Դոնալդ Թրամփ

ԱՄՆ 45-րդ նախագահ, Հանրապետական կուսակցության անդամ։

Ծնվել է 1946թ. հունիսի 14-ին։ 1968 թվականին ավարտել է Փենսիլվանիայի համալսարանի Ուորթոնի դպրոցի տնտեսագիտության բակալավրիատը։ 1971 թվականին ժառանգել է հորը պատկանող անշարժ գույքի և բնակարանային շինարարության ընկերությունը, կարճ ժամանակ անց այն վերանվանելով «The Trump Organization»։ 1996-2015 թվականներին հանդես է եկել «Միսս ԱՄՆ» գեղեցկության մրցույթի ժյուրիի կազմում՝ տվյալ ժամանակահատվածում հանդիսանալով նաև տվյալ նախագծի սեփականատերը։ Կամեո ձևաչափով նկարահանվել է բազմաթիվ հեռուստաշոուներում և գեղարվեստական ֆիլմերում։

2000 թվականին ուժերն է փորձել ԱՄՆ նախագահական ընտրություններում, սակայն մասնակցության հայտը ետ է վերցրել քվեարկության նախօրեին։ Լայնամասշտաբ ճանաչման է հասել նաև «NBC»-ի հեղինակային «Աշակերտը» ռեալիթի հեռուստաշոուից, որի ժամանակ մասնակիցները պայքարում էին Թրամփի մոտ աշխատանքի անցնելու համար (2004-2015)։ 2016 թվականին «Ֆորբս» պարբերականի կողմից ճանաչվել է աշխարհի 324-րդ և ԱՄՆ-ի՝ 156-րդ ամենահարուստ անձ։

2015 թվականի հունիսին Թրամփը հայտարարում է ԱՄՆ նախագահական ընտրություններում մասնակցության մասին՝ արագորեն դառնալով Հանրապետական կուսակցության առաջադիրը։ 2016 թվականի մայիսին մնացած հանրապետական թեկնածուների մասնակցության դադարեցումից հետո, Թրամփն ի վերջո պաշտոնապես դառնում է ընտրություններում գլխավոր հանրապետական թեկնածուն։

2016 թվականի նոյեմբերի 8-ին ընտրվել է ԱՄՆ 45-րդ նախագահ` հաղթելով դեմոկրատ Հիլարի Քլինթոնին։ Նախագահի լիազորությունները Թրամփը ստանձնեց 2017 թվականի հունվարի 20-ին։ 2020 թվականի ԱՄՆ նախագահական ընտրություններում պարտվում է Ջոզեֆ Բայդենին։

Թրամփը կրկին հայտարարել է, որ Փենսը կարող է փոխել նախագահական ընտրությունների արդյունքները |tert.am|

tert.am: ԱՄՆ նախագահ Դոնալդ Թրամփը հերքել է New York Times-ի հրապարակումն այն մասին, որ փոխնախագահ Մայք Փենսն իրեն տեղեկացրել է նախագահական ընտրությունների քվեարկության արդյունքները փոխելու անհնարինության մասին: «Փոխնախագահի մեկնաբանությունների վերաբերյալ New York Times-ի հրապարակումը չի համապատասխանում իրականությանը։ Նա երբեք նման բան չի ասել։ Փենսը և ես լիովին համաձայն ենք, որ փոխնախագահն ունի գործելու լիազորություն»,- ասված է Թրամփի գրավոր հայտարարության մեջ, որը տարածել է նրա նախընտրական շտաբը: Գործող նախագահն ընտրությունները վերստին որակել է «կոռումպացված և սահմանադրությանը չհամապատասխանող»։ Թրամփի խոսքով՝ ամերիկյան սահմանադրությունը Փենսին «գործելու մի շարք հնարավորություններ է տալիս», մասնավորապես՝ վերջինս կարող է չեղյալ հայտարարել ընտրությունների արդյունքների հավաստագրումը։

