Պաղեստին

Դե յուրե ինքնիշխան պետություն Միջին Արեւելքում՝ Հորդանան գետի արեւմտյան ափին (սահմանակցում է Իսրայելին եւ Հորդանանին) եւ Գազայի հատվածին (սահմանակցում է Իսրայելին եւ Եգիպտոսին), որի մայրաքաղաքն է համարվում Արեւելյան Երուսաղեմը՝ չնայած վարչական կենտրոնը Ռամալլահում է: Պաղեստին պետության մեծ հատվածն, ըստ համացանցի աղբյուրների, օկուպացված է Իսրայելի կողմից՝ 1967 թվականի Վեցօրյա պատերազմից հետո:

Երկրորդ համաշխարհային պատերազմից հետո, 1947 թվականին ՄԱԿ-ը հաստատեց Բաժանման նախագիծը Պաղեստինի համար, որը հորդորում էր ստեղծել անկախ արաբական եւ հրեական պետություններ` առանձնացնելով Երուսաղեմը, որը պետք է ղեկավարվեր ՄԱԿ-ի հատուկ միջազգային կառավարման ռեժիմով: Հրեական պետության հիմնադրումից հետո, որը 1948 թվականի մայիսի 14-ին ստացավ Իսրայել անվանում, ներքաշվեց պատերազմների մեջ արաբական բանակների հետ: Ավելի ուշ Արաբական լիգայի կողմից ստեղծվեց Համապաղեստինյան կառավարությունը, որը կառավարեց Եգիպտոսի կողմից վերահսկվող Գազայի հատվածը: Այն շուտով ճանաչվեց Արաբական լիգայի անդամ բոլոր պետությունների կողմից՝ բացառությամբ Հորդանանի: Չնայած Համապաղեստինյան կառավարությունը իրեն հռչակեց ոչ միայն Գազայի հատվածի, այլ ամբողջ նախկին Բրիտանական Պաղեստինի կառավարիչ, այն միայն սահմանափակվում էր Գազայի հատվածով: Իսրայելը ավելի ուշ նվաճեց Գազայի հատվածը եւ Սինայի թերակղզին Եգիպտոսից, Հորդանանի գետի արեւմտյան ափը Հորդանանից եւ Գոլանի բարձունքները՝ Սիրայից՝ Վեցօրյա պատերազմի ընթացքում:

Բրիտանիայի և Ֆրանսիայի ղեկավարները մտահոգություն են հայտնել Մերձավոր Արևելքում իրավիճակի սրման վտանգի առնչությամբ |news.am|

news.am: Մեծ Բրիտանիայի վարչապետ Ռիշի Սունակը և Ֆրանսիայի նախագահ Էմանուել Մակրոնը ընդգծել են պատերազմից բզկտվող Գազայի հատված հրատապ հումանիտար օգնություն հասցնելու կարևորությունը, հայտնում է Մեծ Բրիտանիայի կառավարությունը: Նրանք հեռախոսազրույց են ունեցել՝ «ընդհանուր մտահոգություն հայտնելով ավելի ընդգրկուն տարածաշրջանում իրավիճակի սրման վտանգի առնչությամբ», հաղորդում է France24-ը։ Առաջնորդներն ընդգծել են Գազայի բնակիչներին շտապ հումանիտար օգնություն ցուցաբերելու կարևորությունը։

19:02 - 29 հոկտեմբերի, 2023

Էրդողանը մասնակցում է ի պաշտպանություն Պաղեստինի անցկացվող ակցիային, Լոնդոնում էլ հրադադարի պահանջով հազարավոր մարդիկ քայլերթ են անցկացրել

