Հնդկաստան

Քերոբյանը Հնդկաստանի, Իրանի, Վրաստանի, Հայաստանի փորձագետներին է ներկայացրել «Խաղաղության խաչմերուկի» ընձեռած հնարավորությունները

Նախարար Վահան Քերոբյանը դեկտեմբերի 4-ին ընդունել է «Նոր տարածաշրջանային իրողությունները և «Խաղաղության խաչմերուկը»» խորագրով փորձագիտական համաժողովի պատվիրակությանը, որի կազմում են փորձագետներ Հնդկաստանից, Իրանից, Վրաստանից և Հայաստանից։ Այդ մասին հայտնում են էկոնոմիկայի նախարարությունից: Հանդիպման ընթացքում նախարարը ներկայացրել է ՀՀ Կառավարության մշակած «Խաղաղության խաչմերուկ» նախագիծը՝ մատնանշելով ընձեռվող տնտեսական և կապուղիների զարգացման հնարավորությունները։ Վահան Քերոբյանը հյուրերին ներկայացրել է նաև Հայաստանում ստեղծված բարենպաստ գործարար և ներդրումային միջավայրը, առանձին անդրադարձել Գյումրիում «չոր նավահանգստի» կառուցման նախագծին։

17:12 - 04 դեկտեմբերի, 2023

Հայաստանն ու Հնդկաստանը քննարկել են էներգետիկ ոլորտում համագործակցությանը վերաբերող հարցեր

Հայաստանի տարածքային կառավարման և ենթակառուցվածքների նախարար Գնել Սանոսյանը տեսակապով քննարկում է անցկացրել Հնդկաստանի նոր և վերականգնվող էներգիայի նախարար Ռաջ Կումար Սինգհի հետ: Ինչպես հայտնում են ՀՀ ՏԿԵ նախարարությունը, նախարարը ողջունել է Ռաջ Կումար Սինգհին և ընդգծել, որ հատկապես վերջին շրջանում հայ-հնդկական հարաբերություններն արագ տեմպերով զարգանում են։ Նախարարը կարևորել է նաև օրերս Հայաստանի՝ Միջազգային արևային դաշինքին միանալու փաստը և հույս է հայտնել, որ այդ շրջանակներում ևս հարաբերությունները նույն տեմպով կզարգանան։ Հանդիպման ընթացքում քննարկվել են էներգետիկ ոլորտում երկկողմ և բազմակողմ համագործակցության վերաբերյալ հարցեր։ Նախարար Սանոսյանը կարևորել է հնդկական ընկերությունների մասնակցությունը Հայաստանի էներգետիկ ենթակառուցվածքների կառուցման, վերակառուցման, արդիականացման նախագծերում։ Կարևորվել է նաև համապատասխան մասնագիտական խմբերի փոխադարձ այցերը Հայաստան և Հնդկաստան՝ փորձի փոխանակման և կարողությունների զարգացման նպատակով։

11:59 - 23 նոյեմբերի, 2023

Հայաստանը Հնդկաստանից կստանա MArG 155 տեսակի անվավոր ինքնագնաց հաուբիցներ |armenpress.am|