10:56 - 06 հունվարի, 2021

Սենատը հաղթահարեց Թրամփի վետոն |azatutyun.am|

azatutyun.am: Հունվարի 1-ին ԱՄՆ-ի Սենատը հաղթահարեց ռազմական բյուջեի վրա նախագահ Դոնալդ Թրամփի դրած վետոն։ Թրամփի նախագահության 4 տարիների ընթացքում սա առաջին դեպքն էր, երբ օրենսդիր մարմինը նրա վետոն հաղթահարում է, ինչը տեղի ունեցավ գործող նախագահի լիազորությունների ավարտից ընդամենը 20 օր առաջ։ Սենատը, որտեղ մեծամասնություն են կազմում Թրամփի Հանրապետական կուսակցության ներկայացուցիչները, հաշվի առնելով հարցի կարևորությունը նիստ անցկացրեց հունվարի 1-ին։ «Ես չեմ կարող հիշել, թե վերջին անգամ Սենատը երբ է հավաքվել Նոր տարվա օրը», - ասաց Սենատում դեմոկրատ փոքրամասնության ղեկավար Չաք Շումերը։ 740 միլիարդ դոլար կազմող ռազմական բյուջեի օրինագիծը օրենսդիր մարմինն ընդունել էր ձայների գերակշիռ հարաբերակցությամբ։ Այս հարցում հանրապետականներն ու դեմոկրատները միակարծիք էին, քանի որ սպառազինություններ պատվիրելուց մինչև զինվորի աշխատավարձի վճարումը կախված է Պենտագոնի բյուջեի հաստատումից։ Երկու կուսակցությունների միանման դիրքորոշումը նաև ազդանշան էր նախագահ Թրամփին, որ նրա վետոն կհաղթահարվի։ Այնուհանդերձ, Թրամփը վետո էր դրել, ինչի մասին նա նախօրոք ասել էր։ Հունվարի 1-ին Սենատը նախագահի վետոն հաղթահարեց ձայների 81 «կողմ», 13 «դեմ» հարաբերակցությամբ։

16:14 - 02 հունվարի, 2021

Թրամփը մինչև մարտ երկարաձգել է որոշ կատեգորիաների աշխատանքային այցագրերի տրամադրման արգելքը |tert.am|

tert.am: ԱՄՆ նախագահ Դոնալդ Թրամփը մինչև 2021թ. մարտի 31-ը երկարաձգել է որոշ կատեգորիաների աշխատանքային այցագրերի տրամադրման դադարեցման մասին որոշման գործունեության ժամկետը:Ինչպես հայտնում է ՏԱՍՍ-ը, որոշումը կայացվել է կորոնավիրուսային համավարակի տնտեսական հետևանքներով պայմանավորված:Սպիտակ տան մամուլի ծառայության հաղորդագրությունում ասվում է, որ անհրաժեշտության դեպքում ժամեկտը կարելի է երկարաձգել նայի մարտի 31-ից հետո:Թրամփը շեշտել է, որ համավարակը շարունակում է լուրջ ազդեցություն ունենալ ամերիկացիների եկամտի աղբյուրների վրա: Սպիտակ տան ղեկավարը արգերլքի վերաբերյալ որոշումը ստորագրել է 2020 թվականի ապրիլին և հունիսին: Դրանցից առաջինով Թրամփը 60 օրով արգելել էր գրին քարտեր տրամադրել դիմորդների կատեգորիաների մեծ մասին: Հունիսին այս արգելքը երկարաձգվել էր մինչ դեկտեմբերի վերջ: Բացի այդ, մինչև դեկտեմբերի 31-ը դադարեցվել էր այցագրերի H-1B, H-2B, H-4, L տիպերի և J կարգի փաստաթղթերի մեծ մասի տրամադրումը: Բոլոր այդ այցագրերն իրավունք են տալիս աշխատել ԱՄՆ-ում: ԱՄՆ նախագահն իր գործողությունները բացատրել է ամերիկացիների համար աշխատատեղեր փրկելու ցանկությամբ:

11:11 - 01 հունվարի, 2021

ԱՄՆ-ի Ներկայացուցիչների պալատը հավանություն Է տվել պաշտպանական բյուջեի օրինագծին, չնայած Թրամփի վետոյին |armenpress.am|

armenpress.am: ԱՄՆ-ի Ներկայացուցիչների պալատի անդամները հավանություն Է տվել պաշտպանական բյուջեի օրինագծին, չնայած այն բանին, որ ավելի վաղ երկրի նախագահ Դոնալդ Թրամփը վետոյի Էր ենթարկել այդ փաստաթուղթը:Քվեարկության արդյունքների համաձայն, ստացվել Է դրա անդամների ձայների անհրաժեշտ երկու երրորդը:Այժմ, օրինագծի շուրջ պետք Է քվեարկի Սենատը: Սպասվում Է, որ Կոնգրեսի վերին պալատը կկարողանա այն քննարկել արդեն դեկտեմբերի 29-ին:Թրամփի վետոն հաղթահարելու համար յուրաքանչյուր պալատում օրինագծի օգտին պետք Է քվեարկի քվեարկողների երկու երրորդը:Դեկտեմբերին ավելի վաղ Կոնգրեսի երկու պալատներն արդեն հավանություն Էին տվել այդ նախագծին, ընդ որում՝ ձայների ճնշող մեծամասնությամբ: Սակայն դեկտեմբերի 23-ին Թրամփը դրա վրա վետո Է դրել:ԱՄՆ-ի ղեկավարի խոսքով՝ պաշտպանական բյուջեն ներկայիս տեսքով «նվեր կլինի Չինաստանին եւ Ռուսաստանին»:Օրինագիծը նախատեսում Է 740,5 մլրդ դոլարի հատկացում Պենտագոնի գործունեության ֆինանսավորման եւ ԱՄՆ-ի Էներգետիկայի նախարարության գծով պաշտպանության եւ անվտանգության ոլորտի ծրագրերի համար:Բացի այդ, օրինագիծը դրույթ Է ներառում ռուսաստանյան «Հյուսիսային հոսք-2» եւ «Թուրքական հոսք» խողովակաշարային նախագծերի դեմ ամերիկյան պատժամիջոցների խստացման վերաբերյալ: Փաստաթուղթը նախատեսում Է նաեւ Թուրքիայի նկատմամբ պատժամիջոցների սահմանում ռուսաստանյան C-400 զենիթահրթիռային համակարգերի ձեռքբերման համար: Մասնավորապես, նախագահին պատվիրվել Է պաշտպանական ծախսերի մասին օրենքի ստորագրումից հետո «հինգ կամ ավելի պատժամիջոցներ» սահմանել այն թուրք պաշտոնյաների նկատմամբ, որոնք մասնակցել են C-400-ի ձեռքբերման գործընթացին:Սակայն օրինագծի դեմ Թրամփի առարկումները կապված չեն այս պատժամիջոցների հետ: Նա, մասնավորապես, պայքարում Է 1996 թվականի հեռահաղորդակցությունների մասին օրենքի 230 հոդվածի չեղարկման համար, որը ինտերնետ-հարթակներն ազատում Է իրավական պատասխանատվությունից օգտատերերի կոնտենտ զետեղելու համար:Նաեւ Թրամփը դժգոհ Է այն դրույթներից, որոնք կարող են դժվարացնել Աֆղանստանից եւ Գերմանիայից ԱՄՆ-ի զորքերի դուրսբերման գործընթացը, տեղեկացնում Է «Ինտերֆաքս»-ը:

14:19 - 29 դեկտեմբերի, 2020

Բայդենը հայտարարում է՝ իր թիմը խոչընդոտների է հանդիպում Թրամփի վարչակազմի հետ հարաբերություններում |azatutyun.am|

