Բուլղարիա

Արարատ Միրզոյանն աշխատանքային այցով կմեկնի Բուլղարիա

Հունիսի 14-15-ը ՀՀ ԱԳ նախարար Արարատ Միրզոյանն աշխատանքային այցով կգտնվի Բուլղարիայում:Այցի շրջանակներում ՀՀ ԱԳ նախարարը հանդիպումներ կունենա Բուլղարիայի Հանրապետության նախագահի, վարչապետի, Ժողովրդական ժողովի նախագահի և ԱԳ նախարարի հետ: Հայտնում է ԱԳՆ-ն։ Հայաստանի և Բուլղարիայի ԱԳ նախարարներն իրենց հանդիպման արդյունքներով հանդես կգան մամուլի համար հայտարարությամբ:

12:54 - 13 հունիսի, 2022

ՀՀ նախագահը համատեղության կարգով դեսպաններ է նշանակել

13:52 - 11 հունիսի, 2022

Ադրբեջանը պատրաստվում է Բուլղարիային գազ մատակարարել 25 տարի |news.am|

news.am: Ադրբեջանի արտգործնախարար Ջեյհուն Բայրամովը Բուլղարիայի արտգործնախարար Թեոդորա Գենչովսկայայի հետ հանդիպումից հետո ասել է, որ Բուլղարիան շուտով կսկսի ադրբեջանական գազ ստանալ Հունաստան-Բուլղարիա միջհամակարգային գազատարով (IGB), հաղորդում են ադրբեջանական լրատվամիջոցները: «Ադրբեջանը Բուլղարիային գազ կմատակարարի 25 տարի, ինչպես ավելի վաղ համաձայնեցվել էր երկու երկրների միջեւ։ Այսօր Բուլղարիան Եվրոպայում ադրբեջանական գազ ստացող երեք երկրներից մեկն է։ Համոզված ենք, որ Հունաստանի հետ փոխկապակցման գծի շինարարությունը կավարտվի մոտ ապագայում, եւ Բուլղարիան կսկսի ադրբեջանական գազ ստանալ դրա միջոցով։ Սա մեծ ներդրում կլինի Բուլղարիայի էներգետիկ անվտանգության մեջ»,- ասել է Ադրբեջանի ԱԳՆ ղեկավարը։ Նշենք, որ ավելի վաղ Բուլղարիայի վարչապետ Կիրիլ Պետկովը հայտարարել էր, թե երկիրը հուլիսի 1-ից կկարողանա գազը ամբողջ ծավալով ստանալ Ադրբեջանից՝ անկախ Հունաստանի հետ միջհամակարգային գազատարի կառուցումից։

17:55 - 31 մայիսի, 2022

ՀՀ ԱԳ նախարարը և Բուլղարիայի ԱԳ նախարարի տեղակալը քննարկել են տնտեսական և մշակութային ոլորտներում համագործակցությանն առնչվող հարցեր

Մայիսի 27-ին Երևանում տեղի են ունեցել քաղաքական խորհրդակցություններ Հայաստանի Հանրապետության և Բուլղարիայի Հանրապետության արտաքին գործերի նախարարությունների միջև: Հայկական պատվիրակությունը գլխավորում էր ՀՀ ԱԳ նախարարի տեղակալ Պարույր Հովհաննիսյանը, բուլղարականը՝ Բուլղարիայի ԱԳ նախարարի տեղակալ Իրենա Դիմիտրովան: Խորհրդակցությունների ընթացքում զրուցակիցները քննարկել են հայ-բուլղարական երկկողմ քաղաքական օրակարգի հարցերի լայն շրջանակ, գոհունակությամբ ընդգծել քաղաքական երկխոսության բարձր մակարդակը: Մտքեր են փոխանակվել երկուստեք հետաքրքրություն ներկայացնող տարածաշրջանային և միջազգային օրակարգի մի շարք հարցերի շուրջ: Խորհրդակցությունների ավարտին Իրենա Դիմիտրովային ընդունել է ՀՀ ԱԳ նախարար Արարատ Միրզոյանը: Զրուցակիցներն անդրադարձել են հայ-բուլղարական երկկողմ համագործակցությանը, մասնավորապես, տնտեսական և մշակութային ոլորտներում, ինչպես նաև՝ բազմակողմ հարթակներում փոխգործակցությանը։ Հայկական կողմը կարևորել է Բուլղարիայի դիրքորոշումը Լեռնային Ղարաբաղի հակամարտության խաղաղ կարգավորման վերաբերյալ՝ հաջակցություն ԵԱՀԿ Մինսկի խմբի համանախագահության ջանքերի: Նույն օրը բուլղարական պատվիրակությունն այցելել է Հայոց ցեղասպանության թանգարան-ինստիտուտ և Հայոց ցեղասպանության զոհերի հուշահամալիր՝ հարգանքի տուրք մատուցելու Մեծ Եղեռնի զոհերի հիշատակին:

17:38 - 27 մայիսի, 2022

ԱԽ քարտուղարը Բուլղարիայի արտգործնախարարի տեղակալի հետ քննարկել է երկկողմ համագործակցությանն առնչվող հարցեր

Մայիսի 26-ին ԱԽ քարտուղար Արմեն Գրիգորյանը հանդիպել է Բուլղարիայի Հանրապետության Արտաքին գործերի նախարարի տեղակալ Իրենա Դիմիտրովայի հետ։ Այս մասին տեղեկացնում են ՀՀ ԱԽ գրասենյակից: Զրուցակիցները բարձր են գնահատել հայ-բուլղարական երկկողմ բարեկամական ու եղբայրական հարաբերությունների զարգացման ընթացքը: Քննարկելով հայ-բուլղարական հարաբերություններին առնչվող հարցերի լայն շրջանակ՝ ընդգծել են երկկողմ հարաբերությունների խթանման ու տարբեր ոլորտներում փոխշահավետ համագործակցության զարգացման հեռանկարները: Բուլղարիայի Արտաքին գործերի նախարարի տեղակալ տիկին Իրենա Դիմիտրովան ողջունել է Հայաստանի ջանքերն ու տարածաշրջանային անվտանգային միջավայրի ձևավորմանն ուղղված քայլերի իրականացումը: Հանդիպման ընթացքում զրուցակիցները նաև քննարկել են կեղծ տեղեկատվության ռիսկերն` որպես մերօրյա լուրջ մարտահրավեր, ինչի շրջանակներում անդրադարձ է կատարվել երկկողմ հետագա համագործակցությանը:

19:32 - 26 մայիսի, 2022

Բուլղարիան ԱՄՆ-ից ավելի էժան գնով գազ կներկրի, քան մատակարարում էր «Գազպրոմ»-ը |hetq.am|

hetq.am: Բուլղարիան պայմանավորվել է Ամերիկայի Միացյալ Նահանգներից ձեռքբերել սեղմված բնական գազ ավելի ցածր գնով, քան մինչ այդ ձեռք էր բերում «Գազպրոմից»-ից։ Այդ մասին նշվում է Բուլղարիայի կառավարության պաշտոնական կայք էջում։ Հայտարարության մեջ մասնավորապես նշվում է, որ մատակարարման մասին պայմանավորվել են Բուլղարիայի վարչապետ Կիրիլ Պետկովը և ԱՄՆ փոխնախագահ Քամալա Հարիսը։ Գազի առաջին մատակարարումը կսկսվի հունիսին։ Ապրիլի վերջին Բուլղարիան հրաժարվել էր ռուսական գազի դիմաց վճարել ռուբլով։ Դրանից հետո «Газпром»-ը դադարեցրել էր այդ երկիր սեղմված բնական գազի արտահանումը։ Մարտի 31-ին Ռուսաստանի նախագահ Վլադիմիր Պուտինը հրաման էր ստորագրել, համաձայն որի սկսած 2022 թվականի ապրիլի 1-ից ռուսական գազի համար ԵՄ անդամ երկրները պետք է վճարեն ռուսական ռուբլով։ Լուսանկարը՝ theusaprint.com-ից

21:00 - 11 մայիսի, 2022

ԵՄ երկրների էներգետիկայի նախարարները կքննարկեն գազի մատակարարման հետ կապված խնդիրները