armenpress.am: Հրետանային համակարգերի արտադրությամբ զբաղվող հնդկական Bharat Forge ընկերությունը հաստատել է, որ վերջերս ցուցադրված MArG 155 անվավոր ինքնագնաց հաուբիցները նախատեսված են Հայաստանի համար: Այս մասին հաղորդում է հնդկական IDRW (Indian Defence Research Wing) հարթակը՝ նշելով, որ սա լուրջ ձեռքբերում է Հնդկաստանի համար, որը ջանքեր է գործադրում տեղական արտադրության պաշտպանական սպառազինությունը միջազգային գործընկերներին արտահանելու ուղղությամբ: «Հայաստանի հետ գործարքը հիմնված է երկու երկրների միջև ռազմավարական համագործակցության վրա, որի արդյունքում Հնդկաստանը պաշտպանական սպառազինության առանցքային մատակարար է դարձել Հայաստանի համար: 2020 թվականին Հայաստանը Հնդկաստանից ձեռք է բերել 4 միավոր Swathi շարժական ռադարներ, իսկ 2022 թվականի սեպտեմբերին ստորագրվել է Pinaka բազմափող հրթիռային կայանների, հակատանկայի հրթիռների և տարբեր տեսակի զինամթերքի ձեռքբերման 245 միլիոն դոլարի պայմանագիր», - գրում է պարբերականը: «MArG 155-ը արդիական հրետանային համակարգ է, որում միավորված են հզորությունը, ճշգրտությունը և շարժունակությունը: Սարքավորված լինելով 155 մմ-անոց 39 տրամաչափի թնդանոթով և քարշակող 4 անիվներով, այն բացառիկ մանևրականություն է ապահովում ցանկացած տեղանքում: Մինչև 30 աստիճան անկյունները հաղթահարելու, ինչպես նաև «կրակել և փախչելու» կարողություններն այն դարձնում են ճկուն և ահեղ զենք մարտական ժամանակակից իրավիճակներում», - հավելում է հարթակը։

12:48 - 20 նոյեմբերի, 2023

Քաղաքական խորհրդակցություններ ՀՀ-ի և Հնդկաստանի ԱԳՆ-ների միջև. Մնացական Սաֆարյանը հնդիկ գործընկերոջն է ներկայացրել «Խաղաղության խաչմերուկ» նախագիծը

Նոյեմբերի 18-ին Նյու Դելիում կայացել են Հայաստանի և Հնդկաստանի արտաքին գործերի նախարարությունների միջև քաղաքական 10-րդ հերթական խորհրդակցությունները՝ Հայաստանի Հանրապետության ԱԳ նախարարի տեղակալ Մնացական Սաֆարյանի և Հնդկաստանի Հանրապետության ԱԳ նախարարի Արևմտյան ուղղության հարցերով քարտուղար-տեղակալ Սանջայ Վերմայի գլխավորությամբ: Կողմերը քննարկել են Հայաստանի և Հնդկաստանի միջև ավանդական բարեկամության և քաղաքակրթական կապերի վրա խարսխված, վերջին շրջանում դինամիկ կերպով զարգացող փոխգործակցությանը, երկկողմ քաղաքական բարձր մակարդակի շփումներին և երկխոսության օրակարգին առնչվող հարցեր: Զրուցակիցներն անդրադարձել են նաև առևտրատնտեսական կապերի ընդլայնմանը, հաղորդակցային ուղիների տարբեր ոլորտային նախաձեռնությունների իրականացմանը, ինչպես նաև բազմակողմ մի շարք հարթակներում փոխշահավետ համագործակցությանը: Մնացական Սաֆարյանը փոխանցել է ՀՀ ԱԳ նախարար Արարատ Միրզոյանի ողջույններն ուղղված Հնդկաստանի ԱԳ նախարար Սուբրահմանյամ Ջայշանկարին: ՀՀ ԱԳ նախարարի տեղակալը ներկայացրել է «Խաղաղության խաչմերուկ» նախագիծը՝ ընդգծելով դրա առավելությունները՝ և՛ տնտեսական և՛ տարածաշրջանի երկրների համար խաղաղության երաշխիք հանդիսանալու համատեքստում: Անդրադարձ է կատարվել Հայաստանի և Ադրբեջանի միջև հարաբերությունների կարգավորման ուղղությամբ միջազգային ջանքերին: Մնացական Սաֆարյանը գործընկերոջը ներկայացրել է նաև Ադրբեջանի կողմից էթնիկ զտումների քաղաքականության հետևանքով Լեռնային Ղարաբաղից բռնի տեղահանված 100 հազարից ավել հայ փախստականներին Հայաստանում պատշաճ ընդունելու ուղղությամբ ՀՀ կառավարության ձեռնարկած միջոցառումները՝ կարևորելով նաև միջազգային գործընկերների աջակցությունը: Երկկողմ կրթամշակութային նախանշված ծրագրերի իրականացման և հնարավոր այլ ոլորտներում փոխշահավետ գործակցության շուրջ մտքեր են փոխանակվել նաև Հնդկաստանի Հանրապետության ԱԳ և մշակույթի պետնախարար Մինակշի Լեկհիի հետ: Ընդգծվել է Հարավային Կովկասում հայկական պատմամշակութային ժառանգության պաշտպանության կարևորությունը:

