիտական հարաբերությունների մակարդակը. դեսպանը շուտով կվերադառնա Երևան |armenpress.am|

armenpress.am: Հայաստանում Ռուսաստանի դեսպան Սերգեյ Կոպիրկինը խորհրդակցությունից հետո շուտով կվերադառնա Հայաստան, հարաբերությունների մակարդակի իջեցման մասին խոսք չկա։ «Արմենպրես»-ի փոխանցմամբ՝ «ՌԻԱ Նովոստի»–ին այս մասին ասել է ՌԴ արտաքին գործերի փոխնախարար Միխայիլ Գալուզինը: «Դեսպանին խորհրդակցությունների կանչելը սովորական դիվանագիտական պրակտիկա է: Հենց այս պրակտիկայի շրջանակում էլ Սերգեյ Կոպիրկինը կանչվել է խորհրդակցությունների: Մենք այդ խորհրդակցություններն անցկացրել ենք: Ըստ այդմ, կարծում եմ, որ շատ շուտով կարելի է սպասել, որ Սերգեյ Պավլովիչը կվերադառնա Երևան և կվերսկսի իր պարտականությունները»,- ասել է փոխարտգործնախարարը: Պատասխանելով երկրների միջև հարաբերությունների մակարդակի հնարավոր իջեցման վերաբերյալ հարցին՝ Գալուզինը վստահեցրել է, որ այդ մասին բացարձակապես խոսք չկա: «Դեսպանին կանչել են խորհրդակցությունների, նա հետ չի կանչվել: Ռուսաստանը և Հայաստանը դաշնակիցներ են, ռազմավարական գործընկերներ»,–շեշտել է նա: Ըստ փոխարտգործնախարարի՝ լինում են հակասություններ: «Բայց դա չի նշանակում, թե մենք իջեցնում ենք մեր հարաբերությունների մակարդակը»,–ասել է նա: ՌԴ ԱԳ նախարարությունն ավելի վաղ հայտարարել էր, որ մայիսի 24-ին Հայաստանի Հանրապետությունում Ռուսաստանի Դաշնության դեսպան Սերգեյ Կոպիրկինը հրավիրվել է Մոսկվա՝ խորհրդակցությունների:
19:08 - 06 հունիսի, 2024
Լիահույս եմ, որ համատեղ ջանքերով նոր լիցք կհաղորդենք Հայաստանի և Շվեդիայի համագործակցությանը. Նիկոլ Փաշինյան

Լիահույս եմ, որ համատեղ ջանքերով նոր լիցք կհաղորդենք Հայաստանի և Շվեդիայի համագործակցությանը. Նիկոլ Փաշինյան

Վարչապետ Նիկոլ Փաշինյանը շնորհավորական ուղերձ է հղել Շվեդիայի Թագավորության վարչապետ Ուլֆ Կրիստերսոնին՝ Ազգային տոնի առիթով: Ուղերձում ասված է. «Ջերմորեն շնորհավորում եմ Ձեզ և Շվեդիայի բարեկամ ժողովրդին Ազգային տոնի առթիվ։ Շվեդիան Հայաստանի վստահելի գործընկերն է, և մենք կարևորում ենք Հայաստանի և Շվեդիայի գործընկերային հարաբերությունների շարունակական զարգացումը: Հայաստանը բարձր է գնահատում իր առջև ծառացած բազմաթիվ մարտահրավերների հաղթահարման գործում շվեդական կառավարության ցուցաբերած աջակցությունը։ Մեր երկրների միջև առկա բարեկամական հարաբերությունների ներկա մակարդակը հնարավորություն է ընձեռում ընդլայնելու մեր փոխգործակցությունը ինչպես երկկողմ, այնպես էլ բազմակողմ հարթակներում, այդ թվում՝ Հայաստանում ժողովրդավարական բարեփոխումների առավել խթանման, ինչպես նաև Հայաստան-Եվրամիություն կապերի սերտացման համատեքստում։ Լիահույս եմ, որ համատեղ ջանքերով նոր լիցք կհաղորդենք Հայաստանի և Շվեդիայի համագործակցությանը՝ նպաստելով երկկողմ հետաքրքրություն ներկայացնող ոլորտներում առկա ներուժի օգտագործմանը։ Մաղթում եմ Ձեզ և Շվեդիայի կառավարությանը՝ հաջողություն և նոր ձեռքբերումներ, իսկ բարեկամ շվեդ ժողովրդին՝ խաղաղություն և բարգավաճում»։
13:25 - 06 հունիսի, 2024
Վստահ եմ` ադրբեջանական զnրքը սահմանազատումից հետո դուրս կգա Գեղարքունիքից․ մարզպետ
 |news.am|