azatutyun.am: Միացյալ Նահանգների ընտրված նախագահ Ջո Բայդենը հայտարարել է, որ իր թիմը խոչընդոտների է հանդիպում գործող նախագահ Դոնալդ Թրամփի վարչակազմի հետ հարաբերություններում։ Երկուշաբթի օրը՝ երդմնակալության արարողությունից մի քանի շաբաթ առաջ, Բայդենը պնդում է, թե իշխանության փոխանցման համար անհրաժեշտ տեղեկատվություն ստանալու փորձերը բախվում են պատնեշների պաշտպանության նախարարության և բյուջետային վարչության առաջատար պաշտոնյաների կողմից։ «Հենց հիմա մենք պարզապես չենք կարողանում ստանալ բոլոր տվյալները, որոնք մեզ անհրաժեշտ են հեռացող վարչակազմից անվտանգության առանցքային հարցերի վերաբերյալ։ Իմ կարծիքով՝ սա ոչ այլ ինչ է, քան անպատասպանատվություն»,- ընդգծել է Ջո Բայդենը։ Միացյալ Նահանգների նախագահի պաշտոնը ստանձնող Բայդենը մասնավորապես ասել է, որ ցանկանում է հստակ պատկեր ստանալ աշխարհով մեկ ամերիկյան զինված ուժերի, պաշտպանական ծախսերի պլանավորման վերաբերյալ։

13:25 - 29 դեկտեմբերի, 2020

Բայդենը Թրամփին մեղադրել է ԱՄՆ-ի և Մեքսիկայի սահմանին մարդասիրական աղետ ստեղծելու համար

ԱՄՆ նորընտիր նախագահ Ջո Բայդենը հայտարարել է, որ գործող նախագահ Դոնալդ Թրամփի մեղքով երկրի հարավային սահմանին մարդասիրական աղետ է ստեղծվել։ Նման հայտարարությամբ դեմոկրատը նախօրեին հանդես է եկել Ուիլմինգթոնում, գրում է ՏԱՍՍ-ը։ «Մեզ տեղեկատվություն է տրամադրվել մարդասիրական աղետի լուծման համար անհրաժեշտ քայլերի մասին, որը Թրամփի վարչակազմը պարբերաբար ստեղծել է մեր հարավային սահմանին»,- նշել է նա։ Դեմոկրատի խոսքով՝ Մեքսիկայի տարածքով անօրինական կերպով ԱՄՆ մուտք գործել ցանկացողների հետ պետք է «մարդասիրաբար և ըստ կանոնների» վարվել: Բայդենի կարծիքով՝ ԱՄՆ իշխանությունները պետք է «անվտանգ և արագ» դիտարկեն երկրում ապաստան փնտրող անձանց հարցումները։ Թրամփը մի շարք միջոցներ է ձեռնարկել ներգաղթի քաղաքականության խստացման և սահմանային վերահսկողության ուժեղացման ուղղությամբ։ Իր նախագահության տարիներին նա հայտարարել է անօրինական ներգաղթը դադարեցնելու, ինչպես նաև ԱՄՆ-ում փախստականների ընդունումը սահմանափակելու անհրաժեշտության մասին

10:35 - 29 դեկտեմբերի, 2020

Թրամփն ստորագրել է տնտեսության խթանման միջոցների փաթեթը եւ 2021 ֆինանսական տարվա բյուջեի նախագիծը |armenpress.am|

armenpress.am: ԱՄՆ-ի գործող նախագահ Դոնալդ Թրամփն ստորագրել Է 2021 ֆինանսական տարվա (սկսվել Է հոկտեմբերի 1-ին) բյուջեի նախագիծը՝ մինչեւ 2,3 տրիլիոն դոլար ընդհանուր ծավալով, որը ներառում Է տնտեսության խթանման՝ գրեթե 900 միլիարդ դոլարի փաթեթ՝ համավարակի կապակցությամբ: Դեկտեմբերի 27-ին այդ մասին իր Twitter-ում հայտնել Է Սպիտակ տան մամուլի քարտուղարի տեղակալ Ջադ Դիրը: Նախագահի կողմից այդ փաստաթղթին հավանություն տալը թույլ Է տալիս խուսափել այսպես կոչված «շաթդաունից»՝ կառավարության աշխատանքի մասնակի դադարեցումից, որը կարող Էր սկսվել դեկտեմբերի 29-ին եւ կվերաբերեր մի քանի միլիոն պետական ծառայողների, եթե չընդունվեր ֆինանսավորման երկարաձգման մասին լրացուցիչ ժամանակավոր բանաձեւը: Բացի դրանից, բյուջեի ընդունումը թույլ Է տալիս երկարաձգել համավարակի պայմաններում գործազուրկների օգնության երկու ծրագրերի գործողությունը, որոնց գործողության ժամկետը լրացել Է դեկտեմբերի 26-ի լույս 27-ի գիշերը: «Նախագահ Դոնալդ Թրամփն ստորագրել Է H.R. 133-ը՝ օրինագիծ 2021 թվականի սեպտեմբերի 30-ին ավարտվող ֆինանսական տարվա բյուջետային միջոցների հատկացման մասին, որը նախատեսում Է անհետաձգելի օգնության եւ միջոցների տրամադրում կորոնավիրուսի դեմ պայքարի համար»,- հայտնել Է Դիրը, հաղորդել Է ՏԱՍՍ-ը:

10:10 - 28 դեկտեմբերի, 2020

Թրամփի խոսքով` Moderna ընկերության պատվաստանյութը հաստատվել է |azatutyun.am|

azatutyun.am: Միացյալ Նահանգների նախագահ Դոնալդ Թրամփի խոսքով` կորոնավիրուսի դեմ Moderna ընկերության պատվաստանյութը հաստատվել է, մատակարարումները կսկսվեն առանց հապաղելու։ Ավելի վաղ ամերիկյան կառավարության համապատասխան գերատեսչությունը հավանություն է տվել COVID-19-ի դեմ պայքարի համար Moderna-ի արտադրանքին։ Moderna-ի ներկայացուցիչը Bloomberg-ի հետ զրույցում ասել է, որ ընկերությունը պլանավորում է ԱՄՆ-ին ապահովել մինչև 20 միլիոն չափաբաժնի արտադրանք դեկտեմբերին և 85-100 միլիոն չափաբաժին էլ` 2021 թվականի առաջին եռամսյակում։ Ամերիկյան Moderna դեղագործական ընկերությունը, որի համահիմնադիրներից է ամերիկահայ գործարար և բարերար Նուբար Աֆեյանը, առաջիններից է սկսել կորոնավիրուսի դեմ պատվաստանյութի մշակման աշխատանքները։ Դեղամիջոցը համարվում է առաջատարներից մեկը, դրա արդյունավետությունը գնահատվում է 94,5 տոկոս։

17:51 - 18 դեկտեմբերի, 2020

Իրանն ուրախ է ընտրություններում Թրամփի պարտությամբ․ Հասան Ռոհանի |hetq.am|

hetq.am: Իրանի նախագահ Հասան Ռոհանին ԱՄՆ նախագահ Դոնալդ Թրամփին անվանել է ահաբեկիչ և նշել, որ Իրանի Իսլամական Հանրապետությունն ուրախ է ընտրություններում նրա պարտությամբ։ Այդպիսի հայտարարություն Ռոհանին արել է այսօր՝ դեկտեմբերի 16-ին։ «Ոմանք ասում են, որ մենք ոգևորվել ենք Բայդենի իշխանության գալով։ Դա այդպես չէ, բայց մենք շատ ուրախ ենք, որ Թրամփը հեռացել է։ Այդ մարդը, որն իրականացրել է հանցագործություններ, սպանել մարդկանց, եղել է ահաբեկիչ: Նա նաև խոչընդոտում է Իրան պատվաստանյութի ներկրմանը»,- հայտարարել է Իրանի առաջնորդը։ Իրանի նախագահի ելույթը հեռարձակել է երկրի պետական հեռուստատեսությունը։ «Հուսանք՝ Բայդենի օգտին ԱՄՆ ժողովրդի ձայնը օրենքների պահպանման օգտին տրված ձայն է, այլ ոչ թե խախտելու։ Այդ ձայնը պարտավորությունների ստանձման, այլ ոչ թե դրանցից հրաժարվելու ձայնն է»,- ընդգծել է նա։