Ստամբուլի Աթաթուրքի անվան օդանավակայանում ի պաշտպանություն պաղեստինցիների ակցիա է ընթանում, որին մասնակցում է Թուրքիայի նախագահ Ռեջեփ Թայիփ Էրդողանը։ Լոնդոնում էլ հազարավոր ցուցարարներ քայլերթ են իրականացրել՝ Բրիտանիայի կառավարությունից պահանջելով Գազայում հրադադարի կոչ անել։ Հիշեցնենք՝ Իսրայելը հայտարարել է, որ «ընդլայնում է» ցամաքային գործողությունները Գազայում։ Գազան այս պահին շրջափակման մեջ է, և այնտեղ գտնվող պաղեստինցիները կտրված են արտաքին աշխարհից։ Գլխավոր լուսանկարը՝ Լոնդոնից /աղբյուրը՝ REUTERS/Susannah Ireland/

17:41 - 28 հոկտեմբերի, 2023

Մասկն, ի պատասխան Գազայում StarLink-ը միացնելու կոչերին, ասել է՝ կօգնեն ՄԱԿ-ին ու աջակցման այլ խմբերի

Իլոն Մասկը, պատասխանելով X-ի (նախկին Twitter) օտգատերերի գրառումներին, որ Գազան զրկված է ինտերնետից ու հեռախահաղորդակցությունից, և այնտեղ անհապաղ StarLink-ի կարիքը կա, գրել է․ «Մենք կօգնենք ՄԱԿ-ին և միջազգայնորեն ճանաչված աջակցման այլ խմբերի»։ Հիշեցնենք` Իսրայելը հայտարարել է, որ «ընդլայնում է» ցամաքային գործողությունները Գազայում։ Գազան այս պահին շրջափակման մեջ է, և այնտեղ գտնվող պաղեստինցիները կտրված են արտաքին աշխարհից։

16:30 - 28 հոկտեմբերի, 2023

Իսրայելը խոստացել է թույլատրել լրացուցիչ հումանիտար բեռների մուտքը Գազա |armenpress.am|

armenpress.am: Իսրայելը Գազայի հարավային հատվածում թույլ կտա մտնել սննդով, խմելու ջրով և դեղորայքով բեռնված լրացուցիչ բեռնատարներ, ճեպազրույցի ժամանակ հայտնել է Իսրայելի պաշտպանության բանակի մամուլի քարտուղար, բրիգադային գեներալ Դանիել Հագարին: «Մենք ավելացնում ենք մարդասիրական օգնությունը Գազայի այն քաղաքացիներին, որոնք տեղափոխվել են հարավ։ Այսօր մենք թույլ կտանք մտնել սննդով, խմելու ջրով և դեղորայքով բեռնված լրացուցիչ բեռնատարներ: Նա, ով կհայտնվի անվտանգ տարածքում, կստանա սնունդ, ջուր և դեղորայք»,-ասաց նա։ Նախօրեին, ինչպես հայտարարել էր պաղեստինյան օկուպացված տարածքներում հումանիտար օգնության համակարգող Լին Հաստինգսը, Գազայի հատված պետք է մուտք գործեին մարդասիրական օգնություն տեղափոխող ութ բեռնատարներ: Իսկ դրանց ընդհանուր թիվը հոկտեմբերի 21-ից հասել է 74-ի։

14:02 - 28 հոկտեմբերի, 2023

Գազայում մարդասիրական համակարգը լիակատար փլուզման առջեւ է․ Անտոնիո Գուտերեշ

Գազայում մարդասիրական համակարգը լիակատար փլուզման առջեւ է՝ ավելի քան 2 միլիոն խաղաղ բնակիչների համար աներեւակայելի հետեւանքներով։ Այս մասին X-ի իր միկրոբլոգում գրել է ՄԱԿ-ի գլխավոր քարտուղար Անտոնիո Գուտերեշը։ «Ջրի, դեղորայքի, վառելիքի մատակարարումները պետք է արագ, անվտանգ ու մեծ քանակությամբ հասնեն բոլոր քաղաքացիական անձանց»,- գրել է նա։ Մեկ այլ գրառմամբ նա հրադադարի կոչ է արել՝ նշելով․ «Կրկնում եմ Մերձավոր Արևելքում հումանիտար հրադադարի, բոլոր պատանդների անվերապահ ազատ արձակման եւ անհրաժեշտ ծավալով կենսական բեռների առաքման իմ կոչը։ Յուրաքանչյուր ոք պետք է պատասխանատվություն ստանձնի: Եկել է ճշմարտության պահը։ Պատմությունը մեզ դատավոր կլինի»,- գրել է նա։