Բրյուսելում այսօր կկայանա Եվրամիության երկրների էներգետիկայի նախարարների հանդիպումը։ Նրանք պետք է միասնական դիրքորոշում մշակեն՝ քննարկելով ընթացիկ իրավիճակը, որն առաջացել է Լեհաստանին և Բուլղարիային ռուսական գազի մատակարարումների դադարեցման առնչությամբ։ Դա տեղի է ունեցել այն բանից հետո, երբ այս երկրները հրաժարվել են գազի դիմաց ռուբլով վճարել, ինչպես Ռուսաստանն է պահանջում, գրում է Euronews-ը։ Կապույտ վառելիքի մատակարարման դիմաց վճարումների ընթացակարգի փոփոխման վերաբերյալ «Գազպրոմ» ընկերության պահանջները կապված են Մոսկվայի դեմ Արևմուտքի սահմանած պատժամիջոցների ազդեցությունը նվազեցնելու ձգտման հետ։ Նախկին սխեմայով վճարումներն իրականացնելուց Ռուսաստանի հրաժարումը ԵՄ-ն «շանտաժ» է անվանել։ Իսկ ՌԴ արտգործնախարար Սերգեյ Լավրովն իր վերջերս տված հարցազրույցում հայտարարել է, որ, գազի վաճառքից ստացված միջոցներն արգելափակելով, արևմտյան երկրները Ռուսաստանից «գողացել են» ավելի քան 300 մլրդ դոլար։ Գազի գների կտրուկ աճը Եվրամիությանը սպառնում է էներգետիկ ճգնաժամով։ Ռուսական գազի մատակարարման դադարեցման հեռանկարը կարող է լրջորեն ազդել Գերմանիայի տնտեսության վրա, որի գազի պահանջարկի 55%-ն ապահովում են մատակարարումները Ռուսաստանից։ ԵՄ մի շարք այլ երկրներ գազի առումով նույնպես մեծապես կախված են Մոսկվայից։ Նորա Վանյան

15:34 - 02 մայիսի, 2022

Լեհաստանն ու Բուլղարիան Ռուսաստանին մեղադրել են գազով շանտաժ անելու համար

Լեհաստանի և Բուլղարիայի առաջնորդները Մոսկվային մեղադրել են իրենց երկրների դեմ բնական գազը՝ որպես շանտաժի միջոց օգտագործելու համար այն բանից հետո, երբ ռուսական «Գազպրոմ» պետական ընկերությունը հայտարարել է, որ դադարեցնում է գազի մատակարարումները եվրոպական այս երկրներին, գրում է Associated Press-ը։ Գազի մատակարարման դադարեցման հիմքն այն է, որ նախորդ ամիս Ռուսաստանի նախագահ Վլադիմիր Պուտինը հայտարարել է, որ «ոչ բարեկամ երկրները» պետք է գազի դիմաց ռուբլով վճարեն, ինչը Բուլղարիան ու Լեհաստանը հրաժարվել են անել։ Ռուսական «Գազպրոմ» էներգետիկ հսկան իր հայտարարությունում նշել է, որ ապրիլի մեկից Լեհաստանից և Բուլղարիայից ոչ մի վճարում չի ստացել, հետևաբար՝ դադարեցնում է գազի մատակարարումը։ Լեհաստանի վարչապետ Մատեուշ Մորավեցկին երկրի խորհրդարանում հայտարարել է, որ գազի մատակարարումների դադարեցումը վրեժ է համարում Ռուսաստանի դեմ նոր պատժամիջոցների համար, որոնք Վարվաշան սահմանել է ուկրաինական պատերազմի առնչությամբ։ Նորա Վանյան

16:00 - 27 ապրիլի, 2022

«Գազպրոմ»-ն ամբողջությամբ դադարեցրել է գազի մատակարարումը Բուլղարիա և Լեհաստան՝ ռուբլով չվճարելու պատճառով |tert.am|

tert.am: Ռուսական «Գազպրոմը» ամբողջությամբ դադարեցրել է բուլղարական Bulgargaz և լեհական PGNiG ընկերություններին գազի մատակարարումը՝ ռուբլով ժամանակին չվճարելու պատճառով, ասվում է հոլդինգի հաղորդագրության մեջ, հայտնել է kommersant.ru-ն:«Գազպրոմ Էքսպորտը» ծանուցել է Bulgargaz-ին և PGNiG-ին ապրիլի 27-ից գազի մատակարարումը դադարեցնելու մասին, մինչև վճարումը կատարվի հրամանագրով սահմանված կարգով», - հայտնել է «Գազպրոմը»:Հաղորդագրությունում նշվում է, որ «Գազպրոմ Էքսպորտը» ապրիլի 26-ի գործունեության ավարտի դրությամբ այդ ընկերություններից ապրիլին գազի մատակարարումների համար վճարումներ չի ստացել: Առավել մանրամասն՝ tert.am-ում

