Բարձրագույն դատական խորհուրդն այսօր որոշեց կարգապահական պատասխանատվության ենթարկել Վերաքննիչ քաղաքացիական դատարանի դատավոր Աստղիկ Խառատյանին, Վճռաբեկ դատարանի քաղաքացիական պալատի դատավորներ Արտակ Բարսեղյանին եւ Տիգրան Պետրոսյանին՝ դադարեցնելով նրանց լիազորությունները։

Միաժամանակ ԲԴԽ-ն որոշեց կարճել Սնանկության դատարանի դատավոր Սամվել Թադեւոսյանի վերաբերյալ վարույթը` հաշվի առնելով, որ վերջինս նախքան վարույթի ավարտը հրաժարականի դիմում է ներկայացրել։

Վարույթի հիմքում, հիշեցնենք, 14 տարի առաջ կայացված մի վճիռ է: ՄԻԵԴ-ը 4 տարի առաջ՝ 2019-ին, այս գործով արձանագրել է Հայաստանի կողմից դատարանի մատչելության իրավունքի խախտման փաստը: 

Մասնավորապես, «Շոլց ԱԳ» ընկերությունը դիմել է ՄԻԵԴ՝ նշելով, որ զրկվել է դատարանի մատչելիության իրավունքից, քանի որ սովորական դատարանները եւ Արբիտրաժային տրիբունալը հրաժարվել են քննել իր հայցերը։ ՄԻԵԴ-ն արձանագրել է դիմումատուի իրավունքների խախտումը՝ նշելով, որ դիմումատու ընկերությունը փորձել է իր հայցը ներկայացնել երեք տարբեր դատարաններ կամ տրիբունալներ, եւ դրանցից ոչ մեկը գործը չի ընդունել քննության, եւ դիմումատու ընկերությունը ՍՊԸ-ի դեմ ներկայացված իր քաղաքացիական հայցի մասով ամբողջությամբ զրկվել է ցանկացած դատարանի կամ տրիբունալի մատչելիությունից։ 

Ընդ որում, ՄԻԵԴ-ն արձանագրել է, որ դիմումատու ընկերության հայցը ընդատյա է եղել քաղաքացիական դատարանին։

Միլենա Խաչիկյան