ՊՆ-ն օրենքի փոփոխություն է առաջարկում, որով ԳՇ պետը կհամարվի պաշտպանության նախարարի առաջին տեղակալ
Պաշտպանության նախարարությունը հանրային քննարկման է ներկայացրել նախագիծ, որով, ի թիվս այլ կարգավորումների, Զինված ուժերի գլխավոր շտաբի պետը կհամարվի Պաշտպանության նախարարի առաջին տեղակալ։
Որոշման նախագծի հիմնավորման համաձայն՝ նախատեսվում է նոր խմբագրությամբ շարադրել պաշտպանության ոլորտում Կառավարության լիազորությունները, դրանցում առանձին սահմանել իրավասությունները, ավելացնել ՀՀ անվտանգության խորհրդի կողմից ընդունվող ակտերի շրջանակը, պաշտպանության և ՀՀ զինված ուժերի, այլ զորքերի, տնտեսության գործունեությունը, զորահավաքային նախապատրաստության և զորահավաքի բնագավառը կարգավորող մի շարք հիմնարար պլաններ և ծրագրեր ներառելով մեկ ընդհանուր՝ ՀՀ պաշտպանության պլանում։
Բացի դրանից՝ խմբագրվում և հստակեցվում են վարչապետի, պաշտպանության նախարարության, Զինված ուժերի գլխավոր շտաբի, պաշտպանության նախարարի ու ԶՈՒ գլխավոր շտաբի պետի լիազորությունների շրջանակը, Զինված ուժերի գլխավոր շտաբի պետի պաշտոնը նախատեսվում է որպես ՀՀ պաշտպանության նախարարի առաջին տեղակալ, ինչպես նաև հիմքեր են ստեղծվում ՀՀ պաշտպանության նախարարի այլ տեղակալների պաշտոններն ըստ անհրաժեշտության ևս զինվորական պաշտոններ նախատեսելու ուղղությամբ։
11:59 - 23 փետրվարի, 2022