Հայաստան

ՀՀ կառավարությունը սերտ համագործակցություն է ակնկալում Եվրահանձնաժողովի նոր կազմի հետ. Փաշինյանը շնորհավորել է Ուրսուլա ֆոն դեր Լայենին |armenpress.am|

armenpress.am: Հայաստանի վարչապետ Նիկոլ Փաշինյանը շնորհավորել է Եվրոպական հանձնաժողովի նախագահ Ուրսուլա Ֆոն դեր Լայենին՝ Եվրահանձնաժողովի նոր կազմի ձևավորման առթիվ: Վարչապետն այս մասին գրառում է կատարել X-ի իր միկրոբլոգում: «Շնորհավորում եմ նախագահ Ուրսուլա ֆոն դեր Լայենին՝ Եվրահանձնաժողովի նոր կազմի ձևավորման առթիվ։ Հայաստանի կառավարությունն ակնկալում է Եվրահանձնաժողովի հետ սերտ համագործակցություն՝ Հայաստան-Եվրամիություն գործընկերությունն ավելի բարձր մակարդակի հասցնելու համար»,-գրել է վարչապետը: Եվրախորհրդարանի պատգամավորները նոյեմբերի 27-ին քվեարկել էին Եվրահանձնաժողովի նոր կազմի հաստատման օգտին: Ստրասբուրգում կայացած լիագումար նիստում ձայների մեծամասնությամբ ընդունվել են ԵՄ անդամ պետությունների կողմից առաջարկված և ավելի վաղ Եվրախորհրդարանի հանձնաժողովների կողմից համաձայնեցված բոլոր թեկնածությունները։ ԵՄ գործադիր խորհրդի նոր կազմի հաստատման օգտին քվեարկել է 370 եվրապատգամավոր, «դեմ»՝ 282-ը, 36 խորհրդարանական ձեռնպահ է մնացել։ Նոր Եվրահանձնաժողովը, որը բաղկացած է 27 անդամից, իր լիազորությունները ստանձնել է դեկտեմբերի 1-ից։

15:40 - 02 դեկտեմբերի, 2024

Ռուսաստանն աշխատում է «3+3» հարթակը կազմակերպության վերածելու ուղղությամբ |armenpress.am|

armenpress.am: Ռուսաստանի Դաշնության փոխարտգործնախարար Միխայիլ Գալուզինը հայտարարել է, որ Մոսկվան աշխատում է «3+3» տարածաշրջանային խորհրդակցական հարթակը լիարժեք կազմակերպության վերածելու ուղղությամբ։ Այս մասին հայտնում է ՏԱՍՍ-ը՝ մեջբերելով «Ռուսաստան-Հայաստան» երկրորդ հանրային ֆորումի ժամանակ ՌԴ ԱԳ նախարարի տեղակալի արած հայտարարությունը։ «Տարածաշրջանի բոլոր երկրների շահերի ներդաշնակեցման գործում մենք կարևոր տեղ ենք հատկացնում «3+3» տարածաշրջանային համագործակցության պլատֆորմին», - նշել է Միխայիլ Գալուզինը։ «3+3» խորհրդակցական հարթակի առաջին նիստն անցկացվել է 2021 թվականի դեկտեմբերին։ Այդ ժամանակ նիստին մասնակցել էին Հայաստանի, Ադրբեջանի, Ռուսաստանի, Իրանի և Թուրքիայի արտաքին գործերի նախարարների տեղակալները։ Վրաստանը հրաժարվել էր մասնակցել հանդիպմանը։ Հարթակի երկրորդ նիստը կայացել է 2023 թվականի հոկտեմբերին։ Նիստը կայացել է Իրանի մայրաքաղաք Թեհրանում՝ արտգործնախարարների մակարդակով։ Վրաստանը չի մասնակցել նաև հարթակի երկրորդ նիստին։ 2024 թվականի հոկտեմբերի 18-ին Ստամբուլում տեղի է ունեցել հարթակի 3-րդ հանդիպումը, որի արդյունքներով մասնակից երկրների արտաքին գործերի նախարարները ընդունել են համատեղ հայտարարություն։ Այս հանդիպմանը ևս Վրաստանը չի մասնակցել։