11:54 - 28 հոկտեմբերի, 2023

ՄԱԿ-ի Գլխավոր ասամբլեան Գազայի խաղաղ բնակչության պաշտպանության մասին բանաձեւ է ընդունել

ՄԱԿ-ի Գլխավոր ասամբլեան Գազայի խաղաղ բնակչության պաշտպանության մասին բանաձեւ է ընդունել․ կողմ է քվեարկել 120 երկիր, դեմ՝ 14, ձեռնպահ՝ 45։Բանաձեւը կոչ է անում «անհապաղ, տեւական եւ անխախտ մարդասիրական հրադադարի, որին կհաջորդի ռազմական գործողությունների դադարեցումը»։

10:59 - 28 հոկտեմբերի, 2023

Իսրայելը ցամաքային գործողություն է սկսում Գազայում |tert.am|

tert.am: Իսրայելը ցամաքային գործողություն է սկսում Գազայում։ Ինչպես հայտնում է ՏԱՍՍ գործակալությունը, այս մասին հայտարարել է Իսրայելի պաշտպանության բանակի ներկայացուցիչ Դանիել Հագարին։ «Մենք ավելացրել ենք Գազայի հատվածի վրա հարձակումների տեմպը: Մեր ռազմաօդային ուժերը հարձակվում են ստորգետնյա թիրախների և ահաբեկչական ենթակառուցվածքի օբյեկտների վրա: Գազայի հատվածի վրա հարձակումները շարունակելով՝ մեր ուժերն այս պահին ընդլայնում են ցամաքային գործողության մասշտաբները՝ ապահովելու համար այս պատերազմի նպատակների իրականացումը»,- նշել է ՑԱԽԱԼ-ի ներկայացուցիչը։ Իսրայելի բանակը նաև կոչ է անում Գազայի հյուսիսային հատվածի բնակիչներին շարժվել դեպի հարավ։ Ավելի վաղ, Գազայում ամբողջությամբ անջատվել էր բջջային կապն ու ինտերնետը։ Միևնույն ժամանակ, իսրայելական բանակը ինտենսիվ հարվածներ է հասցնում Գազայի տարբեր հատվածների ուղղությամբ։

22:36 - 27 հոկտեմբերի, 2023

Մարդասիրական օգնություն տեղափոխող 12 բեռնատարներ Գազա են մտել |factor.am|

factor.am: Պաղեստինյան Կարմիր մահիկի ընկերությունը հայտնել է, որ այսօր 12 բեռնատարներ Եգիպտոսից Ռաֆահ սահմանային անցակետով հատել են Գազայի հատվածի սահմանը։ Բեռնատարները Գազայի բնակչությանը մատակարարել են ջուր, սնունդ և դեղորայք, բայց ոչ վառելիք՝ Իսրայելի արգելքի պատճառով, գրում է BBC-ի ռուսական ծառայությունը: Ավելի վաղ Առողջապահության համաշխարհային կազմակերպությունը հրապարակել է դեղերի և սարքավորումների ցանկ, որը հավաքվել է, բայց դեռ չի ուղարկվել կարիքավորներին։ ԱՀԿ-ի տվյալներով՝ հավաքված օգնությամբ բեռնատարները կանգնած են Գազայի հատվածի և Եգիպտոսի սահմանին ու սպասում են մուտքի թույլտվության։ Խոսքը 3,7 հազար վիրավոր հիվանդների համար վիրաբուժական սարքավորումների, քրոնիկ հիվանդություններով տառապող 20 հազար հիվանդների բժշկական սարքավորումների, ինչպես նաև 110 հազար մարդու համար տարրական բժշկական ծառայություններ մատուցելու համար նախատեսված նյութերի մասին է։