13:57 - 19 նոյեմբերի, 2023

Հնդկաստանը Հայաստանին 30 մմ և 40 մմ նռնակներ կմատակարարի․ IADN

Հնդկաստանը Հայաստանին 30 մմ և 40 մմ նռնակներ կմատակարարի։ Այս մասին գրում է Indian Aerospace Defence News-ը X-ի միկրոբլոգում։ ««Munitions India Limited»-ը 150 հազար միավոր նռնակ կմատակարարի Հայաստան։ 2 ամիս առաջ MIL ընկերությունը Հայաստան էր մատակարարել 5 միլիոն միավոր 7,62 մմ տրամաչափի փամփուշտ»,- նշված է աղբյուրի գրառման մեջ։

10:05 - 16 նոյեմբերի, 2023

Այն, ինչ այսօր կատարվում է, դրական եմ գնահատում. Սեյրան Օհանյանը՝ Հնդկաստանից եւ Ֆրանսիայից զենք գնելու մասին |news.am|

13:40 - 15 նոյեմբերի, 2023

Բայրամովը մեկնել է Մարոկկո |azatutyun.am|

azatutyun.am: Ադրբեջանի արտգործնախարար Ջեյհուն Բայրամովը պաշտոնական այցով երեկ մեկնել է Մարոկկո։Ըստ Բաքվի՝ այցի շրջանակներում Բայրամովը կհանդիպի Մարոկկոյի արտաքին գործերի նախարարի, Իսլամական աշխարհի կրթական, գիտական և մշակութային կազմակերպություն (ISESCO) գլխավոր տնօրենի և այլ բարձրաստիճան պաշտոնյաների հետ։

09:09 - 13 նոյեմբերի, 2023

Հայաստանի և Հնդկաստանի միջև ուղիղ չվերթերը կարող են մեկնարկել 2024 թվականին. ԱԳՆ |armeniasputnik.am|

armeniasputnik.am: Հայաստանի և Հնդկաստանի միջև ուղիղ չվերթերը կարող են մեկնարկել 2024 թվականին։ Այս մասին The Economic Times պարբերականին տված հարցազրույցում ասել է ՀՀ փոխարտգործնախարար Մնացական Սաֆարյանը։ Ավելի վաղ հայտնի էր դարձել, որ հայկական և հնդկական ավիաընկերությունները հետաքրքրված են Երևան-Դելի ուղղությամբ ուղիղ չվերթեր իրականացնելու հարցում։ «Մենք նաև բանակցություններ ենք վարում Հնդկաստանի և Հայաստանի միջև ուղիղ չվերթերի մեկնարկի վերաբերյալ, և հուսով եմ, որ թռիչքները կարող են մեկնարկել հաջորդ տարի»,-ասել է Սաֆարյանը: Հիշեցնենք, որ տարածքային կառավարման և ենթակառուցվածքների նախարար Գնել Սանոսյանը 2024 թվականի պետական բյուջեի նախագծի վերաբերյալ Ազգային ժողովի մշտական հանձնաժողովների նիստում դեռևս 2023 թվականի հոկտեմբերին հայտարարել էր, որ աշխատանքներ են տարվում Հնդկաստանից և Չինաստանից ուղիղ չվերթեր իրականացնելու ուղղությամբ։ Հնդկաստանի հարցում կողմերն արդեն մոտենում են հարցի լուծմանը։