Վստահ եմ` ադրբեջանական զnրքը սահմանազատումից հետո դուրս կգա Գեղարքունիքից․ մարզպետ |news.am|

news.am: Վստահ եմ` ադրբեջանական զորքը սահմանազատումից հետո դուրս կգա Գեղարքունիքի մարզից։ Այս մասին այսօր՝ հունիսի 5-ին, ԱԺ-ում լրագրողներին ասաց Գեղարքունիքի մարզպետ Կարեն Սարգսյանը։ «Եթե սահմանազատում պետք է իրականացվի Գեղարքունիքի մարզում, ուրեմն պետք է իրականացվի։ 2022 թվականի սեպտեմբերյան դեպքերի ժամանակ ադրբեջանական զինված ուժերը ներխուժել են Հայաստանի Հանրապետության տարածք, հարձակում է եղել մեր մարզի 12 սահմանին հարող բնակավայրերի վրա, դրա արդյունքում մի շարք հատվածներում իրենք գտնվում են ՀՀ սուվերեն տարածքում։ Սահմանազատման արդյունքում իրենք հետ կգնան իրենց ելման դիրքեր, և ՀՀ այն բնակավայրերը, որոնք ուղիղ թիրախավորված են այդ ուժերի կողմից, արդեն իսկ կլինեն ապահովված։ Այն քարտեզները, որոնցով որ լինելու է սահմանազատումը, տալիս է ինձ այդ վստահությունը»,- նշեց նա։ Հարցին՝ ինչի՞ հիման վրա է ինքը վստահ, որ ադբեջանական զինված ուժերը հետ կգնան իրենց ելման դիրքեր, Սարգսյանն ասաց․ «Դուք տեսաք, որ Տավուշում սահմանազատման արդյունքում որոշ հատվածներ հետ վերադարձվեցին Հայաստանին»,- հայտարարեց նա։ Հարցին, թե ո՞ր հատվածների մասին է խոսքը, մարզպետն ասաց․ «Որոնց մասին որ դուք խոսում եք, որտեղ որ սահմանազատում է իրականացվել, այդ նույն քարտեզներում կա տարածք, որը նախկինում, նաև բնակիչներն ասացին՝ մտածել են, որ դա հարևան երկրինն է, բայց պարզվեց, որ դա ՀՀ տարածք է, և կանգնեցվել են հենասյուներ և ընկել է հենասյունից դեպի ՀՀ տարածք»։ Հարցին՝ եթե հետ չգնա՞ն, ի՞նչ է անելու հայկական կողմը, Սարգսյանն ասաց․ «Կօգտագործվի այլ գործիքակազմ, որով կստիպենք իրենց հետ գնալ»։ Հարցին՝ ուժի՞ գործոնը կօգտագործվի, մարզպետն ասաց՝ ոչ․ «Ոչ, ինչու միայն ուժի գործոնը, տարբեր գործոններ կան»։      
20:58 - 05 հունիսի, 2024
ՀՀ պաշտպանության նախարարը Բուլղարիայի գործընկերոջ հետ քննարկել է ռազմատեխնիկական բնագավառում համագործակցության հնարավորությունները

ՀՀ պաշտպանության նախարարը Բուլղարիայի գործընկերոջ հետ քննարկել է ռազմատեխնիկական բնագավառում համագործակցության հնարավորությունները