15:44 - 29 նոյեմբերի, 2024

Գալուզինը հայտարարել է, թե ՌԴ-ն չի հրաժարվում ՀՀ-ի հանդեպ ռազմաքաղաքական ոլորտում պարտավորություններից |factor.am|

factor.am: Ռուսաստանը հավատարիմ է Հայաստանի հետ պայմանավորվածությունների ամբողջ համալիրին և չի հրաժարվում ռազմաքաղաքական ոլորտում իր պարտավորություններից։ Այս մասին հայտարարել է ՌԴ ԱԳ փոխնախարար Միխայիլ Գալուզինը, գրում է ՌԻԱ Նովոստին։ «Մոսկվան հավատարիմ է եղել և մնում է համաձայնությունների ամբողջ շրջանակին՝ ինչպես երկկողմ մակարդակով, այնպես էլ եվրասիական տարածքում միավորման շրջանակում։ Մենք չենք հրաժարվում դաշնակիցների հանդեպ մեր պարտավորություններից, այդ թվում՝ ռազմաքաղաքական ոլորտում»,- ասել է Գալուզինը։ Նա նշել է, թե Մոսկվան տարիներ շարունակ ձևավորել է անվտանգության ճարտարապետությունը Հարավային Կովկասում։ Գալուզինն ընդգծել է՝ Ռուսաստանի դերն այս հարցում միշտ պահանջված կլինի՝ հաշվի առնելով տարածաշրջանում և ամբողջ աշխարհում դինամիկ իրավիճակը։ «Մենք պատրաստ ենք ակտուալ թեմաների շուրջ Երևանի հետ անկեղծ և առարկայական զրույցի»,- հայտարարել է ՌԴ ԱԳ փոխնախարարը։

15:40 - 29 նոյեմբերի, 2024

Վահագն Խաչատուրյանը Ղազախստանի Մաժլիսի Ղազախստան-Հայաստան բարեկամական խմբի ղեկավարի հետ քննարկել է քաղաքական, տնտեսական և մշակութային կապերի զարգացմանն ուղղված հարցեր

Հանրապետության նախագահ Վահագն Խաչատուրյանն ընդունել է Ղազախստանի Հանրապետության Մաժլիսի Ղազախստան-Հայաստան բարեկամական խմբի ղեկավար Մուկաշ Իսկանդիրովի գլխավորած պատվիրակությանը: Այս մասին հայտնում են նախագահի աշխատակազմից: Նախագահը ողջունել է պատվիրակության այցը Հայաստան և ընդգծել միջխորհրդարանական համագործակցության կարևորությունը երկու երկրների հարաբերությունների և գործակցության ամրապնդման համատեքստում: Մուկաշ Իսկանդիրովը շնորհակալություն է հայտնել ընդունելության համար և շեշտել, որ բարեկամական խմբերի և խորհրդարանական ձևաչափերով աշխատանքներում իրենց բոլոր ջանքերը ներդրում են Հայաստանի և Ղազախստանի միջև բարեկամական հարաբերությունների և բազմաշերտ փոխգործակցության ընդլայնման համար: Հանդիպման ընթացքում ընդգծվել է խորհրդարանական դիվանագիտության կարևորությունը, որն արդյունավետ գործիք է երկու ժողովուրդների միջև բարեկամությունն ամրապնդելու և համագործակցության նոր հնարավորություններ ստեղծելու համար: Քննարկվել են նաև տարածաշրջանային ընդհանուր իրողություններն ու զարգացումները: Այս համատեքստում անդրադարձ է կատարվել «Խաղաղության խաչմերուկ» ծրագրին, որը միտված է տարածաշրջանում կայուն խաղաղության և զարգացման ապահովման նպատակին: Հատուկ ուշադրություն է դարձվել քաղաքական, տնտեսական և մշակութային կապերի զարգացմանն ու ամրապնդմանը: Կողմերը համակարծիք են եղել, որ այս ուղղություններով համագործակցությունը կնպաստի երկու երկրների միջև փոխշահավետ հարաբերությունների ընդլայնմանը՝ ինչը կերաշխավորի ոչ միայն երկրների գործակցության հետագա զարգացումը, այլև հավելյալ խթան կհանդիսանա տարածաշրջանային կայունությանն ու բարգավաճման համար:

15:25 - 29 նոյեմբերի, 2024

Հանդիպել են Հայաստանի և Ադրբեջանի փոխվարչապետները |civilnet.am|

civilnet.am: Հանդիպել են Հայաստանի և Ադրբեջանի փոխվարչապետներ Մհեր Գրիգորյանն ու Յագուբ Էյուբովը, հայտնում է ադրբեջանական ԱՊԱ գործակալությունը։ Հանիպումը կայացել է ԱՊՀ տնտեսական խորհրդի 104-րդ նիստի շրջանակներում: Ըստ լրատվամիջոցի՝ նիստից հետո Հայաստանի և Ադրբեջանի փոխվարչապետները ոտքի վրա ավելի քան 10 րոպե զրուցել են։ Փոխվարչապետ Մհեր Գրիգորյանի գրասենյակից ՍիվիլՆեթի հետ զրույցում հաստատեցին հանդիպման փաստը՝ առանց մանրամասներ հայտնելու։