18:30 - 26 հոկտեմբերի, 2023

Մերձավոր Արևելքում նախապատերազմյան ստատուս քվոյին վերադարձ չի կարող լինել, պետք է լինի լուծում՝ 2 պետության ստեղծմամբ. Բայդեն |tert.am|

tert.am: ԱՄՆ նախագահ Ջո Բայդենը հայտարարել է, որ Իսրայելը չի կարող վերադառնալ նախապատերազմյան ստատուս քվոյին՝ ՀԱՄԱՍ-ի դեմ կռվելուց հետո և պետք է պաղեստինցիների հետ աշխատի հակամարտության՝ երկու պետությունների ստեղծմամբ լուծման ուղղությամբ, գրում է timesofisrael.com-ը: «Չկա վերադարձ դեպի ստատուս քվոն,որը եղել է հոկտեմբերի 6-ի դրությամբ», - ասել է Բայդենը Ավստրալիայի վարչապետ Էնթոնի Ալբանեզի հետ համատեղ մամուլի ասուլիսում։ «Դա նշանակում է ապահովել, որ ՀԱՄԱՍ-ն այլևս չի կարող ահաբեկել Իսրայելին և օգտագործել պաղեստինցի խաղաղ բնակիչներին որպես կենդանի վահան: Դա նաև նշանակում է, որ երբ այս ճգնաժամն ավարտվի, պետք է լինի տեսլական, թե ինչ է լինելու հաջորդը, և, մեր կարծիքով, դա պետք է լինի երկու պետությունների ստեղծմամբ լուծումը: Դա նշանակում է կենտրոնացված ջանքեր բոլոր կողմերից՝ իսրայելցիներից, պաղեստինցիներից, տարածաշրջանային գործընկերներից, համաշխարհային առաջնորդներից, որպեսզի կանգնեն խաղաղության ճանապարհին», - հավելել է նա:

11:27 - 26 հոկտեմբերի, 2023

Ռուսաստանը և Չինաստանը վետո են կիրառել ՄԱԿ-ի ԱԽ-ում իսրայելա-պաղեստինյան լարվածության վերաբերյալ ԱՄՆ-ի առաջարկած բանաձևի նկատմամբ |tert.am|

tert.am: Ռուսաստանը և Չինաստանը վետո են կիրառել ՄԱԿ-ի Անվտանգության խորհրդում ԱՄՆ-ի կողմից առաջարկված բանաձևի նկատմամբ, որը վերաբերում է Մերձավոր Արևելքում ստեղծված իրավիճակին: Այս մասին հայտնում է ՏԱՍՍ-ը:Փաստաթղթին կողմ է քվեարկել 10 երկիր, դեմ՝ Ռուսաստանի Դաշնությունը, Չինաստանը և ԱՄԷ-ն, իսկ 2-ը ձեռնպահ են մնացել: Փաստաթուղթը պարունակում է Իսրայելի վրա արմատական պաղեստինյան ՀԱՄԱՍ շարժման հարձակման դատապարտում, պատանդներին ազատ արձակելու և միջազգային մարդասիրական իրավունքի պահանջներին համապատասխանելու կոչ: Սակայն այն հրադադարի կոչ չի անում, այլ ճանաչում է երկրների ինքնապաշտպանության իրավունքը։

09:27 - 26 հոկտեմբերի, 2023

Գազայի հատվածում Իսրայելի հարվածների հետևանքով զոհերի թիվը գերազանցել է 6500-ը. Պաղեստինի ԱՆ |armenpress.am|

armenpress.am: Գազայի հատվածում Իսրայելի ավիահարվածների հետևանքով զոհված պաղեստինցիների թիվը հասել է 6546-ի: Ինչպես հաղորդում է IRNA գործակալությունը, այս մասին հայտնել է Գազայի առողջապահության նախարարությունը: Նախարարությունը նշել է, որ 6546 զոհերից 2704-ը երեխաներ են, հավելելով, որ ափամերձ անկլավում վիրավորվել է 17439 պաղեստինցի:

22:36 - 25 հոկտեմբերի, 2023

Էմանուել Մակրոնը կայցելի Իսրայել |hetq.am|

hetq.am: Ֆրանսիայի նախագահ Էմանուել Մակրոնը երեքշաբթի օրը՝ հոկտեմբերի 24-ին, պլանավորում է այցելել Իսրայել։ Այդ մասին հայտնում է The Times of Israel-ը։ Այցի ծրագիրը ենթադրում է Իսրայելի վարչապետ Բենյամին Նեթանյահուի հետ հանդիպում: Առաջիկա ուղևորության մասին այլ մանրամասներ չեն հաղորդվում: Ինքը՝ Մակրոնը, դեռ հոկտեմբերի 20-ին լրագրողներին հայտարարել էր, որ տարածաշրջան կայցելի «առաջիկա օրերին կամ շաբաթներին», սակայն միայն այն դեպքում, եթե այդ այցը «թույլ տա օգտակար արդյունքների հասնել»։ Կիրակի երեկոյան Ֆրանսիայում Պաղեստինի դեսպան Հալա Աբու Հասիրան LCI հեռուստաալիքի եթերում հույս է հայտնել, որ այդ ուղևորության ընթացքում Ֆրանսիայի առաջնորդը «խաղաղության, լարվածության թուլացման և կրակի լիարժեք դադարեցման կոչ կտարածի»՝ Գազայի հատվածի խաղաղ բնակիչների շրջանում նոր զոհերից խուսափելու համար: «Ես կցանկանայի, որ նա այցելեր և՛ Պաղեստին, և՛ Իսրայել», - հայտարարել է պաղեստինցի դեսպանը՝ մանրամասնելով, որ խոսքը Հորդանան գետի արևմտյան ափին գտնվող տարածքների մասին է: Դեսպանը հավելել է, որ ակնկալում է Մակրոնի հանդիպումը Պաղեստինի նախագահ Մահմուդ Աբբասի հետ: Ավելի վաղ Նեթանյահուն հեռախոսազրույցներ էր ունեցել Մակրոնի և Նիդերլանդների վարչապետ Մարկ Ռյուտեի հետ: Հեռախոսազրույցներից հետո նա հայտարարել էր այդ առաջնորդների՝ հոկտեմբերի 23-ին և 24-ին Իսրայել կատարվելիք այցերի մասին։

11:31 - 23 հոկտեմբերի, 2023

Իսրայելը անխուսափելի է համարում Գազայի հատվածում ցամաքային հարձակումը, եթե «Համաս»-ը վայր չդնի զենքերը |hetq.am|

hetq.am: Գազայի հատվածում Իսրայելի զինված ուժերի ցամաքային գործողությունը գրեթե անխուսափելի է, եթե պաղեստինյան «Համաս» շարժման գրոհայինները ազատ չարձակեն բոլոր պատանդներին և վայր չդնեն զենքերը: Նման հայտարարությամբ ավստրալական ABC ռադիոկայանի եթերում հանդես է եկելԻսրայելի պաշտպանության բանակի ներկայացուցիչ Ջոնաթան Կոնրիկուսը։ Նրա խոսքով՝ Գազայում իսրայելցի զինվորականների ցամաքային գործողությունը «գրեթե անխուսափելի է, եթե պահպանվի իրերի առկա վիճակը»: «Մեր նպատակն է «Համաս»-ին ամբողջությամբ զրկել ռազմական ներուժից։ Եթե ՀԱՄԱՍ-ի զինյալները դուրս գային իրենց թաքստոցներից,<...> վերադարձնեին մեր պատանդներին, բոլոր 212-ին, և անվերապահորեն հանձնվեին, ապա պատերազմը կավարտվեր, բայց նրանք դա չեն անի»,- ասել է նա՝ նշելով, որ Իսրայելի բանակը «ստիպված կլինի Գազայում ցամաքային գործողություն իրականացնել»։ Ավելի վաղ ամերիկյան CNN հեռուստաալիքը հայտնել էր, որ Վաշինգտոնը ճնշում է գործադրել Իսրայելի վրա՝ կոչ անելով հետաձգել Գազայում ցամաքային գործողության մեկնարկը և ազատ արձակել անկլավում պահվող պատանդներին: Սակայն ԱՄՆ պետքարտուղար Էնթոնի Բլինքենը NBC հեռուստաալիքի եթերում հայտարարել էր, որ Իսրայելը պետք է ինքնուրույն որոշում կայացնի ցամաքային գործողություն մեկնարկի մասին, իսկ Վաշինգտոնը կարող է միայն խորհուրդ տալ:

10:50 - 23 հոկտեմբերի, 2023

Իսրայելի բանակի տանկը պատահաբար կրակել է սահմանին հարող եգիպտական դիրքին

Իսրայելի պաշտպանության բանակի տանկը պատահաբար կրակել և հարվածել է սահմանին հարող եգիպտական դիրքին՝ Քերեմ Շալոմի շրջանում։ Այս մասին հայտնել են Իսրայելի ՊՆ-ից։ Միջադեպը հետաքննվում է, մանրամասները ճշտվում են։ Իսրայելի պաշտպանության բանակը ցավում է տեղի ունեցածի կապակցությամբ։ Ինչպես փոխանցում է Reuters-ը, եգիպտական բանակի ներկայացուցիչը հայտնել է, որ Եգիպտոսի մի քանի սահմանապահներ կիրակի օրը թեթև վնասվածքներ են ստացել արկի բեկորներից։

21:14 - 22 հոկտեմբերի, 2023

Իսրայելը հարվածներ է հասցրել Հալեպի և Դամասկոսի միջազգային օդանավակայաններին |1lurer.am|

1lurer.am: Իսրայելը հարվածներ է հասցրել Հալեպի և Դամասկոսի միջազգային օդանավակայաններին, հայտնում է սիրիական պետական գործակալությունը՝ SANA-ն։ Ինչպես հաղորդում է գործակալությունը, հրթիռային հարվածները հասցվել են տեղի ժամանակով 05:25-ին։ Նշվում է, որ Իսրայելը միաժամանակ է իրականացրել օդային հարձակումները Միջերկրական ծովի (Լաթաքիայի մոտակայքից) և սիրիական Գոլանի բարձունքների կողմից՝ հարվածներ հասցնելով Դամասկոսի և Հալեպի օդանավակայաններին: Դրանց հետևանքով օդանավակայանների թռիչքուղիները վնասվել են: Հաղորդվում է նաև մեկ աշխատակցի զոհվելու մասին:

12:56 - 22 հոկտեմբերի, 2023

Գուտերիշը կոչ է արել քայլեր ձեռնարկել Իսրայելում հակամարտությունը դադարեցնելու համար |shantnews.am|

shantnews.am: ՄԱԿ-ի գլխավոր քարտուղար Անտոնիո Գուտերիշը Կահիրեում Պաղեստինի խնդրին նվիրված գագաթնաժողովի ժամանակ կոչ է արել «գործողություններ ձեռնարկել՝ վերջ դնելու մղձավանջին», որը առաջացել է պաղեստինա-իսրայելական հակամարտության սրումից: «Եկել է գործելու ժամանակը, որպեսզի վերջ դրվի այս սարսափելի մղձավանջին»,- ասել է Գուտերիշը: ՄԱԿ-ի գլխավոր քարտուղարը կոչ է արել նաև անհապաղ դադարեցնել կրակը Գազայի հատվածում և ազատ արձակել պատանդներին։

15:28 - 21 հոկտեմբերի, 2023