12:22 - 09 նոյեմբերի, 2023

Հայաստանը Հնդկաստանից հակադրոնային համակարգ է գնում․ Eurasian Times |armenpress.am|

armenpress.am: Հայաստանը Հնդկաստանից գնում է անօդաչու թռչող սարքերի դեմ պայքարի համակարգ։ Այս մասին գրում է Eurasian Times պարբերականը՝ վկայակոչելով իր աղբյուրներին։ Նշվում է, որ Հայաստանը պայմանագիր է կնքել Հնդկաստանի կողմից մշակված Zen հակադրոնային համակարգ գնելու շուրջ։ Պայմանագրի արժեքը կազմում է 41,5 միլիոն ԱՄՆ դոլար։ Դրա մեջ ներառված են ինչպես հակադրոնային համակարգը, այնպես էլ զինվորների վերապատրաստումը։ Ըստ հրապարակման՝ Zen Technologies ընկերության կողմից մշակված հակադրոնային համակարգը տեղորոշում է և դասակարգում ԱԹՍ-ները, հայտնաբերում է դրանց կողմից իրականացվող պասիվ հետախուզությունը, ինչպես նաև վերացնում է սպառնալիքը՝ խափանելով ԱԹՍ-ների կապի համակարգը։ Zen Technologies-ը հայտարարել է, որ 2023 թ․ հոկտեմբերի 28-ին կայացած խորհրդի հանդիպման ընթացքում հավանություն է տրվել Հայաստանում մասնաճյուղի բացմանը։ Պարբերականը հիշեցնում է, որ 2022 թ․ Հնդկաստանը Հայաստանի հետ պայմանագիր է կնքել 250 միլիոն ԱՄՆ դոլարի «Պինակա» համազարկային կրակի ռեակտիվ համակարգի, հակատանկային զինամթերքի և այլ ռազմամթերքի մատակարարման շուրջ։

15:17 - 08 նոյեմբերի, 2023

Նեպալում տեղի ունեցած երկրաշարժի հետևանքով առնվազն 140 մարդ է զոհվել |1lurer.am|

1lurer.am: Հնդկաստանի և Նեպալի սահմանին 6,0 մագնիտուդով երկրաշարժ է գրանցվել: Նեպալում առնվազն 140 մարդ է մահացել, տասնյակ մարդիկ վիրավորվել են: Կան անհետ կորածներ, որոնողափրկարարական աշխատանքները բարդանում են, քանի որ լեռնային մի շարք շրջանների հետ հաղորդակցությունը խաթարվել է: Արևմտյան լրատվամիջոցները գրում են, որ ըստ ականատեսների՝ Նյու Դելիում և Հնդկաստանի այլ քաղաքներում ևս ուժեղ ցնցումներ են եղել։

13:46 - 04 նոյեմբերի, 2023

Հնդկաստանի հետ կլինեն նոր զարգացման ուղություններ․ ՀՀ ԱԳ նախարար |armtimes.com|

armtimes.com: ՀՀ Ազգային ժողովի 2024 թ. պետական բյուջեի նախագծի նախնական քննարկման ընթացքում ԱԳ նախարար Արարատ Միրզոյանը հայտնեց Հնդկաստանի ORF հիմնադրամի հետ իրականացվող «Ռաիսինա երկխոսություն» («Raisina Dialogue») ամենամյա ծրագրի մասին։ Ըստ նրա՝ նախատեսվում է կազմակերպել Երևանում 2024 թվականի սեպտեմբերին համանուն միջազգային համաժողով։ «Հնդկաստանի հետ մեր հարաբերություններիր զարգացումը հրապարակային է։ Կլինեն նոր ուղղություններ, նոր ծրագրեր, որոնց մասին ստացվելու դեպքում կհայտնենք։ Սա մեծ հնարավորություն կտա մեզ և՛ զարգացնելու մեր հարաբերությունները, և՛ ունենալու այլ հյուրեր, և՛, առհասարակ, Հայաստանը միջազգային քաղաքական, գիտական, նորարական լույսի ներքո ներկայացնելու»,- ասաց նա։