15:20 - 29 նոյեմբերի, 2024

Սիրիայում ծավալվող իրադարձությունների հետևանքով տուժածների թվում ՀՀ քաղաքացիներ չկան․ ԱԳՆ խոսնակ |armenpress.am|

armenpress.am: Սիրիայում ծավալվող իրադարձություների հետևանքով տուժածների թվում ՀՀ քաղաքացիներ չկան։ «Արմենպրես»-ի հարցմանն ի պատասխան՝ այս մասին հայտնեց ՀՀ արտաքին գործերի նախարարության մամուլի խոսնակ Անի Բադալյանը։ «Այս պահին առկա տեղեկություններով՝ տուժածների թվում ՀՀ քաղաքացիներ չկան»,- նշել է ԱԳՆ խոսնակը։ Ավելի վաղ հաղորդվել էր, որ սիրիական բանակի ստորաբաժանումները հակահարձակում են սկսել «Ջաբհաթ ան Նուսրա» ծայրահեղական խմբավորման զինյալների դիրքերի ուղղությամբ, որոնք ավելի քան 20 բնակավայր են գրավել Հալեպ քաղաքից դեպի հյուսիս և արևմուտք։ Հակահարձակում է սկսվել նաև Իդլիբում։ «Ջաբհաթ ան Նուսրա»-ի և նրա դաշնակից արմատական խմբավորումների զինյալները նոյեմբերի 27-ի հարձակման ընթացքում վտանգավոր հեռավորությամբ մոտեցել են Հալեպին և գրավել մի քանի նպաստավոր դիրքեր՝ քաղաքից 7-10 կմ հեռավորության վրա։ Հալեպի մերձակայքում ռազմաճակատի մի քանի հատվածներում կառավարական ուժերին հաջողվել է զսպել հակառակորդի առաջխաղացումը, սպանվել է մի քանի հարյուր զինյալ: Al Mayadeen-ը հաղորդել է, որ սիրիական բանակը հետ է մղում զինյալների հարձակումն Իդլիբում։ Ըստ հրապարակման՝ բանակը կանգնեցրել է «Ջաբհաթ ան Նուսրա»-ի և նրա դաշնակիցների առաջխաղացումը Իդլիբի հարավ-արևելյան ճակատում և հակահարձակում է սկսել՝ փորձելով հետ գրավել զինյալների գրաված դիրքերը։

15:02 - 29 նոյեմբերի, 2024

Շահագրգռված ենք ԵԱՏՄ տարածքում ինտեգրացիոն գործընթացների զարգացմամբ. Վաղարշակ Հակոբյանը՝ Իսկանդիրովի գլխավորած պատվիրակությանը