11:13 - 27 ապրիլի, 2022

ՌԴ ԱԳՆ-ն պերսոնա նոն գրատա է հայտարարել Մոսկվայում Բուլղարիայի դեսպանատան աշխատակիցներին |factor.am|

factor.am: ՌԴ ԱԳՆ-ն պերսոնա նոն գրատա է հայտարարել Մոսկվայում Բուլղարիայի դեսպանատան աշխատակիցներին։ Նախարարությունը չի հստակեցրել, թե քանի դիվանագիտական աշխատողի մասին է խոսքը, գրում է BBC-ի ռուսական ծառայությունը: Տեղեկացվում է, որ այս միջոցը պատասխանն է Բուլղարիայի իշխանությունների՝ Սոֆիայում Ռուսաստանի դեսպանատան տասը աշխատակցի արտաքսելու «անհիմն որոշման»։ Հավելենք, որ մարտի 18-ին Բուլղարիան պերսոնա նոն գրատա է հայտարարել 10 ռուս դիվանագետների։

21:20 - 18 ապրիլի, 2022

Բուլղարիան արգելում է ռուսական նավերին իր նավահանգիստներ մտնել

Ապրիլի 16-ից Բուլղարիան փակում է իր ծովային և գետային նավահանգիստները ռուսական նավերի, ինչպես նաև այն նավերի համար, որոնք ռուսական դրոշը փոխել են Ուկրաիայում հակամարտության մեկնարկից հետո։ «2022 թ-ի ապրիլի 16-ին ժամը 00:00-ից արգելվում է բուլղարական և գետային նավահանգիստների մուտքը բոլոր նավերի համար, որոնք ռուսական դրոշի ներքո են գրանցված և այն նավերի համար, որոնք փոխել են ռուսական դրոշը կամ դրոշի ներքո գրանցումը կամ որոնց ռեեստրն այլ երկիրն է 2022 թ-ի փետրվարի 24-ից», - ասված է Բուլղարիայի ծովային վարչակազմի հայտարարությունում, գրում է «Կոմերսանտը»։ Արգելքը սահմանվում է ԵՄ Կանոնակարգում արված փոփոխությունների հիման վրա, որոնց համաձայն՝ սահմանափակումներ են գործում Ռուսաստանի գործողությունների պատճառով, որոնք ապակայունացնում են իրավիճակն Ուկրաինայում, ասված է փաստաթղթում։ Ապրիլի 16-ին նույնպիսի որոշում է կայացրել Իտալիան։ Բելգիայի և Ռումինիայի իշխանությունները նույնպես ռուսական նավերին արգելել են իրենց նավահանգիստներ մտնել։ Այս միջոցները ձեռնարկվում են ԵՄ պատժամիջոցների հինգերորդ փաթեթի շրջանակում, որն արգելում է ռուսական նավերի մուտքը ԵՄ նավահանգիստներ։ Նորա Վանյան