12:21 - 03 նոյեմբերի, 2023

ԱԺ փոխխոսնակը Հնդկաստանի պատվիրակության պատգամավորներին է ներկայացրել ՀՀ-ի կողմից առաջ քաշվող «Խաղաղության խաչմերուկի» գաղափարը

Միջխորհրդարանական միության 147-րդ վեհաժողովի շրջանակում ՀՀ ԱԺ նախագահի տեղակալ Հակոբ Արշակյանի գլխավորած պատվիրակությունը հանդիպել է Միջխորհրդարանական միությունում Հնդկաստանի պատվիրակությանը: Այդ մասին հայտնում են ԱԺ-ից: Հակոբ Արշակյանը նշել է, որ Հայաստանի արտաքին քաղաքականության առաջնահերթությունը բազմակողմ հարաբերությունների ամրապնդումն ու խորացումն է Հնդկաստանի հետ, որն աշխարհի խոշորագույն և ամենադինամիկ զարգացող ժողովրդավար պետություններից մեկն է։ Փոխխոսնակը կարևորել է միջխորհրդարանական համագործակցությունը, որը մշտապես գտնվել է բարձր մակարդակի վրա, և առանցքային դեր է խաղում մեր պետությունների միջև համագործակցության զարգացման գործում: «Ազգային ժողովում գործող Հայաստան-Հնդկաստան բարեկամական խումբը, որը ես պատիվ ունեմ ղեկավարելու, ավանդաբար ամենամեծ խմբերից մեկն է: Ես լիահույս եմ Հայաստանի հետ բարեկամության խմբի ստեղծմանը նաև Հնդկաստանի խորհրդարանում, ինչը հիանալի հնարավորություն կընձեռի ակտիվ համագործակցության համար»,- նշել է Հակոբ Արշակյանը: «Հայաստանը շահագրգռված է բարեկամ Հնդկաստանի հետ տարբեր ոլորտներում փոխշահավետ համագործակցության զարգացմամբ, այդ թվում՝ պաշտպանության, մշակույթի, գիտության և կրթության, բարձր տեխնոլոգիաների, զբոսաշրջության և այլ ոլորտներում: Հակոբ Արշակյանը ներկայացրել է Հայաստանի կողմից առաջ քաշվող «Խաղաղության խաչմերուկի» գաղափարը՝ շեշտելով տարածաշրջանի խաղաղության համար ճանապարհային քարտեզի կարևորությունը: Հնդկաստանի պատվիրակության պատգամավորներն ընդգծել են, որ Հայաստանը Հնդկաստանի համար առանցքային գործընկեր է՝ նշելով, որ կողմերի հարաբերություններն այսօր արտացոլում են հնդիկ և հայ ժողովուրդների դարավոր բարեկամությունը: Հնդիկ պատգամավորները նշել են, որ Մադրասում և Կալկաթայում են գտնվում հայկական եկեղեցիներ և կրթօջախներ: Առաջին հայկական տպագրությունն իրականացվել է Հնդկաստանում, նույնիսկ հնդկական առաջին ձայնային սկավառակի ձայնագրությունն իրագործվել է հայազգի դասական երգչուհու կատարմամբ: Կողմերը կարևորել են նաև Հնդկաստանի ԱԳ նախարարի՝ պատմության մեջ առաջին անգամ այցն անկախ Հայաստան: Հնդկաստանի պատվիրակության պատգամավորները շնորհակալություն են հայտնել 4000-ից ավելի հնդիկ ուսանողների համար Հայաստանում կրթության հնարավորության կապակցությամբ: Պատգամավորները պատրաստակամություն են հայտնել ջանքեր գործադրել հարաբերությունների զարգացման համար: Հայկական պատվիրակության կազմում են պատգամավորներ Ծովինար Վարդանյանը և Արսեն Թորոսյանը:

16:34 - 27 հոկտեմբերի, 2023

Հնդկաստանը մտադիր է ավելի շատ զենք մատակարարել Հայաստան |civilnet.am|

civilnet.am: Հնդկաստանը դիտարկում է Հայաստանին ռազմական տեխնիկայի նոր խմբաքանակ մատակարարելու հնարավորությունը, գրում է հնդկական The Economic Times պարբերականը։ «Հայ բարձրաստիճան պաշտոնյան վերջերս այցելեց Դելի և քննարկումներ անցկացրեց հարցի շուրջ։ Հնդկաստանը համարվում է որպես զենքի հուսալի մատակարար, որը կարող է բավարարել Հայաստանի պահանջները։ Դեռևս հայտնի չեն նոր մատակարարումների մանրամասները, սակայն խմբաքանակը կարող է ներառել սարքավորումներ, որոնք ուղղված են Պակիստանի և Թուրքիայի աջակցությամբ՝ Ադրբեջանի հետ շարունակվող հակամարտությունում Հայաստանի կարողությունների ամրապնդմանը»,- գրում է կայքը։ Հնդկաստանի նախորդ խմբաքանակը Հայաստան ներառում էր Pinaka hամազարկային կրակի ռեակտիվ համակարգեր, հակատանկային միջոցներ և այլ զինամթերք: Հաղորդվում է, որ զենքի մատակարարումն իրականացվել է Իրանի տարածքով։ «Ադրբեջանի կողմից անօդաչու թռչող սարքերի օգտագործումն է հիմնական պատճառը, որ Հայաստանը գնում Pinaka համակարգը, քանի որ դրա «կրակել և տեղաշարժվել» հնարավորությունը թույլ է տալիս խուսափել հակառակորդի մարտկոցների կրակից: Դրա ցածր արժեքը և օգտագործման պարզությունը նաև այն դարձնում են իդեալական սպառազինության համակարգ Հայաստանի համար»,- գրում է The Economic Times-ը։ Պարբերականը նշում է, որ հայկական բանակը հեշտությամբ կարող է օգտագործել Pinaka-ն, քանի որ այն նաև նման է ռուսական արտադրության «Գրադ» համակարգին: Լրատվամիջոցը մեջբերում է Հայաստանի ԱԺ պաշտպանության հանձնաժողովի նախագահ Անդրանիկ Քոչարյանի խոսքերը, որը հայտարարել է, որ Հայաստան բերված նոր զինատեսակները ներկայումս փորձարկվում են հայ զինվորականների կողմից, և արդյունքները «շատ գոհացուցիչ են»։

10:59 - 27 հոկտեմբերի, 2023

Գիշերն իրավիճակը լարված է եղել Հնդկաստանի և Պակիստանի սահմանին․ հաղորդվել է զոհերի մասին |news.am|

news.am: Սրվել է իրավիճակը Հնդկաստանի և Պակիստանի սահմանին։ Հաղորդվում է հոկտեմբերի 26-ին՝ տեղական ժամանակով 20։00-ին սկսված փոխհրաձգության մասին։ Պակիստանի զինված ուժերը որպես փոխհրաձգության առիթ են նշում «հնդկական կվադրոկոպտերի (նկարահանող ԱԹՍ) մոտենալն» իրենց սահմանին։ Հնդկական կողմը հաղորդում է Պակիստանի կողմից անառիթ կրակահերթերի մասին, որոնց իրենք «արժանի պատասխան են տվել»։ Զոհերի և վիրավորների մասին պաշտոնապես չի հաղորդվում, սակայն Times of India-ն հաղորդում է առնվազն 5 պակիստանցի «ահաբեկչի» զոհվելու մասին։ Վերջին տեղեկություններով կրակահերթերը դեռևս շարունակվում են։