Հայաստանի և Ղազախստանի միջև հաստատված է փոխգործակցության բարձր մակարդակ, մասնավորապես՝ միջխորհրդարանական համագործակցության շրջանակում. ողջունելով Ղազախստան-Հայաստան բարեկամական խմբի անդամներին Ազգային ժողովում՝ ասել է Հայաստան-Ղազախստան բարեկամական խմբի ղեկավար Վաղարշակ Հակոբյանը: Այս մասին հայտնում են Ազգային ժողովի մամուլի ծառայությունից։ «Մենք հատկապես կարևորում ենք մեր պետությունների խորհրդարանների միջև համագործակցության զարգացումը` հիմնվելով 1999 թվականի սեպտեմբերի 2-ին ստորագրված Հայաստանի և Ղազախստանի միջև բարեկամության ու համագործակցության պայմանագրի դրույթների վրա»,- ասել է՝ հավելելով, որ անհրաժեշտություն կա մշակել միջխորհրդարանական բարեկամական խմբի աշխատանքների հստակ ալգորիթմ՝ տարբեր հարթակներում համագործակցելու համար: Հանդիպումը տեղի է ունեցել նոյեմբերի 28-ին, որին մասնակցել են Հայաստան-Ղազախստան բարեկամական խմբի անդամներ, ՀՀ ԱԺ «Քաղաքացիական պայմանագիր» խմբակցության պատգամավորներ Ալխաս Ղազարյանը, Հակոբ Ասլանյանը, Նարեկ Բաբայանը, Դավիթ Դանիելյանը, Միքայել Թումասյանը և ՀՀ ԱԺ «Հայաստան» խմբակցությունից Լիլիթ Գալստյանն ու Իրինա Գասպարյանը: «Մենք շահագրգռված ենք Եվրասիական տնտեսական միության տարածքում ինտեգրացիոն գործընթացների հետագա զարգացմամբ և Հայաստանի ու Ղազախստանի միջև առևտրատնտեսական համագործակցության ընդլայնմամբ»,- նշել է Հայաստան-Ղազախստան բարեկամական խմբի ղեկավարը՝ ընդգծելով, որ հայկական կողմը պատրաստ է սերտ գործընկերություն զարգացնել Ղազախստանի հետ բոլոր հնարավոր ոլորտներում: Նա փաստել է, որ վերջին տարիներին երկու երկրների միջև առևտրաշրջանառության բավականին բարձր ցուցանիշ է արձանագրվել՝ շեշտելով, որ թե՛ Հայաստանը, թե՛ Ղազախստանն ունեն խոստումնալից նախագծեր, որոնք կարող են փոխշահավետ լինել: Ղազախստանի Մաժլիսի Ղազախստան-Հայաստան բարեկամական խմբի ղեկավար Մուկաշ Իսկանդիրովը տեղեկացրել է, որ սա իրենց առաջին այցն է Հայաստան և ընդգծել, որ երկու երկրների միջև բոլոր մակարդակներում ծավալվել է ակտիվ քաղաքական երկխոսություն, խորացել է առևտրատնտեսական համագործակցությունը, ինչպես նաև փոխգործակցությունը մշակութային և հումանիտար ոլորտներում: Խոսելով Ղազախստանում ապրող և ստեղծագործող հայ համայնքի մասին՝ Վաղարշակ Հակոբյանը նշել է, որ երկու ազգերի հարաբերությունները հիմնված են փոխադարձ հարգանքի և վաղեմի ավանդույթների վրա: Մշակութային, գիտակրթական համագործակցության շրջանակում բարեկամական խմբի ղեկավարն անդրադարձել է ղազախ հեղինակների հայերեն աշխատությունների հրատարակմանը, ԵՊՀ-ում Աբայի անվան ղազախական լեզվի, պատմության և մշակույթի կենտրոնի գործունեությանը: Նա համոզմունք է հայտնել, որ Ղազախստանի ազգային ակադեմիական գրադարանում հայ մշակույթի, լեզվի, գրականության և պատմության կենտրոնի բացումը դրական ազդեցություն կունենա երկու երկրների փոխգործակցության մշակութային և հումանիտար ասպեկտների վրա: Մուկաշ Իսկանդիրովը եւս փաստել է, որ հայկական համայնքն իր ուրույն տեղն ու դերակատարումն ունի Ղազախստանում: Բարեկամական խմբի անդամները մեկ անգամ եւս ընդգծել են երկու երկրների հարաբերություններում օրենսդիր մարմինների կարևորագույն դերը և ակտիվ համագործակցելու պատրաստակամություն են հայտնել:

17:08 - 28 նոյեմբերի, 2024

Հայաստանը եղել է, կա և մնում է մեր դաշնակիցը. ՀԱՊԿ-ի գլխավոր քարտուղար |1lurer.am|

1lurer.am: Հայաստանը դադարեցրել է ՀԱՊԿ-ում աշխատանքը, և դա արտացոլում է կազմակերպության նկատմամբ հանրապետության քաղաքական ղեկավարության՝ այս պահին ձևավորված դիրքորոշումը: Այդ մասին Աստանայում ընթացող ՀԱՊԿ-ի միջոցառումների շրջանակում հայտարարել է ՀԱՊԿ-ի գլխավոր քարտուղար Իմանգալի Տասմագամբետովը: «Միանգամից նշեմ, որ սա անկախ, ինքնիշխան պետության որոշում է, որի վրա ոչ մի պետություն կամ կազմակերպություն չի կարող ազդել։ Այնուամենայնիվ, մենք կարծում ենք, որ Հայաստանը եղել է, կա և մնում է մեր դաշնակիցը։ Մենք հույս ունենք, որ Հայաստանը տեսանելի հեռանկարում կվերադառնա ՀԱՊԿ-ին լիարժեք մասնակցությանը։ Իհարկե, Հայաստանի դիրքորոշումը նույնպես քննարկվել է Հավաքական անվտանգության խորհրդի նիստում»,- նշել է Տասմագամբետովը։