Պաշտպանության նախարար Սուրեն Պապիկյանը Բուլղարիայի Հանրապետություն կատարած աշխատանքային այցի շրջանակում հանդիպել է Բուլղարիայի պաշտպանության նախարար Աթանաս Զապրյանովի հետ։ Այդ մասին տեղեկանում ենք նախարարի Ֆեյսբուքի էջից:   «Հանդիպմանը ներկա էր նաև Բուլղարիայում ՀՀ արտակարգ և լիազոր դեսպան Արմեն Եդիգարյանը։   Քննարկել ենք պաշտպանության ոլորտում Հայաստան-Բուլղարիա համագործակցությանը, ինչպես նաև ռազմատեխնիկական բնագավառում համագործակցության հնարավորություններին առնչվող հարցեր։ Հանդիպման ընթացքում քննարկվել են նաև բազմակողմ ձևաչափերով՝ ՆԱՏՕ-ի և ԵՄ շրջանակում համագործակցությանն ու տարածաշրջանային անվտանգությանը վերաբերող հարցեր։   Ներկայացրել եմ ՀՀ զինված ուժերում իրականացվող բարեփոխումների ընթացքն ու նպատակները»,- նշված է գրառման մեջ։
18:20 - 05 հունիսի, 2024
Վստահ եմ, որ Հայաստանի հետ միասին կկարողանանք համաշխարհային ֆուտբոլը բերել մեր երկրներ. Լևան Կոբիաշվիլի
 |armenpress.am|

Վստահ եմ, որ Հայաստանի հետ միասին կկարողանանք համաշխարհային ֆուտբոլը բերել մեր երկրներ. Լևան Կոբիաշվիլի |armenpress.am|

armenpress.am: Վրաստանի ֆուտբոլի ֆեդերացիայի նախագահ Լևան Կոբիաշվիլին կարևորում է միասնական հայտը, որով Հայաստանն ու Վրաստանը կդիմեն ՖԻՖԱ-ին՝ 2029 թվականի երիտասարդների աշխարհի առաջնությունը հյուրընկալելու համար: «Ուրախ եմ այսօր այստեղ լինելու և այս կարևոր նորությունը հայտնելու համար: Մենք եղբայրական պետություններ ենք, պատմական հարևաններ: Ուրախ եմ, որ միասնական հայտով դիմելու ենք աշխարհի 2029 թվականի առաջնությունը հյուրընկալելու համար»,- լրագրողների հետ հանդիպման ժամանակ ասաց Կոբիաշվիլին:  Վերջինիս խոսքով` ինքը ոչ միայն Վրաստանի ֆուտբոլի ֆեդերացիայի նախագահն է, այլ նաև ՈՒԵՖԱ-ի գործկոմի անդամ է, և եվրոպական ասոցիացիան ամեն կերպ իր աջակցությունն է հայտնել ՀՖՖ նախաձեռնություններին: «Երկու երկրներն էլ փորձառու են միջազգային մրցաշարեր հյուրընկալելու առումով: Իսկ թե ինչ է պետք աշխարհի երիտասարդների առաջնության հյուրընկալության համար, ապա կարող եմ ասել, որ շատ կարևոր են ենթակառուցվածքները: Երկու երկրներիս համար շատ կարևոր կլինի աշխարհի երիտասարդների առաջնության հյուրընկալումը: Վստահ եմ` միասին կկարողանանք համաշխարհային ֆուտբոլը բերել մեր երկրներ»,-ասաց նա: Հայաստանը և Վրաստանը միասնական հայտով կդիմեն ՖԻՖԱ` ֆուտբոլի աշխարհի 2029 թվականի երիտասարդների առաջնությունը հյուրընկալելու համար: ՈՒԵՖԱ-ն հաստատել է աջակցությունը Հայաստանի և Վրաստանի միասնական հայտին։  Աշխարհի երիտասարդների առաջնության անցկացման վայրը պարզ կլինի 2025 թվականին:
15:57 - 05 հունիսի, 2024
Հայաստանը եւ Վրաստանը կներկայացնեն ֆուտբոլի երիտասարդական ԱԱ-ի անցկացման համատեղ հայտ
 |sport.news.am|