23:07 - 16 դեկտեմբերի, 2020

ԱՄՆ Սենատը ձայների գերակշիռ մեծամասնությամբ ընդունեց Պենտագոնի տարեկան ծախսերի օրինագիծը |azatutyun.am|

azatutyun.am: ԱՄՆ-ի Սենատը ձայների գերակշիռ մեծամասնությամբ ընդունեց տարեկան ռազմական ծախսերի օրինագիծը (NDAA)՝ 740 միլիարդ դոլարի չափով։ Օրինագծին կողմ է քվեարկել 84 սենատոր, դեմ՝ 13-ը։ Հանրապետական ու դեմոկրատ սենատորները այս հարցում համագործակցության են գնացել, համոզելու համար նախագահ Դոնալդ Թրամփին, որ նա չկիրառի խոստացած վետոն։ Մինչ Թրամփի պաշտոնից հեռանալը օրինագիծն ուղարկվելու է նրա ստորագրությանը։ Օրինագիծը պաշտպանողները հույս ունեն, որ փաստաթղթին երկու կուսակցությունների կողմից մեծ աջակցությունը նրան կհամոզի հրաժարվել վետոյի գաղափարից, սակայն Սպիտակ տունը հայտարարել է, որ Թրամփը միտքը չի փոխել; Կիրակին հանած, նա 10 օր ժամանակ ունի 3 տարբերակներից մեկն ընտրելու համար՝ ստորագրել օրինագիծը, վետո դնել կամ թողնել, որ ավելի ուշ այն ուժի մեջ մտնի առանց իր ստորագրության։ Օրինագծի կողմակիցները գտում են, որ Թրամփի հայտնած անհամաձայնությունները կապված են տեխնիկական բնույթի հարցերի հետ, որոնց պատճառով չպետք է խանգարել Պենտագոնի համար կարևոր օրենքի ընդունմանը։

16:59 - 12 դեկտեմբերի, 2020

ԱՄՆ Գերագույն դատարանը մերժել է Թրամփի՝ 4 նահանգներում ընտրությունների արդյունքներն անվավեր ճանաչելու հայցը |news.am|

news.am: ԱՄՆ Գերագույն դատարանը մերժել է Թրամփի՝ 4 նահանգներում ընտրությունների արդյունքներն անվավեր ճանաչելու հայցը, հաղորդում է BBC-ը: Հայցում, որն անցած շաբաթ ներկայացրել է Տեքսաս նահանգը, պահանջ է ներկայացվում անվավեր ճանաչել ընտրությունների արդյունքները Ջորջիայում, Միչիգանում, Փենսիլվանիայում եւ Վիսկոնսինում: Հայցին աջակցել են 18 նահանգների գլխավոր դատախազներ եւ 106 սենատոր-հանրապետականներ: Սակայն Գերագույն դատարանը վճռել է, որ Տեքսաս նահանգն իրավունք չունի բավարարել հայցը: Ըստ ներկայացված բողոքի՝ վերոնշյալ նահանգներում ընտրությունների արդյունքներն անօրինական են ընտրական գործընթացներում փոփոխությունների պատճառով, որոնք կոչված են օգնել ամերիկացիներին՝ իրենց քվեաթերթիկներն ուղարկել կորոնավիրուսի պանդեմիայի շրջանում:

10:11 - 12 դեկտեմբերի, 2020

Թրամփի շտաբը դատական հայց կներկայացնի Նևադայում գրանցված ընտրակեղծիքների վերաբերյալ |armenpress.am|

armenpress.am: ԱՄՆ գործող նախագահ Դոնալդ Թրամփի նախընտրական շտաբի ներկայացուցիչները մտադիր են չորեքշաբթի դատական հայց ներկայացնել Նևադա նահանգում ընտրությունների արդյունքների հարցով: Ինչպես փոխանցում է «Ռիա-նովոստի»-ն, այդ մասին հայտնել է շտաբի փաստաբաններից մեկը՝ Ջես Բինալը: «Պատրաստվում ենք ապացույցներ ներկայացնել քվեարկության ժամանակ տեղի ունեցած խախտումների մասին, կեղծիքների հազարավոր դեպքեր են գրանցվել միայն Նևադայում: Օրինակ, մենք փաստեր ունենք, որ ավելի քան 40 հազար մարդ կրկնակի է քվեարկել: Դա իսկական կեղծիք է»,- ասել է փաստաբանը: Բացի այդ, նրա խոսքով՝ կան մարդիկ, որոնք նշված են փոստով քվեարկածների ցուցակում, սակայն նրանք անգամ քվեարթերթիկ չեն ստացել և չեն քվեարկել ընդհանրապես: Նևադայի Գերագույն դատարանը նոյեմբերի 24-ին հաստատել է ընտրությունների նահանգային արդյունքները, որոնց համաձայն հաղթանակ է տանում դեմոկրատ թեկնածու Ջո Բայդենը: Մի շարք ամերիկյան լրատվամիջոցների տվյալներով՝ Բայդենը հավաքել է հաղթելու համար անհրաժեշտ ընտրիչների 270 ձայնը, սակայն Թրամփը չի ընդունում իր պարտությունը՝ հայտնելով, որ երկրով մեկ ընտրակեղծիքներ են տեղի ունեցել:

21:28 - 02 դեկտեմբերի, 2020

ԱՄՆ նախագահական ընտրություններ. Բարը ոչ մի կեղծիք չի հայտնաբերել |1lurer.am|

1lurer.am: ԱՄՆ գլխավոր դատախազ Ուիլյամ Բարն ասել է, որ իր գերատեսչությունն ուսումնասիրել է վերջին նախագահական ընտրություններում ձայների հաշվարկի հանգամանքները, և չեն հայտնաբերվել լայնամասշտաբ խախտումներ, որոնց մասին Դոնալդ Թրամփը շարունակում է պնդել՝ հաղորդում է BBC-ն: Չնայած Բարը համարվում է Թրամփի քաղաքական դաշնակիցը, նրա խոսքերը հակասում են նախագահի պնդումներին, թե ընտրությունների արդյունքները կեղծվել են: Քվեաթերթիկների հաշվարկի նախնական արդյունքների համաձայն՝ ԱՄՆ նոր նախագահ է ընտրվել դեմոկրատ թեկնածու Ջո Բայդենը, որը ստացել է 306 ընտրիչի ձայն, մինչդեռ հաղթանակի համար բավարար էր 270-ը: Թրամփն ունի 232 ձայն: Թրամփը դեռ հրաժարվում է ընդունել պարտությունը և շարունակում է անհիմն պնդել, որ ինքը իրականում հաղթել է, իսկ Բայդենը հաղթանակն ապահովել է կեղծիքների միջոցով: Ամերիկյան դատարանները, սակայն, մեկը մյուսի հետևից մերժում են հանրապետականների շտաբի հայցերը, իսկ նահանգները շարունակում են պաշտոնապես հաստատել ընտրությունների արդյունքները: Իր ամենամոտ խորհրդականներին Թրամփն ասել է, որ մտադիր է 2024-ին կրկին առաջադրվել նախագահական ընտրություններում:

11:05 - 02 դեկտեմբերի, 2020

Թրամփը կազատի Սպիտակ տունը, եթե Ընտրիչների կոլեգիան ճանաչի Բայդենի հաղթանակը |azatutyun.am|

azatutyun.am: ԱՄՆ գործող նախագահ, հանրապետական Դոնալդ Թրամփը երեկ ասել է, որ կլքի Սպիտակ տունն այն դեպքում, եթե Ընտրիչների կոլեգիան հաղթող ճանաչի Ջո Բայդենին։ «Իհարկե, ես կգնամ, և դուք գիտեք այդ մասին»,- երեկ Սպիտակ տանը լրագրողների հետ հանդիպման ժամանակ ասել է գործող նախագահը: Բարձրաստիճան հանրապետական գործիչները մինչ այդ տարբեր առիթներով նկատել են տվել, որ Ընտրիչների կոլեգիայի որոշումից հետո Թրամփը կազատի Սպիտակ տունը, սակայն երեկ առաջին անգամ այդ մասին անձամբ Թրամփն է հայտնել: Գործող նախագահը միաժամանակ ասել է, թե «Ընտրիչների կոլեգիան մեծ սխալ կգործի, եթե որոշի ճանաչել Բայդենի հաղթանակը»: Ընտրիչների կոլեգիան այս տարվա դեկտեմբերի 14-ին պետք է ժողով գումարի և պաշտոնապես ազդարարի, թե ով է հաղթել նախագահական ընտրություններում: Բայդենը վաստակել է կոլեգիայի անդամներից 306-ի, իսկ Թրամփը՝ 232-ի աջակցությունը: Թրամփը պնդում է, որ դեմոկրատակաները տարբեր եղանակներով կեղծել են ընտրոությունները: Նա չի ճանաչել պարտությունը և չի շնորհավորել Բայդենին, սակայն Սպիտակ տունը նոյեմբերի 23-ին ԱՄՆ Ընդհանուր ծառայությունների գործակալությանը պաշտոնապես թույլատրել է կապ հաստատել Բայդենի թիմի հետ և կատարել անցումային ժամանակաշրջանում օրենքով նախատեսված ընթացակարգային գործողությունները: Դրանց շարքում են Բայդենի թիմին ֆինանսական միջոցների և գրասենյակների տրամադրումը, դաշնային մակարդակի պաշտոնյաների հետ հանդիպումների կազմակերպումը և անվտանգության ոլորտում տեղեկատվությունների փոխանցումը:

13:24 - 27 նոյեմբերի, 2020

Թրամփը կրկին պահանջել է վերանայել նախագահական ընտրությունների արդյունքները |armenpress.am|

armenpress.am: ԱՄՆ-ի նախագահ Դոնալդ Թրամփը կրկին հայտարարել Է նոյեմբերի 3-ին կայացած նախագահական ընտրությունների արդյունքների կեղծման մասին եւ պահանջել վերանայել դրանք: Այդ մասին հաղորդել Է The Hill հրատարակությունը: «Այդ ընտրություններում դեմոկրատները պարտվել են: Նրանք խարդախություն են արել: Դրանք եղել են կեղծված ընտրություններ»,-ասել Է Թրամփը մի խումբ հանրապետականների հետ Փենսիլվանիայում կազմակերպված հանդիպմանը: «Մենք պետք Է շրջենք ընտրությունների արդյունքները»,-ասել Է Թրամփը, պնդելով, որ ինքը ապացույցներ ունի, որոնք անհրաժեշտ են քվեարկության արդյունքները փոխելու համար: The Hill-ը հիշեցնում Է, որ մի շարք նահանգներում քվեարկության արդյունքները վերանայելու վերաբերյալ Թրամփի իրավաբանական թիմի ներկայացրած հայցերը մերժվել են եւ այդ նահանգներում ճանաչել դեմոկրատներից թեկնածու Ջո Բայդենի հաղթանակը, հաղորդել Է «Ինտերֆաքս»-ը:

11:09 - 26 նոյեմբերի, 2020

Թրամփն իր վարչակազմին թույլ է տվել սկսել իշխանությունը Բայդենին փոխանցելու գործընթացը |hetq.am|

hetq.am: ԱՄՆ նախագահ Դոնալդ Թրամփը Ընդհանուր ծառայությունների վարչակազմի ղեկավար (GSA) Էմիլի Մերֆիին հանձնարարել է սկսել Ջո Բայդենի թիմին իրավասությունների փոխանցման գործընթացը։ Այդ մասին Դոնալդ Թրամփը գրել է թվիթերյան իր միկրոբլոգում։ Նա գրել է, որ Մերֆիին և իր թիմին խորհուրդ է տալիս «անել այն ամենը, ինչ անհրաժեշտ է, հատկապես նախնական արձանագրությունների մասով»։ Թրամփը նաև ընդգծել է, որ այս ամենը չի նշանակում, թե ինքն ընդունում է ընտրությունների արդյունքները և պատրաստ է շարունակել պայքարը դատարաններում։ GSA-ի ղեկավարը Բայդենին տեղեկացրել է իշխանության փոխանցման գործընթացի մեկնարկի մասին։ Իր նամակում, որը հրապարակել է CNN-ը, Մերֆին ընդգծել է, որ Սպիտակ տունն իր վրա ճնշում չի գործադրել իրավասությունների փոխանցման գործընթացը հետաձգելու համար։

22:47 - 24 նոյեմբերի, 2020