16:29 - 28 նոյեմբերի, 2024

Հունգարիայում կբացվի Հայաստանի Հանրապետության դեսպանություն |1lurer.am|

1lurer.am: Կառավարությունը հավանություն տվեց Հունգարիայում Հայաստանի Հանրապետության դեսպանություն ստեղծելու, Հայաստանի Հանրապետության կառավարության 2014 թվականի հուլիսի 3-ի N 738-Ն և 2005 թվականի դեկտեմբերի 29-ի N 2335-Ն որոշումներում լրացում կատարելու մասին հարցին: Հիշեցնենք՝ 2022 թ․ դեկտեմբերի 1-ին Լոձում՝ ԵԱՀԿ նախարարական համաժողովի շրջանակներում, տեղի է ունեցել Հայաստանի և Հունգարիայի ԱԳ նախարարներ Արարատ Միրզոյանի և Պետեր Սիյարտոյի հանդիպումը, որի ընթացքում պայմանավորվածություն է ձեռք բերվել վերականգնել լիարժեք դիվանագիտական հարաբերությունները: 2024 թ. մայիսի 6-ին նախարար Սիյարտոյի հրավերով կայացել է ՀՀ ԱԳ նախարար Արարատ Միրզոյանի պատասխան այցը Հունգարիա, որի ընթացքում պայմանավորվածություն է ձեռք բերվել մայրաքաղաքներում փոխադարձաբար դեսպանությունների բացման վերաբերյալ: ՀՀ արտաքին գործերի նախարարությունը նպատակահարմար է գտնում Հունգարիայում ՀՀ դեսպանության բացումը, ինչը թույլ կտա ավելի ընդլայնել համագործակցությունը՝ նոր լիցք հաղորդելով տարբեր ոլորտում համագործակցությանը։ Ինչպես նշված է Կառավարության որոշման հիմնավորման մեջ, «Դիվանագիտական ծառայության մասին» օրենքի 11-րդ հոդվածի 1-ի մասի համաձայն՝ Հայաստանի Հանրապետության դեսպանությունն ստեղծվում է Կառավարության որոշմամբ` Հայաստանի Հանրապետության և տվյալ օտարերկրյա պետության միջև նախապես ձեռք բերված պայմանավորվածության հիման վրա: Հիմք ընդունելով «Դիվանագիտական ծառայության մասին» օրենքի 11-րդ հոդվածի 1-ի մասը՝ նախագծով առաջարկվում է Հունգարիայում ստեղծել Հայաստանի Հանրապետության դեսպանություն, նստավայրը՝ Բուդապեշտում:

15:56 - 28 նոյեմբերի, 2024

Լեհաստանի նախագահի կինը ՀՀ-ում հանդիպել է Արցախից բռնի տեղահանվածների հետ |factor.am|

factor.am: Լեհաստանի նախագահ Անջեյ Դուդայի՝ Հայաստան կատարած այցի շրջանակում նրա կինը՝ Ագաթա Կորնհաուզեր-Դուդան նախօրեին այցելել է «Առաքելություն Հայաստան» կազմակերպության կենտրոնակայան, որտեղ հանդիպել է կազմակերպության և ՄԱԿ-ի ՓԳՀ հայաստանյան գրասենյակի ներկայացուցիչների հետ։ Լեհաստանի առաջին տիկինը գոհունակություն է հայտնել Հայաստանի հետ կապված միջազգային համերաշխության կապակցությամբ՝ ընդգծելով, որ Լեհաստանն աջակցող երկրների թվում է։ Ներկայացնելով Լեհաստանի գործունեությունը Ուկրաինայից փախստականների հարցում՝ նա պատմել է ինչպես պետական, այնպես էլ ոչ կառավարական ոլորտների կողմից ձեռնարկվող տարբեր միջոցառումների ու նախաձեռնությունների մասին։ Հանդիպմանը մասնակցել է նաև ՀՀ աշխատանքի և սոցիալական հարցերի փոխնախարարը, որը ներկայացրել է Հայաստանի կառավարության ընթացիկ գործունեությունը փախստականների հետ կապված։ Լեհաստանի առաջին տիկինը հանդիպել է նաև Արցախից բռնի տեղահանվածների հետ։ «2023 թվականի սեպտեմբերի վերջին վերսկսված ռազմական գործողությունները հանգեցրին նրան, որ Լեռնային Ղարաբաղից Հայաստան են եկել ավելի քան 100,000 փախստականներ, որոնք, ի թիվս այլոց, օգնություն են ստացել ՄԱԿ ՓԳՀ հայաստանյան գրասենյակից և «Առաքելություն Հայաստան»-ից։ Այցի ընթացքում առաջին տիկինը զրուցել է նաև Լեռնային Ղարաբաղից փախստականների հետ, որոնք պատմել են պատերազմական հակամարտության իրենց անձնական փորձի և Հայաստան ներգաղթելու անհրաժեշտության մասին։ Նրանք ասել են, որ Հայաստանում իրենց ստացած օգնությունը «անգնահատելի օգուտ» էր, ինչը նշանակում է, որ չնայած դժվարին իրավիճակին՝ նրանք կկարողանան վերականգնել իրենց կյանքը»,- ասվում է հայտարարության մեջ։

15:52 - 28 նոյեմբերի, 2024

Լեհաստանը դիտարկում է Հայաստանում ԵՄ առաքելությունում իր ներկայացուցիչների թվի ավելացման հարցը․ Դուդա |1lurer.am|

