armtimes.com: Արտաքին գործերի նախարարությունը կապ է հաստատել թուրքական ավիաընկերության հետ եւ հավաստիացել, որ այս պահի դրությամբ Ստամբուլի օդանավակայանում ՀՀ քաղաքացիներ չկան: Այս մասին ասաց ՀՀ ԱԳՆ մամուլի խոսնակ Աննա Նաղդալյանը՝ անդրադառնալով հարցին, թե ինչ քայլեր է ձեռնարկում ԱԳՆ-ն Թուրքիայում մնացած ՀՀ քաղաքացիներին օգնելու համար:
Թուրքական «Atlas Global» ավիաընկերությունը հայտարարություն էր տարածել նոյեմբերի 26-ից դեկտեմբերի 21-ը չվերթները դադարեցնելու մասին: Պատճառը ֆինանսական խնդիրներն են:
«Մեզ ասացին նաեւ, որ որոշ քաղաքացիներ համաձայնել են Երեւան վերադառնալ դեկտեմբերի 21-ից սկսած, այսինքն՝ երբ վերականգնվի Ստամբուլ-Երեւան չվերթը»,- ասաց Նաղդալյանը:
Նաղդալյանի խոսքով՝ ՀՀ արտաքին գերատեսչությանը, հյուպատոսական ներկայացուցչությանը ՀՀ քաղաքացիներ չեն դիմել՝ որեւէ օժանդակության ակնկալիքով: Նաղդալյանը հորդորեց ԶԼՄ-ներին դիմել ԱԳՆ-ին, եթե նման խնդրով քաղաքացիներ դիմեն իրենց:
Atlas Global ավիաընկերության կողմից բոլոր թռիչքները չեղարկելուց հետո մամուլում տեղեկություններ շրջանառվեցին, որ Ստամբուլ-Երևան չվերթի մոտ 150 ուղևորներ, որոնք պետք է նոյեմբերի 26–ի լույս 27–ի գիշերը մեկնեին հայրենիք, մնացել են Թուրքիայում:
comment.count (0)