14:35 - 17 ապրիլի, 2022

Բուլղարիայի նախկին վարչապետ Բոյկո Բորիսովն ազատ է արձակվել կալանքից |news.am|

news.am: Բուլղարիայի նախկին վարչապետ և ընդդիմադիր ԳԵՐԲ կուսակցության առաջնորդ Բոյկո Բորիսովը մարտի 18-ի գիշերն ազատ է արձակվել կալանքից մոտ մեկ օր անց իր և իր նախկին կառավարության երկու գործիչների ձերբակալությունից հետո, գրում է Sofia Globe-ը։ Միջոցառման ժամանակ, որը ցուցադրվել է ազգային հեռուստաալիքների ուղիղ եթերում, Բորիսովը հայտնվել է կուսակցության հավաքված աջակիցների մեջ՝ իր կալանավորումը որպես «դաժան, զզվելի» բնութագրելով և հավելելով, որ «նրանք վերադարձրին մեզ կոմունիզմը»։ Ավելի վաղ հայտնի էր դարձել, որ ԵՄ միջոցները չարաշահելու կասկածանքով կալանավորվել է Բուլղարիայի նախկին վարչապետը։ Սակայն նա, ինչպես և ֆինանսների նախկին նախարար Վլադիսլավ Գորանովը և Բորիսովի կառավարության նախկին մամուլի քարտուղար Սևդալինա Առնաուդովան, առանց մեղադրանքի առաջադրման, ազատ արձակվեցին: Բուլղարական օրենսդրությամբ թույլատրված 24-ժամյա ոստիկանական կալանքից հետո նրանց կալանքի տակ պահելը դատախազի հրաման կպահանջեր՝ կալանքը մինչև 72 ժամ երկարացնելու համար, որն իր հերթին կարող է երկարաձգվել դատարանի պահանջով: «Ես անհանգստանում եմ, որ հաջորդ անգամ նրանք կարող են ինձ սպանել»,- լրագրողներին ասել է Բորիսովը։ Իր հերթին Բորիսովի փաստաբան Մենկո Մենկովը լրագրողներին ասել է, որ որևէ մեղադրանք չի առաջադրվել, կալանավորման համար որպես հիմք ծառայել էր շորթումը, սակայն նշված չէր, թե ով էր այդ շորթման օբյեկտը, երբ, ինչպես և ինչ պատճառներով էր այն կատարվել:

11:11 - 19 մարտի, 2022

Բուլղարիայի ԱԳՆ-ն «պերսոնա նոն գրատա» է հայտարարել 10 ռուս դիվանագետների

Բուլղարիայի ԱԳՆ-ն «պերսոնա նոն գրատա» է հայտարարել 10 ռուս դիվանագետների։ Այս մասին ՏԱՍՍ-ին հայտնել է Բուլղարիայում ՌԴ դեսպան Էլեոնորա Միտրոֆանովան։ «Տասը դիվանագետներ հայտարարվել են «պերսոնա նոն գրատա», ձևակերպումը սովորական է՝ «իրենց կարգավիճակի հետ անհամատեղելի գործունեություն»։ Մենք դա ընկալում ենք որպես ծայրահեղ անբարյացակամ արարք և մեզ իրավունք ենք պատասխան գործողություններ իրականացնել», - ասել է նա։ Բուլղարիայի ԱԳՆ-ն էլ հայտնել է, որ նշված դիվանագետները 72 ժամ ունեն երկրի տարածքը լքելու համար։

17:22 - 18 մարտի, 2022

ԵՄ միջոցները չարաշահելու կասկածանքով կալանավորվել է Բուլղարիայի նախկին վարչապետը

Բուլղարիայի նախկին վարչապետ Բոյկո Բորիսովը կալանավորվել է Եվրամիության միջոցները չարաշահելու կասկածանքով։ Ոստիկանությունը խարդախության ԵՄ աջակցությանն առնչվող 120 դեպքերի հետաքննությունից հետո մի շարք ձերբակալություններ է իրականացրել: Այս մասին գրում է DW-ն։ Հինգշաբթի օրը ոստիկանությունը կալանավորել է Բուլղարիայի նախկին վարչապետ Բոյկո Բորիսովին՝ ոստիկանական գործողության շրջանակներում, որը հետևել է ԵՄ դատախազության հետաքննությանը։ Դատախազները 120 հետաքննություն են սկսել ԵՄ միջոցներին առնչվող հնարավոր հանցագործության վերաբերյալ: Մեղադրանքները վերաբերում են պետական մրցույթներին, գյուղատնտեսական սուբսիդիաներին, շինարարությանը և կորոնավիրուսի վերականգնման հիմնադրամներին։ Լուսանկարը՝ Xinhua-ի

09:58 - 18 մարտի, 2022

Բուլղարիան պատրաստ չէ աջակցել ռուսական էներգակիրների վերաբերյալ Եվրամիության պատժամիջոցներին. վարչապետ Կիրիլ Պետկով