1lurer.am: Լեհաստանի նախագահ Անջեյ Դուդան հայտնել է, որ COP29-ի շրջանակում առանձնազրույց է ունեցել Ադրբեջանի նախագահ Իլհամ Ալիևի հետ, ի թիվս այլ հարցերի՝ քննարկել Հայաստան-Ադրբեջան խաղաղության գործընթացը: «Ես նախագահին ասացի, որ պատրաստվում եմ պաշտոնական այցով ժամանել Հայաստան և խնդրեցի նրան ներկայացնել իր տեսակետը կոնֆլիկտային հարցերի վերաբերյալ, որոնք վերջին շրջանում քննարկվում են։ Բարեբախտաբար, խաղաղության գործընթացը, այդ կոնֆլիկտային հարցերի լուծումն առաջընթաց են ապրում։ Դա շատ դժվար է, բայց այդ գործընթացն առաջ է շարժվում»,- ասել է Դուդան, հավելել, որ նույն հարցերը քննարկել է նաև Հայաստանի բարձրաստիճան ղեկավարության հետ: Անդրադառնալով Հայաստանում Եվրամիության քաղաքացիական առաքելությանը՝ Լեհաստանի նախագահն ընդգծել է՝ անհրաժեշտ է կայունացնել առաքելությունը։ «Ես նաև հանդիպում եմ ունեցել մեր ներկայացուցիչների հետ, ովքեր մասնակցում են Հայաստանում Եվրամիության առաքելությանը։ Մենք նաև եղել ենք այն վայրերում, որտեղ ես հանդիպել եմ EUMA-ի ղեկավար պարոն Մարկուս Ռիտերի հետ»,- լրագրողներին ասել է Դուդան: Նրա խոսքով՝ առաքելությունը որոշակի հաջողություններ է արձանագրում սահմանին իրավիճակը հանգստացնելու գործում: «Լեհաստանը մասնակցում է այդ առաքելությանը և դիտարկում այդ առաքելությունում իր ներկայացուցիչների քանակի ավելացման հարցը»,- նշել է Լեհաստանի ղեկավարը։ Ավելի վաղ ադրբեջանական կողմը դժգոհություն էր հայտնել Դուդայի այցի կապակցությամբ հայ-ադրբեջանական սահման: Ըստ Ադրբեջանի ԱԳՆ-ի՝ դա ցույց է տալիս «ԵՄ անդամ տարբեր երկրների և եվրոպական կառույցների հակաադրբեջանական քաղաքականությունը»:

12:35 - 28 նոյեմբերի, 2024

Լեհաստանի նախագահը Երասխում հանդիպել է ԵՄ առաքելության լեհ դիտորդների հետ |armenpress.am|

armenpress.am: Լեհաստանի նախագահ Անջեյ Դուդան Հայաստանում Եվրամիության դիտորդական առաքելության՝ Երասխ բնակավայրում գտնվող դիտակետում հանդիպել է լեհ դիտորդների հետ։ Այս մասին նշված է Լեհաստանի նախագահի X-ի միկրոբլոգում կատարված գրառման մեջ։ «Նախագահ Անջեյ Դուդան Եվրամիության դիտորդական առաքելության դիտակետում հանդիպել է լեհական անձնակազմի հետ։ Հայաստանի Հանրապետությունում Եվրամիության առաքելության ղեկավարն է Մարկուս Ռիտերը, իսկ տեղակալը՝ ազգությամբ լեհ Մարեկ Կուբերսկին։ Առաքելությունը ստեղծվել է 2023 թվականի փետրվարին՝ երկու տարի ժամկետով, և դրա նպատակները ներառում են՝ իրավիճակի մոնիթորինգը և պարեկությունը Հայաստանի և Ադրբեջանի սահմանին», - գրել է Անջեյ Դուդան։ Ավելի վաղ հաղորդվել էր, որ Լեհաստանի նախագահը նոյեմբերի 25-27-ը Հայաստան կատարած այցի շրջանակներում կայցելի Երասխ համայնք՝ մասնակցելու Հայաստանում Եվրոպական Միության դիտորդական առաքելության հետ համատեղ պարեկությանը։

15:29 - 27 նոյեմբերի, 2024

Հայաստանը չի մասնակցի նոյեմբերի 28-ի ՀԱՊԿ գագաթնաժողովին․ Պուտինի օգնական |factor.am|

factor.am: Հայաստանը չի մասնակցի նոյեմբերի 28-ին Աստանայում կայանալիք ՀԱՊԿ գագաթնաժողովին, սակայն Երևանը զգուշացրել է, որ դեմ չէ հանդիպման ժամանակ համաձայնեցված փաստաթղթերի ընդունմանը։ Այս մասին հայտարարել է ՌԴ նախագահի օգնական Յուրի Ուշակովը, գրում է ՏԱՍՍ-ը։ «Մենք կասկածի տակ չենք դնում մեր հայ գործընկերների՝ իրենց ուղին ինքնուրույն որոշելու իրավունքը։ Դե յուրե, Երևանը մնում է ՀԱՊԿ-ի լիիրավ անդամ և այդպիսով պահպանում է բոլոր համապատասխան իրավունքներն ու պարտականությունները։ ՀԱՊԿ աշխատանքին Հայաստանի ֆիզիկական վերադարձի դռները բաց են, և մենք հույս ունենք, որ վաղ թե ուշ Հայաստանի ներկայացուցիչները կվերսկսեն համագործակցությունն այս կազմակերպության շրջանակում»,- նշել է Պուտինի օգնականը։ Ավելի մանրամասն՝ սկզբնաղբյուրում։