09:20 - 27 հոկտեմբերի, 2023

«Հայաստանին զինելն անընդունելի է»․ Ադրբեջանի վարչապետը՝ Հնդկաստանի նախարարին |factor.am|

factor.am: Ադրբեջանի վարչապետ Ալի Ասադովը նախօրեին Հնդկաստանի առևտրի և արդյունաբերության պետնախարար Անուպրիա Պատելի հետ հանդիպման ժամանակ անդրադարձել է Հայաստանին զենք վաճառելու թեմային։ Ասադովը նշել է, թե «հայկական կողմն ակտիվորեն զինվում է, ինչը լուրջ հարված է խաղաղության գործընթացին»։ Նա ափսոսանք է հայտնել, որ Հայաստանը Հնդկաստանից զենքի ամենամեծ գնորդն է ։ «Մենք անհանգստացած ենք Հարավային Կովկասի տարածաշրջանում խաղաղության և կայունության համար նոր սպառնալիքների ի հայտ գալով։ Մենք ողջունում ենք Հնդկաստանի հայտարարությունները մեր տարածաշրջանում խաղաղության, կայունության և երկխոսության վերաբերյալ։ Բայց միևնույն ժամանակ մենք Հնդկաստանից ակնկալում ենք այդ հայտարարություններին համապատասխան քայլեր։ Ներկայիս զգայուն պահին, երբ մեծ հույսեր են կապվում խաղաղության համաձայնագրի հետ, Հայաստանին զինելը անընդունելի է»,- ասել է Ադրբեջանի վարչապետը։ Հիշեցնենք, որ այս տարվա հուլիսին Ադրբեջանի նախագահի օգնական, աշխատակազմի արտաքին քաղաքականության բաժնի ղեկավար Հիքմեթ Հաջիևն էլ Բաքվում Հնդկաստանի արտակարգ և լիազոր դեսպան Շրիդհարան Մադհուսուդհանանի հետ հանդիպմանն էր կոչ արել Հայաստանին զենք չվաճառել։ Իսկ ավելի վաղ Ադրբեջանի նախագահ Իլհամ Ալիևն էր Հնդկաստանի դեսպանին բողոքել Հայաստանին զենքի վաճառքից։

13:20 - 26 հոկտեմբերի, 2023

Քննարկվել է Մումբայի նավահանգստով բեռնափոխադրումների հնարավորությունը. էկոնոմիկայի փոխնախարարը Հնդկաստանում է

Էկոնոմիկայի նախարարությունից հայտնում են՝ նախարարի տեղակալ Նարեկ Տերյանը Մումբայ քաղաքում, Հնդկաստանի գլոբալ ծովային գագաթնաժողովի շրջանակում, հոկտեմբերի 18-ին հանդիպել է Հնդկական նավահանգիստների ասոցիացիայի Մումբայ նավահանգստի տնօրեն Ռաջիվ Ջալոտայի հետ։ Հանդիպմանը ներկա էին նաև Հնդկաստանում ՀՀ արտակարգ և լիազոր դեսպան Վահագն Աֆյանը և ԻԻՀ-ում ՀՀ առևտրական կցորդ Վարդան Կոստանյանը։ Հանդիպման ընթացքում Ռաջիվ Ջալոտան ներկայացրել է նավահանգստի հնարավորությունները։ Այնուհետև կողմերը քննարկել են Մումբայ նավահանգստի միջոցով տարանցիկ բեռնափոխադրումների իրականացմանը վերաբերող հարցեր։ Պայմանավորվածություն է ձեռք բերվել այդ ուղղությամբ գործնական քայլերի, ինչպես նաև հնարավոր եռակողմ ձևաչափով գործակցության շուրջ։

13:34 - 18 հոկտեմբերի, 2023