Բուլղարիայի վարչապետ Կիրիլ Պետկովը հայտարարել է, որ Սոֆիան պատրաստ չէ աջակցել ռուսական էներգակիրների վերաբերյալ Եվրամիության պատժամիջոցներին։ «Ամբողջությամբ աջակցում ենք Ուկրաինային, մեկ այլ պետություն չի կարող խախտել միջազգային օրենքներն ու ռմբակոծել հարեւան պետությունը։ Ամբողջությամբ աջակցում ենք գոյություն ունեցող պատժամիջոցներին եւ աշխատում ենք ԵՄ-ի հետ, որպեսզի ձեռնարկված միջոցառումները հնարավորինս ուժեղ լինեն, բայց մենք չենք կարող նավթի ու գազի մատակարարումների սահմանափակում թույլ տալ»,- հայտարարել է Պետկովը։ Ինչպես հաղորդել է Բուլղարիայի նախագահի մամուլի ծառայությունը, նախագահ Ռումեն Ռադեւը համաձայնել է վարչապետի դիրքորոշման հետ․ «Եթե ուզում ենք ոչնչացնել մեր տնտեսությունը, ապա կարող ենք նաեւ դա անել (սահմանափակել նավթի ու գազի մատակարարումները)»,- ասել է Ռադեւը՝ հույս հայտնելով, որ իշխանության մարմինները ճգնաժամի պայմաններում կգործեն ակտիվ, արդյունավետ եւ պրոֆեսիոնալ։

21:01 - 08 մարտի, 2022

Անուշ Բեղլոյանը Բուլղարիայի դեսպանի հետ խոսել է ՀՀ ինքնիշխան տարածք Ադրբեջանի ԶՈՒ-ի ներխուժման մասին

ՀՀ ԱԺ Հայաստան-Բուլղարիա բարեկամական խմբի ղեկավար Անուշ Բեղլոյանը հունվարի 21-ին հանդիպել է Հայաստանի Հանրապետությունում Բուլղարիայի Հանրապետության արտակարգ եւ լիազոր դեսպան Կալին Վասիլեւ Անաստասովի հետ: Այս մասին տեղեկացնում են Ազգային ժողովի լրատվության և հանրության հետ կապերի վարչությունից: Ողջունելով դեսպանին` Անուշ Բեղլոյանը հայ-բուլղարական հարաբերությունների զարգացման գործում կարեւորել է խորհրդարանների բարեկամական խմբերի սերտ համագործակցությունը: Պատգամավորը խոսել է միջազգային տարբեր կառույցներում փոխգործակցության խորացման անհրաժեշտության մասին: Բարեկամական խմբի ղեկավարը ներկայացրել է տարածաշրջանում առկա հետպատերազմյան իրավիճակը եւ մասնավորապես սահմանային իրադրությունը: Անուշ Բեղլոյանը խոսել է ՀՀ ինքնիշխան տարածք ադրբեջանական զինված ուժերի ներխուժման անթույլատրելիության մասին, այս հարցում կարեւորել միջազգային հանրության եւ բարեկամ երկրների ընդգծված վերաբերմունքն ու գործուն քայլերը: Բուլղարիայի դեսպանը նշել է, որ իրենք հետեւում են տարածաշրջանում տեղի ունեցող գործընթացներին, եւ կիսում են իրավիճակի վերաբերյալ ԵՄ դիրքորոշումը: Կալին Վասիլեւ Անաստասովը խոսել է երկու երկրների եւ ժողովուրդների միջեւ առկա բարեկամական հարաբերությունների եւ մշակութային ընդհանրությունների մասին: Դեսպանը երկկողմ կապերի ամրապնդման գործում կարեւորել է Բուլղարիայի հայ համայնքի դերակատարությունը: Հյուրի խոսքով` համայնքն ակտիվ մասնակցություն ունի երկրի քաղաքական- հասարակական կյանքում: Համաձայնելով, որ մի շարք ոլորտներում կա չօգտագործված մեծ ներուժ, կողմերը պատրաստակամություն են հայտնել քայլեր ձեռնարկելու նաեւ այդ ուղղությամբ: Նշվել է, որ Սեւծովյան տնտեսական համագործակցության խորհրդարանական վեհաժողովում կարեւոր է երկրների համագործակցության ակտիվացումը` տարածաշրջանում տրանսպորտային եւ այլ տնտեսական համագործակցության ծրագրեր իրականացնելու նպատակով:

20:52 - 21 հունվարի, 2022