18:22 - 26 նոյեմբերի, 2024

Նիկոլ Փաշինյանը Կառավարությունում հյուրընկալել է Լեհաստանի նախագահ Անջեյ Դուդայի գլխավորած պատվիրակությանը

Վարչապետ Նիկոլ Փաշինյանը Կառավարությունում հյուրընկալել է պաշտոնական այցով Հայաստանում գտնվող Լեհաստանի նախագահ Անջեյ Դուդայի գլխավորած պատվիրակությանը: Այս մասին հայտնում են ՀՀ վարչապետի աշխատակազմից։ Ողջույնի խոսքում վարչապետ Փաշինյանը նշել է. «Մեծարգո պարոն նախագահ, ողջունում եմ Ձեզ և Ձեր պատվիրակությանը Հայաստանի Հանրապետությունում: Շատ եմ կարևորում այս այցը Հայաստանի և Լեհաստանի միջև հարաբերությունների հետագա զարգացմանը խթանելու առումով և կարծում եմ, որ իրականում հարաբերությունների զարգացման շատ մեծ պոտենցիալ կա, որը ցավոք չեմ կարող ասել, որ մեծապես օգտագործված է: Իհարկե, տարբեր հարթակներում մենք հանդիպելու, խոսելու առիթներ ունեցել ենք և ուրախ եմ այս առիթի համար, որ մեր խոսակցությունը շարունակելու հնարավորություն կունենանք: Կրկին ողջունում եմ Ձեզ և բարով եք եկել»:Իր խոսքում Լեհաստանի նախագահը նշել է. «Հարգարժան պարոն վարչապետ, հարգելի ներկաներ, նախ ուրախ եմ, որ հնարավորություն ստեղծվեց իրագործելու իմ պաշտոնական այցը Հայաստան: Ցանկանում եմ խորին երախտագիտությունս հայտնել Ձեզ՝ պարոն վարչապետ, ինչպես նաև Հայաստանի նախագահին նման վերաբերմունքի, մեր ժողովուրդների և պետությունների միջև այդքան բարյացակամ և լավ հարաբերություններ ստեղծելու համար: Ինչո՞ւ եմ ես դա հատուկ ընդգծում, քանի որ ես 9,5 տարի է, ինչ Լեհաստանի նախագահն եմ և պետք է նշեմ, որ դրանից առաջ այդպես չեն եղել մեր հարաբերությունները: Դա չափազանց կարևոր է ինձ համար»: Զրուցակիցները կարևորել են Հայաստանի և Լեհաստանի քաղաքական, տնտեսական, զբոսաշրջության, մշակութային և հումանիտար ոլորտներում համագործակցության շարունակական զարգացումն ու ընդլայնումը: Կողմերն ընդգծել են առևտրատնտեսական կապերի խթանման ուղղությամբ հետևողական քայլերի իրականացման անհրաժեշտությունը: Այդ համատեքստում, Նիկոլ Փաշինյանը և Անջեյ Դուդան առանցքային են համարել միջկառավարական համագործակցության ակտիվացումը, բարձր մակարդակի փոխայցելությունները: Անդրադարձ է կատարվել Հայաստան-Եվրոպական միություն փոխգործակցությանը վերաբերող հարցերի: Լեհաստանի նախագահը հայտնել է իր երկրի աջակցությունը ԵՄ-ի հետ հարաբերություններն ընդլայնելու և Հայաստանում ժողովրդավարական բարեփոխումների իրականացման ուղղությամբ, ինչպես նաև ողջունել ՀՀ-ի հետ վիզաների ազատականացման շուրջ երկխոսության մեկնարկը: Վարչապետ Փաշինյանն Անջեյ Դուդային է ներկայացրել Հայաստան-Ադրբեջան խաղաղության պայմանագրի շուրջ քննարկումների վերջին զարգացումներն ու հայկական կողմի սկզբունքային դիրքորոշումները: Վարչապետն ընդգծել է Հայաստանի հավատարմությունը խաղաղության օրակարգին:

17:03 - 26 նոյեմբերի, 2024

Լեհաստանը ցանկանում է ԵՄ Արևելյան գործընկերության ֆորմատը վերականգնելու շուրջ քննարկումներ սկսել |armenpress.am|

armenpress.am: Լեհաստանը ցանկանում է քննարկումներ սկսել Եվրամիության Արևելյան գործընկերության ֆորմատը վերականգնելու ուղղությամբ՝ այն որոշակի փոփոխությունների ենթարկելու միջոցով։ Երևանում ՀՀ նախագահ Վահագն Խաչատուրյանի հետ ասուլիսի ժամանակ այդ մասին հայտարարեց Լեհաստանի նախագահ Անջեյ Դուդան։ «Վարշավան ցանկանում է վերականգնել Արևելյան գործընկերության ֆորմատը՝ ապագայում այն մի փոքր փոփոխության ենթարկելով։ Լեհաստանը ցանկանում է սկսել այդ քննարկումները և ուզում է մասնակցել այդ գործընթացին»,- շեշտեց Դուդան։ Դուդան շեշտեց նաև, որ Վարշավան պատրաստ է աջակցել Հայաստանին եվրոպական ընտանիքում ներգրավվելու հարցում։ «Մենք ընկերներ ենք, մենք Հայաստանի բարեկամն ենք։ Մենք շատ դրական վերաբերմունք ունենք հայ ժողովրդի, Հայաստանի իշխանությունների նկատմամբ։ Հայերը շատ մեծ ներդրում ունեն համաշխարհային մշակույթի և քաղաքակրթության մեջ։ Մենք ամեն ջանք կգործադրենք, որ Հայաստանին ներգրավենք եվրոպական ընտանիք։ Եթե հայկական կողմը մի փոքր հետաքրքրվածություն ցուցաբերի իր կողմից, ապա մենք պատրաստ ենք օգնել։ Որպես Լեհաստանի նախագահ՝ հայտարարում եմ, որ ցանկացած խնդրանքի դեպքում մենք պատրաստ ենք աջակցություն ցուցաբերել Հայաստանին», - ընդգծեց Անջեյ Դուդան։ ԵՄ Արևելյան գործընկերություն ծրագիրը մեկնարկել է 2009 թվականի մայիսի 7-ին Պրահայում կայացած ԵՄ և Արևելյան գործընկեր պետությունների ղեկավարների գագաթնաժողովով (ԵՄ անդամ 27 երկիր + գործընկեր 6 երկիր` Հայաստան, Բելառուս, Վրաստան, Մոլդովա, Ադրբեջան, Ուկրաինա): Արևելյան գործընկերությունը նախատեսում է ավելի սերտ քաղաքական ասոցացում և տնտեսական ինտեգրում ԵՄ հետ՝ հատկապես խթանելով շարժունակությունը, էներգետիկ անվտանգությունը, տրանսպորտի ոլորտը, գյուղատնտեսությունը, բնապահպանության շուրջ համագործակցությունն ու մերձեցման քաղաքականությունը: 2022 թվականին ռուս-ուկրաինական պատերազմի մեկնարկից հետո Արևելյան գործընկերության շրջանակներում աշխատանքները դադարեցվել են։

15:28 - 26 նոյեմբերի, 2024

Հայաստան-Ադրբեջան խաղաղության պայմանագիրը հանգստություն և կայունություն կապահովի տարածաշրջանում. Թուրքիայի ՊՆ ղեկավար |tert.am|

tert.am: Ուզում եմ ևս մեկ անգամ ընդգծել, որ Կովկասում տարածաշրջանային խաղաղություն և կայունություն ձեռք կբերվի Ադրբեջանի և Հայաստանի միջև ստորագրվելիք համապարփակ խաղաղության պայմանագրով։ Այս մասին, hurriyet.com.tr կայքի փոխանցմամբ, հայտարարել է Թուրքիայի ազգային պաշտպանության նախարար Յաշար Գյուլերն ԱԺ-ում ՊՆ 2025 թվականի բյուջեի քննարկման ժամանակ:Նշենք, որ պաշտոնական Երևանն ու Բաքուն հայտարարել են, որ խաղաղության պայմանագրի մոտ 80%-ը համաձայնեցված է։ ՀՀ-ն առաջարկում է ստորագրել համաձայնեցված կետերի հիման վրա, այսպիսով ունենալ հիմնարար փաստաթուղթ և շարունակել քննարկել չլուծված հարցերը։ Սակայն Ադրբեջանն այս մոտեցումը համարում է կիսատ-պռատ: Ադրբեջանը պահանջում է Հայաստանից փոխել Սահմանադրությունը, քանի որ խնդրահարույց է համարում Անկախության հռչակագիրը, որում հղում կա Հայաստանի ու Լեռնային Ղարաբաղի միավորմանը։

13:46 - 26 նոյեմբերի, 2024