Հայաստանը եւ Վրաստանը կներկայացնեն ֆուտբոլի երիտասարդական ԱԱ-ի անցկացման համատեղ հայտ |sport.news.am|

sport.news.am: Հայաստանը եւ Վրաստանը  2029 թվականի աշխարհի երիտասարդական առաջնությունը համատեղ անցկացնելու հայտ կներկայացնեն: Այս մասին այսօր Վազգեն Սարգսյանի անվան «Հանրապետական» ստադիոնում հայտարարեցին ՀՖՖ նախագահ Արմեն Մելիքբեկյանը եւ ՎՖՖ նախագահ Լեւան Կոբիաշվիլին: «Հաշվի առնելով Հայաստանի եւ Վրաստանի ֆեդերացիաների բարիդրացիական հարաբերությունները եւ, չեմ վախենա այդ բառից՝ տարբեր ոլորտներում փայլուն փոխգործակցությունը, երկու երկրների ֆեդերացիաները որոշել են դիմել ՖԻՖԱ՝ 2029 թվականին աշխարհի երիտասարդական առաջնությունը համատեղ ուժերով անցկացնելու համար: Համատեղ հայտի շուրջ աշխատանքները սկսում ենք արդեն այսօր: Լեւան Կոբիաշվիլիի հետ նախնական պայմանավորվածության ենք եկել անցյալ տարի: Երկու ֆեդերացիաների ղեկավար կազմերը մի քանի հանդիպում են ունեցել Թբիլիսիում, որոշում է կայացվել հայտարարություն անել Երեւանում: Սա ՖԻՖԱ-ի կողմից անցկացվելիք խոշոր մրցաշարերից է: Եթե կարողանանք այս հայտում հաղթել, մեզ համար մեծ պատիվ կլինի անցկացնել համատեղ մրցաշարը»,- ասաց Արմեն Մելիքբեկյանը: Հայտարարությանը ներկա էր նաեւ Վրաստանի ֆուտբոլի ֆեդերացիայի նախագահ Լեւան Կոբիաշվիլին: Երկու երկրների ֆեդերացիաների նախագահները փոխանակվեցին  2029 թվականի աշխարհի առաջնության գրառումով մարզաշապիկներով: «Մենք նախնական խորհրդակցություններ ենք ունեցել ֆուտբոլը կառավարող մարմինների հետ եւ համաշխարհային մասնագետների հետ: ՈՒԵՖԱ-ն արդեն հաստատել է, որ աջակցելու է Հայաստանի եւ Վրաստանի համատեղ հայտին Եվրոպայից: Մեզ համար արդեն շատ մեծ կարեւոր քայլ է»,- նշեց Արմեն Մելիքբեկյանը:
15:52 - 05 հունիսի, 2024
Բայրամովը հաստատել է՝ Բաքուն ստացել է խաղաղության պայմանագրի վերաբերյալ ՀՀ-ի առաջարկների փաթեթը
 |factor.am|

Բայրամովը հաստատել է՝ Բաքուն ստացել է խաղաղության պայմանագրի վերաբերյալ ՀՀ-ի առաջարկների փաթեթը |factor.am|

factor.am: Ադրբեջանի ԱԳ նախարար Ջեյհուն Բայրամովը Բաքվում Հունգարիայի ԱԳ նախարար Պետեր Սիյատրոյի հետ մամուլի ասուլիսում հաստատել է, որ Հայաստանից ստացվել է խաղաղության պայմանագրի վերաբերյալ հերթական առաջարկների փաթեթը։ «Ես տեղեկացրել եմ բանակցային գործընթացի առաջընթացի, խաղաղության գործընթացի շուրջ բանակցությունների, Ալմաթիի հանդիպման մասին: Մինչ այդ, Ադրբեջանը Հայաստանին էր ներկայացրել համաձայնագրի հաջորդ նախագիծը, որի շուրջ բանակցություններ են եղել Ալմաթիում: Մի քանի օր առաջ Հայաստանի կողմից ստացանք խաղաղության հերթական նախագիծը»,- ասել է Բայրամովը։ Նա հավելել է, որ առկա բաց հարցերի թվի նվազում է նկատվում։ «Մի շարք կետերում դրական զարգացում է նկատվում։ Այսինքն՝ մենք այստեղ դրական դինամիկա ենք նկատում»,- ասել է Ադրբեջանի ԱԳ նախարարը։ Հիշեցնենք, որ  ՀՀ ԱԳՆ մամուլի խոսնակ Անի Բադալյանը հայտնել էր, որ Հայաստանը պատասխանել է խաղաղության պայմանագրի նախագծի վերաբերյալ Ադրբեջանի վերջին առաջարկներին՝ ուղարկելով լրամշակված` 9-րդ խմբագրությունը:  
14:44 - 05 հունիսի, 2024